ད་སྔ་གཟིགས་བཞིན་པ།  མདུན་ངོས། > མི་སྣ་མཚམས་སྦྱོར། > མཁས་བའི་ཁྱུ་མཆོག
༄༅། །ལམ་རིམ་བླ་མ་བརྒྱུད་པའི་རྣམ་ཐར་ལས་རྒྱལ་བའི་སྲས་པོ་ཐོགས་མེད་བཟང་པོ་དཔལ་གྱི་རྣམ་ཐར།
སྤེལ་དུས།05-16  ཡོང་ཁུངས། ཀྲུང་གོའི་བོད་ཀྱི་སློབ་གསོ་དྲ་བ།  རྩོམ་པ་པོ། ཡོངས་འཛིན་ཡེ་ཤེས་རྒྱལ་མཚན།
འཇིག་རྟེན་འདི་ནས་ཕྱི་མར་འགྲོ་བའི་ཚེ།   །སྒྲེན་མོ་ལག་པ་སྟོང་པར་འགྲོ་འགྱུར་ན། །ཟང་ཟིང་ནོར་རྫས་སྒྲུབ་པ་མ་འཁྲུལ་ལམ།   །ནམ་ཡང་མི་འཛད་གཏན་གྱི་བདེ་བའི་རྒྱུ།   །དད་དང་ཚུལ་ཁྲིམས་ཐོས་དང་གཏོང་བ་དང༌།   ངོ་ཚ་ཤེས་དང་ཁྲེལ་ཡོད་ཤེས་རབ་སྟེ། །བདེ་བར་འདོད་ན་ནོར་བདུན་འདི་དག་ཟུངས།།ཤེས་ལྡན་རྣམས་ཀྱིས་སྐྱེས་བུ་དམ་པ་སྟེན།། བསྟེན་ཅིང་འགྲོགས་ན་ཉོན་མོངས་ནད་སྐྱེ་བ།   །སྐྱེ་བོ་དམན་པ་འདི་དག་སྦྲུལ་གདུག་དང༌།   །དུག་དང་འདྲེས་པའི་ཁ་ཟས་བཞིན་དུ་སྤོངས། །གཡོ་སྒྱུ་དྲུག་ཅུ་རྩ་བཞིའི་ཞགས་པ་ཡིས།   །ཆགས་ལྡན་སྐྱེས་བུ་ཤིན་ཏུ་དམ་བཅིངས་ནས།  །ཐར་པའི་སྲོག་རྩ་གཅོད་པར་བྱེད་པ་ཡི།། བུད་མེད་དག་ལ་སུ་ཞིག་ཆགས་པར་བྱེད།  །འབྱོར་པའི་ཚེ་ན་བྲོས་ཀྱང་རྗེས་སུ་སྙོག །རྒུད་པའི་ཚེ་ན་དྲུང་དུ་བསྙེགས་ཀྱང་འབྲོས། །བུ་ཡིས་རང་གི་ཕ་ཡང་གསོད་བྱེད་ན། །ཉེ་དུ་རྣམས་ལ་སུ་ཞིག་ཡིད་རྟོན་བྱེད།   །མངོན་དུ་གྱུར་ན་དགའ་བའི་ཚུལ་སྟོན་ཅིང༌། །ལྐོག་ཏུ་གྱུར་ན་མི་སྙན་སྣ་ཚོགས་སྒྲོག །ཕན་བཏགས་ལན་དུ་གནོད་པ་སྐྱེལ་བ་ཡི། །བྱིས་པའི་གྲོགས་པོ་མཛའ་ཡང་ངེས་པར་བསླུ། །དེས་ན་འཇིག་རྟེན་ཆགས་པ་རྣམ་པར་སྤང༌།   །སྤང་བྱ་བག་ཆགས་བཅས་པ་མ་ལུས་པ།   །ལུས་པ་མེད་པར་སྤངས་པ་འགྲོ་བའི་སྐྱབས།   །སྐྱབས་མཆོག་གསུམ་པོ་གུས་པའི་ཡིད་ཀྱིས་སྟེན།   །འདུས་བྱས་མི་རྟག་རྟག་པའི་སྐབས་མེད་ཅིང༌།   །ཟག་བཅས་མི་བདེ་བདེ་བར་འཛིན་པ་འཁྲུལ། ། མྱང་འདས་རབ་ཞི་ཞི་བའི་ལམ་འདོད་ན།    །ཆོས་རྣམས་བདག་མེད་མེད་ཡོད་མཐའ་བྲལ་སྒོམས།   །ལས་ངན་རྒྱ་མཚོ་རྐྱེན་ངན་རྦ་རླབས་ཅན། །སྡུག་བསྔལ་སྣ་ཚོགས་ཆུ་བོའི་རྒྱུན་འབབ་ཅིང༌། །སྐྱེ་བོ་ངན་པའི་ཆུ་སྲིན་རྟག་རྒྱུ་བའི།   །གྲོང་གི་མཚོ་ལ་ཆགས་པར་མ་བྱེད་པར། ། རང་བཞིན་ཉམས་དགའ་གཞན་གྱིས་འཚེ་བ་མེད།  །ཆུ་དང་འོ་མ་འབྲས་པའི་འབྱོར་པ་མོད། །ཆགས་དང་སྡང་བའི་གཏམ་ཡང་མི་ཐོས་པའི།   །དབེན་པའི་ནགས་ཚལ་དག་ཏུ་གནས་པར་གྱིས། །བུང་བ་དག་ནི་ཡིད་འོང་གླུ་ལེན་ཅིང༌།  །རྨ་བྱའི་ཚོགས་རྣམས་མཛེས་པའི་གར་སྟབས་བསྒྱུར། །ལྗོན་ཤིང་འགའ་ཞིག་ཡལ་གའི་བསིལ་ཡབ་གཡོབ།    ། འགའ་ཞིག་འབྲས་བུ་སྨིན་པའི་མེ་ཏོག་འཐོར།   །ཡན་ལག་བརྒྱད་དང་ལྡན་པའི་ཆུ་བོའི་རྒྱུན།    །ལྷུང་ལྷུང་སྙན་པའི་སྒྲ་སྐད་སྒྲོགས་བྱེད་ཅིང༌།   །ལྦུ་བའི་ཕྲེང་བས་ཀུན་ནས་མཛེས་པར་སྤྲས།   །ཆུ་ཐིགས་ཟེགས་མའི་མེ་ཏོག་ཕྱོགས་བཅུར་འཐོར།   །དེ་ལྟར་དབེན་ཞིང་ཉམས་དགའི་གནས་མཆོག་ཏུ། །མཆོག་ཏུ་ཟབ་མོའི་མན་ངག་རབ་སྟོན་པ། ། སྟོན་པ་གཉིས་པ་ལྟ་བུའི་བླ་མ་ལ། །མ་ལ་བུ་བཞིན་གུས་པས་རིམ་གྲོ་བྱ། །དེ་ཡིས་གསུངས་པའི་དམ་ཆོས་འོ་མའི་རྒྱུན། །རྟོགས་པའི་ལུས་སྟོབས་འཕེལ་བར་བྱེད་པ་དེ།  །ཉིན་དང་མཚན་དུ་སྐད་ཅིག་མ་ཡེངས་པར།   །ཉམས་སུ་བླང་ཞིང་འདི་ལྟར་སྤྱད་པར་བྱ།    །ཐབས་ཀྱི་གྲུ་ཆེན་ཤེས་རབ་ཟག་ལྷན་ཅན།  །བདག་གིས་བཟུང་སྟེ་འཁོར་བའི་རྒྱ་མཚོ་ལས། །སེམས་ཅན་ཐམས་ཅད་བསྒྲལ་བར་བྱ་སྙམ་པའི།   །བྱང་ཆུབ་སེམས་མཆོག་ཆོས་ཀྱི་རྩ་བ་ཡིན།    །ཚེ་འདིར་ལན་དང་ཕྱི་མར་རྣམ་སྨིན་ལ།   །རེ་བ་མེད་པའི་སྦྱིན་པ་ཐུབ་པས་བསྔགས། །ཁྲིམས་ནི་ཡོན་ཏན་ཀུན་གྱི་གཞི་ཡིན་པས། །གཞན་ལ་གནོད་པ་དུག་བཞིན་སྤང་བར་གྱིས།    །ཁོང་ཁྲོའི་དགྲ་ཡིས་འདི་ཕྱིའི་དཔལ་འཕྲོག་པས།   ། བཟོད་པའི་དམག་དཔུང་ཆེན་པོ་ཤིན་ཏུ་གཅེས།   །ལེ་ལོས་རང་གཞན་དོན་གཉིས་མི་འགྲུབ་པས།   །ལས་གཞན་སྤངས་ཏེ་དགེ་ལ་འབད་པར་བྱ།   །བསམ་གཏན་མེད་པར་ཆོས་ཉིད་མི་མཐོང་བས།   །རྣམ་རྟོག་མཚན་མ་མེད་པའི་ཏིང་འཛིན་སྒོམས།   །ཤེས་རབ་མེད་པར་ཐར་ལམ་མི་བགྲོད་པས། །བདེན་གཉིས་ཟབ་མོའི་དོན་ལ་མཁས་པར་གྱིས། ། བདག་དང་གཞན་གྱི་དུས་གསུམ་དགེ་བ་རྣམས།   །སྲིད་གསུམ་འགྲོ་བས་བྱང་ཆུབ་ཐོབ་བྱའི་ཕྱིར།   །འཁོར་གསུམ་ཡོངས་སུ་དག་པའི་ཤེས་རབ་ཀྱིས།   །སྐུ་གསུམ་མངོན་གྱུར་བྱང་ཆུབ་ཆེན་པོར་བསྔོ།  །ཞེས་གསུངས་ནས་དབེན་པའི་གནས་མདོ་སྡེ་རྒྱན་ལས་ཇི་ལྟར་གསུངས་པ་དང་མཐུན་པ་རང་བཞིན་གྱིས་དབེན་ལ་འདུག་ན་ཉམས་དགའ་ཞིང་ཏིང་ངེ་འཛིན་ངང་གིས་འཕེལ་བ།  མེ་ཏོག་རྣམ་པ་སྣ་ཚོགས་སྐྱེ་བ་བྱ་རྣམ་པ་སྣ་ཚོགས་སྒྲ་སྙན་པ་འབྱིན་པ། རྩྭ་དང་ལོ་མ་དང་འབྲས་བུས་བརྒྱན་པའི་ཤིང་ལྗོན་པས་མཛེས་པ།   མདུན་ན་ཆུ་བོ་ཆེན་པོ་བཞིའི་ཡ་གྱལ་གཙང་ཆབ་སྒྲ་སྙན་པོ་ལྷུང་ལྷུང་ལྟར་འབབ་པ།    དེའི་ཉེ་འཁོར་ན་བཻ་ཌྰུརྱ་ལྟ་བུའི་ནེའི་གསིང་སྔོན་པོ་ལ། མེ་ཏོག་ཁ་དོག་སྣ་ཚོགས་པ་དག་གིས་ཚོམ་བུ་བཀོད་པ་བཞིན་དུ་བརྒྱན་པ།མདུན་ན་ཐང་ཆེན་པོ་རྒྱལ་ཐང་ཞེས་བྱ་བ་གསེར་གྱི་མཎྜལ་ལ་གཡུའི་ཚོམ་བུ་བཀོད་པ་ལྟ་བུས་མཛེས་པ། འཚོ་བ་རྙེད་སླ་ཞིང་ཆོམ་རྐུན་དང་གཅན་གཟན་གྱི་འཇིགས་པ་མེད་པ། གངས་རི་དཔལ་དང་ལྡན་པས་བསྐོར་བའི་དབུས།   གྲུབ་ཆེན་བརྒྱུད་མར་བྱོན་པའི་གནས་མཆོག་རི་བོ་པོ་ཏ་ལ་དང་ཚུལ་མཚུངས་པར་གྱུར་པ། དངུལ་ཆུའི་ཆོས་རྫོང་དུ་དགུང་ལོ་ཞེ་གསུམ་པ་ལ་བྱོན་ནས་སྐུ་མཚམས་བཅད་དེ།   མཐུན་རྐྱེན་གྱི་ཞབས་ཏོག་སློབ་དཔོན་བསོད་ནམས་བརྟན་གྱི་ཕ་མ་གཉིས་དང༌།   ཕྱུག་མོ་རྣལ་འབྱོར་གྱིས་བསྒྲུབས་ཏེ།ཉེ་གནས་མ་གཏོགས་པ་སུ་ལ་ཡང་མཇལ་ཁ་མེད་ཅིང༌།   དྲག་ཞན་སུ་བྱུང་ཡང་ཕྲད་པར་མི་མཛད་ཅེས་སྒོ་ཡིག་འདི་ལྟར་སྦྱོར་བར་མཛད་དེ།   བླ་མ་དང་དཀོན་མཆོག་གསུམ་ལ་ཕྱག་འཚལ་ལོ་བདག་ལ་ཕྲད་པར་འདོད་པའི་སྐྱེ་བོ་གང༌།   །མི་ཚེ་སྟོན་ཀའི་ཉི་ཐུང་བཞིན་དུ་ཡོང༌།   །འཆི་བདག་ནུབ་རིའི་གྲིབ་སོ་བཞིན་དུ་གཏུགས། །ཡོང་ངེས་གཅིག་པུ་ངེས་པར་འཆི་བ་ཡིན།   །ཕན་ངེས་གཅིག་པུ་དམ་པའི་ཆོས་ལས་མེད།   །དོན་མེད་གླེང་མོས་དགེ་སྦྱོར་གཡེང་མ་བྱེད།   །སྐྱོ་ཤས་སྐྱེས་ན་ལོང་མེད་བློ་སྣ་བསྟུངས།   །ལེ་ལོ་མ་བྱེད་མྱུར་དུ་བརྩོན་འགྲུས་རྩོམས།   
རྒྱབ་སྐྱོར།
返回首页
གཙོ་ངོས།
པར་ལྡན་རྩོམ་ཡིག
ཉེ་ལམ་གསར་བརྗེས།
ཀློག་མཁན་མང་ཤོས།
 
Copyright © 2005 - 2018 Teducn.com
phone:18997245213 QQ:89457590
དྲ་ཚིགས་འདིའི་པར་དབང་ཡོད་ཚད་ཀྲུང་གོའི་བོད་ཀྱི་སློབ་གསོ་དྲ་བར་དབང་།
ཡིག་ཟམ། gangjian_xn@hotmail.com
འབྲེལ་གཏུགས་ཁ་པར། ༡༨༩༩༧༢༤༥༢༡༣青ICP备18000196号