| དེ་ལྟར་སྐུ་ཚེ་རིལ་པོར་ཆོས་དང་མཐུན་པའི་རྣམ་ཐར་གཙང་མ་མཐར་ཕྱིན་པར་མཛད་པ་ནི་སྤྱན་སྔ་ཉིད་ཀྱི་ཞལ་ནས། ལོ་བདུན་ལོན་ནས་ཆོས་ལ་འབད། །སྒྲུབ་པ་ཉིད་ལ་རྩལ་དུ་བཏོན། །དམ་པའི་ཆོས་ཀྱི་རོ་མཆོག་མྱོང༌། །འདི་ནི་མདུན་མ་ལེགས་པའི་ཚད། །ད་ནི་ལོ་ཡང་བདུན་ཅུར་ཉེ། །དཀོན་མཆོག་གསུམ་གྱི་བྱིན་རླབས་ཞུགས། །སྙིགས་དུས་སྐྱིད་པའི་ཚད་ལ་འཁྱོལ། །འདི་ནི་མདུན་མ་ལེགས་པའི་ཚད། །དམ་ཆོས་བདུན་གྱི་སྙིང་པོ་མཆོག །རྣམ་དཔྱོད་ཤེས་རབ་རྩལ་དུ་བཏོན། །མདོ་རྒྱུད་ཀུན་ལ་ནང་བྱན་ཚུད། །འདི་ནི་མདུན་མ་ལེགས་པའི་ཚད། །ཅེས་གསུངས་པ་ལྟར། ཐར་འདོད་རྣམས་སོ་སོར་རྟོག་པའི་ཤེས་རབ་ཀྱིས་ཡང་དག་པའི་ལྟ་བ་ལ་ཐེ་ཚོམ་དང་བྲལ་བར་མཛད། ཉན་ཐོས་ཀྱི་རིགས་ཅན་རྣམས་སོ་སོར་ཐར་པའི་བསླབ་པ་མིག་འབྲས་བཞིན་བསྲུང་བའི་ཚུལ་ཁྲིམས་ལ་བཀོད། ཐེག་ཆེན་གྱི་རིགས་ཅན་རྣམས་བདག་གཅེས་འཛིན་གྱི་དྲི་མ་དང་ཕྲལ་ནས་གཞན་གཅེས་པར་འཛིན་པའི་བྱམས་པ་དང་སྙིང་རྗེ་ལ་བཀོད། སྔགས་པ་རྣམས་དམ་ཚིག་ལ་བཀོད། སྐྱེ་འགྲོ་ཕལ་མོ་ཆེ་རྣམས་བདེ་འགྲོ་ཐོབ་ཕྱིར་དུ་བསྙེན་གནས་དང་དགེ་བ་བཅུའི་ཁྲིམས་ལ་བཀོད་དེ་བསྟན་པ་ལ་བྱ་བ་རྒྱ་ཆེན་པོ་མཛད། ཚུལ་འདི་དག་ལ་སྤྱན་སྔ་ཉིད་ཀྱི་ཞལ་ནས། རྒྱལ་བ་སྲས་བཅས་བསྟན་འཛིན་མཆོག །ཨ་ཏི་ཤ་ཡི་ཆོས་ལུགས་སྦྱངས། །སྐྱེས་བུ་གསུམ་གྱི་ཆོས་ལ་འབད། །འདི་ནི་མདུན་མ་ལེགས་པའི་ཚད། །ཅེས་གསུངས། དེ་ལྟར་བསྟན་འགྲོའི་དོན་རྒྱ་ཆེར་མཛད་ནས། ཞིང་གཤེགས་པ་ལ་ཕྱོགས་པའི་ཚེ་རྗེས་འཇུག་རྣམས་ལ་འདི་ལྟར་གསུངས་ཏེ། བླ་མ་ཚོ་ལ་ཞལ་ཆེམས་ཟེར་བ་ཡོད་པ་ཡིན་ནའང༌། དངོས་པོའི་ཞལ་ཆེམས་འཇོག་རྒྱུ་མེད་པས་དེ་ཁས་འཚེངས། བླ་མ་གཤེགས་པའི་ཤུལ་དུ་དངོས་པོ་ཚན་ཆེན་ཡོད་པ་དེ་བླ་མ་དེའི་རྐང་འདྲེན་དུ་འགྲོ་བས་མེད་པ་རང་ཞིག་དགོས། སྙེ་ཐང་དུ་ཇོ་བོ་སྐུ་གཤེགས་ཁར་ཕྱག་ཁྲི་ཆོག་གིས་ཇོ་པོ་ནི་སྐུ་གཤེགས་པར་གདའ། དེའི་རྗེས་སུ་ཆོས་བཤད་ཐང་རྒྱངས་ལ་བགྱིད་པར་ཞུ་ཞུས་པས། བྱ་བ་ངན་པ་ཡིན་བོར་ལ་ཐོངས་གསུང༌། འོ་ན་སྒྲུབ་པ་རྩེ་གཅིག་བགྱིད་པར་ཞུ་ཞུས་པས་ཀྱང་དེ་སྐད་གསུང༌། འོ་ན་ཇི་ལྟར་བགྱི་ཞུས་པས། ཚེ་འདི་བློས་ཐོངས་གསུང་བ་གཅིག་བྱུང་བས། ཇོ་བོའི་ཞལ་ཏ་ཐུགས་ལ་བཞག་ནས། མི་ཟས་ངན་པ་སྤངས་ནས་ར་སྒྲེང་གི་ཤུག་གསེབ་ཏུ་སྐུ་ཚེ་འདར་བཅུག་པ་ཡིན། དེ་དང་མཐུན་པར་ར་སྒྲེང་དུ་ཇོ་བོ་ཞིག་གིས་བསྐོར་བ་རྐྱང་པ་ལ་སྒྲིལ་བས་འབྲོམ་གྱི་ཞལ་ནས། ཇོ་བོ་སྐོར་བ་བྱེད་པ་ཡང་གློ་བ་དགའ་སྟེ་ཆོས་ཤིག་རང་བྱས་ན་མི་ལེགས་སམ་གསུང༌། ཁོས་ཕྱག་བྱས་པས་ཀྱང་དེ་སྐད་གསུང༌། ཀློག་པ་བྱས་པས་ཀྱང་དེ་སྐད་གསུང་ས། ད་འོ་ན་ཇི་ལྟར་བགྱི་ཞུས་པས། ཚེ་འདི་བློས་ཐོངས་བྱ་བ་ལན་གསུམ་གསུང༌། འབྲོམ་ཉིད་ཀྱང་སྐུ་གཤེགས་ཁར་ཤུག་གསེབ་ན་ཕར་ལ་ཞུགས་འཇིག་རྟེན་ཆོས་བརྒྱད་འགོ་སྙོམས་ནས། བདག་ནི་གྲོལ་བ་དོན་གཉེར་ལ། །རྙེད་དང་བཀུར་སྟིའི་འཆིང་མི་དགོས། །གསུང་ཡང་འཇིག་རྟེན་མཁྱེན་པ་རྙེད་དང་མ་རྙེད་དང༌། ཞེས་རེས་འགོ་ཙམ་རེ་དང་རེས་ཕྱེད་ཙམ་དང༌། རེས་ཚང་བར་གསུང༌། ཁོང་སྤྱན་རས་གཟིགས་ལ་དེ་དགོས་ཞད་མི་གདའ་སྟེ་རྗེས་འཇུག་གི་གདུལ་བྱ་རྣམས་ལ་གསུངས་པར་གདའ། ཆོས་སྙིང་ཤོས་བྱེད་ན་ཚེ་འདི་བློས་གཏོང་དགོས་པར་འདུག ངེད་བླ་མའི་ངོས་ནས་གསོན་རིང་ལ་འཁོར་གཡོག་རྣམས་འཐད་རབ་བྱུང་སྟེ་འདས་རྗེས་སུ་ཇི་ལྟར་ཡོང་བསམ་པའི་ཐེ་ཚོམ་ཟ་བ་མེད། ང་རང་གི་ངོས་ནས་དཔལ་ཨ་ཏི་ཤ་དང༌། རྒྱལ་བ་ཙོང་ཁ་པའི་ཞབས་དྲུང་དུ་དགའ་ལྡན་དུ་འགྲོ་བསམ་པ་ཡོད། དཔལ་ལྡན་ཨ་ཏི་ཤའི་གསུང་རབ་དང༌། རྗེ་ཙོང་ཁ་པ་གཉིས་ཀྱི་གསུང་རབ་ལ་མི་འཕྱུག་པའི་གཟེར་ཐེབས་པས་ད་ཉེས་པ་མེད་པ་ཡིན། ཁྱེད་རང་རྣམས་ཀྱང་བླ་མ་དང་ཡི་དམ་དབྱེར་མེད་དུ་གྱིས་ལ་གསོལ་བ་ཐོབ་དང༌། ལས་ལ་གང་ཤོང་བའི་དངོས་གྲུབ་འབྱུང་བ་ཡིན། ཁྱད་པར་རྟེན་གསུམ་ལོག་བྲིས་འདི་རྣམས་སངས་རྒྱས་བྱང་སེམས་དངོས་སུ་ཡོད་པ་ཡིན། མངོན་སུམ་ཉམས་སྣང་རྨི་ལམ་གསུམ་གང་རུང་དུ་ཞལ་གཟིགས་པར་འདུག་གསུང་མི་འབྱོན་པ་ནི་སེམས་ཅན་གྱི་ལས་ལ་མི་ཤོང་བ་ཡིན་པས་བྱ་ཐབས་མེད།ཁྱེད་གཉིས་བསླབ་སྦྱངས་དང་ཐོས་རྒྱ་ཆེན་པོ་མེད་ནའང༌། ཆོས་རྒྱུན་དུ་ཐོས་པ་རྣམས་སེམས་པ་དང༌། ལྟ་རྟོག་གྱིས་ལ་བླ་མ་དེ་ལ་འཆོལ་སྙིགས་མའི་དུས་སུ་ཐེག་པ་ཆེན་པོའི་དགེ་བའི་བཤེས་གཉེན་མཚན་ཉིད་དང་ལྡན་པ་ཉིན་སྐར་ལས་དཀོན་པས་ཆོས་མི་ཉན་དགུ་ཉན་མ་བྱེད་རྟེན་གསུམ་འདི༌ཚོ་ལ་མཆོད་པ་འོ་མ་བརྒྱལ་བ་བྱུང་ན། ངེད་ཀྱི་ཟླ་མཆོད་ལོ་མཆོད་ཀྱང་དེ་ཡིན་པས་དེ་ལ་འབུངས། ཁྱེད་རང་གཉིས་ཀྱང་བེམ་རིག་མ་བྲལ་རིང་ལ་ནང་འདིར་མ་བྲལ་བ་བྱེད་དགོས་པ་ཡིན། དེ་བར་ལ་དོན་ཉུང་བ་བྱ་བ་ཉུང་བ་ལ་བློ་རྩེ་གཏད་ནས། སྐྱེས་པ་ལྷས་མ་ཚོར།ཤི་བ་འདྲེས་མ་ཚོར་བ་ཞིག་དགོས་པ་ཡིན་གསུང་བའི་ཞལ་ཏ་གནང༌། དེ་ནས་ཞིང་བརྗེ་བའི་སྔ་ལྟས་སུ་ཡོས་ལོའི་ནང་དུ་མེ་ཏོག་གི་ཆར་བབས་པ་དང༌། ཁྱད་པར་ཟླ་བ་ལྔ་པའི་ཉི་ཤུ་ལྔའི་དགོང་ཁའི་དུས་མེ་ཏོག་གི་ཆར་ཉི་མ་སྒྲིབ་ནུས་པ་ཙམ་བབས། 5/6 མདུན་ངོས། 上一页 3 4 5 6 下一页 尾页 |
