|
དེ་ནས་བཟུང་སྟེ་ལོ་སྟོང་ཉིས་བརྒྱ་གྱ་ལྔའི་བར་དུ་རྒྱ་གར་ཡུལ་དུ་སྐྱེ་འགྲོ་རྣམས་ཀྱི་མཆོད་གནས་དམ་པར་བཞུགས། དེ་ནས་ཁིའུ་ཚིའི་ཞེས་བྱ་བ་ལི་ཡུལ་དུ་ལོ་དྲུག་ཅུ་རེ་བརྒྱད་བཞུགས། དེ་སྐབས་རྒྱ་ནག་གི་རྒྱལ་ས་ཐང་གུར་གྱི་བྱེ་བྲག་ཆེན་གུར་གྱིས་བཟུང་བའི་སྐབས་ཡིན་ལ་དེའི་ཞི་ཅུ་རྒྱལ་བོ་པུ་ཀྱན་གྱིས་དམག་དཔོན་ལུའི་ཀྭང་ཞེས་པ་རྒྱ་གར་གྱི་ཡུལ་དུ་མངགས། རྒྱ་གར་གྱི་ཡུལ་ཕྲན་འགའ་ཞིག་དབང་དུ་བསྡུས།ཇོ་བོའི་སྐུ་བརྙན་འདི་དང་སྟོན་པའི་རིརྫ་བསྲེལ་ཤཱ་རི་རི་ཆེ་བ།པཊྞི་ཏ་ཀུ་མ་ར་ཤྲྰི་རྣམས་གདན་དྲངས། ཕྱིར་ལོག་པའི་ལམ་དུ་པཊྞི་ཏས་མངོན་ཤེས་དང་གྲུབ་རྟགས་མང་པོ་བསྟན་པས་དམག་དཔོན་དད་པ་ཆེར་འཕེལ་རིམ་གྱིས་སི་ཆྭན་དུ་སླེབ་པ་ན་རྒྱལ་པོ་སྔ་མ་འདས། དུས་གཟིངས་ཆེན་པོ་བྱུང་བ་དང་ཐུག་པས་བརྗི་བའི་ལུང་བསྟན་པ་ལྟར་ལིའང་ཅེའུ་མཁར་དུ་རྟེན་རྣམས་གདན་དྲངས། དམག་དཔོན་འདིས་རྒྱ་ནག་གི་ཡུལ་གྲུ་དུ་མ་ཞིག་ལ་དབང་བསྒྱུར། དུས་ཕྱིས་ཡོ་ཆང་གི་བུ་ཡོ་ཁིང་རྒྱལ་པོས་ཇོ་པོའི་སྐུ་དང་འཕེལ་གདུང་པཎྚི་ཏ་རྣམས་ཆང་ཨན་མཁར་དུ་གདན་དྲངས། གཙུག་ལག་ཁང་གསར་དུ་བཞེངས་པ་དང་རྒྱལ་བའི་གསུང་རབ་མང་དུ་བསྒྱུར་བ། དགེ་འདུན་སྟོང་ཕྲག་ལོང་བའི་བཤད་སྒྲུབ་ཀྱི་སྡེ་ཡར་དུ་བཙུགས་པ་སོགསུབསྟན་པ་ལ་བསྙེན་བཀུར་རྒྱ་ཆེར་ཞུས། དེ་ལྟར་སྐུ་བརྙན་འདི་ཉིད་ཆེན་པོ་ཐང་ཨུར་སོགས་ཀྱི་དུས་སུ་སི་ཆྭན་དང་ཧྭའི་ནན་དང་ཀྱའང་ནན་སོགས་ཞིང་ས་དུ་མར་རྒྱལ་པོ་རྣམས་ཀྱིས་གདན་དྲངས་ཏེ་འགྲོ་བ་མཐའ་ཡས་པའི་བསོད་ནམས་གྱི་ཞིང་དུ་མཆོད་པར་བྱས། དེ་ནས་ཇུར་ཆིང་དའི་ཀྱིན་གྱི་དུས་སུ་ད་ལྟ་པེའི་ཀྱིང་དུ་གྲགས་པའི་ཕོ་བྲང་ཆེན་པོར་གདན་དྲངས།མིན་ཅུང་སྔི་ཞེས་བྱ་བའི་ལྷ་ཁང་དུ་བཞུགས་སུ་གསོལ་ཏེ་བསྙེན་བཀུར་དང་མཆོད་པ་རྒྱ་ཆེར་བྱས་ཤིང་དའི་ཀྱིན་གྱི་རྒྱལ་རབས་ཕྱི་མ་རྣམས་ཀྱིས་ཀྱང་ཕོ་བྲང་ནང་གི་ལྷ་ཁང་གཞན་དང་གཞན་དུ་གདན་དྲངས་ཏེ་མཆོད་པར་བྱས།
དེ་ནས་དའི་ཡྭོན་ཞེས་པ་ཆེན་པོ་ཧོར་གྱི་དུས་སུ་ཞྰེང་ཨན་སི་ཞེས་པའི་ལྷ་ཁང་དུ་མཆོད་ཅིང་ཁྱད་པར་སེ་ཆེན་རྒྱལ་པོའི་དུས་སུ་ད་ལྟའི་མཆོད་རྟེན་དཀར་པོ་བཞེངས་པའི་གནས་གཞི་འདིར་གཙུག་ལག་ཁང་ཆེན་པོ་གསར་དུ་བཞེངས་ཏེ་དགེ་འདུན་གྱི་སྡེ་བཙུགས་ཤིང་རྟེན་འདི་ཉིད་ལ་མཆོད་པ་བླ་ན་མེད་པ་བྱས། ཧོར་གྱི་རྒྱལ་རབས་ཕྱི་མ་རྣམས་དང༌། ཆེན་པོ་མིང་གི་དུས་སུ་ཡང་ཕོ་བྲང་འདི་གའི་ལྟ་ཁང་དག་ཏུ་བཞུགས་པ་ལས་འུ་ཅག་ཆེན་པོ་ཆིང་གི་དུས་བདེ་སྐྱིད་ཀྱི་ལོ་བཞི་བར་འཇམ་དབྱངས་གོང་མ་ཤེང་ཙི་ཆོས་ཀྱི་རྒྱལ་པོ་ཐུགས་རྗེ་ཅན་གྱིས་གསེར་མཁར་གྱི་ནང་ཕོ་བྲང་ནང་མའི་ཉེ་འདབས་ནུབ་བྱང་ལོགས་སུ་སྙིང་རྗེ་ཆེན་པོའི་ལྷ་ཁང་ཞེས་པ་གསར་དུ་བཞེངས། ཇོ་བོ་རེན་པོ་ཆེ་འདི་ཉིད་དེར་གདན་དྲངས་ཏེ་རྟེན་གྱི་གཙོ་བོར་བཞུགས་སུ་བཅུག རང་རེའི་རི་བོ་དགེ་ལྡན་པའི་ལུགས་འཛིན་པའི་དགེ་འདུན་གྱི་སྡེ་ཚོགས་པར་བྱས།བྱམས་གླིང་མཁན་པོ་ལྷ་རྗེ་སངས་རྒྱས་རྒྱལ་མཚན་བླ་མར་བསྐོས། རྟེན་རྣམས་ལ་རིན་པོ་ཆེའི་རྒྱན་སྣ་ཚོགས་དང་མཆོད་པའི་དངོས་པོ་བསམ་གྱི་མི་ཁྱབ་པས་བསྟི་སྟང་དུ་བྱས། དགེ་འདུན་གྱི་སྡེ་ལ་བསྙེན་བཀུར་ནར་མའི་རྒྱུན་འཛུགས་པ་སོགས་ཐུབ་པའི་བསྟན་པ་ལ་སྲི་ཞུ་བླ་ན་མེད་པ་མཛད། དེ་ནས་ད་ལྟའི་འཇམ་དཔལ་དབྱངས་ཆོས་ཀྱི་རྒྱལ་པོ་ཆེན་པོ་འདི་ཉིད་ཀྱི་བར་ཡབ་མེས་ཀྱི་ཕྱག་སྲོལ་བཟང་པོ་གོང་འཕེལ་དུ་མཛད་དོ། །
དེ་ལྟར་ན་སྟོན་པའི་འཁྲུངས་ལོ་ལ་གོང་དུ་བཤད་པ་ལྟར་རྒྱ་བོད་ཀྱི་བཞེད་ཚུལ་མི་འདྲ་བ་མང་དུ་སྣང་ནའང་རྟེན་འདིའི་ལོ་རྒྱུས་རྒྱ་ནག་གི་ཡིག་ཚང་ལ་ཡོད་པ་ལས་བཤད་པ་ལྟར་ན། སྟོན་པ་ཅེའུ་གུར་གྱི་དུས་ཤིང་ཕོ་སྟག་ལ་འཁྲུངས་པ་ནས་བརྩིས་པར་ད་ལྟའི་ཆེན་པོ་ཆིང་གི་གནམ་སྐྱོང་ལོ་སོ་ལྔ་པ་ལྕགས་ཕོ་སྟག་གི་ལོ་འདི་ཉིས་སྟོང་བདུན་བརྒྱ་གོ་བདུན་པ་ཡིན་པར་སྣང་ཞིང་སྐུ་གཟུགས་འདི་ཉིད་སྟོན་པའི་དགུང་ལོ་སོ་བརྒྱད་པ་ལྕགས་མོ་ཡོས་ལ་བཞེངས་པར་བཤད་དོ། །
དེ་ལྟ་བུའི་སྐུ་གཟུགས་འདི་ཉིད་ནི་སྐུ་རྒྱུ་ཙན་དན་གཽ་ཤིརྵ་ལས་བསྒྲུབས་པ། སྤྱི་གཙུག་བལྟར་མི་མངོན་པ་སོགས་མཚན་དཔེ་རྣམས་གསལ་བ། འགྲོ་བ་རྣམས་འཁོར་བ་ལས་འདྲེན་པ་མཚོན་པའི་སྤྱན་ཅུང་ཟད་གྱེན་དུ་གཟིགས་པ། ཕྱག་གཡས་སྐྱབས་སྦྱིན་གྱི་ཕྱག་རྒྱས་སྐྱེ་རྒུ་ཐམས་ཅད་སྲིད་ཞིའི་འཇིགས་པ་ལས་སྐྱོབ་པ་དང༌། གཡོན་མཆོག་སྦྱིན་གྱི་ཕྱག་རྒྱས་འགྲོ་བ་རྣམས་མངོན་མཐོ་ངེས་ལེགས་ཀྱི་བདེ་བ་ལ་བཀོད་པ་མཚོན་པ། ཞབས་གཉིས་མཉམ་སྟབས་ཀྱིས་བཞེངས་པས་འགྲོ་བའི་དོན་ལ་ནམ་ཡང་སྐྱོ་དལ་མེད་པ་མཚོན་པ།ཐུགས་ཀ་ན་དྲོད་རྟ་རྔ་ཙམ་རྒྱུན་དུ་ཡོད་པ་དང༌། ཞབས་མཐིལ་དང་གད་ན་གྱི་བར་ན་སྐུད་པ་ཤོང་བ་ཙམ་གྱི་བར་སྟོང་ཡོད་པ།བཟོ་བོ་གཞན་གྱིས་འདྲ་སྐུ་ཇི་ལྟར་བཞེངས་ཀྱང་སྐུའི་ཉམས་ཇི་ལྟ་བ་བཞིན་ལོང་དཀའ་བ་སོགས་ཁྱད་ཆོས་དུ་མ་དང་ལྡན་ཞིང༌། བླ་མ་སྐྱེས་བུ་དམ་པ་རྣམས་དང་རྒྱལ་བློན་སྦྱིན་བདག་དང་ལྡན་རྣམས་ཀྱིས་མཇལ་སྐབས་སྐུ་ལས་འོད་ཟེར་འཕྲོ་བ་སོགས་ཀྱི་མཐོང་སྣང་དུ་མ་འབྱུང་བ་དང༌། ནད་དང་སྡུག་བསྔལ་དྲག་པོས་གཙེས་པ་རྣམས་ཀྱིས་གསོལ་བ་རྩེ་གཅིག་ཏུ་བཏབ་པ་ན། ཉམས་དང་རྨི་ལམ་དུ་སྐུ་དངོས་ཀྱི་སྣང་བ་སྩལ་ཏེ་དབུགས་འབྱིན་པར་མཛད་པ་སོགས་སྐུ་ཆེ་བའི་ཡོན་ཏན་བསམ་གྱིས་མི་ཁྱབ་པ་ད་ལྟའི་བར་དུ་ཡང་ཀུན་ལ་མཐུན་སྣང་དུ་གྲུབ་པ་དེ་བཞིན་ལགས་སོ། །དེ་ལྟར་རྒྱལ་བ་རང་ཉིད་ཀྱིས་དངོས་སུ་བྱིན་གྱིས་རླབས་ཤིང་ལུང་བསྟན་པའི་རྟེན་མཆོག་འདི་ཉིད་མཐོང་བ་དང་ཐོས་པ་ཙམ་གྱི་སྐལ་པ་དང་ལྡན་པའི་སྐྱེ་བོ་རྣམས་ཀྱང་སྔོན་བསགས་པའི་བསོད་ནམས་ཕུལ་དུ་བྱུང་བ་དང་ལྡན་པ་ཡིན་ན་རྩེ་གཅིག་ཏུ་དད་ཅིང་མོས་པས་ཕྱག་མཆོད་བསྙེན་བཀུར་བྱེད་པ་ན་ལྟ་ཅི་སྨོས། དེས་ན་རྒྱལ་བ་ཉིད་དང་ཁྱད་པར་མ་མཆིས་པའི་སྐུ་མཆོག་འདི་ལྟ་བུ་ལ་མཇལ་བ་ནི་ཤིན་ཏུ་རྙེད་དཀའ་བར་ཤེས་པར་བགྱིས་ལ་བདག་ལེགས་སུ་འདོད་པ་རྣམས་ཀྱིས་རྩེ་གཅིག་པའི་དད་པ་དང་གུས་པ་མངོན་དུ་བྱས་ཏེ་ཅི་འབྱོར་པའི་མཆོད་པ་འབུལ་བ་དང་ལུས་ཀྱིས་ཕྱག་དང་བསྐོར་བ་བྱེད་པ་དང༌། ངག་གིས་བསྟོད་ཅིང་གསོལ་བ་འདེབས་པ་སོགས་ལ་ནུས་པ་ཅི་ཡོད་ཀྱིས་བརྩོན་པར་བྱ་ལ་དེ་ཡང་ངེས་འབྱུང་དང་བྱང་ཆུབ་ཀྱི་སེམས་ཀྱིས་ཟིན་པ་དང་སྨོན་ལམ་རྣམ་པར་དག་པས་ཁ་བསྒྱུར་བ་ལ་འབད་འཚལ་ལོ། །
ཡང་བསྐོར་བའི་གྲངས་ལ་སྐུ་དངོས་ལྭ་གཞལ་བའི་བསྐོར་ཚད་ནི། ནང་བསྐོར་གྱི་གྲངས་ཉིས་སྟོང་བརྒྱད་བརྒྱ་བདུན་ཅུ།བར་བསྐོར་མཆོད་རྟེན་དང་བཅས་ན་ཉིས་སྟོང་བཞི་བརྒྱ་བརྒྱད་ཅུ། ཕྱི་བསྐོར་རྒྱབ་ཀྱི་ལྟ་ཁང་དང་བཅས་པ་བསྐོར་ན་སྟོང་ཕྲག་ཅིག་དང༌། ལྔ་བརྒྱ་སུམ་ཅུ་བྱས་ན་བསྐོར་འབུམ་ལྷག་དང་བཅས་པ་རྫོགས་པར་སྣང་ངོ༌།། 2/3 མདུན་ངོས། 上一页 1 2 3 下一页 尾页 |
