| རྗེ་བཙུན་འཇམ་པའི་དབྱངས་ཀྱིས་རྗེ་རིན་པོ་ཆེ་དང༌། བླ་མ་འདི་པ་དགའ་ལྡན་གྱི་ལྷ་ཁ་ཤས་བཅས་ལ་མདོ་སྔགས་གཉིས་ཀའི་ལམ་གྱི་གནད་བསྡུས་པའི་སྙན་རྒྱུད་ཀྱི་མན་ངག་ཡོངས་སུ་རྫོགས་པ་སྤྲུལ་པའི་གླེགས་བམ་ཆེན་མོ་དང་བཅས་པ་གནང་ནས་སྤྲུལ་པའི་གླེགས་བམ་ཆེན་མོ་བླ་མ་འདིའི་ཕྱག་ཏུ་ཕེབས།རྗེ་རིན་པོ་ཆེའི་གདུལ་བྱ་འཕྲིན་ལས་ཐམས་ཅད་ས་འུར་རྡོ་འུར་དུ་རྡོལ་བ་ན་འདི་པས་སྒྲུབ་པ་རྩེ་གཅིག་པོ་ཉིད་ཀྱིས་ཐུགས་དྲངས་ནས། ད་ནི་ང་རང་དབེན་གནས་ཤིག་བཙལ་ནས་སྒྲུབ་པ་བྱ་དགོངས་ཏེ་མལ་གྲོ་རྒྱལ་སྟང་དུ་ཐོགས་གཅིག་བཞུགས། དེ་ནས་སྤང་ས་མཁན་པོས་གདན་དྲངས་ཏེ། རི་རྩེའི་ཁང་གཅིག་མོར་རེ་ཤིག་བཞུགས། དེ་ནས་སྤང་ས་སྤྱན་སྔས་དབེན་གནས་སེ་བ་རོང་གི་གཟིམ་ཁང་ཕུལ་བས་དེར་བཞུགས་ཏེ་སྤྱན་སྔས་གཙོ་མཛད་སྐལ་ལྡན་རྣམས་ལ་བྱང་ཆུབ་ལམ་གྱི་རིམ་པ་སོགས་ཆོས་མང་དུ་གསུངས། དེ་ནས་དགོངས་པ་ལ་འོན་ཀྱང་འཕགས་པའི་གོ་འཕང་མ་བརྙེས་བར་དུ་ཆོས་འཆད་པ་སོགས་གཞན་ལ་ཕན་ཆུང་ཞིང་སངས་རྒྱས་སྒྲུབ་པའི་བར་ཆད་ཡིན་པར་དགོངས་ནས་བུག་སྒོ་འདག་སྦྱར་གྱིས་དུས་འདའ་བར་མཛད། གསེར་དང་བོང་བ་སྙོམས་དགྲ་གཉེན་ཉེ་རིང་སྙོམས་ཆོས་བརྒྱད་འགོ་སྙོམས།རྙེད་བཀུར་སྙན་གྲགས་ལ་བལྟ་བའི་འདོད་པ་ངན་པ་རྒྱང་རིང་དུ་དོར་ཏེ་བསམ་གཏན་གྱི་འཁོར་ལོས་དུས་ཡོལ་བར་མཛད་དོ། །དེའི་ཚེ་རྗེ་བཙུན་འཇམ་དབྱངས་ཀྱི་སྐུ་གསུང་ཐུགས་ཀྱི་སྣང་བ་ཡོད་ཚུལ་སྙན་གྲགས་ཆེས་པས་ཕྱོགས་ནས་མཁས་བཙུན་བཟང་གསུམ་དང་མི་དྲག་ཞན་ཡོ་འོང་ནས་ལུང་བསྟན་ཞུ་བས་ཕལ་མོ་ཆེ་ལ་མཇལ་ཁ་མི་འོང༌། རེ་རེ་ཙམ་མཇལ་དུ་བྱུང་བ་ལའང་དང་པོ་ནས་མཐའ་འགོག་རང་མཛད་དེ་ཡི་དམ་གྱི་ཞལ་གཟིགས་པ་སོགས་ཡེ་མི་མངོན་པར་མཛད། དེ་དུས་ཕག་མོ་གྲུ་པའི་མི་དཔོན་ཆེན་པོ་རྣམས་དང༌། ཁྱད་པར་འོལ་ཁ་རྫོང་དཔོན་གྱིས་རང་རང་གི་བསྟི་གནས་སུ་སྤྱན་འདྲེན་པའི་ཞུ་བ་དང༌། དབེན་གནས་ཀྱང་སོ་སོས་གང་བཞེད་འབུལ་བས་ཕེབས་པའི་ཞུ་བ་ཕུལ་དུས་ང་དབེན་གནས་འདིར་སུ་གང་གིའང་ངོ་འཛིན་བྱེད་མི་དགོས་འཚོ་བའང་མཐའ་གཉིས་བྲལ་བར་སྤྱོད་པ་འདི་བསྐྱུར་ནས་དེ་ན་ཕར་ཅི་བྱེད། ཁོང་ཚོའི་ཞབས་ཏོག་དེ་འདྲས་མི་འཚེངས་པར་སྲོག་ཁག་འཁུར་དགོས་པ་འོང་གསུངས་ནས་ཕེབས་མ་བཞེད་ལན་ཅིག་དགེ་བསྙེན་གཅིག་ན་རེ། དྲུང་ནས་མི་རྣམས་མཇལ་དུ་འོངས་པ་ན་བཀའ་བཀྱོན་རེ་བྱོན་བཏང་བས་དགའ་འོང་བར་འདུག ད་ར་ཁ་ཆེ་མཇལ་དུ་བྱུང་བ་ལའང་ཁྱོད་འབྲི་ཁུང་བའི་ས་ཁོག་འདིར་ཕྱི་དཀྲུག་ནང་དཀྲུག་ཡོ་བྱེད་པར་སྣང་གསུངས་ནས་བཀྱོན་པས། ཁོང་དྲུང་ནས་ང་ལ་ཐུགས་ཚ་ལ་སྦྱར་བའི་གསུང་བྱོན་ཟེར་ཀྱིན་དགའ་ནས་སོང་ཞུས་པས། ངས་སུ་གང་གིའང་ངོ་འཛིན་མ་མྱོང་བ་ཡིན་གསུངས། དེ་ལྟར་ཆགས་སྡང་དགྲ་གཉེན་གྱི་ཕྱོགས་རིས་མི་མངའ་བས་འདི་འདྲ་ཞིག་དང་འཐབ་རྩོད་ཁོན་འཛིན་འདུག་ཅེས་པ་དེ་དུས་ཀྱི་སྐྱེ་བོ་སུས་ཀྱང་མ་ཚོར། སྡུག་བསྔལ་དང་དཀའ་སྤྱད་ལ་བཟོད་པའི་མཐུ་ཆེ་བས་དུས་ཐམས་ཅད་དུ་མགོ་འམ་གོས་ལ་མེ་ཤོར་བ་ལྟ་བུའི་བརྩོན་འགྲུས་རྩོམ་པར་མཛད། ཚོགས་ཆོས་སོགས་གསུང་བར་ཞུས་དུས་ཆོས་ང་རང་ལ་འཆད་དགོས་པར་འདུག ཐོག་མར་མི་ལ་སྙིང་རྗེ་བྱེད་པ་བས་རང་ལ་སྙིང་རྗེ་བྱེད་དགོས་པ་འདུག་གསུངས་ནས་ཚིག་གསུངས་ཚད་གོ་རྒྱུ་ཆེ་བ་དོན་འདྲིལ་བ་ཆོས་མི་འཆད་གསུང་ཡང་གསུངས་ཚད་ཚོས་ཀྱི་གནད་ཟབ་དགུ་འབའ་ཞིག་ཏུ་འོང་བ། གསུང་གང་འབྱོན་ཡང་རྡོ་བཅག་པའི་འཕྲོ་བཞིན་དུ་སླར་ལྡོག་ཏུ་མེད་པ་ཅིག་འོང༌། ཁྱད་པར་དུའང་སྔགས་ལ་དམ་དོག་ཆེ་བར་མཛད། བདག་ཉིད་ཆེན་པོ་འདི་ཐུགས་ཀྱི་དཔྱད་པ་གཞན་དང་མི་འདྲ་བ་མངའ་བས་རྗེ་རིན་པོ་ཆེས་ཀྱང་བླ་མ་འདིའི་ཞུ་འབུལ་སོགས་ལ་ཟོས་མཛད་པ་ཡིན་པར་སྣང་ན་གཞན་གྱིས་ལྟ་ཅི་སྨོས། རྗེའི་སྐུ་མདུན་དུ་གཤིབས་པའི་གཤེས་གཉེན་ཅི་རིགས་ལའང་སྡེ་བན་ཚོ་གསུང་གིན་བཀའ་བཀྱོན། ཁོང་ཚོ་ཤེས་རབ་ཆེ་སྟེ་ང་དད་པ་ཆེ་ཞེས་གསུང༌། གཞན་ཡང་ཕྱག་རྫས་ཅི་བྱུང་ཡང་གསོག་པ་ཡེ་མི་མཛད། གཞན་གྱི་བཞིན་ཐབ་ཁ་དང་བཟའ་བཏུང་ལ་གཏོང་བ་ཡེ་མི་མཛད་པར་དགེ་ཕྱོགས་སུ་གཏོང༌། འཕྲལ་དུའང་སྐྱེ་བོ་ཐམས་ཅད་རླག་པར་བྱེད་པའི་རང་བཞིན་ཅན་འདོད་པའི་ཉེས་དམིགས་ཁོ་ན་གསུང་བར་མཛད། དྲི་བ་ནི་རྗེ་བཙུན་འཇམ་དབྱངས་ལ་ཅི་བཞེད་ཞུས་ལས་ཆོག་པ་དང༌། རང་ཉིད་ཡོན་ཏན་ལ་མངའ་བརྙེས་པས་ནད་གདོན་བར་ཆད་ཞི་བ་དང་ཚེ་དང་བསོད་ནམས་རྒྱས་པ་དང་གཞན་དབང་དུ་སྡུད་པ་དང༌། དྲག་པོའི་ལས་སོགས་ཇི་ལྟར་བཞེད་པ་བཞིན་འགྲུབ་པས་རྗེ་རིན་པོ་ཆེ་དང༌། ཆོས་རྗེ་འདུལ་བ་པ་སོགས་ཀྱིའང་སྐུ་ཚེ་བསྲིང་བའི་ཆོ་ག་དང༌། སྐུ་རིམ་ཇི་ལྟར་བསྒྲུབ་པ་སོགས་ཐམས་ཅད་བླ་མ་རིན་པོ་ཆེ་འདི་ཉིད་ཀྱིས་ལུང་སྟོན་ཅིང་གཞན་ཡང་བསྟན་པ་ལ་ཕན་པའི་བཤེས་གཉེན་ཅི་རིགས་ལའང་ལུང་སྟོན་པ་དང༌།དོན་ཆེན་པོར་འགྱུར་བར་སྣང་ན་ཁྱིམ་པ་ཅི་རིགས་ལའང་ཕན་ཐོགས་མཛད། ཚུལ་ཁྲིམས་ཀྱི་དབང་དུ་བྱས་ན་སྡོམ་པ་གསུམ་གྱི་ཉེས་ལྟུང་ཕྲ་མོས་ཀྱང་མ་གོས་པར་སྤྱན་གྱི་འབྲས་བུ་བཞིན་དུ་བསྲུང་བར་མཛད། དུས་ཐམས་ཅད་དུ་བརྗེད་པ་མེད་པའི་དྲན་པ་ཁྱད་པར་ཅན་མངའ་ཞིང་མཉེལ་བའི་རྒྱུ་འདུ་འཛི་དང་རྣམ་གཡེང་རྒྱང་རིང་དུ་སྤངས་ཏེ་དུས་ཐམས་ཅད་དུ་སྒོ་གསུམ་གྱི་སྤྱོད་པ་ལ་སོ་སོར་རྟོག་པར་མཛད། ཟླ་བ་བྱུང་ངོ་ཅོག་གི་ཕྱེད་ན་ཁྱད་པར་དུའང་སྒོ་གསུམ་གྱི་བྱ་བ་ལ་བརྟགས་ནས་ཉེས་པ་བྱུང་བ་ཐམས་ཅད་ལ་མཐོལ་བཤགས་དང༌། ཕྱིན་ཆད་སྲོག་ལ་བབ་ཀྱང་མི་བྱེད་པའི་སྡོམ་སེམས་བཏང་ནས་གསོ་སྦྱོང་བྱ་བའི་ཚུལ་ནམ་ཡང་མ་ཆག་པར་མཛད་པས་བླང་དོར་ལ་གཡེལ་བའི་བག་མེད་པ་ནི་མི་མངའ། དེ་ལྟར་སྡོམ་པ་གསུམ་ལ་རང་བཞིན་དང་བཅས་པའི་ཁ་ན་མ་ཐོ་བའི་དྲི་མ་དང་བྲལ་བས་ཉོན་མོངས་པའི་རྒྱུ་བ་འགགས་ཏེ་ཞི་ཞིང་དུལ་བའི་མཆོག་ཏུ་གྱུར་ཏོ། །འོལ་ཁ་བསམ་གཏན་གླིང་དུ་རྗེ་རིན་པོ་ཆེས་གསང་འདུས་ཀྱི་བསྐྱེད་རྫོགས་གསུངས་ནས་བསྒོམས་པས་གཙོ་འཁོར་ཐམས་ཅད་ལ་གསལ་སྣང་ཐོན། བསྐྱེད་རྫོགས་ཀྱི་གནད་ཟབ་མོ་ཞིག་ལ་ཚོགས་འཁོར་བཤམས་གསེར་གྱི་མཎྜལ་ཕུལ་ནས་ཞུས་པས་གནང༌། བསྐྱེད་རྫོགས་ལ་སྣོད་བཅུད་ཐམས་ཅད་ལ་ཐ་མལ་གྱི་སྣང་ཞེན་བཀག་པ་དེ་དགོས། ངས་ཀྱང་དེ་དུས་ཞག་ཉི་ཤུ་རྩ་དྲུག་ཏུ་སྦྱངས་པས་བྱུང་གསུང༌། ཉིན་མཚན་ཁོར་ཡུག་ཏུ་བྱང་སེམས་མཛད་མེད་དུ་བཟུང་བས་སྐུ་ལུས་ལང་ཚོ་དར་ལ་བབ་པ་ལྟ་བུར་དཀར་ལི་དམར་བའི་མདངས་ཆགས་པ་མངའ་བ་བདེ་སྟོང་གི་ཏིང་ངེ་འཛིན་བརྟན་པོ་བརྙེས་པའི་ཡོན་ཏན་དུ་སྣང་ཞིང༌། དགུང་ལོ་བདུན་ཅུ་ལོན་དུས་སུའང༌། ཁྱོད་ཀྱི་ཞལ་གྱི་པདྨ་དང༌། །པདྨ་ཉི་མས་ཁ་བྱེ་བ། །བུང་བས་མཐོང་ན་པདྨ་ནི། །ཐེ་ཚོམ་དཔྱང་ཐག་ལ་འཇུག་འགྱུར། །ཞེས་གསུངས་པ་ལྟར་ཞལ་རས་ཁ་བའི་གོང་བུ་ལྟར་དཀར་བ་ལ་མཁུར་ཚོས་ཀྱི་རྩེ་ལ་མཚལ་བྱུགས་པ་ལྟ་བུའི་མདངས་དང་ལྡན་ཞིང༌། 2/6 མདུན་ངོས། 上一页 1 2 3 4 5 6 下一页 尾页 |
