རྗེ་བཙུན་ཆོས་ཀྱི་རྒྱལ་པོ་དཔལ་བཟང་པོའི། །བཤད་སྒྲུབ་བསྟན་པའི་བྱ་བ་ལེགས་ཚོགས་རྣམས། །ཡར་ངོའི་ཟླ་ལྟར་འཕེལ་ཞིང་རྒྱས་པ་དང༌། །མཆོག་དང་ཐུན་མོང་དངོས་གྲུབ་སྩལ་དུ་གསོལ། །ཞེས་པ་རྣམས་ཐོགས་མེད་དུ་གསུངས།དེ་ནས་ས་ཆེན་པོའི་ཁྱོན་མཐའ་དག་ནས་འདུས་པའི་དད་ལྡན་སེར་སྐྱ་བགྲང་བ་ལས་འདས་པ་དག་ལ་ཞལ་གྱི་དཀྱིལ་འཁོར་སྟོན་པ་དང༌།གསུང་གི་བདུད་རྩི་སྩལ་བ་དང༌། དད་པས་ཕུལ་བའི་དངོས་པོ་རྣམས་བཞེས་ཏེ་ཉིན་རེ་བཞིན་འགྲོ་བ་བགྲང་བ་ལས་འདས་པར་མཐོ་རིས་དང་ཐར་པའི་ས་བོན་འདེབས་པར་མཛད་དོ། །དེ་ནས་ཚད་མ་རྣམ་འགྲེལ་ལ་སྦྱོང་བར་བཞེད་དེ་འཇམ་དབྱངས་དགེ་འདུན་བློ་བཟང་གིས་མཛད་པའི་རྣམ་འགྲེལ་གྱི་ཡིག་ཆ་ཡོངས་རྫོགས་ཐུགས་ལ་བཟུང་སྟེ་བསྐལ་བཟང་ཁྱམས་ར་ཆེན་མོར་འདུས་པ་རྒྱ་མཚོ་དང་ལྷན་ཅིག་རིགས་ལུང་ལ་རྟག་པར་ཕེབས་ཏེ་འཇམ་མགོན་བླ་མའི་རྣམ་ཐར་སྐྱོང་བར་མཛད་དོ། །བར་སྐབས་སུ་བྱང་རྒྱུད་རྒྱལ་པོ་འཁོར་བཅས་དད་པ་ཆེན་པོས་འདུས་པར་སོ་སོའི་བསྙེན་བཀུར་རྣམས་བཞེས་ཤིང༌།རྒྱལ་པོ་འཁོར་བཅས་ལ་ལམ་རིམ་ཚིགས་བཅད་མ།ལམ་རིམ་དམར་ཁྲིད།སྨན་བླའི་མདོ་ཆོགལམ་རིམ་ཆུང་བ་སོགས་དང༌། སྲས་བགྲེས་པར་ཐུབ་དབང་ཞལ་པད་མ་སོགས་རང་རང་གི་འདོད་པ་དང་བསྟུན་པའི་ཆོས་ཀྱི་བདུད་རྩི་སྩལ། དེའི་ཚེ་འདུས་པ་རྒྱ་མཚོའི་ཚོགས་ལའང་ཚད་མ་རྣམ་འགྲེལ་གྱི་དབུ་ནས་རིམ་གྱིས་གནང་བའི་འགོ་ཚུགས། ཚད་མ་རྣམ་འགྲེལ་ལ་ཐུགས་རབ་ཐོགས་པ་མེད་པར་རྒྱས་པའི་ཚུལ་བཞེས་ཏེ་ཐམས་ཅད་མཁྱེན་པ་དགེ་འདུན་གྲུབ་ཀྱིས་མཛད་པའི་སྤྱི་དོན་རིགས་རྒྱན་ཡོངས་རྫོགས་ཐུགས་ལ་བཟུང༌། གཞན་ཡང་ཚད་མ་རྣམ་འགྲེལ་གྱི་ཊྰིཀྐ་འཇམ་དབྱངས་སྨོན་ལམ་དཔལ་བ་ལེགས་པའི་བློ་གྲོས་ཀྱིས་མཛད་པའི་སྨོནཊྰིཀ་ཏུ་གྲགས་པ་དང༌།ཐམས་ཅད་མཁྱེན་པ་དགེ་འདུན་གྲུབ་ཀྱིས་མཛད་པའི་རྣམ་འགྲེལ་གྱི་ཊྰིཀྐ་ནས་ཐོགས་ཤས་ཐུགས་ལ་བཟུང་སྟེ་ཞག་འགའ་རིགས་ལུང་ཆོས་སྤྱོད་ལ་ཕེབས་ནས་བགྲོ་གླེང་ལ་བརྩོན་པར་མཛད།དེ་ཡང་སྤྱི་དོན་རིགས་རྒྱན་འདི་ཐམས་ཅད་མཁྱེན་པ་དགེ་འདུན་གྲུབ་ཀྱིས་རྗེ་བཙུན་བླ་མ་ཙོང་ཁ་པ་ཆེན་པོ་བཀྲ་ཤིས་རྡོ་ཁར་ཕེབས་པའི་ཚེ་ཚད་མ་རྣམ་ངེས་ཀྱི་སྐོར་ལ་དོགས་གཅོད་ཞུས་པའི་ཟིན་བྲིས་དང༌། རི་བོ་དགེ་ལྡན་དུ་རྒྱལ་ཚབ་ཐམས་ཅད་མཁྱེན་པ་ལ་ཚད་མའི་སྐོར་ལ་ཞིབ་བཤད་ཞུས་པ་རྣམས་ལ་གཞི་མཛད་ནས་གཞུང་གསར་རྩོམ་གནང་བ་ཡིན་འདུག་པ་དང༌། ཐམས་ཅད་མཁྱེན་པ་དགེ་འདུན་རྒྱ་མཚོས་ཀྱང་ཆོས་གྲྭ་ཆེན་པོ་འདིར་ཚད་མ་རྣམ་འགྲེལ་གྱི་གཞུང་ལ་གསན་སྦྱོང་གནང་བའི་སྐབས་སྤྱི་དོན་རིགས་རྒྱན་དང༌། སྨོན་ཊྰིཀ་གཉིས་ལ་ཞིབ་ཏུ་གཟིགས་ཤིང་ཁྱད་པར་སྨོན་ཊྰིཀ་ལ་ཐུགས་ཡིད་འཕྲོག་པར་བྱུང་ནས་ཕལ་ཆེར་ཐུགས་ལ་བཟུང་སྟེ་ངའི་ཚད་མའི་སློབ་དཔོན་འདི་ཡིན་གསུང་བའི་བསྔགས་བརྗོད་ཀྱང་མཛད་པ་བྱུང་འདུག་ཅིང༌། ཆོས་གྲྭ་ཆེན་པོ་འདིར་བསྡུས་ཚད་གཙོ་བོར་མཛད་པའི་རྒྱུ་མཚན་ཡང༌།བཀའ་གདམས་གླེགས་བམ་ལས།རྒྱལ་མཚན་སྟོད་ལ་ཆོས་གྲྭ་འོང༌།།ཆོས་རྒྱལ་ངྷརྨྰ་ཀྰིརྟི་ཡི།།ཆོས་ཀྱི་རྒྱལ་མཚན་ལེགས་པར་འཛུགས། །ཞེས་དང༌།ཐམས་ཅད་མཁྱེན་པ་དགེ་འདུན་གྲུབ་དགེ་འཕེལ་དུ་བཞུགས་སྐབས་མནལ་ལམ་དུ། བཀྲ་ཤིས་ལྷུན་པོའི་རྒྱབ་རིའི་རྩེའི་རྣམ་པ་ནས། རྗེ་བཙུན་ཙོང་ཁ་པ་ཆེན་པོས་དགེ་འདུན་གྲུབ་ཅེས་འབོད་པར་མཛད་ནས། ས་ཕྱོགས་འདིར་ཚད་མ་རྣམ་འགྲེལ་གྱི་བསྟན་པ་རྒྱས་པར་འགྱུར་བ་ཡིན།ཞེས་ལུང་བསྟན་གསུངས་པ་བཞིན། ཐམས་ཅད་མཁྱེན་པ་དགེ་འདུན་གྲུབ་ཀྱིས་ཆོས་གྲྭ་འདིར་བར་སྐབས་ཤིག་ལྷ་ཤཱཀ་གི་འགྲེལ་པ་སོགས་རྒྱ་གཞུང༌། ཊྰིཀ་ཆེན་རིགས་པའི་རྒྱ་མཚོ་སོགས་བོད་གཞུང་འགའ་ཞིག་ལ་གཞི་མཛད་ནས་སྤྲོས་བཤད་གནང་བས་ཐམས་ཅད་ཐུགས་ཕྲོགས་ཏེ་མཁས་པ་དྲི་མེད་བཤེས་གཉེན་སོགས་ཞལ་སློབ་ཆེ་བ་རྣམས་ཀྱིས་ཟིན་བྲིས་ཀྱང་མཛད་འདུག གཞན་ཡང་རྗེ་བདག་ཉིད་ཆེན་པོས།ལོག་སྨྲ་ཚར་གཅོད་ཕྱོགས་གླང་གྲགས་པ་ལས། ལགས་པར་འོངས་པའི་རིགས་ལམ་བདུད་རྩིའི་ཆུས། བློ་མིག་དྲི་མ་ཡང་ཡང་མ་བཀྲུས་ན།།ཤིན་ཏུ་ཟབ་གནད་མཐོང་བ་སྨོས་ཅི་དགོས།།རིགས་པའི་ལུང་དོན་ལ་ཡང་དཔྱོད་པ་ན།།ཕལ་ཆེར་ལོག་པར་རྟོག་པ་འཕེལ་འགྱུར་ཞིང༌། །གལ་ཏེ་ཡང་དག་དམ་བཅའ་ཙམ་ཞིག་གིས། །ངེས་པ་རྙེད་ཀྱང་སྒྲུབ་དང་སུན་འབྱིན་གྱི།།ཚད་མའི་སྟོབས་ཀྱིས་ཐེ་ཚོམ་མ་ཆོད་ཕྱིར།།འདམ་ལ་བཏབ་པའི་ཕུར་བ་བཞིན་འགྱུར་བས། ཡང་དག་བག་ཆགས་བརྟན་པོ་འཇོག་མི་ནུས། ། ཞེས་གསུངས་པ་ལྟར། ལྟ་སྤྱོད་གང་ལ་ཡང་རིགས་ལམ་ནས་དྲངས་པའི་བསྒོམ་བྱའི་དོན་ལ་ངེས་པ་མ་རྙེད་ན་འཁྲུལ་མེད་ཀྱི་ལམ་ལ་འཇུག་དཀའ་བར་གཟིགས་ཤིང༌། ཤེས་རབ་དང་དོན་གཉེར་ཅན་རྣམས་དཔེ་ཆ་འདི་པའི་དཀའ་ཚེགས་ལ་བལྟས་ན་ཕན་པ་ཆེན་པོ་ཡོང་བར་དགོངས་ཏེ་ཐོག་མར་སྤྱི་དོན་རིགས་རྒྱན་དང༌། དེ་ནས་རིམ་བཞིན་འདུལ་བ་མདོ་རྩ་བ། མཛོད་རྩ། རྣམ་འགྲེལ་རྩ་བ། འགྲེལ་པ་དོན་གསལ། འཇུག་པ་རྣམས་པར་དུ་བརྐོ་བ་མཛད། གཞན་ཡང་དོན་གཉེར་ཅན་མང་པོར་ལུང་དང་རྗེས་གནང་སོགས་མཐའ་ཡས་པ་རིམ་པར་གནང་ཞིང༌། དད་རྫས་རྣམས་ཆུད་མི་ཟ་བའི་ཕྱིར་སྐུ་གསུང་ཐུགས་རྟེན་མཐའ་ཡས་པ་བཞེངས་ཤིང༌། དེ་དག་གི་བཞུགས་གནས་ལྷ་ཁང་མང་པོའང་གསར་བསྐྲུན་མཛད་དེ་བསྟན་རྒྱུན་ལ་དགོངས་ནས་སྐུ་གསུང་ཐུགས་རྟེན་གསར་བཞེངས་རྣམས་ཆོས་སྲུང་ལ་གཉེར་གཏད་ཀྱི་འཕྲིན་འཆོལ་མཛད་པ་ནི། ཨོཾ་ས་མ་ཡ་ཏིཥྠ། དུས་གསུམ་རྒྱལ་བའི་ཡབ་གཅིག་འཇམ་པའི་དབྱངས། །སྙིགས་དུས་གདུལ་དཀའ་མཐའ་དག་འདུལ་བའི་ཕྱིར། །གཏུམ་དྲག་རྔམས་པའི་སྐུར་བསྟན་ལྷག་པའི་ལྷར། །བཏུད་ནས་གཉེར་དུ་གཏད་པའི་དམ་ཚིག་བརྗོད། །མཐུ་ལྡན་མྱུར་མཛད་མགོན་པོ་ཕྱག་དྲུག་པ། །ཡབ་ཡུམ་གནོད་སྦྱིན་བཀའ་ཉན་འཁོར་བཞི་དང༌། །ལེགས་ཉེས་ཤན་འབྱེད་ཆོས་ཀྱི་རྒྱལ་པོ་དང༌། །ཙཱ་མུཎྜི་དང་ཕོ་བརྒྱད་མོ་བརྒྱད་སོགས།།བསྟན་དགྲ་ཚར་གཅོད་དཔལ་ལྡན་རེ་མ་ཏི། །གུར་མགོན་མཧཱ་ཀཱ་ལ་ཕྱག་བཞི་པ། །གཏུམ་དྲག་རྡོ་རྗེ་ནག་པོ་ཡབ་ཡུམ་དང༌། །སྒྲོལ་གྱིང་སྲོག་བདག་དམར་པོ་འཁོར་བཅས་ལ། །བཀྲ་ཤིས་ལྷུན་གྱིས་གྲུབ་པའི་ཆོས་གྲྭ་ཆེར། །ལྷག་བསམ་དག་པས་གསར་དུ་སྐྲུན་པ་ཡི། །རྟེན་གསུམ་མཆོད་རྫས་ཇི་སྙེད་མཆིས་པ་རྣམས། །གཉེར་དུ་གཏད་དོ་གཡེལ་མེད་བྱ་ར་མཛོད། གལ་ཏེ་འདི་དག་མཐུ་ཡིས་འཕྲོག་པའམ། །འཇབ་བུས་བརྐུ་སོགས་བསམ་སྦྱོར་ལོག་པ་ཡིས། །རྡུལ་ཕྲན་ཙམ་ཡང་གཞན་དུ་འཁྱེར་བྱེད་ན། །སྐད་ཅིག་དེ་ལ་དྲག་པོས་ཚར་ཆོད་མཛོད། །གཞན་ཡང་ཕན་བདེའི་འབྱུང་གནས་ཆོས་གྲྭ་ཆེའི། །གཙུག་ལག་ཁང་དང་དགེ་འདུན་ཆོས་འབངས་ལ། །འཚེ་བའི་སྙིང་ཁྲག་ཞལ་དུ་རབ་དྲངས་ནས། །བདེ་ཆེན་གོ་འཕང་ཐོབ་པའི་འཕྲིན་ལས་མཛོད། །ཤུགས་དྲག་དད་པས་མཆོད་ཅིང་བསྙེན་བཀུར་བའི། །མཐའ་དག་སྐྱེ་དགུ་ཚེ་རིང་འབྱོར་ལྡན་ཞིང༌། །མཐར་ཐུག་སྐུ་གསུམ་གོ་འཕང་མྱུར་ཐོབ་ནས།།ཕྱོགས་འདིར་བཤད་སྒྲུབ་མངའ་ཐང་འཕེལ་གྱུར་ཅིག །ཅེས་སོ། ། 3/21 མདུན་ངོས། 上一页 1 2 3 4 5 6 下一页 尾页 |