| །།སེམས་བསྐྱེད་དྲུག་པ་ལ་བཞི་སྟེ། ཤེར་ཕྱིན་ལྷག་པས་འགོག་པ་ཐོབ་པར་བསྟན། ཞར་ལ་ཤེར་ཕྱིན་ཉིད་ཀྱི་ཆེ་བ་བརྗོད། ཤེར་ཕྱིན་དེ་ལ་འཇུག་ཚུལ་གཏན་ལ་དབབ། ཚུལ་དེས་ཐོབ་པའི་ཡོན་ཏན་བསྡུས་ཏེ་བསྟན་པའོ། །དང་པོ་ནི་མངོན་གྱུར་སོགས་ཏེ། ས་ལྔ་པར་བསམ་གཏན་གྱི་ཕར་ཕྱིན་ཡོངས་སུ་དག་པ་ཐོབ་པས་ས་དྲུག་པར་ཞི་གནས་ཕུལ་དུ་བྱུང་བ་ལ་གནས་ཤིང་ལྷག་མཐོང་རྟེན་འབྲེལ་ཟབ་མོའི་དེ་ཁོ་ན་ཉིད་མཐོང་བའི་བྱང་ཆུབ་སེམས་དཔའ་ནི་ཤེར་ཕྱིན་ལྷག་པར་ཐོབ་པས་སྤྲོས་པ་མཐའ་དག་བཀག་པའི་འགོག་པ་ཐོབ་པར་འགྱུར་གྱི་སྔ་རོལ་དུ་ནི་མ་ཡིན་ཏེ། ཤེས་རབ་ལྷག་པར་གྱུར་པ་མེད་པའི་ཕྱིར། ཅིའི་ཕྱིར་མངོན་དུ་གྱུར་པ་ཞེས་བྱ་ཞེ་ན། གཟུགས་བརྙན་དང་འདྲ་བའི་ཆོས་ཉིད་ཁོང་དུ་ཆུད་པའི་ཕྱིར་དང་། བྱང་ཆུབ་སེམས་དཔའི་ས་ལྔ་པར་ལམ་གྱི་བདེན་པ་ལ་དམིགས་པའི་ཕྱིར་དང་། རྫོགས་པའི་སངས་རྒྱས་ཀྱི་ཆོས་ལ་མངོན་དུ་ཕྱོགས་པའི་ཕྱིར་ཞེས་རྒྱུ་མཚན་གསུམ་གསུངས་སོ། །གཉིས་པ་ནི། ཇི་ལྟར་སོགས་ཏེ། མདོ་སྡུད་པ་ལས། དམུས་ལོང་དམིགས་བུ་མེད་པ་བྱེ་བ་ཁྲག་ཁྲིག་རྣམས། །ལམ་ཡང་མི་ཤེས་གྲོང་ཁྱེར་འཇུག་པར་ག་ལ་ནུས། །ཤེས་རབ་མེད་ན་མིག་མེད་ཕ་རོལ་ཕྱིན་ལྔ་འདིས། །དམིགས་བུ་མེད་པས་བྱང་ཆུབ་རེག་པར་ནུས་མ་ཡིན། །གང་ཚེ་ཤེས་རབ་ཀྱིས་ནི་རབ་ཏུ་ཟིན་གྱུར་པ། །དེ་ཚེ་མིག་རྙེད་གྱུར་ཅིང་འདི་ཡི་མིང་ཐོབ་བོ། །ཞེས་སོ། །གསུམ་པ་ལ་གསུམ་སྟེ། གང་ལ་བརྟེན་ནས་བཤད་པའི་ཚུལ། གང་ལ་བཤད་པར་བྱ་བའི་ཡུལ། བཤད་བྱའི་སྟོང་ཉིད་གཏན་ལ་དབབ་པའོ། །དང་པོ་ནི། ཇི་ལྟར་སོགས་ཏེ། འདི་རྟེན་འབྱུང་བའི་དེ་ཉིད་མཐོང་བ་དེ། །ཤེས་རབ་གནས་པས་འགོག་པ་ཐོབ་པར་འགྱུར། །ཞེས་སྨྲས་ན། རྟེན་ཅིང་འབྲེལ་བར་འབྱུང་བའི་དེ་ཁོ་ན་ཉིད་ནི་གང་། ས་དྲུག་པའི་བྱང་སེམས་ཀྱིས་དེ་མཐོང་བའི་ཚུལ་ཇི་ལྟར་སྙམ་ན། དེའི་རང་གི་ངོ་བོ་ནི་མ་རིག་པའི་ལིང་ཐོག་མཐུག་པོས་བློ་གྲོས་ཀྱི་མིག་མ་ལུས་པར་གཡོགས་པ་བདག་ཅག་གི་ཡུལ་དུ་ཉེ་བར་འགྲོ་བ་མ་ཡིན་གྱི་ས་དྲུག་པ་ལ་སོགས་པ་ས་གོང་མ་ལ་གནས་པའི་བྱང་ཆུབ་སེམས་དཔའ་རྣམས་ཀྱི་ཡུལ་དུ་ནི་འགྱུར་བ་ཡིན་ཏེ། དེའི་ཕྱིར་ཁོ་བོ་ཅག་ལ་དྲི་བར་བྱ་བ་མ་ཡིན་གྱི་དྲི་མ་མེད་པའི་བློ་མངའ་བའི་བྱང་ཆུབ་སེམས་དཔའ་དང་སངས་རྒྱས་བཅོམ་ལྡན་འདས་དེ་དག་ཉིད་ལ་དྲི་བར་བྱའོ། །ཞེས་གསུངས་པ་ནི་སློབ་དཔོན་ཟླ་བ་རང་ཉིད་ས་མ་ཐོབ་པར་ལུང་རིགས་དང་བླ་མའི་མན་ངག་ལ་བརྟེན་ནས་བསྟན་བཅོས་རྩོམ་པ་ཡིན་ན་འདི་དག་སྒྲ་ཇི་བཞིན་པ་སྟེ། ལུང་རིགས་དང་། བླ་མའི་མན་ངག་ལ་མ་བརྟེན་པར་དེ་ཁོ་ན་ཉིད་རང་སྟོབས་ཀྱིས་སྟོན་པར་མི་ནུས་པའི་ཕྱིར་རོ། །ས་ཐོབ་ནས་རྩོམ་པ་ཡང་དགག་པར་མི་ནུས་པས་དེ་ལྟར་ན་མ་འོངས་པའི་འཆད་པ་པོ་དང་། རྩོམ་པ་པོ་རྣམས་ཀྱི་ང་རྒྱལ་བཅག་པའི་ཆེད་དུ་ཁེངས་བསྐྱུང་བ་སྟེ། སློབ་དཔོན་ཞི་བ་ལྷས། སྔོན་ཆད་མ་བྱུང་བ་ཡང་འདིར་བརྗོད་མེད། །སྡེབ་སྦྱོར་མཁས་པའང་བདག་ལ་ཡོད་མིན་ཏེ། །ཞེས་པ་ལྟར་རོ། །གལ་ཏེ་འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་དང་། འཕགས་པ་ས་བཅུ་པ་ལ་སོགས་པ་མདོ་སྡེ་གང་དག་འདོན་པ་དེ་དག་ལས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པའི་བྱང་ཆུབ་སེམས་དཔས་ཇི་ལྟར་རྟེན་ཅིང་འབྲེལ་བར་འབྱུང་བའི་དེ་ཉིད་མཐོང་བ་ཞེས་བྱ་བ་གསུངས་པ་མ་ཡིན་ནམ། དེའི་ཕྱིར་ལུང་གི་རྗེས་སུ་འབྲང་ནས་བཤད་པར་རིགས་སོ་ཞེ་ན། འདི་ཡང་ཡོད་པ་མ་ཡིན་ཏེ། ལུང་གི་དགོངས་པ་ངེས་པར་དཀའ་བའི་ཕྱིར་བདག་ཅག་འདྲ་བས་ལུང་ལས་ཀྱང་དེ་ཁོ་ན་ཉིད་བསྟན་པར་མི་ནུས་སོ། །རང་ཉིད་ཀྱི་དབང་དུ་བྱས་ནས་དེ་སྐད་དུ་བརྗོད་ཀྱི་བསྟན་བཅོས་ཚད་མར་གྱུར་པའི་སྐྱེས་བུ་བྱས་ཞིང་ལུང་ཕྱིན་ཅི་མ་ལོག་པར་འཆད་པ་མཐོང་བ་ལས་ལུང་གི་དགོངས་པ་ངེས་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པའི་བྱང་ཆུབ་སེམས་དཔས་ཆོས་རྣམས་ཀྱི་བདག་ཉིད་ཇི་ལྟ་བ་ཉིད་ཇི་ལྟར་མཐོང་བ་དེ་ལྟར་འཕགས་པ་ཀླུ་སྒྲུབ་ཀྱིས་ལུང་ཕྱིན་ཅི་མ་ལོག་པར་མཁྱེན་ནས་དབུ་མའི་བསྟན་བཅོས་ལས་རིགས་པ་དང་ལུང་དག་གིས་ཆོས་རྣམས་ཀྱི་བདག་ཉིད་ཇི་ལྟ་བ་ཉིད་རང་བཞིན་མེད་པའི་མཚན་ཉིད་ཅན་ཆེས་གསལ་བར་བསྟན་ཏོ། །དེའི་ཕྱིར་ཇི་ལྟར་འཕགས་པ་ཀླུ་སྒྲུབ་ཀྱི་ཞལ་སྔ་ནས་རིགས་པ་དང་ལུང་དག་གིས་ཆོས་རྣམས་ཀྱི་དེ་ཉིད་བསྟན་པ་དེ་ཁོ་ན་ལྟར། བདག་གིས་དེས་ཉེ་བར་བསྟན་པའི་ལུགས་ཇི་ལྟར་གནས་པ་བཞིན་དུ་བརྗོད་པར་བྱའོ། །ཅི་སྟེ་རེ་ཞིག་འཕགས་པ་ཀླུ་སྒྲུབ་དེ་ཉིད་ལ་ལུང་ཕྱིན་ཅི་མ་ལོག་པར་ངེས་པ་ཇི་ལྟར་ཡོད་ཅེ་ན། ལུང་ལས་ཏེ། དེ་སྐད་དུ་འཕགས་པ་ལང་ཀར་གཤེགས་པ་ལས། ལྷོ་ཕྱོགས་བྷེ་དའི་ཡུལ་དུ་ནི། །དགེ་སློང་དཔལ་ལྡན་ཆེར་གྲགས་པ། །དེ་མིང་ཀླུ་ཞེས་བོད་པ་སྟེ། །ཡོད་དང་མེད་པའི་ཕྱོགས་འཛིན་པ། །ང་ཡི་ཐེག་པ་འཇིག་རྟེན་ན། །བླ་མེད་ཐེག་ཆེན་རབ་བསྟན་ནས། །རབ་ཏུ་དགའ་བའི་ས་བསྒྲུབས་ཏེ། །བདེ་བ་ཅན་དུ་དེ་འགྲོའོ། །ཞེས་གསུངས་པ་དང་། ཡང་འཕགས་པ་སྤྲིན་ཆེན་པོ་སྟོང་ཕྲག་བཅུ་གཉིས་པ་ལས་ཀྱང་། ཀུན་དགའ་བོ་ལི་ཙ་བྱི་གཞོན་ནུ་སེམས་ཅན་ཐམས་ཅད་ཀྱིས་མཐོང་ན་དགའ་བ་ཞེས་བྱ་བ་འདི་ནི་ང་མྱ་ངན་ལས་འདས་ནས་ལོ་བཞི་བརྒྱ་ལོན་པ་ན་ཀླུ་ཞེས་བྱ་བའི་དགེ་སློང་དུ་གྱུར་ནས་ངའི་བསྟན་པ་རྒྱས་པར་རབ་ཏུ་བསྟན་ཏེ། མཐར་གྱི་རབ་ཏུདྭང་བའི་འོད་ཅེས་བྱ་བའི་འཇིག་རྟེན་གྱི་ཁམས་སུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡེ་ཤེས་འབྱུང་གནས་འོད་ཅེས་བྱ་བར་འགྱུར་རོ་ཞེས་གསུངས་སོ། །དེའི་ཕྱིར་འདིས་ལུང་ཕྱིན་ཅི་མ་ལོག་པར་ངེས་པར་གྲུབ་བོ། །ཞེས་འགྲེལ་པར་གསུངས་པ་འདིས་སོ་སོ་སྐྱེ་བོས་ལུང་རིགས་དང་བླ་མའི་མན་ངག་ལ་མ་བརྟེན་པར་བཀའི་དགོངས་པ་རང་དབང་དུ་འགྲེལ་བའི་བསྟན་བཅོས་རྩོམ་མི་ནུས་ཤིང་བཀའི་དགོངས་པ་རང་དབང་དུ་འགྲེལ་བའི་བསྟན་བཅོས་རྩོམ་པ་ལ་ས་ཐོབ་དགོས་པར་བསྟན་ཏེ། སློབ་དཔོན་སེངྒེ་བཟང་པོས། ཤེས་རབ་མི་གསལ་བསྟན་བཅོས་ཀུན། །ཕྱི་རོལ་གྱུར་དག་ག་ན་ཞིག །འཕགས་བློའི་སྤྱོད་ཡུལ་བདག་ཉིད་ཆེ། །བསྟན་བཅོས་དོན་ནི་གང་ན་ཡིན། །ཅེས་གསུངས་པ་ལྟར་རོ། །གཉིས་པ་ལ་གསུམ་སྟེ། སྣོད་ལ་བསྟན་པར་བྱ་བ། དེ་ལ་བསྟན་པའི་ཕན་ཡོན། དེས་ན་མཉན་པར་གདམས་པའོ། །དང་པོ་ནི། སོ་སོའི་སོགས་ཏེ། སྤྱིར་སྟོང་པ་ཉིད་ཀྱི་ལྟ་བ་སྟོན་པའི་ཡུལ་ལ་གསུམ་སྟེ། ཕྱི་ནང་གི་དངོས་པོར་སྨྲ་བའི་གྲུབ་མཐའ་ཁས་ལེན་པ་ལ། ཐལ་འགྱུར་གྱི་རིགས་པས་ལོག་རྟོག་བཅོམ་པའི་སྒོ་ནས་བསྟན་པར་བྱ་བ་དང་། ལས་དང་པོ་པ་བློ་རིམ་གྱིས་སྦྱངས་ནས་བསྟན་པར་བྱ་བ་དང་། ཐེག་ཆེན་གྱི་རིགས་སད་པ་ལ་དང་པོ་ཉིད་ནས་བསྟན་པར་བྱ་བ་རྣམས་སོ། །དང་པོ་ནི་སློབ་དཔོན་འདིས་གྲངས་ཅན་པས་མྱུ་གུ་ཡོད་པ་བདག་ལས་སྐྱེ་བར་ཁས་བླངས་པ་ལ་སྐྱེ་བ་དོན་མེད་དུ་ཐལ་བ་སོགས་ཀྱི་གནོད་བྱེད་བརྗོད་པས་བདག་ལས་སྐྱེ་བའི་ལོག་རྟོག་བཟློག མྱུ་གུ་རང་བཞིན་གྱིས་སྐྱེ་བའི་སྒྲུབ་བྱེད་ཀྱང་བདག་སྐྱེ་ལས་གཞན་མ་མཐོང་བས་རང་བཞིན་སྐྱེ་མེད་ཀྱི་དོན་རྟོགས་པར་གསུངས་པ་ལྟ་བུ་སྟེ་ཆོས་དང་གང་ཟག་བདེན་པར་གྲུབ་པའི་སྒྲུབ་བྱེད་འགོད་པའི་དངོས་སྨྲ་བ་ཐམས་ཅད་ལའང་དེ་བཞིན་ནོ། །གཉིས་པ་ནི། བློ་སྦྱངས་མ་བྱས་སེམས་ཅན་ལ། །སྟོང་པ་ཉིད་ནི་སྟོན་པ་དང་། །ཞེས་བྱང་ཆུབ་སེམས་དཔའི་རྩ་ལྟུང་དུ་གསུངས་པས། གྲུབ་མཐའ་ལ་མ་ཞུགས་པའི་ལས་དང་པོ་པ་དལ་འབྱོར་རྙེད་དཀའ་སོགས་ཀྱིས་བློ་རིམ་གྱིས་སྦྱངས་ནས་ཕྱིས་སྟོང་ཉིད་སྟོན་དགོས་པར་གྲུབ་བོ། །གསུམ་པ་ནི་མདོ་སྡེ་ས་བཅུ་པ་ལས། དུ་བ་ལས་ནི་མེར་ཤེས་དང་། །ཆུ་སྐྱར་ལས་ནི་ཆུར་ཤེས་ལྟར། །བྱང་ཆུབ་སེམས་དཔའ་བློ་ལྡན་གྱི། །རིགས་ནི་མཚན་མ་དག་ལས་ཤེས། །ཞེས་པའི་དོན་རིན་ཆེན་ཕྲེང་བར། ཟབ་མོ་འཁུ་འཕྲིག་ཅན་འཇིགས་པ། །བྱང་ཆུབ་སྒྲུབ་པ་ཁ་ཅིག་ལའོ། །ཞེས་དང་། འཁུ་འཕྲིག་གི་དོན། གཞུང་འདིར་བཤད་པའི་ལུས་ངག་གི་མཚན་མ་སྟེ། དེ་དང་ལྡན་པ་རྣམས་སོ། །འདི་ནི་རྒྱུད་བླ་དང་མདོ་སྡེ་རྒྱན་དུ། བྱང་སེམས་འཕགས་པའི་རྒྱུར་ཐེག་ཆེན་གྱི་ཆོས་ལ་མོས་པ་སོགས་བཞི་གསུངས་པའི་ཆོས་མོས་དང་། མོས་པའི་ལེའུ་ནས་གསུངས་པའི་མོས་པ་རྣམས་དང་དོན་གཅིག་གོ །བསྟན་པའི་ཚུལ་ཡང་གཞུང་ནས་བཤད་པའི་རིགས་པ་རྣམས་ཀྱིས་བསྟན་དགོས་ཏེ། རིགས་པས་མ་བསྟན་པར་དམ་བཅའི་ཚིག་ཙམ་གྱིས་བསྟན་ན་དོན་མི་ངེས་པས་དབང་རྣོན་ངེས་པ་མི་སྐྱེ་ཞིང་དབང་རྟུལ་ལ་ནི་སྟོང་ཉིད་སྤངས་ནས་ངན་འགྲོར་འགྲོ་བའམ་སྟོང་ཉིད་ཀྱི་དོན་མེད་པ་ཉིད་དུ་བཟུང་ནས་དངོས་པོ་ཐམས་ཅད་ལ་སྐུར་བ་འདེབས་པའི་ལོག་རྟོགས་འཕེལ་བར་བྱེད་པའི་ཕྱིར་ཏེ། དབུ་མ་རྩ་བར། སྟོང་པ་ཉིད་ལ་ལྟ་ཉེས་ན། །ཤེས་རབ་ཆུང་རྣམས་ཕུང་བར་འགྱུར། །ཇི་ལྟར་སྦྲུལ་ལ་བཟུང་ཉེས་དང་། །རིག་སྔགས་ལོག་པར་བསྒྲུབས་པ་བཞིན། །ཅེས་དང་། རིན་ཆེན་ཕྲེང་བར། ཆོས་འདི་ལོག་པར་ཤེས་གྱུར་ན། །མི་མཁས་རྣམས་ནི་ཆུད་ཀྱང་འཛའ། །འདི་ལྟར་མེད་པར་ལྟ་བ་ཡི། །མི་གཙང་དེར་ནི་བྱིང་བར་འགྱུར། །ཞེས་གསུངས་པ་ལྟར་རོ། །གཞུང་ནས་བཤད་པའི་རིགས་པ་རྣམས་དངོས་སྨྲ་བ་འགོག་པའི་རིགས་པ་མ་ཡིན་ནམ་སྙམ་ན་ཡིན་མོད། ཡུལ་དང་པོ་ལ་ནི་རང་རང་གི་གྲུབ་མཐས་བཏགས་པའི་ལོག་རྟོག་བཟློག་པའི་སྒོ་ནས་བསྟན་ལ། ཕྱི་མ་གཉིས་ལ་ནི་དངོས་པོ་རང་བཞིན་གྱིས་ཡོད་ན་ཡོད་ཚུལ་འདི་དག་ལས་མ་འདས་སོ་ཞེས་པའི་མཐའ་གཅོད་པའི་སྒོ་ནས་སྟོན་པ་སྟེ། གཞན་དུ་ན་གཞུང་འདིར་ཡུལ་ཕྱི་མ་ཁོ་ན་ལ་དེ་ཁོ་ན་ཉིད་བསྟན་པར་གསུངས་ཤིང་། བསྟན་བྱའི་དེ་ཁོ་ན་ཉིད་དེ་མཐའ་བཞིའི་སྐྱེ་བ་བཀག་པའི་སྒོ་ནས་བསྟན་པ་དེ་ཇི་ལྟར་འཆད། གཞུང་ལུགས་ཆེན་པོའི་གོང་འོག་བསྒྲིགས་ནས་སྐབས་འདིར་སྐབས་སུ་བབ་པ་འདི་ཉིད་ཡིན་ཅེས་པའི་སྒོ་ནས་བཤད་པར་བྱ་ཡི་གཅིག་མཐོང་བ་རྒྱུ་མཚན་དུ་བྱས་ནས་གཞན་རྣམས་དོར་བར་མི་བྱའོ། །གཉིས་པ་ནི། དེ་ལ་སོགས་ཏེ་ཡུལ་གསུམ་ཆར་ལ་ཡང་སྟོང་ཉིད་ཀྱི་ལྟ་བ་ངེས་པའི་རྗེས་སུ་ཡོན་ཏན་འདི་དག་འབྱུང་བར་འདྲ་སྟེ། ཟབ་ཅིང་རྒྱ་ཆེའི་ཚུལ་ལ་མཁས་དགོས་པའི་ཕྱིར་རོ། །གསུམ་པ་ནི། ཟབ་ཅིང་སོགས་སོ། །གསུམ་པ་བཤད་བྱའི་སྟོང་ཉིད་གཏན་ལ་དབབ་པ་ལ་གཉིས་ཏེ། ཐུན་མོང་ཐེག་པས་རྟོགས་བྱའི་སྟོང་ཉིད་བཤད། ཐེག་པ་ཆེན་པོས་རྟོགས་བྱའི་སྟོང་ཉིད་བཤད་པའོ། །དང་པོ་ལ་གཉིས་ཏེ། རྟེན་འབྲེལ་ཆོས་ཀྱི་བདག་མེད་སྒོ་ནས་བཤད། རྟེན་འབྲེལ་གང་ཟག་བདག་མེད་སྒོ་ནས་བཤད་པའོ། །དང་པོ་ལ་གསུམ། དེ་ཁོ་ན་ཉིད་ལུང་ལས་ངེས་པའི་ཚུལ། བསྟན་བཅོས་སུ་གཏན་ལ་དབབ་པའི་ཚུལ། དེ་ཉིད་གཞུང་འདིར་རིགས་པས་བསྒྲུབ་པའི་ཚུལ་ལོ། །དང་པོ་ནི་འཕགས་པ་ས་བཅུ་པ་ལས། ཀྱཻ་རྒྱལ་བའི་སྲས་དག་བྱང་ཆུབ་སེམས་དཔའི་ས་ལྔ་པ་ལ་ལམ་ཤིན་ཏུ་ཡོངས་སུ་རྫོགས་པ་དེ་བྱང་ཆུབ་སེམས་དཔའི་ས་དྲུག་པ་ལ་འཇུག་སྟེ། དེ་ཆོས་མཉམ་པ་ཉིད་བཅུས་འཇུག་གོ །བཅུ་གང་ཞེ་ན་འདི་ལྟ་སྟེ། ཆོས་ཐམས་ཅད་མཚན་མ་མེད་པར་མཉམ་པ་ཉིད་དང་། ཆོས་ཐམས་ཅད་མཚན་ཉིད་མེད་པར་མཉམ་པ་ཉིད་དང་། དེ་བཞིན་དུ་སྐྱེ་བ་མེད་པ་དང་། མ་སྐྱེས་པ་དང་། དབེན་པ་དང་། གདོད་མ་ནས་རྣམ་པར་དག་པ་དང་། སྤྲོས་པ་མེད་པ་དང་། བླང་བ་མེད་པ་དང་། དོར་བ་མེད་པར་མཉམ་པ་ཉིད་དང་། ཆོས་ཐམས་ཅད་སྒྱུ་མ་དང་། རྨི་ལམ་དང་། མིག་ཡོར་དང་། བྲག་ཆ་དང་། ཆུ་ཟླ་དང་། གཟུགས་བརྙན་དང་། སྤྲུལ་པ་ལྟ་བུར་མཉམ་པ་ཉིད་དང་། ཆོས་ཐམས་ཅད་དངོས་པོ་དང་དངོས་པོ་མེད་པ་གཉིས་སུ་མེད་པར་མཉམ་པ་ཉིད་དོ། །དེ་ཆོས་ཐམས་ཅད་ཀྱི་རང་བཞིན་དེ་ལྟར་རབ་ཏུ་རྟོགས་པ་ན། རྣོ་ཞིང་རྗེས་སུ་མཐུན་པའི་བཟོད་པས་བྱང་ཆུབ་སེམས་དཔའི་ས་དྲུག་པ་མངོན་དུ་གྱུར་པ་རྗེས་སུ་ཐོབ་སྟེ། ཞེས་གསུངས་པ་ལྟ་བུ་སྟེ། དང་པོ་བརྒྱད་དོན་དམ་པར་མཉམ་པ་ཉིད་དང་། དགུ་པ་སྒྱུ་མ་སོགས་དཔེ་བདུན་གྱིས་བསྟན་པ་ནི་ཀུན་རྫོབ་ཏུ་མཉམ་པ་ཉིད་དང་། ཐ་མ་ནི་བདེན་པ་གཉིས་ཆར་དུ་མཉམ་པ་ཉིད་དོ། །རྣོ་བ་ནི་མཉམ་པ་ཉིད་བཅུ་པོ་ལ་ཐུགས་ཤིན་ཏུ་གསལ་བ་དང་། རྗེས་སུ་མཐུན་པའི་བཟོད་པ་ནི་དེ་དག་ལ་མི་སྐྲག་པ་སྟེ། དེའི་སྒོ་ནས་ས་དྲུག་པ་འཐོབ་ཅེས་པའོ། །གཉིས་པ་ནི་དེའི་ཕྱིར་འདིར་ཆོས་སྐྱེ་བ་མེད་པ་མཉམ་པ་ཉིད་ཁོ་ན་རིགས་པས་བསྟན་པ་ཉིད་ཀྱིས་ཆོས་མཉམ་པ་ཉིད་གཞན་བསྟན་པར་སླ་བར་དགོངས་ཏེ། སློབ་དཔོན་གྱིས་དབུ་མའི་བསྟན་བཅོས་ཀྱི་དང་པོར། བདག་ལས་མ་ཡིན་གཞན་ལས་མིན། །གཉིས་ལས་མ་ཡིན་རྒྱུ་མེད་མིན། །དངོས་པོ་གང་དག་གང་ན་ཡང་། །སྐྱེ་བ་ནམ་ཡང་ཡོད་མ་ཡིན། །ཞེས་ཉེ་བར་བཀོད་པ་ཡིན་ནོ། །འདིར་འོག་གི་ཡོད་པ་མ་ཡིན་ཅེས་པ་བདག་ལས་ཞེས་སོགས་བཞི་དང་འབྲེལ་བས་དམ་བཅའ་སྟོན་ཏེ། ཕྱི་ནང་གི་དངོས་པོ་གང་དག་ཡུལ་དུས་གྲུབ་མཐའ་གང་ནའང་བདག་ལས་སྐྱེ་བ་ནམ་ཡང་སྲིད་པ་མ་ཡིན་ནོ་ཞེས་སོགས་བཞི་སྦྱར་བར་བྱའོ། །གྲུབ་མཐའ་གང་ནའང་ཞེས་པའི་དོན་ནི་དབང་གིས་ཞེས་པའི་དོན་ཡིན་གྱི་ལུགས་ལ་ཞེས་པའི་དོན་མ་ཡིན་ནོ། །དམ་བཅའ་བཞི་པོ་འདི་ཉིད་སྒྲུབ་པའི་རིགས་པ་ལ། སློབ་དཔོན་སངས་རྒྱས་བསྐྱངས་དང་། ལེགས་ལྡན་འབྱེད་གཉིས་ཀྱི་ཕྱེ་བའི་ཐལ་འགྱུར་དང་རང་རྒྱུད་ཀྱི་སྲོལ་ཆེན་པོ་གཉིས་སྣང་སྟེ། འདི་ལ་ཐལ་རང་གི་ཁྱད་པར་ངོས་བཟུང་། རང་རྒྱུད་ཀྱི་ལུགས་དགག ཐལ་འགྱུར་གྱི་ལུགས་བྱེ་བྲག་ཏུ་བཤད་པའོ། །དང་པོ་ལ། ཁ་ཅིག་ཀུན་གཞི་ཁས་ལེན་མི་ལེན་དང་། ཉོན་ཡིད་ཁས་ལེན་མི་ལེན་དང་། རང་རིག་དང་ཕྱི་དོན་ཁས་ལེན་མི་ལེན་སོགས་ཀྱི་ཁྱད་པར་ནི་འོག་ཏུ་འགོག་པར་འགྱུར་ལ། དོན་དམ་གྱི་དགག་བྱའི་ཁྱད་པར་ལ་རང་རྒྱུད་པའི་སྐབས་སུ་བློ་ལ་སྣང་བའི་དབང་གིས་བཞག་པ་མ་ཡིན་པར་ཆོས་དེ་རྣམས་ཀྱི་སྡོད་ལུགས་གཅིག་ཡོད་པར་འཛིན་པ་ནི་ཐོག་མ་མེད་པ་ནས་ཞུགས་པའི་ལྷན་སྐྱེས་ཀྱི་བདེན་འཛིན་ནོ། །རང་རྒྱུད་པས་འདིར་བཞག་པ་ནི་ཐལ་འགྱུར་བའི་དགག་བྱ་འཛིན་པའི་བློ་ལ་ལྟོས་ན་ཤིན་ཏུ་རགས་པས་ཕྲ་བའི་བདེན་འཛིན་ལྷན་སྐྱེས་ནི་མ་ཡིན་ནོ། །ནམ་ཞིག་བདེན་འཛིན་དེས་གཟུང་བའི་བདེན་གྲུབ་རིགས་པས་ཁེགས་པ་ན་སྒྱུ་མ་མཁན་བཞིན་དུ་ཕྱི་ནང་གི་ཆོས་རྣམས་ལ་ནང་གི་བློའི་དབང་གིས་མ་བཞག་པའི་སྡོད་ལུགས་ཡོད་པར་མི་འཛིན་པར་བློའི་དབང་གིས་བཞག་པའི་ཡོད་པ་ཙམ་དུ་ཤེས་པར་འགྱུར་རོ་ཞེས་དང་། རང་རྒྱུད་པས་དེ་རིགས་པས་འགོག་ཚུལ་གྱི་སྐབས་སུ་དངོས་པོ་ལ་གཟུགས་ཅན་ཡིན་མིན་གཉིས་སུ་ཁ་ཚོན་ཆོད་ཅིང་གཟུགས་ཅན་ལ་ཤར་ལ་སོགས་པའི་ཕྱོགས་ཀྱི་ཆ་མེད་དང་། ཤེས་པ་ལ་དུས་སྔ་ཕྱིའི་ཆ་མེད་དགག་པ་གཞན་ནས་བཤད་པ་ལྟར་བྱ་ལ། དངོས་པོ་ལ་ཆ་བཅས་ཀྱིས་ཁྱབ་པར་བསྒྲུབ། དེ་ནས་ཆ་དང་ཆ་ཅན་གཉིས་ཀ་ངོ་བོ་ཐ་དད་ན་འབྲེལ་མེད་དུ་འགྱུར་བས་དགག་ལ་ངོ་བོ་གཅིག་ཏུ་བསྟན། དེའི་ཚེ་དེ་ལ་ཡིད་ཅི་ལྟར་གཏད་པ་ན་ཡིན་ཚུལ་ངོ་བོ་གཅིག་ཡིན་ཀྱང་སྣང་ཚུལ་ལ་ངོ་བོ་ཐ་དད་དུ་སྣང་བ་སྙོན་དུ་མེད་པས་སྒྱུ་མ་བཞིན་དུ་དེར་སྣང་བ་དང་། དེས་སྟོང་པ་གཉིས་ཚོགས་པར་གཏན་ལ་དབབ། དེ་ནས་དེ་འདྲ་དེ་བློ་ལ་སྣང་བའི་དབང་གིས་བཞག་པའི་བརྫུན་པའི་སྡོད་ལུགས་ལ་འགལ་བ་མེད་ཀྱང་གཞི་དེ་བློ་ལ་སྣང་བའི་དབང་གིས་བཞག་པ་མིན་པའི་སྡོད་ལུགས་ཡིན་ན་གཏན་མི་རིགས་ཏེ་ཞེས་དང་། དེ་ལྟར་ན་བློ་ལ་སྣང་བའི་དབང་གིས་བཞག་པ་མིན་པའི་སྡོད་ལུགས་མེད་ཀྱང་། དེའི་དབང་གིས་བཞག་པའི་སྡོད་ལུགས་མིང་དུ་བཏགས་པ་ཙམ་མིན་པ་གཅིག་ཡོད་པ་ལུགས་འདི་ལ་མི་འགལ་བས་དབུ་མ་པ་གཉིས་ཀྱི་དགག་བྱ་ལ་བློའི་ངོར་མི་འདྲ་བ་ཆེན་པོ་འོང་ངོ་། །ཞེས་དང་། ཐལ་འགྱུར་བའི་དགག་བྱ་ངོས་འཛིན་པའི་སྐབས་སུ་ཆོས་རྣམས་རྟོག་པའི་དབང་གིས་འཇོག་ཚུལ་དང་དེ་ལས་བཟློག་སྟེ་འཛིན་པའི་བདེན་འཛིན་གཉིས་ལས། དང་པོ་ནི། ཉེ་བ་འཁོར་གྱིས་ཞུས་པའི་མདོ་དང་། བཞི་བརྒྱ་པ་དང་། རིན་ཆེན་ཕྲེང་བའི་ལུང་རྣམས་དྲངས་ནས་ཐ་སྙད་དུ་མིང་གི་ཐ་སྙད་ཀྱི་དབང་གིས་བཞག་པ་ཙམ་མ་གཏོགས་པ་ཅི་ཡང་མེད་པར་གསུངས་པ་ལྟར་མིང་དུ་བཏགས་པ་ཙམ་དུ་གནས་སོ། །དེ་རྣམས་ལེགས་པར་ཤེས་ན་ཆོས་ཐམས་ཅད་བརྟེན་ནས་གཞག་དགོས་པ་དང་། བརྟེན་ནས་བཏགས་པ་དང་། བརྟེན་ནས་སྐྱེས་པ་ཉིད་ཀྱིས་རང་གི་ངོ་བོས་གྲུབ་པ་མེད་པ་དང་། ཐ་སྙད་གཞན་གྱི་དབང་གིས་བཞག་པ་མིན་པའི་རང་དབང་བའི་ངོ་བོ་མེད་པ་དང་། ཆོས་གང་ཡོད་པར་འཇོག་ནའང་བཏགས་དོན་མ་བཙལ་བར་འཇོག་པ་རྣམས་ལེགས་པར་ཤེས་པར་འགྱུར་རོ། །གཉིས་པ་ནི། སྔར་བཤད་པའི་མིང་གི་ཐ་སྙད་ཀྱི་དབང་ཙམ་གྱིས་བཞག་པ་མིན་པའི་ཡོད་པར་འཛིན་པ་ནི་བདེན་པར་དང་དོན་དམ་པར་དང་། ཡང་དག་ཏུ་གྲུབ་པ་དང་། རང་གི་ངོ་བོས་དང་། རང་གི་མཚན་ཉིད་ཀྱིས་དང་། རང་བཞིན་གྱིས་ཡོད་པར་འཛིན་པ་ལྷན་སྐྱེས་ཡིན་ལ། དེས་གཟུང་བའི་ཞེན་ཡུལ་ནི་བཏགས་པ་མཐའ་གཟུང་གི་བདེན་ཚད་དོ། །རང་རྒྱུད་པ་རྣམས་བདེན་པ་སོགས་གསུམ་དུ་གྲུབ་པ་ཤེས་བྱ་ལ་མི་སྲིད་པར་བཞེད་ཀྱང་རང་གི་ངོ་བོས་གྲུབ་པ་སོགས་གསུམ་ནི་ཐ་སྙད་དུ་ཡོད་པར་བཞེད་དེ་ཞེས་དང་། ཡིད་ཡུལ་ལ་འཇུག་པ་ན་བདེན་པར་འཛིན་པ་གཅིག་དང་། བདེན་མེད་དུ་འཛིན་པ་གཅིག་དང་། དེ་གཉིས་གང་གིས་ཀྱང་ཁྱད་པར་དུ་མ་བྱས་པར་འཛིན་པ་གཅིག་དང་གསུམ་ཡོད་པས་བདེན་མེད་དུ་མ་བཟུང་ཡང་བདེན་པར་འཛིན་མི་དགོས་པ་བཞིན་དུ་བདག་གཉིས་ལ་མ་ཞུགས་ཀྱང་བདག་མེད་གཉིས་ལ་ཞུགས་མི་དགོས་ཏེ། བློ་ཕུང་པོ་གསུམ་པ་ལ་གནས་པ་མཐའ་ཡས་པ་གཅིག་ཡོད་པའི་ཕྱིར་རོ། །དེ་ལྟར་བདེན་འཛིན་ལེགས་པར་ངོས་ཟིན་ན་བདག་འཛིན་གཉིས་མིན་པའི་རྟོག་པ་དུ་མ་ཞིག་ཡོད་པ་ཤེས་པར་འགྱུར་བས་རྟོག་པས་གང་གཟུང་གི་ཡུལ་ཐམས་ཅད་དེ་ཁོ་ན་ཉིད་ལ་དཔྱོད་པའི་རིགས་པས་འགོག་པར་འདོད་པའི་ལོག་རྟོག་ཐམས་ཅད་ལྡོག་པར་འགྱུར་རོ་ཞེས་བྱ་བ་བྲིས་སོ། །དེ་ལ་རང་རྒྱུད་པས་བློ་ལ་སྣང་བའི་དབང་གིས་བཞག་པ་མ་ཡིན་པར་ཆོས་དེ་རྣམས་ཀྱི་སྡོད་ལུགས་ཡོད་པ་རིགས་པའི་དགག་བྱར་གྱུར་པའི་བདེན་ཚད་དུ་ཁས་ལེན་ཅེས་པ་ཁྱོད་ལ་འགལ་ཏེ། ལེགས་ལྡན་འབྱེད་ཀྱིས་ཕྱི་དོན་རང་གི་ངོ་བོས་སྒྲུབ་པ་སོགས་གསུམ་དུ་ཁས་ལེན་ན། ཕྱི་དོན་བློ་ལ་སྣང་བའི་དབང་གིས་བཞག་པ་མ་ཡིན་པའི་སྡོད་ལུགས་སུ་ཁས་མི་ལེན་པ་འགལ་བའི་ཕྱིར་རོ། །དེ་ཉིད་རིགས་པས་དགག་པའི་སྐབས་སུ་དོན་ཤེས་ཆ་མེད་བཀག་ནས་ཆ་བཅས་སུ་བསྒྲུབ། ཆ་བཅས་ལ་ཆ་དང་ཆ་ཅན་ངོ་བོ་ཐ་དད་པ་བཀག་ནས་ངོ་བོ་གཅིག་ཏུ་བསྒྲུབ་ཅེས་པ་ཡང་མ་བརྟགས་བཞིན་དུ་རང་དགར་སྨྲ་བའམ། ཡང་ན་རང་རྒྱུད་པའི་སྐྱེས་ཆེན་རྣམས་ལ་སྐུར་བ་འདེབས་པ་སྟེ། རང་རྒྱུད་པའི་གཞུང་རྣམས་ལས་གཅིག་དུ་བྲལ་གྱི་ཕྱོགས་ཆོས་སྒྲུབ་པའི་ཚེ་ཆ་དུ་མ་དང་བཅས་པར་སྣང་བའི་རྟགས་ཀྱིས་གཅིག་ཏུ་བདེན་པ་བཀག ཁྱབ་བྱེད་གཅིག་ཁེགས་པས་ཁྱབ་བྱ་དུ་མ་ཁེགས་པ་ཙམ་ཞིག་གསུངས་ཀྱི། བདེན་མེད་བསྒྲུབ་པའི་རིགས་པས་མཐར་ཐུག་ཆ་དང་ཆ་ཅན་ངོ་བོ་གཅིག་ཏུ་བསྒྲུབ་པ་རང་རྒྱུད་པའི་གཞུང་གང་དུའང་མི་སྣང་བའི་ཕྱིར་རོ། །གཞན་ཡང་དེའི་ལུགས་ལ་ཆ་དང་ཆ་ཅན་ངོ་བོ་གཅིག་པ་དེ་བློ་ལ་སྣང་བའི་དབང་གིས་བཞག་པ་མ་ཡིན་པའི་སྡོད་ལུགས་ཡིན་པར་ཐལ། དོན་ལ་ཆ་དང་ཆ་ཅན་ངོ་བོ་གཅིག་པ་ཡིན་པ་གང་ཞིག བློ་ལ་ནི་ཡིད་ཇི་ལྟར་གཏད་ཀྱང་དེ་གཉིས་ངོ་བོ་ཐ་དད་ཡིན་པའི་ཕྱིར། གང་ལ་ལན་འདེབས། གཞན་ཡང་བློ་ལ་ཡིད་ཅི་ལྟར་གཏད་ཀྱང་བདག་དང་ཕུང་པོ་ངོ་བོ་ཐ་དད་དུ་སྣང་བར་ཐལ། དེ་ལ་ཤིང་རྟ་དང་ཤིང་རྟའི་ཆ་ཤས་ངོ་བོ་ཐ་དད་དུ་སྣང་བའི་ཕྱིར། འདོད་ན། ཕྱི་རོལ་པས་བདག་ཕུང་ངོ་བོ་ཐ་དད་དུ་ལྟ་བ་ལྔ་པོ་ཕུང་པོ་ལ་མ་ལྟོས་པར་བདག་ཡོད་པར་ལྟ་བ་ཡིན་པས་འཇིག་ལྟའི་གྲངས་སུ་མི་བགྲང་བར་གཞུང་འདིའི་འགྲེལ་པར་གསུངས་པ་ལྟར་དུ་ཁས་བླངས་པ་དང་འགལ་མི་འགལ་སོམས་ཤིག ཐལ་འགྱུར་བའི་ལུགས་ཀྱི་རིགས་པའི་དགག་བྱའི་ངོས་འཛིན་མིང་གི་ཐ་སྙད་ཀྱི་དབང་ཙམ་གྱིས་བཞག་པ་མ་ཡིན་པའི་ཡོད་པ་ལ་འདོད་པ་ནི་ཤིན་ཏུ་མི་འཐད་དེ། འདིའི་དགག་བྱ་ནི་བདེན་པ་དང་དོན་དམ་པར་ཡོད་པ་སོགས་དྲུག་ཡིན་པས་ཐ་སྙད་དུའང་མེད་པར་ཁས་བླངས་ལ། སྔ་མ་ནི་ཐ་སྙད་དུ་ཡོད་པའི་ཕྱིར་རོ། །མ་གྲུབ་ན། ལྟོ་ལྡིར་ཞབས་ཞུམ་ལ་བུམ་པ་ཞེས་མིང་བཏགས་པ་དང་། རྫོགས་པའི་སངས་རྒྱས་ལ་ཐམས་ཅད་མཁྱེན་པ་ཞེས་མིང་བཏགས་པ་གཉིས་མིང་དུ་བཏགས་པ་ཙམ་གྱི་དབང་གིས་བཞག་པར་མཚུངས་པར་ཐལ། དེ་གཉིས་མིང་གིས་བཏགས་པ་ཙམ་གྱིས་བཞག་པ་མ་ཡིན་པའི་དོན་མེད་པར་མཚུངས་པའི་ཕྱིར། འདོད་ན། དེ་གཉིས་འདོད་རྒྱལ་བའི་མིང་དུ་མཚུངས་པར་འགྱུར་རོ། །དེས་ན་མིང་གིས་བཏགས་པའི་དོན་བཤད་པ་རྒྱུ་མཚན་ཅན་གྱི་མིང་རྣམས་ལ་ནི་ཐ་སྙད་དཔྱོད་བྱེད་ཀྱི་རིགས་པས་བཙལ་བའི་ཚེ་རྙེད་པ་ནི་ཐལ་རང་གཉིས་ཀ་མཚུངས་ལ། དོན་དམ་དཔྱོད་བྱེད་ཀྱི་རིགས་པས་བཙལ་བའི་ཚེ་མི་རྙེད་པ་ནི་གཉིས་ཀར་འདོད་པས་འདི་ཐལ་འགྱུར་བའི་ཐུན་མོང་མ་ཡིན་པའི་དགག་བྱ་ཡིན་ཅེས་པ་ནི་སྒྲུབ་བྱེད་མེད་པའི་དམ་བཅའ་ཙམ་དུ་ཟད་དོ། །དེ་ལྟར་བདེན་འཛིན་ལེགས་པར་ངོས་ཟིན་ན། བདག་འཛིན་གཉིས་མ་ཡིན་པའི་རྟོགས་པ་དུ་མ་གཅིག་ཡོད་པ་ཤེས་པར་འགྱུར་བས་རྟོགས་པས་གང་བཟུང་གི་ཡུལ་ཐམས་ཅད་དེ་ཁོ་ན་ཉིད་ལ་དཔྱོད་པའི་རིགས་པས་འགོག་པར་འདོད་པའི་ལོག་རྟོག་ཐམས་ཅད་ལྡོག་པར་འགྱུར་རོ་ཞེས་པ་ནི་ལོག་རྟོག་རྒྱ་ཆེས་ཏེ། ཤེར་ཕྱིན་གྱི་མདོ་ལས། གཟུགས་སྟོང་ཞེས་བྱ་བར་སྤྱོད་ན་མཚན་མ་ལ་སྤྱོད་དོ། །མི་སྟོང་ཞེས་བྱ་བར་སྤྱོད་ན་མཚན་མ་ལ་སྤྱོད་དོ། །ཞེས་སོགས་མཐའ་གཉིས་སུ་མངོན་པར་ཞེན་པའི་འཛིན་པ་ཐམས་ཅད་མཚན་འཛིན་ཡིན་པར་གསུངས་པ་དེའང་ལོག་རྟོགས་ཏུ་འགྱུར་རོ། །དཀོན་མཆོག་བརྩེགས་པའི་མདོར། འོད་སྲུང་གང་ཟག་གི་བདག་ཏུ་ལྟ་བ་རི་རབ་ཙམ་ནི་སླའི་སྟོང་པ་ཉིད་དུ་ལྟ་བ་མངོན་པའི་ང་རྒྱལ་ཅན་ནི་དེ་ལྟ་མ་ཡིན་ནོ། །ཞེས་པ་འདིའང་ལོག་རྟོག་ཏུ་འགྱུར་རོ། །མགོན་པོ་བྱམས་པས། གཟུགས་སོགས་ཕུང་པོ་སྟོང་ཉིད་ལ། །སྤྱོད་པའི་འདུ་ཤེས་མི་མཐུན་ཕྱོགས། །ཞེས་པ་འདིའང་ལོག་རྟོག་ཏུ་འགྱུར་རོ། །འཕགས་པ་ཀླུ་སྒྲུབ་ཀྱིས། སྟོང་ངོ་ཞེས་ཀྱང་མི་བརྗོད་ལ། །མི་སྟོང་ཞེས་ཀྱང་མི་བརྗོད་དོ། །གཉིས་དང་གཉིས་མིན་མི་བྱ་སྟེ། །གདགས་པའི་དོན་དུ་བརྗོད་པར་བྱ། །ཞེས་དང་། ལྟ་བ་ཐམས་ཅད་སྤོང་བའི་ཕྱིར། །སྟོང་ཉིད་བདུད་རྩི་སྟོན་མཛད་ན། །གང་ཞིག་དེ་ལའང་ཞེན་གྱུར་པ། །དེ་ནི་ཁྱེད་ཀྱིས་ཡོངས་སུ་སྨད། །ཅེས་པ་འདིའང་ལོག་རྟོག་ཏུ་འགྱུར་རོ། །འཕགས་པ་ལྷས། དེ་ཕྱིར་དངོས་ཡོད་མི་བྱ་ཞིང་། །དངོས་པོ་མེད་པའི་ཡིད་ཀྱང་སྤང་། །ཀུན་མཁྱེན་གོ་འཕང་འདོད་རྣམས་ཀྱིས། །དེ་བཞིན་བར་དུའང་གནས་མི་བྱ། །ཞེས་དང་། ཡོད་མིན་མེད་མིན་ཡོད་མེད་མིན། །གཉིས་ཀའི་བདག་ཉིད་ཀྱང་མིན་པས། །མཐའ་བཞི་ལས་གྲོལ་དབུ་མ་པ། །མཁས་པ་རྣམས་ཀྱི་དེ་ཁོ་ན། །ཞེས་པ་འདིའང་ལོག་རྟོག་ཏུ་འགྱུར་ཏེ། ཁྱེད་བདེན་པ་ཁོ་ན་དགག་བྱར་བྱས་ནས། བདེན་པར་མེད་པ་དང་། བློ་ཕུང་གསུམ་པ་གཉིས་ཀ་ལ་གནས་པར་འདོད་པའི་ཕྱིར་རོ། །དེས་ན་ལྟ་བ་འདི་ནི་འཕགས་པ་ལྷས། དངོས་པོ་མེད་པ་ཉི་ཚེ་ལ། །རྨོངས་པ་རྣམས་ནི་ཉེ་བར་གནས། །ཁོད་མྱགས་དམན་པའི་གནས་ལ་ནི། །བླུན་པོ་དེ་དག་འདི་ན་གནས། །ཞེས་པའི་ལྟ་བར་སོང་ཉེན་ཡོད་པས་བག་ཡོད་མཛད་འཚལ་ལོ། །དེས་ན་སྒྲོ་སྐུར་དང་བྲལ་བའི་ཐལ་རང་གི་ཁྱད་པར་ནི་དོན་དམ་སྤྲོས་བྲལ་གྱི་ལྟ་བའི་སྒོ་ནས་མི་ཕྱེ་སྟེ་ཐོག་མར་སྡུག་བསྔལ་གྱི་རྒྱུར་འགྱུར་པའི་བདེན་འཛིན་གྱི་ཞེན་ཡུལ་བཀག་ནས་དེའི་འོག་ཏུ་མཐའ་ཕྱི་མ་གསུམ་བཀག་པའི་མཐའ་བཞིའི་སྤྲོས་བྲལ་ཀླུ་སྒྲུབ་ཀྱི་དགོངས་པ་ཅི་ལྟ་བ་བཞིན་ལུགས་གཉིས་ཀས་བཞེད་པའི་ཕྱིར་རོ། །སྔ་རབས་པ་དག་དམ་བཅའ་ཁས་ལེན་པ་དང་མི་ལེན་པ་ལ་འདོད་པའང་མི་འཐད་དེ། བདག་ལས་མ་ཡིན་གཞན་ལས་མིན། །ཞེས་སོགས་ཀྱི་ཚིགས་བཅད་དེས། མཐའ་བཞིའི་སྐྱེ་བ་བཀག་པའི་དམ་བཅའ་སྟོན་པར་སློབ་དཔོན་ཟླ་བས་བཞེད་པའི་ཕྱིར་རོ། །ཁ་ཅིག་རྣམ་བཅད་དགག་པའི་དམ་བཅའ་འདོད་པར་མཚུངས་ཀྱང་ཡོངས་གཅོད་སྒྲུབ་པའི་དམ་བཅའ་ཡོད་མེད་ཀྱི་ཁྱད་པར་འདོད་པ་ཡང་མི་འཐད་དེ། ཉན་ཐོས་སངས་རྒྱས་འབྲིང་རྣམས་ཐུབ་དབང་སྐྱེས། །ཞེས་སོགས་སྒྲུབ་པའི་དམ་བཅའ་མང་དུ་ཡོད་པའི་ཕྱིར་རོ། །དེས་ན་འདི་གཉིས་ཀྱི་ཁྱད་པར་གྱི་གཙོ་བོ་ནི་དོན་དམ་སྒྲུབ་བྱེད་ཀྱི་རིགས་པ་བཀོད་ཚུལ་གྱི་སྒོ་ནས་འཇོག་སྟེ། ཀླུ་སྒྲུབ་ཀྱི་མཐའ་བཞིའི་སྐྱེ་བ་བཀག་པའི་དམ་བཅའ་གསུངས་པ་སངས་རྒྱས་བསྐྱངས་ཀྱིས་ཐལ་འགྱུར་གྱི་རིགས་པས་བསྒྲུབ། ལེགས་ལྡན་འབྱེད་ཀྱིས་རང་རྒྱུད་ཀྱི་རིགས་པས་བསྒྲུབ་པ་ལ་ཐལ་རང་གཉིས་སུ་ཕྱེ་བའི་ཕྱིར་རོ། །དེ་ལྟར་བཤད་ན་དོན་དམ་སྒྲུབ་བྱེད་ཀྱི་རིགས་པའི་ཁྱད་པར་དང་། ཐ་སྙད་ཀུན་རྫོབ་འཇོག་ཚུལ་གྱི་ཁྱད་པར་གཉིས་ལས། དང་པོ་ལ་ཆོས་ཅན་དང་། ཆོས་དང་། དམ་བཅའ་དང་། གཏན་ཚིགས་དང་། དཔེ་དང་། སྦྱོར་ངག་གི་ཁྱད་པར་དང་དྲུག་ལས། དང་པོ་ནི། རང་རྒྱུད་པས་ནང་གི་འདུ་བྱེད་ལྟ་བུ་བྱེ་བྲག་ཆོས་ཅན་དུ་འཛིན་ལ། ཐལ་འགྱུར་བས་དེ་བཀག་ནས་གང་ལ་དགག་བྱའི་ཆོས་དེ་དགག་དགོས་པའི་དངོས་པོ་ཐམས་ཅད་ཆོས་ཅན་དུ་འཛིན་ཏེ། བུམ་པ་ལ་སོགས་པའི་དངོས་པོ་ཐམས་ཅད་བདག་ལས་སྐྱེ་བ་མེད་དེ་ཞེས་པ་ལྟ་བུའོ། །གཉིས་པ་ནི། རང་རྒྱུད་པས་དགག་བྱ་ལ་དོན་དམ་གྱི་ཁྱད་པར་སྦྱར་ནས་དོན་དམ་པར་བདག་ལས་སྐྱེ་བ་མེད་པ་སོགས་བཞི་བསྒྲུབ་བྱའི་ཆོས་སུ་འདོད་ལ། ཐལ་འགྱུར་བས་དེ་བཀག་ནས་མཐའ་བཞིའི་སྐྱེ་བ་ནི་ཐ་སྙད་དུ་ཁས་མི་ལེན་པས་དོན་དམ་གྱི་ཁྱད་པར་སྦྱར་མི་དགོས་ཤིང་། སྐྱེ་བ་ཙམ་བཀག་ན་ཡང་མཐར་ཐུག་དཔྱོད་པའི་རིག་ངོ་ཡིན་པས་དོན་དམ་གྱི་ཁྱད་པར་སྦྱར་མི་དགོས་པར་བཞེད་དོ། །གསུམ་པ་ནི། རང་རྒྱུད་པས་དམ་བཅའ་བཞི་པོ་ཆོས་ཅན་ཚད་མས་གྲུབ་པའི་སྟེང་དུ་ཁྱད་པར་གྱི་ཆོས་དམ་འཆའ་བས་རང་རྒྱུད་ཀྱི་དམ་བཅར་འདོད་ལ། ཐལ་འགྱུར་བས་ཆོས་ཅན་དེ་ཉིད་ཀྱི་གནས་ལུགས་ལ་དཔྱོད་པའི་སྐབས་ཡིན་པས། ཁྱད་གཞི་ཚད་མས་གྲུབ་པའི་སྟེང་དུ་ཁྱད་པར་གྱི་ཆོས་དམ་འཆའ་བ་མ་ཡིན་གྱིས། གཞན་གྱི་ལོག་རྟོག་འགོག་པའི་དམ་བཅའ་ཙམ་ཡིན་པས་ཐལ་འགྱུར་གྱི་དམ་བཅར་བཞེད་དོ། །བཞི་པ་ནི། རང་རྒྱུད་པས་རང་རྒྱུད་ཀྱི་བསྒྲུབ་བྱ་དེ་བསྒྲུབ་པའི་ཆེད་དུ་རྒོལ་ཕྱིར་རྒོལ་གཉིས་ཀ་ལ་གྲུབ་པའི་གཏན་ཚིགས་བཀོད་པས་རང་རྒྱུད་ཀྱི་གཏན་ཚིགས་སུ་བཞེད་ལ། ཐལ་འགྱུར་བས་དེ་རིགས་པ་དུ་མས་བཀག་ནས། ཕྱི་རྒོལ་ཉིད་ལ་གྲགས་པའི་གཏན་ཚིགས་བཀོད་ནས་འགལ་བ་བརྗོད་པ་ཙམ་ཡིན་པས་ཐལ་འགྱུར་གྱི་གཏན་ཚིགས་སུ་བཞེད་དོ། །ལྔ་པ་ནི་རང་རྒྱུད་པས་མཐུན་དཔེ་ཚད་མས་གྲུབ་པའི་སྟེང་དུ་ཁྱབ་པ་རྒོལ་བ་གཉིས་ཀ་ལ་གྲུབ་དགོས་པས་རང་རྒྱུད་ཀྱི་དཔེར་བཞེད་ལ། ཐལ་འགྱུར་བས་ཕྱིར་རྒོལ་ཉིད་ལ་གྲགས་པའི་དཔེ་ཙམ་ཡིན་གྱི་རང་ཉིད་དཔེ་དེའི་སྟེང་དུ་ཁྱབ་པ་གྲུབ་པར་མི་བཞེད་པས་ཐལ་འགྱུར་གྱི་མཐུན་དཔེར་བཞེད་དོ། །དྲུག་པ་ནི་གཞན་དོན་རྗེས་དཔག་ཐམས་ཅད་ཀྱང་རང་རྒྱུད་པས་རང་རྒྱུད་ཀྱི་སྦྱོར་ངག་ཏུ་འདོད་ལ། ཐལ་འགྱུར་བས་ཆོས་ཅན་དང་། དཔེ་དང་གཏན་ཚིགས་ཐམས་ཅད་ཕྱིར་རྒོལ་ཉིད་ལ་གྲགས་པ་བརྗོད་པའི་སྒོ་ནས་ཕྱིར་རྒོལ་གྱི་ལོག་རྟོག་བཟློག་པ་ཙམ་ཡིན་པས་གཞན་ལ་གྲགས་ཀྱི་རྗེས་དཔག་ཏུ་བཞེད་དོ། །འདི་ལ་ཚིག་གསལ་ལས། རང་ལ་གྲགས་ཀྱི་རྗེས་དཔག་ཞེས་གསུངས་པ་ནི་ཕྱིར་རྒོལ་རང་ལ་གྲགས་པའི་རྗེས་དཔག་ཅེས་པའི་དོན་ཡིན་པས་དོན་གཅིག་གོ །མཁས་རློམ་དག་རང་རྒྱུད་པས་རང་གི་མཚན་ཉིད་ཀྱིས་གྲུབ་པའི་ཆོས་བསྒྲུབ་དགོས་པས་རང་རྒྱུད་ཀྱི་གཏན་ཚིགས་ཁས་ལེན་ལ་ཐལ་འགྱུར་བས་དེ་བསྒྲུབ་མི་དགོས་པས་རང་རྒྱུད་ཀྱི་གཏན་ཚིགས་ཁས་མི་ལེན་པ་ཡིན་ནོ་ཞེས་སྨྲ་བ་ནི་ཕྱོགས་གར་ཡོད་ཙམ་ཡང་མ་མཐོང་བ་སྟེ། རང་རྒྱུད་པས་མཐའ་བཞིའི་སྐྱེ་བ་བཀག་པའི་དམ་བཅའ་བསྒྲུབ་པའི་སྐབས་སུ་རང་གི་མཚན་ཉིད་ཀྱིས་གྲུབ་པའི་ཆོས་སྒྲུབ་པར་ཐལ་བའི་ཕྱིར་རོ། །ཐ་སྙད་དུ་རང་རྒྱུད་ཀྱི་གཏན་ཚིགས་དང་། རང་རྒྱུད་ཀྱི་དམ་བཅའ་ཁས་ལེན་མི་ལེན་གྱི་སྒོ་ནས་ཕྱེ་བ་ནི་མི་འཐད་དེ། ཐལ་འགྱུར་བས་ཀྱང་དུ་བའི་རྟགས་ལས་དུ་ལྡན་ལ་མེ་ཡོད་དུ་བསྒྲུབ་པ་དང་། རིགས་སད་པའི་ལུས་ངག་གི་རྟགས་ལས་ཕ་རོལ་པོ་རིགས་སད་པར་བསྒྲུབ་པ་དང་། ཕྱིར་མི་ལྡོག་པའི་ལུས་ངག་གི་རྟགས་ལས་ཕ་རོལ་པོ་ཕྱིར་མི་ལྡོག་པར་བསྒྲུབ་པ་སོགས་གཏན་ཚིགས་དང་དཔེ་རྒོལ་བ་གཉིས་ཀ་ལ་མཐུན་སྣང་དུ་གྲུབ་པའི་སྒོ་ནས་ཆོས་ཅན་མཐུན་སྣང་དུ་གྲུབ་པའི་སྟེང་དུ་ཁྱད་པར་གྱི་ཆོས་སྒྲུབ་པ་དུ་མ་ཡོད་པའི་ཕྱིར་རོ། །འདི་ཙམ་གྱིས་རང་རྒྱུད་ཀྱི་གཏན་ཚིགས་སུ་མི་འགྱུར་ན་སྔར་གྱི་རང་རྒྱུད་པས་བཀོད་པ་དེ་དག་རང་རྒྱུད་ཀྱི་གཏན་ཚིགས་སུ་ཅི་ལྟར་འགྱུར་ལེགས་པར་སོམས་ཤིག དེས་ན་རང་རྒྱུད་ཀྱི་དོན་ནི་རང་དབང་ཡིན་ལ་རང་དབང་གི་དོན་ནི་བདེན་གྲུབ་ཡིན་ཅེས་སོགས་གཞི་མེད་ཀྱི་སྨྲ་བའི་སྒོ་ནས་གདུལ་བྱ་བསླུ་བར་མ་བྱེད་ཅིག འདི་དག་ནི་མདོར་བསྡུས་པ་ཙམ་ཡིན་ལ་རྒྱས་པར་གཞན་དུ་འཆད་པར་འདོད་ཅིང་། རྣམ་དཔྱོད་དང་ལྡན་པ་དག་གིས་ཚིག་གསལ་ལས་ཤེས་པར་བྱའོ། །གཉིས་པ་ལ་གཞི་དང་། ལམ་དང་། འབྲས་བུའི་ཁྱད་པར་གསུམ་ལས། དང་པོ་ལ་ཐ་སྙད་དུ་གཞན་སྐྱེ་ཁས་མི་ལེན་པ་དང་། ཁས་ལེན་པ་དང་། འདུས་བྱས་དང་མི་བསླུ་བའི་གཞི་མཐུན་ཁས་མི་ལེན་པ་དང་། ཁས་ལེན་པ་དང་། ཚད་མའི་མཚན་ཉིད་མི་བསླུ་བའི་ཤེས་པར་མི་འདོད་པ་དང་། འདོད་པ་དང་ཚད་མ་ལ་མངོན་རྗེས་གཉིས་དང་། དེའི་སྟེང་དུ་དཔེ་ཉེར་འཇལ་དང་། ལུང་ཚད་མ་སྟེ་བཞིར་གྲངས་ངེས་པ་དང་། མངོན་རྗེས་གཉིས་སུ་གྲངས་ངེས་པར་འདོད་པའི་ཁྱད་པར་དང་། ཡང་ལོག་གི་ཁྱད་པར་ཡུལ་ཡུལ་ཅན་གཉིས་ཀ་ལ་འབྱེད་པ་དང་། ཡུལ་ཅན་ལ་མི་འབྱེད་པའི་ཁྱད་པར་རྣམས་སོ། །གཉིས་པ་ནི་ལམ་གྱི་སྐབས་སུ་ཉན་རང་གིས་ཆོས་ཀྱི་བདག་མེད་རྟོགས་པར་འདོད་པ་དང་། མ་རྟོགས་པར་འདོད་པའི་ཁྱད་པར་དང་། འཕགས་པའི་མཉམ་བཞག་སྣང་མེད་དང་། སྣང་བཅས་སུ་འདོད་པའི་ཁྱད་པར་གཉིས་སོ། །གསུམ་པ་ནི་སངས་རྒྱས་ཀྱི་སར་མཉམ་རྗེས་ཐ་དད་མེད་པར་འདོད་པ་དང་། ཡོད་པར་འདོད་པ་རྣམས་ཏེ་ཟུང་དུ་སྦྱར་བ་དེ་དག་གི་དང་པོ་རྣམས་ནི་ཐལ་འགྱུར་བའི་དང་། ཕྱི་མ་རྣམས་ནི་རང་རྒྱུད་པའི་ཡིན་ནོ། །གཉིས་པ་རང་རྒྱུད་པའི་ལུགས་དགག་པ་ནི་དེ་ལྟར་དངོས་པོ་རང་བཞིན་མེད་པར་སྒྲུབ་པའི་སྐབས་སུ་ཆོས་ཅན་རྒོལ་ཕྱིར་རྒོལ་གཉིས་ཀ་ལ་གྲུབ་པར་འདོད་པ་མི་འཐད་དེ། ཆོས་ཅན་དེའི་གནས་ཚུལ་ལ་དཔྱད་པའི་བློ་ངོར་ཆོས་ཅན་དེ་ཉིད་གྲུབ་ན་དེ་བདེན་གྲུབ་ཏུ་ཐལ་བའི་ཕྱིར་རོ། །ཞེས་པ་ནི་ཐལ་འགྱུར་བའི་རིགས་པའི་གཙོ་བོར་སྣང་ཞིང་། གཞན་ཡང་དབུ་མ་པ་ཡིན་ན་རང་གི་རྒྱུད་ཀྱི་རྗེས་སུ་དཔག་པར་བྱ་བ་རིགས་པ་མ་ཡིན་ཏེ། ཕྱོགས་གཞན་ཁས་ལེན་པ་མེད་པའི་ཕྱིར་རོ། །ཞེས་པའི་དོན་དངོས་པོ་རང་བཞིན་མེད་པར་བསྒྲུབ་པའི་སྐབས་སུ་རང་རྒྱུད་ཀྱི་གཏན་ཚིགས་མི་རིགས་ཏེ། རིགས་ན་ཆོས་ཅན་དངོས་པོ་ཚད་མས་གྲུབ་པའི་སྟེང་དུ་དགག་ཆོས་རང་བཞིན་བཀག་ནས་ཁྱད་པར་གྱི་ཆོས་རང་བཞིན་མེད་པ་བསྒྲུབ་དགོས་པ་ལས་ཆོས་ཅན་ཚད་མས་གྲུབ་པའི་སྟེང་དུ་རང་བཞིན་ཡོད་པ་ལས་ཕྱོགས་གཞན་ཁྱད་ཆོས་རང་བཞིན་མེད་པ་ཡང་ཁས་མ་བླངས་པའི་ཕྱིར་ཏེ། དེའི་ཚེ་ཆོས་ཅན་ཉིད་མ་གྲུབ་པའི་ཕྱིར། ཞེས་པའི་དོན་ཡིན་ལ། གཞུང་འདིའི་དོན་འཆད་ཚུལ་བོད་ཕྱི་མ་དག་གིས་གསུམ་ཙམ་སྣང་ཡང་ཕྱོགས་སུ་ཕྱིན་པ་ནི་གཅིག་ཀྱང་མི་སྣང་ངོ་། །ཐ་སྙད་དུ་གཞན་སྐྱེ་ཡོད་པ་འགོག་པ་ནི་གཞུང་ལས་གསལ་ལ། འདུས་བྱས་ལ་མི་བསླུ་བ་འདོད་པའི་ཡང་མི་འཐད་དེ། མདོ་ལས། བདེན་པ་དམ་པ་ནི་གཅིག་ཁོ་ན་སྟེ། འདི་ལྟ་སྟེ་མི་བསླུ་བའི་ཆོས་ཅན་གྱི་མྱ་ངན་ལས་འདས་པའོ་ཞེས་དང་། ཀླུ་སྒྲུབ་ཀྱིས་མྱ་ངན་འདས་པ་བདེན་གཅིག་པུ། །རྒྱལ་བ་རྣམས་ཀྱིས་གང་གསུངས་པ། །དེ་ཚེ་ལྷག་མ་ལོག་པ་ཞེས། །མཁས་པ་ཅི་ཕྱིར་འདོད་མི་བྱེད། །ཅེས་དང་། འདུ་བྱེད་ཐམས་ཅད་བསླུ་བའི་ཆོས། །དེས་ན་དེ་དག་བརྫུན་པ་ཡིན། །ཅེས་གསུངས་པས་སོ། །འདི་ནི་ཐ་སྙད་འདོད་ཚུལ་མི་འདྲ་བའི་ཁྱད་པར་གྱི་གཙོ་བོར་སྣང་བས་དགག་པ་སྟེ། དཔལ་ལྡན་ས་སྐྱ་པཎྜི་ཏས། དབུ་ཚད་གྲུབ་མཐའི་རྣམ་དབྱེ་ནི། །གུས་པས་ཁྱོད་ལ་ཞུ་འོ་སྐད། །འདི་དོན་སྨྲ་བ་མང་ན་ཡང་། །འཇམ་པའི་དབྱངས་ཀྱིས་རྗེས་བཟུང་བས། །དོན་བཞིན་རྟོགས་པ་ཁོ་བོ་ཙམ། །ཐ་སྙད་དུ་ནི་མི་བསླུ་བ། །འདོད་པ་དེ་ནི་ཚད་མའི་ལུགས། །རང་རྒྱུད་དེ་དང་ཆ་མཐུན་ལ། །ཐལ་འགྱུར་བ་དང་ཐ་སྙད་དུ། །བདེན་པ་མི་འདོད་མདོར་བསྡུས་པའོ། །ཞེས་གསུངས་པས་སོ། །གཞན་རྣམས་ཀྱི་སྤྲོས་པ་ནི་རེ་ཞིག་མ་བྲིས་སོ། །གསུམ་པ་ཐལ་འགྱུར་བའི་ལུགས་སྒྲུབ་པ་བྱེ་བྲག་ཏུ་བཤད་པ་ལ་གཉིས་ཏེ། རྣམ་གཞག་བཀོད་པ་དང་། རྣམ་གཞག་དེའི་སྐྱོན་སྤང་བའོ། །དང་པོ་ལ་གསུམ་སྟེ། རང་ཕྱོགས་སྒྲུབ་པ་དང་། གཞན་ཕྱོགས་དགག་པ་དང་། རང་ཕྱོགས་ལ་ཉེས་པ་སྤོང་བའི་རྣམ་གཞག་གོ །དང་པོ་ལ་བསྒྲུབ་བྱ་ནི་ཀུན་རྫོབ་སྒྱུ་མ་ལྟ་བུ་དང་། དོན་དམ་སྤྲོས་བྲལ་གཉིས་ཡིན་ལ། དེ་གཉིས་ཀ་ལ་ཡང་ཐོག་མར་སྣང་བ་ལ་བདེན་པ་དགག་དགོས་པས་སྣང་བ་བདེན་མེད་བསྒྲུབ་བྱའི་གཙོ་བོ་ཡིན་ནོ། །སྒྲུབ་བྱེད་ནི་ལུང་དང་རིགས་པ་གཉིས་ལས། ལུང་ནི་ངེས་དོན་གྱི་མདོ་སྡེ་རྣམས་དང་། རིགས་པ་ནི་ཐལ་འགྱུར་གྱི་རིགས་པའོ། །གཉིས་པ་ལ་དགག་བྱ་ངོས་བཟུང་བ་དང་། འགོག་བྱེད་ཀྱི་རིགས་པ་བཤད་པ་གཉིས། དང་པོ་ལ་ལམ་གྱི་དགག་བྱ་ནི་འཁྲུལ་པའི་སྣང་བ་མཐའ་དག་ཡིན་ལ། འདིར་ལུང་རིགས་ཀྱི་དགག་བྱ་ནི་ཡུལ་དང་ཡུལ་ཅན་གཉིས་ལས། དང་པོ་ལ་ཡང་ཀུན་བཏགས་ཀྱི་མ་རིག་པས་བཏགས་པ་དང་། ལྷན་སྐྱེས་ཀྱི་མ་རིག་པས་བཏགས་པ་གཉིས་ལས། དང་པོ་ནི་དངོས་པོར་སྨྲ་བ་དག་གིས་ལུང་རིགས་ལྟར་སྣང་གི་འཐད་པ་ལ་བརྟེན་ནས་རྟོག་པས་སྦྱར་བ་དག་སྟེ། འདི་ལ་ཡོད་པ་སྒྲོ་འདོགས་ཀྱི་མཐའ་དང་། མེད་པ་སྐུར་འདེབས་ཀྱི་མཐའ་གཉིས། དང་པོ་ལ། གང་ཟག་གི་བདག་དང་ཆོས་ཀྱི་བདག་གཉིས། དང་པོ་ནི། ཕྱི་རོལ་པས་བཏགས་པའི་ཕུང་པོ་ལས་དོན་གཞན་པའི་གང་ཟག་དང་། རང་སྡེ་མང་པོས་བཀུར་བས་བཏགས་པའི་ཕུང་པོ་དང་ངོ་བོ་གཅིག་པའི་གང་ཟག་དང་བརྗོད་དུ་མེད་པའི་གང་ཟག་རྣམས་སོ། །གཉིས་པ་ནི། ཕྱི་རོལ་མུ་སྟེགས་བྱེད་ནས་སེམས་ཙམ་པའི་བར་གྱིས་གཟུགས་སོགས་ཀྱི་དངོས་པོ་བདེན་གྲུབ་ཏུ་བཏགས་པ་རྣམས་སོ། །གཉིས་པ་ནི། མུ་སྟེགས་རྒྱང་འཕེན་པས། རྒྱུ་ལས་དགེ་སྡིག་དང་། འབྲས་བུ་ཚེ་ཕྱི་མའི་བདེ་སྡུག་སོགས་མེད་པར་བཏགས་པ་རྣམས་སོ། །གཉིས་པ་ལྷན་སྐྱེས་ཀྱི་མ་རིག་པས་བཏགས་པ་ནི་གྲུབ་མཐའ་ལ་ཞུགས་མ་ཞུགས་ཐམས་ཅད་ལ་ཐུན་མོང་དུ་ཡོད་པའི་གང་ཟག་ཏུ་འཛིན་པ་དང་། ཆོས་སུ་འཛིན་པ་གཉིས་ཀྱི་དམིགས་ཡུལ་གང་ཟག་དང་། ཆོས་སུ་འཇོག་ལ། འཛིན་སྟངས་ཀྱི་གཟུང་བྱ་བདེན་པ་ནི་གང་ཟག་གི་བདག་དང་། ཆོས་ཀྱི་བདག་ཏུ་འཇོག་པའོ། །གཉིས་པ་ཡུལ་ཅན་ནི། ཡུལ་དེ་དང་དེར་རྟོགས་པའི་བློ་དང་ལྟ་བ་ངན་པ་ཐམས་ཅད་ཡིན་ཏེ། བཞི་བརྒྱ་པ་ལས། རྟོག་པས་མཐོང་བ་འཆིང་བ་སྟེ། །དེ་ནི་འདི་རུ་དགག་པར་བྱ། །ཞེས་དང་། འཇུག་པ་ལས། དེ་ཕྱིར་རྟེན་འབྱུང་རིགས་པ་འདི་ཡིས་ནི། །ལྟ་ངན་དྲྭ་བ་མཐའ་དག་གཅོད་པར་བྱེད། །ཅེས་པ་ལྟར་རོ། །གཉིས་པ་འགོག་བྱེད་ཀྱི་རིགས་པ་ལ། འགལ་བ་བརྗོད་པའི་ཐལ་འགྱུར། གཞན་ལ་གྲགས་ཀྱི་རྗེས་དཔག རྒྱུ་མཚན་མཚུངས་པའི་མགོ་སྙོམས། སྒྲུབ་བྱེད་བསྒྲུབ་བྱ་དང་མཚུངས་པའི་མ་གྲུབ་པ་དང་བཞིའོ། །གསུམ་པ་རང་ཕྱོགས་ལ་ཉེས་པ་སྤོང་པའི་རྣམ་བཞག་ལ་གཉིས་ཏེ། ཀུན་རྫོབ་ལ་ལྟོས་ཏེ་ཉེས་པ་སྤོང་བ་དང་། དོན་དམ་ལ་ལྟོས་ཏེ་ཉེས་པ་སྤོང་བའོ། །དང་པོ་ནི། གཞུང་ནས་ཕ་རོལ་པོས་བཏགས་པ་ཁས་བླངས་ནས་ལེན་འདེབས་པ་ཡོད་དེ། དེ་ནི་གཞན་ངོར་དགོས་པ་ལ་ལྟོས་པའི་ལན་ཡིན་ནོ། །ཡང་འདི་ལ་བརྟག་པ་མི་འཇུག་ཅེས་ལན་འདེབས་པ་ཡོད་དེ། དེ་ནི་རྣལ་མའི་ལན་ཡིན་ནོ། །གཉིས་པ་ལ་དམ་བཅའ་མེད་པ་དང་། གཏན་ཚིགས་མེད་པ་གཉིས་ལས། དང་པོ་ནི་ཀླུ་སྒྲུབ་ཀྱིས། གལ་ཏེ་ངས་དམ་བཅས་འགའ་ཡོད། །དེས་ན་ང་ལ་སྐྱོན་དེ་ཡོད། །ང་ལ་དམ་བཅའ་མེད་པས་ན། །ང་ནི་སྐྱོན་མེད་ཁོ་ན་ཡིན། །ཅེས་པ་དང་། འཕགས་པ་ལྷས། ཡོད་དང་མེད་དང་ཡོད་མེད་ཅེས། །གང་ལ་ཕྱོགས་ནི་ཡོད་མིན་པ། །དེ་ལ་ཡུན་རིང་པོ་ན་འང་། །ཀླན་ཀ་བརྗོད་པར་ནུས་མ་ཡིན། །ཅེས་གསུངས་པའི་དོན་ལ། དེང་སང་གི་དབུ་མ་པ་དག བདེན་གྲུབ་ཀྱི་ཆོས་དམ་བཅས་པ་མེད་པས། སྐྱོན་མེད་ཅེས་པ་འབའ་ཞིག་ལ་འཆད་པ་ནི་མི་འཐད་དེ། ཡོད་མེད་སོགས་ཀྱི་དམ་བཅའ་གསུམ་ཀ་མེད་པར་གསུངས་པའི་ཕྱིར་རོ། །འོ་ན་ཅི་ལྟར་ཞེ་ན། མཐའ་བཞིའི་སྐྱེ་བ་དཔྱད་ནས་སྐྱེ་བ་བདེན་པ་བ་འགོག་པ་དང་། རྒྱུ་འབྲས་ཕྲད་མ་ཕྲད་དཔྱད་ནས་རྒྱུ་འབྲས་བདེན་པ་བ་འགོག་པ་སོགས་རང་ལ་མཚུངས་པའི་ལན་ལ་ནི་བདེན་པར་འགྲུབ་པའི་ཕྱོགས་ཁས་མ་བླངས་ཞེས་པ་ལ་འཆད་དགོས་པ་ཡོད་ཀྱང་། ཆོས་ཅན་དེ་ཉིད་ཀྱི་གནས་ཚུལ་ལ་དཔྱད་པའི་ཚེ་ཆོས་ཅན་སྣང་ཙམ་དེ་ཉིད་ཁས་ལེན་དགོས་པས་དཔྱད་པའི་ཉེས་པ་མཚུངས་སོ་ཞེས་པའི་ལན་ལ་ནི་ཆོས་ཅན་དེ་ཉིད་ཁས་མ་བླངས་པས་ཆོས་ཅན་ཚད་མས་གྲུབ་པའི་སྟེང་དུ་ཁྱད་པར་གྱི་ཆོས་དམ་འཆའ་བའི་རང་རྒྱུད་ཀྱི་དམ་བཅའ་མེད་ཅེས་པ་ལའང་འཆད་དགོས་པ་ཡོད་དེ། དཔེར་ན་དངོས་པོ་བདག་ལས་སྐྱེ་བ་མེད་པའི་སྐབས་སུ་ཡང་དེ་ལྟ་བུའི་རང་རྒྱུད་ཀྱི་དམ་བཅའ་མེད་པར་གསུངས་པ་ལྟ་བུའོ། །དེས་ན་དངོས་པོར་སྨྲ་བའི་ངོར་སྐྱོན་སྤོང་ཚུལ་དང་། རང་རྒྱུད་པའི་ངོར་སྐྱོན་སྤོང་ཚུལ་གཉིས་ཡོད་པར་ཤེས་པར་བྱའོ། །གཉིས་པ་གཏན་ཚིགས་མེད་པ་ནི། ཚིག་གསལ་ལས། དབུ་མ་པ་ཡིན་ན་རང་གི་རྒྱུད་ཀྱི་རྗེས་སུ་དཔག་པ་རིགས་པ་མ་ཡིན་ཏེ། ཕྱོགས་གཞན་ཁས་བླངས་པ་མེད་པའི་ཕྱིར་ཞེས་པ་སྟེ། གནས་ལུགས་ལ་དཔྱོད་པའི་སྐབས་སུ། གང་ལ་དཔྱད་པའི་གཞི་དབུ་མ་པ་ལ་མ་གྲུབ་པས་དེའི་སྟེང་དུ་དགག་ཆོས་ལས་གཞན་སྒྲུབ་ཆོས་ཀྱང་ཁས་བླངས་པ་མེད་པའི་ཕྱིར་རོ་ཞེས་པའོ། །གཉིས་པ་རྣམ་གཞག་དེའི་སྐྱོན་སྤོང་བ་ནི་འགལ་བ་བརྗོད་པའི་ཐལ་འགྱུར་གྱིས་སྤྲོས་པ་མཐའ་དག་གཅོད་མི་ནུས་ན་ཉི་ཚེ་བའི་སྟོང་པ་ཙམ་གྱིས་དབུ་མར་འགྲུབ་པར་འགྱུར་རོ། །ནུས་ན་ཅིག་ཆར་རམ་རིམ་གྱིས་གཅོད། ཅིག་ཆར་གཅོད་ན་རིགས་པ་གཞན་རྣམས་དོན་མེད་པར་འགྱུར། རིམ་གྱིས་གཅོད་ན་ཤེས་བྱ་མཐའ་ཡས་པས་སྤྲོས་པ་གཅོད་པའི་དུས་མེད་པར་འགྱུར་རོ་ཞེ་ན། རྟོག་པ་སེལ་འཇུག་ཡིན་པས་རིམ་གྱིས་གཅོད་ཀྱང་སྤྲོས་པ་ཆོད་པའི་དུས་མེད་པར་མི་འགྱུར་ཏེ། ཆོས་གཅིག་གི་སྟེང་དུ་བདེན་པའི་སྤྲོས་པ་ཆོད་ན་དེ་དང་རིགས་འདྲ་བའི་ཆོས་གཞན་ལ་ཡང་རིགས་པ་དེ་ཁ་སྤོ་ནུས་པའི་ཕྱིར། ཆོས་ཐམས་ཅད་ལ་སྤོ་ནུས་པའི་ངེས་པ་ནི་མེད་དེ། དངོས་པོར་སྨྲ་བ་བཞིན་ནོ། །འོན་ཀྱང་དེ་དག །རྣལ་འབྱོར་པ་ཡང་བློ་ཁྱད་ཀྱིས། །གོང་མ་གོང་མ་རྣམས་ཀྱིས་གནོད། །ཞེས་པའི་ཚུལ་གྱིས་རང་རང་གི་གྲུབ་མཐའ་བཏགས་པའི་གྲུབ་མཐའ་གཙོ་བོ་གྲུབ་མཐའ་གོང་མས་བཀག་པ་ན་དགག་བྱ་གཞན་མེད་པས། ཐུག་མེད་དུ་མི་འགྱུར་རོ། །གསུམ་པ་དེ་ཉིད་གཞུང་འདིར་རིགས་པས་སྒྲུབ་པའི་ཚུལ་ལ་གཉིས་ཏེ། མཐའ་བཞིའི་སྐྱེ་བ་རིགས་པས་དགག རང་གཞན་སྡེ་པའི་རྩོད་པ་སྤང་བའོ། །དང་པོ་ལ་གསུམ་སྟེ། རྟེན་འབྲེལ་བདེན་པའི་སྐྱེ་བ་བཀག་པའི་དོན་དུ་བཤད། རྟེན་འབྲེལ་རྟེན་ནས་སྐྱེ་བའི་དོན་དུ་བཤད། མཐའ་གཉིས་སྤངས་པའི་རྟེན་འབྲེལ་རྟོགས་པའི་ཕན་ཡོན་བཤད་པའོ། །དང་པོ་ལ་གསུམ་སྟེ། དམ་བཅའ་མདོར་བསྟན། རིགས་པ་རྒྱས་པར་བཤད། ཚུལ་དེས་གྲུབ་པའི་དོན་ནོ། །དང་པོ་ནི། དེ་ཉིད་སོགས་སོ། །གཉིས་པ་ལ་བཞི་སྟེ། བདག་ལས་དང་། གཞན་ལས་དང་། གཉིས་ཀ་ལས་དང་། རྒྱུ་མེད་པར་སྐྱེ་བ་དགག་པའོ། །དང་པོ་ལ་གཉིས་ཏེ། འགྲེལ་པ་མཛད་པའི་རིགས་པས་དགག བསྟན་བཅོས་མཛད་པའི་རིགས་པས་དགག་པའོ། །དང་པོ་ལ་གསུམ་སྟེ། དེ་ཁོ་ན་ཉིད་དུ་བདག་སྐྱེ་དགག འཇིག་རྟེན་གྱི་ཐ་སྙད་དུ་བདག་སྐྱེ་དགག དེ་གཉིས་ཀའི་གྲུབ་དོན་བསྡུ་བའོ། །དང་པོ་ལ་གཉིས་ཏེ། གྲགས་པའི་དོན་མི་རུང་བར་ཐལ་བ། མ་གྲགས་པའི་དོན་ཐོབ་པར་ཐལ་བའོ། །དང་པོ་ལ་གཉིས་ཏེ། སྐྱེ་བ་དོན་མེད་དུ་ཐལ་བ། སྐྱེ་བ་སྐབས་མེད་པར་ཐལ་བའོ། །དང་པོ་ནི་དེ་ནི་ཞེས་སོགས་ཏེ། སངས་རྒྱས་བསྐྱངས་ཀྱི་རིགས་པའོ། །གཉིས་པ་ནི། སྐྱེས་ཟིན་སོགས་ཏེ། ཟླ་བས་ཁ་བསྐང་བའོ། །གཉིས་པ་ལ་གསུམ་སྟེ། སྐྱེ་བ་ཐུག་པ་མེད་པར་ཐལ་བ། རྒྱུ་འབྲས་ངོ་བོ་འཆོལ་བར་ཐལ་བ། ཕན་ཚུན་རྟོགས་པ་མཚུངས་པར་ཐལ་བའོ། །དང་པོ་ནི། ས་བོན་སོགས་ཏེ། སངས་རྒྱས་བསྐྱངས་ཀྱི་རིགས་པའོ། །གཉིས་པ་ནི། བྱེད་རྒྱུ་སོགས་ཏེ། རྐང་པ་དང་པོ་གཉིས་ཀྱིས་ཐལ་བ་དངོས་དང་། ཕྱི་མ་གཉིས་ཀྱིས་དེའི་ཉེས་སྤོང་དགག་པའོ། །གསུམ་པ་ནི། གལ་ཏེ་སོགས་ཏེ། ཕྱི་མ་འདི་གཉིས་ཟླ་བས་ཁ་བསྐང་བའོ། །གཉིས་པ་ནི། གང་ཕྱིར་སོགས་ཏེ། འཇིག་རྟེན་གྱི་ཐ་སྙད་དུ་ཡང་ས་མྱུག་ལྟ་བུ་ལ་གཅིག་གི་ཐ་སྙད་ཁས་མི་ལེན་པ་ཡིན་གྱི། རྒྱུ་འབྲས་ཙམ་ལ་ནི་མ་ངེས་པར་མངོན་ནོ། །གསུམ་པ་ནི། དེ་ཕྱིར་སོགས་སོ། །གཉིས་པ་བསྟན་བཅོས་མཛད་པའི་རིགས་པས་དགག་པ་ནི། བདག་ལས་སོགས་ཏེ། རྩ་ཤེར་ལས། རྒྱུ་དང་འབྲས་བུ་གཅིག་ཉིད་དུ། །ནམ་ཡང་འཐད་པར་མི་འགྱུར་རོ། །རྒྱུ་དང་འབྲས་བུ་གཅིག་ཉིད་ན། །སྐྱེད་དང་བསྐྱེད་པ་གཅིག་ཏུ་འགྱུར། །ཞེས་དང་། གལ་ཏེ་ཤིང་འདི་མེ་ཡིན་ན། །བྱེད་པ་པོ་དང་ལས་གཅིག་འགྱུར། །ཞེས་གསུངས་པ་བཀོད་པའོ། །གཉིས་པ་གཞན་ལས་སྐྱེ་བ་དགག་པ་ལ་གཉིས་ཏེ། འདོད་པ་བརྗོད་པ་དང་། སུན་འབྱིན་བཤད་པའོ། །དང་པོ་ནི། རང་སྡེ་དངོས་པོར་སྨྲ་བ་རྣམས་ན་རེ། འདིར་དངོས་པོ་རྣམས་བདག་ལས་འབྱུང་བར་མི་འགྱུར་ཏེ། ཞེས་བྱ་བ་འདི་ངེས་པ་ཡིན་ལ། ཕྱོགས་འདི་ནི་རིགས་པ་ཉིད་ཀྱང་ཡིན་ན། གང་འདི་སྐད་དུ་གཞན་དག་ལས་ལྟ་ག་ལ་ཞིག་ཅེས་སྨྲས་པ་དེ་ནི་མི་རིགས་སོ། །འདི་ལྟར་གཞན་དུ་གྱུར་པའི་རྐྱེན་བཞི་པོ་རྒྱུ་དང་། དམིགས་པ་དང་། དེ་མ་ཐག་པ་དང་། དེ་བཞིན་དུ་བདག་པོ་སྟེ་རྐྱེན་རྣམས་དངོས་པོ་རྣམས་ཀྱི་བསྐྱེད་པར་བྱེད་པའོ་ཞེས་བྱ་བའི་གསུང་རབ་ལ་ལྟོས་ནས་མི་འདོད་བཞིན་དུ་ཡང་གཞན་ལས་སྐྱེ་བ་ཁས་བླང་བར་བྱའོ་ཞེས་ཟེར་རོ། །རྩ་ཤེར་ལས་ཀྱང་རབ་བྱེད་དང་པོར་གཞན་སྐྱེ་དགག་པའི་དབང་དུ་བྱས་ནས། རྐྱེན་རྣམས་བཞི་སྟེ་རྒྱུ་དང་ནི། །ཞེས་སོགས་ཚིགས་བཅད་གཅིག་གིས་ཕྱོགས་སྔ་བརྗོད་པ་དེ་ཉིད་འདིར་བླངས་པའོ། །གཉིས་པ་ལ་གསུམ་སྟེ། བདེན་པ་གཉིས་ལ་ལྟོས་པའི་གཞན་སྐྱེ་དགག དེ་ལྟར་དགག་པའི་ཕན་ཡོན་རྣམ་གཉིས་བསྟན། གཞན་སྐྱེ་སྒྲུབ་བྱེད་རྣམ་རིག་གྲུབ་མཐའ་བཟློག་པའོ། །དང་པོ་ལ་གཉིས་ཏེ། དོན་དམ་དུ་གཞན་ལས་སྐྱེ་བ་དགག་པ། ཀུན་རྫོབ་ཏུ་གཞན་ལས་སྐྱེ་བ་དགག་པའོ། །དང་པོ་ལ་གཉིས་ཏེ། གནོད་བྱེད་ཀྱི་རིགས་པ་བརྗོད། འཇིག་རྟེན་གྱི་གནོད་པ་སྤོང་བའོ། །དང་པོ་ལ་གསུམ་སྟེ། ཧ་ཅང་ཐལ་བའི་གནོད་བྱེད་བརྗོད། དུས་ལ་བརྟགས་ཏེ་གཞན་སྐྱེ་དགག མུ་བཞིར་བརྟགས་ཏེ་གཞན་སྐྱེ་དགག་པའོ། །དང་པོ་ལ་གཉིས་ཏེ། རིགས་མི་མཐུན་པ་ལས་སྐྱེ་བར་ཐལ། སྐྱེ་བ་ངེས་པ་མེད་པར་ཐལ་བའོ། །དང་པོ་ནི། གཞན་ལས་སོགས་ཏེ། རྩ་ཤེར་ལས། རྒྱུ་དང་འབྲས་བུ་གཞན་ཉིད་དུ། །ནམ་ཡང་འཐད་པར་མི་འགྱུར་རོ། །རྒྱུ་དང་འབྲས་བུ་གཞན་ཉིད་ན། །རྒྱུ་དང་རྒྱུ་མིན་མཚུངས་པར་འགྱུར། །ཞེས་གསུངས་པའི་རིགས་པའོ། །གཉིས་པ་ལ་གཉིས་ཏེ། ཐལ་བ་དངོས། རྩོད་པ་སྤོང་བའོ། །དང་པོ་ནི། ཐམས་ཅད་སོགས་ཏེ། འདི་གཉིས་ཀ་ཡང་རྒྱུ་མཚན་མཚུངས་པའི་མགོ་སྙོམས་སོ། །གཉིས་པ་ལ་གཉིས་ཏེ། རྩོད་པ་དང་ལན་ནོ། །དང་པོ་ནི། རབ་ཏུ་སོགས་སོ། །གཉིས་པ་ནི། ཇི་ལྟར་སོགས་ཏེ། སྒྲུབ་བྱེད་བསྒྲུབ་བྱ་དང་མཚུངས་པས་མ་གྲུབ་པའོ། །གཉིས་པ་ལ་གཉིས་ཏེ། དུས་ཐ་དད་ལ་གཞན་ཉིད་མེད་པས་གཞན་སྐྱེ་དགག དུས་མཉམ་པ་ལ་སྐྱེ་བ་མེད་པས་གཞན་སྐྱེ་དགག་པའོ། །དང་པོ་ལ་གཉིས་ཏེ། དགག་པ་དངོས། རྩོད་པ་སྤོང་བའོ། །དང་པོ་ནི། མྱུ་གུ་སོགས་སོ། །གཉིས་པ་ལ་གཉིས་ཏེ། གཞན་གཞུང་རྗེས་སུ་བརྗོད། དེ་ཉིད་བཟློག་བྱེད་བཤད་པའོ། །དང་པོ་ནི། ཇི་ལྟར་སོགས་སོ། །གཉིས་པ་ནི། གལ་ཏེ་སོགས་སོ། །གཉིས་པ་ནི། གལ་ཏེ་མིག་གི་སོགས་སོ། །གསུམ་པ་མུ་བཞིར་བརྟགས་ཏེ་གཞན་སྐྱེ་དགག་པ་ནི། བསྐྱེད་བྱ་སོགས་ཏེ། རྩ་ཤེར་ལས་འབྲས་བུ་ངོ་བོ་ཉིད་ཡོད་ན། །རྒྱུས་ནི་ཅི་ཞིག་སྐྱེད་པར་བྱེད། །འབྲས་བུ་ངོ་བོ་ཉིད་མེད་ན། །རྒྱུས་ནི་ཅི་ཞིག་སྐྱེད་པར་བྱེད། །སྐྱེ་བ་ཡོད་པ་མ་ཡིན་ན། །རྒྱུ་ཉིད་འཐད་པར་མི་འགྱུར་རོ། །རྒྱུ་ཉིད་འཐད་པ་ཡོད་མིན་ན། །འབྲས་བུ་གང་གིས་ཡིན་པར་འགྱུར། །ཞེས་པའི་རིགས་པས་འབྲས་བུ་ཡོད་པ་དང་། མེད་པ་བསྐྱེད་པ་གཉིས་ཀ་ཡིན་ན་ཡང་བཤད་ཟིན་པའི་ཉེས་པར་ཐལ་བས་དགག དེར་མ་ཟད་དབུ་མ་ལས། མྱ་ངན་འདས་པ་དངོས་པོ་དང་། །དངོས་མེད་གཉིས་ཀར་ཇི་ལྟར་འགྱུར། །དེ་གཉིས་གཅིག་ལ་ཡོད་མིན་ཏེ། །སྣང་བ་དང་ནི་མུན་པ་བཞིན། །ཞེས་དང་། བྱེད་པ་པོར་གྱུར་མ་གྱུར་པ། །གྱུར་མ་གྱུར་དེ་མི་བྱེད་དེ། །ཡིན་དང་མ་ཡིན་གྱུར་ཅིག་ལ། །ཕན་ཚུན་འགལ་བས་ག་ལ་ཡོད། །ཅེས་པའི་རིགས་པས་ཀྱང་འགོག་པའོ། །གཉིས་ཀ་དང་བྲལ་བ་ལ་ཡང་རྐྱེན་གྱིས་ཅི་ཞིག་བྱ་སྟེ། མི་སྲིད་པའི་ཕྱིར་རོ། །གཉིས་པ་འཇིག་རྟེན་གྱི་གནོད་པ་སྤང་བ་ལ་གཉིས་ཏེ། གཞན་གཞུང་རྗེས་སུ་བརྗོད། ཟློག་བྱེད་རིགས་པ་བཤད་པའོ། །དང་པོ་ནི། གང་གི་སོགས་ཏེ། དངོས་པོར་སྨྲ་བ་ན་རེ། གཞན་སྐྱེ་སྒྲུབ་པའི་རིགས་པ་གཞན་གྱིས་ཅི་ཞིག་བྱ་སྟེ། འཇིག་རྟེན་གྱིས་མཐོང་བ་འདི་རང་གི་ལྟ་བ་ལ་གནས་པ་ན་ཤིན་ཏུ་སྟོབས་དང་ལྡན་པ་ཡིན་ཞིང་། གཞན་ཁོ་ན་ལས་སྐྱེ་བར་ཡང་འཇིག་རྟེན་པས་མཐོང་བའི་ཕྱིར་གཞན་སྐྱེ་ཡོད་པར་གྲུབ་ཅིང་། གཞན་སྐྱེ་དགག་པ་ལ་གནོད་དོ་ཞེ་ན། གཉིས་པ་ལ་གསུམ་སྟེ། འཇིག་རྟེན་ཚད་མ་དགག་ཕྱིར་བདེན་གཉིས་རྣམ་དབྱེ་བསྟན། དེས་ན་དེ་ཉིད་སྐབས་སུ་འཇིག་རྟེན་གྱིས་མི་གནོད། འཇིག་རྟེན་ཉིད་ཀྱིས་གནོད་པའི་ཡུལ་གྱི་ཁྱད་པར་བཤད་པའོ། །དང་པོ་ལ་གཉིས་ཏེ། མཚན་ཉིད་སྤྱིར་བསྟན། མཚན་གཞི་སོ་སོར་བཤད་པའོ། །དང་པོ་ནི། དངོས་ཀུན་སོགས་ཏེ། འཇིག་རྟེན་གྱིས་མཐོང་བས་གནས་ལུགས་དཔྱོད་པའི་རིགས་པ་ལ་གནོད་པར་འདོད་པ་ཁྱོད་ལ་འཇིག་རྟེན་གྱི་བྱུང་ཚུལ་ཤིན་ཏུ་མང་ཞིང་རྒྱ་ཆེ་བ་མ་བཤད་པར་འཇིག་རྟེན་གྱིས་གནོད་པའི་བླ་བརྡོལ་ལས་བཟློག་པར་མི་ནུས་པས། འཇིག་རྟེན་གྱིས་གནོད་པ་དང་མི་གནོད་པའི་ཡུལ་ཁྱད་པར་ཅན་བསྟན་པའི་ཕྱིར། རེ་ཤིག་བདེན་པ་གཉིས་ཀྱི་རྣམ་བཞག་བཤད་པ་ནི། སངས་རྒྱས་བཅོམ་ལྡན་འདས་ཀྱིས་གདུལ་བྱ་ལ་ཐ་སྙད་ཀྱི་སྒོ་ནས་གནས་ལུགས་བསྟན་པའི་ཚེ། དངོས་པོ་ཐམས་ཅད་ལ་ཀུན་རྫོབ་དང་དོན་དམ་པའི་ངོ་བོ་གཉིས་བསྟན་ཏེ། དངོས་པོ་ཐམས་ཅད་ལ་འཕགས་པའི་མཉམ་བཞག་ཡེ་ཤེས་ཀྱིས་རང་གི་ངོ་བོ་སྟོང་ཉིད་རྙེད་པ་དང་། བརྫུན་པ་མཐོང་བའི་སོ་སོའི་སྐྱེ་བོའི་བློ་བརྫུན་པའི་སྟོབས་ལས་རང་གི་ངོ་བོ་ཡོད་པར་རྙེད་པ་ཉིད་ལ་བདེན་པ་གཉིས་སུ་བཞག་པ་ཡིན་གྱི། དེ་གཉིས་ངོ་བོ་ཐ་དད་དུ་ཡོད་པ་ནི་མ་ཡིན་ནོ། །དེ་ལྟར་བློའི་སྒོ་ནས་ངོ་བོ་གཉིས་འཛིན་པའི་མཐོང་བ་ཡང་དག་པའི་ཡུལ་ནི་དོན་དམ་བདེན་པ་ཡིན་ལ། མཐོང་བ་བརྫུན་པའི་ཡུལ་ནི་ཀུན་རྫོབ་བདེན་པའོ། །འདིར་ཁ་ཅིག འདིས་ནི་མྱུ་གུ་ལྟ་བུ་གཅིག་གི་ངོ་བོ་ལ་ཡང་ཕྱེ་ན་ཀུན་རྫོབ་ཡིན་པ་དང་། དོན་དམ་པའི་ངོ་བོ་གཉིས་ཡོད་པར་སྟོན་གྱི། མྱུ་གུའི་ངོ་བོ་གཅིག་ཉིད་སོ་སྐྱེ་དང་འཕགས་པ་ལ་ལྟོས་ནས་བདེན་པ་གཉིས་སུ་སྟོན་པ་གཏན་མ་ཡིན་ནོ། །དེ་ལྟར་བྱས་ན་ངོ་བོ་མེད་པའི་ཆོས་མི་སྲིད་པས། གཞི་གྲུབ་པ་ཡིན་ན། ངོ་བོ་གཅིག་དང་ཐ་དད་ལས་མ་འདས་ལ། ངོ་བོ་ཡོད་པ་ཁས་ལེན་ཀྱང་། རང་བཞིན་གྱིས་གྲུབ་པའི་ངོ་བོ་མེད་པ་མི་འགལ་ལོ་ཞེས་དང་། བདེན་གཉིས་ངོ་བོ་གཅིག་ལ་ལྡོག་པ་ཐ་དད་པ་བྱས་པ་དང་། མི་རྟག་པ་ལྟ་བུ་སྟེ། བྱང་ཆུབ་སེམས་འགྲེལ་ལས། ཀུན་རྫོབ་ལས་ནི་ཐ་དད་པར། །དེ་ཉིད་དམིགས་པ་མ་ཡིན་ཏེ། །ཀུན་རྫོབ་སྟོང་པ་ཉིད་དུ་བཤད། །སྟོང་ཉིད་ཁོ་ན་ཀུན་རྫོབ་ཡིན། །མེད་ན་མི་འབྱུང་ངེས་པའི་ཕྱིར། །བྱས་དང་མི་རྟག་པ་བཞིན་ནོ། །ཞེས་བྱ་བ་བྲིས་སོ། །དེ་ནི་མི་འཐད་དེ། མྱུ་གུའི་ངོ་བོར་གྱུར་པའི་ཀུན་རྫོབ་ཀྱི་ངོ་བོ་དེ་དེའི་ངོ་བོར་གྱུར་པའི་དོན་དམ་གྱི་ངོ་བོ་ཡིན་པར་ཐལ། དེ་གཉིས་ངོ་བོ་གཅིག་ཡིན་པའི་ཕྱིར། འདོད་ན། མཐོང་བ་བརྫུན་པས་རྙེད་པའི་ངོ་བོ་དེ་མཐོང་བ་ཡང་དག་པས་རྙེད་པའི་ངོ་བོ་ཡིན་པར་ཐལ། འདོད་པ་དེའི་ཕྱིར། འདོད་ན། མཐོང་བ་བརྫུན་པས་རྙེད་པ་དེ་མཐོང་བ་ཡང་དག་པས་རྙེད་པར་ཐལ། འདོད་པ་དེའི་ཕྱིར། འདོད་ན། དེ་གཉིས་ཡུལ་གྱི་ངོ་བོ་རྙེད་ཚུལ་ཁྱད་པར་མེད་པར་འགྱུར་རོ། །གཞན་ཡང་མྱུ་གུ་ལྟ་བུ་གཅིག་ཉིད་ལ། བདེན་པ་གཉིས་ཀྱི་མིང་གིས་བཏགས་པའི་བཏགས་དོན་ཐ་སྙད་དུ་རྙེད་པར་ཐལ། མྱུ་གུའི་ངོ་བོ་ཡིན་པར་གྱུར་པའི་བདེན་གཉིས་ཀྱི་ངོ་བོ་གཉིས་ཡོད་པའི་ཕྱིར། ཡུལ་ཅན་འཕགས་པའི་མཉམ་བཞག་དེས་མཐོང་བ་བརྫུན་པས་རྙེད་པའི་རྙེད་དོན་དེ་མཐོང་བར་ཐལ། དེ་མཐོང་བ་ཡང་དག་པས་རྙེད་པའི་རྙེད་དོན་ལ་སྒྲུབ་འཇུག་གང་ཞིག ཡུལ་དེ་གཉིས་ངོ་བོ་གཅིག་ཡིན་པའི་ཕྱིར། གཞན་ཡང་རང་རང་ངོ་བོས་སྟོང་པར་སྒྲུབ་པ་ལ་དགག་བྱ་དོན་དམ་གྱི་ཁྱད་པར་སྦྱར་དགོས་པར་ཐལ། བདེན་གཉིས་ཐ་སྙད་དུ་རང་རང་ངོ་བོས་མི་སྟོང་པའི་ཕྱིར། སྔ་ཕྱི་གཉིས་ཆར་གྱི་རྟགས་བསལ་ཁས་བླངས་སོ། །དེས་ན་བདེན་གཉིས་བྱས་མི་རྟག་བཞིན་དུ་ངོ་བོ་གཅིག་ཏུ་འདོད་པ་དང་། ཆོས་ཐམས་ཅད་མིང་གི་ཐ་སྙད་ཀྱིས་བཏགས་པའི་དབང་གིས་བཞག་པ་མ་གཏོགས་པར་མིང་གིས་བཏགས་པའི་དོན་ཐ་སྙད་དུ་ཡང་མེད་པར་འདོད་པ་ནི་འགལ་མི་འགལ་བློ་གཟུ་བོར་གནས་པ་དག་གིས་དཔྱོད་ཅིག བྱང་ཆུབ་སེམས་འགྲེལ་གྱི་ལུང་གི་དོན་ནི། བདེན་གཉིས་ཕན་ཚུན་ལྟོས་ནས་འཇོག་དགོས་པས་ངོ་བོ་ཐ་དད་དུ་མེད་པའི་དཔེར་བྱས་མི་རྟག་གསུངས་པ་ཡིན་གྱི། ངོ་བོ་གཅིག་པའི་དཔེ་ནི་མ་ཡིན་ཏེ། དབུ་མ་ཐལ་འགྱུར་བས་ཕན་ཚུན་ལྟོས་ནས་གྲུབ་པའི་ཆོས་ལ་ངོ་བོ་གཅིག་དང་ཐ་དད་གཉིས་ཀ་ཁས་མི་ལེན་པའི་ཕྱིར། གཞན་དུ་ན་རྒྱུ་འབྲས་ལ་ངོ་བོ་གཅིག་དང་ཐ་དད་གང་རུང་གཅིག་ཅིའི་ཕྱིར་ཁས་མི་ལེན་ལེགས་པར་སོམས་ཤིག གཉིས་པ་ལ་གཉིས་ཏེ། ཀུན་རྫོབ་བདེན་པ་དབྱེ་བའི་སྒོ་ནས་བཤད། དོན་དམ་བདེན་པ་དཔེ་ཡི་སྒོ་ནས་བཤད་པའོ། །དང་པོ་ལ་གཉིས་ཏེ། སོ་སྐྱེའི་བློ་ལ་ལྟོས་པའི་དབྱེ་བ། སྐྱེ་འཕགས་གཉིས་ལ་ལྟོས་པའི་དབྱེ་བའོ། །དང་པོ་ལ་བཞི་སྟེ། ཡུལ་ཅན་མཐོང་བ་བརྫུན་པ་གཉིས་སུ་དབྱེ། ཚུལ་དེས་ཡུལ་ལ་ཡང་ལོག་གཉིས་སུ་གྲུབ། གཉིས་པ་འཇིག་རྟེན་ལས་ཀྱང་མེད་པར་བསྟན། དེ་ཉིད་དཔེར་བྱས་སྐབས་ཀྱི་ལན་ལ་སྦྱར་བའོ། །དང་པོ་ནི། མཐོང་བ་སོགས་ཏེ། མཐོང་བ་བརྫུན་པ་ཉིད་ལ་ཡང་། གློ་བུར་གྱི་འཁྲུལ་རྒྱུས་མ་སླད་པའི་དབང་པོ་གསལ་བ་དང་། གློ་བུར་གྱི་འཁྲུལ་རྒྱུས་སླད་པའི་དབང་པོ་སྐྱོན་ལྡན་གྱི་ཤེས་པ་གཉིས་ཡོད་པ་ལས་སྔ་མ་ནི་འཇིག་རྟེན་ཉིད་ལ་ལྟོས་ནས་མཐོང་བ་ཡང་དག་པ་དང་། ཕྱི་མ་ནི་འཇིག་རྟེན་ཉིད་ལ་ལྟོས་ནས་མཐོང་བ་བརྫུན་པར་བཞག་སྟེ། འགྲེལ་པར། དེའི་ཕྱིར་དེ་ལྟར་བདེན་པ་གཉིས་རྣམ་པར་གཞག་ནས། མཐོང་བ་བརྫུན་པ་རྣམས་ལ་ཡང་། མཐོང་བ་ཡང་དག་པ་དང་བརྫུན་པ་ཉིད་ལ་གཉིས་ཉིད་ཡོད་པས་ཞེས་གསུངས་པས་སོ། །གཉིས་པ་ནི། གནོད་པ་སོགས་ཏེ། སྔར་གྱི་ཡུལ་ཅན་གཉིས་པོ་དེས་ཡུལ་ལ་ཡང་ལོག་གཉིས་སུ་ཕྱེ་བའོ། །འདིར་ཕྱི་མ་དག་ཡང་དག་ཀུན་རྫོབ་དང་ལོག་པའི་ཀུན་རྫོབ་ཀྱི་ཐ་སྙད་ནི་རང་རྒྱུད་པའི་ལུགས་ཡིན་གྱི། ཐལ་འགྱུར་བས་ནི་འཇིག་རྟེན་ཉིད་ལྟོས་བདེན་པའི་ཀུན་རྫོབ་དང་། འཇིག་རྟེན་ཉིད་ལྟོས་ལོག་པའི་ཀུན་རྫོབ་ཞེས་ཁས་ལེན་ཅིང་། སྔ་མ་ཁས་མི་ལེན་ཏེ། ཡང་དག་ཡིན་ན་ཀུན་རྫོབ་ཡིན་པར་འགལ་བའི་ཕྱིར་རོ་ཞེས་སྨྲའོ། །འོ་ན་ཀུན་རྫོབ་བདེན་པ་ཞེས་པའི་ཐ་སྙད་ཀྱང་མི་འཐད་པར་འགྱུར་ཏེ། ཀུན་རྫོབ་ཡིན་ན་བདེན་པ་ཡིན་པར་འགལ་བའི་ཕྱིར། དེ་ནི་བློ་ཀུན་རྫོབ་པའི་ངོ་བོར་བདེན་པ་ལ་འཇོག་པས་སྐྱོན་མེད་དོ་སྙམ་ན། ཡང་དག་ཀུན་རྫོབ་ཅེས་པ་ཡང་། བློ་ཀུན་རྫོབ་པ་ལ་ལྟོས་ནས་ཡང་དག་ཏུ་འཇོག་པས་སྐྱོན་མེད་དེ། འགྲེལ་པའི་ལུང་སྔར་དྲངས་པ་ལས། མཐོང་བ་བརྫུན་པ་ཉིད་ལ་ཡང་། མཐོང་བ་ཡང་དག་པ་དང་། མཐོང་བ་བརྫུན་པ་གཉིས་སུ་ཕྱེ་བ་ལྟ་བུའོ། །དེས་ན་ཇོ་བོ་རྗེ་རྗེས་འབྲང་དང་བཅས་པ་དང་། ཞང་ཐང་སག་པ་རྗེས་འབྲང་དང་བཅས་པ་སོགས་ཐལ་འགྱུར་བའི་ལུགས་ལ་ཤིན་ཏུ་མཁས་པ་སྔར་བྱོན་པ་རྣམས་ཀྱིས་ཡང་ལོག་གི་ཐ་སྙད་ཐལ་རང་གཉིས་ལ་ཁྱད་པར་མེད་པར་རྣམ་གཞག་མཛད་པ་ལྟར་ཁྱད་པར་མེད་པར་ཁས་བླང་བར་བྱའོ། །གསུམ་པ་ནི། མི་ཤེས་སོགས་ཏེ། ཚིག་རྐང་དང་པོ་གཉིས་ཀྱིས་ཡིད་གློ་བུར་གྱི་འཁྲུལ་རྒྱུས་སླད་པའི་ཤེས་པ་དང་། གསུམ་པས་དབང་ཤེས་གློ་བུར་གྱི་འཁྲུལ་རྒྱུས་སླད་པའི་ཡུལ་རྣམས་དོན་དམ་དུ་མེད་པར་མ་ཟད། ཀུན་རྫོབ་ཉིད་ལ་ཡང་འཇིག་རྟེན་གྱི་ཐ་སྙད་དུ་མེད་པར་བསྟན་ཏོ། །འདིར་གནད་ཀྱི་དོན་འདི་ཆེ་སྟེ། འཕགས་པའི་མཉམ་བཞག་ལ་ལྟོས་ནས་མཐོང་བ་བརྫུན་པར་བཞག་པའི་ཡུལ་ཐམས་ཅད་བློ་ཀུན་རྫོབ་པའི་ངོར་བདེན་པས་ཀུན་རྫོབ་བདེན་པ་ཡིན་པར་ཁྱད་པར་མེད་ཀྱང་། ཐ་སྙད་བདེན་པ་ཡིན་མིན་གྱི་ཁྱད་པར་ཡོད་དེ། ལོག་པའི་ཀུན་རྫོབ་བདེན་པ་རྣམས་ནི་ཐ་སྙད་བདེན་པ་མ་ཡིན་ཏེ། གྲུབ་མཐའ་ལ་ཞུགས་མ་ཞུགས་ཐམས་ཅད་ལ་ཐུན་མོང་དུ་ཡོད་པའི་ལྷན་སྐྱེས་ཀྱི་བློ་རང་དགའ་བའི་ངོར་བདེན་པའི་ཐ་སྙད་མི་བྱེད་པའི་ཕྱིར། འོ་ན་ཀུན་རྫོབ་ཀྱི་བདེན་པ་ཡང་མ་ཡིན་པར་མཚུངས་སོ་ཞེ་ན། དེ་ནི་གནད་མ་ཟིན་པ་སྟེ། མཐོང་བ་བརྫུན་པའི་ངོར་བདེན་པའི་ཕྱིར་མཐོང་བ་བརྫུན་པ་ལ་གཉིས་སུ་ཕྱེ་བའི་གཉིས་ཀ་མཐོང་བ་བརྫུན་པ་ཡིན་པར་ཁྱད་པར་མེད་ཅིང་། ཕྱི་མའི་ངོར་བདེན་པ་ཡང་དེ་བློ་ལ་ལྟོས་གཉིས་ཆར་བདེན་པ་སྟེ། ཞེས་གསུངས་པས་བསྟན་པའི་ཕྱིར་རོ། །མདོར་ན་ལོག་པའི་ཀུན་རྫོབ་ཐམས་ཅད་ནི་ཀུན་རྫོབ་བདེན་པ་ཡིན་ཀྱང་། ཐ་སྙད་ལ་ནི་མ་བརྟེན་པར། །དམ་པའི་དོན་ནི་རྟོགས་མི་འགྱུར། །ཞེས་དང་། ཐ་སྙད་བདེན་པ་ཐབས་སུ་གྱུར་པ་དང་། །ཞེས་དང་། འཇིག་རྟེན་ཀུན་རྫོབ་བདེན་པ་དང་། །ཞེས་པ་རྣམས་ཀྱིས་བསྟན་པའི་ཐ་སྙད་བདེན་པ་དང་། འཇིག་རྟེན་ཀུན་རྫོབ་བདེན་པ་ལྟར་ཐ་སྙད་དུ་ཡོད་པ་ནི་མ་ཡིན་ཏེ། དེ་དག་ནི་གསུང་རབ་ཀྱི་བརྗོད་བྱ་ཐམས་ཅད་བདེན་པ་གཉིས་སུ་འདུས་པར་གསུངས་པའི་ཡ་རྒྱལ་གྱི་ཀུན་རྫོབ་བདེན་པ་ཡིན་ལ། ལོག་པའི་ཀུན་རྫོབ་རྣམས་ནི་དེ་ལྟར་མ་ཡིན་པའི་ཕྱིར་ཏེ། དོན་དམ་བདེན་པ་རྟོགས་པའི་ཐབས་སུ་མི་རུང་བའི་ཕྱིར་རོ། །དེས་ན་འདིའི་གྲུབ་འབྲས་ལ། ཀུན་རྫོབ་བདེན་པ་ཡིན་ན་ཡོད་པས་མ་ཁྱབ་ཅིང་། ཐ་སྙད་བདེན་པ་ཡིན་ན་ཡོད་པས་ཁྱབ་ཅེས་དང་། ཀུན་རྫོབ་ཏུ་ཡོད་ན་ཡོད་པས་མ་ཁྱབ་ཅིང་། ཐ་སྙད་དུ་ཡོད་ན་ཡོད་པས་ཁྱབ་ཅེས་འབྱུང་ལ། དེང་སང་སྒྲོས་རང་དགའ་བ་རེ་རེའི་རྗེས་སུ་སྐྱེ་བོ་མང་པོ་ཁ་མཐུན་ངོར་མི་བདེ་ཡང་། དབུ་མའི་གཞུང་ལུགས་ཀྱི་མགོ་འཇུག་བསྒྲིགས་ན་འདི་ལས་གཞན་དུ་སྨྲ་ཐབས་ཨེ་འདུག་ལེགས་པར་དཔྱོད་ཅིག ཁྱད་པར་འདི་མ་ཕྱེད་པར་ཁ་ཅིག་གཞུང་འདི་ལ་ཞེན་ཡུལ་ལ་འཁྲུལ་པའི་ཞེན་ཡུལ་ཐ་སྙད་དུ་ཡང་མེད་པར་བསྟན་པ་ཞེས་པའི་ས་བཅད་བྱས་ནས། མུ་སྟེགས་བྱེད་རྣམས་ཀྱིས་རང་རང་གི་གཞུང་ལས་བྱུང་བའི་བདག་ཉིད་ཇི་ལྟ་བ་བཞིན་དུ་ཡོན་ཏན་གསུམ་ལ་སོགས་པ་གང་བརྟགས་པ་ནི་འཇིག་རྟེན་གྱི་ཀུན་རྫོབ་ཏུ་ཡང་ཡོད་པ་མ་ཡིན་ནོ། །འདིས་ནི་ལུགས་འདིས་བློ་འཁྲུལ་པ་གཅིག་གི་ངོར་ཡོད་པ་ལ་ཀུན་རྫོབ་ཏུ་ཡོད་པར་འཇོག་ཟེར་བར་ལེགས་པར་བཀག་གོ་ཞེས་དང་། ད་ལྟ་གཟུགས་སྒྲ་སོགས་ལྔ་རང་གི་མཚན་ཉིད་ཀྱིས་གྲུབ་པར་དབང་ཤེས་ལ་སྣང་བ་ནི་མ་རིག་པས་སླད་པ་ཡིན་པས་ཤེས་པ་དེ་དང་། གཟུགས་བརྙན་དང་བྲག་ཆ་སོགས་སྣང་བའི་དབང་ཤེས་རྣམས་ལ་ཕྲ་རགས་ཙམ་མ་གཏོགས་པ་སྣང་ཡུལ་ལ་འཁྲུལ་མ་འཁྲུལ་ལ་ཁྱད་པར་མེད་ཅིང་། སྔོ་སོགས་རང་གི་མཚན་ཉིད་ཀྱིས་གྲུབ་པ་དག་གཟུགས་བརྙན་བྱད་བཞིན་དུ་ཡོད་པ་མི་སྲིད་ཀྱང་། བྱད་བཞིན་དུ་མེད་པའི་གཟུགས་བརྙན་ཡོད་པ་བཞིན་དུ། རང་གི་མཚན་ཉིད་ཀྱིས་གྲུབ་པ་མིན་ཀྱང་སྔོ་སོགས་ཡོད་དགོས་ལ། དེ་ཡང་ཕྱི་རོལ་གྱི་དོན་དུ་ཡོད་པ་བཞིན་དུ་གཟུགས་བརྙན་ཡང་གཟུགས་ཀྱི་སྐྱེ་མཆེད་དུ་བཞེད་པ་ཡིན་ཏེ། འོག་ནས་གཟུགས་བརྙན་གྱིས་དེ་སྣང་བའི་དབང་ཤེས་བསྐྱེད་པར་ཡང་གསུངས་སོ། །ཚུལ་དེ་དག་ནི་མིག་ལ་རྟ་གླང་དུ་སྣང་བའི་སྒྱུ་མ་དང་། བྲག་ཆ་སོགས་ལ་ཡང་ཤེས་པར་བྱ་སྟེ། ལུགས་འདིའི་རྣམ་བཞག་ཐུན་མོང་མ་ཡིན་པའོ། །ཞེས་བྲིས་སོ། །དེ་ལ་མུ་སྟེགས་བྱེད་རྣམས་ཀྱིས་བརྟགས་པའི་ཞེན་ཡུལ་འཇིག་རྟེན་ཀུན་རྫོབ་ཏུ་ཡོད་པ་མ་ཡིན་པ་འཐད་ཀྱང་། དེས་བློ་འཁྲུལ་པ་གཅིག་གི་ངོར་ཡོད་པ་ལ་ཀུན་རྫོབ་ཏུ་ཡོད་པར་འཇོག་པ་བཀག་ཅེས་པ་ནི་འཇིག་རྟེན་ཀུན་རྫོབ་བདེན་པའི་ཁྱད་པར་མ་ཕྱེད་པ་སྟེ། དབང་པོ་སྐྱོན་ལྡན་གྱི་ཤེས་པའི་ངོར་བདེན་པས་ཀུན་རྫོབ་བདེན་པར་མི་འཇོག་ན། ཀུན་རྫོབ་བདེན་པ་ཡིན་ན་ཡང་དག་ཀུན་རྫོབ་ཡིན་པས་ཁྱབ་པར་ཐལ་བའི་ཕྱིར་རོ། །དབང་པོ་སྐྱོན་མེད་ཀྱི་ཤེས་པ་དང་། སྐྱོན་ལྡན་གྱི་ཤེས་པ་གཉིས་ཀྱི་སྣང་ཡུལ་མེད་མཚུངས་ཡིན་པར་ཐལ། དེ་གཉིས་སྣང་ཡུལ་ལ་འཁྲུལ་པར་མཚུངས་པའི་ཕྱིར། མ་ཁྱབ་ན་ཞེན་ཡུལ་ལ་འཁྲུལ་པའི་ཤེས་པ་ཡིན་ན་ཞེན་ཡུལ་ཐ་སྙད་དུ་ཡང་མེད་པས་ཁྱབ་པ་བུད། གཞན་ཡང་། ཀུན་རྫོབ་བདེན་པ་ལ་འཇིག་རྟེན་ཉིད་ལྟོས་བདེན་པའི་ཀུན་རྫོབ་དང་། ལོག་པའི་ཀུན་རྫོབ་གཉིས་སུ་ཕྱེ་བ་མི་འཐད་པར་ཐལ། དབང་པོ་སྐྱོན་ལྡན་གྱི་ཤེས་པའི་ཡུལ་སྒྱུ་མ་དང་གཟུགས་བརྙན་སོགས་རྟ་གླང་དང་བྱད་བཞིན་དུ་ཞེན་པའི་ཞེན་ཡུལ་ནི་ཀུན་རྫོབ་བདེན་པ་ཙམ་དུ་ཡང་མི་རུང་། སྣང་ཡུལ་ནི་འཇིག་རྟེན་ཉིད་དུ་བདེན་པའི་ཀུན་རྫོབ་ཡིན་པའི་ཕྱིར། རྟགས་ཕྱི་མ་ཁས་བླངས་ཏེ། རང་གི་མཚན་ཉིད་ཀྱིས་མ་གྲུབ་པའི་སྔོ་སོགས་དང་། བྱད་བཞིན་དུ་མེད་པའི་གཟུགས་བརྙན་གཉིས་ཐ་སྙད་དུ་ཡོད་མཚུངས་སུ་ཁས་བླངས་པའི་ཕྱིར་རོ། །གཟུགས་བརྙན་གྱིས་དེ་སྣང་གི་དབང་ཤེས་བསྐྱེད་པར་གསུངས་པས་གཟུགས་བརྙན་ཕྱི་རོལ་གྱི་དོན་དུ་འདོད་པ་ནི་གོང་དུ་རྨི་ལམ་དུ་དབང་ཤེས་ཡོད་པར་སློབ་དཔོན་འདི་བཞེད་ཅེས་པ་ནི་ལོག་པར་བཤད་པ་ཆེན་པོའོ། །ཞེས་བྲིས་པ་དང་འགལ་ཏེ། དེ་ཕྱིར་རྨི་ལམ་དུ་ཡང་དེར་དངོས་མིག །བརྫུན་པའི་ཡུལ་ཅན་རྟོག་པའི་རྒྱུར་ཁས་བླངས། །ཞེས་གསུངས་སོ། །བཞི་པ་ནི། མིག་ནི་སོགས་ཏེ། སྔར་མཐོང་བ་བརྫུན་པ་ལ་གཉིས་སུ་ཕྱེ་བའི་དགོས་པ་ཡང་དབང་པོ་སྐྱོན་ལྡན་གྱི་མཐོང་བས་དབང་པོ་སྐྱོན་མེད་ཀྱི་མཐོང་བ་ལ་མི་གནོད་པ་དཔེར་བྱས་ནས་འཇིག་རྟེན་པས་གཞན་སྐྱེ་མཐོང་ན་ཡང་འཕགས་པའི་མཉམ་བཞག་གི་གཟིགས་ངོར་གཞན་སྐྱེ་མེད་པ་ལ་མི་གནོད་པར་བསྒྲུབ་པའོ། །འདིར་དྲི་མེད་བློ་ཅེས་པས་སྔར་གྱི་ཡང་དག་མཐོང་བ་འཕགས་པའི་མཉམ་གཞག་གི་མཁྱེན་པར་གྲུབ་ལ། ཁ་ཅིག་རང་ཉིད་ཀྱང་དེ་ཁས་བླངས་བཞིན་དུ་དེ་ལ་རིག་ཤེས་ཚད་མ་ཅེས་པའི་ཐ་སྙད་བྱེད་པ་ནི་རྣམ་བཞག་མ་ཆགས་ཏེ། རིག་ཤེས་ཚད་མ་ནི་རྟགས་ལ་བརྟེན་པའི་རྗེས་དཔག་ཡིན་པའི་ཕྱིར་རོ། །གཉིས་པ་ནི་གཏི་མུག་སོགས་ཏེ་འདིར་ཀུན་རྫོབ་བདེན་པ་དང་། ཀུན་རྫོབ་ཙམ་གཉིས་ལས། དང་པོ་ནི་བདེན་འཛིན་ལྷན་སྐྱེས་ཀྱི་མ་རིག་པའི་ངོར་བདེན་པར་སྣང་བ་ཡིན་ལ་ཕྱི་མ་ནི་ཉན་རང་དགྲ་བཅོམ་པ་དང་བྱང་སེམས་འཕགས་པ་ཉོན་མོངས་པ་ཅན་གྱི་མ་རིག་པ་སྤངས་པ་རྣམས་ལ་བཅོས་མའི་རང་བཞིན་དུ་སྣང་བ་སྟེ། བདེན་པར་མངོན་པར་རློམ་པ་མེད་པའི་ཕྱིར་རོ། །དེ་ཡང་གཞི་གཅིག་ཉིད་སྣང་ཚུལ་གྱི་སྒོ་ནས་སོ་སོར་ཕྱེ་བ་ཡིན་གྱི་ཡུལ་གྱི་ངོས་ནས་སོ་སོར་ཡོད་པ་ནི་མ་ཡིན་ནོ། །དེ་ལྟར་ན་སྔ་མས་ཡུལ་ཅན་ལ་ཀུན་རྫོབ་ཏུ་འཇོག་པ་དང་། ཕྱི་མས་ཡུལ་ལ་ཀུན་རྫོབ་ཏུ་འཇོག་པ་འགལ་ལོ་སྙམ་ན། ཀུན་རྫོབ་ཀྱི་སྐད་དོད་སཾ་པྲྀཏྟི་ཞེས་ཡང་དག་སྒྲིབ་བྱེད་ཅེས་པར་འགྱུར་ལ་ཡུལ་ཅན་བདེན་འཛིན་གྱི་མ་རིག་པ་ནི་ཡང་དག་པ་ཡུལ་གྱི་དོན་མཐོང་བ་ལ་སྒྲིབ་པར་བྱེད་པས་ན་ཡང་དག་སྒྲིབ་བྱེད་དེ། དངོས་པོ་བདེན་པར་མེད་པ་ལ་བདེན་པར་མངོན་པར་ཞེན་པའི་ཕྱིར་རོ། །འཕགས་པ་གསུམ་གྱི་རྗེས་ཐོབ་ལ་སྣང་བའི་འདུ་བྱེད་ཡུལ་གྱི་ཆ་དེ་ཡང་ཡང་དག་སྒྲིབ་བྱེད་དེ་གཉིས་སྣང་གིས་བག་ཆགས་ཀྱི་དབང་གིས་བྱུང་བས་སྣང་མེད་ཀྱི་མཉམ་གཞག་ལ་སྒྲིབ་པར་བྱེད་པའི་ཕྱིར་རོ། །དེས་ན་བདེན་གཉིས་ལས། གང་ཞིག་གིས་ནི་གང་ཞིག་ལ། །ཡང་དག་སྒྲིབ་བྱེད་ཀུན་རྫོབ་འདོད། །ཅེས་པ་ཡང་ཡུལ་དང་ཡུལ་ཅན་གཉིས་ཀ་ལ་སྦྱར་བའི་ལུང་ཡིན་ལ། འདིར་ཡང་དེ་བཞིན་ཏེ། བདེན་པ་ཞེས་པའི་ཚིག་དང་འབྲེལ་བའི་ཚེ་ན་ཡུལ་ཅན་དང་། དེ་དང་མ་འབྲེལ་བའི་ཚེ་ན་ཡུལ་ལ་ཡང་དག་སྒྲིབ་བྱེད་ཀྱི་སྒྲ་འཇུག་པ་ནི་གནད་ཀྱི་དོན་ནོ། །ཁ་ཅིག་འདིར་བྱང་ཆུབ་སེམས་དཔའ་ཉོན་མོངས་ཅན་གྱི་མ་རིག་པ་སྤངས་པའི་མ་མཐའི་ས་མཚམས་ས་བརྒྱད་པ་ནས་འཇོག་པར་འདོད་པ་ནི་ཐེག་པ་ཆེན་པོའི་ལམ་ལ་སྐུར་བ་འདེབས་པ་སྟེ། ཉན་ཐོས་ཀྱིས་བདག་མེད་ཚེ་གསུམ་དུ་བསྒོམས་པས་བདེན་འཛིན་སྤང་ནུས་ལ་ཐེག་པ་ཆེན་པོས་བསྐལ་པ་གྲངས་མེད་གཅིག་ལ་སོགས་པར་བསྒོམས་ཀྱང་སྤང་མ་ནུས་པར་ཁས་བླངས་པའི་ཕྱིར་དང་། ཐེག་ཆེན་ལ་ས་བརྒྱད་པ་མ་ཐོབ་བར་དུ་སྤང་བྱ་ལྷག་པོ་སྤང་བ་མེད་པར་ཁས་བླངས་པའི་ཕྱིར་དང་། ཡུལ་ཅན་གྱི་ངོས་ནས་ཐེག་ཆེན་རིགས་པ་རྒྱས་པས་སྤང་བྱ་སྤང་བ་ལ་ནུས་པ་ཆེ་བར་ཁས་བླངས་བས་འགལ་འདུའི་ཕུང་པོ་འབའ་ཞིག་ཏུ་སྣང་བའི་ཕྱིར་རོ། །བོད་ཀྱི་འཇུག་པའི་བཤད་སྲོལ་གཅིག་ལ་དྲུང་བློ་བའི་ལུགས་འདི་ནོར་པ་ཆེ་ཤོས་དང་མང་ཤོས་གཅིག་ཏུ་འདུག་གོ །འགྲེལ་པར། ཀུན་རྫོབ་ཀྱི་བདེན་པ་ནི་བསླུ་བར་བྱེད་པ་ཉིད་ཀྱི་ཕྱིར་དོན་དམ་པའི་བདེན་པ་མ་ཡིན་ནོ། །ཞེས་གསུངས་པ་འདིས་རྗེ་ས་པཎ་གྱིས་ཐལ་རང་གི་ཁྱད་པར་གསུངས་པ་དོན་ལ་གནས་པར་གྲུབ་བོ། །གཉིས་པ་ནི། རབ་རིབ་སོགས་ཏེ། འགྲེལ་པར། འཕགས་པ་བདེན་པ་གཉིས་ལ་འཇུག་པའི་མདོ་དྲངས་པ་ལས། ལྷའི་བུ་གལ་ཏེ་དོན་དམ་པར་ན་དོན་དམ་པའི་བདེན་པ་ལུས་དང་ངག་དང་ཡིད་ཀྱི་རང་བཞིན་དུ་འགྱུར་ན་ནི། དེ་དོན་དམ་པའི་བདེན་པ་ཞེས་བྱ་བའི་གྲངས་སུ་མི་འགྲོ་སྟེ། ཀུན་རྫོབ་ཀྱི་བདེན་པ་ཉིད་དུ་འགྱུར་རོ། །འོན་ཀྱང་ལྷའི་བུ་དོན་དམ་པར་ན་དོན་དམ་པའི་བདེན་པ་ནི་ཐ་སྙད་ཐམས་ཅད་ལས་འདས་པ། བྱེ་བྲག་མེད་པ། མ་སྐྱེས་པ། མ་འགགས་པ། སྨྲ་བར་བྱ་བ་དང་། སྨྲ་བ་དང་། ཤེས་པར་བྱ་བ་དང་། ཤེས་པ་དང་བྲལ་བའོ། །ལྷའི་བུ་དོན་དམ་པའི་བདེན་པ་ནི་རྣམ་པ་ཐམས་ཅད་ཀྱི་མཆོག་དང་ལྡན་པ་ཐམས་ཅད་མཁྱེན་པའི་ཡེ་ཤེས་ཀྱི་ཡུལ་གྱི་བར་ལས་འདས་པ་ཡིན་ཏེ། ཇི་ལྟར་དོན་དམ་པའི་བདེན་པའོ། །ཞེས་བརྗོད་པ་ལྟར་ནི་མ་ཡིན་ནོ། །ཆོས་ཐམས་ཅད་ནི་བརྫུན་ཏེ་བསླུ་བའི་ཆོས་སོ། །ལྷའི་བུ་དོན་དམ་པའི་བདེན་པ་ནི་བསྟན་པར་མི་ནུས་སོ། །དེ་ཅིའི་ཕྱིར་ཞེ་ན། གང་གིས་སྟོན་པ་དང་། ཅི་སྟོན་པ་དང་། གང་ལ་སྟོན་པའི་ཆོས་དེ་དག་ཐམས་ཅད་དོན་དམ་པར་རབ་ཏུ་མ་སྐྱེས་པའོ། །རབ་ཏུ་མ་སྐྱེས་པའི་ཆོས་རྣམས་ཀྱི་ནི་རབ་ཏུ་མ་སྐྱེས་པའི་ཆོས་རྣམས་བཤད་མི་ནུས་སོ། །ཞེས་གསུངས་སོ། །མདོ་འདིས་དོན་དམ་པའི་བདེན་པ་ནི་འཕགས་པའི་སོ་སོ་རང་རིག་པའི་ཡེ་ཤེས་ཀྱིས་གཉིས་སྣང་ནུབ་པའི་ཚུལ་གྱིས་མྱང་བར་བྱ་བ་ཡིན་གྱི། གཉིས་སྣང་དང་བཅས་ན་རྣམ་མཁྱེན་གྱི་བར་གྱི་ཡུལ་ཡང་དོན་དམ་བདེན་པ་མ་ཡིན་པ་དང་། དོན་དམ་བདེན་པ་རང་གི་ངོ་བོ་ཇི་ལྟ་བ་བཞིན་གདུལ་བྱ་ལ་བསྟན་མི་ནུས་ཀྱི། གདུལ་བྱ་ལ་ཐ་སྙད་ཀྱིས་བསྟན་པ་ན་སྒྲ་རྟོག་གི་ཡུལ་ཐམས་ཅད་རྣམ་གྲངས་པའི་དོན་དམ་ཞེས་བྱ་བ་ཀུན་རྫོབ་བདེན་པ་ཡིན་པར་བསྟན་ནོ། །དེ་ལྟར་ན་རྟོགས་པ་དོན་དམ་དང་། བསྟན་པ་དོན་དམ་གཉིས་སུ་བྱས་ནས་སྔ་མ་མཚན་ཉིད་པ་དང་། ཕྱི་མ་བཏགས་པ་བར་གྲུབ་སྟེ། སློབ་དཔོན་འདིས་རིགས་པ་དྲུག་ཅུ་པའི་འགྲེལ་པར། བདེན་པ་གཉིས་སུ་ཕྱེ་བ་ནི། འཇིག་རྟེན་པའི་བློ་ལ་ལྟོས་ནས་ཡིན་པར་གསུངས་པ་ཡང་སྒྲས་བསྟན་པའི་བདེན་གཉིས་ལ་དགོངས་པའོ། །གཞུང་འདིས་བདེན་གཉིས་ངོ་བོ་གཅིག་ཡིན་པ་ཡང་བཀག་སྟེ། འཁར་གཞོང་དུ་སྐྲ་ཤད་མེད་པ་དང་། ཡོད་པ་གཉིས་ངོ་བོ་གཅིག་པར་མི་རུང་བའི་ཕྱིར་རོ། །གཉིས་པ་དེས་ན་དེ་ཉིད་སྐབས་སུ་འཇིག་རྟེན་གྱིས་མི་གནོད་པ་ནི། གལ་ཏེ་སོགས་ཏེ། འཇིག་རྟེན་གྱི་མཐོང་བ་དེ་ཁོ་ན་ཉིད་ལ་ཚད་མ་མ་ཡིན་པས་དེས་གཞན་སྐྱེ་མཐོང་ན་ཡང་དེ་ཁོ་ན་ཉིད་ལ་དཔྱོད་པའི་སྐབས་སུ་གནོད་པ་མེད་ཅེས་པའོ། །གསུམ་པ་འཇིག་རྟེན་ཉིད་ཀྱིས་གནོད་པའི་ཡུལ་གྱི་ཁྱད་པར་བཤད་པ་ནི། འཇིག་རྟེན་སོགས་ཏེ། འགྲེལ་པར། དཔེར་ན་ཁ་ཅིག་གིས། ངའི་རྫས་ཕྲོགས་སོ་ཞེས་སྨྲས་པ་དང་། གཅིག་ཤོས་ཀྱིས་དེ་ལ་རྒལ་ཞིང་བརྟག་པ་རྫས་དེ་ནི་ཅི་ཞིག་ཡིན་དེས་བུམ་པའོ་ཞེས་སྨྲས་པ་ལ། བུམ་པ་ནི་རྫས་མ་ཡིན་ཏེ། གཞལ་བྱ་ཡིན་པའི་ཕྱིར། རྨི་ལམ་གྱི་བུམ་པ་བཞིན་ནོ། །ཞེས་དེས་དེ་སུན་འབྱིན་པར་བྱེད་པ་དེ་ལྟ་བུ་ལ་སོགས་པའི་ཡུལ་ལ་འཇིག་རྟེན་པའི་དོན་འཇིག་རྟེན་པའི་གྲགས་པ་ཉིད་ཀྱིས་སེལ་བར་བྱེད་པ་ལ་འཇིག་རྟེན་གྱིས་གནོད་པར་འགྱུར་གྱི་ཞེས་གསུངས་པའི་དོན་ཐ་སྙད་རྣམ་གཞག་གི་ཚེ་བུམ་པ་རྫས་ཡིན་པ་བཀག་པ་ལ་འཇིག་རྟེན་གྱིས་གནོད། དོན་དམ་རྣམ་གཞག་གི་ཚེ་དེ་ལ་འཇིག་རྟེན་གྱིས་མི་གནོད་ཅེས་པའི་དོན་ཡིན་ནོ། །གཉིས་པ་ཀུན་རྫོབ་ཏུ་གཞན་ལས་སྐྱེ་བ་དགག་པ་ནི། གང་ཕྱིར་སོགས་ཏེ། འདིས་སྔར་གྱི་མི་གཙང་བའི་ས་བོན་དང་། ཕྱིས་ཀྱི་བུ་གཉིས་གཞན་ཡིན་པ་བཀག་པ་ཡིན་གྱི། གཅིག་ཏུ་སྟོན་པ་ནི་མ་ཡིན་ཏེ་བདག་གིས་བུ་འདི་བསྐྱེད་ཅེས་སྨྲ་བའི་འཇིག་རྟེན་པ་དེ་ལ་བུ་འདི་ལྟ་བུ་ཞིག་དང་པོ་ནས་མའི་མངལ་དུ་བླུག་པ་ཡིན་ནམ་ཞེས་བྲིས་པ་ན། དེ་ནི་མ་ཡིན་ཏེ། མི་གཙང་བའི་ས་བོན་ཙམ་བླུག་པ་ལས། བུ་འདི་བྱུང་ཅེས་སྨྲ་བའི་ཕྱིར་རོ། །དེས་ན་གཞུང་འདིས་འཇིག་རྟེན་གྱི་ཐ་སྙད་ཉིད་ལ་ཡང་གཞན་སྐྱེ་མེད་ཅེས་བསྟན་ཅིང་། གཞུང་གོང་མས་ནི་ཡོད་ན་ཡང་དེས་དེ་ཁོ་ན་ཉིད་ལ་གཞན་སྐྱེ་བཀག་པ་ལ་འཇིག་རྟེན་གྱིས་མི་གནོད་ཅེས་བསྟན་ཏོ། །གཉིས་པ་དེ་ལྟར་བཀག་པའི་ཕན་ཡོན་རྣམ་གཉིས་བསྟན་པ་ལ་གཉིས་ཏེ། རྟག་ཆད་གཉིས་ལས་གྲོལ་བའི་ཡོན་ཏན་དང་། ལས་ཀྱི་འབྲས་བུ་འཐད་པའི་ཡོན་ཏན་ནོ། །དང་པོ་ལ་གསུམ་སྟེ། རྟག་ཆད་གཉིས་ལས་གྲོལ་བའི་ཚུལ། དེ་ཡི་འཐད་པ་རྒྱས་པར་བཤད། བཤད་པས་གྲུབ་པའི་འཇུག་སྡུད་བསྟན་པའོ། །དང་པོ་ནི། གང་ཕྱིར་སོགས་ཏེ། འདི་ལ་རྟག་ཆད་ལས་གྲོལ་བའི་ཚུལ། སྒྲུབ་བྱེད་ཀྱི་ལུང་དང་སྦྱར་བ། དེས་ལོག་རྟོག་གཞན་ཁེགས་པ་དང་གསུམ་ལས། དང་པོ་ནི། མྱུ་གུའི་དུས་ན་ས་བོན་ཆད་པ་མ་ཡིན་ཏེ། མྱུ་གུ་ས་བོན་ལས་གཞན་མ་ཡིན་པའི་ཕྱིར་རོ། །ཁྱབ་སྟེ། བ་ལང་བ་མིན་ལས་གཞན་ཡིན་པའི་རྒྱུ་མཚན་གྱིས་བ་ལང་ཤི་བའི་ཚེ་བ་མིན་ཡོད་ཀྱང་བ་ལང་རྒྱུན་ཆད་པ་མ་ཡིན་པ་མ་ཡིན་པའི་ཕྱིར་རོ། །མྱུ་གུའི་དུས་ན་ས་བོན་རྟག་པ་ཡང་མ་ཡིན་ཏེ། མྱུ་གུ་ས་བོན་དང་གཅིག་ཉིད་མ་ཡིན་པས། མྱུ་གུའི་དུས་ན་ས་བོན་ཡོད་པ་མ་ཡིན་པའི་ཕྱིར་རོ། །དེས་ན་གཞུང་འདིར་ཐ་སྙད་རྣམ་གཞག་ལ་ཡང་འབྲས་བུའི་དུས་ན་རང་གི་རྒྱུ་དེ་ཡོད་པ་ཡང་མ་ཡིན། མེད་པ་ཡང་མ་ཡིན་ཞེས་བྱ་བར་གྲུབ་སྟེ། ཡོད་ན་རྟག་པར་འགྱུར་ཞིང་། མེད་ན་ཆད་པར་འགྱུར་བའི་ཕྱིར་རོ། །རྟག་ཆད་སྤོང་ཚུལ་འདི་ནི་ཀླུ་སྒྲུབ་ཀྱི་དགོངས་པ་ཐལ་འགྱུར་བས་བཀྲལ་བའི་ལུགས་ཐུན་མོང་མ་ཡིན་པ་སྟེ། འདིར་ནི་ཐ་སྙད་དུ་ཡང་རྒྱུ་འབྲས་དེ་ཉིད་དང་། གཞན་ཉིད་བཀག་པ་ལ་ཐུག་ལ། རང་རྒྱུད་པས་ཐ་སྙད་དུ་རྒྱུ་འབྲས་གཞན་དུ་ཁས་བླངས་པའི་ཕྱིར་རོ། །དགེ་རྒན་གཞན་ཐམས་ཅད་དངོས་འགལ་གཅིག་རྣམ་བཅད་ལ་ཁེགས་པས་གཅིག་ཤོས་ཡོངས་གཅོད་ལ་གྲུབ་པར་འདོད་པ་རྣམས་ལ་ནི་མྱུ་གུའི་དུས་ན་ས་བོན་ཡོད་པར་ཐལ། དེ་ན་དེ་མེད་པ་མ་ཡིན་པའི་ཕྱིར། ཞེས་བརྗོད་ན་ལན་ཅི་སྨྲ། རྟགས་བསལ་ལ་ལན་འདེབས་ན་གཞུང་འདི་ལ་བརྟེན་པའི་རྟག་ཆད་སྤོང་ཚུལ་ཇི་ལྟར་བྱ། གཉིས་པ་ནི། མདོ་ལས། ས་བོན་ཡོད་ན་མྱུ་གུའི་ཇི་བཞིན་ཏེ། །ས་བོན་གང་ཡིན་མྱུ་གུ་ཉིད་མིན་ཏེ། །དེ་ལས་གཞན་མིན་དེ་ཡང་མ་ཡིན་ཏེ། །དེ་ལྟར་རྟག་མིན་ཆད་མིན་ཆོས་ཉིད་དོ། །ཞེས་དང་། བསྟན་བཅོས་ལས་ཀྱང་། གང་ལ་རྟེན་ཏེ་གང་འབྱུང་བ། །དེ་ནི་རེ་ཞིག་དེ་ཉིད་མིན། །དེ་ལས་གཞན་པའང་མ་ཡིན་པ། །དེ་ཕྱིར་རྟག་མིན་ཆད་མ་ཡིན། །ཞེས་གསུངས་སོ། །གསུམ་པ་ནི། གཞུང་འདི་དག་གིས་བྱང་ཆུབ་སེམས་འགྲེལ་ལས། མེད་ན་མི་འབྱུང་ངེས་པའི་ཕྱིར། །བྱས་དང་མི་རྟག་པ་བཞིན་ནོ། །ཞེས་པ་ལ་བརྟེན་ནས་བདེན་གཉིས་ངོ་བོ་གཅིག་ཏུ་འདོད་པ་ལེགས་པར་བཀག་སྟེ་མེད་ན་མི་འབྱུང་ངེས་པའི་ཆོས་ལ་ཐ་སྙད་དུ་ཡང་ངོ་བོ་གཅིག་དང་ཐ་དད་བཀག་པ་ནི་ལུགས་འདིའི་ཐུན་མོང་མ་ཡིན་པའི་ཁྱད་ཆོས་ཡིན་པའི་ཕྱིར་རོ། །གཉིས་པ་ལ་གཉིས་ཏེ། དོན་དམ་པར་རང་བཞིན་མེད་ཐ་སྙད་དུ་རང་བཞིན་མེད་པའོ། །དང་པོ་ནི། གལ་ཏེ་སོགས་ཏེ། འདི་ལ་དོན་དམ་པར་གཞན་སྐྱེ་དགག་པ། ཤེས་བྱེད་ཀྱི་ལུང་དང་སྦྱར་བ། དེས་སྟོང་ཉིད་བདེན་པར་གྲུབ་པ་ཡང་ཁེགས་པ་དང་གསུམ་ལས། དང་པོ་ནི། འགྲེལ་པར། གལ་ཏེ་གཟུགས་དང་ཚོར་བ་ལ་སོགས་པ་དངོས་པོ་རྣམས་ཀྱི་རང་གི་མཚན་ཉིད་དེ། རང་གི་ངོ་བོ་དང་རང་བཞིན། རྒྱུ་དང་རྐྱེན་དག་གིས་བསྐྱེད་ན་ནི་དེའི་ཚེ་གང་གི་ཚེ་ན་རྣལ་འབྱོར་པ་འདིས་དངོས་པོ་རྣམས་རང་བཞིན་གྱིས་སྟོང་པར་མཐོང་ཞིང་། ཆོས་ཐམས་ཅད་རང་བཞིན་མེད་པར་རྟོགས་པ་དེའི་ཚེ་ངེས་པར་ཇི་ལྟར་སྐྱེས་པའི་རང་བཞིན་ལ་སྐུར་བ་བཏབ་པས་སྟོང་པ་ཉིད་རྟོགས་པར་འགྱུར་ཏེ། དེའི་ཕྱིར་ཇི་ལྟར་ཐོ་བ་ལ་སོགས་པ་དག་བུམ་པ་ལ་སོགས་པ་རྣམས་ཀྱི་འཇིག་པའི་རྒྱུ་ཡིན་པ་དེ་བཞིན་དུ་སྟོང་པ་ཉིད་ཀྱང་དངོས་པོའི་རང་བཞིན་ལ་སྐུར་བའི་རྒྱུར་འགྱུར་བ་ཞིག་ན། དེ་ནི་རུང་བ་ཡང་མ་ཡིན་ལ་དེའི་ཕྱིར་དངོས་པོ་རྣམས་ཀྱི་རང་གི་མཚན་ཉིད་ནི་ཐམས་ཅད་ཀྱི་ཚེ་སྐྱེ་བར་ཁས་བླང་བར་མི་བྱའོ་ཞེས་གསུངས་ཏེ། དེའི་དོན་སེམས་ཙམ་པས་གཞན་དབང་གི་དངོས་པོ་རང་གི་མཚན་ཉིད་ཀྱིས་གྲུབ་པ་དོན་དམ་པར་རྒྱུ་རྐྱེན་གཞན་གྱིས་བསྐྱེད་པར་འདོད་ན་འཕགས་པའི་མཉམ་བཞག་གིས་གཞན་དབང་གི་དངོས་པོ་རང་བཞིན་གྱིས་སྟོང་པ་དང་། ཀུན་བཏགས་དང་གཞན་དབང་གིས་བསྡུས་པའི་ཆོས་ཐམས་ཅད་རང་བཞིན་གྱིས་མེད་པར་རྟོག་པའི་ཚེ། གཞན་དབང་ཇི་ལྟར་སྐྱེས་པའི་རང་བཞིན་ལ་སྐུར་བ་བཏབ་པའི་སྒོ་ནས་སྟོང་ཉིད་རྟོགས་པར་འགྱུར་ཏེ། གཞན་དབང་རང་གི་མཚན་ཉིད་ཀྱིས་གྲུབ་པ་གང་ཞིག་དེས་གཞན་དབང་རང་གི་མཚན་ཉིད་ཀྱིས་མ་གྲུབ་པར་རྟོགས་པའི་ཕྱིར། དེ་བཞིན་དུ་སྟོང་པ་ཉིད་དེ་གཞན་དབང་གི་དངོས་པོའི་འཇིག་རྒྱུར་ཐལ་ཏེ། སྟོང་ཉིད་མ་རྟོགས་པའི་ཚེ་གཞན་དབང་རང་གི་མཚན་ཉིད་ཀྱིས་ཡོད་ཀྱང་། དེ་རྟོགས་པའི་ཚེ་གཞན་དབང་རང་གི་མཚན་ཉིད་ཀྱིས་མེད་པའི་ཕྱིར་རོ། །དེ་གཉིས་ཆར་མི་རུང་བ་དེའི་ཕྱིར། གཞན་དབང་རང་གི་མཚན་ཉིད་ཀྱིས་གྲུབ་པར་དོན་དམ་པར་རྒྱུ་རྐྱེན་གཞན་ལས་སྐྱེ་བར་ཁས་བླང་བར་མི་བྱའོ་ཞེས་པའོ། །ཁ་ཅིག་དོན་འདི་མ་རྟོགས་པར་ཕྱོགས་སྔ་སྨྲ་བ་པོ་དབུ་མ་རང་རྒྱུད་པ་ལ་འཆད་པ་ནི། གཞུང་འོག་མའི་སྔ་འགྲེལ་དུ་འདིར་སྨྲས་པ། དོན་དམ་པར་སྐྱེ་བ་མེད་པས། བདག་དང་གཞན་ལས་སྐྱེ་བ་དགག་པ་ལ་རག་མོད་ཅེས་གསུངས་པ་དང་འགལ་ཏེ་རང་རྒྱུད་པས་དོན་དམ་པར་སྐྱེ་བ་ཁས་མ་བླངས་པའི་ཕྱིར་རོ། །སེམས་ཙམ་པས་འཕགས་པའི་མཉམ་བཞག་གི་དངོས་པོར་རང་བཞིན་གྱིས་སྟོང་པར་མཐོང་བར་ཁས་མི་ལེན་ཅེས་པ་ཡང་གནད་མ་གོ་བ་སྟེ། དེས་འཕགས་པའི་མཉམ་བཞག་གིས་གཞན་དབང་དང་ཀུན་བཏགས་ཀྱིས་སྟོང་པའི་ཡོངས་གྲུབ་ནམ་མཁའ་ལྟ་བུ་ཁོ་ན་མཐོང་བར་འདོད་པ་ལ། དབུ་མ་པས་ཡུལ་གྱི་གནས་ཚུལ་དང་། བློའི་འཛིན་སྟངས་མ་མཐུན་པའི་སྐྱོན་བསྟན་པའི་སྐབས་ཡིན་པའི་ཕྱིར་རོ། །གཟུགས་དང་ཚོར་བ་སོགས་ཀྱི་རང་གི་མཚན་ཉིད་དང་། རང་གི་ངོ་བོ་དང་། རང་བཞིན་ཁས་བླངས་པ་ཙམ་གྱིས་དེ་དག་རང་གི་མཚན་ཉིད་ཀྱིས་གྲུབ་པ་སོགས་ཁས་ལེན་མི་དགོས་ན་འདིའི་ཕྱོགས་སྔས་དེ་དག་ཁས་ལེན་པའི་རྒྱུ་མཚན་ཅི་ཡིན། དགོས་ན་ཁྱེད་རང་གིས་ཐལ་འགྱུར་བའི་ལུགས་ལ་ཆོས་ཐམས་ཅད་ཀྱི་རང་གི་ངོ་བོ་ཡོད་པར་ཁས་བླངས་པ་དང་འགལ་མི་འགལ་སོམས་ཤིག གཉིས་པ་ནི། དཀོན་བརྩེགས་ལས། འོད་སྲུང་གཞན་ཡང་དབུ་མའི་ལམ་ཆོས་རྣམས་ལ་ཡང་དག་པར་སོ་སོར་རྟོག་པ་ནི་གང་སྟོང་པ་ཉིད་ཀྱིས་ཆོས་རྣམས་སྟོང་པར་མི་བྱེད་ཆོས་རྣམས་རང་ཉིད་སྟོང་པ་ཉིད་དང་། ཞེས་གསུངས་ཤིང་། མཚན་མེད་དང་། སྨོན་མེད་དང་། མངོན་པར་འདུ་བྱ་བ་མེད་པ་དང་། མ་སྐྱེས་པ་དང་། མ་བྱུང་བ་ལ་ཡང་དེ་བཞིན་དུ་གསུངས་པ་དྲངས་པའོ། །གསུམ་པ་ནི། ལུང་དེ་ཉིད་ཀྱི་སེམས་ཙམ་པས་གཟུང་འཛིན་གཉིས་ཀྱིས་སྟོང་པའི་སྟོང་ཉིད་བདེན་གྲུབ་ཏུ་འདོད་པ་ཡང་ཁེགས་ཏེ། དེ་ལྟར་ན་སྟོང་པ་ཉིད་ཁོ་ནས་ཆོས་དེ་སྟོང་པ་ཡིན་གྱི་རང་བཞིན་གྱིས་སྟོང་པ་མ་ཡིན་པར་འགྱུར་བས་སྔར་གྱི་མདོ་དང་འགལ་བའི་ཕྱིར་རོ། །འདི་ལ་དགོངས་ནས་བཞི་བརྒྱ་པ་ལས། སྟོང་མིན་སྟོང་ལྡན་མཐོང་མིན་ཏེ། །མྱང་འདས་བདག་གིས་གྱུར་ཅིག་ཅེས། །ལོག་ལྟས་མྱ་ངན་མི་འདའ་བར། །དེ་བཞིན་གཤེགས་པ་རྣམས་ཀྱི་གསུངས། །ཞེས་བཤད་ལ། རྩ་ཤེར་ལས་ཀྱང་། སྟོང་ཉིད་ལྟ་བ་ཐམས་ཅད་ནི། །ངེས་པར་འབྱིན་པར་རྒྱལ་བས་གསུངས། །གང་དག་སྟོང་པ་ཉིད་ལྟ་བ། །དེ་དག་སྒྲུབ་ཏུ་མེད་པར་གསུངས། །ཞེས་གསུངས་སོ། །འདིར་དབུ་མ་པར་རློམ་པ་ཁ་ཅིག ཆོས་ཐམས་ཅད་རང་རང་གི་ངོ་བོས་སྟོང་པའི་དོན་བུམ་པ་བདེན་པས་སྟོང་པའི་དོན་ཡིན་གྱི། བུམ་པ་བུམ་པས་སྟོང་ན་བུམ་པ་ལ་བུམ་པ་མེད་དགོས་ལ། རང་ལ་རང་མེད་ན་གཞན་སུ་ལ་ཡང་མེད་པས་བུམ་པ་གཏན་མེད་པར་འགྱུར་རོ་ཞེས་ཟེར་རོ། །བུམ་པ་རང་གི་ངོ་བོས་སྟོང་པའི་ཚེ་བུམ་པ་གཏན་མེད་པར་དོགས་པའི་ཐུགས་ཁྲལ་ཅན་ཁྱོད་ནི་དབུ་མ་པར་རློམ་པ་ཨ་རེ་མཛེས་ཏེ། བུམ་པ་རང་གི་ངོ་བོས་སྟོང་པར་རྟོགས་པའི་རིག་ངོར་བུམ་པ་ཡོད་ན་བུམ་པ་བདེན་པས་སྟོང་པ་དེ་ཇི་ལྟ་བུ་ཞིག་ཡིན། རིག་ངོ་དེར་བུམ་པ་མེད་ན་བུམ་པ་གཏན་མེད་པར་འགྱུར་རོ་ཞེས་པའི་ཐལ་བ་དེ་གནས་སྐབས་གང་གི་དབང་དུ་བྱས་ནས་རྒོལ་བ་སུ་ལ་འཕངས་པ་ཡིན། གཞན་ཡང་བུམ་པ་རང་གི་ངོ་བོ་དེ་བུམ་པ་མ་ཡིན་པར་བུམ་པའི་བདེན་པ་དེ་ཡིན་པར་ཐལ། ཁས་བླངས་ཀྱི་ཁྱད་པར་དེའི་ཕྱིར། འདོད་ན་བུམ་པའི་ངོ་བོ་ཡོད་པར་ཁས་བླངས་པ་དང་ཅིའི་ཕྱིར་མི་འགལ་ལོ། །གཉིས་པ་ལ་གསུམ་སྟེ། རྣམ་པར་དཔྱད་ན་ཐ་སྙད་འཇིག རྣམ་དཔྱད་ཐ་སྙད་ལ་ཡང་མཚུངས། མ་དཔྱད་སྐྱེ་བ་དཔེ་ཡིས་བསྟན་པའོ། །དང་པོ་ནི། གང་ཕྱིར་སོགས་ཏེ། དོན་དམ་དུ་གཞན་སྐྱེ་མེད་མོད། ཐ་སྙད་དུ་གཞན་སྐྱེ་ཁས་ལེན་དགོས་སོ། །ཞེས་སྔ་མའི་ཡན་ལག་ཏུ་དོགས་པ་བསུས་ནས་མཐའ་བཅད་པའི་ལན་འདེབས་པ་སྟེ། འདི་ཡང་རང་རྒྱུད་པ་ལ་སྦྱར་བར་བྱ་བ་ནི་མ་ཡིན་ཏེ། དངོས་པོ་རང་བཞིན་གྱིས་སྐྱེ་བ་འགོག་པའི་སྐབས་ཡིན་པའི་ཕྱིར་རོ། །གཉིས་པ་ནི། དེ་ཉིད་ཞེས་སོགས་ཏེ། འགྲེལ་པར། དེའི་ཕྱིར་རང་གི་མཚན་ཉིད་ཀྱིས་སྐྱེ་བ་ནི་བདེན་པ་གཉིས་ཆར་དུ་ཡང་ཡོད་པ་མ་ཡིན་ནོ། །ཞེས་གསུངས་པ་ཡང་ཕྱོགས་སྔ་སྨྲ་བ་པོ་གཅིག་ལ་སྦྱར་དགོས་ཏེ། དོན་དམ་པར་སྐྱེ་བ་འགོག་པའི་རིགས་པས་ཐ་སྙད་དུ་ཡང་རང་གི་མཚན་ཉིད་ཀྱིས་གྲུབ་པའི་སྐྱེ་བ་ཁེགས་པར་གསུངས་པའི་ཕྱིར་རོ། །གསུམ་པ་ནི། དངོས་པོ་སོགས་ཏེ། བདེན་པ་གཉིས་ཆར་དུ་རང་གི་མཚན་ཉིད་ཀྱིས་སྐྱེ་བ་མེད་ན། གཟུགས་སོགས་སུ་སྣང་བ་ནི་ཇི་ལྟར་ཞེ་ན་དཔེའི་སྒོ་ནས་ལན་བཏབ་པའོ། །གསུམ་པ་ནི། བདེན་པ་སོགས་ཏེ། དབུ་མ་ལས། གང་དག་རང་བཞིན་གྱིས་ཡོད་པ། །དེ་ནི་མེད་པ་མིན་པས་རྟག །སྔོན་བྱུང་ད་ལྟར་མེད་ཅེས་པ། །དེས་ན་ཆད་པར་ཐལ་བར་གྱུར། །ཞེས་དང་། དངོས་པོ་ཡོད་པར་ཁས་བླངས་ན། །རྟག་དང་ཆད་པར་ལྟ་བ་ནི། །ཐལ་བར་འགྱུར་དེ་དངོས་དེ་ནི། །རྟག་དང་མི་རྟག་འགྱུར་ཕྱིར་རོ། །ཞེས་གསུངས་པའི་རྟག་ཆད་ཀྱི་ལྟ་བ་སྤངས་པའི་ཡོན་ཏན་ནི། བདེན་པ་གཉིས་ཆར་དུ་ཡང་རང་བཞིན་མེད་པའི་ཕྱོགས་ལ་ཡོད་ཅེས་པའོ། །གཉིས་པ་ལས་ཀྱི་འབྲས་བུ་འཐད་པའི་ཡོན་ཏན་ལ་གསུམ་སྟེ། ཀུན་གཞི་མེད་ཀྱང་ལས་འབྲས་ཆུད་མི་ཟ། དེ་ལ་ཧ་ཅང་ཐལ་བ་རྣམ་གཉིས་སྤང་། ཀུན་གཞི་སོགས་གསུངས་དྲང་དོན་ཉིད་དུ་བསྟན་པའོ། །དང་པོ་ལ་གཉིས་ཏེ། དངོས་ཀྱི་དོན་དང་། དེའི་དཔེ་བཤད་པའོ། །དང་པོ་ནི། གང་ཕྱིར་སོགས་ཏེ། འདི་ལ་ལས་འབྲས་ཀྱི་འབྲེལ་པ་འཐད་ཚུལ་དངོས། དེ་ཉིད་ལུང་དང་སྦྱར་བ་དང་། ལོག་རྟོག་གསར་པ་དགག་པ་དང་གསུམ་ལས། དང་པོ་ནི། བདེན་པ་གཉིས་ཀར་ཡང་རང་བཞིན་མེད་པས་རྟག་ཆད་ལྟ་བ་སྤངས་པ་འབའ་ཞིག་ཏུ་མ་ཟད་ཀྱི། དངོས་པོར་སྨྲ་བས་བརྟགས་པའི་ལས་འབྲས་ཀྱི་འབྲེལ་པའི་གཞི་ཁས་མ་བླངས་ཀྱང་། ལས་འགགས་ནས་ཡུན་རིང་དུ་ལོན་ཡང་ལས་རྣམས་ཀྱི་འབྲས་བུ་དང་འབྲེལ་པ་འཐད་པའི་ཡོན་ཏན་ཡོད་དོ། །ཇི་ལྟར་ཞེ་ན། འདི་ལ་དོགས་པ་འགོད་པ་དང་། དེའི་ལན་འདེབས་པའི་ཚུལ་གཉིས། དང་པོ་ནི། རྩ་ཤེར་ལས། གལ་ཏེ་སྨིན་པའི་དུས་བར་དུ། །གནས་ན་ལས་དེ་རྟག་པར་འགྱུར། །གལ་ཏེ་འགགས་ན་འགགས་འགྱུར་པས། །ཅི་ལྟར་འབྲས་བུ་བསྐྱེད་པར་འགྱུར། །ཞེས་གསུངས་ཏེ། ལས་དེ་རྫོགས་པར་བྱས་ནས་འབྲས་བུ་འབྱིན་པའི་བར་དུ་གནས་ན་ལས་རྟག་པར་འགྱུར་ཞིང་། སྐད་ཅིག་གཉིས་པར་འགགས་ན་མཚམས་དེ་ནས་འབྲས་བུ་འབྱིན་པའི་བར་དུ་ལས་གཏན་མེད་པས། ལས་ཀྱི་འབྲས་བུ་འབྱིན་པར་ཅི་ལྟར་འགྱུར། །ཞེས་པའོ། །གཉིས་པ་ནི། རྩ་ཤེར། ལས་འབྲས་ཀྱི་རྟེན་རྣམ་ཤེས་ཀྱི་རྒྱུན་བཀག་ནས་ཆུད་མི་ཟ་འདོད་པའི་དངོས་སྨྲ་བའི་ལུགས་བརྗོད་ནས་དེ་བཀག་སྟེ། རང་ལུགས་བཞག་པའི་རིམ་པ་གསུམ་དུ་མཛད། བསྟན་བཅོས་འདིར་རྩ་བར་ཀུན་གཞི་བཀག་ནས་རང་ལུགས་བཞག་པ་དང་། འགྲེལ་པར་ཀུན་གཞི་དང་། ཆུད་མི་ཟ་དང་། ཐོབ་པ་དང་། རྣམ་ཤེས་ཀྱི་རྒྱུན་བཀག་ནས་རང་ལུགས་འཇོག་པ་མཛད་དོ། །དེ་ལ་ལས་འགགས་པའི་དོན་དངོས་སྨྲ་བས་ལས་རང་བཞིན་གྱིས་འགགས་པ་ལ་འདོད་ལ། དེའི་དོན་ཡང་དགག་བྱའི་ལས་དེ་དེ་ཕྱིན་ཆད་གཏན་མེད་པར་འདོད་དེ། སྐད་ཅིག་མ་དང་རྒྱུན་གང་ལ་སྦྱར་ཡང་འདྲའོ། །དེ་ལྟར་ན་ལས་འགགས་ཟིན་ནས་འབྲས་བུའི་བར་དུ་ལས་གཏན་མེད་པའི་བར་སྟོང་ཡུན་རིང་དུ་བྱུང་བས། དེ་སྦྲེལ་བར་བྱེད་པ་ལ་སེམས་ཙམ་པས་ལས་ཀྱིས་བཞག་པའི་བག་ཆགས་འདོད་ཅིང་། དེའི་གཞི་ཀུན་གཞི་རྒྱུན་བརྟན་པའི་བདེན་གྲུབ་པ་འདོད་དོ། །བྱེ་བྲག་ཏུ་སྨྲ་བ་ཁ་ཅིག ལས་ཀྱི་བུ་ལོན་གྱི་དབང་རྒྱ་དང་འདྲ་བའི་ཆུད་མི་ཟ་བསྐྱེད་པར་འདོད་པ་དང་། ཁ་ཅིག་ལས་ཀྱིས་ཐོབ་པ་བསྐྱེད་ནས་དེས་སྦྲེལ་བར་འདོད་དོ། །མདོ་སྡེ་པས་བག་ཆགས་ཀྱིས་བསྒོས་པའི་རྣམ་པར་ཤེས་པའི་རྒྱུན་རྟོག་པར་བྱེད། སྦྲེལ་བྱེད་བག་ཆགས་ཡིན་པ་ནི་སེམས་ཙམ་པ་དང་འདྲ་ལ་དེའི་བསྒོ་གཞི་མི་འདྲ་བའོ། །དབུ་མ་པ་རང་གི་ལུགས་ནི། ལས་རང་བཞིན་གྱིས་འགགས་ན་དེ་ལྟར་བདེན་ཡང་ཐ་སྙད་དུ་འགགས་པ་ཡིན་གྱི། རང་བཞིན་གྱིས་མ་འགགས་པས་འབྲས་བུ་འབྱིན་གྱིས་བར་དུ་ལས་གཏན་མེད་པ་མ་ཡིན་ལ་དེས་ན་བར་སྐབས་སྟོང་པ་སྦྲེལ་བྱེད་ཀྱི་ཀུན་གཞི་སོགས་མེད་ཀྱང་ལས་ལས་འབྲས་བུ་འབྱུང་བར་འཐད་དོ། །འོ་ན་བར་སྐབས་དེར་ལས་རང་གི་ངོ་བོ་ཡོད་པ་ཡིན་ནམ་ཞེ་ན། ཡོད་པ་ཡང་མ་ཡིན་ཏེ། རྟག་པར་ཐལ་བའི་ཕྱིར་རོ། །གཞུང་འདིར་གང་ཕྱིར་རྒྱུ་ཞིག་ནའང་འབྲས་བུ་མཐོང་བའི་ཕྱིར། ཞེས་འབྲས་བུའི་དུས་ན་རྒྱུ་ཞིག་པར་བཤད་པ་དང་། གང་ཕྱིར་མྱུག་ཚེ་ས་བོན་ཞིག་པ་མེད། །ཞེས་འབྲས་བུའི་དུས་ན་རྒྱུ་མ་ཞིག་པར་བཤད་པ་དང་། གང་ཕྱིར་རང་བཞིན་གྱིས་ནི་མི་འགག་པ། །ཞེས་ལས་མི་འགག་པར་བཤད་པ་དང་། ལ་ལར་ལས་འགགས་ཡུན་རིང་ལོན་ལས་ཀྱང་། །ཞེས་ལས་འགགས་པར་བཤད་པ་འགལ་བ་ལྟར་སྣང་བའི་དོན་ནི། ལས་བྱས་མ་ཐག་ཏུ་ཐ་སྙད་དུ་ཞིག་པ་དང་། ཐ་སྙད་དུ་འགགས་པ་ཡིན་ལ་རང་བཞིན་གྱིས་ཞིག་པ་དང་འགགས་པ་མིན་ཅེས་པའི་དོན་ཏེ། མདོ་ལས། ཟད་པ་མེད་ཅེས་གང་སྨྲས་དང་། །ལས་ཟད་ཅེས་ནི་གང་སྨྲས་པ། །སྟོང་པའི་ཚུལ་དུ་ཟད་པ་མེད། །ཐ་སྙད་ཚུལ་དུ་ཟད་པར་བསྟན། །ཅེས་འབྱུང་བས་སོ། །དེ་གཉིས་ཀྱི་དོན་ཡང་དབུ་མ་པ་ཐམས་ཅད་ལ་རང་བཞིན་དང་ཐ་སྙད་ཅེས་པའི་ཚིག་ཙམ་འཇིག་པའི་རྗེས་སུ་འབྲང་བ་མ་ཡིན་གྱི། ཐ་སྙད་དུ་ཞིག་པ་དང་འགགས་པའི་དོན་ཐ་སྙད་པའི་བློ་ལ་དེ་ལྟར་སྣང་ཡང་གཏན་མེད་རྒྱུན་ཆད་དུ་མ་སོང་བ་ཡིན་ལ་རང་བཞིན་གྱིས་ཞིག་པ་དང་འགགས་པའི་དོན་སྔར་རང་བཞིན་གྱིས་ཡོད་པ་ཕྱིས་གཏན་མེད་དུ་སོང་བའོ། །འདི་ནི་སྐད་ཅིག་ལ་སྦྱར་བའི་ཚེ་སྐད་ཅིག་སྔ་མ་ཕྱི་མའི་དུས་སུ་གཏན་མེད་དུ་སོང་བ་ཡིན་ལ། རྒྱུན་ལ་སྦྱར་བའི་ཚེ་རིགས་འདྲ་སྐྱེ་བ་གཏན་མེད་དུ་སོང་བའོ། །ལས་རང་བཞིན་གྱིས་འགག་པ་མེད་པའི་སྒྲུབ་བྱེད་ནི་རང་བཞིན་གྱིས་མ་སྐྱེས་པའི་ཕྱིར་ཞེས་པ་སྟེ། རྩ་ཤེར་མ་སྐྱེས་པས་ཆུད་ཟར་མི་འགྱུར་ཞེས་དང་། འདིར་མ་འགགས་པས་ལས་ཀྱི་འབྲས་བུ་བསྐྱེད་ནུས་ཞེས་པའི་དོན་ཏོ། །དེང་སང་དབུ་མ་པའི་ལུགས་ལ་དགག་པ་གཉིས་ཀྱི་རྣལ་མ་གོལ་བར་ཁས་བླངས་ནས་རྒྱུ་དེ་འབྲས་བུའི་བར་དུ་ཡོད་པ་ཡང་མ་ཡིན། མེད་པ་ཡང་མ་ཡིན་པ་བློར་མི་ཤོང་བ་དག་གིས་ནི་འདིའི་དོན་བསྐལ་པའི་བར་དུ་བཙལ་ཡང་མི་རྙེད་དེ། འཆད་པར་འགྱུར་བའི་ཕྱོགས་སྔའི་ནང་དུ་གསལ་ལོ། །གཉིས་པ་དེ་ཉིད་ལུང་དང་སྦྱར་བ་ནི། རྩ་ཤེར་ལས། གང་ཕྱིར་ལས་ནི་སྐྱེ་བ་མེད། །འདི་ལྟར་རང་བཞིན་མེད་དེའི་ཕྱིར། །གང་ཕྱིར་དེ་ནི་མ་སྐྱེས་པ། །དེ་ཕྱིར་ཆུད་ཟར་མི་འགྱུར་རོ། །ཞེས་དང་། མདོ་ལས་ཀྱང་། མི་ཡི་ཚེ་ཚད་ལོ་བརྒྱ་སྟེ། །དེ་སྲིད་འཚོ་ཞེས་བརྗོད་མོད་ཀྱི། །ལོ་ལ་ཕུང་པོ་སྤུངས་པ་མེད། །སྒྲུབ་པ་དེ་ཡང་དེ་དང་མཚུངས། །ཟད་པ་མེད་ཅེས་གང་སྨྲས་དང་། །ལས་ཟད་ཅེས་ནི་གང་སྨྲས་པ། །ཅེས་སོགས་སྔར་དྲངས་པ་ལྟར་གསུངས་སོ། །གསུམ་པ་ལ་གཉིས་ཏེ། གསར་པ་བརྗོད་པ་དང་། དེ་དགག་པའོ། །དང་པོ་ནི། ཕྱིས་ཀྱི་དབུ་མ་པ་ཁ་ཅིག དེ་ཡང་དངོས་པོ་རང་བཞིན་གྱིས་གྲུབ་པར་འདོད་པའི་ཕྱོགས་ཐམས་ཅད་ལ། ཞིག་པ་དངོས་པོ་མི་རུང་ལ་རང་བཞིན་གྱིས་མ་གྲུབ་པར་འདོད་པའི་དབུ་མའི་ཕྱོགས་ལ་ཞིག་པ་དངོས་པོར་གྲུབ་པ་ནི་གནད་དོ། །ལུགས་དང་པོ་ལ་ནི་མྱུ་གུ་ལྟ་བུའི་དངོས་པོ་གཅིག་ཞིག་པ་ན། མྱུ་གུའི་ཆ་ཤས་ཀྱི་དངོས་པོ་ཐམས་ཅད་ནི་ལོག་ལ་མྱུ་གུ་ལས་གཞན་པ་བུམ་པ་ལ་སོགས་པའི་དངོས་པོ་གཞན་ཡང་མ་ཐོབ་པས་ཞིག་པ་དེ་དངོས་པོ་གཏན་མ་ཡིན་པར་འདོད་དེ། སྔོན་པོ་ལ་སོགས་པ་སྐྱེ་མཆེད་རེ་རེ་བའི་དངོས་པོ་དང་བུམ་པ་ལ་སོགས་པ་རང་གི་ཆ་ཤས་ཀྱི་དངོས་པོ་ཚོགས་པ་གང་ཡང་ཞིག་པ་དེའི་མཚན་གཞི་མི་རུང་བའི་ཕྱིར་དངོས་པོ་ནི་མིན་ནོ་སྙམ་པའོ། །ལུགས་ཕྱི་མ་ལ་ནི་དཔེར་ན་ཉེར་སྦས་ཀྱི་ཕུང་པོ་ལྔར་རེ་རེ་བ་དང་ཚོགས་པ་གཉིས་ཀ་དང་། དེ་གཉིས་ལས་ངོ་བོ་ཐ་དད་དང་གཅིག་ཉེར་སྦས་ཀྱི་མཚན་ཉིད་འཇོག་རྒྱུ་མེད་ཅིང་། ཉེར་སྦས་ཀྱང་དེ་གསུམ་གྱི་མཚན་གཞི་མི་རུང་ཡང་རང་གི་ཕུང་པོ་ལ་བརྟེན་ནས་ཉེར་སྦས་སུ་བཏགས་པ་དངོས་པོ་ཡིན་པར་མི་འགལ་བ་བཞིན་དུ་ཞིག་པ་ཡང་ཞིག་རྒྱུའི་དངོས་པོ་དང་། དེ་དང་རིགས་མཐུན་པའི་དངོས་པོ་གང་ཡང་མཚན་གཞིར་མེད་ཀྱང་ཞིག་རྒྱུའི་དངོས་པོ་ལ་བརྟེན་ནས་སྐྱེས་པའི་དངོས་པོའོ། །དེ་སྒྲུབ་པ་ལ་ལུང་རིགས་གཉིས་ཚིགས་གསལ་ལས་གསུངས་པའི་དང་པོ་ནི། ས་བཅུ་པ་ལས། སྐྱེ་བའི་རྐྱེན་གྱིས་རྒ་ཤི་ཞེས་གསུངས་པ་སྟེ། ཤི་བ་ནི་གང་ཤི་བའི་སེམས་ཅན་དེ་ཞིག་པ་ཡིན་ལ། དེ་སྐྱེ་བའི་རྐྱེན་གྱིས་བསྐྱེད་པར་གསུངས་པ་དང་། ཡང་དེ་ཉིད་ལས་འཆི་བ་ཡང་བྱ་བ་གཉིས་སུ་ཉེ་བར་གནས་པ་ཡིན་ཏེ། འདུ་བྱེད་འཇིག་པར་བྱེད་པ་དང་། ཡོངས་སུ་མི་ཤེས་པ་རྒྱུན་མི་ཆད་པའི་རྒྱུ་ཡང་འབྱིན་པའོ། །ཞེས་འཆི་བས་བྱ་བ་གཉིས་བྱེད་པར་གསུངས་ཏེ། ཤི་བ་རྒྱུའི་བྱེད་པ་དང་། ཤི་བས་མ་རིག་པ་བསྐྱེད་པར་གསུངས་པས། ཞིག་པ་ལ་བསྐྱེད་པའི་རྒྱུ་ཡོད་པ་དང་། ཞིག་པས་འབྲས་བུ་བསྐྱེད་ནུས་པ་ཡིན་ཏེ། འདི་ནི་རྒྱུན་གྱི་ཞིག་པ་ཡིན་ཡང་སྐད་ཅིག་མ་དང་པོ་དུས་གཉིས་པར་ཞིག་པ་ལ་ཡང་འདྲ་ལ་སྐད་ཅིག་མ་དང་པོ་དུས་གཉིས་པར་ཞིག་པའི་རྒྱུར་ཡང་བསྟན་ཏོ། །དེས་ན་སེམས་ཅན་སྐྱེས་པ་དང་ཤི་བ་གཉིས་དང་སྐད་ཅིག་མ་གཉིས་པར་མི་སྡོད་པ་དང་། སྐད་ཅིག་མ་གཉིས་པར་མ་བསྡད་པ་རྣམས་ལ་དངོས་པོར་འཇོག་མི་འཇོག་དང་། རྒྱུས་སྐྱེ་མི་སྐྱེ་ཀུན་ནས་མཚུངས་སོ། །འདི་ལ་དགོངས་ནས། རྩ་ཤེར་ལས། དངོས་དང་དངོས་མེད་འདུས་བྱས་ཡིན། །ཞེས་དང་། རིགས་པ་དྲུག་ཅུ་པ་ལས་ཀྱང་། རྒྱུ་ཟད་ཉིད་ལས་ཞི་བ་ནི། །ཟད་ཅེས་བྱ་བར་དམིགས་པ་སྟེ། །ཞེས་མྱུ་གུ་སོགས་ཀྱི་དངོས་པོ་དང་། དེ་ཞིག་པ་དེའི་དངོས་པོར་མེད་པ་གཉིས་ཀ་འདུས་བྱས་དང་། སྣུམ་ལྟ་བུའི་རྒྱུ་ཟད་པ་ནི་མར་མེ་ལྟ་བུའི་འབྲས་བུ་ཟད་པའི་རྒྱུར་གསུངས་པས། འཕགས་པའི་བཞེད་པར་གདོན་མི་ཟ་བར་འདོད་པར་བྱའོ། །སྐད་ཅིག་དང་པོ་དུས་གཉིས་པར་ཞིག་པ་ནི་དངོས་སུ་དགག་བྱ་གཅད་ནས་རྟོགས་དགོས་པས་དགག་པ་ནི་ཡིན་ལ་མེད་དགག་ནི་མ་ཡིན་པས་མ་ཡིན་དགག་སྟེ། ཞིག་རྒྱུ་དེ་བཅད་པ་ཙམ་མིན་གྱི་དེ་བཅད་པའི་དངོས་པོ་གཅིག་འཕངས་པའི་ཕྱིར། སྒྲུབ་བྱེད་ལྷག་མ་ནི་རྒྱས་པར་རྩ་ཤེའི་ཊཱི་ཀ་ལས་ཤེས་པར་བྱའོ། །འདི་ནི་ལུགས་འདིའི་རིགས་པ་ཕྲ་ལ་དོན་ཆེ་བ་གཅིག་ཏུ་འདུག་གོ །ཞེས་བྱ་བ་བྲིས་སོ། །གཉིས་པ་ནི། དབུ་མ་པས་ལྷན་སྐྱེས་དང་ཀུན་བཏགས་ཀྱིས་བཏགས་པའི་དངོས་པོ་ཐམས་ཅད་རིགས་པས་དཔྱད་ནས་དགག་དགོས་པ་ལ་འདི་ལྟ་བུའི་དངོས་འཛིན་གསར་དུ་བསྣན་པ་ནི་ཉེས་དམིགས་ཆེ་བས་དགག་དགོས་ཤིང་། ལུང་རིགས་མེད་པའི་རང་བཟོར་སྣང་བས་དགག་ནུས་པ་ཡང་ཡིན་ལ། འདི་དགག་པ་ལ་བཞི་སྟེ། ཕྱོགས་སྔའི་རྡུལ་ཕུང་རིམ་ལྟར་བརླག་པ། གནོད་བྱེད་གཞན་ཡང་ཆར་ལྟར་ཕབས་པ། འགལ་འདུའི་རིགས་པ་ཐོག་ལྟར་འབེབས་པ། བཀས་བཅད་ཀྱི་ང་རོ་འབྲུག་ལྟར་ཆེམས་པའོ། །དང་པོ་ནི། དངོས་པོ་རང་བཞིན་གྱིས་བསྒྲུབ་པར་འདོད་པའི་ཕྱོགས་ཐམས་ཅད་ལ་ཞིག་པ་དངོས་པོར་མི་རུང་ཞེས་པ་ནི་གཟིགས་རྒྱ་ཆུང་བ་སྟེ། ཞིག་པ་དངོས་པོར་འདོད་པ་མུ་སྟེགས་བྱེ་བྲག་པའི་གྲུབ་མཐར་བྱས་ནས་ཆོས་ཀྱི་གྲགས་པས་བཀག་པའི་ཕྱིར་རོ། །དབུ་མ་པའི་ཕྱོགས་ལ་ཞིག་པ་དངོས་པོར་གྲུབ་ཅེས་པའི་གྲུབ་མཐའ་སྔར་མ་བྱུང་ཞིང་འདིར་ནི་འགོག་པར་འགྱུར་རོ། །ལུགས་དང་པོས་མྱུ་གུའི་ཆ་ཤས་ཀྱི་དངོས་པོ་ཐམས་ཅད་ནི་ལོག་ལ་མྱུ་གུ་ལས་གཞན་བུམ་པ་ལ་སོགས་པའི་དངོས་པོ་གང་ཡང་མ་ཐོབ་པ་རྒྱུ་མཚན་དུ་བྱས་ནས། ཞིག་པ་དེ་དངོས་པོ་གཏན་མ་ཡིན་པར་འདོད་པ་མ་ཡིན་ཏེ། དེ་ལྟར་ན་ལུགས་དང་པོས་མྱུ་གུའི་ཆ་ཤས་ཐམས་ཅད་ལོག་ནས་སྡོང་བུ་སྐྱེས་པ་དེ་ཡང་དངོས་པོ་གཏན་མ་ཡིན་པར་འདོད་པར་འགྱུར་ཏེ། རྒྱུ་མཚན་མཚུངས་པའི་ཕྱིར་རོ། །ལུགས་ཕྱི་མ་ལ་ཉེར་སྦས་ཀྱི་ཕུང་པོའི་ཚོགས་པ་ལ་བརྟེན་ནས་ཉེར་སྦས་སུ་བཏགས་པ་དངོས་པོ་ཡིན་པར་མི་འགལ་བ་དང་། ཞིག་རྒྱུའི་དངོས་པོ་ལ་བརྟེན་ནས་སྐྱེས་པའི་ཞིག་པ་དངོས་པོར་མི་འགལ་བ་གཉིས་དཔེ་དོན་དུ་གཏན་མི་མཚུངས་ཏེ། ལུགས་དེ་ལ་ཉེར་སྦས་ཀྱི་ཕུང་པོ་མེད་ན་ཉེར་སྦས་སུ་བཏགས་པ་མེད་དགོས་ཤིང་། ཞིག་པ་དངོས་པོ་བ་ནི། ཞིག་རྒྱུའི་དངོས་པོ་མེད་པའི་དུས་ཁོ་ནར་བཞག་འདུག་པའི་ཕྱིར། ལེགས་པར་སོམས་ཤིག ལུང་གི་སྒྲུབ་བྱེད་ལ། ས་བཅུ་པ་ལས། སྐྱེ་བའི་རྐྱེན་གྱིས་རྒ་ཤི་ཞེས་པའི་ཤི་བ་དེ་སེམས་ཅན་དེ་ཞིག་པ་ཡིན་ན། གནས་སྐབས་དེར་སེམས་ཅན་ཡོད་དམ་མེད། ཡོད་ན་མྱུ་གུའི་ཞིག་པའི་གནས་སྐབས་སུ་ཡང་མྱུ་གུ་ཡོད་པར་འགྱུར་ཞིང་། མེད་ན་སེམས་ཅན་ཤི་ནས་མེད་པ་རྒྱང་འཕེན་པའི་གྲུབ་མཐའ་ལ་གནས་པའོ། །ལུགས་འདིའི་རྗེས་འབྲང་ཐམས་ཅད་ཕྱོགས་ཞེན་གྱིས་མ་བསྒྲིབས་པར་གཟུ་བོས་དཔྱོད་ཅིག གལ་ཏེ་ཤི་བའི་གནས་སྐབས་སུ་སེམས་ཅན་སྐད་ཅིག་སྔ་མ་དེ་མེད་པས་ཤི་བ་དེ་སེམས་ཅན་ཞིག་པར་འཇོག་ཞེ་ན། དེ་ལྟར་ན་རྒ་བ་དེ་ཡང་སེམས་ཅན་ཞིག་པའི་ཞིག་པ་ཡིན་པར་འགྱུར་ཏེ། རྒྱུ་མཚན་མཚུངས་པའི་ཕྱིར། དེ་བཞིན་དུ་ཡན་ལག་བཅུ་གཉིས་པོ་རེ་རེ་ཞིང་སེམས་ཅན་ཞིག་པའི་ཞིག་པར་འགྱུར་ཏེ། རྒྱུ་མཚན་མཚུངས་པའི་ཕྱིར། དངོས་པོ་ཡིན་ན་རང་གི་སྐད་ཅིག་སྔ་མ་དེ་ཞིག་པའི་ཞིག་པ་ཡིན་པས་ཁྱབ་པར་འགྱུར་ཏེ། དགོད་བྲོ་བའི་ཕྱིར་རོ། །རྒ་ཤིའི་ཟླས་ཕྱེ་བའི་ཤི་བ་སྐྱེ་བའི་རྐྱེན་ལས་བྱུང་བ་དང་། དེས་མ་རིག་པ་བསྐྱེད་པར་གསུངས་པས་རང་ལ་མི་ཕན་ཞིང་གཞན་ལུགས་ལ་མི་གནོད་དེ་དེ་ཞིག་པ་ཡིན་པ་བཀག་ཟིན་པའི་ཕྱིར་དང་། ཤི་བ་དེ་དངོས་པོ་ཡིན་པར་གཞན་གྱིས་ཁས་བླངས་པའི་ཕྱིར་རོ། །སྒྲུབ་བྱེད་འདི་ལ་འདི་ཙམ་ཞིག་འཁྲུལ་པ་འདི་རྒྱུ་ཅི་ཡིན། སེམས་ཅན་སྐྱེས་པ་དང་ཤི་བ་གཉིས་དངོས་པོར་འཇོག་མི་འཇོག་དང་། རྒྱུས་བསྐྱེད་མི་སྐྱེད་ཀུན་ནས་མཚུངས་པ་ཅིས་ཀྱང་ཡིན་མོད། དེས་རང་ལུགས་མི་འགྲུབ་ཅིང་། གཞན་ལུགས་ལ་མི་གནོད་པ་བཤད་ཟིན་ཏོ། །སྐད་ཅིག་མ་གཉིས་པར་མི་སྡོད་པ་དང་། སྐད་ཅིག་མ་གཉིས་པར་མ་བསྡད་པ་རྣམས་ལ་དེ་གཉིས་མཚུངས་ན་ཧ་ཅང་ཐལ་ཏེ། སྐད་ཅིག་མ་གཉིས་པར་མི་སྡོད་པ་ནི་སྐད་ཅིག་མ་དང་པོ་ཡིན་པས་དངོས་པོ་ཡིན་དུ་ཆུག སྐད་ཅིག་མ་གཉིས་པར་མ་བསྡད་པ་དངོས་པོ་དང་རྒྱུ་ཡིས་བསྐྱེད་པ་ཡིན་ན། གསུམ་པར་མ་བསྡད་པ་དང་། བཞི་པར་མ་བསྡད་པ་སོགས་ལ་ཡང་མཚུངས་ཤིང་། མཚུངས་པར་ཁས་ཀྱང་བླངས་ཏེ། ད་ལྟ་མྱུ་གུ་ལྟ་བུ་གཅིག་ཞིག་པའི་ཞིག་པ་དེ་འཁོར་བ་མ་སྟོངས་ཀྱི་བར་དུ་རྒྱུ་ཡིས་བསྐྱེད་པར་འགྱུར་རོ། །དངོས་དང་དངོས་མེད་འདུས་བྱས་ཡིན། །ཞེས་པའི་དངོས་པོ་འདུས་བྱས་ཡིན་པས་ནི་འདི་ལ་ཕན་པ་གང་ཡང་མེད་ལ། དངོས་མེད་འདུས་བྱས་ཡིན་པ་ལུང་འདིས་སྟོན་ན། ཞིག་པ་དངོས་མེད་དུ་ཁས་བླངས་དགོས་པར་འགྱུར་རོ། །རྒྱུ་ཟད་ཉིད་ལས་ཞི་བ་ནི། །ཞེས་པའི་ཟད་པ་དེ་དངོས་པོ་དང་འདུས་བྱས་ཡིན་ན། མྱང་འདས་འདུས་བྱས་དང་དངོས་པོ་ཡིན་པར་འགྱུར་ཞིང་། དེ་ཡང་འདོད་ན། མྱ་ངན་འདས་པ་དངོས་མེད་པའང་། །མེད་ན་དེ་དངོས་ག་ལ་ཡིན། །དངོས་དང་དངོས་མེད་འདུས་བྱས་ཡིན། །མྱ་ངན་འདས་པ་འདུས་མ་བྱས། །ཞེས་པའི་ཀླུ་སྒྲུབ་ཀྱི་གཞུང་ལ་སྙིང་ནད་འདི་ཙམ་ཞིག་ཅིའི་ཕྱིར་སློང་། རྒྱུ་ཟད་པ་འབྲས་བུ་ཟད་པའི་རྒྱུ་ཡིན་པས་དེ་གཉིས་དངོས་པོར་གྲུབ་པར་འདོད་ན། ཐོ་བས་བུམ་པ་འཇིགས་པར་བྱས་པས་བུམ་པའི་ཞིག་པ་དངོས་པོར་ཡོད་པ་རྣམ་འགྲེལ་ལེའུ་དང་པོར་བཀག་པ་དེ་དྲན་པར་གྱིས་ཤིག སྐད་ཅིག་མ་དང་པོ་དུས་གཉིས་པར་ཞིག་པ་དེ་དགག་བྱ་དངོས་སུ་བཅད་ནས་རྟོགས་དགོས་ཞེས་པའི་དོན་དགག་བྱ་སྐད་ཅིག་མ་དང་པོ་ལ་བྱེད་ན་ནི། སྔོན་པོ་སྐད་ཅིག་དང་པོ་ཞིག་པའི་རྗེས་ཀྱི་སྔོན་པོ་སྐད་ཅིག་གཉིས་པ་དེ་ཡང་མ་ཡིན་དགག་ཏུ་འགྱུར་ཏེ། དགག་བྱ་དངོས་སུ་བཅད་ནས་རྟོགས་དགོས་པར་མཚུངས་པའི་ཕྱིར། སྒྲུབ་བྱེད་ལྷག་མ་རྩ་ཤེའི་ཊཱི་ཀ་ལས་ཤེས་པར་མི་འཚལ། འདིར་བཀོད་པའི་རྣམ་རྟོག་གི་བཟོ་རྒྱ་འདི་ཙམ་གྱིས་ངེས་འབྱུང་སྐྱེ་བའི་རྒྱུ་ཆོག་པར་སྣང་ངོ་། །འདི་ནི་ལུགས་འདིའི་རིགས་པ་ཕྲ་ལ་དོན་ཆེ་བའི་གཅིག་ཏུ་འདུག་གོ །ཞེས་པ་ནི་འདི་འདྲའི་རིགས་ཀྱི་ཚིག་རེ་གར་ཡོད་སར་འདི་འདྲའི་རིགས་ཀྱི་གྲུབ་མཐའ་རེ་ཡོད་པ་ཁོ་བོས་ཀྱང་གོའོ། །གཉིས་པ་ལ་གཞན་སྐྱེ་ཡོད་པར་ཐལ་བ། མ་ཕྲད་པར་སྐྱེད་པ་ཡོད་པར་ཐལ་བ། རྟེན་གཞན་ལ་བརྗོད་པའི་ཉེས་པ་མཚུངས་པ། དེ་ལས་ཀྱང་སྨད་པའི་གནས་སུ་གྱུར་པ། ཞིག་པས་ནམ་མཁའ་གང་བར་ཐལ་བ། འདུས་མ་བྱས་ལ་རྟེན་འབྲེལ་མི་རུང་བར་ཐལ་བ། སྨིན་ལས་སླར་སྨིན་གྱི་སྐྱོན་སྤོང་མི་ནུས་པ། གཅིག་དང་ཐ་དད་བཏགས་པའི་ཉེས་པ་སྟེ་རེ་ཞིག་བརྒྱད་ལས་དང་པོ་ནི། ལས་འབྲས་གཉིས་པོ་ངོ་བོ་གཞན་དུ་འགྱུར་ཏེ། དེ་གཉིས་ཀྱི་ངོ་བོ་ཡོད་ཅིང་བར་དུ་ཞིག་པ་དངོས་པོ་བས་ཆོད་པའི་ཕྱིར། རྟགས་གཉིས་ཆར་ཁས་བླངས། འདོད་ན། གཞན་སྐྱེ་ཡོད་པར་འགྱུར་རོ། །གཉིས་པ་ནི། རྒྱུ་འབྲས་ཕྲད་ནས་བསྐྱེད་དམ། མ་འཕྲད་པར་བསྐྱེད་ཅེས་དཔྱད་པའི་ཚེ། ཕྱོགས་ཕྱི་མ་ཁས་ལེན་རིགས་པར་འགྱུར་ཏེ། རྒྱུས་འབྲས་བུ་སྐྱེད་པ་གང་ཞིག་དེ་གཉིས་ཀྱི་བར་ཞིག་པ་དངོས་པོ་བས་ཆོད་པའི་ཕྱིར། འདོད་ན་ཕྲད་མ་ཕྲད་དཔྱད་པའི་ཚེ་ཕྱོགས་གཉིས་ཀ་གཞུང་ལས་དངོས་སུ་བཀག་པ་དང་འགལ་ལོ། །གསུམ་པ་ནི། གཞན་གྱིས་ལས་འབྲས་ཀྱི་རྟེན་ཀུན་གཞི་སོགས་ཁས་ལེན་པ་ལ་བརྗོད་པའི་ཉེས་པ་ཐམས་ཅད་འདི་ལ་མཚུངས་ཏེ། གང་ཕྱིར་ལས་ལ་སྐྱེ་བ་མེད། །འདི་ལྟར་རང་བཞིན་མེད་དེའི་ཕྱིར། །གང་ཕྱིར་དེ་ནི་མ་སྐྱེས་པ། །དེ་ཕྱིར་ཞིག་དངོས་མི་དགོས་སོ། །ཞེས་དང་། གང་ཕྱིར་རང་བཞིན་གྱིས་དེ་མི་འགག་པ། །དེ་ཕྱིར་ཞིག་དངོས་མེད་ཀྱང་འདི་ནུས་ཕྱིར། །ཞེས་སོགས་ཅིའི་ཕྱིར་མི་མཚུངས། ཀུན་གཞི་སོགས་ཀྱིས་ཉེས་པ་ཅི་ཞིག་བྱས་ལེགས་པར་སྨྲོས་ཤིག བཞི་པ་ནི། དེ་དག་ལས་ཀྱང་འདི་སྨད་པའི་གནས་ཏེ། ཀུན་གཞི་སོགས་ནི་ནང་པའི་གྲུབ་མཐའ་སྨྲ་བ་རེ་རེའི་འདོད་པ་ཡིན་ལ། ཞིག་པ་དངོས་པོར་གྲུབ་པ་ནི་ཕྱི་རོལ་པའི་འདོད་པ་ཡིན་པའི་ཕྱིར་ཏེ། བྱེ་བྲག་ཏུ་སྨྲ་བས་ཀྱང་ཉོན་མོངས་སྤངས་པའི་འགོག་པ་དངོས་པོར་འདོད་ཀྱང་། དངོས་པོ་ཞིག་ཚད་དངོས་པོར་མི་འདོད་པའི་ཕྱིར་རོ། །ལྔ་པ་ནི་སྔོན་པོ་ལྟ་བུ་སྐད་ཅིག་བཅུ་རྒྱུན་ལྡན་དུ་འབྱུང་བའི་ཚེ་སྐད་ཅིག་མ་གཉིས་པར་སྔོན་པོ་སྐད་ཅིག་དང་པོའི་ཞིག་པ་དངོས་པོ་བ་དང་། སྔོན་པོ་སྐད་ཅིག་མ་གཉིས་པ་དང་གཉིས། སྐད་ཅིག་མ་གསུམ་པར་དེ་གཉིས་ཀྱི་ཞིག་པ་དངོས་པོ་བ་གཉིས་སྔོན་པོ་སྐད་ཅིག་མ་གསུམ་པ། ཞིག་པ་སྐད་ཅིག་མ་དང་པོའི་རིགས་འདྲ་སྐད་ཅིག་མ་གཉིས་པ་སྟེ་བཞི་དང་། ལྔ་པའི་ཚེ་དེ་རྣམས་ཀྱི་རིགས་འདྲ་སྐད་ཅིག་མ་གཉིས་པ་བཞི། དེ་རྣམས་ཞིག་པའི་ཞིག་པ་བཞི་སྟེ། བརྒྱད་དུ་འགྱུར་བ་སོགས་ཁྱོད་ཀྱི་ཞིག་པ་འདི་དག་གཟུགས་སུ་གྲུབ་ན་རྡུལ་ཕྲན་ཙམ་ལས་མེད་ཀྱང་། དངོས་པོ་གཅིག་ཞིག་པའི་ཞིག་པ་དེས་ཀྱང་ནམ་མཁའི་ཁམས་གང་བར་འགྱུར་རོ། །དྲུག་པ་ནི། སྣུམ་ལྟ་བུའི་རྒྱུ་ཟད་པ། མར་མེ་ལྟ་བུའི་འབྲས་བུ་ཟད་པའི་རྒྱུར་གསུངས་པས་རྒྱུ་འབྲས་གཉིས་ཀ་དངོས་པོ་དང་འདུས་བྱས་ཡིན་ན། མ་རིག་པ་ལ་སོགས་པའི་ཡན་ལག་སྔ་མ་སྔ་མ་ཟད་པས། འདུ་བྱེད་ལ་སོགས་པའི་ཡན་ལག་ཕྱི་མ་ཕྱི་མ་ཟད་པའི་རྒྱུ་འབྲས་ཐམས་ཅད་ཀྱང་དངོས་པོ་དང་འདུས་བྱས་སུ་འགྱུར་ལ། དེ་ཡང་འདོད་ན་འདུས་མ་བྱས་ལ་རྟེན་འབྲེལ་གཏན་མི་རུང་བར་འགྱུར་ཏེ། གང་གི་རྐྱེན་གྱིས་གང་འབྱུང་བ་ཐམས་ཅད་འདུས་བྱས་ཁོ་ན་ཡིན་པའི་ཕྱིར་རོ། །གཞན་ཡང་། ངོ་བོ་ཉིད་སྐུ་དེ་འདུས་བྱས་ཡིན་པར་ཐལ། སྦྱོར་བཞི་སྒོམ་པ་དེ་ངོ་བོ་ཉིད་སྐུའི་རྒྱུ་ཡིན་པའི་ཕྱིར། ལན་ཅི་སྨྲ། མ་གྲུབ་ན། སྣུམ་ཟད་པ་དེ་མར་མེ་ཟད་པའི་རྒྱུ་ཡིན་པར་ཁྱོད་སྒྲུབས་ཤིག བདུན་པ་ནི། ལས་ཀྱི་རྣམ་སྨིན་ཕྱུང་ཟིན་པའི་དུས་ན་ལས་ཞིག་པའི་ཞིག་པ་ཡོད་དམ་མེད། ཡོད་ན་ལས་གཅིག་གི་རྣམ་སྨིན་ཕྱུང་ཟིན་པའི་རྗེས་སུ་ཡང་། སླར་ཡང་རྣམ་པར་སྨིན་པར་འགྱུར་ཏེ། དེའི་ཚེ་ཡང་རྣམ་སྨིན་གྱི་རྒྱུར་གྱུར་པའི་ཞིག་པ་དངོས་པོ་བ་ཡོད་པའི་ཕྱིར། མེད་ན་རྣམ་སྨིན་ཕྱུང་ཟིན་པའི་ཚེ་ལས་མ་ཞིག་པར་ཐལ། དེའི་ཚེ་ལས་ཞིག་པའི་ཞིག་པ་མེད་པའི་ཕྱིར། ཁྱབ་པ་གྲུབ་མཐའི་གཙོ་བོ་ལ་ཨེ་སོང་། བརྒྱད་པ་ནི། ལས་ཞིག་པའི་ཞིག་པ་དངོས་པོ་བ་དེ་ལས་དང་པོ་ངོ་བོ་གཅིག་གམ་ཐ་དད། ངོ་བོ་གཅིག་ན། དེའི་ཚེ་ལས་མ་ཞིག་པར་འགྱུར་ཏེ། དེ་ལས་དང་ངོ་བོ་གཅིག་ཡིན་པའི་ཕྱིར། ཐ་དད་ན་དེ་ཡང་འབྲས་བུ་དང་ངོ་བོ་ཐ་དད་པས། དེ་དག་རྟེན་ནས་འབྱུང་བ་མ་ཡིན་པར་འགྱུར་ཏེ། ཕན་ཚུན་མ་ལྟོས་པའི་ཕྱིར། གཉིས་ཀ་མ་ཡིན་ནོ་ཞེ་ན། ལས་དང་ལས་ཀྱི་ཞིག་པ་དངོས་པོ་བ་ཆོས་ཅན། ཁྱོད་ངོ་བོ་གཅིག་དང་ཐ་དད་གང་རུང་ཡིན་པར་ཐལ། ཁྱོད་ཀྱི་ངོ་བོ་གྲུབ་པའི་ཕྱིར། གསུམ་ཆར་ཨེ་དྲན། དེ་ལ་སོགས་པའི་ཉེས་པ་མཐའ་ཡས་སོ། །གསུམ་པ་ནི། གོང་དུ་ཐལ་འགྱུར་བའི་ལུགས་ཀྱིས་ནི་ཐ་སྙད་གདགས་པ་ཙམ་གྱིས་མ་ཚིམ་པར་མྱུ་གུ་སྐྱེ་ཞེས་པ་ལྟ་བུ་ལ་དེ་ལྟར་བཏགས་པའི་བཏགས་དོན་བདག་གམ་གཞན་ལས་སྐྱེ་ཞེས་ཚོལ་བ་ན་དེ་ཁོ་ན་ཉིད་ལ་དཔྱོད་པར་འཇོག་གོ་ཞེས་ཁས་བླངས་པ་དང་འགལ་ཏེ། ལས་ཀྱིས་འབྲས་བུ་བསྐྱེད་ཞེས་བཏགས་པའི་བཏགས་དོན་ལས་དང་འབྲས་བུའི་བར་དུ་ཆོས་གཞན་གྱིས་ཆོད་མ་ཆོད་ཞེས་ཚོལ་བ་ན་དེ་ཁོ་ན་ཉིད་ལ་དཔྱོད་པར་འཇོག་དགོས་པ་ལས། དེའི་ཚེ་ཆོས་གཞན་ཞིག་པ་དངོས་པོ་བས་ཆོད་པར་ཁས་བླངས་པས། བཏགས་དོན་བཙལ་བའི་ཚེ་ན་མི་རྙེད་ཅེས་པའི་གྲུབ་མཐའི་གཙོ་བོ་དང་འགལ་བའི་ཕྱིར་རོ། །བཞི་པ་ནི། ཡབ་སྲས་ཀྱི་གཞུང་ལས། ལས་རང་བཞིན་གྱིས་སྐྱེ་བ་མེད་པ་དང་། འགག་པ་མེད་པའི་སྒོ་ནས། རྟག་ཆད་སྤོང་ཚུལ་ཁོ་ན་གསུངས་ཀྱི། གཞན་མ་གསུངས་བཞིན་དུ་ཞིག་པ་དངོས་པོ་བའི་བསྒྲུབ་ཚུལ་འདི་འདྲ་བྱས་ནས་དེ་ཡང་ཕྲལ་དོན་ཆེ་བ་གཅིག་ཏུ་འདུག་གོ་ཞེས་སོགས་བསླུ་བྲིད་ཀྱི་ཚིག་མང་དུ་བྱས་པ་འདིས་མཚོན་ནས། དྲུང་ཙོང་བ་འདིས་རྩལ་བཏོན་གྱི་གྲུབ་མཐའ་ཐམས་ཅད་ལ་འདི་འདྲ་རེ་ཡོད་པས། རྗེས་འཇུག་རྣམས་ཀྱིས་གསུངས་རབ་ཚད་ལྡན་དང་བསྒྲིགས་ནས་བརྟག་དཔྱད་རེ་ཅིས་ཀྱང་གྱིས། ཁོ་བོ་ལ་ཕྱོགས་གཉིས་སུ་ཕྱེ་བའི་ཕྱོགས་ཞེན་ཡོད་པ་མ་ཡིན་གྱི། ལྟ་བའི་སྙིགས་མར་གྱུར་པ་འདི་འདྲ་ལ་ཡང་མངོན་པར་ཞེན་པ་མང་པོ་མཐོང་སྟེ་མ་བཟོད་ནས་སྨྲས་པའོ། །སྤྲོས་པས་ཆོག་གོ །ད་ནི་གཉིས་པ་དེའི་དཔེ་བཤད་པ་ནི། རྨི་ལམ་སོགས་སོ། །གཉིས་པ་དེ་ལ་ཧ་ཅང་ཐལ་བ་རྣམ་གཉིས་སྤོང་བ་ལ་གཉིས་ཏེ། རྣམ་སྨིན་ཐུག་པ་མེད་པར་ཐལ་བ་སྤང་། རྣམ་སྨིན་ངེས་པ་མེད་པར་ཐལ་བ་སྤང་པའོ། །དང་པོ་ནི་ཇི་ལྟར་སོགས་སོ། །གཉིས་པ་ནི། དེ་ཕྱིར་སོགས་ཏེ། དཔེ་སྔ་མ་ཉིད་ཀྱིས་གྲུབ་པར་གསུངས་སོ། །ལས་འབྲས་རྣམས་ལ་སེམས་པ་དགག་པ་མཛད་པའི་རྒྱུ་མཚན་ནི། སོ་སོ་སྐྱེ་བོས་ལས་དགེ་བ་དང་མི་དགེ་བ་འདིའི་འབྲས་བུ་འདི་ལྟར་འགྱུར་བའི་རྒྱུ་མཚན་ཅི་ཡིན་སྙམ་དུ་སེམས་པ་ན། དེའི་རྒྱུ་མཚན་མི་རྙེད་པས་ལས་འབྲས་ལ་སྐུར་བ་བཏབ་པར་འགྱུར་དུ་འོང་ངོ་སྙམ་སྟེ། བཅོམ་ལྡན་འདས་ཀྱིས་ལས་རྣམས་ཀྱི་འབྲས་བུ་རྣམ་པར་སྨིན་པ་ནི་བསམ་གྱིས་མི་ཁྱབ་བོ་ཞེས་གསུངས་སོ། །གསུམ་པ་ཀུན་གཞི་སོགས་གསུང་དྲང་དོན་ཉིད་དུ་སྟོན་པ་ནི། ཀུན་གཞི་སོགས་ཚིགས་བཅད་གཉིས་ཏེ། འདི་ལ་དོགས་པ་དགོད་པ་དང་། དེའི་ལན་བཤད་པ་གཉིས་ལས། དང་པོ་ནི། འགྲེལ་པར་གལ་ཏེ་དེ་ལྟར་ལས་རྣམས་ཀྱི་འབྲས་བུ་འབྲེལ་པ་རྣམས་དགག་ན། འོ་ན་འཕགས་པ་ལང་ཀར་གཤེགས་པ་ལ་སོགས་པ་རྣམས་ལས་ཀུན་གཞིའི་རྣམ་པར་ཤེས་པ་ཆོས་མཐའ་ཡས་པའི་ནུས་པའི་ཁྱད་པར་གྱི་གཞི་ས་བོན་ཐམས་ཅད་པ་རྦ་རླབས་རྣམས་ལ་རྒྱ་མཚོ་ལྟར་དངོས་པོ་ཐམས་ཅད་སྐྱེ་བའི་རྒྱུ་གསུངས་པ་གང་ཡིན་པ་དེ་ཅི་རྣམ་པ་ཐམས་ཅད་དུ་མེད་པ་ཞིག་གམ་ཞེ་ན། ཞེས་གསུངས་སོ། །གཉིས་པ་ལ་བཞི་སྟེ། ཀུན་གཞི་དྲང་དོན་དུ་བསྟན་པ། གང་ཟག་དང་ཕུང་པོ་དྲང་དོན་དུ་བསྟན་པ། དངོས་པོ་རང་བཞིན་གྱིས་ཡོད་པ་དྲང་དོན་དུ་བསྟན་པ། དྲང་དོན་དུ་གསུངས་པ་ལ་ཐ་སྙད་དུ་ཁས་ལེན་དགོས་མི་དགོས་ཀྱི་དབྱེ་བ་བཤད་པའོ། །དང་པོ་ལ་ཀུན་གཞིའི་ངོ་བོ། ཀུན་གཞི་བསྟན་པའི་དགོས་པ། ཀུན་གཞིའི་སྒྲ་དོན། དངོས་ལ་གནོད་བྱེད་མ་གསུངས་པའི་རྒྱུ་མཚན། ཀུན་གཞི་ཁས་ལེན་དགོས་པའི་སྒྲུབ་བྱེད། ཁས་མི་ལེན་པའི་སྒྲུབ་བྱེད་དགག་པ། རྩོད་པ་སྤོང་བ་དང་བདུན་ལས། དང་པོ་ནི། ཚོགས་དྲུག་ལས་ངོ་བོ་ཐ་དད་པ་ཡོད་པ་མ་ཡིན་གྱི་རྣམ་པར་ཤེས་པ་གསལ་ཙམ་གྱི་ངོ་བོ་སེམས་ཅན་ནས་སངས་རྒྱས་ཀྱི་སའི་བར་དུ་རྒྱུན་མ་ཆད་པར་ཡོད་པ་འདི་ཉིད་དགེ་མི་དགེའི་རིས་སམ་ཡུལ་དྲུག་གི་ཕྱོགས་སུ་མ་ཆད་པར་རང་བཞིན་གྱིས་སྟོང་པས་བྱ་བྱེད་རུང་བའི་ཆ་ནས་ཀུན་གཞིར་འཇོག དེ་ཉིད་ཕུང་པོ་ལ་བརྟེན་ནས་ངའོ་སྙམ་དུ་འཛིན་པ་ངར་འཛིན་ལྷན་སྐྱེས་སུ་སོང་བའི་ཆ་ནི་ཉོན་ཡིད་དུ་འཇོག དེ་ཉིད་ཡུལ་དྲུག་གི་ནང་ནས་ཆོས་ཀྱི་ཕྱོགས་སུ་ཆད་པ་ནི་དྲུག་པ་ཡིད་ཀྱི་རྣམ་པར་ཤེས་པར་འཇོག་སྟེ། གསེར་དང་གསེར་གྱི་རྣ་རྒྱན་དང་། གསེར་གྱི་མགུལ་རྒྱན་བཞིན་ཡིན་པས། ཕྱི་མ་གཉིས་ཀྱི་ཚེ་ན་ཡང་སྔ་མ་མེད་པ་ནི་མ་ཡིན་ནོ། །ལུགས་འདི་མ་ཤེས་པར་ཀུན་གཞི་དང་ཉོན་ཡིད་ཁས་ལེན་ན། སེམས་ཙམ་པའི་ལུགས་ལྟར་ཁས་ལེན་དགོས་སྙམ་ནས། དབུ་མ་ཐལ་འགྱུར་བས་དེ་དག་ཐ་སྙད་དུ་ཡང་ཁས་མི་ལེན་པར་འདོད་པ་ནི། གྲུབ་མཐའ་སོ་སོའི་རྣམ་དབྱེ་མ་ཆགས་པའོ། །གཉིས་པ་ནི། འགྲེལ་པར་སྔར་གྱི་དོགས་པའི་རྗེས་སུ་དེ་མ་ཐག་ཏུ། དེ་ལྟར་ནི་མ་ཡིན་ཏེ། དེ་སྐད་དུ་ཉེ་བར་བསྟན་པས་གདུལ་བའི་སྐྱེ་བོ་རྣམས་ལ་དེ་ཡོད་པ་ཉིད་དུ་བསྟན་པའི་ཕྱིར་རོ། །ཞེས་གསུངས་ཏེ། ལང་གཤེགས་སོགས་ནས་གསུངས་པའི་ཀུན་གཞི་མེད་པ་ནི་མ་ཡིན་ཏེ། དང་པོ་ཉིད་ནས་དེ་ཁོ་ན་ཉིད་ལ་འཇུག་པར་མི་ནུས་པའི་གདུལ་བྱ་ལ་ཀུན་གཞི་དང་གང་ཟག་སོགས་བསྟན་པས། ཐེག་པ་ཆེན་པོ་ལ་འཇུག་པར་འགྱུར་ལ། ཕྱིས་གནས་ལུགས་ལ་འཇུག་པར་འགྱུར་བའི་ཕྱིར་རོ། །ཞེས་པ་སྟེ། འདིས་ནི་ཀུན་གཞི་གསུངས་པའི་དགོས་པ་བསྟན་པ་ཡིན་ལ། དགོས་པ་འདི་འདྲ་བ་ཞིག་ནི་ཀུན་རྫོབ་བདེན་པ་ཐམས་ཅད་ལ་ཡོད་དོ། །གསུམ་པ་ནི། འགྲེལ་པར། དངོས་པོ་ཐམས་ཅད་ཀྱི་རང་བཞིན་རྗེས་སུ་ཞུགས་པའི་ཕྱིར། སྟོང་པ་ཉིད་ཁོ་ན་ཀུན་གཞི་རྣམ་པར་ཤེས་པའི་སྒྲས་བསྟན་པར་རིགས་པར་བྱའོ། །ཞེས་གསུངས་ཏེ། ཅིའི་ཕྱིར་སྔར་གྱི་དེ་ལ་ཀུན་གཞི་ཞེས་བརྗོད་ཅེས་ན། སེམས་ཙམ་པ་ལྟར་བདེན་པར་གྲུབ་པས་འཁོར་འདས་ཀུན་གྱི་བག་ཆགས་ཀྱི་གཞིར་རུང་བས་ཀུན་གཞིར་འཇོག་པ་མ་ཡིན་གྱི། སྟོང་པ་ཉིད་ཁོ་ན་ཡིན་པས་ཀུན་གཞིར་འཇོག་སྟེ། སྟོང་པ་ཉིད་ཡིན་པས་དངོས་པོ་ཐམས་ཅད་ཀྱི་རང་བཞིན་རྒྱུ་རྗེས་སུ་ཞུགས་པའི་ཕྱིར་ཞེས་པ་སྟེ། འདི་ནི་དོགས་པའི་སྐབས་སུ་དངོས་པོ་ཐམས་ཅད་སྐྱེ་བའི་རྒྱུ་གསུངས་པ་གང་ཡིན་པ་དེ་ཞེས་པ། གང་ལ་སྟོང་པ་ཉིད་རུང་བ། །དེ་ལ་ཐམས་ཅད་རུང་བ་ཉིད། །ཅེས་པའི་ཚུལ་གྱིས་འདི་ལ་ཚང་ཞེས་པའི་དོན་ཏོ། །འདིས་ནི་ཀུན་གཞིའི་སྒྲ་དོན་བསྟན་གྱི། སྟོང་ཉིད་ཀུན་གཞིར་བསྟན་པ་ཡང་མ་ཡིན་ཞིང་དགོངས་གཞི་དང་གདགས་གཞིར་བསྟན་པ་ཡང་མ་ཡིན་ཏེ། ལུགས་འདི་ལ་གདགས་གཞི་དང་བཏགས་ཆོས་སོ་སོར་ཕྱེ་བ་མེད་པའི་ཕྱིར་རོ། །བཞི་པ་ནི། འདིར་དངོས་ལ་གནོད་བྱེད་མ་གསུངས་པ་ནི། ལང་གཤེགས་སོགས་ལས་གསུངས་པའི་ཀུན་གཞི་ཙམ་ཞིག་དྲང་དོན་དུ་བསྟན་པའི་སྐབས་ཡིན་གྱི། སེམས་ཙམ་པས་འདོད་པའི་ཀུན་གཞི་བདེན་གྲུབ་པ་དྲང་དོན་དུ་བསྟན་པའི་སྐབས་མ་ཡིན་པས། དངོས་ལ་གནོད་བྱེད་མེད་པའི་ཕྱིར་རོ། །མདོར་ན་དགོངས་འགྲེལ་དང་ལང་གཤེགས་སོགས་ལས་གསུངས་པའི་ཀུན་གཞི་ལ་དབུ་སེམས་གཉིས་ཀྱི་ཁས་ལེན་ཚུལ་གཉིས་ཀྱི་རྣམ་དབྱེ་ཤེས་ན། གནད་འདི་དག་རང་གྲོལ་དུ་འགྱུར་རོ། །ལྔ་པ་ནི། དབུ་མ་ཐལ་འགྱུར་བས་ཐ་སྙད་དུ་ཀུན་གཞི་ཁས་ལེན་དགོས་ཏེ། སངས་རྒྱས་བཅོམ་ལྡན་འདས་ཀྱིས་མདོ་ལས་གསུངས་ཤིང་། དེ་ཡང་དོན་དམ་བདེན་པ་རྟོགས་པའི་ཐབས་སུ་གྱུར་པའི་ཐ་སྙད་བདེན་པ་ཡིན་པར་སློབ་དཔོན་འདི་ཉིད་ཀྱིས་གསུངས་པའི་ཕྱིར་ཏེ། འགྲེལ་པར། ཆེས་ཐོག་མར་ཀུན་གཞི་རྣམ་པར་ཤེས་པ་ལ་སོགས་པ་བསྟན་པ་ནི་མུ་སྟེགས་ཀྱི་ལུགས་བསལ་ནས་དེ་དག་གི་དོན་ཆེན་པོ་འདྲེན་པར་འགྱུར་ཞིང་། ཕྱི་ནས་གསུང་རབ་ཀྱི་དོན་ཕྱིན་ཅི་མ་ལོག་པར་རིག་པ་རྣམས་རང་ཉིད་ཀྱིས་དེ་དག་སྤོང་བར་འགྱུར་བས་ཡོན་ཏན་ཁོ་ན་འབྱུང་གི སྐྱོན་ནི་མ་ཡིན་ནོ་ཞེས་གསུངས་པས་སོ། །འཕགས་པ་ཀླུ་སྒྲུབ་ཀྱིས་གསུངས་པས་ཀྱང་ཁས་ལེན་དགོས་ཏེ། བྱང་ཆུབ་སེམས་འགྲེལ་ལས། ཅི་ལྟར་ཁབ་ལེན་དང་ཉེ་བས། །ལྕགས་ནི་མྱུར་དུ་ཡོངས་སུ་འཁོར། །དེ་ལ་སེམས་ནི་ཡོད་མིན་ཏེ། །སེམས་དང་ལྡན་བཞིན་སྣང་བར་འགྱུར། །དེ་བཞིན་ཀུན་གཞི་རྣམ་ཤེས་ནི། །བདེན་མིན་བདེན་པ་བཞིན་དུ་ནི། །གང་ཚེ་འགྲོ་འདི་གཡོ་བར་འགྱུར། །དེ་ཚེ་སྲིད་པ་འཛིན་པར་བྱེད། །ཇི་ལྟར་རྒྱ་མཚོ་ལ་ནི་ཤིང་། །སེམས་ནི་མེད་ཀྱང་གཡོ་བར་འགྱུར། །དེ་བཞིན་ཀུན་གཞི་རྣམ་ཤེས་ནི། །ལུས་ལ་བརྟེན་ནས་གཡོ་བ་ཡིན། །ཞེས་གསུངས་པས་སོ། །དྲུག་པ་ནི། དབུ་མ་ཐལ་འགྱུར་བས་ཀུན་གཞི་ཁས་མི་ལེན་པའི་རྒྱུ་མཚན་ཅི་ཡིན་ཅེས་དྲིས་པས། དྲང་དོན་དུ་གསུངས་པའི་ཕྱིར་ཞེས་ཟེར་རོ། །འོ་ན་ཕུང་ཁམས་སྐྱེ་མཆེད་ཐམས་ཅད་ཁས་མི་ལེན་པར་འགྱུར་ཏེ། འགྲེལ་པར་མདོ་དྲངས་པས། ཕུང་པོ་དག་དང་ཁམས་རྣམས་དང་། །སྐྱེ་མཆེད་རང་བཞིན་གཅིག་བཞེད་ལ། །ཁམས་གསུམ་པོ་དག་སྟོན་མཛད་པ། །འདི་ནི་འཇིག་རྟེན་མཐུན་འཇུག་ཡིན། །ཅེས་གསུངས་པའི་ཕྱིར། དེ་བཞིན་དུ་སྣོད་ཀྱི་འཇིག་རྟེན་མེས་བསྲེགས་པ་དང་། སེམས་ཅན་གྱི་ཁམས་ཀྱང་ཁས་མི་ལེན་པར་འགྱུར་ཏེ། མདོ་དེ་ཉིད་ལས། ཞིག་པ་མེད་ཅིང་སྐྱེ་མེད་ལ། །ཆོས་ཀྱི་དབྱིངས་དང་མཉམ་གྱུར་ཀྱང་། །བསྲེགས་པའི་བསྐལ་པ་སྟོན་མཛད་པ། །འདི་ནི་འཇིག་རྟེན་མཐུན་འཇུག་ཡིན། །དུས་གསུམ་དག་ཏུ་སེམས་ཅན་གྱི། །རང་བཞིན་དམིགས་པ་མ་ཡིན་ལ། །སེམས་ཅན་ཁམས་ཀྱང་སྟོན་མཛད་པ། །འདི་ནི་འཇིག་རྟེན་མཐུན་འཇུག་ཡིན། །ཅེས་གསུངས་པས་སོ། །མདོར་ན་ཀུན་རྫོབ་བདེན་པ་ཐམས་ཅད་ཁས་མི་ལེན་པར་འགྱུར་ཏེ། དྲང་དོན་དུ་གསུངས་པའི་ཕྱིར། དེས་ན་བློ་གྲོས་མི་ཟད་པའི་མདོའི་རྗེས་སུ་འབྲངས་ནས། ཀུན་རྫོབ་དང་དོན་དམ་ལ་དྲང་དོན་དང་ངེས་དོན་དང་། དེ་གཉིས་སྟོན་པ་ལ་དྲང་དོན་གྱི་མདོ་དང་ངེས་དོན་གྱི་མདོར་འཇོག་པ་ནི་འཕགས་མཆོག་ཀླུ་སྒྲུབ་ཡབ་སྲས་ཀྱི་ཡང་ལུགས་ཐུན་མོང་མ་ཡིན་པའོ་ཞེས་རང་ཉིད་ཀྱིས་ཀྱང་སྨྲས་བཞིན་དུ་དྲང་དོན་དུ་གསུངས་པས་ཐ་སྙད་དུ་ཁས་མི་ལེན་ནོ་ཞེས་སྨྲ་བ་ནི་ཐ་སྙད་ལ་སྐུར་བ་བཏབ་པའོ། །དེ་བཞིན་དུ་དེང་སང་སེམས་ཅན་གྱི་རྒྱུད་ལ་བདེ་གཤེགས་སྙིང་པོ་ཡོད་པ་དྲང་དོན་དུ་གསུངས་པ་རྒྱུ་མཚན་དུ་བྱས་ནས། ཐ་སྙད་དུ་ཡང་སེམས་ཅན་གྱི་རྒྱུད་ལ་མེད་པར་འདོད་པ་ནི་གནད་ཡེ་མ་ཟིན་བཞིན་དུ་བློ་གྲོས་རྩིང་པོའི་ཁ་ཕྲུ་འཐོར་བའོ། །གལ་སྟེ་ཀུན་གཞི་ཁས་ལེན་ན་ཀུན་གཞིའི་བག་ཆགས་སྨིན་པ་ལས་གཟུགས་སྒྲ་སོགས་སུ་སྣང་བ་ཙམ་དུ་ཟད་ཀྱི་ཕྱི་རོལ་གྱི་དོན་མེད་པར་ཁས་བླང་དགོས་ན། བྱང་ཆུབ་སེམས་འགྲེལ་ལས། ཤེས་པས་ཤེས་བྱ་རྟོགས་པ་སྟེ། །ཤེས་བྱ་མེད་པར་ཤེས་པ་མེད། །དེ་ལྟར་ན་ནི་རིག་བྱ་དང་། །རིག་བྱེད་མེད་ཅེས་ཅིས་མི་འདོད། །ཅེས་ཕྱིའི་ཤེས་བྱ་དང་། ནང་གི་ཤེས་པ་གཉིས་ཡོད་མེད་མཚུངས་པར་གསུངས་ལ་གཞུང་འདིར་ཡང་དོན་ཤེས་གཉིས་དོན་དམ་དུ་མེད་མཉམ་དང་། ཐ་སྙད་དུ་ཡོད་མཉམ་དུ་གསུངས་པ་དང་འགལ་ལོ་ཞེས་སྨྲའོ། །འོ་ན་སེམས་ཁས་མི་ལེན་པར་ཐལ། སེམས་ཁས་ལེན་ན། སེམས་ཉིད་ཀྱིས་ནི་སེམས་ཅན་འཇིག་རྟེན་དང་། །སྣོད་ཀྱི་འཇིག་རྟེན་ཤིན་ཏུ་སྣ་ཚོགས་འགོད། །ཅེས་གསུངས་པའི་ཚུལ་གྱིས། སེམས་ལ་བསགས་པའི་ལས་ཀྱི་བག་ཆགས་སྨིན་པ་ལས་གཟུགས་སྒྲ་སོགས་སུ་སྣང་བ་ཙམ་དུ་ཟད་ཀྱི་ཞེས་སོགས་རྣམ་པ་ཀུན་དུ་མཚུངས་པའི་ཕྱིར་རོ། །གཟུགས་སྒྲ་སོགས་སུ་སྣང་བ་ཙམ་ཕྱི་རོལ་གྱི་དོན་ཡིན་ནམ་མ་ཡིན། ཡིན་ན་སྔ་མ་ལ་འགལ་བ་ཅི་ཞིག་ཡོད། མིན་ན་གཟུགས་སྒྲ་སོགས་སྣང་བ་ཙམ་ལ་ཕྱི་རོལ་གྱི་དོན་ཅེས་བཏགས་པའི་བཏགས་དོན་བཙལ་བའི་ཚེ་ཐ་སྙད་དུ་རྙེད་པར་ཐལ། གཟུགས་སྒྲ་སོགས་སུ་སྣང་བ་ཙམ་ལས་མ་གཏོགས་པའི་ཕྱི་རོལ་གྱི་དོན་ཡོད་པའི་ཕྱིར། ལེགས་པར་སོམས་ཤིག བདུན་པ་ནི། གལ་སྟེ་ཀུན་གཞི་ཁས་ལེན་ན། ལས་འབྲས་ཀྱི་རྟེན་དུ་ཁས་ལེན་དགོས་ལ། དེ་ལྟར་ན་ཀུན་གཞི་མེད་ཀྱང་རང་བཞིན་གྱིས་སྐྱེ་འགག་མེད་པའི་ཆ་ནས་ལས་འབྲས་ཀྱི་འབྲེལ་བ་འཐད་པར་བཤད་པ་དང་འགལ་ལོ་སྙམ་ན། སྤྱིར་ལས་འབྲས་ཀྱི་རྟེན་དུ་ཁས་ལེན་པ་ལ་འགལ་བ་མེད་དེ། ལས་འབྲས་སེམས་ལ་བརྟེན་པའི་ཕྱིར། གཞུང་གི་དོན་ནི་སྔར་བཤད་ཟིན་པ་ལྟར་ཡིན་ལ། དེ་འདྲའི་ཀུན་གཞི་ཁས་མི་ལེན་པས་འགལ་བ་ཅི་ཞིག་ཡོད། ཡང་སྔར་དྲངས་པའི་འགྲེལ་པ་ཉིད་ལས། ཕྱི་ནས་གསུང་རབ་ཀྱི་དོན་ཕྱིན་ཅི་མ་ལོག་པར་རིག་པ་རྣམས་རང་ཉིད་ཀྱིས་དེ་དག་སྤོང་བར་འགྱུར་བས་ཞེས་ཕྱིས་སྤོང་བར་བཤད་པའི་ཕྱིར། ཐ་སྙད་དུ་མེད་དོ་སྙམ་ན། དེ་ནི་ཕྱིས་གནས་ལུགས་རྟོགས་པའི་ཚེ་སྒྲུབ་པའི་ཚུལ་གྱིས་ཡོད་པ་སྤོང་ཞེས་པ་ཐ་སྙད་བདེན་པ་ཐབས་སུ་གྱུར་པ་དང་། དོན་དམ་བདེན་པ་ཐབས་བྱུང་གྱུར་པ་སྟེ། ཞེས་པའི་དོན་ཡིན་པས་འདི་ནི་ཀུན་རྫོབ་བདེན་པ་ཐམས་ཅད་ལ་ཡོད་དོ། །གཉིས་པ་ནི་འགྲེལ་པར། ཀུན་གཞིའི་རྣམ་པར་ཤེས་པ་འབའ་ཞིག་ཡོད་པར་མ་ཟད་ཀྱི། གང་ཟག་ཀྱང་ཡོད་དེ་དེས་འདུལ་བའི་སྐྱེ་བོ་ལ་དེ་ཡོད་པ་ཉིད་དུ་བསྟན་པས་རྗེས་སུ་འཛིན་པའི་ཕྱིར་རོ། །ཇི་སྐད་དུ། དགེ་སློང་དག་ཕུང་པོ་ལྔ་ནི་ཁུར་རོ། །ཁུར་ཁུར་བ་ནི་གང་ཟག་གོ་ཞེས་གསུངས་པ་ལྟ་བུའོ། །ཁ་ཅིག་ལ་ནི་ཕུང་པོ་ཙམ་ཞིག་བསྟན་པར་མཛད་དེ། སེམས་ཞེས་བྱ་བའམ། ཡིད་ཅེས་བྱ་བའམ་རྣམ་པར་ཤེས་པ་ཞེས་བྱ་བ་དེ་ནི་དུས་རིང་པོར་དད་པ་དང་ཚུལ་ཁྲིམས་ལ་སོགས་པས་ཡོངས་སུ་བསྒོས་ཤིང་གོང་དུ་འགྲོ་བ་ན་ཕྱི་མ་ལ་མཐོ་རིས་སུ་འགྲོ་བར་འགྱུར་རོ་ཞེས་གསུངས་པ་ལྟ་བུའོ། །འདི་དག་ཐམས་ཅད་ནི་དགོངས་པའི་དབང་གིས་གསུངས་པ་ཡིན་ནོ། །ཞེས་གསུངས་ཏེ། དྲང་དོན་དུ་འགྲོ་ཚུལ་ནི་སྔ་མ་དང་ཁྱད་པར་མེད་དོ། །ཁ་ཅིག་འདིའི་གང་ཟག་དང་ཀུན་གཞི་གཉིས་ཐ་སྙད་དུ་མེད་མཉམ་དུ་སྒྲུབ་པར་འདོད་ནས་རྫས་ཡོད་ཞེས་པ་དངོས་སུ་མེད་ཀྱང་སྦྱོར་དགོས་ཞེས་པ་ནི་མི་འཐད་དེ། དེ་ལྟར་ན་ཁུར་ཁུར་བ་ནི་གང་ཟག་རྫས་ཡོད་ལ་འཇོག་པས། ཐ་སྙད་དུ་ཡང་མེད་པར་ཐལ་བ་ལས། དེ་ཡང་མི་རིགས་ཏེ། ལུགས་འདི་ལ་ལས་བྱེད་པ་པོ་དང་རྣམ་སྨིན་མྱོང་བ་པོའི་གང་ཟག་ཡོད་པའི་ཕྱིར། དེ་ཙམ་གྱིས་ཁུར་ཁུར་བར་མི་འཇོག་ན། རི་བོང་རྭའི་ཁྲེས་པོ་རུས་སྦལ་གྱི་སྤུའི་ཐག་པས་བསྡམས་ནས་མོ་གཤམ་གྱི་བུ་བར་པས་ཁུར་བ་ཞིག་ཡིན་ནམ་ཅི། གཞན་ཡང་གང་ལས་སེམས་ཅན་སྐྱེས་བུ་གང་ཟག་བསྟན། ཆོས་དེ་ཐམས་ཅད་དྲང་བའི་དོན་དུ་ཤེས། །ཞེས་པ་ལ་ཡང་རྫས་ཡོད་སྦྱོར་དགོས་པར་འགྱུར་ཏེ། ཁྱད་པར་མེད་པའི་ཕྱིར། གསུམ་པ་ནི། རྩ་བའི་ཚིགས་བཅད་ཕྱི་མ་སྟེ། སངས་རྒྱས་ལ་ཡང་ངར་འཛིན་ཡོད་པ་དང་། དངོས་པོ་རང་བཞིན་གྱིས་ཡོད་པར་གསུངས་པ་དྲང་དོན་དུ་བསྟན་པ་རྣམས་ལ་ནི་དགོངས་གཞི། དགོས་པ། དངོས་ལ་གནོད་བྱེད་གསུམ་ཆར་གྱི་སྒོ་ནས་བཤད་དགོས་ཏེ། འདི་འདྲའི་རིགས་ཅན་ཡང་མང་དུ་ཡོད་དོ། །འདིར་འགྲེལ་པར། ཤར་གྱི་རི་བོའི་སྡེ་པ་དང་མཐུན་པའི་ཚིགས་སུ་བཅད་པ་ལས། འཇིག་རྟེན་མཐུན་འཇུག་དྲུག་གསུངས་པ་དྲངས་པ་ལས། དྲུང་ཙོང་བ་ན་རེ། ཤར་རིའི་སྡེ་པ་ནི་དགེ་འདུན་ཕལ་ཆེན་བ་ལས་རིམ་གྱིས་གྱེས་པ་ཡིན་པར་རྟོག་གེ་འབར་བ་ལས་བཤད་པས་ན་ཉན་ཐོས་ཀྱི་སྡེ་སྣོད་དུ་ཆོས་རང་བཞིན་མེད་པ་ཤིན་ཏུ་གསལ་བར་བསྟན་པ་གཅིག་ཡོད་པར་སྣང་ངོ་། །ཞེས་ཟེར་བ་ནི་འགྲེལ་པ་འདིར་དེ་མེད་པར་དངོས་སུ་གསུངས་ཤིང་རང་ཉིད་ཀྱང་སྐབས་དེར་དེ་བཞིན་དུ་ཁས་བླངས་པ་དང་དངོས་སུ་འགལ་ལོ། །ཚིགས་བཅད་ཀྱི་དོན་ཡང་འཇིག་རྟེན་མཐུན་འཇུག་ཅེས་པ་ཐ་སྙད་ཀྱི་ལྡོག་པ་ནས་བསྟན་པར་སྣང་གི ཆོས་རང་བཞིན་མེད་པ་ཤིན་ཏུ་གསལ་བར་བཤད་པ་མི་སྣང་ལ། གལ་ཏེ་ཤུགས་ཀྱིས་གོ་སྙམ་ན་དེ་ནི་ཤིན་ཏུ་གསལ་བའི་དོན་ཡེ་མིན་པས་དོགས་པ་མེད་པའི་དོགས་པ་བསླང་ནས་ཆོད་རྒྱུ་མེད་པའི་ཆོད་ཆོད་དེ་མ་མཛད་ཅིག བཞི་པ་ནི། བདེན་པ་གཉིས་ཀྱི་སྒོ་ནས་དྲང་ངེས་ཕྱེ་བའི་ལུགས་མཆོག་འདི་ལ་དྲང་དོན་དུ་གསུངས་པའི་བརྗོད་བྱ་ནི་ཀུན་རྫོབ་ཀྱི་བདེན་པ་ཡིན་པས་ཡང་དག་ཀུན་རྫོབ་ཐ་སྙད་དུ་གསུངས་པ་རྣམས་ལ་ནི་དངོས་ལ་གནོད་བྱེད་མི་དགོས་ཏེ། དེ་ལ་ཐ་སྙད་དུ་ཡོད་པ་ལ་དངོས་ལ་གནོད་བྱེད་མེད་པའི་ཕྱིར་རོ། །དཔེར་ན་ཕུང་ཁམས་སྐྱེ་མཆེད་ཐ་སྙད་དུ་ཡོད་པར་སྟོན་པ་བཞིན་ནོ། །ཀུན་རྫོབ་བདེན་པ་རང་བཞིན་གྱིས་ཡོད་པར་སྟོན་པ་དང་། དོན་དམ་བདེན་པ་བསྒྲུབ་པའི་ཚུལ་གྱིས་ཡོད་པར་སྟོན་པ་དང་། དོན་གཞན་ལ་དགོངས་ཏེ་གསུངས་པ་རྣམས་ལ་ནི་དངོས་ལ་གནོད་བྱེད་དགོས་ཏེ། དེ་དག་ཇི་ལྟར་གསུངས་པ་དེ་བཞིན་དུ་ཁས་ལེན་དུ་མི་རུང་བའི་ཕྱིར་རོ། །གསུམ་པ་གཞན་སྐྱེའི་སྒྲུབ་བྱེད་རྣམ་རིག་གྲུབ་མཐའ་བཟློག་པ་ལ་གཉིས་ཏེ། གཞན་གཞུང་རྗེས་སུ་བརྗོད། དེ་ཉིད་བཟློག་བྱེད་བཤད་པའོ། །དང་པོ་ལ་གསུམ་སྟེ། རྣམ་རིག་ཙམ་དུ་གནས་ལུགས་རྟོགས་པ། རྣམ་རིག་ཙམ་ལས་གཟུང་འཛིན་འབྱུང་བ། རྣམ་རིག་ཙམ་གྱི་མཚན་ཉིད་བཤད་པའོ། །དང་པོ་ནི། གཟུང་བ་སོགས་ཏེ། དབུ་མ་པས་ཇི་སྐད་བསྟན་པའི་རིགས་པ་མ་བཟོད་ནས། སེམས་ཙམ་པས་རང་ལུགས་ཀྱི་ས་དྲུག་པའི་བྱང་སེམས་ཀྱིས་གནས་ལུགས་རྟོགས་ཚུལ་སྨྲོས་པའོ། །གཉིས་པ་ནི། ཇི་ལྟར་སོགས་ཏེ། འོ་ན་འདིར་ཇི་ལྟར་ཕྱི་རོལ་གྱི་དོན་མེད་པར། དེའི་རྣམ་པ་ཅན་གྱི་རྣམ་པར་ཤེས་པ་ཙམ་སྐྱེ་བར་འགྱུར་ཞེ་ན། དེའི་སྐྱེ་ཚུལ་སྨྲས་པའོ། །གསུམ་པ་ནི། དེ་ཕྱིར་སོགས་ཏེ། ཚིག་རྐང་དང་པོ་གཉིས་ཀྱིས་གཞན་དབང་རྫས་གྲུབ་པ་ཁས་ལེན་དགོས་པའི་རྒྱུ་མཚན་དང་། ཕྱི་མ་གཉིས་ཀྱིས་དེའི་མཚན་ཉིད་གསུམ་ལྡན་བརྗོད་དོ། །གཉིས་པ་ལ་གསུམ་སྟེ། རྣམ་རིག་ཙམ་ལ་རིག་པའི་གནོད་བྱེད་བརྗོད། རྣམ་རིག་ཙམ་དུ་གསུངས་པའི་དགོས་པ་བཤད། སྒྲུབ་བྱེད་ལུང་གཞན་དྲང་དོན་ཉིད་དུ་བསྟན་པའོ། །དང་པོ་ལ་གསུམ་སྟེ། བདེན་པ་གཉིས་ལས་ཉམས་པར་བསྟན། བདེན་གཉིས་ཉམས་པའི་ཉེས་དམིགས་བརྗོད། ཀུན་རྫོབ་ཉིད་ལ་མཚུངས་པ་སྤང་བའོ། །དང་པོ་ལ་གསུམ་སྟེ། ཤེས་བྱ་མེད་པའི་རྣམ་རིག་ཙམ་དུ་གྲུབ་པ་དགག གཉིས་ཀྱིས་སྟོང་པའི་གཞན་དབང་རྫས་སུ་གྲུབ་པ་དགག དངོས་པོ་བརྟགས་པར་ཡོད་པའི་རྒྱུ་རུ་གྲུབ་པ་དགག་པའོ། །དང་པོ་ལ་གཉིས་ཏེ། རྒྱས་པར་བཤད་པ་དང་། དོན་བསྡུ་བའོ། །དང་པོ་ལ་བཞི་སྟེ། ཡིད་ཤེས་འཁྲུལ་པའི་དཔེས་མི་འགྲུབ། དབང་ཤེས་འཁྲུལ་པའི་དཔེས་མི་འགྲུབ། སྒོམ་བྱུང་འཁྲུལ་པའི་དཔེས་མི་འགྲུབ། མཐོང་སྣང་འཁྲུལ་པའི་དཔེས་མི་འགྲུབ་པའོ། །དང་པོ་ལ་གཉིས་ཏེ། དམ་བཅའ་དགག སྒྲུབ་བྱེད་དགག་པའོ། །དང་པོ་ནི་ཕྱི་རོལ་སོགས་སོ། །གཉིས་པ་ལ་གཉིས་ཏེ། དྲན་པའི་རྟགས་ཀྱིས་བསྒྲུབ་པ་དགག རྨི་ལམ་ཉིད་ཀྱིས་བསྒྲུབ་པ་དགག་པའོ། །དང་པོ་ནི། གལ་ཏེ་སོགས་ཏེ། སད་པའི་ཚེ་ཡུལ་ཅན་དྲན་པས་རྨི་ལམ་དུ་ཡུལ་ཅན་གྱི་ཤེས་པ་ཡོད་པར་གྲུབ་ན། ཡུལ་ལ་ཡང་མཚུངས་ཅེས་པའོ། །ཁ་ཅིག་འདིར་རྨི་ལམ་ན་སྣང་བའི་གླང་པོ་ཆེ་མེད་པ་བཞིན་དུ་ཡུལ་ཅན་ཤེས་པ་ཡང་མེད་པར་སྟོན་པ་མ་ཡིན་གྱི། རང་བཞིན་གྱིས་གྲུབ་པའི་ཤེས་པ་མེད་པར་སྟོན་པ་ལ་ངེས་པར་འདོད་དགོས་ཏེ། དེའི་ཕྱིར་ཤེས་བྱ་དང་ཤེས་པ་ཡོད་མེད་མགོ་མཚུངས་མཛད་པ་ཐམས་ཅད་ནི་དགག་བྱའི་ཁྱད་པར་གྱི་སྟེང་ནས་ཤེས་པར་བྱའོ། །ཞེས་སྨྲ་བ་ནི་ཡུལ་ལ་ཡང་ལོག་ཕྱེ་བའི་ཚེ། ཡུལ་ཅན་ལ་ཡང་ལོག་ངེས་པར་ཕྱེ་བའི་སློབ་དཔོན་འདིའི་ལུགས་ཐུན་མོང་མ་ཡིན་པ་མ་རྟོགས་པ་སྟེ། རྨི་ལམ་ན་ཡུལ་གླང་པོ་ཆེ་མེད་པར་ཡུལ་ཅན་ཤེས་པ་ཡོད་མེད་ཡང་དག་ཀུན་རྫོབ་ཀྱི་དབང་དུ་བྱས་སམ། ལོག་པའི་ཀུན་རྫོབ་ཀྱི་དབང་དུ་བྱས། དང་པོ་ལྟར་ན། རྨི་ལམ་གྱི་ཤེས་པ་དེ་དབང་པོ་སྐྱོན་ལྡན་གྱི་ཤེས་པ་མ་ཡིན་པར་འགྱུར་ཏེ། དེ་ཡང་དག་ཀུན་རྫོབ་ཏུ་ཡོད་པའི་ཕྱིར། ཕྱི་མ་ལྟར་ན་ཡུལ་གླང་པོ་ཆེ་ཡང་ལོག་པའི་ཀུན་རྫོབ་ཏུ་ཡོད་དེ། དབང་པོ་སྐྱོན་ལྡན་གྱི་ཤེས་པའི་ཡུལ་ཡིན་པའི་ཕྱིར། གཉིས་པ་ལ་གཉིས་ཏེ། འདོད་པ་བརྗོད། དེ་དགག་པའོ། །དང་པོ་ནི་གལ་ཏེ་སོགས་ཏེ། རྨི་ལམ་དུ་ཡིད་ཀྱི་རྣམ་ཤེས་དང་། དབང་ཤེས་ལྔ་ཡོད་མེད་སོ་སོར་ཕྱེ་བ་ནི་སྤྱིར་རྟོག་གེ་བའི་ལུགས་ཡིན་ལ་རྨི་ལམ་དུ་ཡུལ་གཟུགས་སྒྲ་སོགས་མེད་ཀྱང་། ཡིད་ཀྱི་རྣམ་ཤེས་ཡོད་པས། སད་པའི་སྐབས་སུ་ཡང་ཡུལ་མེད་ཀྱང་ཡུལ་ཅན་ཤེས་པ་ཡོད་པར་འགྲུབ་པ་རྣམ་རིག་པའི་ལུགས་སོ། །གཉིས་པ་ལ་གསུམ་སྟེ། རྨི་ལམ་ཡུལ་ཤེས་བདེན་པར་མེད། སད་པའི་ཡུལ་ཤེས་བདེན་པར་མེད། དེས་ན་ཡོད་མེད་མཚུངས་པར་བསྟན་པའོ། །དང་པོ་ནི། །ཇི་ལྟར་སོགས་ཏེ། རྣ་སོགས་ཅེས་པའི་དོན་འགྲེལ་པར། སྒྲ་དང་རྣ་བའི་རྣམ་པར་ཤེས་པ་ནས། ཡིད་དང་ཆོས་ཀྱི་ཁམས་དང་། ཡིད་ཀྱི་རྣམ་པར་ཤེས་པའི་བར་དུའོ། །ཞེས་གསུངས་ཏེ། ལུགས་འདི་ལ་རྨི་ལམ་གྱི་ཁམས་བཅོ་བརྒྱད་པོ་ཐམས་ཅད་འཇིག་རྟེན་ཉིད་ལྟོས་ལོག་པའི་ཀུན་རྫོབ་ཡིན་པས། འཇིག་རྟེན་གྱི་ཐ་སྙད་དུ་ཡང་མེད་པར་མཚུངས་ལ། དབུ་མ་པ་ལ་སད་པའི་ཡུལ་མེད་ཀྱང་ཡུལ་ཅན་ཤེས་པ་ཡོད་པའི་དཔེར་རྨི་ལམ་བརྗོད་ན། དབུ་མ་པས་རྨི་ལམ་གྱི་གནས་སྐབས་སུ་ཡུལ་མེད་པར་ཡུལ་ཅན་ཤེས་པ་ཡོད་པར་ཁས་བླངས་དགོས་པ་ལས་མ་བླངས་པའི་ཕྱིར་ན་མི་འཐད་ཅེས་པའོ། །གནད་འདི་མ་རྟོགས་པར་ཁ་ཅིག་རྣ་བ་ནས་ལུས་ཀྱི་བར་བཞིའི་ཆོས་གསུམ་མེད་ཀྱང་དེ་དག་གི་རྣམ་པར་སྣང་བའི་བརྫུན་པ་དང་། ཡིད་ཀྱི་ཆོས་གསུམ་ནི་རྨི་ལམ་ན་ཡོད་ཀྱང་རང་བཞིན་གྱིས་མེད་བཞིན་དུ་དེར་སྣང་བས་བརྫུན་པའོ། །དེའི་ཕྱིར་རྨི་ལམ་ན་དབང་ཤེས་ཡོད་པ་སློབ་དཔོན་འདིའི་ལུགས་སུ་བྱས་ནས་དེ་ལ་དགག་པ་བྱེད་པ་ནི་བློ་གྲོས་ཀྱི་འཇུག་པ་ཤིན་ཏུ་རྩིང་བས་ཕྱོགས་སྔའི་ནམ་མ་ལངས་པ་ལ་དགག་པའི་ཉི་མ་ཤར་བ་ཡིན་ཞེས་གྲགས་པ་བཞིན་ཡིན་པས་རྒྱང་རིང་དུ་དོར་བར་བྱ་སྟེ་ཞེས་བྲིས་སོ། །དེ་ལ་བཅོམ་ལྡན་རིགས་རལ་གྱིས། རྨི་ལམ་ན་དབང་ཤེས་ཡོད་པ་སློབ་དཔོན་འདིའི་ལུགས་སུ་བྱས་ནས་དགག་པ་བརྗོད་པ་བློ་གྲོས་རྩིང་བ་བདེན་ཏེ། རྨི་ལམ་གྱི་དབང་ཤེས་ཀྱི་ཆོས་གསུམ་ནི་ལོག་པའི་ཀུན་རྫོབ་ཡིན་པས་དེ་འཇིག་རྟེན་གྱི་ཐ་སྙད་དུ་མེད་པའི་ཕྱིར་རོ། །དེ་ལས་ཀྱང་ཁྱོད་བློ་གྲོས་ཀྱི་འཇུག་པ་རྩིང་སྟེ། སློབ་དཔོན་འདིས། དེ་བློ་ལ་ལྟོས་གཉིས་ཆར་བདེན་པ་སྟེ། །དོན་གསལ་མཐོང་ལ་གཉིས་ཀའང་བརྫུན་པ་ཡིན། །ཞེས་པ་དེ། དེ་བློ་ལ་ལྟོས་བཅོ་བརྒྱད་བདེན་པ་སྟེ། །དོན་གསལ་མཐོང་ལ་བཅོ་བརྒྱད་བརྫུན་པ་ཡིན། །ཞེས་པ་ལ་སྦྱར་མ་ཤེས་འདུག་པའི་ཕྱིར་རོ། །རྗེས་འབྲང་དག་སྐྱི་མོའི་ཞྭ་མོ་མ་གོན་པར་ལེགས་པར་དཔྱོད་ཅིག དེས་ན་སློབ་དཔོན་འདིའི་ལུགས་ལ་རྨི་ལམ་གྱི་ཡིད་གྱི་རྣམ་ཤེས་ཐ་སྙད་དུ་ཡོད་པར་འདོད་པ་ནི། གད་རྒྱངས་ཅི་ཙམ་སྒྲོགས་ཀྱང་། རྟོག་གེའི་ཝ་སྐད་རང་ཤུགས་ཀྱིས་ཤོར་བའོ། །གཞན་ཡང་རྟོག་གེ་བ་འདིས་འགྲེལ་པར། གང་ཞིག་ཆོས་ཀྱི་སྐྱེ་མཆེད་དུ་གཏོགས་པའི་གཟུགས་ཡིད་ཀྱི་རྣམ་པར་ཤེས་པས་བཟུང་བར་བྱ་བ་ཞིག་རྨི་ལམ་ན་ཡོད་དེ། དེའི་ཕྱིར་རྣམ་པར་ཤེས་པ་ནི་ཡུལ་མེད་པར་འགར་ཡང་ཡོད་པ་མ་ཡིན་ནོ་སྙམ་དུ་སེམས་པ་དེ་ཡང་རིགས་པ་མ་ཡིན་པ་ཉིད་དེ། རྨི་ལམ་ན་རྣམ་པ་ཐམས་ཅད་དུ་གསུམ་པོ་མི་སྲིད་པའི་ཕྱིར་རོ། །ཞེས་གསུངས་པའི་དོན་སློབ་དཔོན་ལེགས་ལྡན་འབྱེད་ཀྱིས་སྔར་གྱི་དཔེ་མ་གྲུབ་པའི་ལན་མཛད་པ་ནི་རྨི་ལམ་གྱི་གཟུགས་དེ་ལེགས་ལྡན་གྱི་རང་གི་མཚན་ཉིད་ཀྱིས་གྲུབ་པ་ཞལ་གྱིས་བཞེས་པར་གསལ་བས། དེ་མེད་པའི་རྒྱུ་མཚན་དུ་བྱའོ། །ཞེས་སྨྲ་བ་ནི། རང་ཉིད་རྨི་ལམ་གྱི་གཟུགས་ཐ་སྙད་དུ་ཡོད་པར་ཁས་བླངས་པ་དང་འགལ་གྱིས་དོགས་ནས། རྒྱ་གར་གྱི་པཎ་ཆེན་ལ་སྐུར་བ་ཧ་ཅང་བཏབ་པ་སྟེ། རྨི་ལམ་གྱི་གླང་པོ་ཆེའི་གཟུགས་ཐ་མལ་པ་དངོས་པོ་ཐམས་ཅད་བདེན་པར་བཟུང་བ་དག་གིས་ཀྱང་མི་བདེན་པའི་ཐ་སྙད་བྱས་ན། ལེགས་ལྡན་འབྱེད་དེ་ལས་ཀྱང་ལོད་པར་ཐལ་བའི་ཕྱིར་རོ། །དེས་ན་ལུང་དེའི་དོན་ནི་སློབ་དཔོན་ལེགས་ལྡན་གྱིས་རྨི་ལམ་གྱི་ཡུལ་ཤེས་གཉིས་པོ་ཐ་སྙད་དུ་ཡོད་མཚུངས་ཡིན་པའི་སྒོ་ནས་རྣམ་རིག་པ་ལ་ལན་མཛད་པ་ལ་སློབ་དཔོན་འདིས་དེ་ནི་མ་ཡིན་ཏེ། རྨི་ལམ་གྱི་ཡུལ་དབང་རྣམ་ཤེས་གསུམ་ཆར་ཐ་སྙད་དུ་མེད་མཚུངས་ཡིན་པའི་ཕྱིར་ཞེས་པ་སྟེ། འདི་ཡང་དེ་དག་འཇིག་རྟེན་ལས་ཀྱང་ཡོད་མིན་ཉིད། །ཅེས་པའི་དོན་རྟོགས་པའི་སྒོ་ནས་ཤེས་དགོས་སོ། །ཡང་རྟོག་གེ་བ་འདིས་འོ་ན་རང་ལུགས་ཀྱི་རྨི་ལམ་གྱི་གཟུགས་གསལ་བར་སྣང་བ་རྣམས་ཆོས་ཀྱི་སྐྱེ་མཆེད་པའི་གཟུགས་སུ་འདོད་དམ་མི་འདོད་ཅེ་ན། རྨི་ལམ་ན་དབང་ཤེས་མེད་པས་ཡུལ་ལྔ་ཆར་སྣང་བ་རྣམས་ནི་ཡིད་ཤེས་ཁོ་ན་ལ་སྣང་བས་ན་དེ་ལ་གཟུགས་ཀྱི་སྐྱེ་མཆེད་སོགས་ལྔ་བཞག་ཏུ་མེད་ཀྱང་ཡིད་ཙམ་གྱི་ངོར་ཀེང་རུས་གསལ་བར་སྣང་བ་ལྟ་བུ་ཆོས་ཀྱི་སྐྱེ་མཆེད་དུ་འཇོག་པ་དང་འདྲ་བས། ཆོས་ཀྱི་སྐྱེ་མཆེད་ཀྱི་གཟུགས་ཡིན་ལ། དེ་ཡང་དེའི་གཟུགས་ལྔ་ལས་ཀུན་བརྟགས་པའི་གཟུགས་ཡིན་ནོ། །འདིས་ནི་འདི་འདྲ་བ་མང་པོ་གཅིག་ཤེས་པར་བྱའོ་ཞེས་སྨྲའོ། །དེ་ཡང་། དེ་བློ་ལ་ལྟོས་གཉིས་ཆར་བདེན་པ་སྟེ། །དོན་གསལ་མཐོང་ལ་གཉིས་ཀའང་བརྫུན་པ་ཡིན། །ཞེས་པ་འདི་ཉིད་ཀྱིས་འཇོམས་ཏེ། དེ་བློ་ལ་ལྟོས་གཟུགས་ཀྱི་སྐྱེ་མཆེད་དེ། །དོན་གསལ་མཐོང་ལ་ཆོས་ཀྱི་སྐྱེ་མཆེད་ཡིན། །ཅེས་བྱ་བར་འགྱུར་བའི་ཕྱིར་རོ། །གཞན་དུ་ན་ཆོས་ཀྱི་སྐྱེ་མཆེད་པའི་སྒྲ་དང་དྲི་ལ་སོགས་པ་ཡང་ཁས་ལེན་དགོས་པར་འགྱུར་ལ། དེ་མངོན་པ་ནས་བཤད་པའི་ཆོས་ཀྱི་སྐྱེ་མཆེད་གང་ཞིག་ཡིན། འདིས་ནི་འདི་འདྲ་བ་མང་པོ་ཅིག་འཇོམས་པར་ཤེས་པར་བྱའོ། །གཉིས་པ་ནི། རྨི་ལམ་སོགས་སོ། །གསུམ་པ་ནི། འདི་ན་སོགས་སྟེ་འགྲེལ་པར། དེའི་ཕྱིར་སད་པའི་ཤེས་པ་ལ་ལྟོས་ནས་གསུམ་ཆར་ཡང་མ་སྐྱེས་པར་བཤད་ལ། རྨི་ལམ་ན་རྨི་ལམ་རྨིས་བཞིན་པའི་ཤེས་པ་ལ་ལྟོས་ནས་ནི་ཞེས་གསུངས་སོ། །གཉིས་པ་དབང་ཤེས་འཁྲུལ་པའི་དཔེས་མི་འགྲུབ་པ་ལ་གསུམ་སྟེ། ཡུལ་མེད་ཤེས་པ་མཐོང་སྣང་གཉིས་ལ་མཚུངས། ཡུལ་མེད་ཤེས་པ་སྐྱེ་ན་ཧ་ཅང་ཐལ། རྟེན་དང་དམིགས་པ་སླར་ཡང་བརྗོད་ནས་དགག་པའོ། །དང་པོ་ནི། དབང་པོ་སོགས་ཏེ། གལ་ཏེ་རབ་རིབ་ཅན་ལ་སྐྲ་ཤད་སྣང་བའི་དཔེས། ཡུལ་མེད་པའི་ཤེས་པ་འགྲུབ་བོ་སྙམ་ན། དེ་དཔེར་མི་རུང་སྟེ། སྐབས་དེའི་ཡུལ་ཤེས་གཉིས་པོ་ལོག་པའི་ཀུན་རྫོབ་ཏུ་ཡོད་མཚུངས་ཡིན་ཞིང་། ཡང་དག་ཀུན་རྫོབ་ཏུ་མེད་མཚུངས་ཡིན་པའི་ཕྱིར་ཞེས་པ་སྟེ། འདིས་ནི་རྨི་ལམ་དུ་ཡིད་ཀྱི་རྣམ་པར་ཤེས་པ་ཐ་སྙད་དུ་ཡོད་པ་ཡང་བཀག་ལ། འདི་ཉིད་དཔེར་བྱས་ནས་མ་རིག་པའི་གཉིད་མ་སད་པ་ལ་སྣང་བའི་ཡུལ་ཤེས་ཐམས་ཅད་མ་རིག་པའི་གཉིད་སད་པའི་ཚེ་མེད་པར་སྒྲུབ་པ་སོགས་དབུ་མའི་ལུགས་ཀྱི་ཡུལ་སྣང་དང་ཡུལ་ཅན་བདེན་མེད་དུ་སྒྲུབ་པ་ཐམས་ཅད་ཀྱི་སྐབས་སུ་ཉེ་བར་མཁོའོ། །གཉིས་པ་ལ་གཉིས་ཏེ། ཧ་ཅང་ཐལ་བ་དགོད། དེའི་ཉེས་སྤོང་དགག་པའོ། །དང་པོ་ནི། གལ་ཏེ་སོགས་ཏེ། ཡུལ་མེད་པར་ཤེས་པ་སྐྱེ་ན་ཞེས་པའི་དོན་བཀོད་པའི་ཚེ་དགག་བྱའི་ཁྱད་པར་མ་སྦྱར་བར་བཀོད་པ་ཡིན་ལ། དོན་ལ་ཕྱོགས་སྔའི་བསམ་པ་ལ་ཡུལ་སྐྲ་ཤད་ཐ་སྙད་དུ་ཡང་མེད་བཞིན་དུ་ཡུལ་ཅན་ཤེས་པ་རང་བཞིན་གྱིས་སྐྱེ་བར་འདོད་ཅིང་། དབུ་མ་པ་རང་གི་ལུགས་ལ་དེ་གཉིས་ཡོད་མེད་ཀྱི་ཁྱད་པར་དོན་དམ་དུ་ཡང་མེད། ཡང་དག་ཀུན་རྫོབ་ཏུ་ཡང་མེད། ལོག་པའི་ཀུན་རྫོབ་ཏུ་ཡང་མེད་ཅེས་པ་ལ་བསམ་ནས། དེ་གསུམ་གང་རུང་དུ་ཡོད་མེད་ཀྱི་ཁྱད་པར་ཡོད་ན་ཧ་ཅང་ཐལ་བ་འགོད་པའོ། །གནད་འདི་རང་རྒྱུད་པ་མན་ཆད་ལ་མེད་པ་སློབ་དཔོན་འདིའི་ཐུན་མོང་མ་ཡིན་པའི་ཁྱད་ཆོས་སུ་སྣང་ཡང་དེ་མ་རྟོགས་པར་འདིའི་ཕྱོགས་སྔ་འབའ་ཞིག་ལ་ཞེན་ནས་རྣམ་བཞག་བྱེད་པ་རྣམས་ལ་ནི་སྔར་ཡང་དགག་པ་མང་དུ་བརྗོད་ཟིན་ཅིང་། ད་དུང་ཡང་མང་དུ་འབྱུང་བར་འགྱུར་རོ། །གཉིས་པ་ལ་གཉིས་ཏེ། ཉེས་སྤོང་བརྗོད། དེ་དགག་པའོ། །དང་པོ་ནི། གང་ཕྱིར་སོགས་སོ། །གཉིས་པ་ལ་གཉིས་ཏེ། དགག་པ་སྤྱིར་བསྟན། དགག་པ་སོ་སོར་བཤད་པའོ། །དང་པོ་ནི། ནུས་ཏེ་སོགས་ཏེ། འདི་དག་གིས་ནུས་པ་རང་བཞིན་གྱིས་འགྲུབ་པ་དགག་པ་ཡིན་གྱི། ཐ་སྙད་པ་ནི་མ་ཡིན་ནོ། །གཉིས་པ་ལ་གསུམ་སྟེ། ད་ལྟར་བའི་ནུས་པ་དགག མ་འོངས་པའི་ནུས་པ་དགག འདས་པའི་ནུས་པ་དགག་པའོ། །དང་པོ་ནི། སྐྱེས་ལ་སོགས་སོ། །གཉིས་པ་ནི། མ་སྐྱེས་སོགས་སོ། །གསུམ་པ་ལ་གསུམ་སྟེ། སྐྱེ་བར་ངེས་པ་མེད་པར་ཐལ། ཉེས་སྤོང་བསྒྲུབ་བྱ་ཉིད་དང་མཚུངས། གཞན་ལ་རྒྱུད་གཅིག་ཉིད་མི་འཐད་པའོ། །དང་པོ་ནི། གལ་ཏེ་སོགས་སོ། །གཉིས་པ་ནི། གལ་ཏེ་སོགས་ཏེ། འདི་ནི་རྒྱུན་རང་གི་མཚན་ཉིད་ཀྱིས་གྲུབ་པ་དགག་པ་ཡིན་གྱི། ཐ་སྙད་པ་ནི་མ་ཡིན་ཏེ། རྒྱུ་འབྲས་ལ་རྒྱུན་ཞལ་གྱིས་བཞེས་པའི་ཕྱིར་རོ། །རྒྱུན་རང་གི་མཚན་ཉིད་ཀྱིས་གྲུབ་པ་ཕྱོགས་སྔས་ཀྱང་ཁས་མ་བླངས་སོ་སྙམ་ན། རྒྱུན་ཅན་ངོ་བོ་ཐ་དད་པ་ལ་རྒྱུན་གཅིག་པ་ཁས་བླངས་པས་དོན་གྱིས་ཁས་བླངས་པའོ། །གསུམ་པ་ནི། བྱམས་པ་སོགས་ཏེ། རྒྱུ་འབྲས་གཞན་དུ་འདོད་ན་རྒྱུད་གཅིག་པ་དང་། རྒྱུན་གཅིག་པ་ཐ་སྙད་དུ་མི་འཐད་དེ། བྱམས་པ་དང་ཉེར་སྦས་བཞིན་ཅེས་པ་སྟེ། འདིས་རྒྱུ་འབྲས་གཞན་དུ་མེད་པ་ལ་ཐ་སྙད་དུ་རྒྱུན་གཅིག་པ་འཐད་ཅེས་བྱ་བར་གྲུབ་སྟེ། གནད་ཀྱི་དོན་ནོ། །གསུམ་པ་ལ་གཉིས་ཏེ། གཞན་གཞུང་རྗེས་སུ་བརྗོད། དེ་ཉིད་བཟློག་བྱེད་བཤད་པའོ། །དང་པོ་ནི། མིག་བློ་སོགས་ཏེ། ཚིགས་བཅད་དང་པོས་ཀུན་གཞིའི་ནུས་པ་ཡིན་གྱི། ཤེས་པ་ལས་རྫས་གཞན་དུ་མེད་ཀྱང་ཐ་མལ་པས་དབང་པོ་གཟུགས་ཅན་དུ་རྟོགས་པར་བསྟན། ཚིགས་བཅད་གཉིས་པས་ཕྱི་རོལ་གྱི་དོན་མེད་པར་ཀུན་གཞིའི་ནུས་པ་སྨིན་པ་ལས་གཟུགས་སོགས་སུ་སྣང་བར་བསྟན། ཚིགས་སུ་བཅད་པ་གསུམ་པས་དེ་ཉིད་དཔེའི་སྒོ་ནས་གྲུབ་པ་བསྟན་ནོ། །གཉིས་པ་ལ་བཞི་སྟེ། རྒྱུ་མཚན་མཚུངས་པའི་མགོ་སྙོམས་བརྗོད། ཉེས་སྤོང་སྔར་བཤད་རིགས་པས་ཁེགས། སྒྲུབ་བྱེད་ཐམས་ཅད་བསྒྲུབ་བྱ་མཚུངས། ལུང་གི་སྒྲུབ་བྱེད་མེད་པར་བསྟན་པའོ། །དང་པོ་ནི། ཇི་ལྟར་སོགས་སོ། །གཉིས་པ་ནི། གལ་ཏེ་སོགས་ཏེ། འདི་ལྟར་རྨི་ལམ་དུ་མིག་བརྫུན་པ་མིག་ཤེས་བརྫུན་པའི་རྒྱུར་ཁས་བླངས་པར་གསུངས་པ་ནི། འཇིག་རྟེན་ཉིད་ལ་ལྟོས་ནས་ཀྱང་བརྫུན་པའི་དོན་ཡིན་ལ། ཁ་ཅིག་དེའི་ཡུལ་དུ་གྱུར་པའི་གཟུགས་དེ་ཆོས་ཀྱི་སྐྱེ་མཆེད་པའི་གཟུགས་ཡིན་པར་འདོད་པ་ནི་མངོན་པ་ནས་བཤད་པའི་རྣམ་གཞག་ལུགས་འདི་ལ་བསྲེས་པས་ལན་ཏེ། དེ་སད་རྨི་གང་ལ་ཡང་ཆོས་ཀྱི་སྐྱེ་མཆེད་པའི་གཟུགས་སུ་མི་རུང་བའི་ཕྱིར། གལ་ཏེ་སད་པའི་བློ་ངོར་རུང་ངོ་སྙམ་ན། དེ་ལྟར་ན་རྨི་ལམ་གྱི་མིག་གི་རྣམ་པར་ཤེས་པ་དེ་སད་པའི་བློ་ངོར་ཡིད་ཀྱི་རྣམ་ཤེས་སུ་འགྱུར་ཏེ་རྒྱུ་མཚན་མཚུངས་པའི་ཕྱིར་རོ། །འདོད་ན་རྨི་ལམ་དུ་མིག་ཤེས་སོགས་ལྔའི་ཡུལ་དབང་རྣམ་ཤེས་གསུམ་ཆར་མེད་པར་ཁས་བླངས་པ་དང་དངོས་སུ་འགལ་ལོ། །གསུམ་པ་ནི། འདི་ཡིས་སོགས་ཏེ། འགྲེལ་པར། ཕ་རོལ་པོ་གང་ཞིག་སད་པའི་རྣམ་པར་ཤེས་པ་ནི་དོན་གྱིས་སྟོང་པ་ཡིན་ཏེ། རྣམ་པར་ཤེས་པ་ཡིན་པའི་ཕྱིར་རྨི་ལམ་གྱི་རྣམ་པར་ཤེས་པ་བཞིན་ནོ་ཞེས་བྱ་བ་དང་། སད་པའི་གནས་སྐབས་སུ་དམིགས་པའི་ཡུལ་ནི་བརྫུན་པའི་རང་བཞིན་ཡིན་ཏེ། ཡུལ་ཡིན་པའི་ཕྱིར། རྨི་ལམ་གྱི་ཡུལ་བཞིན་ནོ་ཞེས་བྱ་བ་དང་དེ་བཞིན་དུ་ཀུན་ནས་ཉོན་མོངས་པ་དང་རྣམ་པར་བྱང་བ་དག་ནི་གཞན་གྱི་དབང་མེད་ན་ཡོད་པ་མ་ཡིན་ཏེ། རྟེན་མེད་པའི་ཕྱིར་རུས་སྦལ་གྱི་སྤུའི་གོས་བཞིན་ནོ་ཞེས་སྨྲའོ། །དེ་བཞིན་དུ་རབ་རིབ་ཀྱི་དཔེ་དག་གིས་ཀྱང་བརྗོད་པར་བྱའོ། །དེ་ལྟ་བུ་ལ་སོགས་པའི་སྒོ་ནས་རྣམ་པར་ཤེས་པར་སྨྲ་བ་འདིས་ལན་གང་དང་གང་བཏབ་པ་དེ་དང་དེ་ནི་མཁས་པ་དབུ་མ་པས་དམ་བཅའ་བ་དང་མཚུངས་པར་མཐོང་བ་ན་རྩོད་འདི་སྟེ། རྣམ་པར་ཤེས་པ་སྨྲ་བ་བཟློག་པར་བྱེད་དོ། །ཞེས་གསུངས་སོ། །བཞི་པ་ནི། སངས་རྒྱས་སོགས་སྟེ། ལང་ཀར་གཤེགས་པའི་མདོ་ལས། སྲིད་པ་གསུམ་ནི་བཏགས་པ་ཙམ། །ངོ་བོ་ཉིད་ཀྱིས་དངོས་པོ་མེད། །བཏགས་པ་དངོས་པོའི་ངོ་བོ་ནི། །རྟོག་གེ་བ་དག་རྟོག་པར་འགྱུར། །རང་བཞིན་མེད་ཅིང་རྣམ་རིག་མེད། །ཀུན་གཞི་མེད་ཅིང་དངོས་མེད་ན། །བྱིས་པ་ངན་པ་རྟོག་གེ་བ། །རོ་དང་འདྲ་བས་འདི་དག་བརྟགས། །ཞེས་གསུངས་སོ། །གསུམ་པ་བསྒོམ་བྱུང་འཁྲུལ་བའི་དཔེས་མི་འགྲུབ་པ་ནི། རྣལ་འབྱོར་སོགས་ཏེ། བློ་དེ་ཁོ་ན་ཉིད་ཡིད་བྱེད་ཡིན་ན། སྔོན་པོ་འཛིན་པའི་མངོན་སུམ་དང་འདྲ་བས། ཚིགས་བཅད་འོག་མའི་གནོད་པ་སྟོན་པ་ཡིན་གྱི་རང་བཞིན་གྱིས་གྲུབ་པ་ལ་གནོད་པ་སྟོན་པ་ནི་གཞུང་དང་མ་འབྲེལ་ལོ། །འདིའི་སྔ་འགྲེལ་དུ། འདིར་སྨྲས་པ། གལ་ཏེ་ཡུལ་མེད་པར་རྣམ་པར་ཤེས་པ་ཡོད་པ་མ་ཡིན་ན། འོ་ན་གང་བླ་མའི་མན་ངག་ལས་རྣལ་འབྱོར་པ་དག་གི་ས་གཞི་ཀེང་རུས་ཀྱིས་ཡོངས་སུ་གང་བར་མཐོང་བ་དེ་ཅི་ལྟར་ཞེ་ན། བཤད་པ་ཞེས་འབྱུང་བ་ནི། འོག་མའི་མཚམས་སྦྱར་ལ་ཡང་འདྲ་སྟེ། དེ་བཞིན་དུ་ཞེས་འབྱུང་བའི་ཕྱིར་རོ། །བཞི་པ་མཐོང་སྣང་འཁྲུལ་པའི་དཔེས་མི་འགྲུབ་པ་ནི། རབ་རིབ་སོགས་ཏེ། འདི་ལ་རང་ལུགས་གོ་སླ་ཞིང་དོན་ཆེ་བ་བཤད་པ། ཧ་ཅང་རྟོག་པས་བརྟགས་པའི་ལུགས་དགག་པ། གནས་སྐབས་ཀུན་དུ་མཁོ་བའི་གནད་ཀྱི་དོན་བསྟན་པ་དང་གསུམ་ལས། དང་པོ་ལ་ཡང་གཉིས་ཏེ། དོགས་པ་དགོད་པ་དང་། དེའི་ལན་དུ་འགྱུར་ཚུལ་ལོ། །དང་པོ་ནི། སྔར་དྲངས་པ་ལྟར་སེམས་ཙམ་པས་ཕྱི་དོན་མེད་པར་ཤེས་པ་ཡོད་པའི་མཐུན་དཔེ་བསྟན་བཅོས་ལ་གྲགས་པ་ནི་ཆུ་འབབ་པའི་ཀླུང་ལ་ཡི་དྭགས་ལ་རྣག་ཁྲག་ཏུ་སྣང་བའི་བློ་སྐྱེ་བ་ན་ཡུལ་རྣག་ཁྲག་མེད་ཀྱང་ཡུལ་ཅན་གྱི་བློ་ཡོད་པ་བཞིན་ཅེས་འདོད་དེ། ཐེག་བསྡུས་ལས། ཡི་དྭགས་དུད་འགྲོ་མི་རྣམས་དང་། །ལྷ་རྣམས་ཇི་ལྟར་རིགས་རིགས་སུ། །དངོས་གཅིག་ཡིད་ནི་ཐ་དད་ཕྱིར། །དོན་མ་གྲུབ་པར་འདོད་པ་ཡིན། །ཅེས་གསུངས་ཤིང་དེའི་བཤད་སྦྱར་དགེ་བསྙེན་བཙུན་པས་མཛད་པར། ཆུ་ཀླུང་གི་དངོས་པོ་ལ་རང་རང་གི་ལས་ཀྱི་རྣམ་སྨིན་གྱི་དབང་གིས་ཡི་དྭགས་ཀྱིས་རྣག་ལ་སོགས་པ་གང་བར་མཐོང་བ་དང་། དེ་ཉིད་ལ་དུད་འགྲོ་ཉ་ལ་སོགས་པས་གནས་ཀྱི་བློས་གནས་པར་བྱེད་པ་དང་། མི་རྣམས་ཀྱིས་ནི་དངར་བ་དང་དྭང་བ་དང་བསིལ་བའི་ཆུར་རྟོག་ཅིང་ཁྲུས་བྱེད་དོ། །འཐུང་ངོ་དེར་འཇུག་གོ །ནམ་མཁའ་མཐའ་ཡས་སྐྱེ་མཆེད་ལ་སྙོམས་པར་ཞུགས་པའི་ལྷ་རྣམས་ཀྱིས་ནི་ནམ་མཁར་མཐོང་སྟེ། གཟུགས་ཀྱི་འདུ་ཤེས་རྣམ་པར་བཤིག་པའི་ཕྱིར་རོ། །ཞེས་བཤད་དོ། །འདི་དག་གི་དོན་སེམས་ཙམ་པས་དངོས་པོ་ཐུན་མོང་བ་གཅིག་ལས་ཀྱི་དབང་གིས་སོ་སོར་མཐོང་བར་འདོད་པ་མ་ཡིན་གྱི། རྩ་བར་དངོས་གཅིག་ཅེས་པའི་དོན་ཡང་། མི་ལ་ཆུར་སྣང་བ་ལྟ་བུའི་གཞི་གཅིག་བཟུང་ནས། གཞི་དེར་གཞན་རྣམས་ཀྱང་བག་ཆགས་ཀྱི་དབང་གིས་སོ་སོར་སྣང་ཞེས་པ་སྟེ། ལུགས་འདི་ལ་དབང་ཤེས་ཀྱི་ཡུལ་ཐུན་མོང་བ་མེད་པའི་ཕྱིར་རོ། །དེས་ན་གཞི་གཅིག་ཉིད་དུ་བག་ཆགས་མཐུན་པར་སད་པས། དངོས་པོ་གཅིག་པ་ལྟ་བུར་སྣང་བ་དང་། བག་ཆགས་མི་མཐུན་པར་སད་པས་དངོས་པོ་ཐ་དད་པ་ལྟ་བུར་སྣང་བ་གཉིས་ལས། དང་པོ་ནི། སྐྱེས་བུ་དུ་མས་མར་མེ་གཅིག་མཐོང་ཞེས་པའི་ཐ་སྙད་བྱེད་པ་ལྟ་བུ་སྟེ། གཅིག་གིས་མཐོང་བའི་མར་མེ་དེ་ཉིད་གཞན་གྱིས་མཐོང་བ་མ་ཡིན་གྱི། བག་ཆགས་མཐུན་པར་སད་པ་ཙམ་མོ། །ཕྱི་མ་ནི་སྔར་བཤད་པ་ཉིད་དོ། །རྣག་ཁྲག་དང་ཆུ་ལ་སོགས་པའི་དངོས་པོ་ཐ་དད་པ་ནི་གང་ཡང་མེད་ཀྱི། རང་རང་གི་བག་ཆགས་མི་འདྲ་བ་སད་པའི་སྣང་བ་ཙམ་མོ། །ཞེས་འདོད་དོ། །གཉིས་པ་ནི་འགྲེལ་པར་ཡང་ཤེས་པར་བྱའོ། །རབ་རིབ་མཐུ་ལས་སྐྲ་རྣམས་གང་མཐོང་བ། །ཞེས་སྔར་བཤད་པ་དེ་དང་མཚུངས་པ། དེ་ལྟ་བུའི་རིགས་ཅན་གཞན་ཡང་རིག་པར་བྱ་སྟེ། སྤྲོས་པས་ཆོག་གོ་ཞེས་གསུངས་པའི་དོན་ནི། མཚུངས་ཞེས་པ་བཤད་པའི་གཞིར་བཞག གང་དང་མཚུངས་ན། རབ་རིབ་དང་ལྡན་པའི་དབང་པོ་ཅན་ལ་ལན་བཏབ་པ་དེ་མཚུངས། གང་ལ་མཚུངས་ན་ཆུ་འབབ་པའི་ཀླུང་ལ་ཡི་དྭགས་རྣག་བློའི་དཔེས་ཕྱི་དོན་མེད་པར་ཤེས་པ་བསྒྲུབ་པ་ལ་མཚུངས། ཇི་ལྟར་མཚུངས་ན། ཆུ་འབབ་ཀླུང་ལ་ཡི་དྭགས་འགའ་ཞིག་གིས། །ལས་ཀྱི་མཐུ་ལས་རྣག་རྣམས་གང་མཐོང་བ། །དེ་བློ་ལ་ལྟོས་གཉིས་ཆར་བདེན་པ་སྟེ། །དོན་གསལ་མཐོང་ལ་གཉིས་ཀའང་བརྫུན་པ་ཡིན། །ཅེས་པའི་ཚུལ་གྱིས་མཚུངས། འདིར་མིའི་ཐ་སྙད་ཀྱི་དབང་དུ་བྱས་ནས། ཆུ་ནི་འཇིག་རྟེན་ལ་ལྟོས་བདེན་པའི་ཀུན་རྫོབ་ཡིན་ལ། རྣག་ལ་སོགས་པ་ནི་འཇིག་རྟེན་ལ་ལྟོས་ལོག་པའི་ཀུན་རྫོབ་ཡིན་པས། རབ་རིབ་ཅན་ལ་སྐྲ་ཤད་སྣང་བ་དང་མཚུངས་པར་སྟོན་པའོ། །ཁ་ཅིག་གཞུང་འདིའི་དོན། དེ་བཞིན་དུ་རབ་རིབ་དང་ལྡན་པའི་དབང་པོ་ཅན་དང་མཚུངས་པའི་སྒྱུ་མ་དང་གཟུགས་བརྙན་སོགས་དཔེར་འགོད་པ་ལ་ཡང་ལན་གདབ་ཚུལ་ཤེས་པར་བྱས་ལ། ཆུ་འབབ་པའི་ཀླུང་ལ་ཡི་དྭགས་རྣམས་ལ་རྣག་ཁྲག་གི་བློ་སྐྱེ་བ་ལ་ཡང་སྔ་མ་བཞིན་དུ་ཤེས་པར་བྱའོ། །ཞེས་འཆད་པ་ནི་གཞུང་གི་ཚིག་དོན་ཙམ་ཡང་འཆད་མ་ཤེས་པ་སྟེ། རབ་རིབ་དང་ལྡན་པ་ལ་སྔར་ལན་བཏབ་ཟིན་པས་འདིར་མི་དགོས་པའི་ཕྱིར་དང་། དེ་ལ་ལན་བཏབ་ཟིན་པ་སྐབས་འདིའི་ལན་ལ་ཡང་མཚུངས་ཞེས་པའི་དོན་སྦྱར་མ་ཤེས་པར་གཞི་སོ་སོར་བྱས་འདུག་པའི་ཕྱིར་རོ། །གཉིས་པ་ལ་གཉིས་ཏེ། འདོད་པ་བརྗོད། དེ་དགག་པའོ། །དང་པོ་ནི་ཀུན་རྫོབ་ལ་རིག་པའི་འཐད་པ་བཅུག་ནས་དངོས་པོར་སྨྲ་བ་དང་ཚུལ་མཚུངས་པར་བསྒྲུབ་པའི་བོད་ཀྱི་དབུ་མ་པར་རློམ་པ་ཁ་ཅིག་ན་རེ། དེ་ལ་ཆོས་ཀྱི་སྐྱེ་མཆེད་ཀྱི་གཟུགས་ལྔ་ནི་དངོས་པོར་སྨྲ་བའི་གྲུབ་མཐས་བརྟགས་པ་མིན་གྱི། མདོ་ལས་གསུངས་ཤིང་རང་ཉིད་ཀྱང་དེ་ལྟར་དུ་བཞེད་དོ། །དེའི་ཕྱིར་ཀེང་རུས་མེད་ཀྱང་དེ་གསལ་བར་སྣང་བ་ནི། གཟུགས་ཅན་དང་འདྲ་བར་གཟུགས་ཅན་དུ་འདོད་དགོས་ལ། འདི་ཡིད་ཤེས་ཁོ་ན་ལ་སྣང་བ་ཡིན་པས། གཟུགས་ཅན་བཞིན་དུ་གཟུགས་ཀྱི་སྐྱེ་མཆེད་མིན་ལ། སྐྱེ་མཆེད་གཟུགས་ཅན་ལྷག་མ་དགུ་ཡང་མིན་པས། ཆོས་ཀྱི་སྐྱེ་མཆེད་ཀྱི་གཟུགས་ཀུན་བཏགས་པ་ཞེས་འབྱུང་ངོ་། །མིག་ཤེས་ལ་སྐྲ་ཤད་དུ་སྣང་བ་ནི་གཟུགས་ཅན་བཞིན་དུ་གཟུགས་ཀྱི་སྐྱེ་མཆེད་དོ། །ཡི་དྭགས་ལ་ཆུ་ཀླུང་རྣག་ཏུ་སྣང་བ་ནི་དེའི་མིག་ཤེས་ལ་སྣང་བ་ཡིན་པས་གཟུགས་ཀྱི་སྐྱེ་མཆེད་དུ་བཞག་དགོས་སོ། །ཞེས་དང་། །འོ་ན་ཇི་ལྟར་ཞེ་ན་ཐོག་མར་དཔེ་བཤད་པར་བྱ་སྟེ། ལྕགས་གོང་མེས་བསྲེགས་པའི་དམར་འབར་བ་ལ་རེག་ཀྱང་མི་ཚིག་པའི་རིག་སྔགས་དང་ལྡན་པ་གཅིག་གིས་ལྕགས་གོང་དེ་ལག་ཏུ་བླངས་པ་ན་ལུས་ཤེས་ཀྱིས་ལྕགས་དེའི་རེག་བྱ་འཛིན་ཀྱང་། དེ་ལ་རེག་བྱ་དེ་ཤིན་ཏུ་ཚ་ཞིང་བསྲེག་པའི་རྣམ་པ་ཅན་དུ་མི་སྐྱེ་བ་ནི་རིག་སྔགས་བཟླས་པའི་ཆུས་ལག་པ་བཀྲུས་པ་སོགས་ཀྱི་རྐྱེན་གྱིས་ཡིན་ནོ། །དེ་འདྲ་བའི་རིག་སྔགས་ཟློས་པ་དང་བྲལ་བ་ལ་ནི་ལྕགས་གོང་གི་རེག་བྱ་དེ་ཤིན་ཏུ་ཚ་ཞིང་བསྲེག་པའི་རྣམ་པ་ཅན་དུ་སྐྱེའོ། །དེ་ལྟར་ན་མི་བསྲེག་པ་དང་བསྲེག་པའི་རེག་བྱ་གཉིས་ཀའང་ལྕགས་གོང་གཅིག་པུ་དེའི་རེག་བྱར་ནི་བྱ་དགོས་ལ་ལུས་ཤེས་ཚད་མ་གཉིས་གཅིག་གིས་གྲུབ་པའི་རེག་བྱ་གཅིག་ཤོས་ཀྱིས་གྲུབ་པ་ནི་མིན་པས། གཉིས་ཀ་ཚད་མར་ཁས་བླངས་ཀྱང་ཚད་མ་གཅིག་གིས་གྲུབ་པ་གཅིག་ཤོས་ཀྱིས་འགོག་པ་མིན་ནོ། །དེ་བཞིན་དུ་གཞི་གང་དུ་ཆུ་ཀླུང་འབབ་པའི་གཞི་དེར་ཆུ་ཀླུང་དེའི་ཆ་ཤས་གཅིག ཡི་དྭགས་རྣམས་ལ་སྔོན་ལས་ཀྱི་དབང་གིས་རྣག་ཁྲག་ཏུ་སྐྱེས་པ་དང་། ཆུ་ཀླུང་གི་ཆ་ཤས་གཞན་གཅིག་མི་ལ་སྔོན་ལས་ཀྱི་དབང་གིས་རྣག་ཁྲག་ཏུ་མི་སྣང་བའི་བཏུང་བ་དང་། ཁྲུས་ཀྱི་ཆུར་སྐྱེ་བས་དེ་གཉིས་ཀ་ཆུ་ཀླུང་གཅིག་གི་ཆ་ཤས་རེ་ཡིན་པས་ཡི་དྭགས་ཀྱི་མིག་ཤེས་ཚད་མས་གྲུབ་པའི་དོན་དང་། མིའི་མིག་ཤེས་ཚད་མས་གྲུབ་པའི་དོན་གཉིས་ཀྱང་དངོས་པོ་སོ་སོ་བ་ཡིན་པས་དེ་གཉིས་གཅིག་གིས་གྲུབ་པའི་དོན་དེ་ཉིད། གཅིག་ཤོས་ཀྱིས་དེའི་བཟློག་ཕྱོགས་སུ་གྲུབ་པ་ག་ལ་ཡིན། དེ་བཞིན་དུ་བཤེས་སྤྲིང་ལས། ཡི་དྭགས་རྣམས་ལ་སོས་ཀའི་དུས་སུ་ནི། །ཟླ་བའང་ཚ་ལ་དགུན་ནི་ཉི་མའང་གྲང་། །ཞེས་གསུངས་པ་ཡང་། ཡི་དྭགས་རྣམས་ལ་སྔོན་ལས་ཀྱི་དབང་གིས་སོས་ཁ་ཟླ་འོད་རེག་བྱ་ཤིན་ཏུ་ཚ་བ་དང་། དགུན་གྱི་ཚེ་ཉི་འོད་རེག་བྱ་གྲང་བར་སྐྱེ་ཡང་། ཟླ་ཉིའི་འོད་ཀྱི་སྟེང་ནས་མི་ལ་གྲང་དྲོའི་རྣམ་པ་ཅན་དུ་སྐྱེ་བ་མི་འགལ་ལ། དེ་གཉིས་ནི་ཚད་མ་གཅིག་གིས་ཚ་བར་གཞལ་བའི་རེག་བྱ་ཉིད། གཅིག་ཤོས་ཀྱིས་གྲང་བ་འཇལ་བ་མིན་ཞིང་། གཉིས་ཀས་ཉི་ཟླ་གཅིག་གི་འོད་ཀྱི་རེག་བྱར་འཇོག་པའི་ཕྱིར། དངོས་པོ་གཅིག་ཅེས་ཀྱང་གསུངས་པས་གཞུང་དོན་ཞིབ་ཏུ་མ་དཔྱད་པར་གོ་བ་རགས་པ་རེ་ཤར་བ་དེས་ཚིམ་པའི་ཐག་གཅོད་མ་སྔ་ཤིག ཞེས་བྲིས་སོ། །གཉིས་པ་ནི། ཆོས་ཀྱི་སྐྱེ་མཆེད་པའི་གཟུགས་ལྔ་དངོས་སྨྲ་བའི་གྲུབ་མཐས་བཏགས་པ་མིན་གྱི། མདོ་ལས་གསུངས་ཤིང་རང་ཉིད་ཀྱང་དེ་ལྟར་དུ་བཞེད་ཅེས་པ་ནི། ཀུན་གཞིའི་རྣམ་ཤེས་ལ་ཡང་མཚུངས་ཤིང་། རང་ཉིད་བཞེད་པ་ཡང་དངོས་སྨྲ་བ་དང་མི་འདྲ་སྟེ། འདིར་ནི་འཇིག་རྟེན་ཉིད་ལྟོས་ལོག་པའི་ཀུན་རྫོབ་ཐམས་ཅད་བློ་དེའི་དོན་ཇི་ལྟར་སྣང་བ་ལྟར་ཡིན་ཞིང་། བློ་གཞན་གྱི་ངོར་ནི་གཏན་མེད་པའི་ཕྱིར་རོ། །མིག་ཤེས་ལ་སྐྲ་ཤད་དུ་སྣང་བ་གཟུགས་ཀྱི་སྐྱེ་མཆེད་ཡིན་ན། དེ་ཆོས་ཅན། ཐ་སྙད་དུ་ཡོད་པར་ཐལ། གཟུགས་ཀྱི་སྐྱེ་མཆེད་ཡིན་པའི་ཕྱིར། འདོད་ན། རབ་རིབ་ཅན་གྱི་དབང་ཤེས་དེ་ཐ་སྙད་ལ་མ་འཁྲུལ་བར་འགྱུར་རོ། །གཞན་ཡང་འཁར་གཞོང་ལ་སོགས་པའི་གཞི་དེར་དབང་པོ་སྐྱོན་མེད་ཀྱིས་མིག་གཏད་པའི་ཚེ་ན་ཡང་སྐྲ་ཤད་སྣང་བར་འགྱུར་ཏེ། གཞི་དེར་སྐྲ་ཤད་དེ་གཟུགས་ཀྱི་སྐྱེ་མཆེད་ཡིན་པའི་ཕྱིར། མ་ཁྱབ་ན། ཁྱོད་ཀྱི་དབང་བློའི་ཡུལ་རྣམས་ཇི་ལྟ་བར། །ཞེས་སོགས་ཀྱི་ཁྱབ་པ་གང་གིས་སྒྲུབ། གཞི་གཅིག་ལ་ཐོགས་བཅས་ཀྱི་དངོས་པོ་རྫས་ཐ་དད་པ་གཉིས་དུས་མཉམ་དུ་གནས་པར་ཐལ། ཡི་དྭགས་ལ་ཆུ་ཀླུང་རྣག་ཁྲག་ཏུ་སྣང་བ་དེ་ཆུ་ཀླུང་ལས་རྫས་ཐ་དད་པའི་གཟུགས་ཀྱི་སྐྱེ་མཆེད་ཡིན་པའི་ཕྱིར། དཔེ་ཡང་མི་འཐད་དེ། ལྕགས་གོང་མེས་བསྲེགས་པའི་དམར་འབར་བ་ལ་རིག་སྔགས་དང་ལྡན་པ་གཅིག་གི་ལག་པས་རེག་པའི་ཚེ་རེག་བྱ་གཅིག་པུ་དེས་རང་གི་ལག་པ་མི་བསྲེག་པར་བྱེད་ནུས་པ་ཡིན་གྱི། བསྲེག་པའི་རེག་བྱ་དེ་ལས་དོན་གཞན་དུ་གྱུར་པའི་མི་བསྲེག་པའི་རེག་བྱ་གཅིག་གསར་དུ་སྐྱེ་བ་ནི་མ་ཡིན་ཏེ། གལ་ཏེ་ཡིན་ན། རིག་སྔགས་ཀྱིས་སྐྱེས་བུ་གཞན་འཆི་བར་བྱེད་པ་ན། སྐྱེས་བུ་གཅིག་པུ་དེ་ཉིད་ཀྱི་སྲོག་འགག་པ་མ་ཡིན་པར། སྲོག་འགག་པའི་སྐྱེས་བུ་གཅིག་གསར་དུ་སྐྱེ་བར་ཐལ་བའི་ཕྱིར་ཏེ། རིག་སྔགས་ཀྱི་བྱེད་པའི་རྐྱེན་འདྲ་བའི་ཕྱིར། དོན་ཡང་མི་འཐད་དེ། ཐོག་མར་ཡུལ་ཅན་གྱི་ཚད་མ་བཀག་ན་འཁར་གཞོང་གཅིག་ཏུ་རབ་རིབ་ཡོད་མེད་ཀྱི་སྐྱེས་བུ་གཉིས་ཀྱིས་བལྟས་པའི་ཚེ་དེ་གཉིས་ཀྱི་མིག་ཤེས་ལ་ཚད་མ་ཡིན་མིན་གྱི་ཁྱད་པར་མེད་པར་ཐལ། ཆུ་འབབ་པའི་ཀླུང་ལ་ཡི་དྭགས་ལ་རྣག་ཁྲག་ཏུ་སྣང་བའི་ཚེ་མིའི་མིག་ཤེས་དང་ཡི་དྭགས་ཀྱི་མིག་ཤེས་གཉིས་ཚད་མ་ཡིན་མིན་གྱི་ཁྱད་པར་མེད་པའི་ཕྱིར། ཁྱབ་པ་ནི་སློབ་དཔོན་གྱིས་རྩ་འགྲེལ་གཉིས་ཆར་དུ་དེ་གཉིས་མཚུངས་པར་གསུངས་པས་མི་འདོད་བཞིན་དུ་ཁས་བླང་བར་བྱའོ། །ཡུལ་གྱི་ངོས་ནས་ཆུ་འབབ་པའི་ཀླུང་ལ་དམྱལ་བ་པ་ལ་མེའི་ཕུང་པོར་སྣང་བའི་མེ་ཆོས་ཅན། ཆུ་ཀླུང་གི་ཆ་ཤས་མ་ཡིན་པར་ཐལ། མེ་ཡིན་པའི་ཕྱིར། ཡང་དེ་ཉིད་ལ་ནམ་མཁའ་མཐའ་ཡས་སྐྱེ་མཆེད་ལ་སྙོམས་པར་ཞུགས་པའི་ལྷ་རྣམས་ཀྱིས་ནམ་མཁར་མཐོང་བའི་ནམ་མཁའ་ཆོས་ཅན། ཆུ་ཀླུང་གི་ཆ་ཤས་མིན་པར་ཐལ། ནམ་མཁའ་ཡིན་པའི་ཕྱིར། དུང་དཀར་པོ་སེར་འཛིན་གྱི་དབང་ཤེས་ལ་དུང་དཀར་སེར་པོར་སྣང་བའི་སེར་པོ་དེ་ཆོས་ཅན། དུང་དཀར་གྱི་ཁ་དོག་མ་ཡིན་པར་ཐལ། སེར་པོ་ཡིན་པའི་ཕྱིར། མུ་སྟེགས་ཀྱི་སྟོན་པ་རྫོགས་བྱེད་ཀྱི་མིག་ཤེས་ལ་སངས་རྒྱས་ཀྱི་སྐུ་གཟུགས་མི་མཛེས་པར་སྣང་བའི་གཟུགས་དེ་ཆོས་ཅན། སངས་རྒྱས་ཀྱི་སྐུ་གཟུགས་མ་ཡིན་པར་ཐལ། མུ་སྟེགས་ཀྱི་སྟོན་པ་རྫོགས་བྱེད་ཀྱི་ལས་ངན་ལས་གསར་དུ་སྐྱེས་པའི་གཟུགས་ཡིན་པའི་ཕྱིར། ཐལ་འགྱུར་བཞི་པོ་འདིའི་ཁྱབ་པ་ཁོ་བོ་ཅག་གི་ཡིན་ཅིང་། རྟགས་གསལ་དྲུང་ཙོང་པའི་ཡིན་ལགས་སོ། །གཞན་ཡང་འཇིམ་དུམ་སོགས་ལ་སྒྱུ་མའི་རྟ་གླང་དུ་སྣང་བའི་རྟ་གླང་དེ་སྒྱུ་མའི་སྔགས་སྨན་གྱི་རྐྱེན་ལས་རྟ་གླང་མཚན་ཉིད་པར་སྐྱེས་པར་ཐལ། ཆུ་འབབ་པའི་ཀླུང་ལ་ཡི་དྭགས་ལ་རྣག་ཁྲག་ཏུ་སྣང་བའི་ཚེ་ཡི་དྭགས་ཀྱི་ལས་ལས་རྣག་ཁྲག་ཡིན་པར་གསར་དུ་སྐྱེས་པའི་ཕྱིར། བུམ་གཟུགས་གཅིག་ལ་ཐག་ཉེ་རིང་གཉིས་ནས་ལྟ་བའི་ཚེ་གསལ་བའི་ལས་གཟུགས་དང་། མི་གསལ་བའི་ལས་གཟུགས་གཉིས་གསར་དུ་སྐྱེས་པར་ཐལ། ཆུ་འབབ་པའི་ཀླུང་ལ་རིགས་དྲུག་གིས་བལྟས་པའི་ཚེ་ལས་གཟུགས་དྲུག་གསར་དུ་སྐྱེས་པའི་ཕྱིར། ཐལ་འགྱུར་འདི་གཉིས་ཀྱི་ཁྱབ་པ་ནི་བདེ་བདེ་འདྲ་བ་ལ་ཨཱ། འདོད་ན་ནི་ཆོས་གྲགས་ཀྱིས་བཀག་པ་ལ་ཨཱ། རྟགས་ནི་དྲུང་ཙོང་པས་ཞལ་གྱིས་བཞེས་པ་ལ་ཨཱ། ཨ་ལེ་མོ་ལ་ལེ་མོ། ཤེས་བྱ་ཁྲ་ལེབ་ཏུ་སོང་བའི་སྐྱོན་ནི་འབྱུང་བ་བཞི་པོ་རེ་རེའི་རེག་བྱ་ཡིན་པར་གྱུར་པའི་འབྱུང་བཞི་བཞི་ཆར་གྱི་རེག་བྱ་ཡོད་པ་དང་། ཁ་དོག་ལྔ་པོ་རེ་རེའི་ཁ་དོག་ཡིན་པར་གྱུར་པའི་ཁ་དོག་ལྔ་ཆར་ཡོད་པ་དང་། ཐོ་ཡོར་གྱི་ཆ་ཤས་སུ་གྱུར་པའི་མི་གསར་སྐྱེས་ཡོད་པ་དང་། ཐག་པའི་ཆ་ཤས་སུ་གྱུར་པའི་སྦྲུལ་གསར་སྐྱེས་ཡོད་པ་དང་། ཚ་རེག་གི་ཆ་ཤས་སུ་གྱུར་པའི་གྲང་རེག་ཡོད་པ་དང་། གྲང་རེག་གི་ཆ་ཤས་སུ་གྱུར་བའི་ཚ་རེག་ཡོད་པ་སོགས་ཆོས་ཅན་ཇི་སྙེད་པའི་རྣམ་དབྱེ་འབྱེད་པའི་ཚེ། ཤེས་བྱ་ཐམས་ཅད་ཕན་ཚུན་འདྲེས་ནས་ཁྲ་བོ་ལེབ་པ་གཅིག་ཏུ་སོང་འདུག་པ་འདི་ཆོས་ཐམས་ཅད་ཆོས་ཀྱི་དབྱིངས་སུ་རོ་གཅིག་ཏུ་སོང་བའི་སྐབས་སུ་བྱུང་ན་དགའ་བ་ལ་ཨཱ། དྲུང་བློ་བ། རྗེས་འཇུག་ལ་དབུ་མའམ་གཅིག་བཤད་ཟེར་ནས་དངོས་འཛིན་གསར་པ་འདི་འདྲ་བསྣན་པ་མ་མཛད་ཨང་། འདི་དག་ཀྱང་སློབ་དཔོན་འདིའི་ལུགས་ཀྱི་འཇིག་རྟེན་ཉིད་ལྟོས་བདེན་པ་དང་། ལོག་པའི་ཀུན་རྫོབ་ཀྱི་ཁྱད་པར་ཐུན་མོང་མ་ཡིན་པ་ཡུལ་ཡུལ་ཅན་གཉིས་ཀ་ལ་སྦྱར་བའི་ཚུལ་མ་ཤེས་པའི་སྐྱོན་དུ་འདུག་གོ །གསུམ་པ་ནི། སེམས་ཙམ་པའི་གཞི་གཅིག་ལ་རིགས་དྲུག་གི་མཐོང་སྣང་དྲུག་འབྱུང་བ་ནི་དྲུག་ཆར་ཡུལ་མེད་པར་ཡུལ་ཅན་གྱི་ཤེས་པ་ཡོད་པར་འདོད་པས་ལུགས་འདིའི་ཕྱོགས་སྔ་ཡིན་ལ་སློབ་དཔོན་འདིས་ནི་ཀུན་རྫོབ་བདེན་པ་ལ་ཐ་སྙད་ལ་ལྟོས་ནས་བདེན་བརྫུན་གཉིས་སུ་ཡུལ་ལ་ཕྱེ་བའི་ཚེ་ཡུལ་ཅན་ལ་ཡང་དེ་ལྟར་ཕྱེ་བས་སྤྱིར་རིགས་དྲུག་གང་རུང་གཅིག་གི་ཐ་སྙད་གཞིར་བཞག་པའི་ཚེ་དེའི་ཡུལ་ཡུལ་ཅན་གཉིས་ཀའང་ཐ་སྙད་དུ་བདེན་ལ། གཞི་དེར་གཞན་ལྔའི་མཐོང་ཚུལ་གྱི་ཡུལ་ཡུལ་ཅན་གཉིས་ཀ་ཡང་ཐ་སྙད་དུ་མེད་པ་རྣམ་པར་གཞག་གོ །འདིར་ནི་སྟོན་པ་རྫོགས་པའི་སངས་རྒྱས་འཛམ་བུའི་གླིང་དུ་སངས་རྒྱ་བའི་ཚུལ་བསྟན་ནས་ཆོས་ཀྱིས་འཁོར་ལོ་བསྐོར་བ་དང་། བཀའ་བསྡུ་བ་དང་། དགོངས་འགྲེལ་གྱི་བསྟན་བཅོས་རྩོམ་པ་ཐམས་ཅད་མིའི་རྟེན་ལ་མཛད་པས། མིའི་མཐོང་ཚུལ་ལ་ཐ་སྙད་དུ་བདེན་པ་དང་། གཞི་དེ་ཉིད་དུ་འགྲོ་བ་གཞན་གྱི་མཐོང་ཚུལ་ལ་མི་བདེན་པའི་རྣམ་བཞག་མཛད་པས། ཆུ་འབབ་པའི་ཀླུང་ལ་ཆུ་དང་། དེའི་ཡུལ་ཅན་གཉིས་ཀ་ཐ་སྙད་ལ་ལྟོས་ནས་བདེན་པ་དང་། རྣག་ལ་སོགས་པའི་མཐོང་ཚུལ་གཞན་རྣམས་ནི་ཡུལ་ཡུལ་ཅན་གཉིས་ཀ་ཐ་སྙད་དུ་ཡང་མི་བདེན་པར་བཞག་པ་ནི་གནད་ཀྱི་དོན་སྟེ། སློབ་དཔོན་གྱི་གཞུང་རྩ་འགྲེལ་འདིའི་མགོ་མཇུག་སྦྲེལ་ནས་བལྟས་ན་མི་གོ་བའི་དོན་མེད་དོ། །སྟོན་པས་རིགས་དྲུག་སོ་སོའི་སྐད་དུ་ཆོས་སྟོན་པ་ཡོད་ཀྱང་ད་ལྟར་གྱི་བསྟན་པ་འདི་གང་གི་དབང་དུ་བྱས་པ་དང་། གཞི་སོ་སོའི་མཐོང་ཚུལ་མིའི་དབང་དུ་བྱས་ནས་ཀྱང་ཐ་སྙད་དུ་བདེན་བརྫུན་གྱི་རྣམ་དབྱེ་བྱེད་པ་སོགས་ཤིན་ཏུ་ཕྲ་ཞིང་ཞིབ་པའི་ཡུལ་གྱི་ཁྱད་པར་རྣམས་ནི་དེང་སང་ཁོ་བོའི་བློ་གྲོས་གྱི་ཡུལ་ཡིན་པར་སེམས་སོ། །གཉིས་པ་དོན་བསྡུ་བ་ནི། མདོར་ན་སོགས་ཏེ། བསྟོད་པ་ལས། མ་ཤེས་པ་ནི་ཤེས་བྱ་མིན། །དེ་མེད་རྣམ་པར་ཤེས་མེད་པ། །དེ་ཕྱིར་ཤེས་དང་ཤེས་བྱ་དག །རང་བཞིན་མེད་པར་ཁྱོད་ཀྱིས་གསུངས། །ཞེས་སོ། །གཉིས་པ་གཉིས་ཀྱིས་སྟོང་བའི་གཞན་དབང་རྫས་སུ་གྲུབ་པ་དགག་པ་ལ་གསུམ་སྟེ། གཞན་དབང་ཡོད་པའི་སྒྲུབ་བྱེད་མེད། སྒྲུབ་བྱེད་རང་རིག་བརྟགས་ནས་དགག སྒྲུབ་བྱེད་མེད་ཀྱང་གྲུབ་པ་དགག་པའོ། །དང་པོ་ནི། གལ་ཏེ་སོགས་སོ། །གཉིས་པ་ལ་བཞི་སྟེ། རང་རིག་རང་གི་ངོ་བོ་དགག རང་རིག་སྒྲུབ་བྱེད་དྲན་པ་དགག རང་གི་ཕྱོགས་ལ་དྲན་མྱོང་འཐད། གཞན་ཕྱོགས་དགག་པ་བསྡུས་ཏེ་བསྟན་པའོ། །དང་པོ་ནི། དེ་ཉིད་སོགས་སོ། །གཉིས་པ་ནི། གལ་ཏེ་སོགས་ཏེ། འདི་ལ་རང་རིག་དྲན་པའི་རྟགས་ཀྱིས་བསྒྲུབ་ན། དྲན་པ་རྫས་སུ་གྲུབ་པ་ཞིག་གམ། ཐ་སྙད་ཀྱི་དྲན་པས་སྒྲུབ། དང་པོ་ལྟར་ན། མཐའ་བཞིའི་སྐྱེ་བ་དཔྱད་ན་དྲན་པ་རྫས་གྲུབ་པ་མི་འགྲུབ་པས། རང་རིག་གི་སྒྲུབ་བྱེད་དུ་མི་འགྱུར་རོ། །ཕྱི་མ་ལྟར་ན་རང་རིག་བསྒྲུབ་པ་ལ་ཁྱབ་པ་མ་ངེས་ཏེ། གཞི་གཞན་གྱི་སྟེང་དུ་མེ་གཞན་སྔར་ཚད་མས་གྲུབ་ན་ཕྱིས་དུ་བའི་རྟགས་ལས་གཞི་འགའ་ཞིག་ཏུ་མི་གྲུབ་པ་འཐད་པ་བཞིན་དུ། སྔར་སྤྱིར་རང་རིག་ཚད་མས་གྲུབ་ན། དྲན་པའི་རྟགས་ལས་དེ་སྒྲུབ་པ་འཐད་ཀྱང་། ཕྱིར་རྒོལ་གྱི་ངོར་སྔར་རང་རིག་སྤྱི་ལྡོག་ནས་མ་གྲུབ་པས་ད་ལྟ་དྲན་པའི་རྟགས་ཀྱིས་མི་འགྲུབ་པའི་ཕྱིར་དང་དྲན་པ་ཐ་སྙད་པའི་རྟགས་ཀྱིས་རང་རིག་སྒྲུབ་པའི་ཁྱབ་པ་མ་ངེས་པའི་དཔེ་ནི་ཆུ་ཙམ་མཐོང་བ་ལས་ནོར་བུ་ཆུ་ཤེལ་ལམ། མེ་ཙམ་མཐོང་བ་ལས་ནོར་བུ་མེ་ཤེལ་མི་འགྲུབ་པ་བཞིན་ཞེས་གསུངས་སོ། །དེའི་དོན་ཡང་དྲན་པ་ཐ་སྙད་པ་དེ་ཡིན་ན་རང་རིག་ལས་བྱུང་བས་མ་ཁྱབ་སྟེ། རང་མྱོང་མེད་པར་ཡུལ་མྱོང་བ་ལས་ཀྱང་དྲན་པ་ཐ་སྙད་པ་སྐྱེ་བ་ཡོད་པའི་ཕྱིར། དཔེར་ན་ཆུ་ཤེལ་མེད་ཀྱང་ཆར་ལ་སོགས་པ་དང་། མེ་ཤེལ་མེད་ཀྱང་གཙུབ་ཤིང་སོགས་ལས་ཆུ་དང་མེ་འབྱུང་བའི་ཕྱིར་ཞེས་པའི་དོན་ཏེ། དཔེ་འདིས་ཀྱང་རང་རིག་ཐ་སྙད་དུ་ཁས་མི་ལེན་པ་མ་ཡིན་ཏེ། གཞན་དུ་ན་རང་རིག་ཐ་སྙད་པ་སྒྲུབ་པ་ལ་དྲན་པ་ཐ་སྙད་པ་རྟགས་སུ་བཀོད་པ་ཁྱབ་པ་འགལ་བར་གསུངས་དགོས་པ་ལས། ཁྱབ་པ་མ་ངེས་པར་གསུངས་པའི་ཕྱིར་རོ། །དཔེ་ལས་ཀྱང་ཤེས་ཏེ། ཆུ་ཤེལ་དང་མེ་ཤེལ་ལས་ཆུ་དང་མེ་སྐྱེ་བ་སྲིད་ཀྱང་ཆུ་དང་མེ་ཡིན་ན་དེ་གཉིས་ལས་སྐྱེ་བས་མ་ཁྱབ་པ་དཔེར་བཀོད་འདུག་པའི་ཕྱིར་རོ། །གནད་ཀྱི་དོན་ནི་བསྒྲུབ་བྱ་རང་རིག་སྒྲུབ་པ་ལ་དྲན་པ་རྫས་གྲུབ་པ་བཀོད་ན་མ་གྲུབ། དྲན་པ་ཐ་སྙད་པ་བཀོད་ན་མ་ངེས་ཞེས་སྒྲུབ་བྱེད་ལ་བརྟགས་པ་ཡིན་ལ། དོན་དེ་མ་གོ་བར་དྲན་པའི་རྟགས་ཀྱིས་རང་རིག་རྫས་སུ་གྲུབ་པ་དང་། རང་རིག་ཐ་སྙད་པ་གཉིས་ཀ་མི་འགྲུབ་ཞེས་སྒྲུབ་བྱ་ལ་བརྟགས་པར་འདོད་པ་ནི་འགྲེལ་བའི་དོན་ཡེ་མ་ཕྱེད་པའོ། །ཚིགས་བཅད་ཕྱི་མས་ནི་རྒྱུ་འབྲས་གཞན་དུ་འདོད་པའི་ཕྱོགས་ལ་དྲན་པས་མྱོང་བའི་ཡུལ་དྲན་པ་མི་འཐད་པ་དང་། གལ་ཏེ་རྒྱུད་གཅིག་ཏུ་གཏོགས་པ་དང་། རྒྱུ་དང་འབྲས་བུའི་དངོས་པོ་གནས་པས་འཐད་པར་བསྒྲུབ་ན་ཡང་གཞན་ཡིན་པའི་ཕྱིར་ཞེས་པའི་གཏན་ཚིགས་ཉིད་ཀྱིས་འཇོམས་པ་རྣམ་བསྟན་ནོ། །གསུམ་པ་ནི། གང་ཕྱིར་སོགས་ཏེ། འགྲེལ་པར། གང་གིས་ཡུལ་མྱོང་བ་སྟེ་ཡུལ་ཉམས་སུ་མྱོང་བའི་ཤེས་པ་དེ་ལས་དྲན་པའི་ཤེས་པ་གཞན་ཉིད་དུ་ཇི་ལྟར་མེད་པ་དེ་ལྟར་ནི་སྔར་བཤད་ཟིན་ཏོ། །གང་གི་ཕྱིར་དྲན་པ་ཉིད་ཡོད་པ་མ་ཡིན་པ་དེའི་ཕྱིར་གང་ཉམས་སུ་མྱོང་བས་མྱོང་བ་དེ་དྲན་པའི་ཤེས་པས་མྱོང་བ་མ་ཡིན་པ་མ་ཡིན་པས་དྲན་པ་ཡུལ་དང་ལྡན་པར་འགྱུར་ལ། ཉམས་སུ་མྱོང་བའི་ཤེས་པས་ཡོངས་སུ་བཅད་པ་གང་ཡིན་པ་དེ་དྲན་པས་ཡོངས་སུ་མ་བཅད་པ་མ་ཡིན་པས་བདག་གིས་མཐོང་ངོ་ཞེས་བྱ་བར་ཡང་འགྱུར་རོ། །ཞེས་གསུངས་པ་དེའི་དོན་ནི། མྱོང་བ་དང་དྲན་པ་རྒྱུ་འབྲས་ཡིན་པས་གཞན་དུ་མེད་པར་སྔར་བཤད་ཟིན་ལ། གཞན་དུ་མེད་པ་དེའི་ཕྱིར་ཡུལ་ཉམས་སུ་མྱོང་བས་མྱོང་བའི་ཡུལ་སྔོན་པོ་ལྟ་བུ་དེ་ཕྱིས་ཀྱི་དྲན་པས་མ་མྱོང་བ་ཡང་མ་ཡིན་པས་ན། ཡུལ་དྲན་པའི་རྟགས་ལས་ཡུལ་མྱོང་བ་འགྲུབ་ལ། སྔོན་པོ་ཉམས་སུ་མྱོང་བའི་ཤེས་པས་ཡོངས་སུ་བཅད་པའི་ཤེས་པ་གང་ཡིན་པ་དེ། ཕྱིས་ཀྱི་དྲན་པས་ཡོངས་སུ་མ་བཅད་པ་ཡང་མ་ཡིན་པས་ན་བདག་གིས་མཐོང་ངོ་ཞེས་ཡུལ་ཅན་དྲན་པའི་རྟགས་ལས་རང་མྱོང་བ་འགྲུབ་ཅེས་པ་སྟེ། གཞུང་འདིས་རང་ལུགས་ལ་མྱོང་དྲན་གཞན་དུ་མེད་པའི་རྒྱུ་མཚན་གྱིས་ཡུལ་མྱོང་ལས་ཡུལ་དྲན་སྐྱེ་བ་དང་། རང་མྱོང་ལས་རང་དྲན་སྐྱེ་བ་དྲན་པས་ཐ་སྙད་དུ་རང་རིག་ཞལ་གྱིས་བཞེས་པར་གྲུབ་བོ། །གཞན་དུ་ན། གང་ཉམས་སུ་མྱོང་བས་མྱོང་བ་དེ་ཞེས་དང་། ཉམས་སུ་མྱོང་བའི་ཤེས་པས་བཅད་པ་གང་ཡིན་པ་དེ་ཞེས་པའི་ཁྱད་པར་ལེགས་པར་སྨྲ་དགོས་སོ། །འདིར་ཁ་ཅིག མྱོང་བའི་ཡུལ་དང་དྲན་པའི་ཡུལ་གཞན་མ་ཡིན་པར་གསུངས་པ་རྒྱུ་མཚན་དུ་བྱས་ནས་དེ་གཉིས་ངོ་བོ་གཅིག་ཏུ་བྱས་འདུག་པ་ནི་འཁྲུལ་ཏེ། དེ་ལྟར་ན་དྲན་མྱོང་ལ་ཡང་དེར་ཐལ་བའི་ཕྱིར་རོ། །སློབ་དཔོན་འདིས་ཀུན་གཞི་དང་ཉོན་ཡིད་དང་། རང་རིག་སོགས་ལུང་ཚད་མ་ལས་བཤད་ཅིང་། བདེན་པར་ཡོད་མེད་གང་གིས་ཀྱང་ཁྱད་པར་དུ་མ་བྱས་པའི་ཐ་སྙད་ཀྱི་རང་ལྡོག་རྣམས་ནི་ཐ་སྙད་དུ་ཁས་ལེན་པ་ཡིན་ཞིང་དེ་དག་དཔྱད་ནས་འགོག་པ་ནི་དོན་དམ་གྱི་དབང་དུ་བྱས་པར་བཞེད་དོ། །ཁ་ཅིག་རྩ་ཤེས་དང་། རྩོད་བཟློག་དང་། ཚིགས་གསལ་ལས། རིགས་པས་དཔྱད་བཟོད་ཀྱི་རང་རིག་འགོག་པའི་ལུང་རྣམས་ཤེས་བྱེད་དུ་བྱས་ནས་རང་རིག་ཐ་སྙད་པ་འགོག་པ་ལ་སྦྱར་བ་ནི་ནོར་ཏེ། རྩ་ཤེས་ལས། རང་རིག་གི་དཔེ་མར་མེ་བཀོད་པ་ལ་དཔྱད་ནས་འགོག་པའི་ཚེ་མར་མེས་རང་གསལ་བ་བཀག་པ་བཞིན་དུ། མུན་པ་སེལ་བ་ཡང་བཀག་པས་ཐ་སྙད་དུ་མུན་པ་སེལ་བ་ཡང་མི་འཐད་པར་ཐལ་བའི་ཕྱིར་དང་། རྩོད་བཟློག་ལས། ཚད་མ་དེ་རང་གིས་གྲུབ་པ་བཀག་པའི་ཚེ་ཚད་མ་གཞན་གྱིས་གྲུབ་པ་ཡང་བཀག་པས་ཐ་སྙད་དུ་ཚད་མའི་ཡུལ་ཅན་གཏན་མེད་པར་ཐལ་བའི་ཕྱིར་དང་། ཚིག་གསལ་ལས། རང་རིག་མེད་པའི་ཤེས་བྱེད་དུ་མྱོང་བར་བྱ་བའི་སེམས་མི་རྙེད་པའི་མདོ་དྲངས་པས་ཐ་སྙད་དུ་མྱང་བྱའི་སེམས་ཉིད་ཀྱང་མེད་པར་ཐལ་བའི་ཕྱིར་རོ། །གལ་ཏེ་ལང་ཀར་གཤེགས་པ་ལས། ཇི་ལྟར་རལ་གྲིས་རང་གི་སོ། །གཅོད་པར་མི་བྱེད་སོར་མོ་ནི། །རང་ལ་རེག་པར་མི་བྱེད་ལྟར། །རང་རིག་སེམས་ཀྱང་དེ་བཞིན་ནོ། །ཞེས་གསུངས་པས། ཐ་སྙད་དུ་རང་རིག་ཡོད་ན་ཐ་སྙད་དུ་རལ་གྲིའི་སོ་རང་གིས་རང་གཅོད་པར་འགྱུར་རོ་སྙམ་ན་རིགས་པས་དཔྱད་པའི་གནས་སྐབས་ཀྱི་དཔེ་ལ་བརྟགས་པ་མཐའ་བཟུང་བ་མང་སྟེ། གཞན་དུ་ན་ཐ་སྙད་དུ་ནམ་མཁའི་པདྨོ་ཡོད་པར་ཐལ། འཕགས་པ་ལྷས། རྣམ་ཤེས་དམ་པའི་དོན་ལྡན་པ། །དེ་ཡང་བརྟན་རྣམས་མི་འདོད་དེ། །གཅིག་དང་དུ་མའི་རང་བཞིན་དང་། །བྲལ་ཕྱིར་ནམ་མཁའི་པད་མོ་བཞིན། །ཞེས་གསུངས་ཤིང་། ཐ་སྙད་དུ་གཅིག་དང་དུ་མ་ཡོད་པའི་ཕྱིར་རོ། །གལ་ཏེ་ཚུར་མཐོང་གི་མངོན་སུམ་དེ་རང་རིག་མངོན་སུམ་གྱི་ཡུལ་ཡིན་ན། དེ་མངོན་སུམ་མཚན་ཉིད་པར་འགྱུར་ཏེ། ཚིག་གསལ་ལས། མངོན་སུམ་གྱི་ཡུལ་མངོན་གསུམ་མཚན་ཉིད་པར་གསུངས་པའི་ཕྱིར། འདོད་ན་མངོན་སུམ་བཏགས་པ་བར་འགྱུར་ཏེ། མངོན་སུམ་གྱི་ཡུལ་ཅན་ཡིན་པའི་ཕྱིར་སྙམ་ན། ལུགས་འདི་ལ་མངོན་སུམ་བཏགས་པ་བ་དང་། མངོན་སུམ་མཚན་ཉིད་པ་མི་འགལ་ཏེ། འཇིག་རྟེན་ན་མངོན་སུམ་དུ་གྲགས་པ་དེ་ཉིད་འཇིག་རྟེན་ན་གྲགས་པའི་ཆ་ནས་མངོན་སུམ་མཚན་ཉིད་པར་འཇོག་ཅིང་མིང་གིས་བཏགས་པ་ཙམ་གྱི་ཆ་ནས་བཏགས་པ་བར་འཇོག་པའི་ཕྱིར། བཏགས་པ་བ་ཡིན་ན་མཚན་ཉིད་པ་ཡིན་པས་ནི་མ་ཁྱབ་སྟེ། མཚན་ཉིད་པ་འཇིག་རྟེན་ལྷན་སྐྱེས་ཀྱི་བློ་ངོར་ཐ་སྙད་མཐུན་པ་ལ་འཇོག་དགོས་པའི་ཕྱིར་རོ། །དབུ་མ་པའི་ལུགས་ཀྱི་མཚན་བཏགས་དང་དངོས་སྨྲ་བའི་ལུགས་ཀྱི་མཚན་བཏགས་ཕྱེད་པ་གལ་ཆེ་བར་སྣང་ངོ་། །བཞི་པ་ནི། དེ་ཕྱིར་སོགས་སོ། །གསུམ་པ་བསྒྲུབ་བྱེད་མེད་ཀྱང་གྲུབ་པ་དགག་པ་ནི། གལ་ཏེ་སོགས་སོ། །གསུམ་པ་དངོས་པོ་བརྟགས་པར་ཡོད་པའི་རྒྱུར་གྲུབ་པ་དགག་པ་ནི་གང་ཚེ་སོགས་ཏེ། རྣམ་རིག་པས་ཀུན་རྫོབ་རང་གི་ངོ་བོ་བདེན་པར་མི་འདོད་ཀྱང་དེ་འཇོག་པའི་རྒྱུ་གཞན་དབང་རྫས་གྲུབ་པ་རིགས་པས་དཔྱད་ནས་འཇོག་ཅིང་། དེ་རིགས་པས་དཔྱད་པའི་ཚེ་མི་རྙེད་པས་འཇིག་རྟེན་གྲགས་པའི་རྣམ་གཞག་བརླག་པར་བྱས་ཞེས་པ་སྟེ། དངོས་པོར་སྨྲ་བ་གསུམ་ཆར་ལ་ཡང་སྐྱོན་འདི་གནས་པ་ཉིད་དོ། །གཉིས་པ་བདེན་གཉིས་ཉམས་པའི་ཉེས་དམིགས་བརྗོད་པ་ནི། སློབ་དཔོན་སོགས་ཏེ་འགྲེལ་པར། འདིར་ཐ་སྙད་ཀྱི་བདེན་པ་བསྟན་པ་ནི་ཐབས་སུ་གྱུར་བ་སྟེ། ཇི་སྐད་དུ། ཡི་གེ་མེད་པའི་ཆོས་ལ་ནི། །ཉན་པ་གང་དང་སྟོན་པ་གང་། །འགྱུར་བ་མེད་ལ་སྒྲོ་བཏགས་པས། །འོན་ཀྱང་ཉན་ཅིང་སྟོན་པ་ཡིན། །ཞེས་གསུངས་སོ། །ཐ་སྙད་ཀྱི་བདེན་པ་ཁོ་ན་ལ་གནས་ཏེ་དོན་དམ་པ་སྟོན་པ་ཡིན་ལ། དོན་དམ་པ་བསྟན་པ་ཁོང་དུ་ཆུད་པ་ལས་ཀྱང་དོན་དམ་པར་འཐོབ་སྟེ། ཇི་སྐད་དུ་བསྟན་བཅོས་ལས། ཐ་སྙད་ལ་ནི་མ་བསྟེན་པར། །དམ་པའི་དོན་ནི་རྟོགས་མི་འགྱུར། །དམ་པའི་དོན་ནི་མ་རྟོགས་པར། །མྱ་ངན་འདས་པ་ཐོབ་མི་འགྱུར། །ཞེས་གསུངས་སོ། །དེ་ལ་དོན་དམ་པ་བསྟན་པ་ནི་ཐབས་ལས་བྱུང་བར་འགྱུར་ཅིང་འབྲས་བུར་གྱུར་པ་སྟེ། འབྲས་བུ་དང་། ཐོབ་པར་བྱ་བ་དང་། རྟོགས་པར་བྱ་བ་ཞེས་བྱ་བའི་དོན་ཏོ། །ཞེས་གསུངས་སོ། །གསུམ་པ་ཀུན་རྫོབ་ཉིད་ལ་མཚུངས་པ་སྤོང་བ་ལ་གཉིས་ཏེ། གཞན་དབང་རྫས་དང་ཀུན་རྫོབ་མཚུངས་མི་སྲིད། ཀུན་རྫོབ་འགོག་ན་འཇིག་རྟེན་ཉིད་ཀྱིས་གནོད་པའོ། །དང་པོ་ནི། ཇི་ལྟར་སོགས་སོ། །གཉིས་པ་ནི། གལ་ཏེ་སོགས་སོ། །གཉིས་པ་རྣམ་རིག་ཙམ་དུ་གསུངས་པའི་དགོངས་པ་བཤད་པ་ལ་བཞི་སྟེ། བྱེད་པོ་དོན་གཞན་བཀག་པའི་དོན་དུ་བཤད། སེམས་ཙམ་གཙོ་བོར་སྒྲུབ་པའི་དོན་དུ་བཤད། གཞན་དུ་རྟོགས་ན་ལུང་རིགས་གཉིས་ཀྱིས་གནོད། དེས་ན་གྲུབ་མཐའ་བླང་དོར་བྱ་བར་གདམས་པའོ། །དང་པོ་ལ་གསུམ་སྟེ། ལུང་གི་དོན་དངོས། ལུང་གཞན་གྱིས་བསྒྲུབ། ལུང་དེའི་དོན་བཤད་པའོ། །དང་པོ་ནི། མངོན་འགྱུར་སོགས་ཏེ། ཁྱོད་འཇིག་རྟེན་གྱི་གྲགས་པས་འཇིགས་ནས་ཀུན་རྫོབ་ཁས་བླངས་ན་ལུང་གིས་འཇིགས་ནས་སེམས་ཙམ་ཡང་ཁས་བླངས་དགོས་ཏེ། ཁམས་གསུམ་པོ་འདི་ནི་སེམས་ཙམ་མོ། །ཞེས་གསུངས་པའི་སོ་སྙམ་ན། ལུང་དེ་ནི་དགོངས་པ་ཅན་ཡིན་ལ། དགོངས་གཞི་ནི་ཁམས་གསུམ་གྱི་བྱེད་པ་པོ་ལ་སེམས་གཙོ་བོ་ཡིན་ཅེས་པའི་དོན་ཏོ། །གཉིས་པ་ནི། དེ་ཕྱིར་སོགས་ཏེ། ངག་གི་རང་བཞིན་གྱི་རྡོ་རྗེ་ནི། གང་ཟག་རྒྱུན་དང་ཕུང་པོ་དང་། །དེ་བཞིན་རྐྱེན་དང་རྡུལ་དག་དང་། །གཙོ་བོ་དབང་ཕྱུག་བྱེད་པོ་རྣམས། །སེམས་ཙམ་དུ་ནི་ངས་བཤད་དོ། །ཞེས་བྱ་བའོ། །གསུམ་པ་ནི་ཇི་བཞིན་སོགས་སོ། །གཉིས་པ་ལ་བཞི་སྟེ། སེམས་ཙམ་གཙོར་གྱུར་ལུང་དོན་ཡིན། གཞན་དུ་རྟོག་ན་ལུང་དང་འགལ། གཙོར་འགྱུར་བ་ཡི་སྒྲུབ་བྱེད་འགོད། ཙམ་སྒྲས་བཅད་པའི་དགག་བྱ་བཤད་པའོ། །དང་པོ་ནི། དེ་ཉིད་སོགས་ཏེ། དེ་ཁོ་ན་ཉིད་ལ་བློ་རྒྱས་པ་ལ་སངས་རྒྱས་ཞེས་ཚིགས་སྔ་མ་མི་མངོན་པར་བྱས་ནས་བཤད་དུ་ཡོད་པ་བཞིན་དུ། སེམས་ཙམ་གཙོ་བོར་གྱུར་པ་ལ་ཡང་ཁམས་གསུམ་པོ་སེམས་ཙམ་མོ་ཞེས་ཚིག་ཕྱི་མ་མི་མངོན་པར་ཤེས་པར་བྱའོ། །འོ་ན་སྔ་མ་དང་ཁྱད་པར་མི་སྣང་བས་འདིའི་སྔ་འགྲེལ་དུ་རྣམ་པ་གཞན་དུ་བཤད་པ་ལས་ཀྱང་། ཕྱི་རོལ་འཇོག་པ་མི་སྲིད་པར་བསྟན་པའི་ཕྱིར་བཤད་པ། ཞེས་གསུངས་པ་མི་འཐད་པར་འགྱུར་རོ་སྙམ་ན། དགག་བྱ་ལ་ཁྱད་པར་ཡོད་དེ། སྔ་མས་ནི་གཙོ་བོ་དང་དབང་ཕྱུག་སོགས་བྱེད་པ་པོ་ཡིན་པ་བཅད་ལ། འདིས་ནི་གཟུགས་སོགས་བྱེད་པ་པོའི་གཙོ་བོ་ཡིན་པ་བཅད་པའོ། །གཉིས་པ་ནི། གལ་ཏེ་སོགས་ཏེ། དེ་ལས་གཞན་དུ་སེམས་བདེན་པར་གྲུབ་པའི་དོན་ཡིན་ན་མདོ་སྡེ་ས་བཅུ་པ་དེ་ཉིད་ལས་མ་རིག་པ་དང་འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་ཞེས་གསུངས་པ་མི་འཐད་པར་འགྱུར་ཏེ། རྣམ་ཤེས་རང་གི་མཚན་ཉིད་ཀྱིས་གྲུབ་ན་རྐྱེན་ལ་ལྟོས་པ་མི་འཐད་པའི་ཕྱིར་རོ། །གསུམ་པ་ནི། སེམས་ཉིད་སོགས་སོ། །བཞི་པ་ནི། གལ་ཏེ་སོགས་སོ། །གསུམ་པ་ལ་གཉིས་ཏེ། རིགས་པས་གནོད། ལུང་གིས་གནོད་པའོ། །དང་པོ་ནི། འཇིག་རྟེན་སོགས་སོ། །གཉིས་པ་ནི། གཟུགས་མེད་སོགས་ཏེ། འདིར་ཁ་ཅིག་སེམས་ཙམ་པའི་ལུགས་ལ་གཟུགས་སྒྲ་སོགས་ཡོད་ཅིང་། ཕྱི་དོན་མེད་པར་འདོད་པ་ནི་མིང་ཙམ་སྟེ། གཞན་དུ་ན་སློབ་དཔོན་འདིས་སེམས་ཙམ་པའི་ཕྱོགས་སྔ་མ་ལོངས་པར་འགྱུར་བའི་ཕྱིར་རོ། །དགག་བསྒྲུབ་རྒྱས་པར་ནི་གཞན་དུ་བཤད་ཟིན་ཏོ། །བཞི་པ་ནི། བདེན་གཉིས་སོགས་སོ། །གསུམ་པ་སྒྲུབ་བྱེད་ལུང་གཞན་དང་དོན་ཉིད་དུ་བསྟན་པ་ལ་གསུམ་སྟེ། སེམས་ཙམ་གསུངས་པ་གཞན་ཡང་དྲང་དོན་ཡིན། དེ་ལ་ལུང་རིགས་གཉིས་ཀྱི་སྒྲུབ་བྱེད་འགོད། དྲང་ངེས་ཚུལ་འདི་གསུང་རབ་ཀུན་ལ་སྦྱར་བའོ། །དང་པོ་ནི། མདོ་སྡེ་སོགས་ཏེ། དེ་ལྟར་གསུངས་པ་ནི། ལང་ཀར་གཤེགས་པ་ལས། ཕྱི་རོལ་སྣང་བ་ཡོད་མེད་དེ། །སེམས་ནི་སྣ་ཚོགས་རྣམས་སུ་སྣང་། །ལུས་དང་ལོངས་སྤྱོད་གནས་འདྲ་བ། །སེམས་ཙམ་དུ་ནི་ངས་བཤད་དོ། །ཞེས་བྱ་བའོ། །གཉིས་པ་ལ་གཉིས་ཏེ། ལུང་གིས་གྲུབ། རིགས་པས་གྲུབ་པའོ། །དང་པོ་ནི། འདི་ནི་སོགས་ཏེ། འདིར་དྲང་དོན་དུ་བཤད་པར་བྱ་བའི་མདོ་སྡེ་ནི། བཅོམ་ལྡན་འདས་ཀྱི་དགོངས་པ་ངེས་པར་འགྲེལ་པའི་མདོ་ལས། རང་བཞིན་གསུམ་བསྟན་པ་ལས། བཏགས་པ་མེད་པ་ཉིད་དང་། གཞན་གྱི་དབང་ཡོད་པ་ཉིད་དང་། དེ་བཞིན་དུ་ལེན་པའི་རྣམ་པར་ཤེས་པ་ཟབ་ཅིང་ཕྲ། ཞེས་སོགས་དང་། ལང་དཀར་གཤེགས་པའི་མདོ་ལས། གོས་ཧྲུལ་གྱི་ནང་ན་རིན་པོ་ཆེ་རིན་ཐང་མེད་པ་གཏུམ་པ་ལྟར། སེམས་ཅན་གྱི་རྒྱུད་ལ་མཚན་སུམ་ཅུ་རྩ་གཉིས་དང་ལྡན་པའི་བདེ་བར་གཤེགས་པའི་སྙིང་པོ་ཡོད་པར་གསུངས་པ་རྣམས་ཡིན་ལ། དྲང་དོན་དུ་གསལ་བར་བྱེད་པའི་མདོ་ནི། ལང་ཀར་གཤེགས་པ་ལས། ཇི་ལྟར་ནད་པ་ནད་པ་ལ། །སྨན་པས་སྨན་རྣམས་གཏོང་བ་ལྟར། །དེ་བཞིན་སངས་རྒྱས་སེམས་ཅན་ལ། །སེམས་ཙམ་དུ་ཡང་རབ་ཏུ་གསུངས། །ཞེས་བྱ་བའོ། །འདིར་འགྲེལ་པར་དེ་བཞིན་གཤེགས་པའི་སྙིང་པོ་སེམས་ཙམ་པས་ངེས་དོན་དུ་འདོད་པ་དེ་ཉིད་དབུ་མ་པས་དྲང་དོན་དུ་འགྲེལ་པར་གསུངས་ཏེ། བདེ་གཤེགས་སྙིང་པོ་ཆོས་དབྱིངས་ལ་འདོད་པ་ནི་དབུ་སེམས་གཉིས་ཀ་འདྲ་སྟེ། མདོ་སྡེ་རྒྱན་ལས་ཀྱང་། དེ་བཞིན་ཉིད་ནི་ཐམས་ཅད་ལ། །ཁྱད་པར་མེད་ཀྱང་དག་གྱུར་པ། །དེ་བཞིན་གཤེགས་ཉིད་དེ་ཡི་ཕྱིར། །འགྲོ་ཀུན་དེ་ཡི་སྙིང་པོ་ཅན། །ཅེས་གསུངས་པས་སོ། །འོན་ཀྱང་རྒྱུ་དུས་ཀྱི་བདེ་གཤེགས་སྙིང་པོ་རང་བཞིན་གནས་རིགས་སུ་འདོད་མི་འདོད་དང་། སྒྲུབ་པའི་ཚུལ་གྱིས་ཡོད་པ་དོན་དམ་དུ་འདོད་མི་འདོད་ནི་མི་འདྲ་སྟེ། སེམས་ཙམ་པས་ཆོས་དབྱིངས་དང་བདེ་གཤེགས་སྙིང་པོ་སྒྲུབ་པའི་ཚུལ་གྱིས་ཡོད་པ་དོན་དམ་དུ་འདོད་པས། དེ་ལྟར་སྟོན་པའི་མདོ་ངེས་དོན་དུ་འགྲེལ་ལ། དབུ་མ་པས་དེ་དག་ནི་མཐའ་བཞི་ཆར་གྱི་སྤྲོས་པ་དང་བྲལ་བ་ཙམ་ཡིན་གྱི་སྒྲུབ་པའི་ཚུལ་གྱིས་རྒྱུ་དུས་དང་འབྲས་དུས་གང་ན་ཡང་མེད་པས་དེ་བཞིན་གཤེགས་པའི་སྙིང་པོའི་མདོ་དང་རྒྱུད་བླ་སོགས་ལས་སྒྲུབ་པའི་ཚུལ་གྱིས་ཡོད་པར་གསུངས་པ་ནི་དྲང་དོན་དུ་འགྲེལ་ཏེ། དེ་དག་སྒྲུབ་པའི་ཚུལ་གྱིས་ཡོད་པ་ནི་ཀུན་རྫོབ་བདེན་པ་ཡིན་པའི་ཕྱིར་ཞེས་བཞེད་པའོ། །སྒྲུབ་པའི་ཚུལ་གྱིས་ཡོད་པའི་དགོངས་གཞི་སྤྲོས་བྲལ་དང་དགོས་པ་སྐྱོན་ལྔ་སྤོང་བ་དང་། དངོས་ལ་གནོད་བྱེད་ཐ་སྙད་དུ་སྒྲུབ་པའི་ཚུལ་གྱིས་ཡོད་པ་ལ་ནི་མི་འཆད་ཅིང་། དོན་དམ་དུ་ཡོད་ན་མུ་སྟེགས་པའི་བདག་དང་མཚུངས་པ་སོགས་ས་སྐྱ་པཎྜི་ཏས་གསལ་བར་གསུངས་པ་ནི། མདོ་སྡེ་དང་བསྟན་བཅོས་དྲི་མ་མེད་པའི་དགོངས་པའོ། །འདིའི་ཤེས་བྱེད་རྒྱུད་བླར། དགེ་འདུན་དཀོན་མཆོག་གི་མཚན་ཉིད་འཆད་པ་ན། བདག་གཉིས་ཞི་བར་རྟོགས་པས་ཇི་ལྟ་བ་རྟོགས་པ་དང་། ཐམས་ཅད་མཁྱེན་པའི་ཆོས་ཉིད་སེམས་ཅན་གྱི་རྒྱུད་ལ་ཡོད་པར་རྟོགས་པས་ཇི་སྙེད་པ་རྟོགས་པར་གསུངས་པ་ཉིད་ཡིན་ཏེ། ཆོས་ཉིད་དང་། བདེ་གཤེགས་སྙིང་པོ་རང་གི་ངོ་བོ་ཀུན་རྫོབ་བདེན་པ་མིན་ཀྱང་། དེ་བསྒྲུབ་པའི་ཚུལ་གྱིས་ཡོད་པ་ཀུན་རྫོབ་བདེན་པ་ཡིན་ཅེས་པ་སྟེ། ད་དུང་ཕྱོགས་སྔ་མ་ལོངས་པར་དགག་སྒྲུབ་བྱེད་པའི་བློ་གྲོས་རྩིང་པོ་དག་གིས་ངོ་ཚ་མེད་པའི་གཏམ་མ་སྨྲ་ཤིག གཉིས་པ་ནི། ཤེས་བྱ་སོགས་སོ། །གསུམ་པ་ནི། དེ་ལྟར་སོགས་ཏེ། ཏིང་ངེ་འཛིན་རྒྱལ་པོ་ལས། སྟོང་པ་བདེ་བར་གཤེགས་པས་བཤད་པ་ལྟར། །ངེས་དོན་མདོ་སྡེ་དག་གི་བྱེ་བྲག་ཤེས། །གང་ལས་གང་ཟག་སེམས་ཅན་སྐྱེས་བུ་བསྟན། །ཆོས་དེ་ཐམས་ཅད་དྲང་བའི་དོན་དུ་ཤེས། །ཞེས་གསུངས་སོ། །ལུང་འདི་ལ་བརྟེན་ནས་དྲང་དོན་དང་། ངེས་དོན་གྱི་མདོའི་ཁྱད་པར་ཕྱེ་བཞིན་དུ། དྲང་དོན་དུ་གསུངས་པའི་མདོའི་བརྗོད་བྱ་ཐ་སྙད་དུ་ཡང་མེད་པར་འདོད་པ་ནི་རྣམ་དཔྱོད་མཛངས་པའི་གཉེན་དང་བྲལ་ཞིང་། མཁས་རློམ་གྱི་བུ་རྫ་གཏིབ་ཏུ་སྐྱེས་པའོ། །གསུམ་པ་གཉིས་ཀ་ལས་སྐྱེས་པ་དགག་པ་ལ་གཉིས་ཏེ། ཕྱོགས་སྔ་མ་བརྗོད་པ་དང་། དེ་དགག་པའོ། །དང་པོ་ནི། ཚིགས་འགལ་གཉིས་སུ་སྨྲ་བ་གཅེར་བུ་པ་རྣམས་ནི། སྔར་གྱི་རིགས་པ་དེ་དག་གིས་ཁོ་བོ་ཅག་ལ་གནོད་པར་བྱེད་པ་མིན་ཏེ། ཁོ་བོ་ཅག་བདག་ཁོ་ན་ལས་སྐྱེ་བ་དང་། གཞན་ཁོ་ན་ལས་སྐྱེ་བར་ཁས་མ་བླངས་པའི་ཕྱིར་རོ། །དེས་ན་བདག་གཞན་གཉིས་ཀ་ལས་སྐྱེ་སྟེ། བུམ་པ་འཇིམ་པ་ལས་གཞན་མ་ཡིན་པས་བདག་ལས་ཀྱང་སྐྱེ་ལ། རྫ་མཁན་སོགས་ལས་གཞན་ཡིན་པས། གཞན་ལས་ཀྱང་སྐྱེ་བའི་ཕྱིར་རོ། །ཕྱི་རོལ་ཇི་ལྟ་བ་བཞིན་དུ་ནང་ལ་ཡང་ཡིན་ཏེ། བྱམས་པ་ཚེ་རབས་གཞན་དུ་སྲོག་གི་བདག་ཉིད་དུ་ཡོད་པ་ཁོ་ན་ལས་སྐྱེ་བས། བདག་ལས་ཀྱང་སྐྱེ་ལ། ཕ་མ་དང་། ཆོས་དང་། ཆོས་མ་ཡིན་པ་དང་། ཟག་པ་སོགས་ལས་སྐྱེ་བས། གཞན་ལས་ཀྱང་སྐྱེ་བའི་ཕྱིར་རོ་ཞེ་ན། གཉིས་པ་ལ་གཉིས་ཏེ། རིགས་པ་སྔ་མས་ཁེགས། རིགས་པ་གཞན་གྱིས་དགག་པའོ། །དང་པོ་ལ་གཉིས་ཏེ། སྐྱེ་བ་གཉིས་ལ་ལྟོས་པའི་རིགས་པས་ཁེགས། བདེན་པ་གཉིས་ལ་ལྟོས་པའི་རིགས་པས་ཁེགས་པའོ། །དང་པོ་ནི། གཉིས་ལས་སོགས་སོ། །གཉིས་པ་ནི། འདི་ན་སོགས་སོ། །གཉིས་པ་ནི། གང་ཕྱིར་སོགས་ཏེ། འདིའི་སྔ་འགྲེལ་དུ། སྔར་བཤད་པའི་རིགས་པ་ཁོ་ནས་གཉིས་ཀའི་ཕྱོགས་ལ་ཡང་གཉིས་ཀ་ལས་སྐྱེ་བ་མི་རིགས་པ་འབའ་ཞིག་ཏུ་མ་ཟད་ཀྱི། འདིར་བཤད་པས་ཀྱང་ཡིན་ནོ་ཞེས་བསྟན་པའི་ཕྱིར་བཤད་པ་ཞེས་བཤད་དོ། །བཞི་པ་རྒྱུ་མེད་པར་སྐྱེ་བ་དགག་པ་ལ་གཉིས་ཏེ། ཕྱོགས་སྔ་མ་བརྗོད་པ་དང་། དེ་དགག་པའོ། །དང་པོ་ནི། རང་བཞིན་རྒྱུ་སྨྲ་བ་རྒྱང་འཕེན་པ་ན་རེ། གལ་ཏེ་སྐྱེ་བ་རྒྱུ་ལས་ཡིན་ན་ནི་ཇི་སྐད་བཤད་པའི་ཕྱོགས་གསུམ་གྱི་ཉེས་པར་འགྱུར་བ་ཞིག་ན། བདག་གིས་ནི་རྒྱུ་ཁས་མ་བླངས་པས་བཤད་ཟིན་པའི་ཉེས་པའི་གོ་སྐབས་མེད་དོ། །དེས་ན་དངོས་པོ་རྣམས་རང་བཞིན་ལས་སྐྱེ་བ་ཡིན་ཏེ། པདྨའི་འདབ་མའི་འཇམ་པ་དང་། ཟེའུ་འབྲུའི་ཁ་དོག་དང་དབྱིབས་ལ་སོགས་པ་འགའ་ཞིག་གིས་འབད་ནས་བྱེད་པར་མ་མཐོང་བའི་ཕྱིར་དང་། ཕྱི་རོལ་ཇི་ལྟ་བ་བཞིན་དུ་ནང་ན་ཡང་རྨ་བྱ་དང་། བྱ་ཏི་ཏི་རེ་དང་། བྱ་གག་ལ་སོགས་པ་དག་འགའ་ཞིག་གིས་འབད་པས་བཟུང་ནས། ཁ་དོག་དང་དབྱིབས་ལ་སོགས་པ་འགོད་པར་མ་དམིགས་པ་ཉིད་དོ་ཞེས་སྨྲའོ། །གཉིས་པ་ལ་གཉིས་ཏེ། ངོ་བོ་ཉིད་ལས་སྐྱེ་བ་དགག འབྱུང་བའི་རྒྱུ་ལས་སྐྱེ་བ་དགག་པའོ། །དང་པོ་ལ་གཉིས་ཏེ། རིགས་པ་དང་འགལ་བ་དང་། མཐོང་བ་དང་འགལ་བའོ། །དང་པོ་ནི། གལ་ཏེ་སོགས་སོ། །གཉིས་པ་ནི། འབྲས་བུ་སོགས་སོ། །གཉིས་པ་ལ་གསུམ་སྟེ། འཇིག་རྟེན་ཕ་རོལ་རྟོགས་པའི་ནུས་པ་མེད་པར་བསྟན། ལྟ་བ་ཕྱིན་ཅི་ལོག་ཏུ་སྒྲུབ་པའི་གཏན་ཚིགས་དགོད། གཏན་ཚིགས་དེ་ཡི་དཔེ་ལ་རྩོད་པ་སྤང་བའོ། །དང་པོ་ནི། འབྱུང་བ་སོགས་སོ། །གཉིས་པ་ནི། འཇིག་རྟེན་སོགས་སོ། །གསུམ་པ་ནི། འབྱུང་བ་སོགས་ཏེ། འགྲེལ་པར། དེ་བཞིན་དུ་ཐམས་ཅད་མཁྱེན་པ་ལ་སྐུར་བ་འདེབས་པ་དང་། དངོས་པོ་ཡོད་པ་ཉིད་དུ་སྨྲ་བ་དང་། དངོས་པོ་མེད་པ་ཉིད་དུ་སྨྲ་བ་དང་། དབང་ཕྱུག་དང་། དུས་དང་། རྡུལ་དང་། རང་བཞིན་དང་། ངོ་བོ་ཉིད་སྨྲ་བ་རྣམས་དང་། དེ་དག་ལས་གཞན་པ་རྣམས་ལ་ཡང་རང་གིས་ཇི་ལྟ་བུ་ཡིན་པ་སྨྲ་བ་ན་རྟོགས་པ་ཕྱིན་ཅི་ལོག་ཉིད་སྦྱར་བར་བྱའོ། །འདི་ལྟ་སྟེ། རྫོགས་པའི་སངས་རྒྱས་འགོག་པར་བྱེད་པའི་དུས་སུ་བདག་ཉིད་ནི། །ཤེས་བྱའི་རང་བཞིན་ཕྱིན་ཅི་ལོག་ཏུ་ལྟ་བར་རྟོགས་བྱ་སྟེ། །དེ་ཡི་ལྟ་བའི་རྣམ་པའི་རྟེན་མཚུངས་ལུས་དང་ལྡན་ཉིད་ཕྱིར། །གང་ཚེ་འབྱུང་བའི་བདག་ཉིད་ཡོད་ཉིད་ཁས་ལེན་དེ་ཚེ་བཞིན། །ཞེས་བྱ་བ་ལ་སོགས་པ་སྦྱར་བར་བྱ་སྟེ། ཡོད་པ་དང་མེད་པ་ཉིད་དུ་ལྟ་བ་ཐམས་ཅད་དགག་པར་འདོད་པའི་ཕྱིར་རོ། །ཁོ་བོ་ཅག་ལ་ནི་གནས་སྐབས་འགར་ཡང་མི་འདོད་པ་འཐོབ་པ་ཡོད་པ་མ་ཡིན་ཏེ། དེའི་ཕྱིར་མཁས་པས་ཡོངས་སུ་བསྒྱུར་བ་ཚིགས་སུ་བཅད་པ་འདི་ཉིད་ཀྱིས་གཞན་གྱིས་ཡོངས་སུ་བརྟགས་པའི་ཕྱོགས་མ་ལུས་པ་བསལ་བར་ངེས་པར་བྱ་སྟེ། རྟོག་པའི་དྲྭ་བ་མ་ལུས་པ་བཀག་པས་དོན་དམ་པའི་ཡེ་ཤེས་གྲུབ་པར་མངོན་པར་འདོད་པའི་ཕྱིར། ཅི་སྟེ་ཁྱོད་ལའང་ཐལ་བར་འགྱུར་བ་འདི་མཚུངས་སོ་སྙམ་ན། དེའང་ཡོད་པ་མ་ཡིན་ཏེ། ཁོ་བོ་ཅག་ཕྱིན་ཅི་ལོག་པར་བསྒྲུབ་པ་ལ་དཔེ་མེད་པའི་ཕྱིར་རོ། །འཇིག་རྟེན་གཞན་རྟོགས་ཡོད་པ་ཉིད་དུ་རྟོགས་པའི་དུས་སུ་བདག །ཤེས་བྱའི་རང་བཞིན་དམ་པའི་དོན་ནི་ལྟ་བར་རྟོགས་བྱ་སྟེ། །བདག་གི་ལྟ་བའི་རྣམ་པའི་རྟེན་མཚུངས་ལུས་དང་ལྡན་ཉིད་ཕྱིར། །གང་གི་ཚེ་ནི་བདག་མེད་རྟོགས་པར་ཁས་ལེན་དེ་ཚེ་བཞིན། །ཞེས་བྱ་བར་བརྗོད་པར་ནུས་པ་ཡང་ཡིན་ནོ། །དེ་བཞིན་དུ་འདི་ན་ཐམས་ཅད་མཁྱེན་པ་ཡོད་ཅེས་རྟོགས་པའི་དུས་སུ་བདག །ཤེས་བྱའི་རང་བཞིན་དམ་པའི་དོན་ནི་ལྟ་བར་རྟོགས་བྱ་སྟེ། །གཏན་ཚིགས་དང་དཔེ་དག་ནི་དེ་གཉིས་ཁོ་ནའོ། །དེ་བཞིན་དུ་དངོས་པོ་ཐམས་ཅད་ངེས་པ་ལ་ཡང་སྦྱར་བར་བྱའོ། །དེའི་ཕྱིར་ཚུལ་འདིས་ནི། དེ་ཉིད་དེ་ལས་འབྱུང་མིན་གཞན་དག་ལས་ལྟ་ག་ལ་ཞིག །གཉིས་ཀ་ལས་ཀྱང་མ་ཡིན་རྒྱུ་མེད་པར་ནི་ག་ལ་ཡོད། །ཞེས་གང་དམ་བཅས་པར་གྱུར་པ་དེ་རབ་ཏུ་བསྒྲུབས་པ་ཡིན་ནོ། །ཞེས་གསུངས་སོ། །གསུམ་པ་ཚུལ་དེས་གྲུབ་པའི་དོན་ནི། གང་གི་སོགས་ཏེ། རྡོ་རྗེ་གཟེགས་མའི་གཏན་ཚིགས་འདི་ལྟར་འགོད་པ་ནི་ཐལ་རང་གཉིས་ཀ་མཐུན་ཀྱང་གཞན་ལ་གྲགས་ཀྱི་གཏན་ཚིགས་དང་། རང་རྒྱུད་ཀྱི་གཏན་ཚིགས་སུ་འདོད་པ་ནི་ཁྱད་པར་རོ། །གཉིས་པ་རང་གཞན་སྡེ་པའི་རྩོད་པ་སྤོང་བ་ལ་གཉིས་ཏེ། བྱིས་པས་མཐོང་བའི་དོན་དང་འགལ་བ་སྤོང་། ཐ་སྙད་དུ་ཡང་མེད་པར་ཐལ་བ་སྤོང་བའོ། །དང་པོ་ནི། གང་གིས་སོགས་ཏེ། སྔ་འགྲེལ་དུ་འདི་སྨྲས་པ། གལ་ཏེ་དངོས་པོ་རྣམས་ཀྱི་རང་བཞིན་སྐྱེ་བ་མེད་པ་ཡིན་ན། འོ་ན་མ་སྐྱེས་པ་སྔོན་པོ་ལ་སོགས་པ་རྣམས་ཇི་ལྟར་བཟུང་ཞེ་ན། བཤད་པ་སྔོན་པོ་ལ་སོགས་པའི་རང་བཞིན་ནི་ཇི་ལྟར་ཡང་འགའ་ཞིག་ཡུལ་ཉིད་དུ་འགྱུར་བ་མ་ཡིན་པས། སྔོན་པོ་ལ་སོགས་པ་རྣམས་ཀྱི་རང་བཞིན་བཟུང་བ་མ་ཡིན་ནོ་ཞེས་གསུངས་སོ། །གཉིས་པ་ལ་གཉིས་ཏེ། རྩོད་པ་དང་ལན་ནོ། །དང་པོ་ནི། གལ་ཏེ་སོགས་སོ། །གཉིས་པ་ལ་གསུམ་སྟེ་ཐལ་བའི་ཁྱབ་པ་ལོག་པའི་ཀུན་རྫོབ་ཀྱིས་མ་ངེས། རང་རྒྱུད་བསྒྲུབ་བྱ་ལུང་དང་རིགས་པ་གཉིས་ཀྱིས་ཁེགས། དཔེ་ལ་རང་སྡེ་རང་ལ་གྲགས་པའི་དཔེ་ཡིས་གནོད་པའོ། །དང་པོ་ནི། གང་དག་སོགས་སོ། །གཉིས་པ་ནི་མོ་གཤམ་སོགས་ཏེ། བཅོམ་ལྡན་འདས་ལ་སྒྲིབ་པ་ཐམས་ཅད་རྣམ་པར་སེལ་བས་བསྟོད་པ་ལས། ཆོས་ཀྱི་འཁོར་ལོ་བསྐོར་བ་ན། །གདོད་ནས་ཞི་ཞིང་མ་སྐྱེས་པ། །རང་བཞིན་མྱ་ངན་འདས་པ་ཡི། །ཆོས་རྣམས་མགོན་པོ་ཁྱོད་ཀྱིས་བསྟན། །ཅེས་གསུངས་སོ། །གསུམ་པ་ནི། བུམ་སོགས་སོགས་སོ། །གཉིས་པ་རྟེན་འབྲེལ་བརྟེན་ལས་འབྱུང་བའི་སྐྱེ་བའི་དོན་དུ་བཤད་པ་ནི། གང་ཕྱིར་སོགས་ཏེ། གལ་ཏེ་མཐའ་བཞིར་སྐྱེ་བ་མེད་ན། ས་བོན་ལས་མྱུ་གུ་དང་། མ་རིག་པ་ལས་འདུ་བྱེད་སོགས་སྐྱེ་བ་ཇི་ལྟར་ཞེ་ན། རྒྱུ་འདི་ལ་བརྟེན་ནས་འབྲས་བུ་འདི་འབྱུང་བ་ཙམ་ཞིག་སྟེ། མདོ་ལས། འདི་ལྟ་སྟེ། འདི་ཡོད་ན་འདི་འབྱུང་། འདི་སྐྱེས་པས་འདི་སྐྱེས་ཏེ། གང་དེ་མ་རིག་པའི་རྐྱེན་གྱིས་འདུ་བྱེད་རྣམས་ཞེས་བྱ་བ་ལ་སོགས་པ་དང་། འདི་ཡོད་པས་ན་འདི་འབྱུང་བར་ཞེས་སོགས་དང་། བྱེད་པོ་ལས་ལ་བརྟེན་བྱ་ཞིང་ཞེས་སོགས་ཀྱི་བསྟན་པའི་དོན་རྐྱེན་ཉིད་འདི་པ་ཙམ་གྱི་སྐྱེ་བ་ཡོད་པའོ། །གསུམ་པ་མཐའ་གཉིས་སྤངས་པའི་རྟེན་འབྱུང་རྟོགས་པའི་ཕན་ཡོན་བཤད་པ་ལ་བཞི་སྟེ། རྟེན་འབྲེལ་རིགས་པས་ལྟ་ངན་དྲྭ་བ་གཅོད། རྟེན་འབྲེལ་རྟོགས་པས་རྟོག་པ་མ་ལུས་ལྡོག རྟོག་རྣམས་ལོག་པར་དཔྱད་པའི་འབྲས་བུ་བསྟན། དེས་ན་ཆགས་སྡང་སྤངས་ཏེ་དཔྱད་པར་གདམས་པའོ། །དང་པོ་ནི། གང་ཕྱིར་སོགས་སོ། །གཉིས་པ་ནི། རྟོགས་རྣམས་ཞེས་སོགས་སོ། །གསུམ་པ་ནི། སོ་སོའི་སོགས་ཏེ། འགྲེལ་པར། དེའི་ཕྱིར་རྟོག་པ་མ་ལུས་པ་བཀག་པ་ཉིད་སློབ་དཔོན་གྱིས་དབུ་མའི་བསྟན་བཅོས་ལས་བཤད་པའི་རྣམ་པར་དཔྱོད་པའི་འབྲས་བུར་རྣམ་པར་གཞག་གོ་ཞེས་གསུངས་སོ། །བཞི་པ་ནི། རང་གི་སོགས་སོ། །གཉིས་པ་རྟེན་འབྲེལ་གང་ཟག་བདག་མེད་སྒོ་ནས་བཤད་པ་ལ་གཉིས་ཏེ། བདག་ལྟའི་ཞེན་ཡུལ་འགོག་པའི་དགོས་པ་བསྟན། དགོས་པ་ཅན་གྱི་འགོག་བྱེད་རིགས་པ་བཤད་པའོ། །དང་པོ་ནི། ཉོན་མོངས་སོགས་ཏེ། འདིར་འཇིག་ཚོགས་ལ་ལྟ་བ་ནི་ཕུང་པོ་དམིགས་ཡུལ་དུ་བྱས་པ་སྔོན་དུ་སོང་བ་ལ་བརྟེན་ནས་གཞི་མེད་ལ་ངའོ་སྙམ་དུ་གཟུང་བའི་ངར་འཛིན་ལྷན་སྐྱེས་ཡིན་ལ། དེ་ཉིད་འདིར་ཤེས་རབ་ཉོན་མོངས་ཅན་དུ་བཤད་དོ། །དེ་ཉིད་བཀག་པ་ལ་དེའི་ཞེན་ཡུལ་ང་ཙམ་རིགས་པས་དཔྱད་ནས་འགོག་པ་ཡིན་གྱི། ཐ་སྙད་དུ་འགོག་པ་ནི་མ་ཡིན་ནོ། །འོ་ན་འོག་ནས་ཀུན་བཏགས་ཀྱི་བདག་འགོག་པའི་རིགས་པ་ཁོ་ན་གསུངས་པས་ལྷན་སྐྱེས་ཀྱི་བདག་འགོག་པར་ཇི་ལྟར་འགྱུར་སྙམ་ན། འདི་ལ་གྲུབ་མཐས་བློ་མ་བསྒྱུར་བའི་གདུལ་བྱ་སྐལ་ལྡན་རྣམས་ལ་ནི་ལྷན་སྐྱེས་ཀྱི་ཞེན་ཡུལ་དུ་གྱུར་པའི་ང་ཙམ་དེ་ཉིད་ཕུང་པོ་དང་གཅིག་དང་ཐ་དད་སོགས་གང་དུ་གྲུབ་རིགས་པས་བཙལ་བའི་ཚེ་མ་རྙེད་པའི་ཚུལ་གྱིས་འགོག་པ་སྟེ། རིན་ཆེན་ཕྲེང་བ་དང་སྤྱོད་འཇུག་ལས་གསུངས་པ་ལྟར་རོ། །འདིར་ནི་གྲུབ་མཐས་བློ་བསྒྱུར་བ་རྣམས་ལྷན་སྐྱེས་ཀྱི་ཞེན་ཡུལ་དུ་གྱུར་པའི་ང་ཙམ་དེ་ཉིད་རྫས་སུ་ཡོད་པའི་སྒྲུབ་བྱེད་དུ་ཕུང་པོ་དང་གཅིག་དང་ཐ་དད་སོགས་ཀུན་བཏགས་ཀྱི་བདག་རྣམས་བཀོད་པའི་རིགས་པ་བཀག་པས་སྒྲུབ་བྱེད་ལ་གནོད་པ་མཐོང་ན་བསྒྲུབ་བྱ་འཛིན་པའི་བློ་བཟློག་པ་རིགས་པ་སྨྲ་བ་རྣམས་ཀྱི་སྤྱི་ལུགས་ཡིན་པར་རོང་སྟོན་ཆོས་རྗེ་བཞེད་པ་སྐབས་འདིར་གནད་དུ་དགོས་པར་སྣང་སྟེ། གཞན་དུ་ན་མཐའ་བཞིའི་སྐྱེ་བ་བཀག་པས་བདེན་འཛིན་ལྷན་སྐྱེས་ཀྱི་ཡུལ་དུ་གྱུར་བའི་སྐྱེ་བ་མི་ཁེགས་པར་ཐལ་ལོ་ཞེས་གསུངས་པའང་སྙིང་ལ་འབབ་པའི་གཏམ་མོ། །གཉིས་པ་ལ་གསུམ་སྟེ། གང་ཟག་རྫས་ཡོད་རིགས་པས་དཔྱད་ནས་དགག བརྟེན་ནས་བཏགས་པའི་གང་ཟག་རྣམ་པར་གཞག རིགས་པའི་ཚུལ་དེ་དངོས་པོ་ཀུན་ལ་བསྒྲེ་བའོ། །དང་པོ་ལ་གཉིས་ཏེ། གང་ཟག་རྣམ་ལྔར་གྲུབ་པ་དགག བརྗོད་དུ་མེད་པའི་གང་ཟག་དགག་པའོ། །དང་པོ་ལ་གཉིས་ཏེ། འགོག་བྱེད་རིགས་པ་རྒྱས་པར་བཤད། བསྡུས་ཏེ་འཇིག་ལྟའི་དྲང་ངེས་བཤད་པའོ། །དང་པོ་ལ་བཞི་སྟེ། བདག་ཕུང་གཞན་དུ་གྲུབ་པ་དགག བདག་ཕུང་གཅིག་ཏུ་གྲུབ་པ་དགག རྟེན་དང་བརྟེན་པར་གྲུབ་པ་དགག བདག་ལ་ཕུང་པོ་ལྡན་པ་དགག་པའོ། །དང་པོ་ལ་གཉིས་ཏེ། འདོད་པ་བརྗོད། སུན་འབྱིན་བཤད་པའོ། །དང་པོ་ནི། ཟ་པོ་སོགས་ཏེ། མུ་སྟེགས་གྲངས་ཅན་པ་རྣམས་ནི་ངར་འཛིན་ལྷན་སྐྱེས་ཀྱི་དམིགས་ཡུལ་དུ་གྱུར་པའི་བདག་དེ་རྣམ་སྨིན་ཟ་བ་པོ་དང་། རྟགས་པའི་དངོས་པོ་དང་། ལས་བྱེད་པ་པོ་མིན་པ་དང་། བདེ་སྡུག་ལ་སོགས་པའི་ཡོན་ཏན་མེད་པ་དང་། བརྐྱང་བསྐུམ་ལ་སོགས་པའི་བྱ་བ་མེད་པ་སྟེ་ཁྱད་པར་ལྔ་ལྡན་དུ་བཏགས་ཏེ། འདིའི་སྔ་འགྲེལ་དུ། འཇིག་ཚོགས་ལ་ལྟ་བའི་དམིགས་པ་བདག་དེ་ཅི་ཞིག དེ་ཉིད་མི་ཤེས་སོ་ཞེ་ན། དེ་ལ་རེ་ཞིག་ཅེས་གསུངས་པས་སོ། །དེས་ན་ཀུན་བཏགས་ཀྱི་བདག་འཛིན་མ་སྐྱེས་པའི་གོང་དུ་གང་ཟག་དེ་ཉིད་ཀྱི་ངོར་ཡང་ལྷན་སྐྱེས་ཀྱི་བདག་འཛིན་གྱི་ཡུལ་གྱི་བདག་ཁོ་ན་ཡིན་ལ། དེ་སྐྱེས་ནས་བཏགས་པ་པོ་ཁོ་རང་གི་ལུགས་ལ་ལྷན་སྐྱེས་ཀྱི་ཡུལ་གྱི་བདག་དེ་ཉིད་ཀུན་བཏགས་ཀྱིས་ཇི་ལྟར་བཏགས་པ་ལྟར་ཡིན་པས། དེ་གཉིས་གཅིག་ཏུ་འདོད་ཀྱང་། སློབ་དཔོན་འདིས་རིགས་པས་དཔྱད་པའི་ཚེ། ཁྱོད་ཀྱིས་འདོད་པའི་བདག་དེ་ནི་ལྷན་སྐྱེས་ཀྱི་དམིགས་ཡུལ་དུ་གྱུར་པའི་བདག་མ་ཡིན་ཏེ། ཐ་སྙད་དུ་ཡང་མེད་པའི་ཕྱིར་དང་། ལས་བྱེད་པ་པོ་དང་རྣམ་སྨིན་མྱོང་བ་པོ་མ་ཡིན་པའི་ཕྱིར་ཞེས་སོགས་ཀྱི་རིགས་པས་དེ་གཉིས་གཅིག་ཡིན་པ་བཀག་ནས་ལྷན་སྐྱེས་ཀྱི་བདག་ཐ་སྙད་དུ་ཡོད་པ་དང་། ཀུན་བཏགས་ཀྱི་བདག་ཐ་སྙད་དུ་ཡང་མེད་པར་བཞེད་དོ། །གྲངས་ཅན་གྱིས་བདག་ཁས་བླངས་བ་དེ་བཞིན་དུ་བདག་དེའི་ཁྱད་ཆོས་ཀྱི་དབྱེ་བ་ཅུང་ཟད་ཅུང་ཟད་ལ་བརྟེན་ནས་མུ་སྟེགས་ཅན་རྣམས་ཀྱི་ལུགས་ཐ་དད་པར་འགྱུར་ཏེ། བྱེ་བྲག་པས་བདག་ནི་བློ་དང་། བདེ་བ་དང་། སྡུག་བསྔལ་དང་། འདོད་པ་དང་། སྡང་བ་དང་། འབད་པ་དང་། ཆོས་དང་། ཆོས་མ་ཡིན་པ་དང་། བྱས་པའི་ཤུགས་ཏེ། ཡོན་ཏན་དགུ་ལྡན་དུ་སྨྲ་ལ། ཡོན་ཏན་དང་པོ་དེ་དག་ཇི་སྲིད་དུ་བདག་ལ་འདུ་ཞིང་ཡོད་པ་དེ་སྲིད་དུ་དེ་དག་གི་སྦྱར་བའི་དགེ་བ་དང་། མི་དགེ་བའི་ལས་བསྒྲུབ་པའི་ཕྱིར་འཁོར་བར་འགྱུར་ལ། གང་གི་ཚེ་སྐྱེས་བུ་ཡང་དག་པར་རྟོགས་པའི་ཤེས་པས་ཡོན་ཏན་རྣམས་རྩ་བ་ནས་གཅོད་པའི་ཚེ་རང་གི་བདག་ཉིད་ལ་གནས་ཤིང་ཐར་པར་འགྱུར་རོ། །བདག་དེའི་ཁྱད་པར་རྟག་དངོས་སོགས་གསུམ་ནི་སྔ་མ་དང་འདྲ་ལ། ལས་བྱེད་པ་པོ་དང་། ཡོན་ཏན་དང་བཅས་པར་འདོད་པའི་ཁྱད་པར་རོ། །བྱེ་བྲག་པའི་ནང་ཚན་ཁ་ཅིག་བརྐྱང་བསྐུམ་ལ་སོགས་པའི་བྱ་བ་དང་བཅས་པར་ཁས་ལེན་ཏོ། །རིག་བྱེད་དུ་སྨྲ་བ་དག་ནི་བུམ་པ་ལ་སོགས་པའི་ནམ་མཁའ་ལྟར་ལུས་ཐ་དད་པ་གཅིག་སྣ་ཚོགས་པ་ཉིད་དོ་ཞེས་བྱ་བ་ལ་སོགས་པར་ཁས་ལེན་ཏོ། །གཉིས་པ་ལ་གསུམ་སྟེ། ངོ་བོ་ཁྱད་པར་གཞན་གྲགས་རྟགས་ཀྱིས་དགག ཕུང་པོ་ལས་གཞན་མ་དམིགས་རྟགས་ཀྱི་དགག ངར་འཛིན་དམིགས་པ་བཀག་སྟེ་མཇུག་སྡུད་བསྟན་པའོ། །དང་པོ་ལ་གཉིས་ཏེ། ངོ་བོ་དགག ཁྱད་པར་དགག་པའོ། །དང་པོ་ནི། མོ་གཤམ་སོགས་ཏེ། ཀུན་བཏགས་ཀྱི་བདག་སྔར་བཤད་པ་རྣམས་ཆོས་ཅན་དུ་བཟུང་ནས་དེ་ཁོ་ན་ཉིད་དུ་ཡོད་པ་དང་། ངར་འཛིན་ལྷན་སྐྱེས་ཀྱི་རྟེན་ཡིན་པ་དང་། ཐ་སྙད་དུ་ཡོད་པ་གསུམ་འགོག་པ་ལ་མུ་སྟེགས་རང་ལ་གྲགས་པའི་མ་སྐྱེས་པའི་གཏན་ཚིགས་བཀོད་པའོ། །གཉིས་པ་ནི། གང་ཕྱིར་སོགས་ཏེ། ཁྱད་པར་སྔར་བཤད་པ་རྣམས་འགོད་ཚུལ་སྔ་མ་དང་འདྲའོ། །གཉིས་པ་ནི། དེ་ཕྱིར་སོགས་སོ། །གསུམ་པ་ནི། འཇིག་རྟེན་སོགས་སོ། །གཉིས་པ་བདག་ཕུང་གཅིག་ཏུ་གྲུབ་པ་དགག་པ་ལ་གཉིས་ཏེ། འདོད་པ་བརྗོད། སུན་འབྱིན་བཤད་པའོ། །དང་པོ་ནི། ཕུང་པོ་སོགས་ཏེ། རང་སྡེ་མང་པོས་བཀུར་བ་དག་གིས་ཅི་སྐད་བཤད་པའི་རིགས་པས་ཕུང་པོ་ལས་ཐ་དད་པའི་བདག་མ་གྲུབ་པའི་ཕྱིར། འཇིག་ཚོགས་ལ་ལྟ་བའི་དམིགས་པ་ནི་ཕུང་པོ་དག་ཁོ་ན་ཡིན་ནོ། །དེའི་ཕྱིར་བདག་ནི་ཕུང་པོ་ཙམ་ཁོ་ན་ཡིན་ནོ་ཞེས་འདོད་དེ་འཇིག་ལྟའི་དམིགས་པ་དང་བདག་དོན་གཅིག་པར་འདོད་པ་ནི་བདག་རྫས་ཡོད་དུ་འདོད་པ་ཐམས་ཅད་འདྲ་ལ། བཏགས་ཡོད་དུ་འདོད་པའི་ཕྱོགས་ལ་རང་རྒྱུད་པ་མན་ཆད་དེ་གཉིས་དོན་མི་གཅིག་པར་འདོད་དེ། འཇིག་ལྟའི་དམིགས་པ་ཕུང་པོ་ཡིན་ཀྱང་ཕུང་པོ་བདག་ཏུ་མི་འདོད་པའི་ཕྱིར་རོ། །ཐལ་འགྱུར་བས་དེ་གཉིས་དོན་གཅིག་ཏུ་འདོད་དེ། ཕུང་པོ་དེ་གཉིས་གང་ཡང་མ་ཡིན་གྱི། ཕུང་པོ་ལ་བརྟེན་ནས་རང་དགར་ངའོ་སྙམ་དུ་གཟུང་བའི་དམིགས་ཡུལ་གྱི་ང་ཙམ་དེ་དེ་གཉིས་སུ་འདོད་པའི་ཕྱིར་རོ། །དེས་ན་མང་པོས་བཀུར་བ་ཐམས་ཅད་བདག་རྫས་ཡོད་དུ་འདོད་པར་འདྲ་ཡང་བདག་གི་མཚན་གཞི་ངོས་འཛིན་ཚུལ་མི་འདྲ་བ་གསུམ་བྱུང་སྟེ། ཁ་ཅིག་ཕུང་པོ་ལྔ་ཆར་བདག་ཏུ་འདོད་དེ། ཅི་སྐད་དུ་བཅོམ་ལྡན་འདས་ཀྱིས། དགེ་སློང་དག དགེ་སྦྱོང་ངམ་བྲམ་ཟེ་གང་སུ་དག་གཅིག་བདག་གོ་སྙམ་དུ་ཡང་དག་པར་རྗེས་སུ་ལྟ་བ་དེ་དག་ནི་ཉེ་བར་ལེན་པའི་ཕུང་པོ་ལྔ་པོ་འདི་དག་ཁོ་ན་ལ་ཡང་དག་པར་རྗེས་སུ་ལྟ་བ་ཞེས་གསུངས་པ་ལྟ་བུའོ། །དེའི་ཕྱིར་ལྟ་བ་འདི་ནི་འཇིག་པའི་བདག་ཉིད་ཅན་གྱི་ཚོགས་པ་ལ་དམིགས་པ་ཡིན་གྱི། བདག་གམ་བདག་གི་བ་ལ་ནི་མ་ཡིན་ནོ་ཞེས་གསལ་བར་མཛད་པའི་སླད་དུ་བདག་དང་བདག་གི་བའི་རྣམ་པར་ཞུགས་པའི་ལྟ་བ་ལ་འཇིག་ཚོགས་ལ་ལྟ་བར་གསུངས་སོ་ཞེས་སྨྲའོ། །ཡང་ཁ་ཅིག་སེམས་ལ་བདག་གོ་ཞེས་འདོད་དེ། བདག་ཉིད་བདག་གི་མགོན་ཡིན་གྱི། །གཞན་ནི་སུ་ཞིག་མགོན་དུ་འགྱུར། །བདག་ཉིད་ལེགས་པར་ཐུལ་བས་ནི། །མཁས་པས་མཐོ་རིས་འཐོབ་པར་འགྱུར། །ཞེས་ཚིགས་སུ་བཅད་པ་ལས་སེམས་ལ་བདག་གི་སྒྲས་གསུངས་སོ། །འདི་གང་ལས་ཞེ་ན། ཕུང་པོ་ལས་ཐ་དད་པའི་བདག་མེད་པའི་ཕྱིར་དང་། མདོ་གཞན་ལས་ཀྱང་སེམས་འདུལ་བར་གསུངས་པའི་ཕྱིར་ཏེ། སེམས་འདུལ་བ་ནི་ལེགས་པ་སྟེ། །སེམས་འདུལ་བས་ནི་བདེ་བ་འདྲེན། །ཞེས་བྱ་བ་དེ་ལས་སོ་ཞེས་འགྲེལ་པར་གསུངས་ཏེ། དེའི་དོན་ནི་བདག་རྫས་སུ་ཡོད་ཅིང་ཕུང་པོ་ལས་ཐ་དད་དུ་མེད་པས་ཕུང་པོ་ཉིད་བདག་ཏུ་གྲུབ་ལ། དེ་ལའང་བདག་ཐུལ་བ་དང་སེམས་ཐུལ་བར་གསུངས་པ་དོན་གཅིག་ཏུ་སྣང་བས་སེམས་ཉིད་བདག་ཡིན་ནོ་སྙམ་དུ་སེམས་སོ། །ཡང་ཁ་ཅིག་བརྗོད་དུ་མེད་པའི་བདག་ཁས་ལེན་ཏེ། འདིའང་འོག་ཏུ་མང་བཀུར་བའི་འདོད་པར་བཤད་པས། མང་བཀུར་བ་ལ་ས་སྒྲོགས་རི་པ་དང་། བསྲུང་བ་པ་དང་། གནས་མ་བུ་བའི་སྡེ་པ་གསུམ་ཡོད་པར་བཤད་པའི་དང་པོ་གཉིས་ཀྱིས་བདག་ཕུང་གཅིག་ཏུ་འདོད་པ་དང་། ཕྱི་མས་བརྗོད་དུ་མེད་པའི་བདག་ཁས་ལེན་པ་གསལ་ཏེ། གཞུང་ལུགས་ཚད་ལྡན་གཞན་ལས་ཀྱང་བརྗོད་དུ་མེད་པའི་བདག་ཁས་ལེན་པ་གནས་མ་བུ་བའི་འདོད་པ་ཡིན་པར་བཤད་པ་དང་དོན་གཅིག་གོ །གནད་འདི་མ་རྟོགས་པར་བདག་ཕུང་གཅིག་ཏུ་འདོད་པ་དང་། བརྗོད་དུ་མེད་པའི་བདག་ཁས་ལེན་པ་གཉིས་ཕྱོགས་སྔ་སྨྲ་བ་པོ་གཅིག་ཏུ་འདོད་པ་ནི་བརྗོད་དུ་མེད་པའི་དོན་ལ་མ་དཔྱད་པར་ཟད་དོ། །འདིར་ཁ་ཅིག རྟོག་གེ་འབར་བ་ལས། འདི་ལྟར་ཁོ་བོ་ཅག་ཀྱང་ཐ་སྙད་དུ་རྣམ་པར་ཤེས་པ་ལ་བདག་གི་སྒྲ་དངོས་སུ་འདོགས་ཏེ། འདི་ལྟར་རྣམ་པར་ཤེས་པ་ནི་ཡང་སྲིད་པ་ལེན་པའི་ཕྱིར་བདག་ཡིན་ནོ་ཞེས། ལུས་དང་དབང་པོའི་ཚོགས་དག་ལ། །ཉེ་བར་རྟོགས་པའི་ཕྱིར་དེ་ཞེས་དང་། དེའང་མདོ་ཁ་ཅིག་ལས་སེམས་འདུལ་ན་བདེ་བ་ཐོབ་པར་གསུང་ལ། ཁ་ཅིག་ཏུ་བདག་དུལ་བས་མཐོ་རིས་ཐོབ་པར་གསུངས་པས་སེམས་ལ་བདག་ཏུ་འཇོག་ཅེས་ལུང་དང་། ཕུང་པོ་ལེན་མཁན་ནི་བདག་ཡིན་ལ། རྣམ་ཤེས་ཀྱིས་ཡང་སྲིད་ལེན་པའི་ཕྱིར་རྣམ་ཤེས་བདག་ཏུ་འཇོག་གོ་ཞེས་རིགས་པའི་སྒྲུབ་བྱེད་སྨྲའོ། །དེས་ན་སློབ་དཔོན་འདིས་ཀུན་གཞི་མི་བཞེད་པས་ལུས་ལེན་པའི་རྣམ་ཤེས་ནི་ཡིད་ཀྱི་རྣམ་ཤེས་ཡིན་ཏེ། ཀུན་གཞི་མི་འདོད་པ་གཞན་ཡང་དེ་དང་འདྲའོ། །ཀུན་གཞི་འདོད་པས་ཀུན་གཞིའི་རྣམ་ཤེས་ཉིད་གང་ཟག་གི་མཚན་གཞིར་སྨྲའོ། །དེ་ཡང་ལུགས་དེ་དག་གིས་ཉན་རང་གིས་གང་ཟག་རྫས་ཡོད་དུ་མེད་པར་རྟོགས་པར་འདོད་ཀྱང་རྣམ་ཤེས་གཉིས་པོ་རྫས་ཡོད་དུ་མེད་པར་རྟོགས་པར་མི་འདོད་པས་གང་ཟག་རང་རྐྱ་ཐུབ་པའི་རྫས་སུ་མེད་པར་སྨྲ་བ་ནི་གང་ཟག་གི་རང་གི་ལྡོག་པ་ནི་འདོད་པ་ཡིན་གྱི་གང་ཟག་གི་མཚན་གཞི་རྣམ་ཤེས་ལ་དེ་ལྟར་འདོད་པ་ནི་མ་ཡིན་ནོ་ཞེས་བྲིས་སོ། །དེ་ལ་སློབ་དཔོན་ལེགས་ལྡན་འབྱེད་ཀྱིས་འདི་ལྟར་རྣམ་པར་ཤེས་པ་ནི། ཡང་སྲིད་པ་ལེན་པའི་ཕྱིར་བདག་ཡིན་ནོ་ཞེས་དང་། རྣམ་ཤེས་བདག་ཏུ་བཞག་གོ་ཞེས་གསུངས་པ་ནི་ཁོ་རང་གི་ལུགས་ཀྱི་བདག་ལྟས་ཕུང་པོ་ལ་དམིགས་ནས་བདག་ཏུ་བཟུང་ཚུལ་སྟོན་པ་ཡིན་གྱི་ཕུང་པོ་བདག་གི་མཚན་གཞིར་སྟོན་པ་མ་ཡིན་ཏེ་གཞན་དུ་སློབ་དཔོན་དེས་བདག་ཕུང་གཅིག་ཏུ་འདོད་པར་ཐལ། ཕུང་པོ་བདག་ཏུ་འདོད་ཅིང་མང་བཀུར་བས་ཀྱང་དེ་ལས་ལྷག་པ་ཁས་མ་བླངས་པའི་ཕྱིར་རོ། །གལ་ཏེ་ཕུང་པོ་བདག་གི་མཚན་གཞིར་ཁས་བླངས་ཀྱི་བདག་ཏུ་ཁས་མི་ལེན་ནོ་སྙམ་ན། ཕུང་པོ་ཆོས་ཅན། བདག་ཡིན་པར་ཐལ། བདག་གི་མཚན་གཞི་ཡིན་པའི་ཕྱིར། ཞེས་པའི་རིགས་པ་འདི་ལ་སློབ་དཔོན་འདིའང་སྙོན་འདིངས་པར་མི་བྱེད་དོ། །གལ་ཏེ་སེམས་དུལ་ན་བདེ་བ་འཐོབ་པར་གསུངས་པའི་ལུང་དེ་སློབ་དཔོན་འདི་དང་མང་བཀུར་བ་གཉིས་ཆར་གྱི་ཤེས་བྱེད་དུ་འདྲེན་པས་ཡིད་ཀྱི་རྣམ་ཤེས་ཉིད་བདག་གི་མཚན་གཞི་ཡིན་ནོ་སྙམ་ན་དེ་ནི་གཏན་མི་འདྲ་སྟེ་སློབ་དཔོན་འདིས་ནི་སེམས་བདག་གི་གདགས་གཞི་ཡིན་པའི་ཤེས་བྱེད་དུ་འདྲེན་ཅིང་། མང་བཀུར་བས་ནི་མཚན་གཞིའི་ཤེས་བྱེད་དུ་འདྲེན་པའི་ཕྱིར་རོ། །དེ་བཞིན་དུ་ཀུན་གཞི་ཁས་ལེན་པས་ཀྱང་ཀུན་གཞི་བདག་གི་མཚན་གཞིར་འདོད་པ་གཏན་མ་ཡིན་ཏེ། ཀུན་གཞི་རྫས་ཡོད་དང་བདག་བཏགས་ཡོད་དུ་ཁས་ལེན་པའི་ཕྱིར་རོ། །མདོར་ན་གདགས་གཞི་དང་མཚན་གཞི་ནོར་བ་ཁྱོད་ནི་རང་སྡེ་དངོས་པོར་སྨྲ་བ་དག་གིས་ལུགས་ལ་བུམ་པའི་རྡུལ་རྫས་བརྒྱད་བུམ་པའི་མཚན་གཞི་དང་། ཤིང་རྟའི་ཡན་ལག་རྣམས་ཤིང་རྟའི་མཚན་གཞིར་ཁས་ལེན་དགོས་པས་གདགས་གཞི་རྫས་ཡོད་ལ་བཏགས་ཆོས་བཏགས་ཡོད་བཏགས་པའི་རྣམ་གཞག་མ་ཆགས་པའོ། །དེས་ན་ཁྱོད་ཉིད་ལ་གནད་ཀྱི་གདམས་པ་སྦྱིན་པར་བྱ་སྟེ། རང་སྡེ་མང་པོས་བཀུར་བས་ཕུང་པོ་བདག་ཉིད་དུ་འདོད་པ་དང་། བརྗོད་དུ་མེད་པའི་བདག་འདོད་པ་གཉིས་ནི་བདག་རྫས་ཡོད་དུ་འདོད་པའི་ལུགས་ཡིན་ལ། ཁ་ཆེ་བྱེ་བྲག་ཏུ་སྨྲ་བ་ནས་རང་རྒྱུད་པའི་བར་གྱིས་ཕུང་པོ་གདགས་གཞི་དང་། བདག་བཏགས་ཡོད་དུ་འདོད་ཅིང་ཐལ་འགྱུར་བས་ཕུང་པོ་བདག་ཏུ་གདགས་པའི་རྒྱུ་ཡིན་གྱི་བདག་གི་གདགས་གཞི་དང་མཚན་གཞི་གང་དུ་ཡང་མི་འདོད་པའི་ཁྱད་པར་གསུམ་ཡོད་པ་མ་འདྲེས་པར་ཤེས་པར་གྱིས་ཤིག གཉིས་པ་སུན་འབྱིན་བཤད་པ་ལ་གསུམ་སྟེ། བདག་ཕུང་གཅིག་པའི་དོན་ལ་རིགས་པས་གནོད། བདག་ཕུང་གཅིག་པ་ལུང་གི་དོན་མ་ཡིན། བདག་ཕུང་གཅིག་ན་སྤང་གཉེན་འཆོལ་བར་ཐལ་བའོ། །དང་པོ་ལ་གསུམ་སྟེ། ཞེན་ཡུལ་བདག་དང་ཕུང་པོ་དཔྱད་ནས་དགག འབྲས་བུ་མཐའ་ལྡན་ལ་སོགས་མེད་པས་དགག ཡུལ་ཅན་རྣལ་འབྱོར་མངོན་སུམ་སྒོ་ནས་དགག་པའོ། །དང་པོ་ལ་གཉིས་ཏེ། ཧ་ཅང་ཐལ་བ་བདུན་གྱིས་གནོད། ཉེས་སྤོང་བརྗོད་དེ་མཇུག་སྡུད་བསྟན་པའོ། །དང་པོ་ནི། གལ་ཏེ་སོགས་ཏེ། ཐལ་བ་དང་པོ་གཉིས་ལ་གནོད་པའི་ལུང་ནི་འཇིག་རྟེན་སྐྱེ་བ་ན་གང་ཟག་ཉག་ཅིག་སྐྱེའོ། །ཞེས་དང་། དགེ་སློང་དག་ཕུང་པོ་ལྔ་པོ་འདི་རྣམས་ནི་མིང་ཙམ། ཐ་སྙད་ཙམ། བཏགས་པ་ཙམ་སྟེ། གང་འདི་ལྟ་སྟེ། འདས་པའི་དུས་དང་། མ་འོངས་པའི་དུས་དང་། ནམ་མཁའ་དང་། མྱ་ངན་ལས་འདས་པ་དང་། གང་ཟག་གོ་ཞེས་པའོ། །ཁ་ཅིག འདི་ནི་མང་པོ་དང་ངོ་བོ་གཅིག་པར་འདོད་པ་ཙམ་ལ་འཕན་དུ་མི་རུང་བས་བདག་དང་ཕུང་པོ་གཉིས་ཐ་དད་གཏན་མེད་ཀྱི་གཅིག་ཏུ་འདོད་པ་ལ་འཕེན་ནོ། །དེའང་དང་པོ་ནས་གཞན་གྱིས་དེ་ལྟར་ཁས་མ་བླངས་པས། ངོ་བོ་གཅིག་པ་དང་། ཐ་དད་ཙམ་ཡིན་པ་རྫུན་པ་ལ་སྐྱོན་མེད་ཀྱང་། བདག་ཕུང་གཉིས་བདེན་པར་ཁས་ལེན་པ་ལ་ངོ་བོ་གཅིག་ན་དབྱེར་མེད་ཀྱི་ངོ་བོ་གཅིག་ཏུ་འཕུལ་ནས། དེའི་འོག་ཏུ་བདག་མང་པོ་དང་ཕུང་པོ་ལྔ་གཅིག་ཏུ་ཐལ་བ་འཕང་ངོ་ཞེས་བྲིས་སོ། །འདི་ནི་གཞི་གྲུབ་ན་ངོ་བོ་གཅིག་དང་ཐ་དད་གང་རུང་ཡིན་དགོས་པས། བདེན་གཉིས་ངོ་བོ་གཅིག་ཏུ་རང་ཉིད་ཀྱིས་ཁས་བླངས་པ་དང་འགལ་གྱིས་དོགས་ནས་བདག་ཕུང་ངོ་བོ་གཅིག་ཏུ་ཁས་ལེན་པར་སྣང་ཡང་། ཕན་ཚུན་ལྟོས་གྲུབ་ཀྱི་ཆོས་ལ་ངོ་བོ་གཅིག་དང་། ངོ་བོ་ཐ་དད་གང་ཡང་ཁས་མི་ལེན་པའི་ཀླུ་སྒྲུབ་ཡབ་སྲས་ཀྱི་གྲུབ་མཐའི་གཞུང་ཤིང་འགོག་པ་སྟེ། གོང་འོག་མང་པོར་ཤེས་པར་བྱའོ། །བདག་ཕུང་ངོ་བོ་གཅིག་ཏུ་ཁས་ལེན་པ་རང་སྡེ་མང་པོས་བཀུར་བའི་སྡེ་པ་ལས་གཞན་མེད་ཀྱང་ཁྱེད་དབུ་མ་པར་རློམ་ཞིང་འདི་ཁས་བླངས་པ་ནི་ཅི་ཞིག བདེན་པར་ཁས་ལེན་པ་ལ་ངོ་བོ་གཅིག་ན་ཐ་དད་གཏན་མེད་ཀྱི་གཅིག་ཏུ་འཕུལ་ཡང་མི་ཐུབ་སྟེ། མདོ་སྡེ་པས་བྱས་མི་རྟག་གཉིས་བདེན་པ་དང་ངོ་བོ་གཅིག་ཏུ་ཁས་ལེན་ཀྱང་། ཐ་དད་གཏན་མེད་ཀྱི་གཅིག་ཏུ་འཕུལ་མི་ཐུབ་པ་བཞིན་ནོ། །དེས་ནས་གཞུང་འདི་དག་བདག་ཕུང་ངོ་བོ་གཅིག་པ་ལ་སྐྱོན་བརྗོད་པ་ཡིན་པས་འཁྱོག་པོར་མ་བཤད་ཅིག གཉིས་པ་ནི། དེ་ཉིད་སོགས་ཏེ། སྔར་རྣམ་པར་དཔྱད་པ་ནི་བསྟན་བཅོས་འདིར། བྱམས་པ་ཉེར་སྦས་ལ་བརྟེན་ཆོས་རྣམས་ནི། །ཞེས་བྱ་བ་དེ་ཡིན་ལ། རྩ་ཤེར་ལས། གལ་ཏེ་ལྷ་དེ་མི་དེ་ན། །དེ་ལྟ་ན་ནི་རྟག་པར་འགྱུར། །གལ་ཏེ་ལྷ་མི་གཞན་ཡིན་ན། །རྒྱུད་ནི་འཐད་པར་མི་འགྱུར་རོ། །ཞེས་གསུངས་པའང་ཡིན་ནོ། །གཉིས་པ་ནི། འཇིག་རྟེན་སོགས་ཏེ། སོགས་ཀྱི་སྒྲས་ལུང་མ་བསྟན་གྱི་ལྟ་བ་བཅུ་བཞིའི་ཡུལ་འཇིག་རྟེན་མཐའ་དང་ལྡན་པ་སོགས་བཅུ་བཞི་འཐད་པར་འགྱུར་ཏེ། གལ་ཏེ་འཇིག་རྟེན་གྱི་སྒྲས་ཕུང་པོ་རྣམས་འཛིན་ན། དེའི་ཚེ་ཕུང་པོ་རྣམས་སྐྱེ་བ་དང་འཇིག་པ་ཉིད་ཀྱིས་མི་རྟག་པའི་ཕྱིར་འཇིག་རྟེན་མི་རྟག་ཅེས་བྱ་བར་ཡང་ལུང་བསྟན་པར་འགྱུར་ལ། མྱ་ངན་ལས་འདས་པའི་འོག་རོལ་དུ་ཕུང་པོ་རྣམས་མེད་པས་འཇིག་རྟེན་མཐའ་དང་ལྡན་ནོ་ཞེས་བྱ་བར་ཡང་འགྱུར་བའི་ཕྱིར་རོ། །འདོད་མི་ནུས་པ་ནི་མེད་པའི་ཕྱིར་རོ་ཞེས་པ་སྟེ། ལུང་མ་བསྟན་གྱི་ལྟ་བ་བཅུ་བཞི་འདོན་པར་སྡེ་པ་ཐམས་ཅད་མཚུངས་པའི་ཕྱིར་རོ། །གསུམ་པ་ལ་གཉིས་ཏེ། བདག་མེད་རྟོགས་ཚེ་ཕུང་པོ་ཆད་པར་ཐལ། བདག་མེད་རྟོགས་ཚེ་ཆགས་སོགས་སྐྱེ་བར་ཐལ་བའོ། །དང་པོ་ནི། ཁྱོད་ཀྱི་སོགས་སོ། །གཉིས་པ་ནི། ཁྱོད་ཀྱི་སོགས་ཏེ། སློབ་དཔོན་འདིས་གང་ཟག་བདེན་མེད་དུ་རྟོགས་པ་ལ་གང་ཟག་ཏུ་གདགས་པའི་རྒྱུ་ཉེར་ལེན་གྱི་ཕུང་པོ་བདེན་མེད་དུ་རྟོགས་དགོས་པའི་རིགས་པའི་གཙོ་བོའོ། །གཉིས་པ་བདག་ཕུང་གཅིག་པ་ལུང་གི་དོན་མ་ཡིན་པ་ལ་གསུམ་སྟེ། ཕུང་པོ་བདག་ཏུ་བཞེད་པ་ལུང་དོན་མིན། ལུང་དོན་ཡིན་ན་ལུང་རིགས་གཉིས་ཀྱིས་གནོད། ལུང་ལ་བརྟེན་ནས་སྔ་མའི་གྲུབ་དོན་བསྡུ་བའོ། །དང་པོ་ནི། གང་ཕྱིར་སོགས་ཏེ། དགེ་སློང་དག དགེ་སྦྱོང་ངམ་བྲམ་ཟེ་གང་སུ་དག་གཅིག་བདག་གོ་སྙམ་དུ་ཡང་དག་པར་རྗེས་སུ་ལྟ་བ་དེ་དག་ནི་ཉེ་བར་ལེན་པའི་ཕུང་པོ་ལྔ་པོ་འདི་དག་ཁོ་ན་ལ་ཡང་དག་པར་རྗེས་སུ་ལྟའོ། །ཞེས་པའི་ལུང་གི་དོན་ནི་ཕུང་པོ་ལས་དོན་གཞན་པའི་བདག་འགོག་པ་ཡིན་གྱི་ཕུང་པོ་ཉིད་བདག་ཏུ་སྟོན་པ་མ་ཡིན་པར་མདོ་གཞན་གྱིས་སྒྲུབ་པའོ། །གཉིས་པ་ལ་གཉིས་ཏེ། ལུང་གིས་གནོད། རིགས་པས་གནོད་པའོ། །དང་པོ་ནི། ཕུང་པོ་སོགས་ཏེ། ཕུང་པོ་རྣམས་བདག་ཡིན་ཅེས་པའི་ཚིག་དེས་ཕུང་པོ་བདག་ཏུ་སྟོན་ན། ཕུང་པོའི་ཚོགས་པ་བདག་ཡིན་དགོས་ཏེ། ཤིང་རྣམས་ནགས་ཚལ་ཞེས་པ་བཞིན་ནོ། །ཕུང་པོའི་ཚོགས་པ་བདག་ཡིན་པ་ལ་ལུང་གིས་གནོད་དེ། ཇི་སྐད་དུ། བདག་ཉིད་བདག་གི་མགོན་ཡིན་ཏེ། །བདག་ཉིད་བདག་གི་དགྲ་ཡང་ཡིན། །ལེགས་དང་ངན་པར་བྱས་པ་ལ། །བདག་ཉིད་བདག་གི་དཔང་པོ་ཡིན། །ཞེས་མགོན་ཉིད་དང་དཔང་པོ་ཉིད་དུ་གསུངས་ལ། བདག་ཉིད་ལེགས་པར་དུལ་བས་ནི། །མཁས་པས་མཐོ་རིས་ཐོབ་པར་འགྱུར། །ཞེས་འདུལ་བར་གསུངས་ན་ཚོགས་པ་ཙམ་པོ་རྫས་སུ་མེད་པས་དེ་དག་ཏུ་མེད་པའི་ཕྱིར་རོ། །གཉིས་པ་ལ་གསུམ་སྟེ། འདུས་ཙམ་ཡིན་ན་ཤིང་རྟའི་དཔེ་ཡིས་གནོད། ཚོགས་དབྱིབས་ཡིན་ན་སེམས་ལ་མེད་པས་གནོད། གཉིས་ཀ་བྱ་བྱེད་གཅིག་ཏུ་ཐལ་བས་གནོད་པའོ། །དང་པོ་ནི་དེ་ཚེ་སོགས་ཏེ། འགྲེལ་པར་གང་ཞིག་ལ་བརྟེན་ནས་གང་བཏགས་པ་དེ་ནི་བརྟགས་པ་ཉེ་བར་ལེན་པའི་ཡན་ལག་ཚོགས་པ་ཙམ་མ་ཡིན་ཏེ། བརྟེན་ནས་བརྟགས་པའི་ཕྱིར་འབྱུང་བ་ལས་གྱུར་པ་བཞིན་ནོ། །ཇི་ལྟར་འབྱུང་བ་དག་རྒྱུར་བྱས་ནས་འབྱུང་བ་ལས་གྱུར་པ་སྔོན་པོ་ལ་སོགས་པ་དང་། མིག་ལ་སོགས་པ་བཏགས་མོད་ཀྱི་དེ་གཉིས་འབྱུང་བ་འདུས་པ་ཙམ་ཉིད་མ་ཡིན་ནོ། །དེ་བཞིན་དུ་བདག་ཕུང་པོ་རྒྱུར་བྱས་ནས་བཏགས་པའི་རང་བཞིན་ཅན་ཡང་ཚོགས་པ་ཙམ་ཡིན་པར་མི་རུང་ངོ་། །ཞེས་གསུངས་པ་འདིས་ཕུང་པོ་ལ་བརྟེན་ནས་བདག་ཏུ་བཏགས་པ་དང་། འབྱུང་བ་ལ་རྟེན་ནས་འབྱུང་འགྱུར་དུ་བཏགས་པ་དང་། བུམ་པའི་གཟུགས་སོགས་ལ་བརྟེན་ནས་བུམ་པར་བཏགས་པ་སོགས་ཡན་ལག་རྒྱུར་བྱས་ནས་ཡན་ལག་ཅན་དུ་བཏགས་པ་ཐམས་ཅད་མཚུངས་པར་གསུངས་ཤིང་། དེ་ཡང་ཅི་ལྟར་ཡན་ལག་ཚོགས་རྣམས་ལ། །བརྟེན་ནས་ཤིང་རྟར་བརྗོད་པ་ལྟར། །དེ་བཞིན་ཕུང་པོ་རྣམས་བརྟེན་ནས། །ཀུན་རྫོབ་སེམས་ཅན་ཞེས་བྱ་འོ། །ཞེས་པའི་མདོ་ཤེས་བྱེད་དུ་མཛད་པར་སྣང་བས་མདོ་ལས་སེམས་ཅན་ཞེས་དང་། འདིའི་རྩ་འགྲེལ་ལས་བདག་ཅེས་པ་རྣམས་མིང་གི་རྣམ་གྲངས་སུ་ཤེས་པར་བྱའོ། །དེས་ན་བདག་དང་གང་ཟག་དང་སེམས་ཅན་མིང་གི་རྣམ་གྲངས་སུ་འདོད་པ་ཕྱི་རོལ་མུ་སྟེགས་བྱེད་ཀྱི་གཞུང་ཡིན་ནོ། །ཞེས་སྨྲ་བ་ནི་བྱུང་རྒྱལ་དུ་སྨྲ་བ་སྟེ། འོག་ཏུ་འཆད་པར་འགྱུར་རོ། །གཉིས་པ་ནི། དབྱིབས་ཞེས་སོགས་སོ། །གསུམ་པ་ནི། ལེན་པོ་སོགས་ཏེ། རྩ་ཤེར་ལས། གལ་ཏེ་ཤིང་དེ་མེ་ཡིན་ན། །བྱེད་པ་པོ་དང་ལས་གཅིག་འགྱུར། །ཞེས་དང་། མེ་དང་ཤིང་གིས་བདག་དང་ནི། །ཉེ་བར་བླངས་པའི་རིམ་པས་ཀུན། །བུམ་སྣམ་སོགས་དང་ལྷན་ཅིག་ཏུ། །མ་ལུས་པར་ནི་རྣམ་པར་བཤད། །ཅེས་དང་། འགྲེལ་པར། འདིར་ཉེ་བར་ལེན་པ་པོ་ནི་བདག་ཡིན་ལ། ཉེ་བར་ལེན་པ་ནི་ཕུང་པོ་ལྔ་རྣམས་ཡིན་ནོ། །ཞེས་གསུངས་པ་འདིས་ཀྱང་བདག་ཐ་སྙད་དུ་ཁས་ལེན་པར་བསྟན་ནོ། །གསུམ་པ་ལུང་ལ་བརྟེན་ནས་སྔ་མའི་གྲུབ་དོན་བསྡུ་བ་ནི། གང་ཕྱིར་སོགས་ཏེ། འགྲེལ་པར་མདོ་དྲངས་པ་ལས། རྒྱལ་པོ་ཆེན་པོ་སྐྱེས་བུ་གང་ཟག་དེ་དག་ནི་ཁམས་དྲུག་དང་། རིག་པའི་སྐྱེ་མཆེད་དྲུག་དང་། ཡིད་ཀྱི་ཉེ་བར་ལོངས་སྤྱོད་པ་བཅོ་བརྒྱད་དོ་ཞེས་གསུངས་པའི་དོན་རྩ་བར། གང་ཕྱིར་ཐུབ་པས་བདག་དེ་ཞེས་དང་། འགྲེལ་པར། གང་ཕྱིར་ཁམས་ལ་སོགས་པ་དེ་རྣམས་ཀྱི་སྒོ་ནས་བདག་ཏུ་གདགས་སོ་ཞེས་གསུངས་པ་འདིས་ཀྱང་སྐྱེས་བུ་དང་། གང་ཟག་དང་། བདག་གསུམ་པོ་མིང་གི་རྣམ་གྲངས་སུ་བསྟན་ནོ། །གསུམ་པ་བདག་ཕུང་གཅིག་ན་སྤང་གཉེན་འཆོལ་བར་ཐལ་བ་ནི། བདག་མེད་སོགས་ཏེ། བདག་ཕུང་གཅིག་ཏུ་འདོད་པའི་རང་སྡེས་ངར་འཛིན་ལྷན་སྐྱེས་ཀྱི་དམིགས་ཡུལ་གྱི་བདག་ནི་ཕུང་པོ་ཡིན་ལ། བདག་མེད་རྟོགས་པའི་ཚེ་རྟག་པའི་བདག་སྤོང་བ་ཡིན་ཞེས་འདོད་པ་ལ་ཁས་བླངས་ནང་འགལ་སྟོན་པ་སྟེ། དེའི་དཔེ་ནི་ཚིགས་བཅད་ཕྱི་མས་སྟོན་ནོ། །ཁ་ཅིག་འདི་མ་རྟོགས་པར་ཀུན་བཏགས་ཀྱི་བདག་མེད་པར་རྟོགས་པས་ལྷན་སྐྱེས་ཀྱི་བདག་མེད་པར་རྟོགས་པ་མི་འཐད་པར་ཐལ། ཀུན་བཏགས་ཀྱི་བདག་དེ་ལྷན་སྐྱེས་ཀྱི་བདག་མ་ཡིན་པའི་ཕྱིར་ཞེས་པའི་དོན་དུ་འཆད་དེ། འདི་ལྟར་འདིས་ནི་རང་གཞན་གྱི་སྡེ་པ་དངོས་པོའི་དེ་ཁོ་ན་ཉིད་གཏན་ལ་འབེབས་པར་འདོད་པ་མང་པོས་ལྷན་སྐྱེས་ཀྱི་བདག་འཛིན་གྱིས་ཇི་ལྟར་གཟུང་བའི་ཡུལ་སུན་འབྱིན་པ་མི་ཤེས་པས་དེ་དོར་ནས་དེ་ལས་གཞན་པའི་དེ་ཉིད་གཏན་ལ་འབེབས་པའི་རྣམ་གཞག་ཐམས་ཅད་སྙིང་པོ་མེད་པའི་གནས་ལ་ངལ་བ་བྱེད་པར་བསྟན་ཏེ། འདི་ཤེས་པ་ཤིན་ཏུ་གནད་ཆེའོ་ཞེས་བྲིས་སོ། །དེ་ལ་མཁས་པའི་མཁས་པ་དག་གིས་དེ་ལྟར་ན་མཐའ་བཞིའི་སྐྱེ་བ་བཀག་པས་ལྷན་སྐྱེས་ཀྱི་ཡུལ་དུ་གྱུར་པའི་སྐྱེ་བ་མི་ཁེགས་པར་ཐལ། མཐའ་བཞིའི་སྐྱེ་བ་ནི་ཀུན་བཏགས་ཡིན་པའི་ཕྱིར་ཞེས་གསུངས་པ་ལ་ལན་མེད་དོ། །དེ་བཞིན་དུ་ལྷན་སྐྱེས་ཀྱི་ཡུལ་དུ་གྱུར་བའི་གང་ཟག་གི་བདག་དང་། གང་ཟག་རྣམ་ལྔར་གྲུབ་ཚུལ་ལའང་སྦྱར་ཏེ་འགྲེའོ། །དེས་ན་འདི་ནི་ཕ་རོལ་པོས་ཀུན་བཏགས་ཀྱི་བདག་དང་། ལྷན་སྐྱེས་ཀྱི་བདག་གཞན་དུ་འདོད་པ་ལ་ཁས་བླངས་ནང་འགལ་སྟོན་པ་ཡིན་ལ། ཀུན་བཏགས་ཀྱི་བདག་བཀག་པས་ལྷན་སྐྱེས་ཀྱི་བདག་ཁེགས་པའི་གནད་ནི་རང་གཞན་གྱི་སྡེ་པ་རྣམས་ཀུན་བཏགས་ཀྱི་བདག་སྨྲ་བ་ཀུན་གྱིས་ལྷན་སྐྱེས་ཀྱི་བདག་རིགས་པས་འཚོལ་བ་ན་ཀུན་བཏགས་ཀྱི་བདག་དེ་ཉིད་ཡིན་པར་འདོད་པས་སྒྲུབ་བྱེད་མ་མཐོང་བ་ན་བསྒྲུབ་བྱ་འཛིན་པའི་བློ་བཟློག་པའོ། །བདག་ཕུང་གཅིག་ཏུ་འདོད་པའི་རང་སྡེས་ཀྱང་ཕུང་པོ་བདག་ཏུ་འདོད་པ་དེ་ཉིད་ཀུན་བཏགས་ཡིན་པས་དོན་ལ་སྔ་མ་དེ་ཉིད་ཀྱི་ནང་དུ་འདུས་སོ། །གསུམ་པ་རྟེན་དང་བརྟེན་པར་གྲུབ་པ་དགག་པ་ནི། ཕུང་པོར་སོགས་ཏེ། ཕུང་པོ་ལ་བདག་བརྟེན་པའི་ཚུལ་གྱིས་ཡོད་པ་དང་། བདག་ལ་ཕུང་པོ་བརྟེན་པའི་ཚུལ་གྱིས་ཡོད་པ་གཉིས་ཐ་སྙད་དུ་ཡང་ཁས་མི་ལེན་པ་སྟེ། རྟེན་དང་བརྟེན་པ་ལ་འཁར་གཞོང་དང་རྒྱ་ཤུགས་ལྟར་གཞན་དུ་ཡོད་དགོས་པའི་ཕྱིར་རོ། །ཁ་ཅིག་ཕུང་པོ་ལ་བདག་ངོ་བོ་ཉིད་ཀྱིས་བརྟེན་པའི་ཚུལ་གྱིས་ཡོད་པའང་མ་ཡིན། བདག་ལའང་ཕུང་པོ་དེ་རྣམས་ངོ་བོ་ཉིད་ཀྱིས་བརྟེན་པའི་ཚུལ་གྱིས་ཡོད་པ་མ་ཡིན་ཏེ་ཞེས་དང་། མཇུག་ཏུ་རྟེན་དང་བརྟེན་པའི་ངོ་བོར་རང་བཞིན་གྱིས་གྲུབ་པ་མེད་དོ་ཞེས་པའི་འབྲུ་སྦྱང་བ་ནི་མི་འཐད་དེ། འདིར་རྟེན་དང་བརྟེན་པ་ཐ་སྙད་དུའང་ཁས་མི་ལེན་ན་དགག་བྱ་ལ་ཁྱད་པར་སྦྱར་བ་དོན་མེད་པའི་ཕྱིར་ཏེ། ལེགས་ལྡན་འབྱེད་ཀྱིས་བདག་སྐྱེ་འགོག་པའི་སྐབས་སུ་དགག་བྱ་ལ་ཁྱད་པར་སྦྱར་བ་སློབ་དཔོན་ཟླ་བས་འགོག་ཚུལ་གྱི་རིགས་པ་ཐམས་ཅད་འདི་ལ་མཚུངས་པའི་ཕྱིར། ཐ་སྙད་དུ་ཁས་ལེན་ན་གང་ཟག་རྣམ་ལྔར་གྲུབ་པ་དང་། མཐའ་བཞིའི་སྐྱེ་བ་ཐ་སྙད་དུ་ཡོད་མེད་རྣམ་པ་ཀུན་ཏུ་མཚུངས་པ་སློབ་དཔོན་འདིའི་བཞེད་པ་ཡིན་པ་དང་འགལ་ཞིང་། ཁྱེད་རང་གིས་ཕུང་པོ་ལ་བརྟེན་ནས་བཏགས་པའི་གང་ཟག་ཅེས་བཏགས་པའི་དོན་རྣམ་པ་ལྔ་པོ་གང་དུ་གྲུབ་ཚོལ་བ་ན་དེ་ཁོ་ན་ཉིད་ལ་དཔྱོད་པར་འཇོག་ཅེས་པ་དང་ཡང་འགལ་ཏེ། དེའི་ཚེ་བདག་ཕུང་རྟེན་དང་བརྟེན་པ་ཐ་སྙད་དུ་རྙེད་འདུག་པའི་ཕྱིར་རོ། །བཞི་པ་བདག་ལ་ཕུང་པོ་ལྡན་པ་དགག་པ་ནི། བདག་ནི་སོགས་ཏེ། འདི་ཡང་བདག་ཕུང་གཅིག་དང་ཐ་དད་ཐ་སྙད་དུ་ཡང་ཁས་མི་ལེན་པས་ལྡན་པ་ཐ་སྙད་དུ་ཡང་ཁས་མི་ལེན་པའོ། །ཁ་ཅིག འདིར་ཡང་བདག་ནི་གཟུགས་ཀྱི་ཕུང་པོ་དང་ལྡན་པའི་ངོ་བོ་ཉིད་ཀྱིས་གྲུབ་པར་མི་འདོད་དེ་ཞེས་དང་། དེའི་སྒྲུབ་བྱེད་རང་བཞིན་གྱིས་གཅིག་དང་ཐ་དད་པ་ནི་བཀག་ཟིན་པ་དེའི་ཕྱིར་ཞེས་དགག་བྱ་ལ་ཁྱད་པར་སྦྱོར་བ་ཡང་བརྟགས་པ་སྔ་མ་དེ་ཉིད་གནས་སོ། །གཉིས་པ་བསྡུས་ཏེ་འཇིག་ལྟའི་གྲངས་ངེས་བསྟན་པ་ནི། གཟུགས་བདག་སོགས་ཏེ། ཕུང་པོ་རེ་རེ་ལ་ཕུང་པོ་ཉིད་བདག་ཏུ་ལྟ་བ་དང་། ཕན་ཚུན་རྟེན་དང་བརྟེན་པར་ལྟ་བ་གཉིས་དང་། བདག་ཕུང་པོ་དང་ལྡན་པར་ལྟ་བ་བཞི་བཞིར་ཕྱེ་བས་འཇིག་ཚོགས་ལ་ལྟ་བའི་ཆ་ཉི་ཤུར་འགྱུར་རོ། །གལ་ཏེ་བདག་ཕུང་གཞན་དུ་ལྟ་བ་རེ་རེ་བསྣན་པས་རྣམ་པར་དཔྱད་པ་རྣམ་པ་ལྔ་ལྔ་སྐབས་སུ་བབ་ལ་བསྟན་བཅོས་ལས་ཀྱང་། ཕུང་མིན་ཕུང་པོ་ལས་གཞན་མིན། །དེ་ལ་ཕུང་མེད་དེར་དེ་མེད། །དེ་བཞིན་གཤེགས་པ་ཕུང་ལྡན་མིན། །དེ་བཞིན་གཤེགས་པ་གང་ཞིག་ཡིན། །ཅེས་གསུངས་པས་འདིར་ཆ་ཉི་ཤུ་རྩ་ལྔར་འགྱུར་བ་མ་ཡིན་ནམ་ཅིའི་ཕྱིར་ཉི་ཤུར་བཞག་ཅེ་ན། འཇིག་ཚོགས་ལ་ལྟ་བའི་ཆ་ཉི་ཤུར་བཞག་པ་ནི་མདོ་སྡེ་ལས་གསུངས་པ་ཡིན་ལ། དེའི་རྒྱུ་མཚན་ཡང་འཇིག་ཚོགས་ཕུང་པོ་ལ་འདོད་པར་རང་སྡེ་ཐམས་ཅད་མཐུན་ཡང་། དེ་ལ་ལྟ་བའི་དོན་དངོས་སྨྲ་བ་གསུམ་དང་། རང་རྒྱུད་པ་དང་བཅས་པ་རྣམས་ཀྱིས་ཕུང་པོ་ལ་དམིགས་ནས་བདག་ཏུ་ལྟ་བར་འདོད་ལ་ཐལ་འགྱུར་བས་ནི་ཕུང་པོ་དམིགས་ཡུལ་དུ་སོང་བ་ལ་བརྟེན་ནས་གཞི་མེད་ལ་བདག་ཏུ་ལྟ་བས་འཇིག་ཚོགས་ལ་རྟེན་ནས་ལྟ་བ་ལ་འཇིགས་ཚོགས་ལ་ལྟ་ཞེས་བར་གྱི་ཚིག་མི་མངོན་པར་བྱས་པར་བཞེད་པས་དེ་གཉིས་གང་གི་ལུགས་ལྟར་ན་ཡང་བདག་ཕུང་གཞན་དུ་ལྟ་བ་དེ་འཇིག་ཚོགས་ལ་ལྟ་བ་མ་ཡིན་པའི་ཕྱིར་ཏེ། སྔ་མ་ལྟར་ན་ཕུང་པོ་དམིགས་ཡུལ་དུ་མ་བྱས་པར་བདག་ཏུ་ལྟ་བའི་ཕྱིར་དང་། ཕྱི་མ་ལྟར་ན་ཕུང་པོ་ལ་མ་ལྟོས་པར་བདག་ཏུ་ལྟ་བའི་ཕྱིར། དེས་ན་ཉི་ཤུར་ངེས་སོ། །བསྟན་བཅོས་ལས། སྔ་མ་བདག་ཕུང་གཞན་པ་ཉིད་ཀྱི་ཕྱོགས་གསུངས་པ་དང་། འདིར་ཡང་ཐོག་མར་བདག་ཕུང་གཞན་པའི་ཕྱོགས་དགག་པ་ནི་གཞན་མུ་སྟེགས་པའི་ལུགས་དགག་པའི་ཕྱིར་རོ། །ཞེས་བྱ་བར་ཤེས་པར་བྱའོ། །དེ་ལ་མདོ་ལས། འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་ནས་རྒྱུན་དུ་ཞུགས་པའི་འབྲས་བུ་མངོན་དུ་བྱས་སོ། །ཞེས་གསུངས་པའི་དོན་རྣམས་འགྲེལ་པར་འཇིག་ཚོགས་ལ་ལྟ་བའི་རི་བོ་འཕགས་པའི་ཡེ་ཤེས་ཀྱི་རྡོ་རྗེ་མ་བབས་པས་ཉིན་རེ་ཞིང་ཉོན་མོངས་པའི་བྲག་རྡོ་འཕེལ་བ། འཁོར་བ་ཐོག་མ་མེད་པ་ནས་བྱུང་བ། དཔངས་ཁམས་གསུམ་དུ་མཐོ་བ། ཕྱོགས་ཀྱི་ངོས་མ་ལུས་པ་ཁྱབ་པ། མ་རིག་པའི་གསེར་གྱི་ས་གཞི་ལས་འཐོན་པ། བདག་མེད་པ་ཁོང་དུ་ཆུད་པའི་རྡོ་རྗེས་བཤིག་པ་ན་རྩེ་མོ་ཆེས་མཐོ་བ་གང་དག་དང་ལྷན་ཅིག་འཇིག་པར་འགྱུར་བ་དེ་དག་ནི་རྩེ་མོ་ཡིན་པར་ཤེས་པར་བྱའོ། །ཞེས་གསུངས་སོ། །དེ་དག་གི་དོན་ཉོན་མོངས་པའི་བྲག་རྡོ་འཕེལ་བ་ནི་འཕེན་བྱེད་སོགས་འཁོར་བ་ཐོག་མེད་ནས་བྱུང་བ་ནི་འཁོར་བ་ཐོག་མེད་ཀྱི་གྲུབ་མཐའ་ངན་པས་བརྟགས་ཏེ་བཞག་པའི་ས་བོན་ཡིན་པ་དཔངས་ཁམས་གསུམ་དུ་མཐོ་བ་ནི་སྲིད་རྩེའི་བར་དུ་ཡོད་པ་ཕྱོགས་ཀྱི་ངོས་མ་ལུས་པ་ཁྱབ་པ་ནི། སོ་སྐྱེ་ཐམས་ཅད་ཀྱི་རྒྱུད་ལ་ཁྱབ་པ། མ་རིག་པའི་གསེར་གྱི་ས་གཞི་ལས་ཐོན་པ་ནི་ཕུང་པོ་ལ་བདེན་པར་འཛིན་པའི་བདེན་འཛིན་ལྷན་སྐྱེས་ལས་འཐོན་པ་རྩེ་མོ་ཆེས་མཐོ་བ་དང་ལྷན་ཅིག་འཇིག་པ་ནི་མདོ་ལས་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་ཞེས་པའི་དོན་འདི་ཉིད་ཡིན་ཞེས་པ་ཡིན་གྱི། རྩེ་མོ་དེ་དག་དང་འདི་ཐ་དད་དུ་བྱས་ནས་ལྷན་ཅིག་ཏུ་བཅོམ་ཞེས་པའི་དོན་ནི་མ་ཡིན་ནོ། །དེས་ན་འདིར་བརྟགས་པ་མཐའ་བཟུང་གི་ཚུལ་དུ་གསེར་གྱི་ས་གཞི་ལས་རི་ལྷུན་སྟུག་པ་གཅིག་ཐོན་ནས། དེ་ལ་རྩེ་མོ་སྲིད་རྩེར་སླེབ་པ་ཉི་ཤུ་ཡོད་པ་དཔེར་བྱས་ཏེ། དང་པོ་ནི་ཕུང་པོ་ལ་བདེན་པར་འཛིན་པའི་བདེན་འཛིན་ལྷན་སྐྱེས། གཉིས་པ་ནི་དེ་ལ་བརྟེན་ནས་ངར་འཛིན་པའི་ངར་འཛིན་ལྷན་སྐྱེས། གསུམ་པ་ནི་ཐོག་མ་མེད་པ་ནས་བྱུང་བའི་ཀུན་བཏགས་ཀྱི་ས་བོན་ཉི་ཤུ་ཡིན་པར་ཤེས་པར་བྱའོ། །གནད་འདི་མ་རྟོགས་པ་ཁ་ཅིག འདིར་འགྲེལ་པའི་འགྱུར་ལས་རྩེ་མོ་ཆེས་མཐོ་བ་གང་དག་དང་ལྷན་ཅིག་འཇིགས་པར་འགྱུར་བ་དེ་དག་ནི་རྩེ་མོ་ཡིན་པར་ཤེས་པར་བྱའོ་ཞེས་པ་འབྱུང་ཡང་། རྩ་བའི་འགྱུར་ལྟར་ན་རྩ་བའི་འཇིག་ལྟ་དང་ལྷན་ཅིག་ཅེས་འབྱུང་བ་ལྟར་བྱའོ། །དེའང་ལྷན་སྐྱེས་ཀྱི་འཇིག་ལྟར་ངར་འཛིན་སྔར་བཤད་པའི་ཉི་ཤུ་པོ་གང་ཡང་མ་ཡིན་པས་འཇིག་ཚོགས་ལྟ་རི་ལྷུན་སྟུག་ལ་གནས་པ་ཞེས་རྩེ་མོ་ཉི་ཤུའི་འཇིག་ལྟ་རྩ་བའི་འཇིག་ལྟ་ལ་གནས་པར་གསུངས་སོ། །གང་དང་ལྷན་ཅིག་ཏུ་ཉི་ཤུ་རྒྱུན་ཞུགས་ཀྱིས་སྤངས་པའི་རྩ་བའི་འཇིག་ལྟ་ཡང་ཀུན་བཏགས་ཡིན་ལ་ཞེས་བྲིས་སོ། །དེ་ནི་མི་འཐད་དེ། འདིར་རྩེ་མོ་ཉི་ཤུ་གང་ལ་གནས་པའི་རྩ་བའི་འཇིག་ལྟ་ཀུན་བཏགས་ཡིན་ན། འཇིག་ལྟ་ཀུན་བཏགས་ལ་ཉི་ཤུར་གྲངས་མ་ངེས་པར་ཐལ་བའི་ཕྱིར་དང་། རྩེ་མོ་ཉི་ཤུ་པོ་ལྷན་ཅིག་པའི་ཡུལ་ལ་འཆད་ན་གང་དང་ལྷན་ཅིག་ཏུ་ཉི་ཤུ་རྒྱུན་ཞུགས་ཀྱིས་སྤངས་པའི་རྩ་བའི་འཇིག་ལྟ་ཡང་ཞེས་རང་ཉིད་ཀྱིས་བཤད་པ་དང་འགལ་བའི་ཕྱིར་དང་། ལྷན་ཅིག་པ་པོ་ལ་འཆད་ན་མདོ་ལས་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་ནས་ཞེས་པའི་དོན། ལྟ་རི་བདག་མེད་རྟོགས་པའི་རྡོ་རྗེ་ཡིས། །བཅོམ་བདག་གང་དང་ཞེས་འབྱུང་བ་དང་འགལ་བའི་ཕྱིར་རོ། །དེས་ན་འདིར་རྒྱུན་ཞུགས་ཀྱིས་བཅོམ་པའི་ཚེ་ན་འཇིག་པ་ནི་རྩེ་མོ་ཉི་ཤུ་པོ་འདི་དག་ཡིན་ཞེས་པའི་དོན་ཡིན་པས་ལྷན་ཅིག་པའི་ཡུལ་དང་ལྷན་ཅིག་པ་པོ་ཐ་དད་དུ་མེད་པའི་འཆད་ཚུལ་ཤེས་དགོས་སོ། །གཉིས་པ་བརྗོད་དུ་མེད་པའི་གང་ཟག་དགག་པ་ལ་གཉིས་ཏེ། འདོད་པ་བརྗོད། སུན་འབྱིན་བཤད་པའོ། །དང་པོ་ནི། ཁ་ཅིག་སོགས་ཏེ། མང་པོས་བཀུར་བའི་སྡེ་པ་ཁ་ཅིག་གི་འདོད་པའོ། །འདིའང་ཕུང་པོ་ལ་མ་བརྟེན་པར་བདག་ཏུ་ལྟ་བས་སྔར་གྱི་འཇིག་ལྟ་ཉི་ཤུའི་གྲངས་སུ་མ་འདུས་པར་མངོན་ནོ། །གཉིས་པ་ལ་གསུམ་སྟེ། བརྗོད་དུ་མེད་ན་རྫས་སུ་ཡོད་མི་སྲིད། བརྗོད་དུ་མེད་ན་བརྟགས་པར་ཡོད་པར་བསྟན། དངོས་ཆོས་མེད་པས་དངོས་པོར་འགྲུབ་མི་འགྱུར་བའོ། །དང་པོ་ནི། གང་ཕྱིར་སོགས་ཏེ། རྫས་གཞན་དུ་ཡོད་པའི་དཔེ་གཟུགས་སེམས་གཉིས་ལ་འཇོག་པའོ། །གཉིས་པ་ནི། གང་ཕྱིར་སོགས་ཏེ། གཞན་དུ་བརྗོད་དུ་མེད་པའི་དཔེ་བུམ་པ་དང་བུམ་པའི་གཟུགས་སོགས་ལ་འཇོག་པའོ། །གསུམ་པ་ནི། ཁྱོད་ཀྱིས་སོགས་ཏེ། རིགས་པས་དཔྱད་བཟོད་ཀྱི་དངོས་པོ་ཡིན་ན་དེ་ཉིད་དང་གཞན་ཉིད་ལས་མ་འདས་པས། བདག་རིགས་པས་དཔྱད་བཟོད་ཀྱི་དངོས་པོར་མ་གྲུབ་ཅེས་མཇུག་བསྡུ་བའོ། །གཉིས་པ་བརྟེན་ནས་བཏགས་པའི་གང་ཟག་རྣམ་པར་གཞག་པ་ལ་གསུམ་སྟེ། སྔར་བཤད་རིགས་པས་བཏགས་ཡོད་གྲུབ། དེ་ཉིད་ཤིང་རྟའི་དཔེ་དང་སྦྱར། དེ་ལྟར་དཔྱད་པའི་འབྲས་བུ་བསྟན་པའོ། །དང་པོ་ནི། དེ་ཕྱིར་སོགས་ཏེ། སྔར་ཆོས་ཀྱི་བདག་མེད་སྒྲུབ་པའི་སྐབས་སུ་མཐའ་བཞིའི་སྐྱེ་བ་བདེན་པ་གཉིས་ཆར་དུ་ཡང་བཀག་ཟིན་ནས་དེ་ཕྱིར་རྒྱུ་མེད་པ་དང་དབང་ཕྱུག་གི ཞེས་སོགས་ཀྱིས་མཐའ་བཞིར་དཔྱད་པའི་ཚེ། སྐྱེ་བ་མ་རྙེད་ཀྱང་ཐ་སྙད་དུ་སྐྱེ་བ་མཐོང་བས་བརྟེན་ནས་འབྱུང་བའི་སྐྱེ་བ་འགྲུབ་པར་བསྟན་པ་བཞིན་འདིར་ཡང་བདག་རྣམ་པ་ལྔར་བཙལ་ན་བདེན་པ་གཉིས་ཆར་དུའང་མི་རྙེད་ཅིང་། ཐ་སྙད་དུ་བདག་གི་ཐ་སྙད་མཐོང་བའི་ཕྱིར་དང་། ངར་འཛིན་ལྷན་སྐྱེས་ཀྱི་དམིགས་པའི་ཡུལ་དུ་གྱུར་བའི་ང་ཙམ་དང་། བདག་ཙམ་དང་། གང་ཟག་ཙམ་དང་། སེམས་ཅན་ཙམ་ཐ་སྙད་བདེན་པའི་དོན་དུ་ཁས་བླངས་ཉེས་པ་སྟེ། ས་བོན་ལས་མྱུ་གུ་སྐྱེ་བ་ཐ་སྙད་དུ་ཁས་བླངས་པ་ལ་བརྟེན་ནས། མཐའ་བཞི་ཆར་བཙལ་ན་མི་རྙེད་པའི་ཆོས་ཀྱི་བདག་མེད་རྟོགས་པའི་བློ་འབྱུང་བ་ལྟར། བདག་དང་སེམས་ཅན་སོགས་ཐ་སྙད་དུ་ཁས་བླངས་པ་ལ་བརྟེན་ནས་རྣམ་པ་ལྔར་བཙལ་ན་མ་རྙེད་པའི་གང་ཟག་གི་བདག་མེད་རྟོགས་པའི་བློ་འབྱུང་བའི་ཕྱིར་དང་། ཚུལ་འདི་སློབ་དཔོན་འདིས། ཐ་སྙད་བདེན་པ་ཐབས་སུ་གྱུར་པ་དང་། དོན་དམ་བདེན་པ་ཐབས་བྱུང་དུ་གྱུར་པར་གསུངས་པའི་གནད་དམ་པ་ཡིན་པའི་ཕྱིར་རོ། །འགྲེལ་པར་དེའི་ཕྱིར་བདག་རྟག་པའམ་མ་དམིགས་པར་འདོད་པས་ཀྱང་རུང་སྟེ། ཇི་སྐད་སྨྲས་པའི་རྣམ་པ་དག་གིས་བདག་ཁས་བླང་བར་མི་བྱའོ། །ཞེས་བཤད་པ་ནི། འདི་ནི་ཕུང་པོ་རྣམས་བརྟེན་འགྲུབ་པར་འགྱུར། །ཞེས་བྱ་བའོ། །ཇི་ལྟར་འདི་ལ་བརྟེན་ནས་འདི་འབྱུང་ཞེས་བྱ་བ་འདི་ཙམ་ཞིག་ཀུན་རྫོབ་ཀྱི་བདེན་པའི་རྣམ་པར་བཞག་པ་མ་ཆད་པར་བྱ་བའི་ཕྱིར་ཁས་ལེན་གྱི་རྒྱུ་མེད་པ་ལ་སོགས་པ་དག་ལས་སྐྱེ་བ་མ་ཡིན་པ་དེ་བཞིན་དུ། འདིར་ཡང་བརྟེན་ནས་བརྟགས་པ་ལ་ཡང་དག་པར་བརྟེན་པ་ན། ཇི་སྐད་བཤད་པའི་སྐྱོན་དང་ལྡན་པའི་རྣམ་པ་བསལ་ནས་ཕུང་པོ་རྣམས་ལ་བརྟེན་ནས་གདགས་པ་ཞེས་བྱ་བ་འདི་ཙམ་ཞིག འཇིག་རྟེན་གྱི་ཐ་སྙད་རྣམ་པར་གནས་པར་བྱ་བའི་ཕྱིར་ཁས་བླང་བར་བྱ་སྟེ། བདག་ཏུ་ཐ་སྙད་བརྟགས་པ་མཐོང་བའི་ཕྱིར་རོ། །ཞེས་གསུངས་སོ། །གཉིས་པ་ལ་གཉིས་ཏེ། མདོར་བསྟན། རྒྱས་པར་བཤད་པའོ། །དང་པོ་ནི། ཤིང་རྟ་རང་ཡིན་སོགས་ཏེ། བདག་རྣམ་པ་ལྔར་བཙལ་ན་མི་རྙེད་ཀྱང་། བརྟེན་ནས་བཏགས་པ་ཙམ་དུ་གྲུབ་པའི་དོན་དེ་ཉིད་ཕྱི་རོལ་གྱི་དཔེའི་སྒོ་ནས་བསྟན་པ་སྟེ། ཚོགས་པ་དང་དབྱིབས་ཤིང་རྟ་ཡིན་པ་འགོག་པ་ནི་དཔེ་ཉིད་ལ་དོགས་པ་གཅོད་པའི་ཆེད་དུ་སློབ་དཔོན་འདིས་བསྣན་པའོ། །གཉིས་པ་ལ་གཉིས་ཏེ། དཔེ་སྒྲུབ། དོན་ལ་སྦྱར་བའོ། །དང་པོ་ལ་གསུམ་སྟེ། རྣམ་བདུན་རིགས་པས་དཔྱད་ན་རྫས་སུ་མེད། མ་དཔྱད་འཇིག་རྟེན་ཉིད་ལས་ཤིང་རྟ་འགྲུབ། རྣམ་བདུན་རིགས་པས་དཔྱད་པའི་ཕན་ཡོན་བསྟན་པའོ། །དང་པོ་ལ་གཉིས་ཏེ། ཚོགས་ཙམ་ཤིང་རྟ་ཉིད་མ་ཡིན། ཚོགས་དབྱིབས་ཤིང་རྟ་ཉིད་མ་ཡིན་པའོ། །དང་པོ་ནི། གལ་ཏེ་ཚོགས་ཙམ་ཤིང་རྟར་འགྱུར་ན་ནི་སོགས་ཏེ། ཕྱོགས་ལྔ་པོ་དག་ནི་སྔར་བརྟན་ཟིན་པས་འདིར་ཚོགས་པའི་ཕྱོགས་དང་། དབྱིབས་ཀྱི་ཕྱོགས་གཉིས་ལ་དཔྱད་དགོས་པས་ཚོགས་པ་ཤིང་རྟ་ཡིན་པ་ལ་གནོད་བྱེད་ཀྱི་རིགས་པ་སྟོན་པའོ། །གཉིས་པ་ལ་བཞི་སྟེ། ཡན་ལག་མེད་པའི་ཚོགས་དབྱིབས་ཤིང་རྟ་མིན། ཡན་ལག་རེ་རེའི་དབྱིབས་ཀྱང་ཤིང་རྟ་མིན། ཡན་ལག་ཚོགས་པའི་དབྱིབས་ཀྱང་ཤིང་རྟ་མིན། ཚུལ་དེས་རིགས་ཅན་གཞན་ཡང་དེ་ལྟར་གྲུབ་པའོ། །དང་པོ་ནི། གང་ཕྱིར་ཡན་ལག་ཅན་མེད་ཡན་ལག་དག མེད་པས་སོགས་ཏེ། ཕ་རོལ་པོས་ཡན་ལག་ཅན་རྫས་སུ་མེད་ཅིང་། ཡན་ལག་རྫས་སུ་འདོད་པ་ལ་ཁས་བླངས་ནང་འགལ་སྟོན་པའོ། །གཉིས་པ་ནི། ཁྱོད་དབྱིབས་སོགས་སོ། །གསུམ་པ་ནི། གང་ཕྱིར་སོགས་ཏེ་ཡན་ལག་ཚོགས་པ་རྫས་སུ་མེད་པས་དེ་ལ་དབྱིབས་སུ་འདོགས་པ་འགལ་ཅེས་པ་སྟེ། ཕ་རོལ་པོ་གདགས་གཞི་རྫས་ཡོད་ལ་གདགས་ཆོས་བཏགས་ཡོད་བཏགས་པར་འདོད་པ་ལ་ཁས་བླངས་ནང་འགལ་སྟོན་པའོ། །གལ་ཏེ་ཚོགས་པ་མི་བདེན་པ་ལ་དབྱིབས་མི་བདེན་པ་བཏགས་པའོ་སྙམ་ན་དེ་ལྟར་ན་བརྟེན་ནས་བཏགས་པ་ཐམས་ཅད་ལ་དེ་ལྟར་འདོད་པར་གྱིས་ཤིག་ཅེས་པའོ། །ཁ་ཅིག་ཕ་རོལ་པོས་བཏགས་ཡོད་ཀྱི་དངོས་པོ་རྣམས་རང་རྐྱ་ཐུབ་པའི་རྫས་ཡོད་དེ་གདགས་གཞི་ཡོད་པ་ལ་བརྟེན་ནས་འདོགས་པར་ཁས་ལེན་ཅིང་ཚོགས་པ་དང་དབྱིབས་གཉིས་ལ་ཡང་བཏགས་ཡོད་དུ་འདོད་པའི་ཚོགས་དབྱིབས་ཀྱི་གདགས་གཞིར་འདོད་ན་འགལ་བ་ཙམ་ལས་མ་མཛད་ཀྱང་ཞེས་བྲིས་པ་ནི་འགྲེལ་པར་གང་འགའ་ཞིག་གསུང་རབ་ཀྱི་དོན་ཕྱིན་ཅི་ལོག་ཏུ་རྟོགས་པས་ཡན་ལག་ཚོགས་པ་ཙམ་ཞིག་ཡོད་ཀྱི་ཡང་ཡན་ལག་ཅན་ནི་རྣམ་པ་ཐམས་ཅད་དུ་ཡོད་པ་མ་ཡིན་ཏེ་ཞེས་ཕ་རོལ་པོས་ཡན་ལག་ཕྱི་རོལ་རྫས་སུ་ཡོད་པར་ཁས་བླངས་པར་གསུངས་པ་དང་འགལ་ལོ། །བཞི་པ་ནི། འདིས་ནི་སོགས་སོ། །གཉིས་པ་མ་དཔྱད་འཇིག་རྟེན་ཉིད་ལས་ཤིང་རྟ་འགྲུབ་པ་ལ་གཉིས་སྟེ། བརྟན་ནས་བཏགས་ཚེ་ཤིང་རྟའི་ཐ་སྙད་འགྲུབ། ཚུལ་དེས་ཡན་ལག་ཅན་སོགས་ཐ་སྙད་འགྲུབ་པའོ། །དང་པོ་ནི། དེ་ནི་སོགས་ཏེ། གལ་ཏེ་རྣམ་པ་བདུན་གྱིས་བཙལ་བ་ན་ཤིང་རྟ་ཡོད་པ་མ་ཡིན་པས་འཇིག་རྟེན་ན་ཤིང་རྟའི་ཐ་སྙད་འདོགས་པ་དེ་རྒྱུན་ཆད་པར་འགྱུར་ལ། དེ་ལྟར་ན་ཤིང་རྟ་འོན་ཅིག ཤིང་རྟ་ཉོས་ཤིག ཤིང་རྟ་ཆོས་ཤིག་ཅེས་བྱ་བ་ལ་སོགས་པ་མཐོང་བ་དང་འགལ་ལོ། །དེའི་ཕྱིར་འཇིག་རྟེན་ན་གྲགས་པའི་ཕྱིར་ན་ཤིང་རྟ་ལ་སོགས་པ་ཡོད་པ་ཉིད་དུ་བརྗོད་པར་བྱའོ་ཞེ་ན་ཉེས་པ་འདི་ནི་ཁྱོད་ཁོ་ན་ལ་འགྱུར་ཏེ། རྣམ་པ་བདུན་གྱིས་བཙལ་ན་ཤིང་རྟ་མི་རྙེད་ཅིང་། ཁྱོད་ཀྱིས་ཤིང་རྟ་རྣམ་པར་དཔྱད་ནས་འཇོག་པར་བྱེད་ལ། མ་དཔྱད་པར་འགྲུབ་པའི་ཐབས་གཞན་ཁས་མ་བླངས་པའི་ཕྱིར་རོ། །ཁོ་བོ་ཅག་ལ་ནི་ཉེས་པ་འདི་མེད་དེ། རྣམ་པ་བདུན་གྱིས་མ་དཔྱད་པར་བརྟེན་ནས་བཏགས་པ་ཙམ་ཞིག་ཁས་བླངས་པས་འཇིག་རྟེན་གྱི་ཐ་སྙད་རྒྱུན་ཆད་པའི་ཉེས་པ་མེད་པའི་ཕྱིར་རོ། །ཞེས་པ་སྟེ། རིགས་པ་འདིས་དེང་སང་བོད་ཀྱི་ཐལ་འགྱུར་བ་འཇིག་རྟེན་རྒྱང་འཕེན་པ་ལྟར་ཐ་སྙད་གང་ཡང་ཁས་མི་ལེན་པ་ཐམས་ཅད་བཀག་པར་ཤེས་པར་བྱའོ། །གཉིས་པ་ནི། དེ་ཉིད་སོགས་ཏེ། ཤིང་རྟའི་ཐ་སྙད་འཇིག་རྟེན་ལ་གྲགས་པའི་སྒོ་ནས་གྲུབ་པར་མ་ཟད་འདིའི་མིང་གི་ཁྱད་པར་ཡན་ལག་ལ་ལྟོས་ནས་ཡན་ལག་ཅན་དང་། ཆ་ཤས་ལ་ལྟོས་ནས་ཆ་ཤས་ཅན་ལ་སོགས་པ་ཐམས་ཅད་ཀྱང་འཇིག་རྟེན་ལ་གྲགས་པའི་སྒོ་ནས་བརྟེན་ནས་བཏགས་པ་ཙམ་ཞིག་སྒྲུབ་པར་བསྟན་པའོ། །གལ་ཏེ་ཡན་ལག་དང་ཆ་ཤས་དང་ཉེ་བར་ལེན་པ་བྱ་བ་དང་། ཉེ་བར་ལེན་པ་ནི་རྫས་སུ་ཡོད་ཀྱི་ཡན་ལག་ཅན་ལ་སོགས་པ་མེད་པར་འདོད་པ་ཁྱོད་ལ་རིགས་པ་དེ་ཉིད་ཀྱིས་ཡན་ལག་ལ་སོགས་པ་ཡང་མི་རྙེད་པའི་འཇིག་རྟེན་གྲགས་པའི་ཀུན་རྫོབ་མ་བརླག་ཅིག་ཅེས་འདི་ནི་བཟློག་པར་བྱ་བ་ཁོ་ནའོ། །གསུམ་པ་རྣམ་བདུན་རིགས་པས་དཔྱད་པའི་ཕན་ཡོན་བསྟན་པ་ལ་གཉིས་ཏེ། གནས་ལུགས་དོན་ལ་འཇུག་པར་བསྟན། ཡན་ལག་ཅན་སོགས་ཁེགས་པར་བསྟན་པའོ། །དང་པོ་ནི། རྣམ་བདུན་སོགས་སོ། །གཉིས་པ་ནི་ཤིང་རྟ་སོགས་ཏེ། ཤིང་རྟ་ཞིག་པའི་ཚེ་འཕང་ལོ་སོགས་དམིགས་པ་མ་ཡིན་ནམ་ཅིའི་ཕྱིར་ཡན་ལག་ཅན་མེད་པར་ཡན་ལག་དེ་དག་མེད་པར་བརྗོད་ཅེ་ན། དེ་ནི་མ་ཡིན་ཏེ་ཤིང་རྟ་དང་འབྲེལ་བའི་ཚེ་འཕང་ལོ་ལ་སོགས་པ་འདི་དག་ནི་ཤིང་རྟའི་ཡིན་ནོ་སྙམ་དུ་རྟོགས་ཀྱི་ཤིང་རྟ་ཞིག་པའི་ཚེ་དེ་ལྟར་མི་རྟོགས་པར་འདི་ནི་འཕང་ལོའོ་ཞེས་སོགས་ཙམ་ཞིག་རྟོགས་པའི་ཕྱིར། དེའི་དཔེ་ཚིག་རྐང་ཕྱི་མ་གཉིས་ཀྱིས་སྟོན་ཏེ། འདི་ནི་སློབ་དཔོན་འདིའི་རིགས་པ་གྲུབ་མཐའ་འོག་མ་ལ་གནས་པ་རྣམས་ཀྱི་བློ་ཡུལ་དུ་ཡང་མི་འཆར་བའི་ཁྱད་པར་བ་ཞིག་གོ །གཉིས་པ་དོན་ལ་སྦྱར་བ་ལ་བཞི་སྟེ། བརྟེན་ནས་བརྟག་ཚེ་ལེན་པ་པོ་སོགས་འགྲུབ། རྣམ་པར་དཔྱད་ཚེ་སྤྲོས་པ་མ་ལུས་བཟློག ངར་འཛིན་དམིགས་པ་གཏི་མུག་དབང་གིས་བཞག ཚུལ་དེས་བདག་གི་བ་ཡང་ཁེགས་པར་བསྟན་པའོ། །དང་པོ་ནི། དེ་བཞིན་སོགས་ཏེ། ཤིང་རྟ་དང་ཤིང་རྟའི་ཡན་ལག་དཔེར་བྱས་ནས་བདག་དང་ཕུང་སོགས་ལའང་ཉེ་བར་ལེན་པ་པོ་དང་། ཉེ་བར་བླང་བྱ་སོགས་ཀྱི་ཐ་སྙད་མ་དཔྱད་པའི་བློ་ངོར་གྲུབ་ཅེས་པའོ། །གཉིས་པ་ནི། དངོས་ཡོད་སོགས་ཏེ། རྣམ་པར་དཔྱད་པའི་ཚེ་ན་དགག་པ་དང་སྒྲུབ་པའི་ཐ་སྙད་ཐམས་ཅད་བཟློག་ཅེས་པའོ། །གསུམ་པ་ནི། གང་ལ་སོགས་ཏེ། གང་ལ་དམིགས་ནས་བདག་འཛིན་འབྱུང་བའི་དམིགས་པའི་ཡུལ་གྱི་བདག་དེ་ནི་གནས་ལུགས་མི་ཤེས་པའི་མ་རིག་པའི་དབང་གིས་མ་བརྟག་པའི་བློ་ངོར་གྲུབ་པ་ཡིན་པས་དེ་འཛིན་པའི་བློ་ནི་མ་རིག་པ་ཡིན་ཅེས་པའོ། །བཞི་པ་ནི། གང་ཕྱིར་སོགས་སོ། །གསུམ་པ་དེ་ལྟར་དཔྱད་པའི་འབྲས་བུ་བསྟན་པ་ནི། དེ་ཕྱིར་སོགས་སོ། །གསུམ་པ་རིགས་པའི་ཚུལ་དེ་དངོས་པོ་ཀུན་ལ་བསྒྲེ་བ་ལ་གསུམ་སྟེ། བརྟེན་ནས་བཏགས་པའི་དངོས་པོ་ཀུན་ལ་བསྒྲེ། ཁྱད་པར་བྱ་བྱེད་དངོས་པོ་ཀུན་ལ་བསྒྲེ། རྒྱུ་དང་འབྲས་བུ་དངོས་པོ་ཀུན་ལ་བསྒྲེ་བའོ། །དང་པོ་ནི། བུམ་པ་སོགས་ཏེ། འོག་གི་དེ་རྣམས་ཤིང་རྟའི་རྣམ་དཔྱད་བྱས་པས་ཞེས་སོགས་ཚིག་རྐང་གཉིས་སྦྱར་ཏེ། ཇི་ལྟར་བདག་དང་ཕུང་པོའི་གདགས་པ་ཤིང་རྟའི་རྣམ་དཔྱད་དང་མཚུངས་པ་དེ་བཞིན་དུ་དངོས་པོ་གཞན་རྣམས་ཀྱི་ཡང་ཡིན་ནོ་ཞེས་བསྒྲེ་བའི་ཕྱིར་ཡིན་ནོ། །དེར་མ་ཟད་ཐ་སྙད་གང་དག་གི་སྒོ་ནས་སྐྱེ་བོ་འདིས་ཐ་སྙད་བསྙད་པ་དེ་རྣམས་ཀྱང་རྟོགས་པར་བྱ་སྟེ། འཇིག་རྟེན་གྱི་གྲགས་པ་ལ་གནོད་པར་མི་བྱ་བའི་ཕྱིར་རོ། །གཉིས་པ་ནི། ཡན་ལག་སོགས་ཏེ། ཡན་ལག་དང་ཡན་ལག་ཅན་ལ་སོགས་པ་ཐམས་ཅད་ལ་ཡང་ཤིང་རྟའི་རྣམ་དཔྱད་མཚུངས་ཅེས་པའོ། གསུམ་པ་ལ་གསུམ་སྟེ། རིགས་པ་སྔ་མས་རྒྱུ་འབྲས་རང་བཞིན་མེད། ཕྲད་དང་མ་ཕྲད་དཔྱད་ཚེ་རང་བཞིན་མེད། དེ་ལ་རང་ལ་མཚུངས་སོགས་སྐྱོན་གཉིས་སྤང་བའོ། །དང་པོ་ནི། གལ་ཏེ་སོགས་ཏེ། རྒྱུ་དང་འབྲས་བུ་ཡང་ཡན་ལག་དང་། ཡན་ལག་ཅན་ལྟར་ཕན་ཚུན་ལྟོས་ནས་འཇོག་པས་རྣམ་པར་དཔྱད་པའི་ཚེ་མི་རྙེད་ཀྱང་མ་དཔྱད་པ་འཇིག་རྟེན་གྱི་གྲགས་པའི་སྒོ་ནས་འགྲུབ་ཅེས་པའོ། །གཉིས་པ་ནི། གལ་ཏེ་སོགས་ཏེ། ཚིགས་བཅད་དང་པོས་རྒྱུ་འབྲས་ཕྲད་མ་ཕྲད་དཔྱད་པའི་ཚེ་མི་རྙེད་ཅིང་། དེ་གཉིས་ལས་གཞན་དུ་རྒྱུ་འབྲས་རང་བཞིན་གྱིས་གྲུབ་པའི་སྒྲུབ་བྱེད་ཀྱང་མེད་པས་རྒྱུ་འབྲས་རང་བཞིན་གྱིས་མ་གྲུབ་ཅེས་སྟོན་ལ། ཚིགས་བཅད་ཕྱི་མས་དེ་ལྟ་བུའི་དཔྱད་པ་མེད་པར་ཕན་ཚུན་ལྟོས་ནས་རྒྱུ་འབྲས་འཇིག་རྟེན་ན་གྲགས་པའི་སྒོ་ནས་ཁས་བླངས་ཞེས་པའོ། །གསུམ་པ་ལ་གཉིས་ཏེ། རྩོད་པ་འགོད། སུན་འབྱིན་བཤད་པའོ། །དང་པོ་ནི་སུན་འབྱིན་སོགས་ཏེ། རྒྱུས་འབྲས་བུ་ཕྲད་ནས་བསྐྱེད་དམ་མ་འཕྲད་པར་བསྐྱེད་ཅེས་པའི་རིགས་པ་འདི་དབུ་མ་པ་ཁྱོད་ཀྱི་སུན་འབྱིན་གྱིས་སུན་དབྱུང་བྱ་སུན་འབྱིན་པ་ལ་ཡང་མཚུངས་པས། སུན་དབྱུང་བྱ་སུན་འབྱིན་མི་ནུས་པར་འགྱུར་རོ། །གཞན་ཡང་དབུ་མ་པ་ཁྱོད་སྐྱེ་བོ་དམ་པས་བཞེད་པར་མི་འགྱུར་ཏེ། གོང་དུ་བཤད་པ་ལྟར་རང་གི་ཚིག་ལའང་ཐལ་བ་མཚུངས་པའི་ལྟག་ཆོད་སྨྲས་པའི་ཕྱིར་དང་། མ་ཕྲད་པར་མཚུངས་པས་སྐྱེད་པར་བྱེད་པ་ཉིད་མ་ཡིན་ནོ་ཞེས་བྱ་བ་འདིའང་དངོས་པོ་མཐའ་དག་ལ་བསྐུར་བ་འདེབས་པ་ཡིན་པའི་ཕྱིར་ཏེ། ཁབ་ལེན་གྱིས་མ་ཕྲད་པར་རུང་བའི་ཡུལ་ན་གནས་པའི་ལྕགས་འདྲེན་པ་བཞིན་དུ་མིག་གིས་མ་ཕྲད་པར་རུང་བའི་ཡུལ་ན་གནས་པའི་གཟུགས་འཛིན་པའི་ཕྱིར་རོ། །གཞན་ཡང་སུན་ཅི་ཕྱིན་དུ་རྒོལ་པ་ཉིད་དུའང་འགྱུར་ཏེ། རང་གི་ཕྱོགས་གཞག་པ་དང་བྲལ་ཞིང་གཞན་གྱི་ཕྱོགས་སེལ་བ་ཙམ་ལ་ཞུགས་པའི་ཕྱིར་རོ་ཞེ་ན། གཉིས་པ་ལ་གཉིས་ཏེ། ཁས་བླངས་མེད་པས་རྩོད་པ་སེལ། སུམ་འབྱིན་ལྷག་མས་རྩོད་པ་སེལ་བའོ། །དང་པོ་ལ་བཞི་སྟེ། བདེན་ཕྱོགས་མེད་པས་རྩོད་པའི་ཉེས་མི་མཚུངས། མ་དཔྱད་ཚེ་ན་བྱ་བྱེད་འཐད་པའི་དཔེ། དཔྱད་པའི་ཉེས་པ་གཞན་སྐྱོན་ཁོ་ནར་བསྟན། རང་བཞིན་སྒྲུབ་པའི་གཏན་ཚིགས་དགོས་པ་མེད་པའོ། །དང་པོ་ནི། སུན་འབྱིན་སོགས་ཏེ། སུན་དབྱུང་བྱ་དང་འབྱིན་བྱེད་རང་བཞིན་གྱིས་གྲུབ་པའི་ཕྱོགས་ཁས་མ་བླངས་པས་རང་གི་ཚིགས་ལ་ཐལ་བ་མཚུངས་པའི་ལྟག་ཆོད་དུ་མི་འགྱུར་ཞེས་པའོ། །གཉིས་པ་ལ་གཉིས་ཏེ། སུན་འབྱིན་བྱ་བྱེད་འཐད་པའི་དཔེ། སྒྲུབ་པའི་བྱ་བྱེད་འཐད་པའི་དཔེའོ། །དང་པོ་ནི། ཇི་ལྟར་སོགས་ཏེ། ཕྲད་མ་ཕྲད་ཀྱི་དཔྱད་པ་བོར་ནས་བརྟེན་ནས་བཏགས་པ་ཙམ་གྱི་སུན་དབྱུང་བྱ་སུན་འབྱིན་པའི་རྣམ་གཞག་འཐད་ཅེས་པའོ། །གཉིས་པ་ནི། མི་བདེན་སོགས་ཏེ། དངོས་པོ་བཏགས་ཡོད་དུ་ཁས་བླངས་པ་དབུ་མ་པའི་ཕྱོགས་ལ་ཕྲད་མ་ཕྲད་ཀྱི་རིགས་པས་རྣམ་པ་ཐམས་ཅད་དུ་གླགས་མི་རྙེད་དོ། །ཇི་སྐད་དུ་འཕགས་པའི་ལྷས། ཡོད་དང་མེད་དང་ཡོད་མེད་ཅེས། །གང་ལ་ཕྱོགས་ནི་ཡོད་མིན་པ། །དེ་ལ་ཡུན་ནི་རིང་པོ་ནའང་། །ཀླན་ཀ་བརྗོད་པར་ནུས་མ་ཡིན། །ཞེས་བྱ་བ་དང་། རྩ་ཤེར་ལས། སྟོང་པ་ཉིད་ཀྱིས་བརྩད་བྱས་ཚེ། །གང་ཞིག་ལན་འདེབས་སྨྲ་བྱེད་པ། །དེ་ཡིས་ཐམས་ཅད་ལན་བཏབ་མིན། །བསྒྲུབ་པར་བྱ་དང་མཚུངས་པར་འགྱུར། །ཞེས་གསུངས་སོ། །དེ་ལྟ་བུའི་རྩོད་པ་བོར་ནས། ཐ་སྙད་དུ་བསྒྲུབ་བྱ་སྒྲུབ་བྱེད་འཐད་པའི་དཔེ་ནི་མེ་ལོང་གི་གཟུགས་བརྙན་ལ་རང་གི་བྱད་བཞིན་མཛེས་པར་སྒྲུབ་པའི་ནུས་པ་ཡོད་པར་བཀོད་པའོ། །འདིས་ནི་སྐྱེད་པར་བྱེད་པའི་རྒྱུ་ཁས་ལེན་ཚུལ་ཡང་ཤེས་པར་བྱའོ། །སྔར་གྱི་རྩོད་པ་དེ་དག་གི་ལན་དུ་སློབ་དཔོན་ལེགས་ལྡན་འབྱེད་ཀྱིས་དབུ་མའི་བསྟན་བཅོས་འདིར་སྐྱེ་བྱེད་ཀྱི་རྒྱུ་སྐབས་སུ་བབ་ཀྱི། གསལ་བར་བྱེད་པའི་རྒྱུ་ནི་མ་ཡིན་ལ། ཁྱོད་ཀྱིས་ཕྲད་མ་ཕྲད་ཀྱི་རྒོལ་བ་ནི་གསལ་བར་བྱེད་པའི་རྒྱུ་ལ་སྨྲས་པ་ཡིན་གྱི། སྐྱེད་པར་བྱེད་པའི་རྒྱུ་ལ་ནི་མ་ཡིན་པས་ཁོ་བོ་ཅག་གི་ཚིག་རྣམས་ལ་ལྟག་ཆོད་ཀྱི་སྐབས་མེད་དོ་ཞེས་སྨྲ་བར་བྱེད་པ་ནི་འདིའི་ལན་མ་ཡིན་ཏེ། གཞན་གྱི་གླགས་དང་བཅས་པའི་ལན་བརྗོད་ན་ཕ་རོལ་པོ་མི་བཟོད་ལ། སྐྱེད་བྱེད་ཀྱི་རྒྱུ་ལ་བདེན་པར་ཁས་བླངས་ན་ཕྲད་མ་ཕྲད་ཀྱི་དཔྱད་པ་འཇུག་པ་ལྟར་གསལ་བྱེད་ཀྱི་རྒྱུ་ལའང་རང་བཞིན་གྱིས་གྲུབ་པར་ཁས་བླངས་ན་སྐྱོན་འདི་འཇུག་པར་མཚུངས་པའི་ཕྱིར་རོ། །གཞན་ཡང་ལེགས་ལྡན་འདིས་དབུ་མའི་བསྟན་བཅོས་སུ་རང་བཞིན་མེད་པར་དམ་བཅས་པའི་དོན་སྒྲུབ་པའི་ཕྱིར་དུ་བཀོད་པའི་སྒྲུབ་བྱེད་ལ་གཞན་གྱིས་སུན་འབྱིན་པ་བཀོད་པ་རྣམས་ཀྱི་སྐྱོན་སྤོང་ལ་ལྟག་ཆོད་ཀྱི་ལན་སྨྲ་བར་བྱེད་པས་འདི་ནི་གཞན་གྱིས་སུན་དབྱུང་བར་བྱ་བ་ཁོ་ན་ཡིན་ནོ། །དེས་ན་ཁོ་བོ་ཅག་གིས་རང་བཞིན་གྱིས་གྲུབ་པའི་ཕྱོགས་ཁས་བླངས་ན་སྐྱེད་བྱེད་དང་གསལ་བྱེད་ཀྱི་རྒྱུ་གཉིས་ཀ་ལ་ཡང་ཕྲད་མ་ཕྲད་ཀྱི་དཔྱད་པ་འཇུག་པས་དེ་ཁས་མི་ལེན་ཅེས་པའི་ལན་ཁོ་ན་མཛེས་སོ། །གསུམ་པ་ནི། གལ་ཏེ་སོགས་སོ། །བཞི་པ་ནི། དངོས་རྣམས་སོགས་ཏེ། དངོས་པོར་རང་བཞིན་མེད་པར་བསྒྲུབ་པའི་དཔེ་རྨི་ལམ་དང་སྒྱུ་མ་སོགས་ཡོད་པས་རང་བཞིན་མེད་པར་རྟོགས་སུ་གཞུག་པར་ནུས་ལ་དངོས་པོ་བདེན་པར་བསྒྲུབ་པའི་དཔེ་མེད་པས་དེ་རྟོགས་སུ་གཞུག་པར་མི་ནུས་སོ། །དེའི་ཕྱིར་རྟོགས་གེ་བ་ཁྱོད་ལྷན་སྐྱེས་ཀྱི་བདེན་འཛིན་དར་གྱི་ཁ་ཆུས་བཏུམས་པའི་སྟེང་དུ་ཀུན་བཏགས་ཀྱི་བདེན་འཛིན་གྱི་རྒྱ་སྲན་ཏེ་མ་བཙུགས་ཏེ་འཇིག་རྟེན་བསླུ་བར་མ་བྱེད་ཅིག་ཅེས་པའོ། །གཉིས་པ་ནི། །སུན་འབྱིན་སོགས་ཏེ། སུན་འབྱིན་ལྷག་མ་གོང་དུ་བསྟན་པ་རྟེན་ཅིང་འབྲེལ་བར་འབྱུང་བ་རྣམ་པར་བཞག་པའི་སྐབས་སུ་མཐའ་བཞིའི་སྐྱེ་བ་བཀག་ནས་བརྟེན་ནས་འབྱུང་བའི་སྐྱེ་བ་ཁས་བླངས་པ་དང་། བརྟེན་ནས་བཏགས་པ་རྣམ་པར་གཞག་པའི་སྐབས་སུ་གང་ཟག་རྣམ་པ་བདུན་བཙལ་ན་མི་རྙེད་ཀྱང་བརྟེན་ནས་བཏགས་པའི་གང་ཟག་ཁས་བླངས་པ་གཉིས་ཡིན་ལ། དེ་ཉིད་འདིར་ཕྲད་ནས་བསྐྱེད་དམ་མ་ཕྲད་པར་བསྐྱེད་ཅེས་པའི་སུན་འབྱིན་གྱི་ལན་གྱི་ཆེད་དུ་བཏང་བར་བྱ་སྟེ། དེར་ཆོས་དང་གང་ཟག་རང་བཞིན་གྱིས་འགྲུབ་པའི་ཕྱོགས་ལ་གནོད་བྱེད་བརྗོད་པ་ཐམས་ཅད་འདིར་རྒྱུ་འབྲས་རང་བཞིན་གྱིས་གྲུབ་པའི་ཕྱོགས་ལ་བརྗོད་ནུས་པའི་ཕྱིར་དང་། དེར་རང་ཕྱོགས་ལ་སྐྱོན་སྤོང་ཚུལ་གྱི་རྣམ་བཞག་རྣམས་འདིར་རང་ལ་ཕྲད་མ་ཕྲད་ཀྱི་དཔྱད་པ་མི་མཚུངས་པའི་ལན་དུ་ཡང་འགྱུར་བའི་ཕྱིར་རོ། །སུན་ཅི་ཕྱིན་གྱི་རྒོལ་བར་མི་འགྱུར་བ་ཡང་སྔར་བཤད་ཟིན་ཏེ། རྟོག་རྣམས་ལོག་པར་འགྱུར་བ་གང་ཡིན་པ། །རྣམ་པར་དཔྱོད་པའི་འབྲས་བུ་མཁས་རྣམས་གསུངས། །ཞེས་རྣམ་པར་རྟོག་པ་ལྡོག་པ་ཉིད་བརྗོད་པར་འདོད་ཀྱི་དོན་དམ་པར་སུས་ཀྱང་རང་གི་ཕྱོགས་མ་བཞག་ཅིང་གཞན་གྱི་ཕྱོགས་བཟློག་པ་ཡང་མེད་པའི་ཕྱིར་རོ། །རང་གི་ཚིག་ལ་ཐལ་བ་མཚུངས་པའི་རྩོད་པ་དང་། སུན་ཅི་ཕྱིན་དུ་རྒོལ་བར་ཐལ་བའི་རྩོད་པ་གཉིས་ལ་གནོད་བྱེད་དུ་བརྗོད་པའི་སུན་འབྱིན་གྱི་ལྷག་མ་དངོས་པོ་མཐའ་དག་ལ་སྐུར་བ་འདེབས་པར་ཐལ་བའི་རྩོད་པའི་སུན་འབྱིན་བདེན་གཉིས་ཀྱི་ལན་གྱི་ཕྱོགས་འདི་ཉིད་ཀྱིས་རྟོགས་པར་བྱ་སྟེ། ཐ་སྙད་དུ་རྟེན་འབྱུང་གི་སྐྱེ་བ་ཁས་བླངས་པ་ཡིན་ལ། དོན་དམ་པར་ནི་སྐུར་བ་གདབ་པར་བྱ་བའི་ཡུལ་དང་། འདེབས་པ་པོ་གཉིས་ཀ་ཡང་ཡོད་པ་མ་ཡིན་པའི་ཕྱིར་རོ། །འདི་དག་ལ་སྔ་མ་དག་བདག་མེད་རིགས་པས་བསྒྲུབ་པ་ཞེས་དང་། འདི་མན་ཆད་ལ་ལུང་གིས་སྒྲུབ་པ་ཞེས་པའི་ས་བཅད་མཛད་མོད་ཀྱིས་སློབ་དཔོན་འདིའི་བཞེད་པ་ནི་མཐའ་བཞིར་དཔྱད་ནས་ཕུང་པོ་བདེན་པའི་སྐྱེ་མེད་དུ་རྟོགས་པ་མེད་པར་གང་ཟག་གི་བདག་མེད་མི་རྟོགས་པས་སྔར་བཤད་པ་དེ་དག་ནི་ཐེག་པ་གསུམ་ཆར་གྱི་ཐུན་མོང་གི་རྟོགས་བྱའི་དབང་དུ་བྱས་པ་ཡིན་ལ། ཆོས་ཀྱི་བདག་མེད་དེ་ཉིད་རྒྱས་པར་ཕྱེ་ནས་ཐེག་ཆེན་གྱི་ཐུན་མོང་མ་ཡིན་པའི་རྟོགས་བྱ་འདི་མན་ཆད་ཀྱིས་སྟོན་པར་བཞེད་དེ། ཉན་རང་ལ་ཆོས་ཀྱི་བདག་མེད་རྟོགས་པ་ཡོད་པར་སྒྲུབ་བཞིན་དུ། །བདག་མེད་འདི་ནི་འགྲོ་བ་རྣམ་གྲོལ་ཕྱིར། །ཞེས་པའི་འགྲེལ་པར་དེ་ལ་གང་ཟག་གི་བདག་མེད་པ་ནི་རང་སངས་རྒྱས་རྣམས་དང་། ཉན་ཐོས་རྣམས་རྣམ་པར་གྲོལ་བའི་ཕྱིར་བསྟན་ལ་བྱང་ཆུབ་སེམས་དཔའ་རྣམས་རྣམ་པ་ཐམས་ཅད་མཁྱེན་པ་ཐོབ་པས་རྣམ་པར་གྲོལ་བར་བྱ་བའི་ཕྱིར་གཉིས་ཀ་བསྟན་ཏོ། །ཞེས་དང་། རྩ་བར། ཐེག་ཆེན་དུ་ཡང་བཤད་པ་ཡིན་ཞེས་དང་། ཉན་རང་ལ་ཆོས་ཀྱི་བདག་མེད་རྫོགས་པར་བསྒོམ་པ་མེད་པར་གསུངས་པ་རྣམས་གུང་མཐུན་པའི་ཕྱིར་རོ། །རྒྱུ་མཚན་དེས་ན་ད་ནི་སྤྱི་དོན་གཉིས་པ་ཐེག་པ་ཆེན་པོས་རྟོགས་བྱའི་སྟོང་ཉིད་བཤད་པ་ལ་བཞི་སྟེ། དགོས་པའི་སྒོ་ནས་རྒྱས་པར་ཕྱེ་བའི་ཚུལ། དེ་ཉིད་ཐེག་པ་ཆེན་པོའི་རྟོགས་བྱར་བསྟན། སྟོང་གཞིའི་ཆོས་ཅན་སྒོ་ནས་རྒྱས་པར་བཤད། ལུང་ཁུངས་སྨྲོས་ཏེ་སྔར་གྱི་འཇུག་སྡུད་བསྟན་པའོ། །དང་པོ་ནི། བདག་མེད་སོགས་ཏེ། འདིའི་འགྲེལ་པར་སྔར་དྲངས་པའི་དེ་མ་ཐག་ཏུ་ཉན་ཐོས་དང་རང་སངས་རྒྱས་རྣམས་ཀྱིས་ཀྱང་རྟེན་ཅིང་འབྲེལ་བར་འབྱུང་བ་རྐྱེན་ཉིད་འདི་པ་ཙམ་མཐོང་མོད་ཀྱི་དེ་ལྟ་ན་ཡང་དེ་དག་ལ་ཆོས་ཀྱི་བདག་མེད་པ་ཡོངས་སུ་རྫོགས་པ་བསྒོམ་པ་མེད་དོ། །ཁམས་གསུམ་ན་སྤྱོད་པའི་ཉོན་མོངས་པ་སྤོང་བའི་ཐབས་ཙམ་ཞིག་ནི་ཡོད་དོ་ཞེས་གསུངས་ལ། དེའི་དོན་ལ་ཁ་ཅིག སྔར་བཤད་པ་ལྟར་གྱི་ཆོས་ཀྱི་བདག་མེད་པ་རྣམ་གྲངས་དང་། དུས་ཀྱི་སྒོ་ནས་ཡོངས་སུ་རྫོགས་པར་བསྒོམ་པ་མེད་པ་སྟེ་ཞེས་དང་། ཉོན་མོངས་ཀྱི་ས་བོན་གྱི་གཉེན་པོ་རྫོགས་པར་བསྒོམ་པ་ཡོད་ལ། ཤེས་བྱའི་སྒྲིབ་པའི་གཉེན་པོ་རྫོགས་པར་བསྒོམ་པ་ནི་མེད་དོ་ཞེས་བྲིས་པ་ནི། མ་དག་ས་བདུན་གྱི་སྐབས་སུ་ཤེས་སྒྲིབ་ཀྱི་གཉེན་པོ་མེད་པར་འདོད་པ་དང་འགལ་ཏེ། རྣམ་གྲངས་དང་དུས་ཀྱི་སྒོ་ནས་ཆོས་ཀྱི་བདག་མེད་རྒྱས་པར་བསྒོམ་པ་ཉོན་སྒྲིབ་ཙམ་སྤོང་བ་ལ་ངེས་པར་དགོས་སམ་མི་དགོས། དང་པོ་ལྟར་ན་ཉན་རང་ལ་དེ་མེད་པར་འདོད་པ་དང་འགལ་ལ། ཕྱི་མ་ལྟར་ན་མ་དག་ས་བདུན་གྱི་སྐབས་སུ་དེས་ཅི་ཞིག་བྱ། ལེགས་པར་སོམས་ཤིག གཉིས་པ་ནི། སྤྲོས་དང་སོགས་ཏེ། ཇི་སྐད་དུ་རབ་འབྱོར་གཞན་ཡང་བྱང་ཆུབ་སེམས་དཔའི་ཐེག་པ་ཆེན་པོ་འདི་ལྟ་སྟེ། ནང་སྟོང་པ་ཉིད་དང་། ཕྱི་སྟོང་པ་ཉིད་དང་། ཕྱི་ནང་སྟོང་པ་ཉིད་དང་། སྟོང་པ་ཉིད་སྟོང་པ་ཉིད་དང་། ཆེན་པོ་སྟོང་པ་ཉིད་དང་། དོན་དམ་པ་སྟོང་པ་ཉིད་དང་། འདུས་བྱ་སྟོང་པ་ཉིད་དང་། འདུས་མ་བྱས་སྟོང་པ་ཉིད་དང་། མཐའ་ལས་འདས་པ་སྟོང་པ་ཉིད་དང་། ཐོག་མ་དང་ཐ་མ་མེད་པ་སྟོང་པ་ཉིད་དང་། དོར་བ་མེད་པ་སྟོང་པ་ཉིད་དང་། རང་བཞིན་སྟོང་པ་ཉིད་དང་། ཆོས་ཐམས་ཅད་སྟོང་པ་ཉིད་དང་། རང་གི་མཚན་ཉིད་སྟོང་པ་ཉིད་དང་། མི་དམིགས་པ་སྟོང་པ་ཉིད་དང་། དངོས་པོ་མེད་པའི་ངོ་བོ་ཉིད་སྟོང་པ་ཉིད་དོ། །ཞེས་གསུངས་སོ། །དེ་སྐད་དུ་སྟོང་པ་ཉིད་བཅུ་དྲུག་བསྟན་ནས། རབ་འབྱོར་གཞན་ཡང་དངོས་པོ་ནི་དངོས་པོས་སྟོང་ངོ་། དངོས་པོ་མེད་པ་ནི་དངོས་མེད་པས་སྟོང་ངོ་། །རང་བཞིན་ནི་རང་བཞིན་གྱིས་སྟོང་ངོ་། །གཞན་གྱི་དངོས་པོ་ནི་གཞན་གྱི་དངོས་པོས་སྟོང་ངོ་། །ཞེས་སླར་ཡང་སྟོང་པ་ཉིད་བཞི་བསྟན་ཏོ། །སྟོང་པ་ཉིད་འདི་རྣམས་ནི་ཐེག་པ་ཆེན་པོ་ཞེས་བྱའོ། །སྟོང་པ་ཉིད་དམ་སྟོང་པ་ཉིད་མ་ཡིན་པ་ནི་ཅུང་ཟད་ཀྱང་ཡོད་པ་མ་ཡིན་ཏེ། རྣམ་པ་དེ་ལྟ་བུས་གདུལ་བྱའི་སྐྱེ་བོའི་དབང་གིས་གཟུགས་ལ་སོགས་པ་ལྟར་ཀུན་རྫོབ་ཏུ་བསྙད་པར་ཟད་དོ། །ཞེས་གསུངས་སོ། །གསུམ་པ་ལ་གཉིས་ཏེ། རྒྱས་པའི་རབ་དབྱེ་བཅུ་དྲུག་བཤད། །བསྡུས་པའི་རབ་དབྱེ་རྣམ་བཞི་བཤད་པའོ། །དང་པོ་ལ་བཅུ་དྲུག་ཡོད་པ་ལས། དང་པོ་ནང་སྟོང་པ་ཉིད་ནི་གང་ཕྱིར་སོགས་ཏེ། ཚིག་རྐང་དང་པོ་གཉིས་ཀྱི་མིག་རང་གི་ངོ་བོས་སྟོང་པ་མིག་གི་རང་བཞིན་ཡིན་པས་ནང་སྟོང་པ་ཉིད་དུ་བསྟན་ཅིང་། དེ་ནས་གཉིས་ཀྱིས་སྐྱེ་མཆེད་གཞན་ལྔ་ལ་མཚོན་པར་བསྟན། དེ་ནས་གཉིས་ཀྱི་རང་བཞིན་གྱི་སྟོང་པའི་སྒྲུབ་བྱེད་བསྟན། ཕྱི་མ་གཉིས་ཀྱིས་ནང་གི་སྐྱེ་མཆེད་དྲུག་གི་རང་བཞིན་མེད་པ་ཉིད་ནང་སྟོང་པ་ཉིད་དུ་བསྟན་ཏེ། དེས་སྟོང་ཉིད་གཞན་རྣམས་ལའང་མཚོན་པའོ། །འདིར་ཁ་ཅིག་པ་ཚབ་ཀྱི་འགྱུར་ལས། ཐེར་ཟུག་ཏུ་གནས་པ་མ་ཡིན་པ་ནི་རང་བཞིན་མི་འདོར་བ་ལ་བྱའོ། །དེའང་དུས་ཅུང་ཞིག་གནས་ནས་ལྡོག་པར་འགྱུར་བས་འཇིག་པ་མ་ཡིན་པ་ཉིད་ཀྱི་ཕྱིར་རོ་ཞེས་གསུངས་སོ། །འདི་སྐད་བསྟན་པར་འགྱུར་ཏེ། དངོས་པོ་གང་ཞིག་རང་བཞིན་དང་བཅས་པ་དེ་ཉིད་ནི་གོར་མ་ཆག་པར་ཐེར་ཟུག་མ་ཡིན་པ་དང་། མི་རྟག་པ་ཞིག་ཏུ་འགྱུར་དགོས་སོ་ཞེས་བསྒྱུར་བ་ནི་འགྱུར་འཆུགས་པ་འདྲ་སྟེ། ཐེར་ཟུག་ཏུ་གནས་པ་རང་བཞིན་མི་འདོར་བ་ལ་འཆད་དགོས་པའི་ཕྱིར་དང་། རང་བཞིན་དང་བཅས་ན་ཐེར་ཟུག་མ་ཡིན་པ་དང་། མི་རྟག་པ་ཞིག་ཏུ་འགྱུར་དགོས་ན་རང་བཞིན་མེད་པའི་སྒྲུབ་བྱེད་དུ་དེ་གཉིས་བཀོད་པ་དང་འགལ་བའི་ཕྱིར་རོ། །དེས་ན་ནག་མཚོའི་འགྱུར་ལ་དངོས་པོ་གང་ཞིག་རང་བཞིན་གྱིས་ཡོད་པ་དེ་ནི་ཐེར་ཟུག་ཏུ་གནས་པའམ་ཉམས་པར་འགྱུར་བ་ཞིག་ཏུ་འགྱུར་རོ། །ཞེས་བསྒྱུར་བ་ལྟར་ལེགས་སོ་ཞེས་བྲིས་པ་ནི་མི་འཐད་དེ། ཐེར་ཟུག་གི་སྐད་དོད་ཀུ་ཊེཥྛ་ཞེས་པ་བརྩེགས་པའམ། བསགས་པའམ། བྱས་པ་ལ་འཇུག་པས། མིག་སོགས་ཀྱི་རང་བཞིན་སྟོང་པ་ཉིད་ནི་རང་བཞིན་ཡིན་ཏེ། ཐེར་ཟུག་གནས་པ་སྟེ་བྱས་པ་མ་ཡིན། འཇིག་པ་སྟེ་མི་རྟག་པ་མ་ཡིན་པའི་ཕྱིར་ཞེས་པའི་དོན་དུ་འཆད་དགོས་པའི་ཕྱིར་རོ། །འདི་ནི་རྩ་ཤེར་ལས། རང་བཞིན་བྱས་པ་ཅན་ཞེས་བྱར། །ཇི་ལྟར་བུར་ན་རུང་བར་འགྱུར། །རང་བཞིན་དག་ནི་བཅོས་མིན་དང་། །གཞན་ལ་ལྟོས་པ་མེད་པ་ཡིན། །ཞེས་པའི་དོན་ཡིན་ནོ། །ཕྱི་སྟོང་པ་ཉིད་ནི། གང་ཕྱིར་སོགས་སོ། །གཉིས་ཀ་སྟོང་པ་ཉིད་ནི། གཉིས་ཆར་སོགས་སོ། །སྟོང་པ་ཉིད་སྟོང་པ་ཉིད་ནི། ཆོས་རྣམས་སོགས་ཏེ། འདིའི་སྟོང་གཞི་སྔར་བཤད་པ་ལྟར་རང་རང་ངོ་བོས་སྟོང་པའི་སྟོང་ཉིད་ཡིན་པར་བཞེད་དོ། །ཆེན་པོ་སྟོང་པ་ཉིད་ནི། སེམས་ཅན་སོགས་སོ། །དོན་དམ་པ་སྟོང་པ་ཉིད་ནི། དེ་ནི་སོགས་སོ། །འདུས་བྱས་སྟོང་པ་ཉིད་ནི། རྐྱེན་ལས་སོགས་སོ། །འདུས་མ་བྱས་སྟོང་པ་ཉིད་ནི། གང་ལ་སོགས་སོ། །མཐའ་ལས་འདས་པ་སྟོང་པ་ཉིད་ནི། གང་ལ་སོགས་སོ། །ཐོག་མ་དང་ཐ་མ་མེད་པ་སྟོང་པ་ཉིད་ནི། ཐོག་མར་སོགས་སོ། །དོར་བ་མེད་པ་སྟོང་པ་ཉིད་ནི། དོར་བ་སོགས་ཏེ། འགྲེལ་པར་མཚན་གཞི་གསལ་བར་མ་གསུངས་ཀྱང་། གཞན་དུ་བྱང་ཕྱོགས་སོ་བདུན་ལ་བཤད་པ་དང་འདྲའོ། །རང་བཞིན་སྟོང་པ་ཉིད་ནི། འདུས་བྱས་སོགས་ཏེ། འདི་དང་སྟོང་པ་ཉིད་སྟོང་པ་ཉིད་སྟོང་གཞིའི་ཆོས་ཅན་འདྲ་ཡང་། སྔ་མ་སྟོང་ཉིད་དངོས་པོའི་བློ་ཅན་གྱི་འཛིན་པ་བཟློག་པའི་ཕྱིར་ཡིན་ལ། འདི་ནི་འཕགས་པ་རྣམས་ཀྱིས་ཤེས་མཐོང་གིས་གསར་དུ་བྱས་སམ་སྙམ་པའི་དོགས་པ་བཟློག་པའི་ཕྱིར་དུ་ཡིན་ནོ། །ཆོས་ཐམས་ཅད་སྟོང་པ་ཉིད་ནི། ཁམས་བཅོ་སོགས་སོ། །རང་གི་མཚན་ཉིད་སྟོང་པ་ཉིད་ནི། གཟུགས་རུང་སོགས་ཏེ། ཚིག་རྐང་དང་པོ་གཉིས་ཀྱིས་སྟོང་ཉིད་ངོས་བཟུང་ནས། དེ་ནས་ཚིགས་བཅད་བཅུ་གསུམ་གྱིས་སྟོང་གཞིའི་ཆོས་ཅན་རྒྱས་པར་བཤད་པ་སྟེ། གཟུགས་ནས་རྣམ་མཁྱེན་གྱི་བར་གྱི་རང་གི་མཚན་ཉིད་ངོས་གཟུང་བའོ། །འདི་ནི་རང་མཚན་དང་སྤྱི་མཚན་གཉིས་ཀྱི་ཟླས་ཕྱེ་བའི་རང་མཚན་ཡིན་པས་མི་རྟག་སྡུག་བསྔལ་སོགས་སྡུག་བསྔལ་བདེན་པ་སྤྱིའི་མཚན་ཉིད་དང་། འདི་ནས་བཤད་པ་ལྟ་བུ་གཟུགས་སོགས་རང་གི་མཚན་ཉིད་ཡིན་པ་དབུ་མ་ཐལ་འགྱུར་པས་ཐ་སྙད་དུ་ཁས་མི་ལེན་པ་མ་ཡིན་ཏེ། ཆོས་མངོན་པའི་མདོ་ལས་རང་གི་མཚན་ཉིད་དང་སྤྱིའི་མཚན་ཉིད་ཅེས་གསུངས་པའི་དོན་མདོ་སྡེ་པས་དོན་དམ་པར་དོན་བྱེད་ནུས་མི་ནུས་ལ་འདོད་ཀྱང་། འདིར་ཐ་སྙད་དུ་ཆོས་དེ་རང་ཉིད་ཐུན་མོང་མ་ཡིན་པར་མཚོན་པ་དང་། ཐུན་མོང་བར་མཚོན་པ་ལ་འཆད་པའི་ཕྱིར། དེ་ལྟར་ན་མདོ་ལས། ཆོས་དང་། གང་ཟག་དང་། དེ་དག་གི་ནང་ཚན་ཀུན་གཞི་དང་། ཉོན་ཡིད་དང་། རང་རིག་དང་། སྣང་བ་སེམས་སུ་གསུངས་པ་དང་། བདེན་པ་བཞི་དང་། བདེན་པ་གཉིས་ལ་སོགས་པ་གྲུབ་མཐའ་སྨྲ་བ་བཞི་ཆར་གྱིས་ཐ་སྙད་ཐུན་མོང་དུ་ཁས་ལེན་དགོས་པ་རྣམས་ལ་རིགས་པས་དཔྱད་པའི་ཚེ་ངོས་འཛིན་ཚུལ་མི་འདྲ་བ་རེ་རེ་ཡོད་པའི་གནད་མ་རྟོགས་པར་གཞི་གཅིག་དངོས་སྨྲ་བས་བདེན་གྲུབ་ཏུ་གཏན་ལ་དབབ་པའི་ཕྱིར་ན་དབུ་མ་པས་ཐ་སྙད་དུའང་ཁས་མི་ལེན་ནོ་ཞེས་སྨྲ་བ་རྣམས་ནི་གསུང་རབ་འཆད་མ་ཤེས་སོ། །ཚིགས་བཅད་ཐ་མས་ནི་སྟོང་ཚུལ་རྒྱས་པར་བཤད་པའོ། །ཁམས་ཀྱི་བདག་ཉིད་སྦྲུལ་གདུག་འདོད། །ཅེས་པའི་འགྲེལ་པར་འཛིན་པར་ཆོས་མཐུན་པའི་སྒོ་ནས་ཁམས་རྣམས་ནི་སྦྲུལ་གདུག་པའི་མཚན་ཉིད་ཅན་ནོ་ཞེས་བྱ་བའི་དོན་ཏོ་ཞེས་གསུངས་པ་ལྟར་ན། ཁམས་ཀྱི་སྐད་དོད་དྷ་ར་ཞེས་པ་འཛིན་པ་ལ་འཇུག་ཅིང་། སྦྲུལ་གདུག་པས་སྲོག་ཆགས་འཛིན་པ་དང་ཆོས་མཚུངས་པ་སྟེ། མདོ་སྡེ་རྒྱན་ལས། ཐུགས་རྗེའི་བདག་ཉིད་སྦྲུལ་ཆེན་ལྟ་བུས་རིགས་བཤད་དབུགས་འདྲའི་ཆོས་རྣམས་ཀྱིས། །ཞེས་གསུངས་པ་དང་མཐུན་ནོ། །ཡང་གསེར་འོད་དམ་པའི་མདོ་ལས། སྐྱེས་བུའི་ལུས་ཀྱི་ཁམས་དྲུག་པོ་ཁང་སྟོང་གཅིག་གི་ནང་དུ་སྦྲུལ་དྲུག་གནས་པ་དང་འདྲ་བར་གསུངས་པ་ལྟར་ན་ཆོས་མཚུངས་སྔ་མ་དང་མི་འདྲ་བ་ཞིག་ཀྱང་དགོས་པར་སྣང་ངོ་། །མི་དམིགས་པ་སྟོང་པ་ཉིད་ནི། ད་ལྟར་སོགས་སོ། །དངོས་པོ་མེད་པའི་ངོ་བོ་ཉིད་སྟོང་པ་ཉིད་ནི། རྐྱེན་ལས་སོགས་སོ། །གཉིས་པ་བསྡུས་པའི་རབ་དབྱེ་རྣམ་བཞི་བཤད་པ་ལ། དངོས་པོ་སྟོང་པ་ཉིད་ནི། དངོས་པོའི་སོགས་སོ། །དངོས་པོ་མེད་པ་སྟོང་པ་ཉིད་ནི། མདོར་བསྡུ་སོགས་སོ། །རང་གི་ངོ་བོ་སྟོང་པ་ཉིད་ནི། རང་བཞིན་སོགས་སོ། །འདིའི་སྟོང་གཞིའི་ཆོས་ཅན་སྟོང་ཉིད་ཡིན་ཀྱང་སྟོང་ཉིད་རྒྱུན་རྐྱེན་གྱིས་བྱས་སམ་སྙམ་པའི་དོགས་པ་བཟློག་པའི་ཆེད་དུ་ཡིན་ནོ། །གཞན་གྱི་ངོ་བོ་སྟོང་པ་ཉིད་ནི། སངས་རྒྱས་སོགས་ཏེ། འདིའི་སྟོང་གཞིའི་ཆོས་ཅན་ཡང་སྟོང་ཉིད་ཡིན་ལ། དེ་ལ་གཞན་གྱིས་དངོས་པོ་ཞེས་བརྗོད་པའི་རྒྱུ་མཚན་ནི་འགྲེལ་པར་གཞན་གྱི་དངོས་པོ་ནི་མཆོག་ཏུ་བྱུང་བའི་དེ་ཁོ་ན་ཉིད་དོ། །དེའི་མཆོག་ཏུ་བྱུང་བ་ཉིད་ནི་རྟག་ཏུ་ཡོད་པ་ཉིད་དོ། །རྣམ་པ་གཅིག་ཏུ་ན་གཞན་གྱི་དངོས་པོ་ནི་ཡེ་ཤེས་ཕུལ་དུ་བྱུང་བས་རྟོགས་པར་བྱ་བའི་དངོས་པོ་སྟེ། དེ་ནི་དེ་ཉིད་ཀྱིས་སྟོང་ངོ་། །ཡང་ན་ཕ་རོལ་ན་ཡོད་པ་ནི་གཞན་གྱི་དངོས་པོའོ། །འཁོར་བ་ལས་འདས་ཕྱིར་གཞན་གྱི་དངོས་པོ་ཞེས་བྱ་བ་ནི་ཡང་དག་པའི་མཐའ་སྟེ། རྣམ་པར་འགྱུར་བ་མེད་པའི་དོན་དེ་བཞིན་ཉིད་སྟོང་པ་ཉིད་ཀྱི་མཚན་ཉིད་ཅན་གྱི་སྟོང་པ་ཉིད་ལ་ནི་གཞན་གྱི་དངོས་པོ་སྟོང་པ་ཉིད་དོ་ཞེས་བཤད་དོ། །བཞི་པ་ལུང་ཁུངས་སྨྲོས་ཏེ་མཇུག་སྡུད་བསྟན་པ་ནི། ཤེས་རབ་སོགས་སོ། །བཞི་པ་ཚུལ་དེས་ཐོབ་པའི་ཡོན་ཏན་བསྡུས་ཏེ་བསྟན་པ་ལ་གསུམ་སྟེ། དོན་དམ་རྟོགས་པའི་ཡོན་ཏན། ཀུན་རྫོབ་རྟོགས་པའི་ཡོན་ཏན། ཟུང་དུ་འཇུག་པའི་ཡོན་ཏན་ནོ། །དང་པོ་ནི། དེ་ལྟར་སོགས་སོ། །གཉིས་པ་ནི། རྟག་ཏུ་སོགས་སོ། །གསུམ་པ་ནི། ཀུན་རྫོབ་སོགས་སོ། །སེམས་བསྐྱེད་དྲུག་པ་བཤད་ཟིན་ཏོ།། 7/12 མདུན་ངོས། 上一页 5 6 7 8 9 10 下一页 尾页 |
