| བཀའ་གདམས་གཞུང་དྲུག་གི་ལུང༌། ལམ་རིམ་གྱི་ཁྲིད་སོགས་ཆོས་ཀྱི་རྣམ་གྲངས་ཤིན་ཏུ་མང་བ་གནང༌། དམ་པ་དེ་ཉིད་ཀྱི་དྲུང་དུའང༌། ནཱ་རོ་མཁའ་སྤྱོད་མའི་དབང༌། མཁའ་སྤྱོད་གཞན་གཉིས་ཀྱི་རྗེས་གནང༌།འཇམ་དབྱངས་ཆོས་སྐོར། ཞབས་བརྒྱད་པའི་རྗེས་གནང༌། གླེང་འབུམ་ཆེན་མོ། མདོ་རྩ། སུམ་བརྒྱ་པ། མངོན་པ་ཀུན་ལས་བཏུས་དང་མཛོད་རྩ་བ། འགྲེལ་པ་དོན་གསལ། མདོ་ཀུན་ལས་བཏུས། ཇོ་བོའི་ཆོས་ཆུང་བརྒྱ་རྩ། དབུ་མ་རིགས་ཚོགས་དྲུག བྱམས་ཆོས་ལྔ། འཇིགས་བྱེད་ཀྱི་བསྐྱེད་རིམ་ཆེན་མོ་མཁས་གྲུབ་ཐམས་ཅད་མཁྱེན་པའི་གསུང་གི་འཕྲོ་ཆོས་རྗེ་བློ་གྲོས་ཆོས་སྐྱོང་བས་མཛད་པ་རྣམས་ཀྱི་ལུང་གསན། ཉིན་མཚན་ཁོར་ཡུག་ལྟ་བུར་ཕན་ཚུན་རེ་མོས་སུ་ཆོས་ཀྱི་འཁོར་ལོ་བསྐོར་ཏེ། མངོན་ཆུང་བར་དབེན་དགོན་དུ་ཕེབས། དེ་དུས་དབེན་པ་ལ་ཤིན་ཏུ་དགྱེས་པ་ཆེ་ཞིང༌། ད་ལམ་བྱ་བྲལ་གྱི་བརྟུལ་ཞུགས་བླངས་ཏེ་ཕྱིར་ཟློག་པ་མེད་པ་སྔོན་གྱི་གྲུབ་ཐོབ་རྣམས་དང་མཚུངས་པ་ཞིག་བྱེད། དེ་ལྟར་བྱེད་པ་ལ་འདི་ནང་གི་ལྟོ་གོས་ཙམ་ལ་ཡང་འཁྲི་བ་ཆོད་པ་ཞིག་མ་བྱུང་ན་བྱ་བྲལ་གྱི་མིང་བཏགས་པའི་གཉིས་མེད་སེང་གེར་སོང་ན་མ་ལེགས་སོ་སྙམ་དུ་དགོངས་ཏེ་བཅུད་ལེན་གྱི་རྣམ་གྲངས་དུ་མ་ལ་གོམས་པ་ཉམས་འོག་ཏུ་ཆུད་པར་མཛད་ཅིང་རླུང་སྦྱོར་འཁྲུལ་འཁོར་སོགས་ལ་གོམས་པ་ཕུལ་ཕྱིན་ཡོད་ཀྱང་ད་དུང་བོགས་དབྱུང་བའི་ཕྱིར་དགུན་སྟོད་བྲག་རྒྱར་ཕེབས་ནས་བརྩོན་པར་མཛད་པས་ཞག་བདུན་ཙམ་གྱིས་བཀའ་རྒྱུད་པའི་ལུགས་ཀྱི་རས་ཕུད་བཏང་ཆོག་པ་བྱུང༌། དེར་གཡེང་བ་མེད་ཅིང་ཐུགས་རིག་དྭངས་པས་ཉམས་མགུར་མང་པོ་མཛད་ཅིང༌། འགའ་ཞིག་ཡི་གེར་མཛད་པ་ནི་འདི་ལྟར། ན་མོ་གུ་རུ་མཉྫུ་གྷ་ཥྰ་ཡ། བློ་གཏད་ཐུབ་ཀྱི་བླ་མ་དཀོན་མཆོག་གསུམ། །རྐང་རུས་པའི་ཁོང་ནས་སྐྱབས་བཟུང་སྟེ། །བཀའ་མདོ་རྒྱུད་ཀྱི་ལམ་ལས་འོངས་པ་ཡི། །གླུ་ཚིག་གསུམ་གྱི་སྙིང་གཏམ་འདི་སྐད་སྨྲ། །དུས་ད་ལྟ་རང་དབང་ཡོད་པའི་ཚེ། །དོན་འབྲས་མེད་སྤུན་པ་མ་འཕྱར་བར། །ལས་བྱས་པས་འཚེང་པའི་རྣམ་དཀར་ལ། །ཡིད་རྩེ་གཅིག་ཏུ་དྲིལ་ན་དོན་པོ་ཡིན། །ཚེ་འདི་ཡི་མདུན་མ་ཅི་བྱས་སླ། །ཚེ་ཕྱི་མ་ཤུལ་རིང་འཇིགས་པ་ཆེ། །ལམ་ཤུལ་རིང་འཇིགས་པའི་བསྐྱེལ་བསུ་དང༌། །བརྒྱགས་འཛད་མེད་ཀྱི་གྲབས་གཤོམས་བྱས་ན་ལེགས། །སྔར་འདོད་ཡོད་རོ་ལ་ཇི་ཙམ་སྤྱད། དེ་བསམས་ན་སྙིང་པོ་ཅི་འདྲ་འདུག །ད་རང་ཉིད་རང་གིས་མ་བསླུ་བར། །བློ་འགྱོད་མེད་ཀྱི་གདེངས་དྲོད་ཚེགས་སུ་ཚུད། །རང་མངལ་དུ་ཞུགས་པ་ནས་བཟུང་སྟེ། །དགྲ་འཆི་བདག་དྲུང་དུ་ཆས་ཟིན་ཅིང༌། །དུས་ཡུད་ཙམ་སྡོད་པའི་སྐབས་མེད་པས། །སྙིང་ངང་རིངས་ཀྱི་ལོངས་ཡོད་བདུད་ཀྱིས་བསླུས། །དགུང་མཁའ་ལ་ཤར་པའི་འཇའ་ཚོན་དེ། །གཟུགས་མཛེས་ཀྱང་མྱུར་དུ་ཡལ་ནས་འགྲོ། །གཞོན་ཤ་ཁྲག་རྒྱས་པའི་ལང་ཚོ་ཡང༌། །དུས་སྐད་ཅིག་གིས་མི་རྟག་འགྱུར་བའི་ཆོས། །དབྱར་ཆར་སྤྲིན་ནང་གི་གློག་དམར་བཞིན། །དུས་སྙིགས་མའི་ཚེ་ཐུང་ཞག་འགའ་འོ། །མི་རྒན་གཞོན་གོ་རིམ་མི་འདུག་པས། །ཕྱིས་གཡེང་མེད་དུ་བག་གཟོན་དམ་པོ་མཛོད། །གཉེན་འཁོར་གཡོག་སྤྲིན་གྱི་འདུ་འགོད་དང༌། །སྲོག་མི་ངན་ཆུ་ཡི་ཆུ་ལྦུར་དང༌། །ནོར་ལོངས་སྤྱོད་རྨི་ལམ་དཔལ་འདྲ་བས། ཚེ་རྟག་འཛིན་གྱི་མདུན་གྲབས་ཅམ་སྟེ་ཞོག །རྟེན་དལ་འབྱོར་ལྡན་པའི་མི་ཡི་ལུས། །འདི་རྙེད་པར་དཀའ་ཞིང་འཇིག་པར་སླ། །དུས་ད་རེས་ལན་ཅིག་རྙེད་པ་འདི། །དོན་མདོ་མེད་དུ་གཏོང་ན་སྨྱོན་པ་ཡིན། །ཡུལ་ཡུལ་ཅན་གྱི་ཆོས་རྣམས་ཇི་སྙེད་པ། བློ་ས་མ་བརྟགས་མ་དཔྱད་ཉམས་དགའ་ཡང༌། །དོན་དཔྱད་ན་མི་དམིགས་སྟོང་པའི་ངང༌། །དབྱིངས་དེ་རུ་རིག་པ་གཅེར་བུར་ཞོག །སེམས་ཆགས་སྡང་རྗེས་སུ་མ་འཕྲོ་བར། །རྗེ་རྒྱལ་བའི་གསུང་གི་གཅེས་པའི་མཛོད། །ལམ་སྟོང་ཉིད་སྙིང་རྗེའི་སྙིང་པོ་ཅན། །འདི་འབྲལ་མེད་དུ་སྒོམས་དང་ཡུན་དུ་དགེ །ཕྱི་ཐོས་བསམ་སྒྲོ་འདོགས་མ་ཆོད་ཀྱང༌། །སེམས་འཁོར་འདས་རྩ་བར་གསུངས་པའི་ཕྱིར། ནང་ཤེས་རྒྱུད་ཞི་ཞིང་དུལ་བར་གྱིས། །ཆོས་ཟབ་དོན་གྱི་སྙིང་པོ་བསྡུས་པ་ཡིན། །ལུས་སྣང་སྟོང་ཚོགས་པ་ལྷ་ཡི་སྐུ། །ངག་གྲག་སྟོང་བཟླས་པ་རྒྱུན་མི་འཆད༌། །ཡིད་བདེ་སྟོང་དབྱིངས་ལས་མ་གཡོས་པར། །ཕ་བླ་མའི་རྣམ་ཐར་རྗེས་སུ་སྐྱོངས། །གཏམ་འདི་ལྟར་སྨྲས་པའི་དགེ་བ་དེས། །ཁམས་གསུམ་གྱི་འཁོར་བའི་སེམས་ཅན་རྣམས། །རྒྱུ་ཀུན་འབྱུང་འབྲས་བཅས་ཡོངས་སྤངས་ཏེ། །སྐུ་གསུམ་གྱི་གོ་འཕང་མྱུར་ཐོབ་ཤོག །དེ་ནས་དབེན་དགོན་ཚོགས་པ་རྗེ་རྒྱས་སུ་སོང་སྟེ་དགེ་འདུན་མང་དུ་ཚོགས་པ་དང༌། ཕྱོགས་འདུས་ཀྱི་དད་ལྡན་བཅས་ལ་ལམ་རིམ། བློ་སྦྱོང༌། བཀའ་གདམས་གླེགས་བམ། དཔེ་ཆོས་རིན་སྤུངས། འདུལ་བའི་བསླབ་བྱ། འཇིགས་བྱེད་དང་བདེ་མཆོག་སོགས་ཀྱི་བསྐྱེད་རྫོགས་དམར་ཁྲིད། ལྟ་ཁྲིད། གསང་བདེ་འཇིགས་གསུམ། གདུགས་དཀར་སོགས་ཀྱི་དབང༌། སྣར་ཐང་བརྒྱ་རྩའི་རྗེས་གནང༌། ཆོས་སྐྱོང་མང་པོའི་རྗེས་གནང༌། བསྒྲུབ་སྐོར་སོགས་རྒྱས་པར་མཛད་དེ་ཀློག་པ་ཐོས་བསམ་གྱི་འཁོར་ལོ་དང༌། སྟོན་དང་དགུན་གྱི་དུས་འདུ་འཛིས་དབེན་པར་མཛད་དེ། སྐུ་མཚམས་སུ་་ཞུགས་ནས་ལྷག་པའི་ལྷ་མང་པོའི་བསྙེན་བསྒྲུབ་སོགས་བསམ་གཏན་གྱི་འཁོར་ལོ་དང༌། སོས་དང་དབྱར་མཇུག་མྱང་སྟོད། ཤབ།ཤངས། ཐོན་སོགས་ཅི་རིགས་སུ་ཕེབས་ནས་ཆོས་དང་མཐུན་པར་སྡེ་དཔོན་རིགས་དང་བན་སྐྱའི་ཚོགས་མང་པོའི་བཞེད་པ་འགེངས་པ་སོགས་བྱ་བ་ལས་ཀྱི་འཁོར་ལོ་ལའང་བརྩོན་པར་མཛད། དེ་དག་གི་སྐབས་སུའང༌། དམ་པའི་འགྲོ་བ་གཉིས་ཡིན་ཏེ། །ཐམས་ཅད་ཕུན་སུམ་ཚོགས་པ་འམ། །ཡང་ན་ནགས་སུ་གནས་པའོ། །ཞེས་འབྱུང་བ་ལྟར། རབ་མི་གྲལ་ནས་བུད་དེ། མང་དུ་ཐོས་པ་ནགས་ཀྱི་ནང་དག་ཏུ། །ལང་ཚོ་ཡོལ་བ་རྣམས་ཀྱིས་གནས་པ་བདེ། །ཞེས་བཀའ་སྩལ་པ་ལྟར། གཞན་གྱི་དོན་དུ་རང་དོན་གཙོ་བོ་ལྟར་བསྒྲུབ་པའི་སྒྲུབ་པ་ཅིག་བྱེད། དེ་མིན་རང་དོན་གྱི་འཁྲི་བ་བཅད་དེ་བསྟན་པ་དང་སེམས་ཅན་གྱི་དོན་ཕུན་སུམ་ཚོགས་པ་གང་རུང་ཞིག་བསྒྲུབ་པར་བྱའི། དེ་གཉིས་གང་ཡང་མ་ཡིན་པའི་གསོན་པ་ཙམ་ལས་ཤི་བ་ལེགས་སོ་སྙམ་དུ་དགོངས་པ་བྱུང་ཞིང༌། དེ་དང་མཐུན་པར་བླ་མ་དཀོན་མཆོག་ལ་ཡང་སྙིང་ནས་རེ་དོགས་དང་བྲལ་བའི་གསོལ་བ་འདེབས་པ་འདི་ལྟར་མཛད་དེ། ན་མོ་ཨཱརྱ་མཻ་ཏྲི་ཡ། སྟེང་དགའ་ལྡན་ལྷ་བརྒྱའི་གཙུག་རྒྱན་དུ། །རྗེ་ས་བཅུའི་དབང་ཕྱུག་མི་ཕམ་མགོན། ། 5/23 མདུན་ངོས། 上一页 3 4 5 6 7 8 下一页 尾页 |
