ད་སྔ་གཟིགས་བཞིན་པ།  མདུན་ངོས། > མི་སྣ་མཚམས་སྦྱོར། > མཁས་བའི་ཁྱུ་མཆོག
༄༅། །ལམ་རིམ་བླ་མ་བརྒྱུད་པའི་རྣམ་ཐར་ལས་རྗེ་བཙུན་ཐམས་ཅད་མཁྱེན་པ་བློ་བཟང་ཡེ་ཤེས་དཔལ་བཟང་པོའི་རྣམ་ཐར།
སྤེལ་དུས།04-22  ཡོང་ཁུངས། ཀྲུང་གོའི་བོད་ཀྱི་སློབ་གསོ་དྲ་བ།  རྩོམ་པ་པོ། ཡོངས་འཛིན་ཡེ་ཤེས་རྒྱལ་མཚན།
ཕུན་ཚོགས་རྒྱ་མཚོས་མཛད་པའི་དབུ་མའི་མཐའ་དཔྱོད་དང༌། སྒོམ་སྡེས་མཛད་པའི་དབུ་མའི་ཊྰིཀྐ་གཉིས་ཀྱང་ཐུགས་ལ་བཟུང༌། གཞན་ཡང་འཇམ་དབྱངས་དགའ་བློས་མཛད་པའི་དབུ་མའི་མཐའ་དཔྱོད་དང༌།རྗེ་དགེ་འདུན་རྒྱ་མཚོས་མཛད་པའི་ལྟ་ཁྲིད་ཆེན་མོ་དང༌། ཆོས་རྗེ་བདེ་ལེགས་ཉི་མས་མཛད་པའི་དབུ་མའི་སྤྱི་དོན་རྣམས་ཀྱང་ཐུགས་ལ་བཟུང་ཞིང༌། འཇུག་པའི་རྣམ་བཤད་དགོངས་པ་རབ་གསལ་ཡང་ཕལ་ཆེར་ཐུགས་ལ་བཟུང་སྟེ་ཟབ་མོ་དབུ་མའི་ལྟ་བ་གཏན་ལ་འབེབས་པ་ལ་སློབ་དཔོན་ཟླ་བ་གྲགས་པ་སླར་ཡང་འཇིག་རྟེན་འདིར་བྱོན་པ་ལྟར་ལུང་དང་རིགས་པའི་དབང་ཕྱུག་ཆེན་པོར་གྱུར་ཏོ།   །དེ་ནས་རྡོ་རྗེ་འཛིན་པ་དཀོན་མཆོག་རྒྱལ་མཚན་སྤྱན་དྲངས་ཏེ་རིན་པོ་ཆེའི་མཎྜལ་སོགས་མཆོད་སྤྲིན་མཐའ་ཡས་པས་མཆོད་ནས་འཇམ་མགོན་བླ་མའི་བསྟན་པའི་སྙིང་པོ་གྲུབ་ཆེན་དབེན་ས་པ་ཡབ་སྲས་ཀྱི་སྙན་རྒྱུད་ཀྱི་མན་ངག་ཞལ་ཤེས་དང་བཅས་གསན་ཞིང་དཔལ་གསང་བ་འདུས་པ་མི་བསྐྱོད་པའི་དབང་གི་སྟ་གོན་དང༌། དངོས་གཞི་བཅས་གསན། དེ་ནས་རིམ་གྱིས་བདེ་མཆོག་ལྰུ་དྲིལ་གཉིས།ཚེ་དཔག་མེད་ལྷ་དགུ་སོགས་ཀྱི་དབང་སོ་སོར་སྟ་གོན་དང་བཅས་པ། ནམ་མཁའ་སྒོ་འབྱེད་ཀྱི་དབང༌།   བདེ་མཆོག་ལྰུ་དྲིལ་གཉིས་དང་རྡོ་རྗེ་འཇིགས་བྱེད་ཀྱི་རྫོགས་རིམ་གྱི་ཁྲིད། བྱང་ཆུབ་ལམ་གྱི་རིམ་པའི་ཁྲིད།   ཡེ་ཤེས་མགོན་པོ་ཕྱག་དྲུག་པ། དམ་ཅན་ཆོས་ཀྱི་རྒྱལ་པོ། དཔལ་ལྡན་དམག་ཟོར་རྒྱལ་མོ། དཔལ་མགོན་ཞལ་བཞི་པ། རྒྱལ་ཆེན་རྣམ་སྲས་རྣམས་ཀྱི་རྗེས་གནང༌།   ཐུན་དྲུག་གི་རྣལ་འབྱོར་གྱི་བཤད་ལུང་དང་བཅས་པ་དང༌། བླ་མ་མཆོད་པའི་ཟབ་ཁྲིད་སྙན་རྒྱུད་མན་ངག་ཞལ་ཤེས་ཡོངས་རྫོགས་དང༌།མགོན་པོའི་བཀའ་ཆེན་བཅུ་གསུམ་གྱི་རྗེས་གནང༌།   ཁྱུང་ནག་མེའི་སྤུ་གྲིའི་རྗེས་གནང༌། བཅོམ་ལྡན་འདས་དམ་ཚིག་གསུམ་བཀོད་རྒྱལ་པོའི་དབང་གི་སྟ་གོན་དངོས་གཞི་དང་བཅས་པ།    དེ་ཉིད་ཀྱི་སྒྲུབ་དཀྱིལ་ཡོངས་སུ་རྫོགས་པའི་ཆོག་སྒྲིགས་རྡོ་རྗེ་འཛིན་པ་རང་ཉིད་ཀྱིས་མཛད་པའི་ལུང༌།   དཔལ་རྡོ་རྗེ་འཇིགས་བྱེད་དཔའ་བོ་གཅིག་པ་དང་བཅུ་གསུམ་མ་གཉིས་ཀྱི་དབང་བཞི་ཡོངས་རྫོགས་སོ་སོར་སྟ་གོན་དང་བཅས་པ་དང༌།   སྔགས་བཏུ་བའི་རྗེས་གནང༌། ཁམས་གསུམ་འགྲོ་བའི་བླ་མ་ཙོང་ཁ་པ་ཆེན་པོས་མཛད་པའི་ནཱ་རོ་ཆོས་དྲུག་གི་ཁྲིད་ཡིག་ཡིད་ཆེས་གསུམ་ལྡན་གྱི་སྟེང་ནས་ཁྲིད་ལུང་སྦྲགས་མ་དང་རྐང་པའི་འཁྲུལ་འཁོར་གྱི་སྐབས་སུ་འདི་སྐོར་གྱི་ལག་ལེན་རྣམས་ལེགས་པར་གསན། བསྲེ་བ་སྐོར་དགུ་ལ་གསུང་བཤད་འཐུས་འདོམས་ཆེ་བ་ཞིག་ཀྱང་གནང་གསུང༌།   གཞན་ཡང་ཕྱག་རྡོར་གཏུམ་ཆེན་དང་གཏུམ་ཆུང་གཉིས་ཀྱི་རྗེས་གནང༌།    དཔལ་འཁོར་ལོ་བདེ་མཆོག་ལྷ་ལྔའི་དབང་བཞི་ཡོངས་སུ་རྫོགས་པ། ཕྱག་རྡོར་གོས་སྔོན་ཅན་གྱི་རྗེས་གནང༌། འཇམ་དབྱངས་ནག་པོའི་རྗེས་གནང༌།རྒྱལ་བའི་སྲས་པོ་ཐོགས་མེད་བཟང་པོ་དཔལ་གྱིས་མཛད་པའི་བློ་སྦྱོང་གི་ཁྲིད་ཡིག་སྟེང་ནས་ཁྲིད་ལུང་སྦྲགས་མ། སྒོམ་སྡེ་ཐམས་ཅད་མཁྱེན་པས་མཛད་པའི་དཔལ་རྡོ་རྗེ་འཇིགས་བྱེད་ཆེན་པོའི་བསྐྱེད་རྫོགས་ཀྱི་ལུང་རྣམས་གསན་ཞིང་ཐུབ་པ་དམ་ཚིག་གསུམ་བཀོད་ཀྱི་དབང་ཡང་གསན། ལྷག་པར་དགའ་ལྡན་སྙན་རྒྱུད་ཀྱི་མན་ངག་ཡོངས་སུ་རྫོགས་པ་གསན།   དེ་ནས་དགུང་ལོ་ཉེར་གཉིས་པ་མིག་དམར་ཞེས་པ་ཤིང་ཕོ་ཕྱི་བའི་ལོ་རྒྱལ་ཟླ་བའི་ཡར་ཚེས་བརྒྱད་ཀྱི་ཉིན་བླ་བྲང་རྒྱལ་མཚན་མཐོན་པོའི་གཟིམ་ཆུང་ཡིད་དགའ་ཆོས་འཛིན་དུ་རྡོ་རྗེ་འཛིན་པ་དཀོན་མཆོག་རྒྱལ་མཚན་དཔལ་བཟང་པོའི་ཞལ་སྔ་ནས་ཀྱིས་མཁན་སློབ་ཟུང་འབྲེལ་དང༌།   སྔགས་གྲྭ་ཞལ་སྔ་ནས་སློབ་དཔོན་རིན་པོ་ཆེ་བློ་བཟང་མགོན་པོས་གསང་སྟོན། དཀྱིལ་ཁང་ཞལ་སྔ་ནས་མགོན་པོ་དཔལ་བཟང་གིས་གྲིབ་ཆོད་པ།   ཐོས་བསམ་གླིང་ཞལ་སྔ་ནས་བློ་བཟང་བྱམས་པས་ལྷུང་བཟེད་འབྲིམ་པ། ཤར་རྩེ་ཞལ་སྔ་ནས་བློ་བཟང་དཔལ་འབྱོར་སོགས་ཁ་སྐོང་དུ་འོས་པ་དག་གིས་ཁ་སྐོང་བ་མཛད་དེ་དད་པའི་དགེ་འདུན་གྲངས་ཚང་བའི་དབུས་སུ་བསྟན་པ་ལ་ཞུགས་ལ་ཡོངས་སུ་རྫོགས་པ་དགེ་སློང་གི་སྡོམ་པ་ལེགས་པར་བཞེས་ཏེ་ཐུབ་པའི་དབང་པོ་སླར་ཡང་གངས་རིའི་ལྗོངས་འདིར་བྱོན་པ་ཇི་ལྟ་བར་གྱུར་ཏོ།།ཚུལ་དེ་ལ་ནི་རྗེ་ཉིད་ཀྱི་ཞལ་ནས།   མཁན་ཆེན་རྡོ་རྗེ་འཛིན་པའི་དེད་དཔོན་གྱིས། །བདག་བློའི་གྲུ་ཆེན་ལྷག་པ་ཚུལ་ཁྲིམས་ཀྱི།   །བསླབ་པ་ཡོངས་རྫོགས་རིན་ཆེན་གཏེར་གྱིས་བཀང༌། །བཀའ་དྲིན་ཆེ་འོ་དཀོན་མཆོག་རྒྱལ་མཚན་ཞབས། །གཞན་ཡང་སྲིད་ཞིའི་གཙུག་རྒྱན་རྡོ་རྗེ་འཆང༌། ། མཁན་ཆེན་རྣམ་གཉིས་བཀའ་དྲིན་ལ་བརྟེན་ནས།   །བྱང་སེམས་རིག་འཛིན་སྡོམ་པའི་ནོར་བུས་ཀྱང༌། །རྙེད་དཀའི་དལ་འབྱོར་གྲུ་ཆེན་བྱུར་བུར་གཏམས།   །སྡོམ་གསུམ་ཆུ་གཏེར་ལས་འོངས་ཚུལ་ཁྲིམས་ནི། ། རྣམ་གསུམ་རིན་ཆེན་ཀྱིས་གང་གཟིངས་བཟང་པོ།།ཉོན་མོངས་ཆུ་སྲིན་ཆོམ་རྐུན་མ་རུངས་པས། །མི་འཇིགས་དྲན་ཤེས་སོ་བཅས་བརྩོན་པས་བསྲུང༌། །ཅི་ཡི་ཕྱིར་ན་འཇམ་མགོན་བླ་མ་ཡིས། །ཚུལ་ཁྲིམས་ཉེས་སྤྱོད་དྲི་མ་འཁྲུད་པའི་ཆུ། །ཉོན་མོངས་ཚ་གདུང་སེལ་བ་ཟླ་བའི་འོད། །སྐྱེ་དགུའི་དབུས་ན་ལྷུན་པོ་ལྟ་བུར་བརྗིད། །སྟོབས་ཀྱིས་བསྡིགས་པ་མེད་པར་འགྲོ་ཀུན་འདུད། །ཅེས་སོགས་བསྔགས་པའི་ཚུལ་ལ་ངེས་རྙེད་ཅིང༌། །ཐུབ་པའི་བསྟན་པ་ཡང་དག་གཟུང་བར་ཡང༌། ། ལེགས་པར་རྟོགས་པས་འབད་དེ་བསྲུང་བར་སྨོན། །དེའང་ཚེ་འདིར་རྙེད་བཀུས་སྙན་གྲགས་དང༌། །ཕྱི་མ་མངོན་མཐོའི་བདེ་འབྲས་ཐོབ་ཆེད་མིན། །འཕྲལ་ཡུན་བསྟན་འགྲོར་ཕན་བདེ་བསྒྲུབ་པ་སོགས། །འཇམ་དཔལ་དཔའ་བོའི་སྤྱོད་པ་ཇི་ལྟར་སྨོན། །འདི་ལས་བྱུང་བའི་དགེ་ཚོགས་འོད་དཀར་གྱིས། །ཁམས་གསུམ་འཁོར་བའི་གནས་ཀུན་ཁྱབ་གྱུར་ནས།
རྒྱབ་སྐྱོར།
返回首页
གཙོ་ངོས།
པར་ལྡན་རྩོམ་ཡིག
ཉེ་ལམ་གསར་བརྗེས།
ཀློག་མཁན་མང་ཤོས།
 
Copyright © 2005 - 2024 Teducn.com
phone:18997245213 QQ:89457590
དྲ་ཚིགས་འདིའི་པར་དབང་ཡོད་ཚད་བོད་ཀྱི་སློབ་གསོ་དྲ་བར་དབང་།
ཡིག་ཟམ། gangjian_xn@hotmail.com
འབྲེལ་གཏུགས་ཁ་པར། ༡༨༩༩༧༢༤༥༢༡༣青ICP备18000196号