| རྗེ་འདི་པ་ནི་སྔོན་བསྐལ་པ་བགྲང་བ་ལས་འདས་པ་ནས་ཐུགས་བསྐྱེད་དེ་ཞིང་འདིར་ཐུབ་པའི་བསྟན་པ་སྤེལ་བའི་སླད་དུ་བསམས་བཞིན་དུ་བྱོན་པ་ཡིན་པ་དང༌།ཐ་མལ་པ་རྣམས་ཀྱི་སྣང་ངོར་ཡང་བྱང་ཆུབ་ཀྱི་སེམས་རིན་པོ་ཆེ་ཉིད་ཐུགས་དམ་གྱི་ཐིལ་དུ་མཛད་དེ་སྤྱིར་འགྲོ་བ་མཐའ་དག་དང༌། ཁྱད་པར་བྱང་ཕྱོགས་གངས་རིའི་ཁྲོད་ཀྱི་འགྲོ་བ་རྣམས་ལ་ཡུལ་ཕྱོགས་དང་གྲུབ་མཐའི་ཕྱོགས་ལྷུང་གང་ཡང་མེད་པར་ཐམས་ཅད་བྱམས་བརྩེས་སྐྱོང་བར་མཛད་པས་མཆོག་དམན་བར་མ་ཐམས་ཅད་ཀྱིས་བསྙེན་བཀུར་བའི་ཞིང་མཆོག་ཏུ་བཟུང་སྟེ་རང་རང་གི་གཅེས་པའི་ནོར་རྣམས་རྗེ་འདིའི་ཕྱག་ཏུ་འབུལ་ཅི་ཐུབ་བྱེད་པས་ཟང་ཟིང་གི་ཡོ་བྱད་མཐའ་ཡས་པ་བྱུང་བ་དེ་དག་ཐམས་ཅད་སྐུ་གསུང་ཐུགས་རྟེན་གསར་བཞེང་དང༌། རིས་སུ་མ་ཆད་པའི་དགེ་འདུན་གྱི་སྡེ་མཐའ་དག་ལ་བསྙེན་བཀུར་ནར་མར་མཛད་ཅིང༌། དེ་ཐམས་ཅད་ཀྱང་བསྔོ་བས་རྒྱས་ཐེབས་པར་མཛད་དེ། དེའི་ཚེ་བསྔོ་བའི་ཚིགས་བཅད་ཀྱང་འདི་ལྟར། ན་མོ་གུ་རུ་བུངྔྷ་བོ་ངྷི་སཏྭ་ཡ། གསེར་སྦྱངས་བཙོ་མའི་ལྷུན་པོ་རྣམ་མང་ཕྲས། །བཏབ་པ་ཇི་བཞིན་མཚན་དཔེའི་དཔལ་འབར་བ། །ཤཱཀྱའི་ཏོག་སོགས་རྒྱལ་བ་སྲས་བཅས་ལ། །ཕྱག་འཚལ་ཡིད་སྨོན་འགྲུབ་པའི་གྲོགས་མཛོད་ཅིག །བདག་གིས་སྐུ་གསུང་ཐུགས་རྟེན་བཞེངས་མཆོད་དང༌། །དགེ་འདུན་བསྙེན་བཀུར་དབུལ་ཕོངས་ཚིམ་བྱས་སོགས། །དགེ་བ་འདི་དག་གིས་མཚོན་བདག་གཞན་གྱིས། །སྔོན་ནས་ད་ལྟའི་བར་བསྒྲུབས་དགེ་ཚོགས་མཐུས། །འབྲུ་ཀུན་སྐྱེ་ལ་ས་བཞིན་ཡིད་ཅན་ལ། །ཕན་བདེ་བླ་མེད་སྟེར་ལ་མེད་མི་རུང༌། །ཐུབ་པའི་བསྟན་པ་ལུང་རྟོགས་ཉི་འོད་ཀྱིས། །འཆི་མེད་ལམ་བཞིན་ཕྱོགས་ཀུན་ཁྱབ་གྱུར་ཅིག །འཇིག་རྟེན་ཁམས་སུ་མི་འདོད་བསྐྱེད་པའི་གཞི། །ཕན་ཚུན་རྩོད་སོགས་མི་དགེའི་ཚོགས་ཞི་ཞིང༌། །རྫོགས་ལྡན་གསར་དུ་བཞད་པའི་དགའ་སྟོན་ལ། །འགྲོ་ཀུན་གཏན་དུ་སྤྱོད་པ་ཉིད་གྱུར་ཅིག །གྲངས་མེད་བགྲོད་ཀྱང་བཟོད་པའི་ལམ་ཆེན་བཞིན། །སྡུག་བསྔལ་གྱིས་མནར་འགྲོ་ཚོགས་སྒྲོལ་བའི་ཁུར། །ལྩི་ཡང་བཟོད་པའི་བྱང་ཆུབ་སེམས་མཆོག་དང༌། །ནམ་ཡང་འབྲལ་བ་མེད་པ་ཉིད་གྱུར་ཅིག །ཐུབ་པས་འགྲོ་ཀུན་དོན་ཆེད་གྲངས་མེད་པའི། ། བསྐལ་པ་གསུམ་དུ་སྐུ་ལུས་ལོངས་སྤྱོད་སོགས། །བཏང་བས་ཚོགས་གཉིས་ཡོངས་རྫོགས་བྱང་ཆུབ་བརྙེས། །བདག་གི་སྤྱོད་པའང་དེ་དང་མཚུངས་པར་ཤོག།ཇི་ལྟར་སྨོན་བཞིན་བསོད་ནམས་ཡེ་ཤེས་ཀྱི། །རླབས་ཆེན་ཚོགས་དག་ཡོངས་སུ་རྫོགས་གྱུར་ནས། །སྐྱོན་བྲལ་ཡོན་ཏན་ཀུན་གྱི་དཔལ་ལྡན་པའི། །བླ་མེད་བྱང་ཆུབ་མྱུར་དུ་ཐོབ་གྱུར་ཅིག།དེ་ཐོབ་ནས་ཀྱང་འཁོར་བར་འཁྱམས་པའི་འགྲོ། །མ་ལུས་ཀུན་མཁྱེན་རྒྱལ་བའི་གོ་འཕང་ལ། །འགོད་པའི་བརྩོན་འགྲུས་ཐུབ་པ་མཆོག་ཉིད་དང༌། །མི་མཉམ་མེད་པ་ཉིད་དུ་བདག་གྱུར་ཅིག །ཅེས་སོ། །དེ་ནས་དོན་གྲུབ་ཅེས་པ་ས་མོ་ལུག་གི་ལོ་ཟླ་བ་དྲུག་པའི་ནང་དུ་དབུས་ཕྱོགས་སུ་ཆིབས་ཁ་བསྐྱོད་དེ་རྒྱལ་བ་ཐམས་ཅད་མཁྱེན་པ་ངག་དབང་བློ་བཟང་རྒྱ་མཚོ་ལ་གསེར་གྱི་མཎྜལ་དང་ནམ་མཁའ་མཛོད་ཀྱི་སྒོ་འཕར་ཕྱེ་བ་ལྟར་དངོས་པོ་ཚད་མེད་པས་མཆོད་དེ་དབང་ལུང་མན་ངག་མཐའ་དག་ཡོངས་སུ་རྫོགས་པ་ཞིག་གནང་དགོས་ཞེས་གསོལ་བ་འདེབས་པར་མཛད་པས། རྒྱལ་དབང་ཐམས་ཅད་མཁྱེན་པ་ཆེན་པོས་ད་ལམ་ཆོས་བཀའ་ཡོངས་རྫོགས་འབུལ་ཐུབ་པ་མི་ཡོང་ཡང་ཉེར་མཁོ་གང་འགྲུབ་ཅིག་འབུལ་གསུང་ནས།ཐུབ་པ་གཙོ་འཁོར་གསུམ། ཐུགས་རྗེ་ཆེན་པོ་གཙོ་འཁོར་གསུམ། རྗེ་བཙུན་མི་གཡོ་མགོན་པོ། སྒྲོལ་མ་གཙོ་འཁོར་གསུམ་དང་བཅས་ཏེ་བཀའ་གདམས་ལྷ་བཞིར་གྲགས་པའི་རྗེས་གནང༌། སྨན་བླ་བདེ་གཤེགས་བརྒྱད་མཐོ་བརྩེགས་སུ་བཞུགས་པའི་རྗེས་གནང༌། པཎྜི་ཏ་གསེར་གདུགས་ཅན་གྱི་བཞེད་སྲོལ་འཇམ་དཀར་ཤེས་རབ་འཁོར་ལོའི་རྗེས་གནང་ཁྲོ་ཕུ་ལོ་ཙཱ་བ་ནས་བརྒྱུད་པ། དགེ་སློང་མ་དཔལ་མོ་ནས་བརྒྱུད་པའི་ཐུགས་རྗེ་ཆེན་པོ་ཞལ་བཅུ་གཅིག་པ་ཕྱག་སྟོང་སྤྱན་སྟོང་གི་རིགས་གཏད་ཀྱི་རྗེས་གནང༌། བ་རི་བའི་ལུགས་ཀྱི་རྣམ་འཇོམས་ལྗང་སྔོན་གྱི་རྗེས་གནང༌། འཇམ་དབྱངས་དཀོན་མཆོག་ལྷུན་གྲུབ་ཀྱི་ཡི་གེའི་སྟེང་ནས་ཕྱག་རྣ་རྡོ་རྗེ་འབྱུང་པོ་འདུལ་བྱེད་ཀྱི་རྗེས་གནང་གུར་ནས་འབྱུང་པ། རྗེ་བཙུན་ས་སྐྱ་པའི་ཟབ་ཆོས་སུ་གྲགས་པ་དབང་གི་སྒྲོལ་མ་དམར་མོའི་རྗེས་གནང༌། འཕགས་པ་ཀླུ་སྒུབ་ཀྱིས་མཛད་པའི་སྒྲུབ་ཐབས་དང་གོང་མའི་ཕྱག་ལེན་ལྟར་ཀླུ་དབང་རྒྱལ་པོ་གཙོ་འཁོར་ལྔའི་རྗེས་གནང༌། 4/21 མདུན་ངོས། 上一页 2 3 4 5 6 7 下一页 尾页 |
