| དཔལ་ལྡན་ནམ་མཁའི་ལུས་ཅན་ཁྱོད་ཉིད་ཀྱི། །འདྲེན་བྱེད་ཡོན་པོར་འཁྱོག་པའི་སྒྲོ་ལྡན་ནི། །པཉྩ་རྫོགས་པ་ཅི་སྨོས་གཅིག་གིས་ཀྱང༌། །དཔལ་རྐང་ཡིད་ཀྱི་བརྟན་པ་རྡོ་རྗེའི་གོ།ལན་བརྒྱར་འབིགས་ན་དེ་ལས་གཞན་པའི་ཅི། །མཆུ་སྒྲོས་བྱུ་རུའི་སྐྱེད་ཚལ་ཉམས་དགའ་བར། །ཆུ་ཤེལ་གསར་པའི་སྤུ་ལོང་ཕང་ཕུང་ལ། །འགོངས་པའི་ཚེམས་དཀར་ཕྲེང་བ་ཚར་དུ་དངར། །སྙན་ཚིག་གྲེ་འགྱུར་གདངས་ཀྱིས་སྒྲ་འཛིན་གྱི། །དབང་པོ་རྣམ་པར་བཞད་པའི་བཅུད་ལེན་འདིས། །དྲི་ཟའི་ན་ཆུང་མཁར་ཉལ་གནས་འབྲོས་ཤིང༌། །གསེར་མངལ་སྐྱེངས་ནས་བསམ་གཏན་ཟོལ་ལ་བརྟེན། །རིན་ཆེན་སོར་གདུབ་མཛེས་མས་དམ་འཁྱིད་པའི། །ཕྱག་ཟུང་འཇམ་མཉེན་ཀ་མ་ལ་ཡི་སྟེང༌། །འཕང་འགྲོའི་རྔ་གསང་དབྱར་སྐྱེས་དབྱངས་བཞིན་སྒྲོག །མཁྲང་ཞིང་རབ་རྒྱས་ནུ་མའི་ཁུར་འཆང་བ། །སྨིན་ལེགས་ན་ཆུང་གཙུག་རྒྱན་ཁྱོད་ཀྱིས་ནི། །ལུས་ཅན་ཆགས་པའི་བསམ་གཏན་ལ་འགོད་ན། །འདི་ལས་གཞན་པའི་ཡིད་སྲུབས་མདའ་དེ་གང༌། །རིང་ནས་ཆགས་དང་བྲལ་བའི་དྲང་སྲོང་ཡང༌། །ཡ་མཚན་ཁྱོད་སྐུའི་དཔལ་འདིར་ཡིད་འཁྱོར་བས། །མནྡྷ་རཱ་ཡི་དབུ་བ་བརྩེགས་འདྲ་བའི། །མུ་ཏིག་ཕྲེང་ཚོགས་འཆའ་བས་དགོད་པ་བཞིན། །དབང་སྔོན་འདབ་བརྒྱ་བཞད་པ་ལ་འགྲན་པའི། །སྲབ་འཇམ་ལྷ་རྫས་སྟོད་གཡོགས་རྣམ་པར་གཡོ། །པདྨ་རཱ་གའི་མདངས་ཀྱི་མཛེས་སྡུག་ཀྱང༌། །ཕམ་བྱེད་སྨད་གཡོག་ཤམ་ཐབས་དྲ་བས་དཀྲིས། །ཡིད་འོང་་རྣམ་འགྱུར་སྟོང་གི་རྣམ་རོལ་ཅན། །འཕོ་འགྱུར་སྤངས་པའི་བརྒྱད་ཟུང་ལང་ཚོའི་དབྱིངས། །མངོན་དགྱེས་དུས་གསུམ་རྒྱལ་བའི་ཡུམ་དེ་ལ། །གཙུག་སྐྱེས་འཛིན་མར་བཀོད་པའི་ཕྱག་བགྱིད་དོ། །སྙིང་ལ་ཁྱོད་སྐུའི་སྣང་བ་དྲན་ཙམ་གྱིས། །རབ་འབྱམས་ཤེས་བྱའི་ཚོགས་རྣམས་མ་ལུས་པ། །ཇི་བཞིན་རྟོགས་པའི་རྣམ་དཔྱོད་འོད་སྟོང་གིས། །འགྲོ་བའི་རྨོངས་མུན་མ་ལུས་སེལ་བར་ཤོག །བཤད་པས་བློ་གསལ་རྣ་བ་མཛེས་བྱེད་ཅིང༌། །རྩོད་པས་ལོག་སྨྲ་མ་ལུས་ཀླད་པ་འགེམས། །རྩོམ་པས་མཁས་རྣམས་མགྲིན་པའི་རྒྱན་འཆང་བའི། །དབྱངས་ཅན་ལྷ་མོས་བཀྲ་ཤིས་དེང་འདིར་སྩོལ། །ཅེས་པ་འདི། བཙུན་པ་བློ་བཟང་ཆོས་ཀྱི་རྒྱལ་མཚན་གྱིས་ན་ཚོད་ལོ་བཅུ་བཞི་པའི་དུས་སུ་སྦྱར་བའོ། །ཞེས་པ་འདི་ཕྱག་བྲིས་སུ་མཛད་དོ། །བསྟོད་པ་འདི་ནི་དབྱངས་ཅན་མའི་སྐུ་ཇི་ལྟར་གཟིགས་པ་ལྟར་དུ་བསྟོད་པ་མཛད་པ་ཡིན་པས་འདི་ལ་དབྱངས་ཅན་མའི་བསྟོད་པ་གཟིགས་སྣང་མ་ཞེས་རྗེ་བཙུན་བློ་བཟང་ཆོས་ཀྱི་རྒྱལ་མཚན་གྱི་ཐུགས་སྲས་གྲུབ་ཆེན་རྣམས་མཐུན་པར་གསུང་ངོ༌། །དེ་ནས་མཁས་གྲུབ་སངས་རྒྱས་ཡེ་ཤེས་ཀྱི་བཀའ་བཞིན་ལམ་རིམ་ཆུང་བ་བཟུང་ནས་ཞག་བཅུ་སྐོར་སོང་བའི་མཚམས་ལམ་རིམ་ཆེ་བ་ལ་གཟིགས་པས་ཐུགས་ཤིན་ཏུ་འགྲོ་བ་ཞིག་བྱུང་སྟེ་འཛིན་པར་རྩོམ་པ་ན་བདག་ཅག་གི་སྟོན་པ་ཐུབ་པའི་དབང་པོ་སྐུ་གསེར་གྱི་ལྷུན་པོ་ལ་ཉི་མ་འབུམ་གྱི་མདངས་བྱུགས་པ་ལྟ་བུ་སྐུ་ཆེ་ཞིང་འོད་ཟེར་ཕྱོགས་ཀུན་ཏུ་འཕྲོ་བ་ཞིག་ཞལ་གཟིགས་ཏེ། དེ་ལ་བསྐོར་བ་ལན་མང་དུ་བྱས་ཏེ་གསོལ་བ་བཏབ་པས་བྱིན་གྱིས་བརླབས་ཏེ་ལམ་རིམ་ཆེན་མོ་ཡོངས་སུ་རྫོགས་པ་ཐོགས་པ་མེད་པར་ཟིན་ཏེ་མཁས་གྲུབ་སངས་རྒྱས་ཡེ་ཤེས་ལ་རྒྱུགས་ཕུལ། དེ་ནས་དགུང་ལོ་བཅུ་དྲུག་ལོན་པའི་དུས་སུ་མགོན་པོ་ཞི་བ་ལྷའི་རྟོགས་བརྗོད་པདྨ་དཀར་པོའི་ཕྲེང་བ་ཞེས་པ་སྙན་ངག་གི་ཚིག་རྒྱན་ཕུན་སུམ་ཚོགས་པ་ཞིག་རྩོམ་པ་མཛད་པས་སྐྱེ་བོ་བློའི་ནོར་ལྡན་རྣམས་དགའ་བ་བསྐྱེད་པར་གྱུར། རབ་ཏུ་བྱུང་ནས་ཁས་བླངས་པའི་ཚུལ་ཁྲིམས་མིག་འབྲས་ལྟར་གཅེས་པར་བསྲུང་འདོད་ཀྱིས་ཐམས་ཅད་མཁྱེན་པ་དགེ་འདུན་གྲུབ་ཀྱིས་མཛད་པའི་འདུལ་བའི་གླེང་འབུམ་ཆེན་མོ་ཡང་ཡང་གཟིགས་པས་ཚིག་དོན་ཐམས་ཅད་ཐུགས་སུ་ཆུད་པ་བྱུང༌། ཚུལ་འདི་ལ་ནི་རྗེ་བློ་བཟང་ཆོས་ཀྱི་རྒྱལ་མཚན་ཉིད་ཀྱི་ཞལ་ནས། དེ་དུས་དཀོར་ཀྱིས་ཆེར་མ་སྦགས་ཤིང་ན་ཚོད་གསར་པ་རྩ་ཁམས་ཤེས་པ་སོགས་ཀྱང་གསལ་བས་ཡིན་པ་འདྲ། གླེགས་བམ་བདག་ཉིད་ཀྱིས་བལྟས་པ་དང༌། ཆོས་བླ་མས་གསུངས་པ་སོགས་ལན་རེ་ལན་གཉིས་ཙམ་གྱིས་དོན་བློ་ལ་འཆར་བ་བྱུང་གསུང་ངོ༌། །མདོར་ན་དགུང་ལོ་བཅུ་བཞི་ནས་བཅོ་བརྒྱད་ཀྱི་བར་མཁས་གྲུབ་ཆེན་པོ་སངས་རྒྱས་ཡེ་ཤེས་ཀྱི་ཞལ་སྔ་ནས་གདུལ་བྱའི་བསོད་ནམས་ཀྱི་ཞིང་དུ་ཕྱོགས་སུ་གཤེགས་པའི་སྐབས་མ་གཏོགས་རྒྱུན་དུ་ཞབས་དྲུང་དུ་བཞུགས་ནས་བུ་སྟོན་ཐམས་ཅད་མཁྱེན་པའི་གསུང་རབ་འགངས་ཆེ་བ་འགའ་ཞིག་གི་ལུང་དང༌། བློ་སྦྱོང་གི་རིམ་པ་མང་པོའི་ལུང་དང༌། དཔེ་ཆོས་རིན་སྤུངས་རྩ་འགྲེལ། བེའུ་བུམ་སྔོན་པོ་རྩ་འགྲེལ་སོགས་ཀྱི་ལུང་གསན། གཞན་ཡང་ལམ་རིམ་ཆེ་བ་དང་འདུས་པའི་འགྲེལ་པ་བཞི་སྦྲགས་སུ་གྲགས་པ་སོགས་ཅུང་ཟད་མ་གཏོགས། རྗེ་བདག་ཉིད་ཆེན་པོ། སྲས་ཀྱི་ཐུ་བོ་རྣམ་གསུམ། རྗེ་དགེ་འདུན་གྲུབ། བ་སོ་ཆོས་རྗེ་སོགས་ཀྱི་གསུང་རབ་ཡོངས་སུ་གྲགས་པ་ཕལ་ཆེར་གྱི་ལུང་རྣམས་གསན། ལམ་རིམ་དང་བསྐྱེད་རྫོགས་ཀྱི་ཁྲིད་གང་གསན་པ་རྣམས་ལ་ཉམས་བཞེས་ཀྱང་གདེང་ཐོབ་པར་མཛད། སྟོན་གྱི་དུས་འགོལ་བའི་སྐབས་སྣར་ཐང་བརྒྱ་རྩའི་རྗེས་གནང༌། ཇོ་བོ་ལུགས་ཀྱི་སྒྲོལ་མ་ཉེར་གཅིག་གི་རྗེས་གནང༌། བཀའ་གདམས་ལྷ་བཞིའི་རྗེས་གནང༌། བེའུ་བུམ་སོ་སོའི་ལུང་དང་བཅས་པ། རྡོ་རྗེ་འཕྲེང་བ་དང༌། མི་ཏྲ་བརྒྱ་རྩའི་དབང་ལུང་ཡོངས་རྫོགས་གསན། དབང་རྗེས་གནང་གསན་པའི་ལྷ་རྣམས་ལ་བསྙེན་འགྲོ་གང་ཆེ་ཡང་མཛད་དོ། །དེ་ནས་སྟོན་རྗེ་རིན་པོ་ཆེའི་རྣམ་ཐར་ལྟར་ཐོག་མར་ཤིང་རྟ་ཆེན་པོའི་གཞུང་རྣམས་ལ་བསླབ་སྦྱོང་གཏིང་ཕྱིན་པ་ཞིག་མཛད་པར་བཞེད་ནས་ཐུགས་ལ་འདི་འཁྲུངས་ཏེ། ད་ནི་དབང་ལུང་གདམས་ངག་ཕལ་ཆེར་ཡང་ཞུས་ཟིན། མདོ་སྔགས་ཀྱི་ལམ་གྱི་རིམ་པ་རྣམས་ལ་ཡང་གོ་བ་རགས་པ་ཙམ་ཆགས། །ལྷག་པའི་ལྷ་མང་པོའི་བསྙེན་སྒྲུབ་སོགས་ཀྱང་དགའ་རབ་བྱུང༌། ད་ནི་བཀྲ་ཤིས་ལྷུན་པོར་ཕྱིན་ནས་ཤིང་རྟ་ཆེན་པོའི་གཞུང་ཡོངས་རྫོགས་ལ་བསླབ་སྦྱོང་མཐར་ཕྱིན་པ་ཞིག་མྱུར་བར་བྱའོ་སྙམ་དུ་དགོངས་ནས་མཁས་གྲུབ་སངས་རྒྱས་ཡེ་ཤེས་ལ་དེ་བཞིན་ཞུས་པ་ན། སྔར་དང་གཏན་མི་འདྲ་བའི་དགྱེས་པའི་འཛུམ་དང་བཅས་ཏེ། ད་ནི་བཀྲ་ཤིས་ལྷུན་པོར་སློབ་གཉེར་གྱི་རྩིས་ཅིས་ཀྱང་ལེགས་ཞེས་བཀའ་སྩལ་ཏེ་ལོ་དེ་ཁའི་ཟླ་བ་བཅུ་གཅིག་པའི་ཡར་ངོའི་ཚེས་གསུམ་ལ་ཆོས་གྲྭ་ཆེན་པོ་བཀྲ་ཤིས་ལྷུན་པོར་ཕེབས། དེ་ནུབ་མནལ་ལམ་དུ་བུད་མེད་གཞོན་ནུ་མ་ཕོ་ཆས་སུ་བྱས་པ་ཅིག་ན་རེ། འདི་སྔར་ཁྱོད་རང་གིས་བཟུང་བའི་ཉི་མའི་དཀྱིལ་འཁོར་ཡིན་ནོ་ཟེར་སེར་ཁོབ་པ་འོད་ཟེར་ཆེར་མེད་པ་མཎྜལ་གྱི་དབྱིབས་ཅན་ཞིག་ཕྱག་ཏུ་ཕུལ་བྱུང་བ་ལ། ཉི་མ་ཡིན་ན་འོད་ཆེན་པོ་ཡོང་དགོས་རྒྱུ་ལ་གསུངས་པས། དེ་ན་རེ། འོད་ཟེར་རྣམས་ཕྱིས་ནས་གསལ་བར་འགྱུར་རོ། །ཟེར་བ་ཞིག་རྨིས། དེ་ཡང་སློབ་གཉེར་གཤའ་མ་ཞིག་བྱེད་ན་སྙིང་ཐག་པ་ནས་ཆོས་གྲྭ་རིགས་ལུང་དུས་ལས་མ་ཡོལ་བ་འགྲིམ་པ་སོགས་དཀའ་བ་མ་སྤྱད་ན་དམ་པའི་སྐྱེ་བོ་མཁས་པ་རྣམས་དགྱེས་པ་བསྐྱེད་མི་ནུས་པའི་ཉེས་པར་གཟིགས་ནས། འཁྲུངས་ཡུལ་དང་བསྟུན་ཐོས་བསམ་གླིང་གི་ཆོས་གྲྭ་འགྲིམ་པར་མཛད། དེ་དུས་འཁོར་ཡང་དགེ་བཤེས་དཔལ་འབྱོར་བྱ་བ་གཅིག་ལས་མེད་ཅིང༌། གྲྭ་རྐྱང་སྙོམས་ཆུང་རང་ལ་ཐུགས་གཞོལ་བས་དེ་ཁའི་བརྟུལ་ཞུགས་འཛིན་པ་ཡིན་ཡང་བཀྲ་ཤིས་ལྷུན་པོའི་བླ་མ་སློབ་དཔོན་ཐམས་ཅད་ཀྱིས་ཕྱག་དང་བསྙེན་བཀུར་མཐོང་གཟོས་ཆེར་མཛད་ཅིང༌། ཁྱད་པར་ཁྲི་ཐོག་ན་པཎ་ཆེན་བསམ་འགྲུབ་དཔལ་བཟང་བཞུགས་པ་མཇལ། དེ་རྗེས་ཁོང་ལ་གྲྭ་པ་ཞིག་གིས་དེ་རིང་རྗེ་དྲུང་དབེན་ས་པ་དང་མཇལ་འཛོམ་མཛད་འདུག་པ་ཞེས་ཞུས་པས། ཤིན་ཏུ་མཇལ། ངེད་གཉིས་ཕྱག་འཚལ་རེས་ནི་མ་བྱུང་གསུངས། ཅི་ཡིན་ཞུས་པས། ཁོང་ནི་ཐམས་ཅད་མཁྱེན་པ་དགེ་འདུན་གྲུབ་ལ་ཕྱག་འཚལ་གྱི་འདུག ངས་ནི་རྒྱལ་བ་བློ་བཟང་དོན་གྲུབ་ལ་བཙལ། ངེད་གཉིས་ཕྱག་འཚལ་རེས་མ་བྱུང་ཞེས་ཞལ་ཀྱལ་ཡང་གསུངས་ཞེས་ཟེར། དེའི་ཚེ་གཟིམ་ཁང་དང་ཆོས་ཁྲིམས་པ་སོགས་མང་པོས་མཁན་སློབ་ཐམས་ཅད་ཀྱིས་ཕྱག་སོགས་མཛད་ནས། ཚོགས་ཆེན་དུ་ཡང་ཁྲི་སྟན་མཐོ་བེ་ཞིག་ཅིས་ཀྱང་བཞེས་དགོས་ཞེས་ཡང་ཡང་ནན་གྱིས་ཞུ་བ་བྱུང་ཡང༌། དགག་བྱ་ཆེ་ཞིང་དགོས་པ་ཆུང་བ་དང༌། རྗེ་བླ་མའི་དགོངས་པར་ཡང་སྙོམས་ཆུང་གིས་ཆོས་གྲྭ་གཤའ་མ་འགྲིམ་པ་ཞིག་ལ་དགྱེས་པས་དང་དུ་མ་བཞེས་པ་ན། འོ་ན། བཙུན་ཆུང་རྣམས་དང་ལྷན་ཅིག་གྲལ་འཛིན་གྱི་དཀའ་བ་མི་དགོས་ཤིང༌། ཉེས་པ་གཞན་གང་ཡང་མེད་པས་དྲེའུ་རྔོག་གིས་ཁྱད་པར་དུ་བྱས་པའི་གྲལ་ཁུངས་ཤིག་ཅིས་ཀྱང་འཛིན་དགོས་ཞེས་པཎ་ཆེན་རིན་པོ་ཆེས་ནན་གྱིས་ཞུ་བར་མཛད་པས། རྗེ་འདི་ཐུགས་བཞེད་པ་བཞིན་མ་བྱུང་ཡང་པཎ་ཆེན་རིན་པོ་ཆེའི་བཀའ་ལྕིད་ཆེས་པས་དང་དུ་བཞེས། དེ་ནས་ཐོས་བསམ་གླིང་གི་སློབ་དཔོན་རིན་པོ་ཆེ་དཔལ་འབྱོར་རྒྱ་མཚོའི་དྲུང་དུ་སྦྱོར་བ་རྩི་བའི་འགོ་འཛིན་པར་བྱོན་པའི་ཚེ་རྟེན་འབྲེལ་ཁྱད་པར་ཅན་མང་དུ་བྱུང་ཞིང༌། ཁྱད་པར་གཟིམ་སྤྱིལ་གྱི་སྒོ་དྲུང་དུ་རྣལ་འབྱོར་མའི་རྣམ་པ་ཞིག་གིས་འོ་མ་ཀ་པྰ་ལ་གང་ཁྱེར་བྱུང་བ། རྗེ་འདི་པས་མ་རྒྱུད་པའི་བསླབ་བྱ་གཡོན་སྐོར་དང་ཕྱག་མཛད་པར་མོས་པས། དེས་འཛུམ་པ་དང་བཅས་སྣོད་བཅུད་དེ་རྗེ་འདིའི་སྐུ་མདུན་དུ་བཏེག་བྱུང་བ་དེ་ལ་མཆོད་ཡར་ཞིག་མཛད་ནས་ཡར་ཅུང་ཟད་ཅིག་ཕེབས་ཏེ། རྣལ་འབྱོར་མ་དེ་ཅི་འདྲ་ཞིག་ཡིན་སྙམ་དུ་ཕྱི་མིག་ཅིག་གཟིགས་པས་མི་སྣང་བར་གྱུར་འདུག་གསུང༌། དེ་ནས་སྦྱོར་པ་རྩི་བ་སོགས་སྤྱི་དང་མཐུན་པར་མཛད་པས་སྔོན་ཡུན་རིང་པོ་ནས་སྦྱུངས་པའི་མཐུ་ཅན་ཡིན་པར་མ་ཟད། མཁས་གྲུབ་སངས་རྒྱས་ཡེ་ཤེས་ཀྱི་ཞབས་དྲུང་དུ་མདོ་སྔགས་ཀྱི་ལམ་གྱི་དཀའ་གནས་ཐམས་ཅད་གསན་ཏེ་ཐུགས་ཉམས་སུ་བཞེས་པར་མཛད་པས། དུས་འདིར་ཆོས་གྲྭར་ཕེབས་ཙམ་ཉིད་ནས་ལམ་དང་ལམ་མིན་འབྱེད་པ་ལ་བློ་གྲོས་ཐོགས་པ་མེད་པར་གྱུར་ཀྱང་ཟླ་བ་གཅིག་ཙམ་ཞིག་བུམ་ནང་གི་མར་མེའི་ཚུལ་དུ་བཞུགས། དབྱར་གནས་ལ་དབེན་དགོན་དུ་ཕེབས། དེའི་ཚེ་མཁས་གྲུབ་སངས་རྒྱས་ཡེ་ཤེས་ཀྱིས་བདག་ཉིད་ཆེན་པོ་འདིས་གཙོས་དབེན་དགོན་ཚོགས་པ་ལ་སྤྱན་སྔ་ཆོས་དྲུག་གི་བཤང་ལུང་དང༌།ཆོས་རྗེ་འབའ་ར་བའི་གསུང་འབུམ་གྱི་ལུང་སོགས་དང༌། བདག་ཉིད་ཆེན་པོ་འདི་ལ་སྒེར་དུ་རྒྱལ་བ་ཙོང་ཁ་པའི་སྙན་རྒྱུད་ཐུན་མོང་མིན་པ་ཁྲིད་ཆེན་བརྒྱད་དུ་གྲགས་པ་དང༌།དབང་རྗེས་གནང་སྔར་མ་གསན་པ་མང་དུ་གནང༌། སྟོན་དུས་རྗེ་བཙུན་མི་ལའི་རྣམ་མགུར་གྱི་ལུང་སོགས་གསན་ཞིང༌། དབེན་པ་ལ་ཐུགས་སྤྲོ་བས། ན་མོ་གུ་རུ་མཉྫུ་གྷོ་ཥྰ་ཡ། གང་ལ་བརྟེན་ན་བསླུ་བ་མེད་པའི་སྐྱབས། །བུ་རམ་ཤིང་པའི་ཞབས་སེན་ཟླ་ཚེས་དཀར། བདག་སྙིང་ཀུན་དའི་ཟེའུ་འབྲུར་རྟག་གཟིམས་པའི། །མཛེས་སྡུག་ནམ་ཡང་ཉམས་པ་མེད་གྱུར་ཅིག །ལྷར་བཅས་འདྲེན་པ་སྟོན་པ་སངས་རྒྱས་ཀྱང༌། །དེང་དུས་ཐོས་པའི་ལམ་དུ་གཤེགས་གྱུར་ན། །མཐོན་པོའི་ནོར་འཛིན་ལས་འོངས་འབབ་ཆུ་ལྟར། །གཡོ་བའི་འཇིག་རྟེན་རྟག་པའི་གོ་སྐབས་ཅི། །དཔག་མེད་ཚེ་གནས་སྔོན་གྱི་མི་རྣམས་ཀྱང༌། །དེང་སང་མིང་གི་ལྷག་མ་ཙམ་ཞིག་ན། །སྐལ་ངན་སྙིགས་དུས་སྐྱེ་བོ་འདི་དག་གི། །ཚེ་ནི་བར་སྣང་གློག་དང་ཅིས་མི་མཚུངས། །སྐྱེ་རྒ་ན་འཆིའི་དགྲ་ཚོགས་ཀུན་བཅོམས་ཤིང༌། །ཉོན་མོངས་གཡུལ་ལས་རྒྱལ་བའི་མཁས་པའི་ཚོགས། །ཀུན་ཀྱང་དུས་ཀྱིས་རིམ་པས་བྱོན་ཟིན་ན། །བདག་ལྟ་མྱུར་དུ་མི་འཆིའི་ངེས་པ་གང༌། །ཚེ་ནི་བསེར་བུས་བསྐྱོད་པའི་ཨུཏྤལ་གྱི། །འདབ་རྩེར་འབྲེང་བའི་ཆུ་ཐིགས་ལྟར་མཐོང་ཞིང༌། །སྲིད་པའི་ཕུན་ཚོགས་གདུག་པའི་སྦྲུལ་གྱི་ལྕེ། །གཡོ་བའི་ཟློས་གར་འདི་ལ་དགའ་བ་ཅི། །འཁོར་བའི་བདེ་འབྱོར་ཀུན་གྱི་རྩེར་སོན་པ། །ཚངས་དང་དབང་པོ་འཁོར་ལོས་བསྒྱུར་རྒྱལ་ཡང༌། །དབང་མེད་འཇིགས་རུང་མནར་མེད་མེས་སྲེག་ན། །མཁས་པ་སུ་ཞིག་འདོད་ལ་ཆགས་པར་བྱེད། །འཇིག་རྟེན་ཕུན་ཚོགས་སྟོབས་ཀྱི་མྱོས་ཆུ་ཡིས། །མངོན་པར་མྱོས་པའི་དྲེགས་ལྡན་འདི་དག་ཀྱང༌། །རིང་པོར་མི་ཐོགས་རྒྱ་མཚོ་འཁྲུགས་པའི་ནང༌། །གྲུ་ངན་ཇི་བཞིན་འགྱུར་བའི་ཆོས་ཅན་ཉིད། །མདོར་ན་མཐོན་པོའི་མཐའ་རྒུད་བསགས་པ་མཛད། །འདུས་པ་འབྲལ་ཞིང་སྐྱེས་པ་ཀུན་འཆི་ཞེས། །བསླུ་མེད་བདེན་པ་གསུང་བས་གང་གསུངས་པ། །དེ་དེ་བཞིན་དུ་འཇིག་རྟེན་འདི་ན་སྣང༌། །རྒྱལ་པའི་ཞལ་གྱི་ཉིན་བྱེད་ལས་འོངས་པའི། །འོད་ཟེར་གང་གིས་ཡིད་ལ་མ་རེག་པ། མི་གོམ་བརྒྱད་ཀྱི་མུན་པའི་གླིང་ཆུད་ན། །དེ་ཚེ་དགེ་ལེགས་གོ་སྐབས་ག་ལ་ཡོད། །སྣ་ཚོགས་འགྲོ་བའི་མཐོ་དམན་འགྱུར་ལྡོག་དང༌། །སྡང་དང་ཕྲད་དང་གཉེན་དང་བྲལ་བ་དང༌། །སྐྱེ་རྒ་ན་འཆིའི་སྣང་ཚུལ་མཐོང་ནས་ནི། །བདག་ཀྱང་དེ་དང་འདྲ་བར་ཅིས་མི་ལྟ། །དབྱར་དུས་མཁའ་ལ་ཤར་བའི་འཇའ་ཚོན་དང༌། །ཆུ་འཛིན་ལང་ལིང་གཡོ་བའི་འདུ་འགོད་ལྟར། །ལང་ཚོའི་རང་བཞིན་འཇིག་པའི་ངང་ཚུལ་ཅན། འདི་ལ་བློ་ལྡན་སུ་ཞིག་ཡིད་རབ་རྟོན། །གསེར་གྱི་རི་ལས་གཡུ་ཡི་ཁྲོན་འབབ་ཅིང༌། །མི་རྣམས་བདག་གི་བཤེས་སུ་སོང་ཡང་ཅི། །འབྲལ་མེད་ནོར་དུ་འཕགས་པའི་ནོར་བདུན་དང༌། །གཏན་གྱི་གྲོགས་པོར་བླ་མེད་བྱང་ཆུབ་བཟང༌། །དེ་ཕྱིར་འདི་ནང་ཆོས་བརྒྱད་སྤྲོས་པའི་རྒྱ། །ཤེས་རབ་རལ་གྲི་རྣོན་པོས་དྲལ་བྱས་ཏེ། །ཐུབ་པས་བསྔགས་པ་དབེན་པའི་ནགས་ཚལ་དེར། །སེམས་ཁྱོད་ཞི་བའི་བདུད་རྩི་ཅིས་མི་ལེན། །སྤངས་ལྗོངས་འཇའ་ཚོན་བཀྲ་བའི་ལྡིང་ཁང་དུ། །ཟླ་བ་ནོར་བུའི་རྡོ་ལེབ་གཅལ་དུ་བཀྲམ། །གཡུར་གྱིས་དུད་པའི་འདབ་མའི་གྲིབ་བསིལ་ལ། །ཉིན་མོ༌སྤྱོད་པའི་རྣལ་འབྱོར་སྐྱོང་བར་སྤྲོ། །དེ་བཞིན་ཟླ་བའི་སྒྲོན་མེ་འོད་འབར་ཞིང༌། །རྒྱུ་སྐར་དོ་ཤལ་རྒོད་པའི་མཚན་དུས་སུ། །གཡེང་མེད་རྣལ་འབྱོར་བརྩོན་པའི་དགའ་བདེ་འདིའི། །དཔེ་ཡང་སྲིད་པ་གསུམ་ན་ག་ལ་ཡོད། །པདྨོའི་དྲ་བས་ཁེབས་པའི་ཉལ་འགྲོའི་རྒྱུན། །ཡོངས་མཛེས་ཆུ་བྱའི་ཚོགས་རྣམས་སྙན་སྒྲོག་ཅིང༌། །རྨ་བྱ་གཞོན་ནུ་དགའ་བའི་གར་བྱེད་པའི། །གནས་དེར་དལ་འབྱོར་དོན་ལྡན་བྱས་ན་སྙམ། །མེ་ཏོག་འབྲས་བུས་གང་བའི་ལྗོན་ཤིང་གི། །སྤུ་ལོང་མངོན་པར་རྒྱས་པའི་ས་འཛིན་ཁྲོད། །སྔོ་ལྗང་ལོ་མའི་སྤྱིལ་ཆུང་ཉམས་དགའ་བར། །ཏིང་འཛིན་དགའ་བདེའི་དཔལ་ལ་སྤྱོད་པར་སྤྲོ། །གང་དུ་ཟ་ཟིར་གཡེང་བ་ཀུན་བོར་ནས། །རི་སྐྱིབས་ནོར་བུའི་ཕུག་ཡངས་ཉམས་དགའ་བར། །འཕགས་པའི་རིགས་བཞི་ལ་གནས་དགའ་བདེ་གང༌། །དེ་འདྲ་རྒྱལ་པོ་རྣམས་ལའང་ཡོད་རེ་སྐན། །འཆི་མེད་སྐྱེད་ཚལ་འདྲ་བའི་སྨན་ལྗོངས་སུ། མི་དགེའི་སྤྱོད་ཚུལ་ཕྲ་མོའང་རྒྱང་བསྲིངས་ཏེ། །སྒོ་གསུམ་དམ་པའི་ལམ་བཟང་སྐྱོན་མེད་པར། །མ་བཅོས་ལྷུག་པར་འཇོག་ལ་སྙིང་ནས་སྤྲོ།།དེར་ནི་ཐུབ་གཞུང་བདུད་རྩིའི་བཅུད་ལེན་གྱིས། །ཉོན་མོངས་ཡིད་ཀྱི་རྣག་ཁྲག་ཀུན་སྦྱངས་ཏེ། ། 2/23 མདུན་ངོས། 上一页 1 2 3 4 5 6 下一页 尾页 |
