|
འདི་སྐད་དུ། གསལ་རྒྱལ་གྱིས་ཞུས་པའི་མདོ་ལས། སུ་དག་བདེ་བར་གཤེགས་པའི་མཆོད་རྟེན་ལ། །མཆོད་པའི་ཁྱད་པར་ཅི་འདོད་ཅི་འབྱོར་བ།།མཚན་པར་འབུལ་བྱེད་དེ་དག་དྲི་མེད་ཅིང༌། མྱ་ངན་མེད་པའི་བླ་མེད་བྱང་ཆུབ་འཐོབ། །ཞེས་དང༌། ཡང༌། མི་རྣམས་གང་དག་སངས་རྒྱས་མཆོད་རྟེན་ནམ། །སྐུ་གཟུགས་དག་ལ་མགོས་གཏུགས་ཕྱག་འཚལ་བ། །དེ་དག་ལྷ་རྣམས་དང་ནི་མི་རྣམས་ཀྱི། ། ཆེར་ཡང་ཆེ་བར་བཀུར་བའི་གནས་སུ་འགྱུར། །ཞེས་དང༌། འཕགས་པ་སྤྱན་རས་གཟིགས་ཀྱི་མདོ་ལས། འཇིག་རྟེན་མགོན་གྱི་མཆོད་རྟེན་ལ།། མི་གང་བསྐོར་བ་བྱེད་པ་ཡི། །བསྔགས་པ་བསྐལ་པ་བྱེ་བར་ཡང༌། ། བརྗོད་པས་ཟད་པར་བྱེད་མི་ནུས། །ཞེས་སོགས་རྒྱལ་བའི་མཆོད་རྟེན་ལ་ཕྱག་མཆོད་བསྐོར་བ་སོགས་བྱས་པས་མངོན་མཐོ་དང་ངེས་ལེགས་ཀྱི་འབྲས་བུ་མཆོག་ཏུ་གྱུར་པ་འཐོབ་པའི་ཕན་ཡོན་དཔག་ཏུ་མེད་པ་གསུངས་ཤིང༌།
གཞན་ཡང་མདོ་རྒྱུད་རྣམས་ལས། སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་མཚན་ནས་བརྗོད་པ་དང༌། གཟུངས་སྔགས་ཟབ་མོ་བཟླས་བཞིན་དུ་རིང་བསྲེལ་གྱི་སྙིང་པོ་ཅན་གྱི་མཆོད་རྟེན་ལ་ཕྱག་མཆོད་བསྐོར་བ་བྱས་ན་མཚམས་མེད་པ་ལ་སོགས་པའི་ལས་སྒྲིབ་ཆེན་པོ་ཡང་མྱུར་དུ་བྱང་བ་དང༌།ཚེ་དང་བསོད་ནམས་དང་གཟི་བརྗིད་ཕུན་སུམ་ཚོགས་པ་དང༌། ནམ་ཡང་ངན་སོང་དུ་མི་ལྟུང་བ་དང༌།འཆི་བའི་དུས་སུ་བཅོམ་ལྡན་འདས་ཀྱི་ཞལ་མཐོང་བ་དང༌། དག་པའི་ཞིང་དུ་སྐྱེ་བ་སོགས་ཕན་ཡོན་མཐའ་ཡས་པ་གསུངས་པ་རྣམས་ལ་ཡིད་ཆེས་ཀྱི་དད་པ་ཤུགས་དྲག་པོའི་སྒོ་ནས་སྐལ་པ་དང་ལྡན་པ་རྣམས་ཀྱིས་ཕྱག་མཆོད་བསྙེན་བཀུར་སོགས་ལ་འབད་པ་ཆེན་པོས་རང་གཞན་གྱི་གནས་སྐབས་དང་མཐར་ཐུག་གི་དོན་རྒྱ་ཆེན་པོ་བསྒྲུབ་པར་མཛད་འཚལ་ལོ། །དེ་ལྟར་འབད་ལས་དགེ་བ་གང་ཐོབ་པ། །རྒྱལ་བསྟན་དྲི་མེད་ཕྱོགས་བཅུར་རྒྱས་པ་དང༌། །འགྲོ་ཀུན་ཡང་དག་ལམ་ལ་ཞུགས་གྱུར་ཏེ། །མྱུར་དུ་བྱང་ཆུབ་ཆེན་པོ་ཐོབ་ཕྱིར་བསྔོ།།ཅེས་རྒྱལ་ཁབ་ཆེན་པོའི་ཕོ་བྲང་ཕྱི་མའི་ནུབ་སྒོའི་ནང་ལོགས་སུ་བཞུགས་པའི་མཆོད་རྟེན་ཆེན་པོ་འཛམ་གླིང་རྒྱན་གཅིག་གི་དཀར་ཆག་དད་པ་རྒྱས་བྱེད་ཅེས་བྱ་བ་འདི་ནི། མཆོད་རྟེན་དཀར་པོའི་ཏཱ་བླ་མའི་ལས་དོན་བྱེད་ཅིང་རང་གི་གམ་དུ་ཉེ་རང་གནས་པའི་བསླབ་གསུམ་ལྡན་པའི་དགེ་སློང་ཨ་ཆི་ཐུ་ཆོས་རྗེ་བསྟན་པ་རིན་ཆེན་གྱིས་ཡང་ཡང་བསྐུལ་བའི་ངོར། རྒྱ་ནག་གི་ཡིག་ཚང་ལས་འབྱུང་བའི་ལོ་རྒྱུས་རྙིང་པ་རྣམས་ལ་ཞིབ་ཏུ་བལྟས་ཏེ་རང་གཞན་གྱི་དད་པའི་གསོས་སུ་མང་དུ་ཐོས་པའི་རྒྱལ་ཁམས་པ་༧ཏཱཀྭཽ་ཤི་ལྕང་སྐྱ་རོལ་བའི་རྡོ་རྗེས་སྦྱར་བའི་ཡི་གེ་པ་ནི་ཆོས་ཚུལ་དུ་མ་ལ་རྣམ་དཔྱོད་ཡངས་པའི་ཨུ་ཅུ་མུ་ཆེན་གུ་ཤི་དགེ་སློང་ངག་དབང་བསྟན་འཕེལ་གྱིས་བགྱིས་པ་འདིས་ཀྱང་བསྟན་པ་དང་འགྲོ་བ་ལ་ཕན་ཐོགས་པར་གྱུར་ཅིག ། 3/3 མདུན་ངོས། 上一页 1 2 3 |
