ད་སྔ་གཟིགས་བཞིན་པ།  མདུན་ངོས། > མི་སྣ་མཚམས་སྦྱོར། > མཁས་བའི་ཁྱུ་མཆོག
༄༅། །ལམ་རིམ་བླ་མ་བརྒྱུད་པའི་རྣམ་ཐར་ལས་རྗེ་ཐམས་ཅད་མཁྱེན་པས་བཀའ་གདམས་གཞུང་པའི་ལམ་རིམ་གསན་བརྒྱུད་ལས། བ
སྤེལ་དུས།05-16  ཡོང་ཁུངས། ཀྲུང་གོའི་བོད་ཀྱི་སློབ་གསོ་དྲ་བ།  རྩོམ་པ་པོ། ཡོངས་འཛིན་ཡེ་ཤེས་རྒྱལ་མཚན།
སྨྱུག་རུམ་པ་ཆེན་པོ་གསུམ་སྟེ་འདི་གསུམ་ལ་སྤྱན་སྔའི་སློབ་མ་འགྲན་གྱི་དོ་མེད་གསུམ་ཞེས་གྲགས་སོ།    །བྱ་ཡུལ་པ་ཆེན་པོའི་རྣམ་ཐར་ནི་འཆད་པར་འགྱུར་ལ།    སྟོད་ལུང་པ་ཆེན་པོ་རིན་ཆེན་སྙིང་པོ་ནི། གསེར་ཕུག་ལྕང་མ་ཅན་དུ་ཆུ་ཕོ་སྤྲེའུ་ལ་སྐུ་འཁྲུངས།   དེ་ལྐོག་ཏུ་ཁྱུང་པོ་ཇོ་གསོད་ལས་རབ་ཏུ་བྱུང༌།དེ་ནས་གཞོན་ནུ་ནས་གཙང་དུ་བྱོན་ནས།   བླ་མ་སེང་གེ་སྒྲ་གཅན་འཛིན་བཟང་པོ།པཎྜི་ཏ་འབུམ་ཕྲག་གསུམ་པ་ལ་སོགས་པ་མཁས་པ་མང་པོ་ལ་མདོ་སྔགས་ཀྱི་གསན་སྦྱོང་རྒྱ་ཆེར་མཛད། རྩོད་པ་ཡང་བཟང༌།   དེ་ནས་སྟོད་ལུང་ཐག་མར་དབུས་གཙང་གི་སྟོན་ཆེན་ཐམས་ཅད་འཚོགས་ནས་ཆོས་ཀྱི་བགྲོ་གླེང་འབའ་ཞིག་མཛད་པས་ཁོང་གིས་ཀྱང་གྲྭ་སྐོར་ལ་བྱོན།   རྩོད་པ་མཛད་པས།   གློག་སྐྱ་གཙོ་རྒན་བྱ་བས་ཉན་ནས།   ཁོ་ན་རེ་བོད་དབུས་གཙང་གི་སྟོན་ཆེན་འདི་ཙམ་ཞིག་ཉིན་རེ་བཞིན་འཚོགས་ནས་མར་འཁོར་བ་སྤོང་ལུགས།   ཡར་ཐར་པ་སྒྲུབ་ལུགས་ཀྱི་ཆོས་ཚིག་བཞི་པ་གཅིག་མེད་པར་ཀླད་པ་གས་གས་བ་ལང་དཀར་ཟལ་འཆི་བ་འདི་བྱུར་རེ་ཆེ་ཟེར་བ་སྟོད་ལུང་རིན་ཆེན་སྙིང་པོས་གསན་པས། ཁོང་ཀྱང་དེ་ཙམ་ཞིག་གོ་འདུག་ནས། ང་རྒྱ་གར་དུ་ཆོས་འཚོལ་བ་ལ་འགྲོ་དགོངས་ནས་བྱོན་པ་དང༌།མཁའ་རུ་བའི་གྲྭ་པ་དགེ་སློང་སྣམ་སྦྱར་ཕྲག་པར་བཞག་པ་ཚུལ་ཁྲིམས་ཀྱི་དྲི་བྲོ་བ་ཞིག་དང་མཇལ་ཏེ། ཚེ་འདི་ཡུན་ཐུང་ཤེས་བྱའི་རྣམ་པ་མང༌།    །ཚེ་ཡི་ཚད་ཀྱང་ཇི་ཙམ་མི་ཤེས་པས། ངང་པས་ཆུ་ལས་འོ་མ་ལེན་པ་ལྟར། །རང་གི་འདོད་པ་དང་དུ་བླང་བར་བྱ། །ཞེས་གསུང་བས།   དེ་སུས་མཛད་བྱས་པས་ཇོ་བོའི་གསུང་ཡིན་ཟེར། གང་ནས་བྱོན་བྱས་པས། མཁའ་རུ་དགོན་པ་ནས་འོང་ཟེར། དེ་ནས་མཁའ་རུ་བའི་དྲུང་དུ་བྱོན་ཏེ་སྐྱབས་འགྲོའི་ཆོས་སྐོར་གསུང་བ་གསན།   མཁའ་རུ་བས་ལུང་བསྟན་ནས་ར་སྒྲེང་དུ་རྣལ་འབྱོར་པ་ཆེན་པོའི་སྤྱན་སྔར་བྱོན། ལྟ་བའི་དྲི་བ་མང་པོ་མཛད་པས།   སྔོན་དུ་ཐབས་གོམས་པས་རྒྱུད་སྨིན་དགོས་པ་ཡིན་གསུངས་ནས།ཐོག་མར་སྐྱབས་འགྲོ་དང༌།   བྱམས་སྙིང་རྗེ་ནས་རིམ་གྱིས་ཁྲིད་དེ་ཆོས་མང་དུ་གསན། ལོ་བཅུ་གཅིག་ལོན་དུས་ཇོ་བོ་བོད་དུ་ཕེབས་པ་ལ་ཤམ་ཐབས་ཁྲ་ལེ་ཀྱང་འཇལ་བར་སྣང༌།    སྟོད་ལུང་པ་ཆེན་པོས་ར་སྒྲེང་དུ་རྣལ་འབྱོར་པ་ཆེན་པོའི་སྤྱན་སྔར་བྱོན་པའི་དུས།རྟེན་དགེ་སློང་ཡིན་པ་དང་མི་ཆེ་བའི་དོན་གྱིས་བྲང་ཁང་དེ་རྙེད་པ་དཀའ་ཙམ་ཞིག་བྱུང་བ་ལ། རྣལ་འབྱོར་པ་ཆེན་པོས་སྒྲོལ་སྒོམ་གཞོན་ནུ་སྨོན་ལམ་བྱ་བ་ལ་གནས་ཁང་ལེགས་པོ་ཞིག་ཡོད་དེ། ཁོ་ཁྱེད་ལ་ཉམ་ང་ཟེར་བ་གདའ་གསུངས་པས། སྟོད་ལུང་པ་ས་སྒྲོལ་སྒོམ་གཞོན་ནུ་སྨོན་ལམ་གྱི་སྒོ་གང་ཡིན་དྲིས་ཏེ་ནང་དུ་ཙངས་ཀྱིས་བྱོན་ནས། །སྒྲོལ་སྒོམ་ཁྱོད་ང་ལ་ཉམ་ང་ཟེར་བ་ཉམ་ང་མི་དགོས། ཆུ་ཡང་ང་རང་གིས་ལེན།ཡོས་ཀྱང་ང་རང་གིས་འཐགཕྱེ་སྐྱོ་ཡང་ང་རང་གིས་བསྐོལ།ངའི་མལ་དེ་འདི་ཁོ་ནར་འོས་པ་སྣང་གསུང་ནས་ས་གཅིག་ཏུ་གཟིམ་མལ་མཛད།   དེར་སྒྲོལ་སྒོམ་དད་པ་བཅོས་མིན་སྐྱེས་ནས་སློབ་མར་གྱུར། ལན་ཅིག་རྣལ་འབྱོར་པའི་སྐུ་མདུན་དུ་བྱོན་ཟེར་བ་བྱུང་བས། དེར་བྱོན་ཙ་ན་སྟན་ཐོན་པོ་ཞིག་བཤམས་འདུག་པ་ལ། རྣལ་འབྱོར་པས་ཇོ་བོ་སྟོན་པ་སྟན་ལ་གཤེགས་གསུངས་པས། བདག་འདི་ལ་མི་མཆི་ཞུས་པས། རྣལ་འབྱོར་པའི་ཞལ་ནས། ཇོ་བོ་སྟོན་པ་ད་དུང་མཚན་ཉིད་པའི་སྐྱ་དྲི་མ་སངས་པར་འདུག་གསུང་བས།    ཁོང་གི་ཐུགས་ལ་ང་ས་འདིར་ཐིམ་གྱིས་སོང་ན་རུང་བ་ལ་དགོངས་པ་བྱུང་གསུང༌།རྣལ་འབྱོར་པ་ལོ་བརྒྱད་དང༌། དགོན་པ་བ་ལོ་ལྔ་བསྟེན་པར་གདའ།   དེ་དུས་སྤྱན་སྔ་སྐུ་མཚམས་ལ་བཞུགས་པས་སྤྱན་སྔ་ལ་དད་པ་འཁྲུངས་ཏེ་རྣལ་འབྱོར་པས་ངོ་ཆེན་མཛད་ནས་ཆོས་ཐུན་བཞི་ཚན་གཅིག་ཐོག་མར་གསན།རྣལ་འབྱོར་པ་སྐུ་གཤེགས་ནས་སྤྱན་སྔ་ལ་བརྟེན། གསེར་སྲང་བརྒྱད་བརྒྱ་འབུལ་བའི་དམ་བཅའ་མཛད་པ་ལ།   ཕྱེད་དང་དྲུག་བརྒྱ་ཕྱག་ཏུ་ཐོངས་དུས་སྤྱན་སྔ་སྐུ་གཤེགས་པས།ཕྱེད་དང་སུམ་བརྒྱས་དགོངས་པ་རྫོགས་པའི་དོན་དུ་སྟོད་ལུང་བཙན་གྲོ་དགོན་པ་གཙུག་ལག་ཁང་དང་བཅས་པ་དགུང་ལོ་བདུན་ཅུ་རྩ་གཉིས་པ་ཆུ་མོ་ལུག་ལ་བཞེངས།སྐུ་གསུང་ཐུགས་ཀྱི་རྟེན་སྔ་ཕྱིར་དཔག་ཏུ་མེད་པ་བཞེངས་པའི་གྲགས་ཆེ་བ།   རབ་གནས་ཀྱི་དུས་སྤྱན་སྔ་ལ་ཆོས་གསུངས་པའི་འཇམ་དཔལ་དཔའ་བོའི་སྐུ་ལ་སོགས་པ་རྒྱུད་སྦྱངས་མ་བདུན་དང༌། རྣལ་འབྱོར་པས་རབ་གནས་མཛད་པ་པོ་ཏོའི་གསུང་འབྱོན།མཁའ་རུའི་ལྗང་སྐྱེས། བཙན་གྲོའི་ཆུ་ཁོལ་ཞེས་རྟེན་རྟགས་ཐོན་གསུམ་དུ་གྲགས་པའི་ཆུ་ཁོལ་ཐུབ་པ་སོགས་མང་དུ་བཞེངས།ཁོང་གི་ཞལ་ནས།   སྟོད་ལུང་པའི་བན་དེ་ལ་ཆོས་སྟོན་དྲངས་པ་བས།ལོ་པའི་ཁྱི་ལ་ཟན་བྱིན་པ་བསོད་ནམས་ཆེ་ཞེས་གསུངས་ཏེ། ཕྱོགས་བཅུའི་སངས་རྒྱས་ཐམས་ཅད་མཆོད་པ་བས་བླ་མའི་བ་སྤུའི་བུ་ག་གཅིག་མཆོད་པ་ཕན་ཡོན་ཆེ་བ་གསང་བ་འདུས་པའི་རྒྱུད་སོགས་རྒྱུད་དང་གྲུབ་ཆེན་གྱི་གཞུང་མང་པོ་ལས་འབྱུང་བ་དང༌།བྱང་ཆུབ་ལམ་གྱི་རིམ་པའི་རྩ་བ་བཤེས་གཉེན་བསྟེན་ཚུལ་ལ་ཐུག་པས་འདིའི་ཐད་ནས་རྟེན་འབྲེལ་གྱི་སྒོ་མ་འཕྱུགས་པ་ཞིག་དགོས་ཞེས་འདོམས་པའོ།   །དེ་ལྟར་སྟོད་ལུང་པ་ཆེན་པོས་སྤྱན་སྔ་ལོ་བདུན་བསྟེན་ནས་མཉེས་པ་གསུམ་གྱིས་མཉེས་པར་མཛད།   སྤྱན་དང་མངོན་པར་ཤེས་པ་མངའ། ཡི་དམ་མང་པོའི་ཞལ་གཟིགས།བདེན་གཉིས་ཀྱི་རྟོགས་པ་ཐུགས་ལ་འཁྲུངས།འགྲོ་བའི་དོན་རྒྱ་ཆེན་པོ་མཛད་དེ་དགུང་ལོ་བརྒྱད་ཅུ་རྩ་ལྔ་པ་མེ་ཕོ་སྤྲེའུ་ལོ་མངོན་པར་བྱང་ཆུབ་པའི་ཟླ་བའི་ཚེས་བརྒྱད་ལ་ལམ་དགོན་དུ་སྐུ་གཤེགས་སོ།   །སྤྱན་སྔའི་སློབ་མ་སྨྱུག་རུམ་པ་ཆེན་པོ་ནི།སྤྱན་སྔའི་ཞབས་ལ་བསྙེན་ནས་གདམས་པ་མང་དུ་གསན། ཀླུངས་ཤོད་མདར་སྨྱུག་རུམ་གྱི་དགོན་པ་བཏབ།    ཕྱིས་སྤྱན་སྔ་ཕེབས་ནས་གནས་དེ་རྡོ་རྗེ་གདན་དུ་བྱིན་གྱིས་རློབ་པར་མཛད།རྗེ་སྒམ་པོ་པས་ཀྱང་བླ་མ་འདིའི་ཞབས་ལ་བཏུགས་ཏེ་བཀའ་གདམས་ལམ་རིམ་གསན་ནས་སྐལ་བ་དང་ལྡན་པ་མཐའ་ཡས་པ་ལ་འདོམས་པར་མཛད་དོ།   །དགེ་བཤེས་སྨྱུག་རུམ་པ་འདི་ནི་དུས་སྐབས་ཀུན་ཏུ་རང་གི་རྒྱུད་ལ་བརྟགས་ནས་རང་རྒྱུད་འདུལ་བ་གཙོ་པོར་མཛད་དེ་ཡི་དམ་ལྷའི་བསྙེན་པ་བྱེད་པའི་ཚེ་ཡང་རང་གི་ཉོན་མོངས་འདུལ་བའི་ཐབས་ཁོ་ནར་མཛད་དེ་སྨྱུག་རུམ་པའི་ཞལ་ནས།ཉོན་མོངས་པ་ཉུག་གིས་བྱུང་ཙ་ན་ལེ་ལོ་མི་བྱ་བར་མོད་ལ་གཉེན་པོས་བཟློགམ་ནུས་ན་ལང་ལ་མཎྜལ་དང་མཆོད་པ་བཤམས་བླ་མ་དང་ཡི་དམ་ལ་ཕུལ་ལ་གསོལ་བ་གདབ།   དེ་ལ་དམིགས་ནས་ཁྲོ་བོའི་བཟླས་པ་བྱས་པས་ཉལ་གྱིས་འགྲོ་གསུང་ངོ༌། །དེས་ན་བྱང་ཆུབ་ལམ་གྱི་རིམ་པ་ལ་བློ་སྦྱོང་བར་འདོད་པ་རྣམས་ཀྱིས་བཀའ་གདམས་སྐུ་མཆེད་གསུམ་གྱི་ནང་ནས་སྐུ་ན་གཞོན་པ་འབྲོམ་ཆོས་ཀྱི་རྒྱལ་པོའི་གསང་བའི་མཛོད་འཛིན་པ་སྤྱན་སྔ་བ་ཆེན་པོ་ལ་གསོལ་བ་འདེབས་ཤིང་བདག་ཉིད་ཆེན་པོ་འདིའི་རྣམ་ཐར་ལྟར་དལ་འབྱོར་རྙེད་པར་དཀའ་བ་དང༌། ཚེ་ལ་ལོང་མེད་པའི་ཚུལ་ཡང་ཡང་བསམས་ལ་སྒྲུབ་པ་ལ་ནང་ནས་བསྐུལ་ཏེ་བྱང་ཆུབ་ལམ་གྱི་རིམ་པ་སྒོམ་པ་ལ་བརྩོན་པ་ཆུ་བོའི་རྒྱུན་བཞིན་བྱའོ། །

རྒྱབ་སྐྱོར།
返回首页
གཙོ་ངོས།
པར་ལྡན་རྩོམ་ཡིག
ཉེ་ལམ་གསར་བརྗེས།
ཀློག་མཁན་མང་ཤོས།
 
Copyright © 2005 - 2018 Teducn.com
phone:18997245213 QQ:89457590
དྲ་ཚིགས་འདིའི་པར་དབང་ཡོད་ཚད་ཀྲུང་གོའི་བོད་ཀྱི་སློབ་གསོ་དྲ་བར་དབང་།
ཡིག་ཟམ། gangjian_xn@hotmail.com
འབྲེལ་གཏུགས་ཁ་པར། ༡༨༩༩༧༢༤༥༢༡༣青ICP备18000196号