༈ རྒྱལ་སྲས་བཟང་པོ་ཞེས་བསྔགས་པ། མཁན་ཆེན་རྒྱལ་སྲས་བཟང་པོ་ནི། ངོ་མཚར་བའི་ལྟས་དང་བཅས་ཤུད་ཕུ་བའི་རིགས་སུ་སྐུ་འཁྲུངས། ཁྱིམ་གྱི་འདུ་འཛི་ལ་མ་ཆགས་པར་ངེས་འབྱུང་གི་བསམ་པས་རྒྱུད་བསྐུལ་ཏེ། དགུང་ལོ་བཅུ་གཅིག་པ་ལ་མཁན་ཆེན་སེང་གེ་བཟང་པོའི་དྲུང་དུ་རབ་ཏུ་བྱུང༌། འདུལ་འཛིན་མཚོ་སྣ་བ་དང་དགེ་བའི་བཤེས་གཉེན་མོན་གྲ་པ་སོགས་དམ་པ་མང་པོའི་ཞབས་ལ་གཏུགས་ཏེ། དཀའ་ཆེན་བཞི་ལ་སྦྱངས་པ་མཐར་ཕྱིན་པར་མཛད་ནས་དགུང་ལོ་བཅོ་ལྔ་ལོན་པའི་ཚེ་འདུལ་བའི་བཤད་པའང་མཛད། མཁན་ཆེན་སེང་གེ་བཟང་པོའི་དྲུང་དུ་བྱང་ཆུབ་ལམ་གྱི་རིམ་པའི་ཁྲིད་དང་ལམ་རིམ་གྱི་མན་ངག་སྤྱོད་འཇུག་ལ་སོགས་པ་བཀའ་གདམས་ཀྱི་ཆོས་རྣམས་གསན། ཐུགས་རྗེ་ཆེན་པོའི་ཆོས་སྐོར་རྣམས་ཀྱང་ཡོངས་སུ་རྫོགས་པར་གསན་ནས་ལམ་ཐུན་མོང་བ་དང་ཐུན་མོང་མ་ཡིན་པའི་ལམ་གྱི་རིམ་པ་རྣམས་ལ་མྱོང་བ་ཐོན་པར་མཛད། སྒྲོ་བ་དགོན་པའི་གདན་སར་ཕེབས་ཏེ་སྐུ་གསུང་ཐུགས་རྟེན་མང་དུ་བཞེངས། མོན་གྲ་པ་ཆེན་པོ་དགེ་འདུན་གྱི་སྡེ་མང་པོ་དང་བཅས་སྤྱན་དྲངས་ཏེ་ཆོས་འཁོར་བཙུགས། ལྷོ་བྲག་གྲུབ་ཆེན་སོགས་སྐལ་བ་དང་ལྡན་པ་མང་པོ་ལ་ལམ་གྱི་རིམ་པའི་ཁྲིད་དང་བཀའ་གདམས་ཀྱི་ཆོས་རྣམས་རྒྱས་པར་གནང༌། དེ་ནས་ལྷོ་བྲག་གྲུབ་ཆེན་ནམ་མཁའ་རྒྱལ་མཚན་ལ་ལུགས་གཉིས་ཀྱི་ཞལ་ཏ་ལེགས་པར་གནང་ནས་ངོ་མཚར་བའི་ལྟས་བསམ་གྱིས་མི་ཁྱབ་པ་དང་བཅས་ཞི་བར་གཤེགས། ལྷོ་བྲག་ཕྱོགས་སུ་བཀའ་གདམས་ཀྱི་བསྟན་པ་ཡུན་རིང་དུ་གནས་པའི་རྟེན་འབྲེལ་དུ་སྐུ་གདུང་རིལ་པོར་སྒྲོ་བ་དགོན་པའི་གསེར་འབུམ་གྱི་ནང་དུ་བཞུགས་སོ། །དེས་ན་བྱང་ཆུབ་ལམ་གྱི་རིམ་པ་ལ་བློ་སྦྱོང་བར་འདོད་པ་རྣམས་ཀྱིས་མཁན་ཆེན་རྒྱལ་སྲས་བཟང་པོ་ལ་གསོལ་བ་འདེབས་ཤིང་དམ་པ་འདིའི་རྣམ་ཐར་ལྟར་ལམ་མ་ནོར་བར་སྟོན་པའི་བཤེས་གཉེན་དམ་པ་ཚུལ་བཞིན་དུ་བསྟེན་ནས་སྐྱེས་བུ་གསུམ་གྱི་ལམ་གྱི་རིམ་པ་བསྒོམ་པ་ལ་བརྩོན་པར་བྱའོ། ། |
