| རྗེའི་གསང་སྔགས་ཀྱི་སྒྲུབ་དཀྱིལ་རྣམས་ལ་ལྷན་ཐབས་དང་ཕྱག་བཞེས། རབ་གནས་ཀྱི་ཆོ་ག འཁོར་ལོ་སྡོམ་པའི་ཕྱི་རོལ་མཆོད་པ། གསང་འདུས་མི་བསྐྱོད་པའི་ཚོམ་བུ་ལ་བརྟེན་པའི་མདུན་བསྐྱེད་ཀྱི་མཆོད་ཐབས། དྲིལ་བུ་ལྷ་ལྔའི་སྒྲུབ་ཐབས། འཁོར་ལོ་ཆེན་པོའི་སྒྲུབ་དཀྱིལ། ལྰུ་ཨི་པའི་དཀྱིལ་ཆོག དམར་ནག་གི་སྒྲུབ་ཐབས། རྡོ་རྗེ་དབྱིངས་ཀྱི་དཀྱིལ་འཁོར་གྱི་ཆོ་ག ཀུན་རིག་རྣམ་པར་སྣང་མཛད་ཀྱི་ཆོ་ག ངན་སོང་སྦྱོང་རྒྱུད་ཀྱི་རྣམ་བཤད། བྱ་རྒྱུད་རིགས་གསུམ་ལ་བརྟེན་པའི་ཆོ་གའི་ལག་ལེན་སོགས་རྩོམ་པ་ཡང་མང་དུ་མཛད་དོ། །ཐུན་མོང་མ་ཡིན་པའི་རྣམ་ཐར་དང་སྐྱེས་རབས་ནི་མཁན་ཆེན་ལས་ཀྱི་རྡོ་རྗེས་གསང་བདག་ལ་ཞུས་པ་དང༌། བླ་མ་དབུ་མ་པས་རྗེ་བཙུན་འཇམ་དབྱངས་ལ་ཞུས་པ་དང༌། བླ་མ་འཇམ་དཔལ་རྒྱ་མཚོས་རྗེ་བཙུན་ལ་ཞུས་པ་རྣམས་མཐུན་པར་སྣང་སྟེ། དེ་ཡང་འདི་ལྟར་སློབ་དཔོན་གྲགས་པ་རྒྱལ་མཚན་པ་སྐྱེ་བ་མང་པོའི་སྔོན་དུ་བྲམ་ཟེའི་ཁྱེའུ་གོ་འཕང་བྱ་བར་སྐྱེས་པའི་དུས་ན། སངས་རྒྱས་ལོག་པར་དད་སེལ་གྱི་སྤྲུལ་བའི་རང་སངས་རྒྱས་ཤིག་ལ་བསོད་སྙོམས་བཟང་པོ་ལྷུང་བཟེད་གང་ཕུལ་ནས་བདག་འདི་ནས་སྐྱེ་བ་ཐམས་ཅད་དུ་རྒྱལ་བ་ཀུན་གྱི་དམ་པའི་ཆོས་མ་ལུས་པར་འཛིན་ཅིང༌། མཐའ་འཁོབ་རྣམས་སུ་འགྲོ་བ་མང་པོ་ལ་དམ་པའི་ཆོས་སྟོན་ཅིང་ཐེག་པ་གསུམ་གྱི་ལམ་ལ་འགོད་པར་གྱུར་ཅིག ཅེས་སྨོན་ལམ་བཏབ་པའི་མཐུས་སྐྱེ་བ་དྲུག་མཐའ་འཁོབ་ཀྱི་རྒྱལ་པོར་སྐྱེས་ནས་འགྲོ་བ་མང་པོ་ལ་ཐེག་པ་གསུམ་གྱི་ཆོས་བསྟན་ཏེ་ལམ་རྣམ་པར་དག་པ་ལ་བཀོད། དེ་ནས་རབ་ཏུ་བྱུང་བ་དང་ཐེག་པ་གསུམ་ལ་མཁས་པའི་དགེ་སློང་དང༌། པཎྜི་ཏ་མཁས་ཤིང་གསལ་བ་ཤ་སྟག་ཏུ་སྐྱེ་བ་མང་པོ་བླངས་ནས་དམ་པའི་ཆོས་བསྟན་ཏེ་མཐའ་ཡས་པའི་སེམས་ཅན་གྱི་དོན་རྒྱ་ཆེར་བྱས། དེ་ནས་སུམ་ཅུ་རྩ་གསུམ་དུ་ལྷའི་བུ་ཞི་བའི་ཏོག་ཅེས་བྱ་བར་སྐྱེས་ནས་ལྷ་མང་པོའི་དོན་བྱས། དེ་ནས་འདིར་སྐྱེས་པ་ཡིན། འདིར་རྗེ་བཙུན་བྱམས་མགོན་གྱི་སྐུ་རིན་པོ་ལས་བྱས་པ་སོགས་བཀོད་པ་ཐོ་ཚེར་བྲིས་པ་ལྟར་བཞེངས་ནས་འཆད་ཉན་དང་ཐུགས་དམ་སོགས་ཀྱི་དགེ་རྩ་རྗེ་བཙུན་གྱིས་རྗེས་སུ་འཛིན་པའི་ཆེད་དུ་བསྔོ་ཞིང་བསྟན་པ་རྒྱས་པ་སོགས་ཀྱི་སྨོན་ལམ་རྒྱ་ཆེན་པོ་འདེབས་པར་མཛད། དེ་ལྟར་བསྒྲུབས་པས་འདིར་ཡང་བསྟན་པ་དང་སེམས་ཅན་ལ་ཕན་པ་རྒྱ་ཆེན་འབྱུང༌། བྱང་ཆུབ་ཀྱི་སེམས་ལ་བརྟེན་ནས་རྟོགས་པ་ཁྱད་པར་ཅན་སྐྱེ། འབྲེལ་ཚད་དཀར་པོའི་ས་བོན་ཐེབས། མདོ་སྔགས་ལ་བརྟེན་པའི་སློབ་མ་བསྟན་པ་འཛིན་པ་དང་སེམས་ཅན་ལ་ཕན་པ་རྒྱ་ཆེན་པོ་དང་ལྡན་པ་མང་དུ་འབྱུང༌། སྙན་པའི་གྲགས་པས་ཕྱོགས་ཀུན་ཏུ་ཁྱབ་ཅིང་སངས་རྒྱས་ཀྱི་བསྟན་པ་རིན་པོ་ཆེ་སྒོ་ཐམས་ཅད་ནས་རྒྱས་པར་བྱེད་དོ། །སྐྱེ་བ་ཕྱི་མ་དགའ་ལྡན་དུ་རྒྱལ་ཚབ་མི་ཕམ་མགོན་པོའི་སྲས་མཆོག་ལྷའི་བུ་རྒྱལ་སྲས་ཞི་བའི་སྙིང་པོ་ཞེས་བྱ་བར་སྐྱེས་ནས་བྱང་ཆུབ་སེམས་དཔའི་སྤྱོད་པ་རླབས་པོ་ཆེས་འགྲོ་བའི་དོན་བྱེད་ཅིང༌།མཐར་དེ་བཞིན་གཤེགས་པ་བྱམས་པའི་དབང་པོ་ཞེས་བྱ་བར་འགྱུར་རོ། །ཞེས་མཁན་ཆེན་ལས་ཀྱི་རྡོ་རྗེས་གསང་བའི་བདག་པོ་ཕྱག་ན་རྡོ་རྗེ་ལ་དངོས་སུ་ཞུས་པ་ལས་འབྱུང་ཞིང་དབུ་མ་པ་དཔའ་བོ་རྡོ་རྗེས་རྗེ་བཙུན་འཇམ་དཔལ་དབྱངས་ལ་ཞུས་པ་ལས་ཀྱང་དེ་བཞིན་དུ་འབྱུང་ཡང་དུས་ཕྱིས་བླ་མ་འཇམ་དཔལ་རྒྱ་མཚོས་རྗེ་བཙུན་འཇམ་པའི་དབྱངས་ལ་གསོལ་བ་ཡུན་རིང་དུ་བཏབ་སྟེ། སློབ་དཔོན་རིན་པོ་ཆེ་འདུལ་བ་པ་འདི་པའི་སྐུ་ཚེ་སྔ་ཕྱི་རྣམས་ཇི་སྐད་བྱ་བ་ལགས། འདིར་བསྟན་པ་ལ་ཕན་པ་ཆེ་ཆུང་ཇི་ཙམ་འབྱུང༌། སྐུ་ཚེ་རིང་ཐུང་ཇི་ཙམ་ཡོང༌། གང་དུ་བཞུགས་ན་འགྲོ་དོན་དང་ཐུགས་དམ་འཕེལ་ཞེས་ཞུས་པས། རྗེ་བཙུན་གྱིས་འདུལ་བ་པ་སྔོན་སྐྱེ་བ་མང་པོའི་སྔོན་རོལ་དུ་རྒྱ་གར་དུ་བྲམ་ཟེའི་ཁྱེའུ་གོ་འཕང་བྱ་བར་སྐྱེས་ཏེ་སངས་རྒྱས་ལོག་པར་དད་སེལ་གྱི་སྤྲུལ་པའི་རང་རྒྱལ་ཞིག་ལ་བསོད་སྙོམས་བཟང་པོ་ལྷུང་བཟེད་གང་ཕུལ་ནས། བདག་སྐྱེ་བ་ཐམས་ཅད་དུ་རྒྱལ་བའི་དམ་ཆོས་མཐའ་དག་བཟུང་ནས་མཐའ་འཁོབ་ཀྱི་ཡུལ་རྣམས་སུ་འགྲོ་བ་གདུལ་དཀའ་བ་རྣམས་ལ་དམ་པའི་ཆོས་བསྟན་ནས་ཐེག་པ་གསུམ་གྱི་ལམ་རྣམ་པར་དག་པ་ལ་འགོད་པར་གྱུར་ཅིག ཅེས་སྨོན་ལམ་བཏབ་པས་སྐྱེ་བ་མང་པོར་མཐའ་འཁོབ་ཀྱི་རྒྱལ་པོ་སོགས་སུ་སྐྱེས་ནས་འགྲོ་བ་གདུལ་དཀའ་བ་མང་པོའི་དོན་དཔག་མེད་བྱས། སྟོན་པ་འདི་འཇིག་རྟེན་དུ་བྱོན་དུས་དགེ་སློང་འདུལ་བ་ཏོག་ཅེས་བྱ་བའི་སྡེ་སྣོད་གསུམ་ལ་མཁས་པ་ཅིག་ཏུ་སྐྱེས། དེ་ནས་བཟུང་སྟེ་པཎྜི་ཏ་དང་རབ་ཏུ་བྱུང་བ་དང་དགེ་སློང་ཐེག་པ་གསུམ་ལ་མཁས་པ་ཤ་སྟག་ཏུ་སྐྱེས་ཞིང༌། དེའི་དུས་དཀའ་བཞི་པ་དང་དཔོན་སློབ་ཏུ་གྱུར་ཅིང་འབྲེལ། དེ་ནས་སུམ་ཅུ་རྩ་གསུམ་དུ་ལྷའི་བུ་ཞི་བའི་ཏོག་ཅེས་བྱ་བར་སྐྱེས། དེ་ནས་འདིར་སྐྱེས་པ་ཡིན། འདིར་ཡང་སྔོན་གྱི་འབྲེལ་བས་དཀའ་བཞི་པ་དང་དཔོན་སློབ་ཏུ་གྱུར་ཏེ་བླ་ན་མེད་པའི་དད་པ་བརྟན་པོ་ཐོབ། བྱང་ཆུབ་ཀྱི་སེམས་ལ་བརྟེན་ནས་མངོན་རྟོགས་ཁྱད་པར་ཅན་སྐྱེས། མདོ་སྔགས་རྣམ་དག་གི་སྒོ་ནས་བསྟན་པ་ལ་ཕན་པ་རྒྱ་ཆེན་པོ་འབྱུང༌། མི་གཡོ་བ་དཀར་པོ་སྐྱེ་བ་མང་པོའི་ཡི་དམ་ཡིན་པས་འདིར་ཡང་རྗེས་སུ་བཟུང་ཞིང་དངོས་དང་རྨི་ལམ་ཅི་རིགས་སུ་ཞལ་སྟོན། འོད་ཟེར་ཅན་གྱིས་སྐབས་མང་པོར་བར་ཆད་སེལ། སྐྱེ་བ་མང་པོར་དཔལ་ལྡན་འདུས་པ་དང་ཧེ་རུ་ཀས་བྱིན་གྱིས་བསླབས། འཇམ་དཀར་གྱིས་སྐྱེ་བ་གསུམ་དུ་རྗེས་སུ་བཟུང་ནས་བྱིན་གྱིས་བརླབས་ཀྱང་དམ་སེལ་ཅན་ཞིག་ལ་རྗེས་གནང་བྱས་པས་ཅུང་ཟད་འགྲིབས་འདུག དེ་ལ་བཤགས་བསྡམ་གྱིས་ལ་འཇམ་དབྱངས་ཀྱི་བློ་འཕེལ་བའི་གཟུངས་རིན་པོ་ཆེས་བྲིས་པ་བརྒྱ་ཕྲག་གཅིག་འདོན་པ་ལ་ཡོན་བྱིན་ནས་སྨོན་ལམ་བཏབ་ན་གཞན་ཕན་ཆེ། ཚེ་དྲུག་ཅུ་ལྷག་ཙམ་ལས་ཕལ་ཆེར་མི་ཐུབ། དེ་ལའང་བར་ཆད་མང་བར་སྣང་བས། དེ་བཟློག་པའི་ཐབས་རྟ་མགྲིན་ཤྭ་ནའི་བཟླས་སྒྲུབ་དང༌། 4/5 མདུན་ངོས། 上一页 2 3 4 5 下一页 尾页 |
