ད་སྔ་གཟིགས་བཞིན་པ།  མདུན་ངོས། > སྲོལ་རྒྱུན་སློབ་གསོ། > ནང་བའི་གྲུབ་མཐའ།
༄༅། །གྲུབ་མཐའི་རྣམ་བཞག་ཐུབ་བསྟན་ལྷུན་པོའི་མཛེས་རྒྱན་ལས་དག་ཡིག་མཁས་པའི་འབྱུང་གནས་ཞེས་བྱ་བ་ལས་ཕར་ཕྱིན་
སྤེལ་དུས།05-18  ཡོང་ཁུངས། ཀྲུང་གོའི་བོད་ཀྱི་སློབ་གསོ་དྲ་བ།  རྩོམ་པ་པོ། ལྕང་སྐྱ་རོལ་བའི་རྡོ་རྗེ།

       ༀ་བདེ་ལེགས་སུ་གྱུར་ཅིག དཔལ་ལྡན་རྒྱ་ཆེན་ཚོགས་གཉིས་གསེར་གྱི་རྡུལ་བརྩེགས་མཚར་སྡུག་ལྷུན་པོ་མཐའ་ཡས་ཡོན་ཏན་ཉི་འབུམ་འོད་ཀྱིས་འཁྱུད། ། བདུད་སྡེའི་མཚོན་གྱིས་ནམ་ཡང་མི་ཕིག་བླ་གོས་ཐུན་མཚམས་རྩེ་་དགའ་ལ་འགྲོགས་མེས་པོའི་དཔལ་ཡང་མོག་པོར་བགྱིད། ། རྟེན་འབྲེལ་ཟབ་མོའི་གཏམ་གྱི་འོད་ཞགས་རིང་པོར་རྐྱོང་བས་ལོག་སྨྲ་ཀུན་དང་སྲིད་ཞིའི་རྒུད་མུན་ལྷན་ཅིག་གཞོམ། ། སྲིད་གསུམ་དྲེགས་ལྡན་རལ་རྩེར་ཞབས་སེན་དངར་བའི་ཐུབ་དབང་གང་དེས་དེང་འདིར་དགེ་ལེགས་འཛུམ་རླབས་འཁྱིལ་བར་མཛོད། ། གང་གི་མཁྱེན་པའི་ཕ་མཐའ་ཀུན་གཟིགས་ཚད་མའི་སྲང་ལ་བཏེགས་ཀྱང་མཐའ་ཡས་བསྐལ་པར་གཞལ་དུ་མ་སྤྱོད་པས། ། རྒྱལ་བ་ཀུན་བགྲོས་རང་གི་རྗེ་བོར་བཀུར་ཀྱང་འགྲོ་སླད་རྒྱལ་སྲས་ཚུལ་གྱིས་རྣམ་རོལ་མཁྱེན་པའི་གཏེར་ཆེན་དང་། །གང་གི་མཚན་ཙམ་དྲན་པའི་སྙིང་ལ་སྐད་ཅིག་ཉིད་དུ་རབ་དཀར་ངང་མོ་འོ་མའི་རྒྱ་མཚོར་ཆས་པ་བཞིན། ། ཐུགས་རྗེའི་འོད་དཀར་འགྱེད་པས་དགེ་ལེགས་སྤོབས་པ་མཆོག་རྩོལ་སྒྲ་དབྱངས་ལྷ་མོས་འགྲོ་ཀུན་རང་གི་ཟླར་བསྐྲུན་ཅིག ། གཞན་ཆེད་འཁོར་བའི་འབྲོག་དགོན་པད་ཚལ་ལྟར་དགོངས་རང་དོན་ཞི་བདེའི་དབྱིངས་ཀྱང་མི་སྤྱོད་རྒྱལ་སྲས་སེམས་དཔའི་ཚོགས། ། ཐུབ་བསྟན་མི་ནུབ་འཛིན་སྤེལ་གཏད་རབས་བདུན་དང་ཤིང་རྟ་ཆེ་གཉིས་འཕགས་བོད་པཎ་གྲུབ་རྣམ་དག་གསེར་རིའི་ཕྲེང་། ། དཔལ་ལྡན་ཐུབ་པ་ཀུན་གྱི་ཡོན་ཏན་མཛེས་སྡུག་གཅིག་བསྡུས་འཇམ་དཔལ་སྙིང་པོ་སྲས་བཅས་དབྱིག་ལྡན་དཔལ་ཡོན་ཆེ། ། རྣམ་མང་དྲིན་གྱིས་རབ་ལྕི་དངོས་བརྒྱུད་ཡོངས་འཛིན་མཐའ་དག་འདིར་ནི་འགྲོ་འདིའི་གདུང་སེལ་དགེ་ལེགས་བྱེ་བའི་ཆར་རྒྱུན་ཕོབས། ། བརྟན་པའི་འཁོར་ལོས་སྲིད་ཞིའི་དཔལ་གྱིས་འཇིག་རྟེན་འདི་ཉིད་མཆོག་ཏུ་མཛེས་པར་བསྒྲུབ་པའི་ཆེད། །དཔུང་བཞིའི་སྟོབས་ཀྱི་གོམ་པ་རྒྱལ་ཕྲན་བྱེ་བའི་ཐོར་ཅོག་རྩེ་མོར་འགོད་པས་རྣམ་སྒེག་ཅིང་། ། མཆོག་གསུམ་གཙུག་བསྟེན་དགེ་བཅུའི་ལུགས་བཟང་རྩི་བས་སྟོང་རབ་མཛེས་བཀའ་ཁྲིམས་གསེར་གྱི་འཁོར་ལོ་ཆེས། ། གླིང་འདིར་དབང་བསྒྱུར་མི་རྗེའི་ཚུལ་འཛིན་གང་གི་ཆབ་སྲིད་བསྔགས་འོས་གཤིས་སུ་བརྟན་གྱུར་ཅིག ། སྨྲ་བའི་ཉི་མ་ཐུབ་པའི་དབང་བོ་ཡིས། ། སྐྱེ་དགུའི་དོན་གཉིས་བདེ་བླག་བསྒྲུབ་པའི་སླད། ། བཀའ་སྩལ་ཟབ་རྒྱས་ཆོས་ཕུང་དགོངས་འགྲེལ་བཅས། ། ལྷར་བཅས་འགྲོ་བའི་མཆོད་གནས་དམ་པ་རུ། ། ཇི་སྲིད་ཀུན་གསལ་མཛེས་མའི་ལང་ཚོ་ཡིས། ། རང་གི་རང་བཞིན་མ་དོར་དེ་སྲིད་དུ། ། དྲི་མས་མ་བསླད་གནས་དང་འཕེལ་བ་ཡིས། ། ཕུན་ཚོགས་སྲིད་ཞིའི་འདོད་པ་འཇོ་བའི་ཆེད། ། གསུང་རབ་ཀུན་ལ་མཁོ་བའི་མིང་ཚིག་དང་། ། སོ་སོའི་བརྡ་སྐད་རྣམ་བཞག་མ་ལུས་པོ། ། ཆེན་པོ་ཧོར་གྱི་སྐད་དུ་བསྒྱུར་བའི་ཚུལ། ། དཔྱད་གསུམ་དག་པས་འདིར་ནི་དགོད་པར་བྱ། ། མ་སྦྱངས་རང་འདོད་ཕྱོགས་ཞེན་གཟུ་ལུམས་ཀྱིས། ། གང་དྲན་མ་དག་ཐ་སྙད་མང་སྦྱར་བས། ཐུབ་བསྟན་དྲི་མས་སློད་ལ་ཆེས་རིངས་པའི། ། བསྒྱུར་བྱེད་གཟུགས་བརྙན་དེ་དག་ངལ་གསོས་ཤིག ། ཤྰཀྱའི་རིང་ལུགས་སྙིང་ལ་ལེགས་བཅངས་ནས། ། གཞན་ཕན་བསྒྲུབ་ལ་བརྩོན་པའི་ཤེས་རབ་ལྡན། ། ཕྱོགས་ལྷུང་འཁྱོགས་པོའི་སྤྱོད་ཚུལ་རིང་དོར་བ། ། དེ་དག་དགའ་བའི་འཛུམ་ནི་ད་སྟོན་ཅིག །

        དེ་ལ་འདིར་ལྷ་དང་བཅས་པའི་འགྲོ་བ་ཐམས་ཅད་ཀྱི་འདྲེན་པ་དམ་པ་བསོད་ནམས་དང་ཡེ་ཤེས་ཀྱི་ཚོགས་རླབས་པོ་ཆེས་བགྲང་ལས་འདས་པའི་བསྐལ་པར་བསྒྲུན་པའི་གཟི་བརྗིད་ཕུན་སུམ་ཚོགས་པའི་དཔལ་གྱིས་ཚངས་པ་དང་ཁྱབ་འཇུག་དང་དབང་བོ་ལ་སོགས་པ་སྲིད་ན་ཤིན་ཏུ་ཆེ་བའི་དྲེགས་ལྡན་མ་ལུས་པའི་རལ་པའི་ཐོར་ཅོག་ལ་ཞབས་སེན་གྱི་པདྨོ་རྣམ་པར་དགོད་པ། ཆེས་གདུལ་བར་དཀའ་བའི་སྙིང་སྟོབས་ཀྱི་ཆ་ཤས་ཡོངས་སུ་རྫོགས་པའི་སྟོབས་བཅུ་མངའ་བ་སྟོང་གི་དབུས་ན་པད་དཀར་ལྟ་བུར་བསྔགས་པ། དབང་བཅུ་དང་སྟོབས་བཅུ་དང་མི་འཇིགས་པ་བཞིའི་ཕ་རོལ་དུ་སོན་པས་རྣམ་པར་གྲོལ་བ་དོན་དུ་གཉེར་བའི་སྐྱེས་བུ་རྣམས་ལ་གཅིག་ཏུ་མི་བསླུ་བའི་བདེན་པ་བཞི་དང་རྟེན་ཅིང་འབྲེལ་བར་འབྱུང་བའི་གཏམ་གྱི་སེང་གེའི་ང་རོ་འཇིག་རྟེན་དུ་ཡང་དག་པར་སྒྲོགས་པར་མཛད་པ། ཆོས་ཀྱི་རྒྱལ་པོ་སངས་རྒྱས་བཅོམ་ལྡན་འདས་དཔལ་རྒྱལ་བ་ཤྰཀྱ་ཐུབ་པ་ཞེས་སྙན་པའི་གྲགས་པས་འཇིག་རྟེན་གསུམ་རྣམ་པར་འགེངས་པ་དེ་ཉིད་ཀྱིས། བདག་ཅག་ཁོ་ནའི་ཕྱིར་དུ་བྱང་ཆུབ་མཆོག་ཏུ་ཐུགས་བསྐྱེད། བསྐལ་པ་གྲངས་མེད་པ་གསུམ་དུ་བྱ་དཀའ་བའི་རླབས་པོ་ཆེའི་བསོད་ནམས་དང་ཡེ་ཤེས་ཀྱི་ཚོགས་བསགས་ནས་འོག་མིན་སྟུག་པོ་བཀོད་པའི་ཞིང་ཁམས་སུ་བླ་ན་མེད་པའི་ཡེ་ཤེས་ཀྱི་བདུད་རྩིའི་གོ་འཕང་མཆོག་དམ་པ་བརྙེས་ཏེ་ལོངས་སྤྱོད་རྫོགས་པའི་སྐུ་མངོན་དུ་མཛད། སྐད་ཅིག་དེ་ཉིད་ལ་བྱེ་བ་ཕྲག་བརྒྱའི་འཇིག་རྟེན་གྱི་ཁམས་སུ་སྤྲུལ་བའི་སྐུའི་རྣམ་པར་རོལ་པས་དགའ་ལྡན་གྱི་གནས་ནས་འཕོ་བ་ལ་སོགས་པའི་མཛད་པ་བཅུ་གཉིས་རྣམ་པ་དུ་མར་གཅིག་ཆར་དུ་སྟོན་པར་མཛད་པ་ལས། འཛམ་བུ་བྲིཀྵའི་ལྗོན་པས་མཚོན་པའི་གླིང་འདི་ཉིད་དུ་ནི་རྒྱ་གར་འཕགས་པའི་ཡུལ་དུ་རྒྱལ་པོ་ཟས་གཙང་མ་ཞེས་བྱ་བའི་སྲས་སུ་ཉེ་བར་བལྟམས། རྒྱལ་སྲིད་ཀྱི་ཕུན་ཚོགས་ཀྱང་སྙིང་མེད་པར་གཟིགས་ནས་ཁྱིམ་ནས་མངོན་པར་བྱུང་སྟེ་ངེས་པར་འབྱུང་བའི་སྤྱོད་པས་དཀའ་བ་སྤྱད་དེ། ས་གའི་ཉ་ལ་བབས་པ་ན་རྡོ་རྗེའི་གདན་དུ་བྱང་ཆུབ་ཀྱི་ཤིང་གི་དྲུང་དུ་གཤེགས་ཏེ་སྲོད་ལ་བདུད་དམག་བྱེ་བ་དུང་ཕྱུར་དུ་མ་བྱམས་པའི་ཏིང་ངེ་འཛིན་གྱིས་ཚར་བཅད། ཐོ་རངས་མངོན་པར་རྫོགས་པར་སངས་རྒྱས་པའི་ཚུལ་བསྟན། མི་མཇེད་ཀྱི་བདག་པོ་ཚངས་པས་རྩིབས་སྟོང་དང་ལྡན་པའི་གསེར་གྱི་འཁོར་ལོ་ཕུལ་ནས་ཆོས་འཁོར་བསྐོར་བར་བསྐུལ་བས་སེམས་ཅན་ཐམས་ཅད་ལ་རྒྱུ་མེད་པར་གཅིག་ཏུ་མཉེས་གཤིན་པའི་སྒོ་ནས། འཇིག་རྟེན་ན་མགོན་དང་སྐྱབས་མ་མཆིས་ཤིང་། མ་རིག་པ་འཐུག་པོས་བློ་མིག་རབ་ཏུ་གཡོགས་པ་སྲིད་པའི་ཆུ་བོ་ཆེན་པོས་སྡུག་བསྔལ་གྱི་རྒྱ་མཚོ་གཏིང་མཐའ་མེད་པར་ཁྱེར་བ་རྣམས། ཉིད་ཀྱིས་བརྙེས་པའི་བདུད་རྩིའི་རོ་ཕུལ་དུ་བྱུང་བས་ཚིམ་པར་མཛད་དགོངས་ནས། གདུལ་བྱ་རྣམས་ཀྱི་ཁམས་དང་བསམ་པ་དང་བག་ལ་ཉལ་དང་མཐུན་པར་ཆོས་ཀྱི་འཁོར་ལོ་རིམ་པ་གསུམ་དུ་བསྐོར་ནས་ཆོས་ཕུང་བརྒྱད་ཁྲི་བཞི་སྟོང་སྙེད་དུ་འདོམས་པར་མཛད་དེ། ཐེག་པ་གསུམ་གྱི་རིགས་ཅན་མཐའ་ཡས་པའི་རྨོངས་པའི་མུན་པ་སེལ་པར་བྱེད་པའི་ཆོས་ཀྱི་སྒྲོན་མེས་འཇིག་རྟེན་ཐམས་ཅད་ལ་ཐར་བ་དང་ཐམས་ཅད་མཁྱེན་པའི་ལམ་སྣང་བར་མཛད་དོ། ། དེ་ནས་སྐུ་དངོས་ཀྱི་གདུལ་བྱ་རྣམས་སྨིན་ཅིང་གྲོལ་བར་མཛད་ཟིན་པ་ན་གདུལ་བྱ་རྟག་འཛིན་ཅན་རྣམས་ཆོས་ལ་བསྐུལ་བའི་ཕྱིར་དུ། འོད་སྲུང་ཆེན་པོ་ལ་བསྟན་པ་གཏད་དེ་མྱ་ངན་ལས་འདའ་བའི་ཚུལ་བསྟན་ཏོ། །
       དེ་ནས་ཀུན་དགའ་བོ་དང་། ཉེ་བར་འཁོར་དང་། འོད་སྲུང་ཆེན་པོ་རྣམས་ཀྱིས། བཀའ་ཐམས་ཅད་མདོ་སྡེ་དང་། འདུལ་བ་དང་། མངོན་པའི་སྡེ་སྣོད་གསུམ་དུ་བསྡུས་སོ། ། ཐེག་པ་ཆེན་པོའི་སྡེ་སྣོད་ནི། རྒྱལ་སྲས་ཀུན་ཏུ་བཟང་པོ་དང་། བྱམས་པ་དང་། འཇམ་དབྱངས་ལ་སོགས་པས་བསྡུས་ཤིང་། གསང་སྔགས་ནི་གསང་བའི་བདག་པོས་བསྡུས་པར་གྲགས་སོ། །བསྟན་པ་ནི་འོད་སྲུང་ཆེན་པོས་ཀུན་དགའ་བོ་སོགས་ལ་རིམ་པར་གཏད་དེ་ཐུབ་པ་ཉི་མའི་གཉེན་གྱི་བསྟན་པ་འཇིག་རྟེན་གྱི་མིག་ཏུ་གྱུར་པ་འདི་ཉིད་མི་ནུབ་པའི་རྒྱལ་མཚན་དུ་བྱས་ཤིང་། ཐེག་པ་ཆེན་པོའི་གསུང་རབ་ཕལ་མོ་ཆེ་ཞིག་ནི་ལྷ་དང་ཀླུའི་ཡུལ་དུ་སྤྱན་དྲངས་ཤིང་དར་བར་གྱུར་པ་ལས། ཕྱིས་སུ་བཅོམ་ལྡན་འདས་ཉིད་ཀྱིས་ལུང་བསྟན་པའི་ཤིང་རྟའི་སྲོལ་འབྱེད་ཆེན་པོ་འཕགས་པ་ན་ག་རྫུ་ནས་ཀླུའི་ཡུལ་ནས་ཡུམ་འབུམ་པ་ལ་སོགས་པ་སྤྱན་འདྲེན་པར་མཛད་ཅིང་། འཕགས་པ་ཐོགས་མེད་ཀྱིས་ལྷའི་ཡུལ་དུ་བྱོན་ནས་རྗེ་བཙུན་མི་ཕམ་པ་ལས་ཐེག་པོ་ཆེན་པོའི་ཆོས་མང་དུ་གསན་ཞིང་མི་ཡུལ་དུ་སྤྱན་དྲངས་ཏེ། དེ་གཉིས་ཀས་ཐེག་པ་ཆེན་པོའི་སྡེ་སྣོད་མང་དུ་བརྩམས། མ་རྟོགས་པ་དང་ལོག་པར་རྟོགས་པའི་དྲི་མ་རྣམས་རིགས་པའི་ཚུལ་རྣམ་པར་དག་པས་བསལ་ནས་ཟབ་པ་དང་རྒྱ་ཆེ་བའི་ལམ་བཟང་བོ་ཤིན་ཏུ་གསལ་བར་བྱས་སོ། །ཤིང་རྟའི་སྲོལ་ཆེན་པོ་འདི་དག་ལས་རིམ་པར་བརྒྱུད་དེ་ཐེག་པ་གསུམ་གྱི་སྡེ་སྣོད་རྣམས་བཤད་པ་དང་སྒྲུབ་པས་འཛིན་ཅིང་སྤེལ་བའི་པཎྚི་ཏ་དང་གྲུབ་པ་ཐོབ་པ་གནམ་གྱི་སྐར་མ་ལྟ་བུས་རྒྱ་གར་འཕགས་པའི་ཡུལ་དུ་གང་ཞིང་ཐུབ་པའི་བསྟན་པ་ཤིན་ཏུ་དར་བར་གྱུར་ཏོ།
རྒྱབ་སྐྱོར།
返回首页
གཙོ་ངོས།
པར་ལྡན་རྩོམ་ཡིག
ཉེ་ལམ་གསར་བརྗེས།
ཀློག་མཁན་མང་ཤོས།
 
Copyright © 2005 - 2018 Teducn.com
phone:18997245213 QQ:89457590
དྲ་ཚིགས་འདིའི་པར་དབང་ཡོད་ཚད་ཀྲུང་གོའི་བོད་ཀྱི་སློབ་གསོ་དྲ་བར་དབང་།
ཡིག་ཟམ། gangjian_xn@hotmail.com
འབྲེལ་གཏུགས་ཁ་པར། ༡༨༩༩༧༢༤༥༢༡༣青ICP备18000196号