ད་སྔ་གཟིགས་བཞིན་པ།  མདུན་ངོས། > སྲོལ་རྒྱུན་སློབ་གསོ། > སྲོལ་རྒྱུན་རིག་ཚན།
༄༅། །གྲུབ་མཐའི་རྣམ་བཞག་ཐུབ་བསྟན་ལྷུན་པོའི་མཛེས་རྒྱན་ལས་དག་ཡིག་མཁས་པའི་འབྱུང་གནས་ཞེས་བྱ་བ་ལས་གཏན་ཚིགས
སྤེལ་དུས།05-16  ཡོང་ཁུངས། ཀྲུང་གོའི་བོད་ཀྱི་སློབ་གསོ་དྲ་བ།  རྩོམ་པ་པོ།
ལུགས་འདི་པས་མི་འདོད་ཀྱང་གྲུབ་མཐའ་གོང་མ་འགའ་ཞིག་གི་འདོད་ལ།དེ་ཡང་སྒྲ་ནི་མི་རྟག་སྟེ། བྱས་པའི་ཕྱིར།དཔེར་ན་བུམ་པ་བཞིན།བུམ་པ་བྱས་པ་དེ་བཞིན་དུ་སྒྲ་ཡང་བྱས། དེའི་ཕྱིར་སྒྲ་མི་རྟག་ཞེས་པ་སྟེ།དམ་བཅའ།དཔེ།ཕྱོགས་ཆོས།ཉེར་གཏོད།འཇུག་སྡུད་ལྔའོ། །འདི་ལ་ལ་ལར་ཁྱབ་པ་འདྲེན་ནོ། །བསྒྲུབ་དག་གི་ལམ་སྦྱོང་སུན་འབྱིན་ལ།   སུན་འབྱིན་དང་ཐལ་འགྱུར་དོན་གཅིགདཔེར་ན་སྒྲ་ཆོས་ཅན།མ་བྱས་པ་ཡིན་པར་ཐལ།   རྟག་པ་ཡིན་པའི་ཕྱིར། ཞེས་པ་ལྟ་བུའོ༑   ༑
དེ་ལ་བཀོད་ཚོད་ཀྱིས་དབྱེ་ན།ཁྱབ་རྟགས་གཉིས་ཀ་མ་གྲུབ་པ། རྟགས་ཁོ་ན་མ་གྲུབ་པ།ཁྱབ་པ་ཁོ་ན་མ་གྲུབ་པ།ཁྱབ་རྟགས་གཉིས་ཀ་གྲུབ་པ་བཞི། ཕྱི་མ་ལ་རྟགས་ཚད་མས་གྲུབ་ཅིང༌།ཁྱབ་པ་ཁས་བླངས་ཀྱིས་གྲུབ་པ་དང༌།ཁྱབ་པ་ཚད་མས་གྲུབ་ཅིང་རྟགས་ཁས་བླངས་ཀྱིས་གྲུབ་པ། གཉིས་ཀ་ཚད་མས་གྲུབ་པ།གཉིས་ཀ་ཁས་བླངས་ཀྱིས་ཀྱང་གྲུབ་པ་སྟེ།བཞི་རྣམས་སོ། །ཡང་ན་ཐལ་འགྱུར་ཡང་དག་དང༌།ལྟར་སྣང་གཉིས།ཡང་དག་ལ་སྒྲུབ་བྱེད།འཕེན་པ་དང༌། མི་འཕེན་པ་གཉིས།འཕེན་པ་ལ་བཟློག་པ་རང་རིགས་འཕེན་པ་དང༌།གཞན་རིགས་འཕེན་པ་གཉིས། འབྲས་མཚུངས་ཀྱི་ལྟག་ཆོད་ནི་སུན་འབྱིན་ལྟར་སྣང་ངོ༌། །རྒོལ་བའི་རྣམ་བཞག་ལ་སྔ་རྒོལ་ནི།   སྒྲུབ་བྱེད་འགོད་པར་ཁས་ལེན་པའི་གང་ཟག   ཕྱི་རྒོལ་ནི་སུན་འབྱིན་བརྗོད་པར་ཁས་ལེན་པའི་གང་ཟག   དེ་རེ་རེ་ལའང་ཡང་དག་དང་ལྟར་སྣང་གཉིས་གཉིས། དཔང་པོ་ནི་རྒྱལ་ཕམ་ཤན་འབྱེད་པའི་གང་ཟག   དབྱེ་ན། ཤན་འབྱེད་པའི་དཔང་པོ།    རྗེས་སུ་བརྗོད་པའི་དཔང་པོ།   ཚར་གཅོད་པའི་དཔང་པོའོ།།སྔ་རྒོལ་ཚར་གཅོད་པའི་གནས་སུ་གྱུར་པ་ནི།   གྲུབ་གསལ་ཞུགས་པ་དམ་བཅའ་བ།དྲིས་ཀྱང་ལན་མི་འདེབས་པ།མི་འོས་པ་དམ་འཆའ་བ། སྐབས་སུ་མ་བབས་པ་སྒྲུབ་བྱར་བྱེད་པ།ཁས་བླང་བའི་དོན་ལ་སྒྲུབ་བྱེད་མི་དགོད་པ།མ་གྲུབ་པ་མ་ངེས་པའི་གསལ་བ་བརྗོད་པ། ཤེས་འདོད་མེད་པའི་སྒྲུབ་བྱེད་དགོད་པ་རྣམས་སོ། །ཕྱི་རྒོལ་ཚར་གཙོད་པའི་གནས་སུ་གྱུར་པ་ནི། འདྲི་བར་ཁས་བླངས་ནས་བཏང་སྙོམས་སུ་འཇོག་པ།གྲུབ་བསལ་ཞུགས་པ་འདྲི་བ།སྐབས་སུ་མ་བབས་པ་འདྲི་བ། སྐྱོན་བརྗོད་རྒྱུ་ཡོད་ཀྱང་མི་བརྗོད་པ།སྐྱོན་མིན་པ་སྐྱོན་དུ་བརྗོད་པ། སྐབས་སུ་མ་བབས་པའི་སྐྱོན་བརྗོད་པ་རྣམས་སོ། །དཔང་པོ་ཚར་གཅོད་པའི་གནས་སུ་གྱུར་པ་གསུམ་ནི། བདེན་རྫུན་ཤན་མི་འབྱེད་པ།   རྒྱལ་ཕམ་ཕྱིན་ཅི་ལོག་ཏུ་ཤན་འབྱེད་པ།རྩོད་པ་མཐར་མ་ཕྱིན་པར་ཤན་འབྱེད་པའོ།།
རྩོད་པའི་རྒྱུ་ནི།སྐྱེས་ཐོབ་ཀྱི་ཤེས་རབ་ཆེ་བ།སྒྲ་ཚད་ལ་བློ་སྦྱངས་པ། རང་གཞན་གྱི་གཞུང་ལུགས་ལ་ལེགས་པར་སྦྱངས་པའོ།།རྩོད་པ་མཛེས་པའི་རྒྱན་ནི།བཞིན་གྱི་མདངས་གསལ་བ།ངག་སྙན་ཅིང་འཇམ་པ། ཕ་རོལ་དམའ་འབེབས་པའི་ཚིག་མདའ་མི་འཕེན་པ། ལུང་དང་རིགས་པ་གསལ་ལ་རྣོ་བ།སྒྱིད་ལུག་པ་དང་ང་རྒྱལ་མེད་པ། རིགས་ལམ་འདོར་བའི་གཡོ་སྒྱུ་དང་ཆགས་སྡང་མེད་པ།རང་གཞན་གྱི་དོན་དང་བསྟན་པ་ལ་གཅེས་པར་འཛིན་པ་རྣམས་སོ།།རྩོད་པའི་དཔེ་ནི།རང་གཞན་གྱི་གཏི་མུག་གཅོད་པ་འཁོར་ལོ་ལྟ་བུ།སུན་འབྱིན་པའི་རླུང་གིས་མི་གཡོ་བ་ལྷུན་པོ་ལྟ་བུ།་ཚིག་དོན་ལ་མ་རྨོངས་པ་ཐུབ་པའི་དབང་པོའི་སྲས་ལྟ་བུ་དགོས་སོ།།
རྩོད་པའི་འབྲས་བུ་ནི།རྩོད་པའི་རྒྱུ།རྒྱན།བསམ་པ།སྦྱོར་བ་ཕུན་སུམ་ཚོགས་པ་ལ་བརྟེན་ནས་རྟོགས་པ་འཕེལ་བས་རང་རྒྱུད་ཚིམ་པ།སྙན་པའི་གྲགས་པས་ཕྱོགས་ཀུན་ཁྱབ་པ།བསྟན་པ་བསྲུང་བས་ཆོས་ཀྱི་རྒྱལ་པོར་འགྱུར་བའོ། །གཏན་ཚིགས་རིག་པའི་གཞུང་ལས་འབྱུང་བའི་མིང་གི་རྣམ་གྲངས་མདོར་བསྡུས་པའོ།།
རྒྱབ་སྐྱོར།
返回首页
གཙོ་ངོས།
པར་ལྡན་རྩོམ་ཡིག
ཉེ་ལམ་གསར་བརྗེས།
ཀློག་མཁན་མང་ཤོས།
 
Copyright © 2005 - 2021 Teducn.com
phone:18997245213 QQ:89457590
དྲ་ཚིགས་འདིའི་པར་དབང་ཡོད་ཚད་བོད་ཀྱི་སློབ་གསོ་དྲ་བར་དབང་།
ཡིག་ཟམ། gangjian_xn@hotmail.com
འབྲེལ་གཏུགས་ཁ་པར། ༡༨༩༩༧༢༤༥༢༡༣青ICP备18000196号