| རྗེ་བཙུན་མ་ཚར་གཅིག་གསུངས་ནས་བྱིན་རླབས་མཛད་དེ།དེ་རིང་ཉིད་ཀྱི་གེགས་སེལ་དེ་རྣ་མོས་བྱས། མོས་ཀྱང་གོ་བཅད་གསུང་བ་ལ།ཁོས་ངུས་པས། སྒྲོལ་མ་གྱིས་ལ་སྐད་ཆེན་པོ་ཐོང་ལ་ངུས་གསུངས་བས། རྣ་མོ་དེས་རྗེ་བཙུན་མའི་འཕྲིན་ལས་བྱས་པ་ཡིན་པར་འདུག དེ་ལྟ་བུའི་ཡ་མཚན་ཆེ་བ་ཅིག་བྱུང་བ་དེ་དུས་ཀྱི་ཚོགས་པ་ཐམས་ཅད་ལ་མངོན་སུམ་དུ་གྲུབ་ཅིང༌། བླ་མ་ལ་བྱིན་རླབས་དང་ཐུགས་རྗེ་ཡོད་ཙ་ན་དུད་འགྲོས་ཀྱང་མིའི་གེགས་སེལ་ནུས་པ་འབྱུང་ངོ༌། །བླ་མ་ཁྱུང་པོ་བའི་སློབ་མ་གསུམ་གྱིས་བོགས་འདོན་གྱི་གདམས་པ་ཅིག་ཞུས་པས། ཚེ་འདི་བློས་ཐོངས། སེམས་ཅན་ལ་བྱམས་སྙིང་རྗེ་སྒོམས།བླ་མ་ལ་གསོལ་བ་དུང་པ་ཐོབ་ལ་སྤྲོས་པ་མེད་པའི་ངང་ལ་མ་ཡེངས་པར་ཞོག་གསུང༌། དེ་ཡང་སེམས་དཔའ་ཆེན་པོ་འདི་ནི་འབྱོར་པ་དང་ལྡན་པའི་མི་ཆེན་རྣམས་ལས་ཀྱང་སྙོམས་ཆུང་ཆོས་དོན་དུ་གཉེར་བ་རྣམས་ལ་མཉེས་ཤིང་ཁྱད་པར་དུ་ཁྲིད་ཞུ་བ་རྣམས་ལ་མཉེས་ཏེ། ཁྲིད་ཞུ་བ་འདི་རྣམས་དུས་རྒྱུན་དུ་སྒོམ་པ་མ་བྱུང་ཡང་ཁྲིད་ཞུ་བའི་རིན་དེ་ལ་འཇུར་པོ་རེ་སྒོམ་པར་འདུག དེའི་སྟོབས་ཀྱིས་ཕལ་ཆེར་ལ་ཉམས་མྱོང་དགའ་རབ་རེ་སྐྱེ་ཡིན་འདུག་པས། གདུལ་བྱ་སྐྱོང་བའི་དུས་ཁྲིད་འབོགས་པ་འདི་རང་འགྲོ་དོན་ཆེ་གསུང༌། ཕྱོགས་ནས་མཇལ་འཕྲད་པ་དང༌། བསྙེན་བཀུར་བ་ནང་ན་ཡོད་པའི་དུས་སུ་ཁྲིད་པ་རྣམས་འཚོགས་ནས་གདའ་ཞུས་ན། དོ་ཞག་མཚམས་གྲོལ་བའི་སྐབས་དེར་གལ་ཆེ་ཤོས་ཆོས་འཆད་པ་འདི་ཡིན་པས། གཞན་རྣམས་དུམ་པ་སྒོར་བྱོན།ཁྲིད་པ་ཚོ་ལ་ཤོག་གྱིས་གསུང་ནས་ཆོས་གསུང༌། འགྲོན་པོ་མང་རབ་རང་ནང་ན་ཡོད་ན། སྟན་ཕྱིར་ཐོན་འོ་སྐོལ་རང་སྒོར་ཆོས་འཆད་འགྲོའོ་གསུང་ནས་ཕྱིར་བྱོན་ཏེ་ཆོས་གསུང་ངོ༌། །ད་ལྟའི་སློབ་དཔོན་ཚོ་ལ་བལྟས་ཙ་ན་དེ་ལྟ་བུའི་མཛད་སྤྱོད་རང་དཀའ་བར་གདའོ། །ཁྲིད་ཚར་བའི་རྗེས་ཐམས་ཅད་དུ་མི་ལ་རས་པས་དྭགས་པོ་ལྷ་རྗེ་ལ་གདམས་ངག་ཟབ་ཤོས་རང་གཅིག་ཡོད་པ་འགྲོ་ཁར་སྦྱིན་ཟེར་བའི་གཏམ་བརྒྱུད་གསུངས་ནས་ཐམས་ཅད་ལ་སྒོམ་སྐྱེ་བར་འདུག་པས་སྙིང་རུས་བསྐྱེད་ལ་སྒོམ་དགོས་པ་ཡིན་ཏེ།སྒོམ་ཆེན་པ་བྱ་བ་སྟན་ཐོག་ཏུ་སྡོད་ཚུགས་པ་ཅིག་རང་དགོས་གསུངས། ཡང་དགོན་པ་གཤེགས་ཁར་ཁོང་གི་ཞལ་ནས། ཁྱེད་སྒོམ་ཆེན་ཕོ་མོ་རྣམས་ཀྱིས་རབ་ཀྱིས་ལོ་དགུ་དགུ། འབྲིང་གིས་ལོ་གསུམ། ཐ་མས་ཀྱང་ཟླ་བ་གསུམ་རི་ལ་བསྡད་ནས་སྒྲུབ་པ་མ་བྱས་ན། ང་དང་དམ་ཚིག་མེད་གསུངས་ནས་ཞལ་ཆེམས་བཞག་པར་འདུག དེ་བཞིན་དུ་ཐམས་ཅད་ཀྱིས་རྒྱུན་དུ་སྒོམ་པ་བྱུང་ན་ཤིན་ཏུ་ལེགས། ཐ་མ་ཡང་སྲོད་ཐོ་རངས་དྲན་ཙམ་རེ་མ་བྱས་ན་དམ་ཚིག་མེད་པ་ཡིན་ནོ་གསུང༌། རྒྱལ་སྲས་བདག་ཉིད་ཆེན་པོ་འདིས་བསྟན་འགྲོའི་དོན་རྒྱ་ཆེར་མཛད་པས་སློབ་བུའི་རིགས་ཀྱང་རྒྱ་གར། རྒྱ་ནགབལ་པོ། ཧོར། ཡུ་གུར། སོག་པོ། འགའ།མདོ་སྟོད་སྨད། དབུས་གཙང༌། ཡང་རྩེ།མངའ་རིས་ལ་སོགས་པའི་མི་རིགས་མི་གཅིག་པ་གྲངས་མེད་པ་ཅིག་སྨིན་ཅིང་གྲོལ་བར་མཛད་ཅིང༌། སེམས་དཔའ་ཆེན་པོ་འདིའི་འཕྲིན་ལས་རྣམ་པར་ཐར་པ་བསམ་གྱིས་མི་ཁྱབ་ཅིང་བརྗོད་ཀྱིས་མི་ལང་སྟེ། བྱམས་སྙིང་རྗེ་བྱང་ཆུབ་ཀྱི་སེམས་ལ་བལྟས་ན། སྐྱེ་བ་དཔག་ཏུ་མེད་པའི་གོང་རོལ་ནས་བྱམས་སྙིང་རྗེ་བྱང་ཆུབ་ཀྱི་སེམས་ཁོ་ན་ལ་སྦྱངས་པ་འདྲ་བ་ཡོད། ཏིང་ངེ་འཛིན་དང་མངོན་པར་ཤེས་པ་མངའ་ཚུལ་ལ་བལྟས་ན། སྐྱེ་བ་དཔག་ཏུ་མེད་པའི་གོང་རོལ་ནས་ཏིང་ངེ་འཛིན་ཁོ་ན་ལ་སྦྱངས་པ་འདྲ་བ་ཡོད། རྨི་ལམ་ལ་དབང་ཐོབ་པ་ལ་བལྟས་ན། སྐྱེ་བ་དཔག་ཏུ་མེད་པའི་གོང་རོལ་ནས་སྒྱུ་ལུས་དང་རྨི་ལམ་ཁོ་ན་ལ་སྦྱངས་པ་འདྲ་བ་ཡོད། ཡི་དམ་ལྷའི་ཞལ་གཟིགས་པ་ལ་བལྟས་ན།སྐྱེ་བ་དཔག་ཏུ་མེད་པའི་གོང་རོལ་ནས་བསྐྱེད་རིམ་ཁོ་ན་ལ་གོམས་པར་བྱས་པ་འདྲ་བ་ཡོད། སྐུ་ཚེ་འདིར་ཡང་དང་པོ་ཉན་བཤད་མཛད་པའི་དུས་ཀྱི་སློབ་མ་སྟོན་ཆེན་སྟོན་པ་ལ་བལྟས་ན། སྐུ་ཚེ་རིལ་པོ་ཉན་བཤད་མཛད་པ་འདྲ་བ་ཡོད། སྐུ་མཚམས་དམ་པོ་བཅད་པའི་ལོ་གྲངས་ལ་བལྟས་ན། སྐུ་ཚེ་རིལ་པོ་དབེན་པ་བསྟེན་པ་འདྲ་བ་ཡོད།ཕྱག་དང་བསྐོར་བ་མཛད་པའི་གྲངས་ལ་བལྟས་ན། སྐུ་ཚེ་རིལ་པོ་ཕྱག་དང་བསྐོར་བ་མཛད་པ་འདྲ་བ་ཡོད།མ་ཎི་དང་རྗེ་བཙུན་མའི་གཟུངས་ལ་སོགས་པ་གཟུངས་སྔགས་བཟླས་པའི་གྲངས་བཅད་ལ་བལྟས་ན། སྐུ་ཚེ་རིལ་པོ་བཟླས་བརྗོད་ཁོ་ན་མཛད་པ་འདྲ་བ་ཡོད། སོ་སོ་ཐར་པའི་སྡོམ་པ་ཕོག་པའི་སློབ་མ་དགེ་ཚུལ་དང་དགེ་སློང་ལ་བལྟས་ན། སྐུ་ཚེ་རིལ་པོ་མཁན་སློབ་མཛད་པ་འདྲ་བ་ཡོད། བྱང་ཆུབ་མཆོག་ཏུ་སེམས་བསྐྱེད་པའི་སློབ་མ་ལ་བལྟས་ན། སྐུ་ཚེ་རིལ་པོ་བྱང་ཆུབ་སེམས་དཔའི་སྡོམ་པ་ཕོག་པ་འདྲ་བ་ཡོད།བདག་པས་གཞན་གཅེས་པའི་བྱང་ཆུབ་ཀྱི་སེམས་འཁྲུངས་ནས་གནོད་ལན་དུ་ཕན་འདོགས་པའི་དམ་བཅའ་བྱེད་པའི་སློབ་མ་ལ་བལྟས་ན། སྐུ་ཚེ་རིལ་པོ་ཀུན་རྫོབ་བྱང་ཆུབ་ཀྱི་སེམས་ཀྱི་ཁྲིད་བསྐྱངས་པ་འདྲ་བ་ཡོད། ཞི་ལྷག་ཟུང་འཇུག་གི་རྟོགས་པ་དང་ལྡན་པའི་སློབ་མ་ལ་བལྟས་ན། སྐུ་ཚེ་རིལ་པོ་དོན་དམ་བྱང་ཆུབ་ཀྱི་སེམས་ཀྱི་ཁྲིད་བསྐྱངས་པ་འདྲ་བ་ཡོད། ཡང་ཞལ་ནས། དགེ་བ་བསགས་པ་བྱང་ཆུབ་ཏུ་མ་བསྔོས་ན། ཡུལ་ཁྱད་པར་ཅན་ལ་ཁོང་ཁྲོ་སྐྱེས་པ་ལ་སོགས་པ་དགེ་བ་འཛད་པའི་རྒྱུ་འགའ་ཞིག་བྱུང་ན་འཛད་ཅིང་། བྱང་ཆུབ་ཏུ་བསྔོས་པའི་དགེ་བ་ནམ་ཡང་མི་འཛད་ཅིང༌།རང་ཉིད་གཅིག་པུའི་དོན་དུ་ཁམས་གསུམ་གྱི་བདེ་འབྲས་དང་ཐེག་པ་དམན་པར་མི་བསྔོ་སྟེ། སེམས་ཅན་ཐམས་ཅད་ཀྱི་དོན་དུ་བླ་ན་མེད་པའི་བྱང་ཆུབ་ཏུ་བསྔོ་བ་གལ་ཆེ། བསྔོ་བའི་དབང་པོ་རྒྱལ་བ་སྲས་དང་བཅས་པ་བཞུགས་པར་བསམས་ལ། བསྔོ་བྱ་བསྔོ་བྱེད་ལ་སོགས་པའི་ཆོས་ཐམས་ཅད་མི་དམིགས་བཞིན་དུ་བསྔོ།བསྔོ་བཞིན་དུ་མི་དམིགས་པར་ཤེས་དགོས། དེ་ལྟར་མི་ཤེས་ན་ཡང་འོ་སྐོལ་སོ་སོ་སྐྱེ་བོ་མོས་པས་སྤྱོད་པ་ཡིན་པས། འཇམ་དབྱངས་དང་ཀུན་ཏུ་བཟང་པོ་ལ་སོགས་པས་ཇི་ལྟར་བསྔོས་པ་བཞིན་དུ་བདག་གིས་ཀྱང་བསྔོ་སྙམ་པ་བྱས་ཆོག་གསུང༌། 19/23 མདུན་ངོས། 上一页 17 18 19 20 21 22 下一页 尾页 |
