| ཀྱཻ་རྡོར་མན་ངག་ལུགས་དང་རྔོག་ལུགས། བདག་མེད་ལྷ་མོ་བཅོ་ལྔ། གུར་རིགས་བསྡུས། དྲག་པོ་གདན་ཅན། རྭ་ལུགས་ཀྱི་འཇིགས་བྱེད། དགྲ་ནག གཉོས་ལུགས་རོ་ལངས་བརྒྱད་བསྐོར་དང་དགྲ་ནག ཞང་ལུགས་ཀྱི་ཞེ་དགུ་མ། དཔལ་འཛིན་ལུགས་ཀྱི་གཤེད་དམར་བཅུ་གསུམ་མ། རྣལ་འབྱོར་དབང་ཕྱུག་ལུགས་ཀྱི་གཤེད་དམར་ལྷ་ལྔ། འཁོར་ཆེན། གཏུམ་པོ་ཁྱུང་ཉི་ཤུ་རྩ་གཅིག་ཁྲོ་བོ་བཞི་དང་བཅས་པའི་ཉེར་ལྔ་མ། ཀུན་རིག མི་འཁྲུགས་པ། གདུགས་དཀར། གྲྭ་ལྔ། མི་ཏྲ་ལུགས་ཀྱི་སྤྱན་རས་གཟིགས། དུས་འཁོར་རྣམས་ཀྱི་དབང༌། ཕྱག་རྡོར་ཁྱུང་ལྔ། ཨུ་ཙརྱ་འགྲོ་བཟང་ལུགས། རྣམ་འཇོམས། ཚེ་དཔག་མེད་གྲུབ་རྒྱལ་ལུགས། ནོར་རྒྱུན་མ། འོད་ཟེར་ཅན་མ། ཛཾ་བྷ་ལ། ལོ་མ་གྱོན་མ་རྣམས་གྱི་རྗེས་གནང༌། ས་ར་ཧའི་ལུགས་ཀྱི་མགོན་པོ་ཞལ་གསུམ་ཕྱག་དྲུག་པའི་དབང་བཞི། མགོན་པོ་བཅུ་གསུམ་གྱི་རྗེས་གནང༌། ལྷ་མོ་ཕྱག་བཞི་མ་གནོད་སྦྱིན་དང་བཅས་པའི་རྗེས་གནང༌། སྙིང་ཞུགས་ཐུན་མོང་མ་ཡིན་པའི་རྗེས་གནང༌། ཕྱག་བཞི་པ་རས་བྲིས་དང་ལུས་དཀྱིལ་ལ་བརྟེན་པའི་དབང༌། གུར་ཞལ་ལེགས་ལྡན་མཆེད་གསུམ། བདེ་མཆོག་དང་འཇིགས་བྱེད་ཀྱི་སྔགས་བཏུ། དབྱངས་གསལ། ཡེ་ངྷརྨ། ཡི་གེ་བརྒྱ་པ་རྣམས་ཀྱི་རྗེས་གནང༌། མགོན་པོ་བཞི་སྦྲགས་དང་དུས་མཚན་མའི་དབང༌། སེང་གདོང་རིགས་ལྔའི་དབང་དང་དེའི་སྒྲུབ་ཐབས་ལས་ཚོགས་དང་བཅས་པ། འཇམ་དབྱངས་ཆོས་སྐོར་གྱི་དབང་རྗེས་གནང་ལུང་དང་བཅས་པ། གདུགས་དཀར་གྱི་དབང༌། རྣམ་སྲས་གསང་སྒྲུབ་ལྗང་སེར་དང་དྲག་བྱེད་ཀླུ་ཆེན་བརྒྱད་ཀྱིས་བསྐོར་བ། སེར་ཆེན་དཀར་པོ། བདུད་མོ་བཞི་སྐོར། གཤིན་རྗེ་ལྟར་སྒྲུབ་པ། དྲག་བྱེད་རྐང་ཐང་མ་རྣམས་ཀྱི་རྗེས་གནང༌། མི་ཏྲ་ཁྲིད་དྲུག་གི་རྗེས་གནང༌། ཡེ་ཤེས་མགོན་པོ་ཕྱག་དྲུག་པའི་བེའུ་བུམ་དཀར་ནག གཏོར་ཆེན་འཁོར་ལོ་སོགས་ཀྱི་ཕྱག་ལེན་ཞལ་ཤེས་དང་བཅས་པ། རྭ་པོད། གཤིན་རྗེའི་འཁྲུལ་འཁོར། དྲུག་ཅུ་པ་སོགས་ཀྱི་ཕྱག་ལེན་མན་ངག་སོགས། མདོར་ན་དབང་ཁྲིད་ལུང་གི་རིམ་པ་མཐའ་ཡས་པ་བུམ་པ་གང་བྱོའི་ཚུལ་དུ་གསན་པར་མཛད་དོ། །དེ་ནས་བྱང་གི་ཧོར་རྣམས་ཀྱིས་གསོལ་བ་བཏབ་ནས་ཧོར་གྱི་ཡུལ་དུ་ཕེབས་ཏེ་སྐྱེ་བོ་སྡིག་ཅན་རྣམས་དགེ་བ་བཅུའི་ཁྲིམས་ལ་བཀོད་ཅིང་འཇམ་མགོན་བླ་མའི་བསྟན་པ་ཆེས་ཆེར་འཕེལ་བར་མཛད་དོ། །དེ་ནས་ར་སྒྲེང་དུ་ཕེབས་པ་ན་ཇོ་བོ་ཕྱིང་དཀར་བས་དངོས་སུ་གཟུགས་བསྟན་ཏེ་བསུ་བ་བྱས་ཤིང༌། ར་སྒྲེང་འདུས་ཚོགས་ལ་བཀའ་གདམས་གླེགས་བམ་དང་སྙིང་པོ་དོན་གསུམ་སོགས་ཆོས་མང་དུ་གནང༌། དེ་ནས་འབྲས་སྤུངས་སུ་ཕེབས་པ་ན་པཎ་ཆེན་ཆོས་ཀྱི་རྒྱལ་མཚན་གྱི་སློབ་མ་འཇའ་ལུས་གྲུབ་པ་རྡོ་རྗེ་མཆེད་གསུམ་གྱི་ནང་ཚན་སྟོད་ལུང་པ་དཔལ་ལྡན་རྡོ་རྗེ་དང་མཇལ་ཏེ་འཇམ་མགོན་སྙན་རྒྱུད་ཀྱི་གདམས་ངག་མང་དུ་གསན་ནོ། །དེ་ནས་མིག་དམར་ཞེས་པ་ཤིང་ཕོ་བྱི་བའི་ལོ། ཡང་དག་པར་རྫོགས་པའི་སངས་རྒྱས་ཀྱི་དུས་ཆེན་གསུམ་འཛོམ་ཧོར་ཟླ་བཞི་པ་ས་ག་ཟླ་བའི་ཚེས་བཅོ་ལྔའི་ཉིན། དགེ་ལྡན་ཁྲི་རིན་པོ་ཆེ་ཟུར་པ་མཁས་གྲུབ་དགེ་ལེགས་དཔལ་བཟང་པོས་མཁན་པོ། ཁྲི་ལས་ཐོག་པ་དགེ་བཤེས་པོ་ཏོ་བའི་རྣམ་པར་སྤྲུལ་པ་དགེ་འདུན་བསྟན་པ་དར་རྒྱས་ཀྱིས་ལས་སློབ། ཤངས་དགེ་འཕེལ་ཆོས་རྗེ་ཕྱོགས་ལས་རྣམ་རྒྱལ་བས་གསང་སྟོན། ལྷའི་བཙུན་པ་བསོད་ནམས་དཔལ་བཟང་གིས་དུས་གོ་བ་མཛད་དེ། དད་པའི་དགེ་འདུན་གྲངས་ཚང་བའི་དབུས་སུ། དགེ་སློང་གི་སྡོམ་པ་བཞེས། མཁན་སློབ་སོགས་ལ་ཟང་ཟིང་གི་བསྙེན་བཀུར་དཔག་ཏུ་མེད་པ་མཛད། དེའི་ཚེ་མཁན་སློབ་ཀྱི་སྤྱན་སྔར་ཇི་ལྟར་ཞལ་གྱིས་བཞེས་པ་ལྟར་འདུལ་ཁྲིམས་མཐའ་དག་ཉམས་པ་མེད་པར་བསྲུང་བར་མཛད་དེ་ཐུབ་པའི་རྒྱལ་ཚབ་ཆེན་པོར་གྱུར་ཏོ། །དེ་ནས་བཀྲ་ཤིས་ལྷུན་པོའི་གྲྭ་ཚང་བླ་མ་རྣམས་དང༌། སྤྱི་ནས་གཙང་ཕྱོགས་སུ་འབྱོན་དགོས་པའི་གདན་འདྲེན་བྱུང་སྟེ་གཙང་ཕྱོགས་སུ་ཕེབས། ལམ་བར་གྱི་སེར་སྐྱ་བགྲང་བ་ལས་འདས་པ་ལ་མཐོ་རིས་དང་ཐར་པའི་ས་བོན་འདེབས་པར་མཛད་ཅིང་དབེན་དགོན་དུ་ཕེབས་ནས་རྒྱལ་བ་དབེན་ས་པ་ཆེན་པོའི་སྐུ་གདུང་ལ་མཆོད་འབུལ་སྨོན་ལམ་མཛད་ཅིང༌། མཁས་གྲུབ་སངས་རྒྱས་ཡེ་ཤེས་ཀྱིས་གསོལ་བ་བཏབ་ནས་དབེན་དགོན་འདུས་ཚོགས་ལ་ཆོས་མང་དུ་གནང༌། དེ་ནས་བཀྲ་ཤིས་ལྷུན་པོའི་དགེ་འདུན་རྣམས་ཀྱིས་མཆོད་པའི་བྱེ་བྲག་སྣ་ཚོགས་པས་བསུས་ཏེ་འཇིགས་མེད་སེངྒེའི་ཁྲི་ལ་ཞབས་སེན་བཀོད་ནས་མདོ་སྔགས་ཀྱི་ཆོས་མང་དུ་སྩལ། དེ་ནས་བཀའ་གདམས་བསྟན་པའི་འབྱུང་གནས་སྣར་ཐང་དུ་ཕེབས་ཏེ་རྟེན་རྣམས་ལ་མཆོད་འབུལ་སྨོན་ལམ་རྒྱ་ཆེར་མཛད་ཅིང་སེར་སྐྱ་མང་པོ་ལ་ཆོས་ཀྱི་བདུད་རྩི་སྩལ། དེ་ནས་གངས་ཅན་ཆོས་འཕེལ་དུ་ཕེབས་ཏེ་དཔལ་ལྡན་དམག་ཟོར་མ་ལ་བསྐང་བ་དང་འཕྲིན་འཆོལ་རྒྱ་ཆེར་མཛད་ཅིང་འདུས་ཚོགས་ལ་ཆོས་ཀྱང་སྩལ། དེ་ནས་ཁྲོ་ཕུར་ཕེབས་ཏེ་བྱམས་ཆེན་ལ་མཆོད་འབུལ་སྨོན་ལམ་རྒྱ་ཆེར་མཛད།དེ་ནས་ས་སྐྱར་ཕེབས་ཏེ་རྟེན་རྣམས་ལ་མཆོད་འབུལ་མཛད་ཅིང༌། ལྷག་པར་བསེ་འབག་དེ་ལ་སུས་ཀྱང་རེག་མི་ནུས་པར་བྱེད་པ་ལ་རྗེ་འདིས་ཕྱག་གིས་རྡུལ་རྣམས་ཕྱིས་ཤིང་ཕྱག་གིས་བཟུང་སྟེ་སྤྱན་དམིགས་མཛད་པ་ན་ཆོས་སྐྱོང་དགྱེས་པའི་མཚན་མ་ངོ་མཚར་བ་བྱུང༌། དེ་ནས་ཁའུར་ཕེབས་ཏེ་དཔལ་མགོན་ཞལ་ལ་འཕྲིན་འཆོལ་མཛད་པས་ཆོས་སྐྱོང་དགྱེས་པའི་མཚན་མ་སྟོན་པ་དངོས་སུ་བྱུང༌། དེ་ནས་རིམ་གྱིས་འབྲས་སྤུངས་སུ་ཕེབས་ཏེ་བསྟན་པ་རིན་པོ་ཆེའི་སྲོག་ཤིང་གཡོ་བ་མེད་པར་བཟུང༌། དེ་ནས་སེ་རའི་དགེ་འདུན་ཚང་མས་དད་འདུན་རྩེ་གཅིག་པས་གདན་དྲངས་ནས་སེ་རར་ཕེབས་ཏེ་མདོ་སྔགས་ཀྱི་ཆོས་མང་དུ་གསུངས། དེ་ལྟར་རྗེ་འདི་ནི་བསྟན་པའི་དོན་དུ་ངལ་བ་མེད་པར་དབུས་གཙང་གི་སའི་ཆ་ཕལ་མོ་ཆེར་ཞབས་ཀྱིས་བཅགས་ནས་རྒྱལ་བའི་བསྟན་པ་ལ་མ་དད་པ་རྣམས་དད་པར་བྱས་དད་པ་རྣམས་ཕྱིར་ཞིང་དད་པ་འཕེལ་བར་བྱས་ཏེ་འཇམ་མགོན་བསྟན་པ་ཕྱོགས་ཀུན་ཏུ་འཕེལ་བར་མཛད། གཙོ་བོར་འབྲས་སྤུངས་དང་རྒྱལ་གཉིས་གདན་ས་འདྲ་བར་མཛད་དེ་གཉིས་ཀར་རེ་མོས་ཀྱིས་བཞུགས་ཤིང་ཆོས་ཟང་ཟིང་གཉིས་ཀའི་སྒོ་ནས་ལེགས་པར་བསྐྱངས། བསྟན་པའི་བྱ་བ་དེ་ལྟར་མཛད་པའི་སྐབས་ཀུན་ཏུའང་ཐུགས་དམ་གྱི་རིམ་པ་རྣམས་འཆག་མེད་དུ་མཛད། དེ་ཡང་ཉིན་ཞག་ཕྲུགས་གཅིག་ལ་ཐུགས་དམ་གྱི་རིམ་པ་ཇི་ལྟར་མཛད་པ་ནི། ཐོག་མར་ཁྲུས་དང་ཉེ་རེག་གནས་བསྲུང་བ། སྐྱབས་འགྲོ། ཕྱག་མཆོད། ལམ་རིམ་གྱི་ཁྲིད། སྒྲ་མི་སྙན་དང༌། མགོན་པོ་ཆེ་ཆུང་གི་ཚེ་སྒྲུབ། ལྷ་བཞི་དྲིལ་སྒྲུབ་ཀྱི་དབང༌། སྙིང་ཞུགས་འཕོ་བ་དང་བཅས་པ། འཇམ་ནག འཇམ་དབྱངས། བླ་མའི་རྣལ་འབྱོར། སེམས་བསྐྱེད། བསམ་གཏན་ཉལ་ཆོག བདེ་མཆོག་ལུས་དཀྱིལ། རྩ་སྔགས་བརྒྱ་རྩ། སྙིང་པོ་དང་ཉེ་སྙིང་སུམ་བརྒྱ། མི་འཁྲུགས་པ། དེའི་གཟུངས་སྔགས་བརྒྱ་རྩ། བཀའ་གདམས་ལྷ་བཞིའི་སྒོམ་བཟླས་དང་སྔགས་བརྒྱ་རྩ། བསྟོད་ཚོགས་དང་སྨོན་ལམ་སྐོར་འགའ་ཞིག ཚེ་དཔག་མེད་ཀྱི་བསྐྱེད་རྫོགས། ཚེ་ཁྲིད། སྒྲོལ་དཀར། འཇམ་དབྱངས། དབྱངས་ཅན་དཀར་དམར། མཁའ་སྤྱོད་མ་རྣམས་ཀྱི་བཟླས་བསྙེན། བདེ་མཆོག་གདན་བཞིའི་བསྙེན་པ་སུམ་བརྒྱ། སྔགས་རིང་ཉེར་གཅིག་རེ་བཟླ་ཞིང༌། གཙོ་བོར་ལམ་རིམ། བློ་སྦྱོང༌། གཅོད་དམིགས། རིམ་གཉིས་ཀྱི་ཁྲིད་རྣམས་སྐྱོང་བར་མཛད་ཅིང༌། ཆོས་སྐྱོང་མང་པོའི་བསྐང་གསོ་བསྟོད་བསྐུལ་རྣམས་འཆག་མེད་དུ་མཛད། 2/4 མདུན་ངོས། 上一页 1 2 3 4 下一页 尾页 |
