ད་སྔ་གཟིགས་བཞིན་པ།  མདུན་ངོས། > མི་སྣ་མཚམས་སྦྱོར། > མཁས་བའི་ཁྱུ་མཆོག
༄༅། །ལམ་རིམ་བླ་མ་བརྒྱུད་པའི་རྣམ་ཐར་ལས་རྒྱལ་བའི་སྲས་པོ་ཐོགས་མེད་བཟང་པོ་དཔལ་གྱི་རྣམ་ཐར།
སྤེལ་དུས།05-16  ཡོང་ཁུངས། ཀྲུང་གོའི་བོད་ཀྱི་སློབ་གསོ་དྲ་བ།  རྩོམ་པ་པོ། ཡོངས་འཛིན་ཡེ་ཤེས་རྒྱལ་མཚན།
སྟོང་པ་ཉིད་དང་སྙིང་རྗེ་ཆེན་པོའི་རྦ་ཀློང་ཆེན་པོ་འཁྲུགས་ནས་དོན་གཉིས་ལྷུན་གྲུབ་ཀྱི་རྒྱ་མཚོ་ཆེན་པོར་ཕྱིན་ཏོ།   །རྒྱལ་སྲས་བདག་ཉིད་ཆེན་པོ་འདིས་ལམ་མ་ནོར་བར་སྟོན་པའི་བླ་མ་ལ་ཡིད་བཞིན་གྱི་ནོར་བུ་དང་སངས་རྒྱས་དངོས་ཀྱི་མོས་གུས་བཅོས་མ་མིན་པ་ཐོབ་སྟེ། མཁན་ཆེན་རིན་པོ་ཆེ་དང་མཇལ་ཙ་ན།གནས་བརྟན་ཆེན་པོ་ཞིག་དང་མཇལ་བའི་སྣང་བ་ཡོང་གིན་འདུག་གསུང༌། ཇོ་བོ་རྗེ་བླ་མ་གསེར་གླིང་པའི་མཚན་བརྗོད་པའི་ཚེ།ཕྱག་ཐལ་མོ་སྦྱོར་སྤྱན་ཆབ་འདོན་པ་བཞིན་དུ། མཁན་ཆེན་རིན་པོ་ཆེའི་མཚན་བརྗོད་པ་ན་ཕྱག་ཐལ་མོ་སྤྱར་སྤྱན་ཆབ་ཉིལ་མཛད་ནས། ངའི་བླ་མ་དེའི་ཐུགས་རྗེ་དེ་ལྟ་བུ་གཞན་ལ་རང་མེད་གསུང་ནས་གཙུག་གི་ནོར་བུ་ལྟར་འཛིན་ཏོ། །གཞན་ཡང་བྱང་སེམས་བསོད་ནམས་གྲགས་པ་ལ། སྐྱིད་སྡུག་ལམ་ཁྱེར།དོན་ཞགས་ཀྱི་སྐོར།   སྨན་བླའི་རྗེས་གནང་དང་མདོ་ཆོག འདུལ་བ་མདོ་རྩ།   རི་ཁྲོད་ལོ་མ་གྱོན་མ་དང་འོད་ཟེར་ཅན་གྱི་གཟུངས།ཇོ་བོ་རྗེས་མཛད་པའི་སེམས་བསྐྱེད་ཆོ་ག ཛེ་ཏ་རིས་མཛད་པ་ལ་སོགས་པའི་ཆོས་ཆུང་བརྒྱ་རྩ། རིགས་གཏད་སོགས་སྐྱེར་སྒང་པའི་ཆོས་སྐོར་རྣམས་ཞོར་ཉན་མཛད་དོ།   །དང་པོར་རིགས་པའི་གནས་ལྔ་ལ་མཁས་པར་སྦྱངས་ཤིང༌།   བར་དུ་རྣམ་པ་ཐམས་ཅད་པའི་མཆོག་དང་ལྡན་པའི་སྟོང་པ་ཉིད་དང༌།   དམིགས་པ་མེད་པའི་སྙིང་རྗེ་ཆེན་པོ་གཉིས་ལ་གོམས་པར་བྱས་པས་མཆོག་གི་དངོས་གྲུབ་བརྙེས་ནས་འགྲོ་བའི་དོན་རྒྱུན་ཆད་མེད་པར་མཛད་པ།   རྡོ་རྗེ་འཆང་ཆེན་པོའི་ངོ་བོར་གྱུར་པ་རིན་པོ་ཆེ་ཤེས་རབ་འབུམ་པ་ལ་དུས་འཁོར་གྱི་དབང་དང་སྦྱོར་བ་ཡན་ལག་དྲུག་གི་ཁྲིད་སོགས་སྔགས་ཀྱི་ཟབ་ཆོས་མང་དུ་གསན་ཞིང་ལྷག་པར་དུས་གསུམ་སངས་རྒྱས་ཐམས་ཅད་ཀྱི་འགྲོད་པ་གཅིག་པའི་ལམ་བྱང་ཆུབ་སེམས་དཔའ་ཐམས་ཅད་ཀྱི་ཐུགས་དམ་གྱི་མཐིལ་བྱང་ཆུབ་ཀྱི་སེམས་རིན་པོ་ཆེ་ནམ་པ་གཉིས་ཞུ་བར་མཛད་པས་དད་གུས་བླ་ལྷག་ཏུ་མཛད་ཅིང༌།   ཐུགས་རྗེ་ཆེན་པོ་ཐུགས་རྒྱུད་ལ་འཁྲུངས་ངེས་ཤེས་པ་ནི་རིན་པོ་ཆེ་ཤེས་རབ་འབུམ་པ་དེ་ཡིན་གསུངས་ནས་ཕྱག་ཐུགས་ཀར་ཐལ་མོ་སྦྱར་ནས་སྤྱན་ཆབ་ཉིལ་ཉིལ་མཛད་དོ།    །ཡང་རིན་པོ་ཆེ་ཤེས་རབ་འབུམ་པས་རྒྱལ་སྲས་བདག་ཉིད་ཆེན་པོ་འདི་ལ་དུས་ལན་ཅིག་ཆེད་ཀྱིས་ཤོག་གསུང་སྟེ།   སྙན་ནས་སྙན་དུ་བརྒྱུད། ཐུགས་ནས་ཐུགས་སུ་བརྒྱུད། གྲུབ་ཐོབ་ཀྱི་ཟམ་མ་ཆད།   བྱིན་རླབས་ཀྱི་ན་བུན་མ་ཡལ་བ།སྡིག་པོ་ཆེ་བཙན་ཐབས་སུ་འཚང་རྒྱ་བར་ནུས་ཤིང༌།རབ་ཚེ་འདི།   འབྲིང་བར་དོ། ཐ་མ་ཡང་སྐྱེ་བ་བདུན་ནམ་བཅུ་དྲུག་ན་འཚང་རྒྱ་བའི་གདམས་ངག་མཁའ་འགྲོའི་ཁ་རླངས་ཐུལ་ལེ་བའི་ཆོས་ཐུགས་རྗེ་ཆེན་པོའི་དམར་ཁྲིད་དང༌།   ཕྱག་རྒྱ་ཆེན་པོ་ལྷན་ཅིག་སྐྱེས་སྦྱོར།   རྟེན་འབྲེལ་སྙིང་པོ་རྣམས་ཀྱི་ཁྲིད།དབང་མདོར་བསྟན།   སྨྱུང་གནས་ཀྱི་སྐོར་རྣམས་གནང་སྟེ། འགྲོ་དོན་རྒྱ་ཆེན་པོ་འབྱུང་བའི་རྟེན་འབྲེལ་བསྒྲིག་པར་མཛད་དོ།   །དེ་ནས་རྒྱལ་སྲས་བདག་ཉིད་ཆེན་པོ་འདིས།   མཛོད་ལས། ཚུལ་གནས་ཐོས་དང་བསམ་ལྡན་པས། ། སྒོམ་པ་ལ་ནི་རབ་ཏུ་སྦྱོར།།ཞེས་གསུངས་པ་ལྟར། མདོ་སྔགས་ཡོངས་སུ་རྫོགས་པའི་ལམ་གྱི་གནད་ཀུན་ལ་ཐོས་བསམ་གྱིས་སྒྲོ་འདོགས་ཆོད་པར་མཛད་ནས་སྔོན་བྱོན་དམ་པའི་རྣམ་ཐར་ལྟར་དབེན་པའི་གནས་སུ་སྒྲུབ་པ་རྩེ་གཅིག་ཏུ་མཛད་བཞེད་ནས་བོ་དོང་ཨེའི་རྟ་རའི་གདན་ས་སེམས་དཔའ་ཆེན་པོ་རང་གི་བུ་ཆེན་སློབ་དཔོན་རྒྱལ་མཚན་སེང་གེ་ལ་གཏད་ནས་བཤད་ཉན་མཛད་ཀྱིན་ཡོད་པའི་སྐབས་སུ།   འཇམ་དཔལ་དབྱངས་དོན་ཡོད་རྒྱལ་མཚན་སྐུ་མཆེད་ཡུམ་དང་བཅས་པ་རྣམས་ཀྱིས།    ཨེའི་ཆོས་དཔོན་མཛད་པར་ཞུ་བ་གསོལ་བས།   ངས་ཆོས་དཔོན་བཙལ་ཡོང་གི་གསུང་ནས་ས་སྐྱར་བྱོན་ཏེ།དཔང་ལོ་ཙཱ་བ་བློ་གྲོས་བརྟན་པ་ལ་ཨེའི་ཆོས་དཔོན་ལ་འབྱོན་པར་ཞུ་ཕུལ་བས་དཔང་ལོའི་ཞལ་ནས།   གུ་རུ་ཐོགས་མེད།ཐོས་པའི་གཏམ་ལ་སྙན།   ངའི་བླ་མ་གཡག་སྡེ་བ་སེང་གེ་རྒྱལ་མཚན་གྱིས་ཀྱང་མ་ཐོབ་པའི་གདན་ས་ཡིན་སང་རང་འགྲོ་གསུང་ནས་མཉེས།   དེ་ནས་དཔང་ལོ་ཨེར་གདན་དྲངས་ནས་རྒྱལ་སྲས་འདིས་ས་སྡེ་ལ་སོགས་པའི་ཕྱག་དཔེ་རྣམས་དཔང་ལོ་ལ་ཕུལ་ནས།   དབེན་པ་བསྟེན་པ་ལ་ཐུགས་ཕྱོགས་ཏེ། ཉིད་ཀྱི་ཞལ་ནས།འདུ་འཛི་མི་གཙང་བ་ལྟར་བརྒྱང་བསྲིངས་ནས།   །རང་གཞན་དོན་དུ་རྟག་ཏུ་བསམ་གཏན་ལ། །རབ་ཏུ་བརྩོན་པར་འདོད་པའི་སྐྱེ་བོ་ཡིས།   །ཕྱི་དང་ནང་གི་དབེན་པ་ཐོབ་པར་ཤོག   །ཅེས་དང༌། ཀྱེ་ཀྱེ་ཉོན་ཅིག་གྲོགས་པོ་དམ་པ་ཀུན། ། ཀུན་ཀྱང་གཏན་གྱི་བདེ་བ་ཐོབ་འདོད་ན།   །ན་རྒ་འཆི་དང་སྐྱེ་བའི་སྡུག་བསྔལ་བསམ། །བསམ་པ་ཐེག་པས་སྒོ་གསུམ་དགེ་ལ་འབད། ། འབད་ཀྱང་དོན་ཆུང་འཇིག་རྟེན་བྱ་བ་སྤངས། །སྐྱེས་བུའི་ཚེ་ནི་རི་གཟར་འབབ་ཆུ་འདྲ།   །སྐད་ཅིག་མི་སྡོད་འཆི་བའི་གནས་སུ་སྙོག །ལང་ཚོའི་དཔལ་ནི་མེ་ཏོག་མགུལ་རྒྱན་བཞིན། །ཡུད་ཙམ་ཞིག་གིས་རྙིངས་པར་འགྱུར་བ་ཡིན། །ཚེ་འདི་སྐད་ཅིག་ཅིག་གིས་འཛད་འགྱུར་ཞིང༌། ། བསགས་པའི་ལོངས་སྤྱོད་སྤྱོད་པའི་དབང་མེད་པར། །གློ་བུར་ཉིད་དུ་དུ་མའི་ནང་ནས་བདག།གཅིག་པུར་འགྲོ་ཚེ་ཚེ་འདིའི་མདུན་མས་བསླུ། །བ་སྤུ་གྱེན་ལང་བཤང་གཅི་འཐུར་དུ་རྒྱུག   །བྱད་ཤ་ཕྱིར་སྦོས་མིག་འབྲས་ནང་དུ་བྲོས།   །ཟས་ཀྱི་ཞེན་ལོག་སྐོམ་གྱི་སྲེད་པ་འཕེལ།   །ལུས་སྐྱོད་མི་ནུས་སེམས་ཀྱི་གྱ་གྱུ་ལངས། །དེ་འདྲའི་སྡུག་བསྔལ་དྲག་པོས་ཐེབས་པའི་ཚེ།   །སྨན་པ་མཁས་ཀྱང་བཅོས་པའི་ཐབས་མེད་ཅིང༌། །ཟང་ཟིང་རིམ་གྲོས་བཟློག་པར་མི་ནུས་ན།   །གཉེན་བཤེས་བརྩེ་གདུང་ཆེ་ཡང་ཅི་བྱར་ཡོད།།རིག་རིག་མིག་གིས་ཉེ་དུའི་གདོང་ལ་བལྟ།   །ནོམ་ནོམ་ལག་པས་རང་གི་གོས་ལ་འཇུ། །ངར་ངར་དབུགས་ཀྱི་ཕྲེང་བ་ཆད་ལ་ཉེ།   །འཇིགས་འཇིགས་འདྲ་བའི་གཤིན་རྗེས་ཟིན་པ་ན།   །ཁང་བཟང་རིན་ཆེན་ནང་དུ་གནས་བཅས་ཤིང༌།།དཔའ་བའི་སྐྱེས་བུ་རྣོ་བའི་མཚོན་ཐོགས་པ། །འབུམ་ཕྲག་དག་གིས་བསྲུངས་ཀྱང་གཤིན་རྗེ་ཡི། ། སྐྱེས་བུ་གཅིག་ཀྱང་ཐུབ་པར་མི་འགྱུར་ཞིང༌།   །འཁོར་ལོས་བསྒྱུར་རྒྱལ་གྱིས་ཀྱང་སྐྱོབ་མི་ནུས། །སྟོང་གསུམ་ནོར་གྱིས་བཀང་ཡང་བླུར་མི་རུང༌།   །དེ་བས་ད་ལྟ་ཉིད་ནས་དཀོན་མཆོག་ལ།    །སྐྱབས་སུ་སོང་ལ་འཕགས་པའི་ནོར་བདུན་བཟུང༌།   །ཉོན་མོངས་སྟོབས་ཀྱིས་བསྒྲུབས་པའི་ནོར་རྫས་འདི། །འདི་དང་ཕྱི་མའི་སྡུག་བསྔལ་ཀུན་གྱི་གནས།   །གནས་ངན་ལེན་དང་ཟག་པ་འཕེལ་བའི་གྲོགས།   །གྲོགས་དང་ཉེ་དུ་འབྱེད་པའི་ཕུང་འདྲེ་ཡིན། །ནོར་ནི་སྦྲང་མའི་སྦྲང་རྩི་ཇི་བཞིན་དུ། །རང་གིས་ཏིལ་ཙམ་སྤྱད་པར་མི་ནུས་ཤིང༌།   །གཞན་དག་བསྲུང་བའི་དོན་དུ་ནོར་ཉིད་དང༌།    །བདག་གི་སྲོག་ཀྱང་འཆོར་པར་འགྱུར་བ་ཡིན།   །སྟོང་གསུམ་ནོར་ལ་དབང་བསྒྱུར་རྒྱལ་པོ་ཡང༌། །
རྒྱབ་སྐྱོར།
返回首页
གཙོ་ངོས།
པར་ལྡན་རྩོམ་ཡིག
ཉེ་ལམ་གསར་བརྗེས།
ཀློག་མཁན་མང་ཤོས།
 
Copyright © 2005 - 2018 Teducn.com
phone:18997245213 QQ:89457590
དྲ་ཚིགས་འདིའི་པར་དབང་ཡོད་ཚད་ཀྲུང་གོའི་བོད་ཀྱི་སློབ་གསོ་དྲ་བར་དབང་།
ཡིག་ཟམ། gangjian_xn@hotmail.com
འབྲེལ་གཏུགས་ཁ་པར། ༡༨༩༩༧༢༤༥༢༡༣青ICP备18000196号