| དཔྱིད་རྒྱགས་སྟོན་ནས་མ་སྒྲུབ་བླུན་ཟེར་ན། །འཆི་བར་ངེས་ཤིང་འཆི་ཚེ་ཕན་ངེས་ཆོས། །ད་ལྟ་ཉིད་ནས་མི་སྒྲུབ་ཤིན་ཏུ་བླུན། །དེས་ན་རྙེད་བཀུར་གྲགས་སོགས་ཚེ་འདི་ཡི། །ཕུན་ཚོགས་སྒྲུབ་པའི་བསམ་སྦྱོར་ཡོངས་སྤངས་ནས། །འཆི་ཚེ་ངེས་པར་ཕན་པའི་དམ་ཆོས་ལ། ། གཡེལ་བ་མེད་པར་རྟག་ཏུ་འབད་པར་བྱ། །ཞེས་གསུངས་སོ།།བདག་ཉིད་ཆེན་པོ་འདིས་སྐྱེས་བུ་གསུམ་གྱི་ལམ་ལ་སྦྱངས་པས་མྱོང་བ་ཕུལ་ཕྱིན་ཐོན་ཏེ་བཤེས་གཉེན་བསྟེན་ཚུལ་དང༌། དལ་འབྱོར་དང་མི་རྟག་པའི་སྐོར་ལ་མྱོང་བ་ཕུལ་ཕྱིན་ཐོན་པ་བཤད་ཟིན་པ་ལྟར་དང༌།སྐྱབས་འགྲོ་ལས་འབྲས་ལ་མྱོང་བ་ཕུལ་ཕྱིན་ཐོན་པ་ནི་རྒྱལ་སྲས་འདི་དབུས་སུ་བྱོན་པའི་དུས་གུང་ཐང་ནས་ལྷ་སར་འབྱོན་པའི་ཆུ་ཁར་ཕེབས་དུས། རྟ་བདུན་བརྒྱད་ཅིག་ལ་མི་རེ་རེ་ཞོན་ནས་ཆུ་ལ་རྐྱལ་བཏང་ནས་བྱུང་བས། ཆུ་དཀྱིལ་དུ་ཐམས་ཅད་ནུབ་ནས་སོང་བ་གཟིགས་པ་དང༌། ཨ་ཀ་ཁ་སྐྱོན་ཆེ་གསུང་ནས་ཕྱག་ཐལ་མོ་སྦྱར་ཏེ། སྒྲོལ་མ་སྒྲོལ་མ། འཕགས་མ་འཕགས་མ། གསུང་ནས་སྤྱན་ཆབ་ཉིལ་ཉིལ་འདུག་པ་དང༌། མི་རྟ་ཟུང་གཅིག་མ་གཏོགས་པ་རྟ་དང་མ་བྲལ་བས་ཡུད་ཅིག་ན་ཆུ་འགྲམ་དུ་ཐོན་བྱུང༌། མི་རྟ་ཟུང་གཅིག་ཆུས་ཁྱེར་སོང་བ་དང༌། སེམས་དཔའ་ཆེན་པོའི་སྐུ་རྒྱབ་ནས་ད་ཅི་མེད་པའི་མི་དཀར་པོ་གཟུགས་རིང༌། ཕྲུག་གོས་དཀར་པོ་རྙིང་ངེ་སོང་བ་ཞིག་ལ། སྐ་རགས་དྲེས་མ་ཆིག་རྐྱང་བཅིངས་པ་ཅིག་བྱུང་ནས་ང་འགྲོ་ང་འགྲོ་ཟེར་ཞིང་ཆུ་ལ་ཚམ་ཚོམ་མེད་པར་རྒལ་སོང་བ་ནས། མི་དེས་ལག་པ་ནས་དྲུད་བྱུང་སྟེ་ཅི་ཡང་མ་ཉེས་པར་གསོས་རྟིང་མི་དཀར་པོ་དེ་གར་སོང་ཆ་མེད་ལ་སོང་བས་ཀུན་ཡ་མཚན་པར་གྱུར་ཏེ། སེམས་དཔའ་ཆེན་པོའི་ཞལ་ནས། ཅི་ཐོ་དོད་གསུང་བ་ལ། དྲུང་ནས་འཕགས་མ་ལ་གསོལ་བ་བཏབ་པས། འཕགས་མའི་སྤྲུལ་པ་ཡིན་ལས་ཆེ་ཞུས་པ་ལ། ཡིན་པ་དག་ཀྱང་སྲིད། རེ་མཚར་ཅིག་བྱུང༌། ལར་རང་གིས་བློ་གཏོད་ནུས་དཀོན་མཆོག་འདིས་རང་མི་བསླུ་བ་ཅིག་ཡིན་གསུངས། ཡང་ཉེ་གནས་ཀྱིས་ལོ་གཅིག་ལོ་ཞིང་དུམ་པ་གཅིག་བཏབ་པ་གཟིགས་པས།སེམས་ཅན་མང་པོ་འཆི། འོ་སྐོལ་ལོ་མས་ཅི་བྱེད་གསུང་ནས་བྱེད་དུ་མ་གནང༌། དབྱར་ཡོག་མོའི་མེ་ཤིང་མ་འདོན། དེ་ལ་སེམས་ཅན་མང་པོ་ཡོད།མ་ཤི་ན་འཁོས་གཅིག་འཆར་ནས་འོང་གསུང༌།དབྱར་འོད་ཁང་མེད་དུས་ནུབ་མོ་དཀར་མེ་ཕུལ་ན་ཕྱེ་མ་ལེབ་འཆི་གསུང་ནས། དཀར་མེ་ཉིན་པར་འབུ་ལ།དབྱར་ཁ་མཆོད་པ་སྔ་སེ་གྱིས། འཕྱིས་ན་སེམས་ཅན་རྐང་འོག་ཏུ་སོང་བ་མི་མཐོང་གསུང་ཞིང༌།མདོར་ན་ལས་རྒྱུ་འབྲས་ལ་ཐུགས་ཡིད་གཏིང་ནས་ཆེས་པའི་རྟགས་སྲོག་གི་ཕྱིར་ཡང་སྲོག་ཆགས་ཕྲ་མོ་རེ་ལའང་གནོད་པ་མི་མཛད་ཅིང་དུས་རྒྱུན་དུ་ལས་རྒྱུ་འབྲས་སེམས་པ་ལ་བསྔགས་པ་ཆེན་པོ་མཛད་དོ། །སྐྱེས་བུ་ཆེན་པོའི་ལམ་ལ་མྱོང་བ་ཕུལ་ཕྱིན་ཐོན་ཏེ་བདག་གཞན་དངོས་སུ་བརྗེ་ནུས་པ་བྱུང་བ་དང་སེམས་ཅན་ཀུན་ལ་ཉེ་རིང་མེད་པར་ཕན་སེམས་ཁོ་ན་མཛད་པ་ནི། འདི་ལྟར་ཡོན་བདག་གི་རིགས་འགའ་ཞིག་གིས། དམག་ལ་འགྲོ་བའི་དུས་རིམ་གྲོ་ལ་གཏོར་མའི་ཆས་མང་པོ་བསྐྱལ་ཙ་ན། གཏོར་མ་ཕུལ་ནས་འཕྲིན་ལས་འཆོལ་པའི་སྐབས་སུ། འོ་སྐོལ་རང་དཀོན་མཆོག་དང་ཆོས་སྐྱོང་ལ་ཞུ་བ་བྱེད་ཙ་ན།ཕྱོགས་གཉིས་ཀར་འཁྲུག་པ་ཞི་བར་བྱིན་གྱིས་རློབས། བསམ་ངན་སྦྱོར་རྩུབ་ཐམས་ཅད་ཞི་བར་མཛོད་ཅིག་ཟེར་བ་མ་གཏོགས། གཅིག་རྒྱལ་གཅིག་ཕམ་པར་མཛོད་མི་ཟེར། ཉིད་ཅག་རྣམ་པའང་དེ་བཞིན་མཛོད། ཁོ་བ་སྟེ་རྒྱལ་བ་ཞིག་འདོད་དེ། རྒྱལ་བ་མ་བྱུང་ཡང་འཁྲུག་པ་ཞི་ན་ཕར་ཚུར་གཉིས་ཀ་ལ་དེས་ཆོགདེ་བཞིན་བྱས་པས་ཡོན་བདག་བསླུས་པར་མི་འགྲོ་གསུང༌། སེམས་ཅན་འདི་དང་འདི་ཞེས་བྱ་བ་བདེ་ཞིང་སྐྱིད་པ་འདུག་ཟེར་བ་གསན་ཙ་ན། དེ་ལེགས་སོ་གསུང་ནས་ཤིན་དུ་མཉེས་ཤིང་འདི་ལྟར་ཡང་གསུང་ངོ༌། ། བདག་གིས་སྡུག་བསྔལ་རླུང་ཤུགས་ཀྱིས་བསྐྱོད་ནས། །གང་གིས་བཞིན་རས་ནག་པོའི་སྤྲིན་བསྡུས་ཏེ། །མཆི་མའི་ཆར་ཕབ་ངུད་མོའི་འབྲུག་སྒྲ་བསྒྲགས། །དེ་འདྲ་ཡལ་བར་འདོར་བ་རིགས་སམ་ཅི། །བདག་ཉིད་བདེ་བའི་ཉི་ཟེར་ཕོག་པ་ཡིས། །གང་གི་བཞིན་རས་པདྨོའི་ཚལ་རྒྱས་ཏེ། །སོ་ཡི་ཟེའུ་འབྲུ་དཀར་པོ་སྟོན་གྱུར་པ། །དེ་འདྲ་ཡལ་བར་འདོར་བ་ག་ལ་རིགས། །ཞེས་སོགས་གསུང་ངོ༌། །ཡང་དྲུང་ན་འཁོད་པའི་རི་དྭགས་དང་གཅན་གཟན་ཀུན་ཀྱང་གཅིག་ལ་གཅིག་ཕན་ཚུན་གནོད་པ་མེད་པར་བྱམས་ཏེ་གཞན་གྱིས་ཕུལ་བའི་ཤ་ཁྱི་ཆེན་པོ་གཅིག་ཡོད་པ་ཡང༌། རྣ་མོས་རྩེད་མོའི་ཕྱིར་རྡུང་བ་ལྟར་བྱས་ཙ་ན། མི་རྨུག་པར་བྲོས་འགྲོ་ཞིང༌། སྤྲང་པོ་ལ་རྨུག་པའི་ཚེ་མ་ཎི་བགྲངས་པ་དང་རྨུག་འཕྲོ་གཅོད་པ་ཞིག་ཡོད་དོ། །བྱི་ལ་ཞིག་ཡོད་པ་དེ་ཡང་བྱེའུ་མཐོང་ཁར་བབ་པའི་དུས་གནོད་པའི་སེམས་སྤངས་ནས། དེ་བྱུང་བ་ལ་དགའ་ཞིང་འགྲོགས་དོགས་པའི་ཕྱིར་དེས་མི་མཐོང་བའི་སར་ཕྱིན་ནས་ཉལ་ཞིང༌། བྱི་ཆུང་ལ་ཡང་གནོད་པ་མི་བྱེད་དོ། །སྤྱང་ཀི་གཅིག་ཡོད་པ་ཡང་སེམས་ཅན་ལ་འཚེ་བའི་སེམས་སྤངས་ཏེ། རྟིང་ལ་ཤ་བྱིན་ཀྱང་མི་ཟ་བ་ཅིག་བྱུང་ཞིང༌། ངང་པ་གཅིག་ཡོད་པ་ཡང་སེམས་དཔའ་ཆེན་པོ་བསྐོར་བ་མཛད་པའི་དུས་སུ་ཁོ་ཡང་བསྐོར་བ་བྱེད་དེ།བཞུགས་པའི་དུས་སུ་ཁོ་ཡང་སྡོད། སེམས་དཔའ་ཆེན་པོའི་སྤྱོད་ལམ་གྱི་ལད་མོ་བྱེད་པ་ཅིག་བྱུང་འདུག དེ་ལ་མཉེས་ཤིང༌། དམག་བྱུང་ནས་བོ་དོང་དུ་འབྱོན་དགོས་པ་བྱུང་དུས། ཉེ་གནས་ལ་གཞན་དངོས་པོ་མི་ཐུབ་ངང་པ་དེ་མ་ལུས་པ་གྱིས་གསུང་ཟེར། མཁན་ཆེན་བྱང་ཆུབ་རྩེ་མོའི་གསུང་གིས། དུད་འགྲོ་དེ་ཀུན་གྱི་བྱེད་ལུགས་དེ་རང་ངོ་མཚར་ཆེ། བྱང་ཆུབ་ཀྱི་སེམས་འདི་འབྱོངས་ཙ་ན་གང་ཡང་དབང་དུ་འདུ་བ་ཅིག་ཡིན་པར་འདུག་གསུང༌། 10/23 མདུན་ངོས། 上一页 8 9 10 11 12 13 下一页 尾页 |
