| མི་གཡོ་བའི་རྗེས་གནང༌། དཔལ་སྣར་ཐང་པ་རིག་རལ་གྱི་ཕྱག་ལེན་དང་མཐུན་པ་མི་གཡོ་ཆུ་སྲུངས་ཀྱི་རྗེས་གནང་ཡར་ཀླུངས་པ་ཡོན་ཏན་བཀྲ་ཤིས་ཀྱི་ཕྱག་ལེན་དང་མཐུན་པ། ཡང་དེ་ཉིད་ཀྱི་ཕྱག་ལེན་དང་མཐུན་པ་མི་གཡོ་བ་དཀར་པོ་གཏུམ་པོའི་རྗེས་གནང༌། འཇམ་དབྱངས་མཁྱེན་བརྩེའི་ཡི་གེའི་སྟེང་ནས་གུར་ནས་གསུངས་པའི་སོ་སོར་འབྲང་མའི་རྗེས་གནང༌། རབ་འབྱམས་པ་རིན་ཆེན་དཔལ་བཟང་གི་ཡི་གེའི་སྟེང་ནས་སྭའི་སྔགས་འཆང་སྙེ་མོ་ཤཱཀྱ་དཔལ་ལ་གསང་བའི་བདག་པོས་དངོས་སུ་གསུངས་བ་གུར་ནས་འབྱུང་བ་དང་འབྲེལ་བའི་ཕྱག་རྡོར་འབྱུང་འདུལ་གྱི་རྗེས་གནང་མེའི་དབང་དང་བཅས་པ། འཇམ་དབྱངས་མཁྱེན་བརྩེའི་དབང་ཕྱུག་གི་ཡི་གེའི་སྟེང་ནས་འོད་ཟེར་ཅན་གཙོ་རྐྱང་གི་རྗེས་གནང༌། སྤྱན་སྔ་ངག་དབང་ཆོས་གྲགས་ཀྱི་ཡིག་ཆའི་སྟེང་ནས་ཇོ་བོ་ལུགས་ཀྱི་སྨེ་བརྩེགས་ལྗང་ནག་གི་རྗེས་གནང༌།འཇམ་དབྱངས་མཁྱེན་བརྩེའི་ཟིན་བྲིས་གྱི་སྟེང་ནས་སྨེ་བརྩེགས་དུད་ཀའི་རྗེས་གནང༌། རྟ་མགྲིན་ལྕགས་རལ་ཅན་ཟླ་རྒྱལ་ལུགས་སུ་གྲགས་པའི་རྗེས་གནང་ཡིག་སྙིང་དང་མཐུན་པ། རྟ་མགྲིན་ཤྭ་ན་བཞི་སྐོར་གྱི་རྗེས་གནང་ཇོ་བོ་ཆེན་པོ་ནས་བརྒྱུད་པ། ཤེའུ་ལོ་ཙཱ་བའི་ཡིག་ཆའི་སྟེང་ནས་ཇོ་བོ་ཆེན་པོ་ལ་འཕགས་པ་སྤྱན་རས་གཟིགས་ཀྱིས་གནང་བའི་ཛམ་ལ་དཀར་པོ་འབྲུག་ཞོན་གྱི་རྗེས་གནང༌། ཡང་ཛམ་ལ་སེར་པོ་དང་ནག་པོ་གཉིས་ཀྱི་རྗེས་གནང༌། སློབ་དཔོན་ཨ་བྷ་ཡའི་བཞེད་སྲོལ་ཆག་ལོ་སུམ་པས་མཛད་པའི་སྲེག་བྱེད་མེའི་མཚོན་ཆའི་ཡི་གེའི་སྟེང་ནས་གཙུག་ཏོར་འབར་བའི་རྗེས་གནང༌། སྒྲུབ་ཐབས་རྒྱ་མཚོའི་ནང་གི་རྡོ་རྗེ་དབྱངས་ཅན་མ་དམར་མོ་ཞལ་གསུམ་ཕྱག་དྲུག་པའི་རྗེས་གནང༌། ཐར་རྩེ་ནམ་མཁའ་དཔལ་བཟང་གིས་མཛད་པའི་ཡིག་ཆའི་སྟེང་ནས་ཇོ་བོ་ཆེན་པོས་ཡོལ་ཆོས་དབང་ལ་གནང་བའི་རྟ་མགྲིན་གཤོག་པ་ཅན་ཞལ་གསུམ་ཕྱག་དྲུག་པའི་རྗེས་གནང༌། པཎྜི་ཏ་ནགས་ཀྱི་རིན་ཆེན་ནས་བརྒྱུད་པའི་སེང་གདོང་མ་དམར་མོའི་རྗེས་གནང༌། ས་སྐྱ་པའི་གསེར་ཆོས་སུ་གྲགས་པའི་སེང་གདོང་མ་ནག་མོའི་རྗེས་གནང༌། ཡང་ས་སྐྱ་པའི་ལྕགས་རི་མི་འདའ་བའི་གསེར་ཆོས་སུ་གྲགས་པ་འཕགས་པ་འཇིག་རྟེན་དབང་ཕྱུག་སེང་གེ་སྒྲའི་རྗེས་གནང༌། དམ་པ་སངས་རྒྱས་ནས་བརྒྱུད་པའི་འཇམ་དབྱངས་སྨྲ་སེང་ཡུམ་བཅས་ཀྱི་རྗེས་གནང༌། ཕྱག་རྡོར་ཨུ་ཙརྱའི་བྱབས་བསྲུང་དང་རྗེས་གནང་རྣམས་གསན། གཞན་ཡང་ཇོ་བོ་ཆེན་བོ་ལྷ་ཅིག་ནས་བརྒྱུད་པའི་སྒྲོལ་མ་ཉེར་གཅིག་གི་སྔོན་འགྲོར། སེང་ལྡེང་ནགས་ཀྱི་སྒྲོལ་མའི་རྗེས་གནང་བཅས་ཡོངས་རྫོགས་དང༌། དཔལ་ལྡན་ལྷ་མོའི་རྗེས་གནང་། ཀཱ་མ་རུ་པ་ནས་བརྒྱུད་པའི་ཞལ་བྲམ་ནག་གི་རྗེས་གནང༌། ཚེ་དཔག་མེད་དཀར་པོའི་རྗེས་གནང་རྣམས་གསན། འདི་སྐབས་རྒྱལ་བ་ཐམས་ཅད་མཁྱེན་པ་ཆེན་པོས་རྗེ་འདི་པ་ལ་རྗེ་བདག་ཉིད་ཆེན་པོའི་ཐུགས་དམ་རྟེན་སྟོན་པ་ཐུབ་པའི་དབང་པོའི་སྐུ་བརྙན་འཕགས་ཡུལ་ལི་མ་ངོ་མ་ཁྱད་མཚར་ཞིག་གནང་སྟེ། མཉམ་མེད་བུ་རམ་ཤིང་པའི་མདོ་སྔགས་ཀྱི་བསྟན་པ་སྤྱི་དང༌། ཁྱད་པར་ཁམས་གསུམ་ཆོས་ཀྱི་རྒྱལ་པོ་ཙོང་ཁ་པ་ཆེན་པོའི་བསྟན་པའི་བདག་པོ་མཛོད་ཅེས་བསྟན་པའི་བདག་པོར་མངའ་གསོལ། དེ་མཐུན་གཞན་གྱི་ཞུ་བ་པོ་མེད་པར་དགོངས་དཔྱད་ཀྱིས། རྒྱལ་ཀུན་ངོ་བོ་བློ་བཟང་གྲགས་སྙན་བསྟན། །འཛིན་པར་བསོད་ནམས་ས་བོན་དར་དྲག་ལས། །ཡེ་ཤེས་མཆོག་གི་ཡོངས་འདུ་ས་བརྟོལ་རྩེར། །སྤྲུལ་སྐུའི་འབྲིས་བཟང་སྨིན་ལ་གསོལ་བ་འདེབས། །ཞེས་སོགས་ཞབས་བརྟན་གསོལ་འདེབས་བཀའ་རྩོམ་གསར་དུ་གནང་སྟེ་ཕྱག་ཏུ་ཕུལ། གསོལ་འདེབས་དེ་ཉིད་ཕྱོགས་མཐའ་དག་ལའང་འགྱེད་པར་མཛད། དེ་སྐབས་ཐོན་ཕྱག་གི་སྐབས་ཡབ་སྲས་གཉིས་ཀ་ཕན་ཚུན་འབྲལ་མི་ཕོད་པར་སྤྱན་ཆབ་མང་དུ་བྱུང་ཞིང་ཐུགས་འཕྲེང་བའི་རྣམ་པ་ཆེར་མཛད་པ་ན་ཞབས་འབྲིང་པ་ཚང་མའང་རྒྱལ་བ་ཡབ་སྲས་འདི་གཉིས་ཀྱི་མཛད་སྤྱོད་འདི་འདྲ་སྙམ་དུ་ཡབ་སྲས་གཉིས་ཀར་གུས་པ་བླ་མེད་ཐོབ་ཅིང་སྤྱན་ཆབ་འབྱིན་པ་བྱུང་འདུག་སྟེ། དེ་ནི་སྐུ་ཚེ་འདིར་ཡབ་སྲས་གཉིས་སླར་མི་མཇལ་བར་གཉིས་ཀས་མཁྱེན་པར་མངོན་ནོ། །ཚུལ་དེ་དག་ལ་རྗེ་ཉིད་ཀྱིས་འདི་ལྟར་གསུངས་ཏེ། རྒྱལ་བ་ཀུན་དངོས་བློ་བཟང་གྲགས་པ་དང༌།།དབྱེར་མེད་གཏན་གྱི་སྐབས་གཅིག་ཐམས་ཅད་མཁྱེན། །ཕྱག་ན་པདྨོའི་ཞལ་དཀྱིལ་ལེགས་མཇལ་ཏེ། །དམ་ཆོས་བདུད་རྩི་དགའ་སྟོན་དཔག་མེད་མྱངས།། ཐུབ་པའི་སྣང་བརྙན་དངོས་པོའི་གནང་སྐྱེས་བཅས།།སྩལ་ནས་ཐུབ་བསྟན་བདག་པོ་གྱིས་ཤིག་ཅེས། །ཤཱཀྱའི་རྒྱལ་པོས་འཕགས་པ་འོད་སྲུངས་ལ། །ཇི་བཞིན་བསྟན་པའི་ཁུར་ཆེན་བདག་ལ་སྩལ།།བློ་དམན་བདག་འདྲས་དེ་འདྲའི་ཁུར་ལྩི་བ། །བཟོད་པར་དཀའ་ཡང་རྫེ་བཙུན་བླ་མའི་བཀའ། །འདོར་མེད་ཡང་དག་བསྒྲུབ་ནུས་གྱུར་ཅིག་པའི། །སྨོན་ལམ་བཟང་པོ་རྩེ་གཅིག་ཡིད་ཀྱིས་བཏབ། །ཅེས་སོ། །དེ་ནས་གཙང་དུ་ཕེབས་བཀྲ་ཤིས་ལྷུན་པོའི་དབྱར་ཆོས་ཀྱི་ཐོག་དབུ་མའི་གཞུང་ལ་སྦྱོང་བར་བཞེད་དེ་ཁྱུང་ཕྲུག་བྱམས་པ་བཀྲ་ཤིས་ཀྱིས་མཛད་པའི་དབུ་མའི་སྤྱི་དོན་དང༌། སེ་ར་རྗེ་བཙུན་པས་མཛད་པའི་དབུ་མའི་སྤྱི་དོན་ཆེན་མོ་དང༌། དབུ་མའི་ས་ལམ་རྣམ་གཞག་ཡོངས་རྫོགས་ཐུགས་ལ་བཟུང་སྟེ་ཉིན་ལྟར་སྔ་དྲོའི་ཆ་ལ་བླ་བྲང་ཉིད་དུ་མཚན་ཉིད་ཞབས་ཕྱི་རྣམས་དང་བགྲོ་གླེང་མཛད།དགོང་མོ་བསྐལ་བཟང་ཁྱམ་ར་ཆེན་མོར་འདུས་ཚོགས་ཀྱི་རིགས་ལུང་དང་བསྟུན་ནས་ཟུར་བཞི་བླ་མ་རྣམས་དང་བཅས་རིགས་ལུང་འཆག་མེད་མཛད། 5/21 མདུན་ངོས། 上一页 3 4 5 6 7 8 下一页 尾页 |
