རྗེ་མི་ལ་རས་པ་ནི། བཀའ་རྒྱུད་པའི་སྲོལ་འཛུགས་མཁན་མར་བ་ཆོས་ཀྱི་བློ་གྲོས་ཀྱི་དངོས་སློབ་ཡིན།ང་ཚོས་སློབ་ཚན་འདི་བསླབས་པ་བརྒྱུད“བརྩོན་པ་རྟག་ཏུ་མ་བཏང་ར།། མི་འགྲུབ་བྱ་བ་ཅི་ཡང་མེང།།”ཅེས་པའི་དཔེ་ལྟར།མི་ལ་རས་པས་སྡུག་རུས་ཆེན་པོས་མཐུ་དང་གདམས་ངག་བསླབས་ནས་མཐར་གྲུབ་འབྲས་མཐར་ཕྱིན་ཐོབ་ཚུལ་ཤེས་རྟོགས་བྱ་དགོས།
རྣལ་འབྱོར་གྱི་དབང་ཕྱུག་རྗེ་བཙན་མི་ལ་རས་པ་ནི།སྤྱི་ལོ༡༠༤༠ལོར་གུང་ཐང་སྐྱ་རྔ་རྩ་ནས་ཡབ་མི་ལ་ཤེས་རབ་རྒྱལ་མཚན་དང༌། ཡུམ་མྱང་ཚ་དཀར་རྒྱན་གཉིས་ཀྱི་སྲས་སུ་སྐུ་འཁྲུངས། རུས་ཁྱུང་བོ་ཡིན།ཁོང་ཀི་ཆུང་དུས་ཀྱི་མིང་ལ་ཐོས་པ་དགའ་ཟེར།
ཁོང་གི་སྐུ་ཚེ་གང་བོར་ལོ་རྒྱུས་ཡིད་སྐྱོ་བ་ཚར་དུ་དངར་བ་ཡོང་དེ།སྐུ་ཆུང་་ངུའི་དུས་ནས་བཟུང་ཡབ་འདས་པས་ཨ་ཁུ་དང་ཨ་ནེའི་གཡོག་ཏུ་གྱུར་ཏེ་སྡུག་བསྔལ་ཚད་མེད་མྱངས།དེ་ནས་ཡུམ་མྱང་ཚ་དཀར་རྒྱན་གྱིས་མཐུ་གཏད་སེར་སུམ་བསླབ་པར་ཡང་ཡང་བསྐུལ་བར་བརྟེན། གཡུང་སྟོན་ཁྲོ་རྒྱལ་ཞེས་པའི་མདུན་དུ་ཕེབས་ཏེ་མཐུ་ལ་
སྦྱངས་ཀྱང་རྟགས་དེ་འདྲ་མ་ཐོན་པས་སླར་ཡང་ལྷ་རྗེ་གནུབས་ཆུང་བ་ཡོན་ཏན་རྒྱ་མཚོ་ལས་མཐུ་སྦྱངས་པས་རྟགས་ཐོན་ཏེ་མི་རྟ་སོ་ལྔ་བསད།དེ་ནས་གཡུང་སྟོན་ཁྲོ་རྒྱལ་གྱི་མདུན་དུ་བྱོན་ནས་སེར་བ་ལ་སྦྱངས་ཏེ་ཡུལ་གྱི་ལོ་ཏོག་བཅོམས། དེའི་རྗེས་སུ་སྡིག་པ་ལ་འགྱོད་པ་དང༌། ངེས་འབྱུང་གི་བསམ་པ་་སྐྱེས་ནས་དགུང་ལོ་སོ་བརྒྱད་པར་ལྷོ་བྲག་ཆུ་ཁྱེར་ཞེས་པའི་ས་ཆར་ཕེབས་ཏེ་མར་བ་ཆོས་ཀྱི་བློ་གྲོས་དང་མཇལ།དེར་ལོ་ངོ་དྲུག་ལྷག་བཞུགས་ཏེ་སྡིག་གཤགས་སུ་སྲས་མཁར་དགུ་ཐོགས་བཞེངས།དེ་ནས་བླ་མ་མར་བས་གསང་སྔགས་ཀྱི་དབང་སྐུར་ཏེ་གསང་མཚན་ལ་དཔལ་བཞད་པ་རྡོ་རྔེ་ཞེས་བཏགས།
དགུང་ལོ་ཞེ་ལྔ་ནས་བཟུང་བྲག་དཀར་རྟ་སོ་རྫོང་ཆེན་དྲུག་ཏུ་སྒྲུབ་པ་ཉམས་ལེན་མཛད་དེ་ཚེ་གཅིག་ལུས་གཅིག་ལ་སངས་རྒྱས་ཀྱི་གོ་འཕང་བརྙེས་པས།ཆོས་བདག་མེད་ལ་སྙིང་རུས་གང་ཆེ་ཟེར་བ་དང༌།དོན་གཉེར་རབ་འབྲིང་ཐ་གསུམ་ལས། ཆོས་པ་རབ་འབྲིང་ཐ་གསུམ་འོངས།།ཞེས་པའི་ཁ་དཔེ་ལ་ལག་ལེན་གྱི་ར་སྤྲོད་གང་ལེགས་བྱས་པ་སོགས་སྒྲ་བསྒྱུར་མར་བ་ལྟ་བུའི་བླ་མ་དང༌།མི་ལ་རས་པ་ལྟ་བུའི་སློབ་མ་ཞེས་ཀུན་ཀྱི་ཚད་མར་འཛིན་པ་མ་ཟད། ཀུན་ལ་རླུང་ལྟར་གྲགས་པ་ཡིན་ནོ།། ཁོང་གི་སློབ་མ་ལ་ཉི་མ་ལྟ་བུའི་རས་ཆུང་བ་རྡོ་རྗེ་གྲགས་པ།རྒྱུ་སྐར་ལྟ་བུའི་ངན་རྫོང་སྟོན་པ་བྱང་ཆུབ་རྒྱལ་བོ་སོགས་བགྲངས་གིས་མི་ལང་བ་བྱོན་ནོ།།མཐར་དགུང་ལོ་གྱ་བཞི་བ་སྤྱི་ལོ༡༡༢༣ལོར་སྐུ་གཤེགས།
བསམ་གཞིག སྦྱང་གཞི།
གཅིག གཤམ་གྱི་ཚན་པ་སོ་སོའི་གུག་རྟགས་ནང་ཁ་སྐོངས།
༡. རྗེ་བཙུན་མི་ལ་རས་པ་ནི་སྤྱེ་ལོར＿ ལོར＿ ནས་སྐུ་འཁྲུངས་ཤིང༌།སྦྱི་ལོ＿ ལ་སྐུ་གཤེགས།
༢. ཁོང་གིས་ཨ་ཕའི་མིང་ལ＿ ཟེར་ཞིང་། ཨ་མའི་མིང་ལ＿ ཟེར།
ཁོང་མ་སྨད་གསུམ་སྡུག་ལ་སྦྱོར་མཁན་ནི ＿ དང་＿ གཉིསཡིན།
གཉིས། གཤམ་གྱི་དྲི་བར་ལན་ཐོབས།
༡. ཁོང་གིས་ཨ་ཁུ་དང་ཨ་ནེ་གཉིས་ལ་འཁོན་ལན་ངི་ལྟར་སློག་པ་ཡིན།
༢. ཆོས་ཀྱི་ཆེད་དུ་དཀའ་སྡུག་གང་འདྲ་མྱངས་ཚུལ་ཤོད་དགོས། |
