དམ་པའི་ཆོས་དང་ཚེ་འདིའི་མདུན་མ་གཉིས། །མཉམ་དུ་འགྲུབ་པ་སུ་ཡང་ཡོད་མ་ཡིན། །བསྒྲུབ་པར་འདོད་པ་དེ་དག་རང་ཉིད་ཀྱིས། །རང་ཉིད་བརླུ་བ་ཉིད་དུ་ཐེ་ཚོམ་མེད། །ཕྲད་ཀྱང་སྨྲ་རྒྱུ་དེ་ལས་མ་མཆིས་པས། ། སོ་སོའི་གནས་སུ་ལུས་ངག་དགེ་ལ་སྦྱོར། །ཞེས་དང༌། བདག་ནི་སྔོན་གྱི་ལས་འཕྲོ་མི་བཟང་བས། །སྙིགས་མའི་དུས་སུ་མཐའ་འཁོབ་ཡུལ་དུ་སྐྱེས། །སྔོན་ཆད་ལུས་ངག་སེམས་ཀྱི་བྱ་བྱེད་རྣམས། །སྡུག་བསྔལ་འབའ་ཞིག་སྒྲུབ་པའི་ཐབས་སུ་སོང༌། །ད་ནི་དབེན་པའི་ཁང་བུར་རབ་ཞུགས་ཏེ། །ཐག་པ་ཆད་པའི་སོག་ཕོན་ཇི་བཞིན་དུ། །ལུས་གྱི་བྱ་བྱེད་ཐམས་ཅད་ཞོག་ལས་ཐོང༌། །རྒྱུད་གསུམ་ཆད་པའི་པི་ཝཾ་ཇི་བཞིན་དུ། །ངག་གི་བྱ་བྱེད་ཐམས་ཅད་ཞོག་ལས་ཐོང༌།ལྟག་ཆུ་ཆད་པའི་རང་ཐག་ཇི་བཞིན་དུ། །སེམས་ཀྱི་བྱ་བྱེད་ཐམས་ཅད་ཞོག་ལས་ཐོང༌། །གལ་ཏེ་འདི་ལས་འདས་པ་བྱེད་གྱུར་ན། །མ་ཧཱ་ཀཱ་ལས་ཆད་བ་གཅོད་པར་གྱུར། ཅེས་མཁའ་འགྲོ་ཆོས་སྐྱོང་དཔང་དུ་བཙུགས་ཏེ་མི་དང་མི་ཕྲད་ཅིང་ཚེ་འདིའི་སྣང་ཤས་ཕྲ་མོའང་མེད་པར་སྒྲུབ་པ་སྙིང་པོར་མཛད་པའི་དམ་བཅའ་བརྟན་པོས་སྐུ་མཚམས་བཅད་དེ་ཉིན་མཚན་ཐམས་ཅད་དུ་སྟོང་ཉིད་རྟོགས་པའི་ལྟ་བ་དང་སྙིང་རྗེ་ཟུང་དུ་འབྲེལ་བའི་ཏིང་ངེ་འཛིན་གྱིས་དུས་འདའ་བར་མཛད་དོ། །དེ་དུས་ཨེ་ནས་དགེ་བཤེས་རྣམས་ཀྱིས་གདན་འདྲེན་པར་ཕྱིན་ཏེ་ད་དུང་ཆོས་གསུང་བར་ཞུ་འཕྲིན་ཕུལ་བས་མཇལ་ཁ་ཡང་མ་གནང་བར།ཉིད་ཀྱི་ཞལ་ནས།ན་མོ་ལོ་ཀེ་ཤྭ་རཱ་ཡ། དཔག་ཡས་མཁྱེན་བརྩེ་འཕྲིན་ལས་འོད་ཟེར་གྱིས། །གནས་སྐབས་བདེ་དང་གཏན་དུ་ཕན་པའི་ལམ། །འགྲོ་བ་ཀུན་ལ་གསལ་བར་སྟོན་མཛད་པའི། །རྒྱལ་བ་སྲས་དང་བཅས་ལ་ཕྱག་འཚལ་ནས། །བརྩེ་ཡང་གཞན་ཕན་ནུས་མེད་མ་ཎི་བ།།མཆི་མའི་རྒྱུན་དང་སྙིང་རྗེས་གདོང་དང་ཡིད། །རྣམ་པར་བརླན་པར་གྱུར་ནས་རང་ཉིད་ཀྱི། །སློབ་མ་རྣམས་ལ་སྙིང་གཏམ་འདི་སྐད་སྨྲ། །དལ་འབྱོར་རིན་ཆེན་གླིང་དུ་ཆུད་དུས་འདིར། །དམ་ཆོས་ཡིད་བཞིན་ནོར་བུ་མི་ལེན་པར།།དོན་མེད་ཚེ་འདིའི་བྱ་བ་ལྷུར་བླངས་ན། །འགྱོད་ཀྱང་འཕྱིས་པའི་དུས་ཤིག་བྱུང་དོགས་བདོག །དེ་བས་རང་གིས་རང་ཉིད་མ་བསླུ་བར། །ཚུལ་གནས་ཐོས་བསམ་སྒོམ་པའི་སྦྱོར་བ་ཡིས། །དམ་ཆོས་ཚུལ་བཞིན་སྒྲུབས་ལ་དལ་འབྱོར་འདི།།ཐོབ་པ་དོན་ཡོད་མཛོད་ཅིག་ཤེས་ལྡན་རྣམས། ། རྒན་གཞོན་བར་མ་གོ་རིམ་མ་ངེས་པར། །འཆི་སྙམ་མེད་པར་གློ་བུར་འཆི་བའི་ཚུལ། །མཐོང་ཡང་རང་ཉིད་འཆི་སྙམ་མི་སེམས་པ། །ནང་ན་བློ་གདེང་ཅི་ཡོད་ལེགས་པར་སོམས། །དེས་ན་རྙེད་བཀུར་གྲགས་པ་ལ་སོགས་པ། །ཚེ་འདིའི་ཆེ་ཐབས་མ་སྒྲུབ་ཕ་རོལ་ཏུ། །ཕན་པའི་དམ་ཆོས་བསྒྲུབས་ཏེ་ཕྱི་མ་རུ། འགྲོ་བའི་ཚེ་ན་གདེང་དང་ལྡན་པར་མཛོད།། སྡུག་བསྔལ་མི་འདོད་བདེ་ལ་རབ་སྲེད་ཅིང༌། །ལས་འབྲས་བསླུ་བ་མེད་པར་ཤེས་བཞིན་དུ། །སྡིག་སྤྱོད་དགེ་བ་མི་སྒྲུབ་སྐྱེས་བུ་དེ། །མཁས་པ་ཡིན་ན་དེ་བས་བླུན་པ་སུ། །དེས་ན་ཚེ་འདིར་ཀུན་གྱིས་བརྙས་གྱུར་ཅིང༌། །ཟས་སྐོམ་ལ་སོགས་མེད་པར་ཤི་ཡང་བླ། །མི་དགེ་སྤངས་ཏེ་རྒྱུན་དུ་དགེ་བའི་ལས། །སྤྱོད་ན་མཁས་པ་ཡིན་ནོ་ཤེས་ལྡན་རྣམས། ། བླུན་པོ་ཡི་དྭགས་ལ་ཡང་སྐྱབས་འགྲོ་ཞིང༌། །བརྩེ་མེད་སྡིག་ཅན་མི་ལ་སྐྱབས་འགྲོ་མོད། །དེ་དག་མཁས་པ་སྙིང་རྗེ་ཅན་རྣམས་ཀྱི། ། སྐྱབས་གནས་མ་ཡིན་སྙིང་རྗེའི་ཡུལ་ཉིད་ཡིན། །དེ་བས་མཁྱེན་བརྩེ་ནུས་ལྡན་དཀོན་མཆོག་ལ། །བློ་ལྟོས་གཏོད་ལ་འཕྲལ་གྱི་བདེ་སྡུག་རྐྱེན། ། གང་བྱུང་བྱིན་རླབས་ཡིན་པར་ཤེས་པར་གྱིས། །ཡུན་དུ་ཕན་པར་འགྱུར་བ་གདོན་མི་ཟ། །ཉོན་མོངས་ཀྱིས་བསྐྱེད་ལས་ཀྱི་བུད་ཤིང་ལ། །སྡུག་བསྔལ་གསུམ་གྱི་མེ་ལྕེ་རབ་འབར་བའི། །འཁོར་བ་བདེ་བར་སེམས་པ་ཕྱེ་མ་ལེབས། །མར་མེའི་གཟུགས་ལ་དགའ་བས་རྒྱུག་དང་མཚུངས། །དེས་ན་འཁོར་བ་སྡུག་བསྔལ་རང་བཞིན་དུ། ། ཤེས་ནས་དེ་རྒྱུ་ལས་དང་ཉོན་མོངས་རྣམས། །སྤངས་ཏེ་མྱང་འདས་ཐོབ་པར་བྱ་བའི་ཕྱིར། །ཐར་པའི་ལམ་ལ་རབ་ཏུ་འབད་པར་མཛོད། །བདེ་བ་འདོད་དང་སྡུག་བསྔལ་མི་འདོད་པར། །བདག་དང་སེམས་ཅན་མཚུངས་པར་རྟོགས་བཞིན་དུ། །བདག་གི་དོན་དུ་གཞན་ལ་གནོད་བྱེད་པའི། །མི་དེ་མི་ཡི་གཟུགས་ཅན་དུད་འགྲོ་ཡིན། །གང་གིས་སྔོན་ཆད་འཁོར་བར་ལན་མང་དུ། །བྱམས་པའི་ཤུགས་ཀྱིས་སྡུག་བསྔལ་ཁུར་བླངས་ཏེ། །ཕན་བདེ་སྒྲུབ་པའི་མར་གྱུར་འགྲོ་རྣམས་ལ། །གནོད་བྱེད་ཆོས་པ་ཡིན་ན་ཆོས་མེད་སུ། །གང་གིས་རང་གི་བདེ་བ་ཡལ་བོར་ནས། །ཡུ་བུའི་དོན་དུ་སྡུག་བསྔལ་ཁུར་བླངས་པའི། །སེམས་ཅན་ཚོགས་འདི་བློ་ཡིས་ཡལ་བོར་ན། །ཐེག་ཆེན་དམ་ཆོས་ཐོས་པའི་དགོས་པ་ཅི། །དེས་ན་མཐའ་ཡས་སེམས་ཅན་བསྒྲལ་བྱའི་ཕྱིར། །བླ་མེད་བྱང་ཆུབ་མཆོག་ཏུ་སེམས་བསྐྱེད་དེ། །རང་དོན་སྤངས་ཏེ་དངོས་སམ་བརྒྱུད་ནས་ཀྱང༌། །གཞན་དོན་སྒྲུབ་དེ་སྐྱེས་བུ་མཆོག་ཡིན་ནོ། །གཞན་ལ་མི་ཕན་སྲེད་ཟད་བདེ་བ་ཡང༌། །དམྱལ་བའི་མེ་ལྟར་མཐོང་ནས་རབ་སྤོང་ཞིང༌། །གཞན་ལ་ཕན་ན་མནར་མེད་མེ་ནང་དུའང༌། །རབ་དགས་འཇུག་པ་རྣམས་ཀྱི་རྗེས་སུ་སློབས། ། སྣང་བ་ཐམས་ཅད་རྨི་ལམ་སྒྱུ་མ་བཞིན། །སྣང་ཙམ་ཉིད་ནས་རང་་རང་ངོ་བོས་སྟོང༌། །སྟོང་དང་སྣང་པ་གཅིག་མིན་ཐ་དད་མིན། །རྣམ་པར་བརྟགས་ན་བརྟག་དཔྱད་ཡུལ་ལས་འདས། །ཤེས་བྱའི་གནས་ལུགས་ཅིར་ཡང་མ་གྲུབ་པས། །གང་དུ་བཟུང་ཡང་འཛིན་བྱེད་འཁྲུལ་པ་ཡིན། ། 7/23 མདུན་ངོས། 上一页 5 6 7 8 9 10 下一页 尾页 |