ད་སྔ་གཟིགས་བཞིན་པ།  མདུན་ངོས། > སྲོལ་རྒྱུན་སློབ་གསོ། > སྲོལ་རྒྱུན་རིག་ཚན།
༄༅། །གྲུབ་མཐའི་རྣམ་བཞག་ཐུབ་བསྟན་ལྷུན་པོའི་མཛེས་རྒྱན་ལས་དག་ཡིག་མཁས་པའི་འབྱུང་གནས་ཞེས་བྱ་བ་ལ་དབུ་མའི་ས
སྤེལ་དུས།05-16  ཡོང་ཁུངས། ཀྲུང་གོའི་བོད་ཀྱི་སློབ་གསོ་དྲ་བ།  རྩོམ་པ་པོ།
དབུ་མ་ལ་སྒྲས་བརྗོད་ཀྱིས་དབྱེ་ན། གཞུང་དང་། ལམ་དང་། འབྲས་བུའི་དབུ་མ་གསུམ་མོ། ། གཞི་བདེན་པ་གཉིས་ལ། ཀུན་རྫོབ་ཀྱི་བདེན་པ་དང་། ཐ་སྙད་བདེན་པ་དང་། ཐབས་ཀྱི་བདེན་པ་དང་། ཚུ་རོལ་གྱི་བདེན་པ་རྣམས་དོན་གཅིག་དོན་དམ་བདེན་པ་དང་། མཆོག་གི་བདེན་པ་དང་། ཐབས་ལས་བྱུང་བའི་བདེན་པ་དང་། ཡང་དག་པའི་བདེན་པ་རྣམས་དོན་གཅིག ཀུན་རྫོབ་བདེན་པ་དང་། ཡང་དག་ཀུན་རྫོབ་དང་། ལོག་པའི་ཀུན་རྫོབ་གཉིས། ཐལ་འགྱུར་པ་ལྟར་ན་ཡང་ལོག་གཉིས་ཐ་སྙད་པའི་ཤེས་ངོ་ཁོ་ནར་འཇོག་གོ། ། ཡང་དག་ནི་འཕྲལ་གྱི་འཁྲུལ་རྒྱུས་མ་བསླད་པའི་ཡུལ་ཡུལ་ཅན་དྲུག་དང་། ལོག་པ་ནི་བསླད་པའོ།། ཀུན་རྫོབ་ལ་སྐད་དོད་ཀྱི་སྟེང་ནས་ཡང་དག་པའི་སྒྲིབ་བྱེད་དང་བརྫུན་པའི་དོན་དུ་བཤད་དོ། ། དོན་དམ་བདེན་པ་ནི། མྱང་འདས་དང་། འགོག་བདེན་ཕྲ་མོ་དང་། སྟོང་ཉིད་དང་། ངོ་བོ་ཉིད་སྐུ་རྣམས་སོ། །ཆོས་ཉིད་དང་། སྟོང་ཉིད་དང་། ཆོས་དབྱིངས་དང་། ཕྱག་རྒྱ་ཆེན་པོ་དང་། ཆོས་རྣམས་ཀྱི་གནས་ལུགས་དང་། རང་བཞིན་དང་། ངོ་བོ་ཉིད་དང་། དེ་ཉིད་དང་། དེ་ཁོ་ན་ཉིད་དང་། དེ་བཞིན་ཉིད་རྣམས་དོན་གཅིག་གོ། །
སྟོང་ཉིད་ལ་དབྱེ་ན། ནང་སྟོང་པ་ཉིད། ཕྱི་སྟོང་པ་ཉིད། ཕྱི་ནང་སྟོང་པ་ཉིད། སྟོང་པ་ཉིད་སྟོང་པ་ཉིད། ཆེན་པོ་སྟོང་པ་ཉིད། དོན་དམ་པ་སྟོང་པ་ཉིད། འདུས་བྱས་སྟོང་པ་ཉིད། འདུས་མ་བྱས་སྟོང་པ་ཉིད། མཐའ་ལས་འདས་པ་སྟོང་པ་ཉིད། ཐོག་མ་དང་ཐ་མ་མེད་པ་སྟོང་པ་ཉིད། དོར་བ་མེད་པ་སྟོང་པ་ཉིད། རང་བཞིན་སྟོང་པ་ཉིད། ཆོས་ཐམས་ཅད་སྟོང་པ་ཉིད། རང་གི་མཚན་ཉིད་སྟོང་པ་ཉིད། མི་དམིགས་པ་སྟོང་པ་ཉིད། དངོས་པོ་མེད་པའི་ངོ་བོ་ཉིད་སྟོང་པ་ཉིད་དེ་བཅུ་དྲུག་གོ། ། དེའི་སྟེང་དུ་དངོས་པོ་སྟོང་པ་ཉིད། དངོས་པོ་མེད་པ་སྟོང་པ་ཉིད། རང་གི་དངོས་པོ་སྟོང་པ་ཉིད། གཞན་གྱི་དངོས་པོ་སྟོང་པ་ཉིད་བཞི་བསྣན་པ་ནི་སྟོང་ཉིད་ཉི་ཤུའོ། ། ཡང་སྒྲས་བརྗོད་ཀྱིས་དབྱེ་ན། སྣང་སྟོང་གཉིས་ཚོགས་མ་ཡིན་དགག་གི་སྟོང་ཉིད་དང་། བདེན་པ་རྣམ་པར་བཅད་ཙམ་གྱི་མེད་དགག་གི་སྟོང་ཉིད་དེ་གཉིས། སྟོང་ཉིད་རྟོགས་པའི་ཤེས་པ་ལ་ཐལ་འགྱུར་པ་ལྟར་ན། ཟག་བཅས་ཟག་མེད་གཉིས། ཟག་བཅས་ལ་ཐོས་བསམ་བསྒོམ་གསུམ་གྱི་རིགས་ཤེས་གསུམ་དང་། དོན་སྤྱིའི་ཚུལ་གྱིས་རྟོགས་པའི་མཉམ་བཞག་ཡེ་ཤེས་དང་། འཕགས་པའི་རྗེས་ཐོབ་ཡེ་ཤེས་རྣམས་སོ། ། ཟག་མེད་ལ་སློབ་པ་འཕགས་པ་གསུམ་གྱི་སྟོང་ཉིད་རྟོགས་པའི་མཉམ་བཞག་ཡེ་ཤེས་དང་། སངས་རྒྱས་ཀྱི་ཡེ་ཤེས་ཏེ་བཞིའོ། ། ཡང་གཉིས་སྣང་དང་བཅས་པ་དང་། གཉིས་སྣང་ནུབ་པའི་ཤེས་པ་གཉིས་སོ། །
དབུ་མ་ཐལ་འགྱུར་པའི་ཐུན་མོང་མ་ཡིན་པའི་ཁྱད་པར་ནི། རང་གི་མཚན་ཉིད་ཐ་སྙད་དུ་ཡང་ཞལ་གྱིས་མི་བཞེས་པ་དང་། བདེན་འཛིན་སོགས་ཉོན་མོངས་ཐམས་ཅད་ལ་ཕྲ་རགས་གཉིས་གཉིས་སུ་འབྱེད་ཚུལ་ཐུན་མོང་མ་ཡིན་པ་དང་། བདག་མེད་ཕྲ་མོ་གཉིས་འདོད་ཚུལ་དང་། རྟོག་པས་བཏགས་པ་ཙམ་རྟེན་འབྲེལ་གྱི་དོན་དུ་འདོད་པ་དང་། ལས་འབྲས་ཀྱི་རྟེན་གཞི་བདག་འཇོག་ཚུལ་ཐུན་མོང་མ་ཡིན་པ་དང་། ཕྱི་དོན་འཇོག་ཚུལ་ཐུན་མོང་མ་ཡིན་པ་དང་། ཀུན་གཞི་དང་རང་རིག་དང་རང་རྒྱུད་ཁས་མི་ལེན་ཚུལ་ཐུན་མོང་མ་ཡིན་པ་དང་། སྒྲིབ་གཉིས་ཀྱི་འཇོག་ཚུལ་དང་སྤོང་ཚུལ་ཐུན་མོང་མ་ཡིན་པ་དང་། ཉན་རང་འཕགས་པ་ལ་ཆོས་རང་བཞིན་མེད་པར་རྟོགས་པས་ཁྱབ་པར་ཁས་ལེན་པ་དང་། སོ་སྐྱེ་ལ་རྣལ་འབྱོར་མངོན་སུམ་ཡོད་པར་ཁས་ལེན་པ་དང་། ཞིག་པ་དངོས་པོར་འདོད་པ་སོགས་དུས་གསུམ་འཇོག་ཚུལ་ཁྱད་པར་བ་དང་། སངས་རྒྱས་ཀྱི་ཤེས་བྱ་མཁྱེན་ཚུལ་ཐུན་མོང་མ་ཡིན་པ་སྟེ་བཅུ་གཉིས་ནི་གཙོ་བོ་ཡིན་ལ་ཁྱད་པར་ཕྲ་མོ་མཐའ་ཡས་སོ། ། དབུ་མ་པའི་ལུགས་མང་དུ་ཡོད་པ་རྣམས་ཀྱི་མིང་གི་རྣམ་གྲངས་ནི་གྲུབ་མཐའ་སྤྱིའི་སྐབས་སུ་བལྟ་བར་བྱ་ལ། འདིའི་ཚད་མ་དང་གཏན་ཚིགས་ལ་མཁོ་བའི་མིང་གི་རྣམས་གྲངས་ནི་གཏན་ཚིགས་རིག་པའི་སྐབས་སུ་བལྟ་བར་བྱའོ། ། དབུ་མའི་གཞུང་གི་བརྗོད་བྱའི་གཙོ་བོ་རྣམས་ཀྱི་མིང་གི་རྣམ་གྲངས་མདོར་བསྡུས་པའོ། །
རྒྱབ་སྐྱོར།
返回首页
གཙོ་ངོས།
པར་ལྡན་རྩོམ་ཡིག
ཉེ་ལམ་གསར་བརྗེས།
ཀློག་མཁན་མང་ཤོས།
 
Copyright © 2005 - 2021 Teducn.com
phone:18997245213 QQ:89457590
དྲ་ཚིགས་འདིའི་པར་དབང་ཡོད་ཚད་བོད་ཀྱི་སློབ་གསོ་དྲ་བར་དབང་།
ཡིག་ཟམ། gangjian_xn@hotmail.com
འབྲེལ་གཏུགས་ཁ་པར། ༡༨༩༩༧༢༤༥༢༡༣青ICP备18000196号