ད་སྔ་གཟིགས་བཞིན་པ།  མདུན་ངོས། > མི་སྣ་མཚམས་སྦྱོར། > མཁས་བའི་ཁྱུ་མཆོག
༄༅། །ལམ་རིམ་བླ་མ་བརྒྱུད་པའི་རྣམ་ཐར་ལས་ཁྲི་ཆེན་ངག་དབང་མཆོག་ལྡན་པའི་རྣམ་ཐར།
སྤེལ་དུས།05-16  ཡོང་ཁུངས། ཀྲུང་གོའི་བོད་ཀྱི་སློབ་གསོ་དྲ་བ།  རྩོམ་པ་པོ། ཡོངས་འཛིན་ཡེ་ཤེས་རྒྱལ་མཚན།
 སྲད་རྒྱུད་ཀྱི་མན་ངག་དང༌།   རྒྱུད་སྨད་རང་གི་རྡོ་ལག་བརྒྱུད་ཀྱི་མན་ངག་གསུམ་ག་མངའ་ཞིང༌། དེ་ཡང་བཀླགས་ལུང་ཙམ་མིན་པར་དམར་ཁྲིད་ལག་རྗེས་དང་བཅས་པ་ཞིབ་ཏུ་ཁྲིད་པར་མཛད་པས་ལམ་རིམ་གཉིས་ལ་མི་འཇིགས་པའི་གདེང་ཐོབ། དེ་ནས་འཇམ་དབྱངས་བཞད་པ་རྡོ་རྗེ་ལ་ཡང་ལམ་རིམ་གྱི་ཁྲིད་དང་བསྐྱེད་རྫོགས་ཀྱི་ཁྲིད་དང་དབང་རྗེས་གནང་མང་དུ་གསན། གཞན་ཡང་དགེ་བའི་བཤེས་གཉེན་དུ་མ་ལ་དབང་ལུང་མན་ངག་མཐའ་ཡས་པ་གསན།དེ་ནས་ཡབ་ཡུམ་གྱིས་ནན་གྱིས་བསྐུལ་ཏེ་མདོ་སྨད་དུ་བྱོན་ནས་ལོ་ངོ་བཞི་ཙམ་བཞུགས་སླར་དགུང་ལོ་སོ་གསུམ་གྱི་ཐོག་དབུས་སུ་ཕེབས་ནས་ཁྲི་ཆེན་དགེ་འདུན་ཕུན་ཚོགས་ལ་གསང་བདེ་འཇིགས་གསུམ་གའི་བསྐྱེད་རྫོགས་རྣམས་ཀྱི་ཁྲིད་དང་རྗེ་རིན་པོ་ཆེའི་གསུང་འབུམ་གྱི་ལུང་སོགས་ཆོས་བཀའ་མཐའ་ཡས་པ་གསན།  དགུང་ལོ་སོ་བཞི་པའི་ལོ་གཞུང་ས་ནས་མཐོ་ལྡིང་མཁན་པོར་བསྐོ་བཞག་གནང་སྟེ་མཐོ་ལྡིང་གསེར་ཁྲིར་ཕེབས་ནས་ལོ་ཆེན་རིན་ཆེན་བཟང་པོའི་གདན་ས་བསྐྱངས་ཏེ་ལོ་ཆེན་གྱིས་བསྟན་པའི་དོན་དུ་སྐུ་གསུང་ཐུགས་རྟེན་རྒྱ་ཆེན་པོ་བཞེངས་པ་རྣམས་དང་མདོ་སྔགས་ཀྱི་འཆད་ཉན་བཙུགས་པ་རྣམས་བར་སྐབས་སུ་ཉམས་པ་རྣམས་དམ་པ་འདིས་ལེགས་པར་གསོས་ཏེ་ལོ་ཆེན་རང་ཉིད་སླར་བྱོན་པ་ལྟར་མངའ་རིས་སྐོར་གསུམ་དུ་མདོ་སྔགས་ཀྱི་ཆོས་རྒྱ་ཆེར་བཤད་དེ་བསྟན་པ་ལ་བྱ་བ་རྒྱ་ཆེན་པོ་མཛད།    མངའ་རིས་སུ་ལོ་བདུན་གྱི་རིང་བསྟན་པའི་བྱ་བ་མཛད་ནས་མཐོ་ལྡིང་གི་ཁྲི་བཞག་སྟེ་དབུས་གཙང་དུ་འབྱོན་པའི་ལམ་ཞོར་གངས་ཏེ་སེ་མཇལ་བར་ཕེབས། གནས་དེར་བཀའ་རྒྱུད་པའི་བླ་མ་གོང་མ་མང་པོས་ཕྱག་རྗེས་དང་ཞབས་རྗེས་བཞག་པ་མང་དུ་སྣང་བ་རྣམས་གཟིགས་པ་ན་འཇམ་མགོན་བླ་མའི་བསྟན་པའི་ཆེ་བ་འདོན་ཕྱིར་དམ་པ་འདིས་ཀྱང་རྡོ་ལ་ཞབས་རྗེས་འཇོག་པར་མཛད། དེ་ནས་མང་ཡུལ་སྐྱིད་གྲོང་དུ་ཕེབས་ཏེ་རང་བྱུང་ཝ་ཏི་བཟང་པོ་ལ་མཆོད་འབུལ་སྨོན་ལམ་རྒྱ་ཆེར་མཛད། དེ་ནས་སྐྱིད་གྲོང་གི་ཕུ་བྲག་ཁ་རི་ཁྲོད་དུ་ལི་ཐང་རབ་འབྱམས་པ་བླ་མ་བློ་བཟང་ཆོས་འཁོར་ལ་ཆོས་མང་དུ་གསན། དེ་ནས་དཔལ་ཁུད་དུ་ཕེབས་ནས་པད་མ་ཆོས་སྡིངས་མཇལ། བོ་དོང་འཇིགས་བྲལ་གྱི་གསུང་རྣམས་ལ་ཤིན་ཏུ་དགྱེས་པར་མཛད། དེ་ནས་རིམ་གྱིས་བཀྲ་ཤིས་ལྷུན་པོར་ཕེབས་ཏེ་པཎ་ཆེན་ཐམས་ཅད་མཁྱེན་པ་ཆེན་པོར་རྟ་བཟང་པོ་སུམ་ཅུ་སྐོར་གྱིས་གཙོས་པའི་འབུལ་བ་སྤམ་ཆེ་བ་མཛད། བྱང་ཆུབ་ལམ་གྱི་སྒྲོན་མ་སོགས་ཆོས་མང་དུ་ཞུ་བར་མཛད། དེ་ནས་དབུས་སུ་ཕེབས་ཏེ་གྲུབ་པའི་དབང་ཕྱུག་འཇམ་དཔལ་རྒྱ་མཚོ་བ་ལ་མི་ཏྲ་བརྒྱ་རྩ་སོགས་དབང་རྗེས་གནང་མང་དུ་གསན། ཁྲི་ཆེན་དགེ་འདུན་ཕུན་ཚོགས་ལ་བདེ་མཆོག་རྩ་རྒྱུད་དང་སྦས་དོན་ཀུན་གསལ་གཉིས་རྩ་འགྲེལ་སྦྲགས་པའི་ལུང་སོགས་ཟབ་ཆོས་མང་དུ་གསན། དེ་ནས་རྒྱུད་སྨད་ཀྱི་ཁྲི་ལ་ཕེབས་ཏེ་རྗེ་ཐམས་ཅད་མཁྱེན་པས་རྗེ་བཙུན་ཤེས་རབ་སེང་གེ་ལ་ཕ་རྒྱུད་གསང་བ་འདུས་པ་དང་། མ་རྒྱུད་འཁོར་ལོ་སྡོམ་པ་གཉིས་ཀྱི་རྒྱུད་འགྲེལ་དང༌།   བསྐྱེད་རྫོགས་ཀྱི་ཁྲིད་རྣམས་རྒྱུན་མི་ཉམས་པར་བྱ་བའི་ཕྱིར་རྒྱུད་གྲྭ་འཛུགས་དགོས་པར་བཀའ་ཕེབས་པ་ལྟར་རྗེ་ཤེས་རབ་སེང་གེས་རྗེའི་བཀའ་ལྟར་རྒྱུད་ཀྱི་རྒྱལ་པོ་གཉིས་ཀྱི་འཆད་ཉན་གཙོ་བོར་བཏོན།   བདེ་གསང་འཇིགས་གསུམ་གྱི་ཆོ་ག་ཕྱག་ལེན་མཐའ་དག་རྒྱུད་དང་རྗེའི་དགོངས་པ་ལྟར་རྣམ་པར་དག་པའི་རྒྱུད་གྲྭ་འཛུགས་པར་མཛད་ཅིང་རིང་ཞིག་འཕེལ་རྒྱས་སུ་གྱུར་ནའང་བདེ་མཆོག་གི་སྐོར་འདི་ལྷག་པར་བཀའ་གཉན་པ་དང༌། དུས་དབང་གིས་བར་སྐབས་ཤིག་ནས་བཟུང་རྒྱུན་ཆད་པ་དམ་པ་འདིས་གསོ་བར་བཞེད་ནས་རྗེ་རིན་པོ་ཆེ་ཉིད་ལ་གསོལ་བ་ཤུགས་དྲག་ལ་རྒྱུན་རིང་བ་བཏབ། རྗེ་རིན་པོ་ཆེའི་བསྟན་པ་གཉེར་དུ་གཏད་པའི་སྲུང་མ་མགོན་ཆོས་གཉིས་ལ་འཕྲིན་ལས་བཅོལ་ཏེ་སྡེ་སྣོད་འཛིན་པ་བློ་གསལ་དོན་གཉེར་ཅན་ཁ་ཤས་དབེན་དགོན་དུ་བཏང་སྟེ་གྲུབ་ཆེན་དབེན་ས་པ་ཡབ་སྲས་ཀྱིས་ཇི་ལྟར་བཙུགས་པའི་བདེ་མཆོག་གི་ཆོ་གའི་ཕྱག་ལེན་རྣམས་ཉམས་པ་མེད་པར་བླངས་ཏེ་ཆོ་ག་རྣམས་ལེགས་པར་བཙུགས། སྔར་ནས་གསང་བ་འདུས་པའི་འགྲེལ་བ་བཞི་སྦྲགས་ཀྱི་འཆད་ཉན་རྒྱུན་ཉམས་པ་མེད་པར་གནས་པ་གོང་འཕེལ་གྱི་ཐོག་བདེ་མཆོག་རྩ་རྒྱུད་དང༌།   སྦས་དོན་ཀུན་གསལ་རྩ་འགྲེལ་སྦྲགས་པའི་འཆད་ཉན་ལེགས་པར་བཙུགས། ཊྰིཀྐའི་འཛིན་ཆོས་དང༌། བདེ་གསང་གཉིས་ཀྱི་བསྐྱེད་རིམ་དང་རིམ་ལྔ་གསལ་སྒྲོན་གྱི་གཟབས་བཤད་འཇིགས་བྱེད་ཀྱི་བསྐྱེད་རྫོགས་ཆེན་མོའི་གཟབས་བཤད་དབྱར་གནས་ཐོག་འདུས་པའི་བསྐྱེད་རྫོགས་ཀྱི་མྱོང་ཁྲིད་ལོ་ལོ་བཞིན་ཉམས་པ་མེད་པ་བསྐྱངས།   དོན་གཉེར་ཅན་འགའ་ཡར་ལ་ཁྲིད་ཆེན་བརྒྱད་ཀྱང་གནང་སྟེ་རྡོ་རྗེ་ཐེག་པའི་བསྟན་པ་ཆེས་ཆེར་སྤེལ་བས་རྒྱལ་བའི་བསྟན་པ་སྤྱི་དང་ཁྱད་པར་རྡོ་རྗེ་ཐེག་པའི་བསྟན་པ་ལ་བཀའ་དྲིན་ཟླ་མེད་དུ་མཛད་དོ། ། གཞན་ཡང་བློ་གསལ་གླིང་ཞལ་སྔ་ནས་བློ་བཟང་སྦྱིན་པ་དང༌། གྲུབ་པའི་དབང་ཕྱུག་དོན་ཡོད་མཁས་གྲུབ་སོགས་ལའང་མདོ་སྔགས་ཀྱི་ཟབ་ཁྲིད་མང་དུ་གསན། དེ་ལྟར་མེ་ཕག་ནས་མེ་སྤྲེའི་བར་ལོ་བཅུའི་རིང་ལ་དཔལ་ལྡན་སྨད་རྒྱུད་གྲྭ་ཚང་གི་གདན་ས་མཛད་དེ་ཆོས་ཟང་ཟིང་གཉིས་ཀའི་སྒོ་ནས་དགེ་འདུན་གྱི་སྡེ་ལེགས་པར་བསྐྱངས། ཁྱད་པར་བདེ་མཆོག་གི་ཆོས་སྐོར་ཉམས་པ་གསར་དུ་གསོ་བར་མཛད།   ཡུན་རིང་གནས་པའི་ཕྱིར་གཞུང་ས་ཆེན་པོར་རྩོལ་བ་ཆེན་པོས་ཞུས་ཏེ་བདེ་མཆོག་སྒྲུབ་མཆོད་ཀྱི་མཆོད་གཞི་ཡང་གསར་སྦྱོར་མཛད།དེ་ནས་རྒྱལ་བ་ཐམས་ཅད་མཁྱེན་པ་རྗེ་བཙུན་བློ་བཟང་བསྐལ་བཟང་རྒྱ་མཚོ་སྔགས་ཀྱི་གསན་སྦྱོང་མཛད་རྒྱུའི་ཡོངས་འཛིན་དུ་རྗེ་འདི་པ་སྤྱན་དྲངས་པ་ན་རྒྱུད་སྨད་ཀྱི་གདན་ས་བཞག་སྟེ་རྒྱལ་བ་མཆོག་གི་ཡོངས་འཛིན་དུ་བཞུགས་ཏེ་འགར་ཐར་དུ་ཕེབས་འགར་ཐར་དུ་བཞུགས་པའི་རིང་རྒྱལ་བ་བསྐལ་བཟང་རྒྱ་མཚོར་རྒྱུད་སྨད་ཀྱི་ཕྱག་བཞེས་བཞིན་རྡོ་རྗེ་སློབ་དཔོན་མཆོད་པའི་ཆོ་ག་སྔོན་དུ་བཏང་སྟེ་ཉིན་རེ་བཞིན་འགྲེལ་པ་བཞི་སྦྲགས་ནས་གཟབས་བཤད་རེ་དང་རྒྱུད་ཊྰིཀ་གི་འཛིན་ཆོས་འཆག་མེད་ངོས་བར་བར་དུ་དབང་རྗེས་གནང་གི་རིགས་དང་ལུང་གི་རིགས་འབུལ་བར་མཛད། དགུན་དུས་ཕལ་ཆེར་བཅད་རྒྱར་བཞུགས་ཤིང་རྒྱུད་པའི་ཕྱག་བཞེས་ལྟར་དཔྱིད་སོས་ནས་བཟུང་རྒྱུད་འགྲེལ་གྱི་འཆད་ཉན་གོང་འཕེལ་དུ་མཛད་དེ་བཀླགས་ལུང་ཙམ་གྱིས་ཆོག་པར་མ་མཛད་པར་རྩ་རྒྱུད་དང་བཤད་རྒྱུད་རྣམས་ཤན་སྦྱར། དེ་དག་གི་དོན་འཕགས་པ་ཡབ་སྲས་ཀྱི་གཞུང་རྣམས་དང་རྗེ་ཡབ་སྲས་ཀྱི་གཞུང་རྣམས་དང་སྤྱར་ཏེ་མཐའ་དྲུག་དང་ཚུལ་བཞིའི་དོན་མཐའ་དག་པར་བཤད།   རྒྱལ་བ་མཆོག་འདིའང་སྤྱིར་རྒྱལ་བའི་དམ་ཆོས་མ་ལུས་འཛིན་པ་དང༌། ཁྱད་པར་བླ་མེད་རྡོ་རྗེ་ཐེག་པའི་བསྟན་པ་ཉམས་པ་རྣམས་གསོ་བ་དང་རྒྱུན་ཅུང་ཟད་གནས་པ་རྣམས་ཆེས་ཆེར་སྤེལ་བར་བཞེད་པའི་ལྷག་བསམ་སྙིང་སྟོབས་ལྷག་པར་ཆེ་བས་རྒྱ་མཚོ་ཆེན་པོ་ཆུས་མི་ངོམས་པ་ལྟར་བླ་མ་རྡོ་རྗེ་འཆང་གིས་ཇི་ཙམ་བཤད་ཀྱང་ཚིམ་པ་མེད་པར་གོང་འཕེལ་དུ་མཛད།   འགར་ཐར་དུ་བཞུགས་རིང་ཐོས་བསམ་སྒོམ་པའི་བྱ་བ་མཐའ་དག་དབྱར་གྱི་མཚོ་དང་ཡར་ངོའི་ཟླ་བ་ལྟར་གོང་འཕེལ་དུ་གྱུར་པ་ཞིག་བྱུང༌། དེ་ལྟར་ལོ་གཉིས་ལྷག་ཙམ་གྱི་རིང་ལ་འགྲེལ་པ་བཞི་སྦྲགས་ནན་ཏན་དུ་བྱས་ནས་ཐུགས་སུ་ཆུད་པར་མཛད། 
རྒྱབ་སྐྱོར།
返回首页
གཙོ་ངོས།
པར་ལྡན་རྩོམ་ཡིག
ཉེ་ལམ་གསར་བརྗེས།
ཀློག་མཁན་མང་ཤོས།
 
Copyright © 2005 - 2018 Teducn.com
phone:18997245213 QQ:89457590
དྲ་ཚིགས་འདིའི་པར་དབང་ཡོད་ཚད་ཀྲུང་གོའི་བོད་ཀྱི་སློབ་གསོ་དྲ་བར་དབང་།
ཡིག་ཟམ། gangjian_xn@hotmail.com
འབྲེལ་གཏུགས་ཁ་པར། ༡༨༩༩༧༢༤༥༢༡༣青ICP备18000196号