| དེ་ལྟར་གྲུབ་པའི་དབང་ཕྱུག་འཇམ་དཔལ་རྒྱ་མཚོ་བ་འདིས་འཇམ་མགོན་བསྟན་པའི་སྒྲུབ་རྒྱུད་ཀྱི་ཆུ་འགོ་བཙུགས་ཏེ། རྗེ་བླ་མའི་བཤད་སྒྲུབ་ཀྱི་བསྟན་པ་ཆུ་ཀླུང་ཆེན་པོ་གང་གཱ་ལྟར་ནམ་ཡང་རྒྱུན་འཆད་པ་མེད་པའི་རྟེན་འབྲེལ་བསྒྲིགས། ཐུབ་པའི་བསྟན་པ་རིན་པོ་ཆེ་ནམ་ཡང་མི་ནུབ་པའི་རྒྱལ་མཚན་བཙུགས། སྲས་ཀྱི་ཐུ་བོ་སྙན་རྒྱུད་འཛིན་པའི་བཀའ་བབ་བ་སོ་ཆོས་ཀྱི་རྒྱལ་མཚན་ལ་སྙན་རྒྱུད་ཀྱི་མན་ངག་ཡོངས་སུ་རྫོགས་པ་སྤྲུལ་པའི་གླེགས་བམ་དང་བཅས་པ་གཏད། ཐུགས་ཀྱི་སྲས་མཆོག་སྤྱན་སྔ་བློ་གྲོས་རྒྱལ་མཚན་སོགས་བསྟན་འཛིན་དམ་པ་མང་པོ་ལ་མདོ་སྔགས་ཀྱི་མན་ངག་རྣམས་རྒྱ་ཆེར་སྤེལ་ཏེ་སྐུ་ཚེ་འདིའི་མཛད་པ་ཕལ་ཆེར་རྫོགས་པ་ན་དཔའ་བོ་གཡུལ་ལས་རྒྱལ་བ་འམ་ཚོང་པ་ཁེ་སྤོགས་གྲུབ་པ་ལྟར་དལ་བའི་རྟེན་ལ་སྙིང་པོ་ནི་བླངས། སྐུ་ཚེ་འདིར་སྒྲུབ་དགོས་པ་ཐམས་ཅད་ནི་རྫོགས། རྗེ་བླ་མ་གང་དུ་བཞུགས་པའི་ཞིང་ཁམས་དགའ་ལྡན་ཆོས་གྱི་ཕོ་བྲང་དུ་གཤེགས་པར་དགོངས་ཏེ། དགུང་ལོ་བདུན་ཅུ་རྩ་གསུམ་བཞེས་པ་ས་ཕོ་སྤྲེའུའི་ལོ་དེ་ཡང་སྔ་སོར་ཟླ་བ་གཉིས་པ་ལ་སྒྲུབ་མཆོད་རེ་མཛད་ཅིང་དུས་ཀྱང་ཚེས་ལྔ་དྲུག་ནས་འཛུགས་པ་ཡིན་ནའང༌། དེ་ལོ་ཟླ་བ་དང་པོ་ལ་བཙུགས། དེ་ཡང་ཚེས་གཅིག་རང་ནས་ཚོགས་གསུངས་ནས་བཙུགས་པའི་ཉིན་རང་བདེ་བར་གཤེགས། དེའི་ཚེ་ངོ་མཚར་བའི་ལྟས་མང་དུ་བྱུང་ངོ༌། །སྐུ་གདུང་ནི་རིལ་པོར་སྤང་ས་བ་རྣམས་ཀྱིས་དད་པའི་རྟེན་དུ་གསེར་འབུམ་བཞེངས་ཏེ་བཞུགས་ནས་གསོལ་བ་འདེབས་པའི་རྟེན་དུ་བཞུགས་སོ། །རྗེ་གྲུབ་པའི་དབང་ཕྱུག་འདི་ལ་རྗེ་རིན་པོ་ཆེའི་སློབ་མ་ཕལ་ཆེར་གྱིས་གུས་འདུད་མཛད་པས་སློབ་མ་བསམ་གྱིས་མི་ཁྱབ་པ་ཡོད་ཀྱང་རྒྱུད་འཛིན་གྱི་གཙོ་བོ་ནི། རྗེ་བཙུན་འཇམ་པའི་དབྱངས་ཀྱིས་ལུང་བསྟན་པ་སྙན་རྒྱུད་བསྟན་པའི་བདག་པོ་བ་སོ་ཆོས་ཀྱི་རྒྱལ་མཚན་དང༌།རྒྱལ་སྲས་དཔའ་བོ་སྤྱན་སྔ་བློ་གྲོས་རྒྱལ་མཚན་གཉིས་སོ། །བ་སོ་ཆོས་ཀྱི་རྒྱལ་མཚན་གྱི་རྣམ་ཐར་ནི་འཆད་པར་འགྱུར་ལ། སྤྱན་སྔ་བློ་གྲོས་རྒྱལ་མཚན་ནི་ལྷས་ལུང་པ་གྲ་ནམ་ཁང་ཞེས་བྱ་བར་དགྱེར་བྲམ་ཟེ་ལྷས་གནང་གི་རིགས་སུ།ཡབ་དགྱེར་དབོན་པོ་ཆོས་སྐྱབས་དང༌། ཡུམ་ཇོ་མོ་བླ་འབུམ་གཉིས་ཀྱི་སྲས་སུ་ཆུ་ཕོ་རྟའི་ལོ་སྐུ་འཁྲུངས།སྔོན་ཡུན་རིང་པོ་ནས་ལམ་ལ་སྦྱངས་པའི་བག་ཆགས་བརྟས་པས་འཁྲུངས་ཙམ་ཉིད་ནས་སྲིད་པ་མཐའ་དག་ལ་ཞེན་པ་ལོག་པའི་ངེས་འབྱུང་ཤུགས་དྲག་པོས་རྒྱུད་བསྐུལ་ཏེ་ཆོས་ཁོ་ན་ཡིད་ལ་སེམས་པ་ལས་བྱ་བ་གཞན་གང་ཡང་མི་སེམས་པ་ཞིག་བྱུང་ཞིང༌། དགུང་ལོ་བདུན་པའི་དུས་སུ་ཁུ་བོ་སྤྱན་སྔ་རིན་ཆེན་ཀུན་དགའ་བློ་གྲོས་པའི་དྲུང་དུ་རབ་ཏུ་བྱུང༌། མཚན་བློ་གྲོས་རྒྱལ་མཚན་དཔལ་བཟང་པོར་གསོལ། རབ་ཏུ་བྱུང་མ་ཐག་ནས་སོ་ཐར་གྱི་བཅས་མཚམས་རྣམས་མིག་འབྲས་ལྟར་བསྲུང་ཞིང༌། མཁས་གྲུབ་ཐམས་ཅད་མཁྱེན་པ་དང༌། ཆོས་རྗེ་བློ་གྲོས་པ་སོགས་དམ་པ་མང་པོའི་ཞབས་ལ་གཏུགས་ཏེ་ཚད་མ་དང༌། ཕྱིན་དང༌། འདུལ་བ་དང༌། མངོན་པ་དང༌། དབུ་མ་རྣམས་ལ་སྦྱངས་པ་མཐར་ཕྱིན་པར་མཛད་དེ། གཙང་དབུས་ཀྱི་གྲྭ་ས་རྣམས་སུ་གྲྭ་སྐོར་མཛད། དགུང་ལོ་ཉི་ཤུ་ལོན་པའི་ཚེ་ཚོགས་ཆེན་པོའི་མཁན་པོ་ཡོན་ཏན་རིན་ཆེན་པས་མཁན་པོ་དང༌། ལས་སློབ་སློབ་དཔོན་ནོར་བཟང་པ་དང༌། གསང་སྟོན་སོགས་དགེ་འདུན་རྣམ་པར་དག་པ་རྣམས་ཀྱི་དབུས་སུ། བསྙེན་པར་རྫོགས་པར་མཛད་ནས་གནས་བརྟན་འོད་སྲུངས་ཆེན་པོ་སླར་ཡང་ལྗོངས་འདིར་བྱོན་པ་ལྟ་བུར་གྱུར་ཏོ། །དེ་ནས་མལ་གྲོ་སྤང་སར་རྗེ་གྲུབ་པའི་དབང་ཕྱུག་འཇམ་དཔལ་རྒྱ་མཚོ་བའི་ཞབས་དྲུང་དུ་བྱོན་ཏེ། བསམ་སྦྱོར་གཉིས་ཀྱིས་ཚུལ་གཞིན་དུ་བསྟེན་ནས་རྗེ་བཙུན་ཙོང་ཁ་པ་ཆེན་པོའི་མདོ་སྔགས་ཀྱི་མན་ངག་རྣམས་ཡོངས་སུ་རྫོགས་པར་གསན། དེ་དུས་རྗེ་བཙུན་འཇམ་པའི་དབྱངས་ཀྱིས་རྗེ་གྲུབ་པའི་དབང་ཕྱུག་འཇམ་དཔལ་རྒྱ་མཚོ་བ་ལ་བླ་མ་འདི་ལ་སྙན་རྒྱུད་ཀྱི་མན་ངག་རྣམས་མཐིལ་ཕྱིན་པར་བསྟན་དགོས་པའི་ལུང་བསྟན་བྱུང་བ་ལྟར་རྗེ་བཙུན་དམ་པ་འཇམ་དཔལ་རྒྱ་མཚོ་བས་བླ་མ་འདི་ལ་གཞན་སུ་དང་ཡང་མི་མཉམ་པའི་མཐོང་མཛད་དེ་གཅེས་པར་བསྐྱངས་ཏེ་མན་ངག་མཐའ་དག་རྫོགས་པར་གནང༌། དེ་ནས་སེམས་དཔའ་ཆེན་པོ་འདིས་ཚེ་འདིའི་གཉེན་ལུས་ལོངས་སྤྱོད་གང་ལའང་མ་ཆགས་པར་དབེན་པའི་གནས་རྣམས་སུ་སྒྲུབ་པ་ལ་རྩེ་གཅིག་ཏུ་གཞོལ་བར་མཛད་པས་ལམ་ཐུན་མོང་བ་དང་ཐུན་མོང་མིན་པའི་རིམ་པ་ཐམས་ཅད་ལ་རྟོགས་པའི་གདེང་ཐོབ། དེ་ནས་སྐམ་དགོན་གྱི་གདན་སར་གདན་འདྲེན་ཡང་ཡང་ཞུས་ཀྱང་སྲིད་པའི་ཕུན་ཚོགས་སྲིན་མོའི་སླུ་བྲིད་ལྟར་གཟིགས་ནས་འཇིགས་ཤིང་སྐྲག་པས་བྱོལ་ཐབས་མཛད་དེ་ཕེབས་མ་བཞེད་པར་དབེན་པའི་གནས་སུ་སྒྲུབ་པ་རྩེ་གཅིག་ཏུ་མཛད། སྐམ་དགོན་གྱི་གདན་ས་པ་ལན་བཞི་ཙམ་བརྗེ་རེས་ཀྱི་སེམས་དཔའ་ཆེན་པོ་འདི་ལ་ཐམས་ཅད་ཀྱིས་གསོལ་བ་བཏབ་ཀྱང་ཕེབས་ཏུ་མ་བཞེད། ལན་བཞི་བའི་དུས་སུ་ཕྱོགས་དེའི་གྲྭ་བུ་སློབ་སྐྱ་སེར་ཚང་མས་མགྲིན་གཅིག་ཏུ་གདོང་མཆི་མ་དང་བཅས་ཏེ་གཙུག་ལག་ཁང་གི་ལྡེ་མིག་ཕྱག་ཏུ་ཕུལ་ཏེ་ད་གདན་ས་འདིའི་བདག་པོ་མཛད་ཀྱང་ཁྱེད་མཁྱེན། མི་མཛད་ཀྱང་ཁྱེད་མཁྱེན། ཞེས་གསོལ་བ་བཏབ་པ་རྗེ་རིན་པོ་ཆེའི་བསྟན་རྒྱུན་ལ་དགོངས་ནས་ཕྱིན་ཆད་འཇིག་རྟེན་གྱི་བྱ་བྱེད་གང་ལའང་ཐེ་མི་དགོས་པ་དང༌། ཆོས་ཕྱོགས་ནས་བཀའ་གང་གནང་ཞུ་བ་དང༌། བཀའ་གདམས་ཀྱི་རྣམ་ཐར་གཙང་མ་བསྲེ་བསླད་མེད་པར་སྐྱོང་བ་སོགས་ཀྱི་རྩིས་ཀ་བཟུང་ནས་ཞལ་གྱིས་བཞེས་ཏེ་གདན་སར་ཕེབས། དེ་ནས་རྒྱུན་པར་ཁོར་ཡུག་ཏུ་སྐུ་མཚམས་མཛད་ཅིང༌། ཡར་ངོ་མར་ངོའི་གསོ་སྦྱོང་ལ་ཕེབས་ཏེ་ཆོས་གནང༌། དུས་དུས་སུ་ལམ་རིམ་གྱི་ཁྲིད་དང་བློ་སྦྱོང་གི་ཁྲིད་སོགས་གནང༌། ཇོ་བོ་རྗེ་དཔལ་ལྡན་ཨ་ཏི་ཤ་དང་རྒྱལ་བ་ཙོང་ཁ་པ་ཆེན་པོ་གཉིས་ཀྱི་གསེར་སྐུ་བཞེངས་ཏེ་མཆོད་པ་ཚད་མེད་པས་མཆོད་པ་དང༌། ནམ་ཡང་མི་ཉམས་པའི་མཆོད་པའི་རྒྱུན་བཙུགས། གཞན་ཡང་སྐུ་གསུང་ཐུགས་རྟེན་མང་དུ་བཞེངས་ཤིང་དེ་དག་ལ་མཆོད་པ་རྒྱ་ཆེན་པོ་ཕུལ་ཞིང་འབུལ་རྒྱུན་བཙུགས། དེ་ལྟར་བསྟན་འགྲོའི་དོན་རྒྱ་ཆེར་མཛད་ནས་བྱ་ལོ་ལ་ཞབས་ཅུང་བསྙེལ་བ་ཞིག་བྱུང་བས་སྐུ་རིམ་གསོས་སྨན་སོགས་བསྟེན་པས་དྭངས། 4/6 མདུན་ངོས། 上一页 2 3 4 5 6 下一页 尾页 |
