| ༄༅། །ཆོས་ཀྱི་རྗེ་དོན་རིན་པས་མཛད་པའི་རྒྱུད་བླ་མའི་བསྟན་བཅོས་ལས་འགྱུར་མཐར་ཕྱིན་པའི་བྱ་བ་བསྟན་པ། |
| སྤེལ་དུས།07-17 ཡོང་ཁུངས། ཀྲུང་གོའི་བོད་ཀྱི་སློབ་གསོ་དྲ་བ། རྩོམ་པ་པོ། |
| མི་ཕམ་གཞུང་བཟང་རྒྱལ་ཡུམ་དགོངས་པའི་གནད༑།འཁྲུལ་མེད་གསལ་བྱེད་ནོར་བུའི་མེ་ལོང་ནི། །རྣམ་ལྔ་ཚུལ་གཉིས་སྲོལ་ལ་ལེགས་བརྟེན་པའི། །དཀའ་གནད་གཟུགས་མཚར་བཀྲ་བའི་གཟིགས་མོར་ཆེ། །ཁྱད་པར་མཐའ་ཡས་འགྲོ་རྒྱུད་རང་བཞིན་ཁམས༑ །སྒྲིབ་བྱེད་དྲི་མ་ཡོངས་སྦྱོང་རྡོ་རྗེའི་གནས། །རྣམ་བདུན་ཚིག་དོན་གྱིས་མཛེས་བླ་མའི་གཞུང༌། །ཟབ་མོའི་མདོ་དོན་གསལ་བ་ཉིན་མོར་བྱེད། །འདི་ཡི་དྲི་མེད་རིགས་པའི་སྲོལ་ཆེན་པོ། །འཕགས་ཡུལ་(༡༧༨ན)ཤིང་རྟ་ཆེ་དེས་རྣམ་ཕྱེ་ཡང༌། །ད་དུང་རང་དགར་འཇུག་པའི་སྤྱི་རྟོལ་གྱིས། །ལོག་པའི་ལམ་དུ་འཕྱན་པ་མང་མཐོང་ནས། །རྒྱལ་བའི་ངེས་དོན་དམ་ཆོས་འཛིན་པའི་མཐུ། །ལེགས་པར་གྲུབ་པའི་བཤེས་གཉེན་གདེངས་ཅན་གཙོ། །གང་དེའི་མཁྱེན་ཡངས་རིན་ཆེན་འབྱུང་གནསོལས། །རྣམ་དག་བཤད་པའི་ཉིན་བྱེད་སླར་ཡང་ཤར། །དེ་ལྟ་མོད་ཀྱི་འགྲོ་བའི་བསོད་ནམས་མཐུ། །ཆེར་སྙིགས་མར་ངོར་སྤྱོད་པ་དང་འགྲོགས་པས། །ལེགས་བཤད་ཟླ་སྣང་མཐའ་ཀླས་མོས་པའི་མཚོར༑ །རྩེན་པའི་དགེ་མཚན་རེ་ཞིག་གསལ་མ་གྱུར། །ཚུལ་དེར་རིང་ནས་གདུང་བའི་མེ་ལྕེས་སྙིང་གི་ཆུ་གཏེར་ཁོལ་གྱུར་ཅིང༌། །བསྟན་ལ་གཅིག་ཏུ་དགེ་བའི་ལྷག་བསམ་རབ་དཀར་ལུས་འདེགས་བསྐྱོད་པ་ཅན༑ །བློ་ལྡན་ངང་པའི་དེད་དཔོན་འབུམ་ཕྲག་བཤད་སྒྲུབ་ཡོན་ཏན་དར་རྒྱས་པའི། །མངོན་འདོད་དད་པས་ཉེ་བར་བསྐུལ་ཏེ་རྣམ་གྲོལ་ནོར་བུའི་གླིང་མཆོག་འདིར།།བི་ཤྭ་ཀརྨའི་འཕྲུལ་ལས་བཏོན་པ་ལྟའི།།ངོ་མཚར་ཡིག་རིས་དབུ་བའི་འཛུམ་ཕྲེང་ཅན། །འཛད་མེད་པར་གྱི་མཆོད་ཡོན་ལམ་གསུམ་འབབས། །འགྲོ་རྒྱུད་ཉེས་པའི་དྲི་མ་སྦྱང་ཕྱིར་བསྐྲུན། །འདིར་འབད་ལེགས་བྱས་འབུམ་ཕྲག་ཟླ་ཤེལ་གཟུགས།།གཅིག་ཏུ་བསྡུས་པྲ་ཆེས་དཀར་འོད་སྣང་ཅན། །གང་དེས་འགྲོ་བ་སྲིད་པའི་མཚོ་ཆེན་ལས། །བདེ་བླག་བརྒལ་ནས་ཀུན་མཁྱེན་གླིང་བགྲོད་(༡༧༨བ)ཤོག །ཐུབ་བསྟན་བདུད་རྩིའི་ཆུ་གཏེར་བསྲུབས་པའི་བཅུད༑།དགེ་ལྡན་ལུགས་བཟང་ཉིན་མོར་བྱེད་པའི་བདག །སྔོན་མེད་ལེགས་བཤད་འོད་བརྒྱ་འབར་བའི་གཟིས། །ས་གསུམ་རྒུད་པའི་མུན་རིམས་དྲུངས་འབྱིན་ཤོག །རྨད་བྱུང་རྣམ་ཐར་གཙང་མའི་མཛད་བཟང་གིས། །ལུང་རྟོགས་ཆོས་ཀྱི་སྲིད་ལ་དབང་བསྒྱུར་བ། །ཟླ་བྲལ་བཤེས་གཉེན་དམ་པའི་ཞབས་སྐྱེས་ནོར། །སྐལ་བཟང་རལ་པའི་རྒྱན་དུ་རྟག་གནས་ཤོག །དགེ་བཅུའི་དཔལ་ཡོན་རྫོགས་ལྡན་ལ་འགྲན་བཤད་སྒྲུབ་རླབས་ཕྲེང་མཁའ་ལ་རྩེན། །བླ་མེད་ཡོན་ཏན་བདུད་རྩིའི་དགའ་སྟོན་དར་ཞིང་རྒྱས་པའི་གླིང་ཆེན་པོར། །ལུང་རིགས་མགྲིན་པའི་རྫ་རྔ་བརྡུང་མཁས་སྡོམ་བརྩོན་ངང་མོ་འབུམ་ཕྲག་གིས། །ཡོངས་སུ་གང་བའི་དགེ་མཚན་དཔལ་ནི་དུས་ཀྱི་མཐར་ཡང་ཉམས་མེད་ཤོག།འབྲེལ་ཐོགས་ཀུན་ཀྱང་ཚེ་རབས་པདྨའི་ཕྲེང༌། །བཤེས་གཉེན་ཉི་མའི་ཟེར་གྱིས་རྟག་བསྐྱངས་ཏེ། །མི་ཕམ་ཆོས་ཚུལ་རྫོགས་ལྡན་མངོན་པའི་ཚེ༑ །ཐེག་མཆོག་སྦྲང་རྩིའི་བཅུད་ཀྱིས་འཚོ་བར་ཤོག །མདོར་ན་རྒྱལ་བསྟན་ཀུན་གསལ་སྒེག་མོའི་བཞིན་རས་རྣམ་དག་བཤད་སྒྲུབ་ཉི་ཟླའི་སྣང་བས་མཛེས། །ཚངས་སྤྱོད་འདུས་པའི་པད་ཚལ་ཀུན་ཏུ་བློ་གསལ་རྐང་དྲུག་ཚོགས་རྣམས་ལུང་རིགས་རྩེ་འཇོས་བྲེལ། །མཐའ་ཀླས་སྐྱེ་རྒུ་ཡོངས་ཀྱི་དད་གུས་ཟུར་ཕུད་སྐྱབས་མཆོག་རིན་ཆེན་རྣམ་གསུམ་ཅོད་པཎ་གྱིས། །(༡༧༩ན)ཉེ་བར་འཁྱུད་པའི་སྐལ་བཟང་དེ་ཡིས་རྒྱལ་ཁམས་ཀུན་ཏུ་དགེ་ལེགས་སྣང་བ་འབར་གྱུར་ཅིག །ཅེས་རྗེ་རྒྱལ་བ་གཉིས་པའི་ཡོངས་འཛིན་དམ་པ་༧ཤར་ཕྱོགས་རིགས་པའི་དཔའ་བོ་ཆོས་ཀྱི་རྗེ་དོན་གྲུབ་རིན་པོ་ཆེའི་ཞལ་སྔ་ནས་མཛད་པའི་རྒྱུད་བླའི་ཊྰིཀྐ་ལེགས་བཤད་རྨད་དུ་བྱུང་བ་འདི་ཉིད་སྔ་མོ་ནས་དཔེ་རྒྱུན་དཀོན་པར་བརྟེན། ཕྱིས་གདན་སའི་མཁན་པོ་སྟག་དཀར་བ་བློ་བཟང་ཆོས་དབྱིངས་ཀྱིས་དཔེ་འཐོར་མང་པོའི་ཁྲོད་ནས་རྙེད་པ་དབུ་ནས་ཤོག་གྲངས་དྲུག་དང་མཇུག་ནས་གཅིག་མ་ཚང་བ་དེ་ཉིད་ཀྱིས་ཁ་བསྐངས་པར་བཤད། དེ་ལས་ཀྱང་དཔེ་མང་པོ་མ་འཕེལ་བས་ས་འོག་གི་གཏེར་བཞིན་སོང་བ། རབ་བྱུང་བཅུ་དྲུག་པའི་ལྕགས་ལུག་ལོར་བསྟན་འགྲོའི་གཉེན་གཅིག་ཆེན་པོ་༧རྗེ་ཐར་ཤུལ་རིན་པོ་ཆེ་དགེ་ལེགས་དབང་ཕྱུག་ཆོས་སྐྱོང་རྒྱ་མཚོ་དཔལ་བཟང་པོས་སྐུ་གོང་མའི་ཕྱག་དཔེའི་གྲྭས་སུ་བཞུགས་པ་གཡར་པོའི་བཀའ་དྲིན་བསྐྱངས། དེ་ཡང་གོང་འོག་ཀུན་ཏུ་བྲིས་ནོར་རྒྱུན་འབྱམས་སུ་སོང་བ། ཁ་གྱའི་རི་ཁྲོད་པ་དགེ་འདུན་ཕུན་ཚོགས་ཀྱིས་ཞུས་དག་བྱས་ནས་པར་དུ་འགོད་པའི་ཚེ། བསྟན་པའི་སྲོག་ཤིང་ཆེན་པོ་རྣམས་ཀྱིས་པར་ཐེབས་སུ། སྐུ་ཕྱོགས་ཨ་རོལ་རིན་པོ་ཆེ་ནས་གོར་མོ་ཞེ་གཅིག་དང་དོང་ཁྲོན་བརྒྱ་དང་ཉི་ཤུ། སྐུ་ཕྱོགས་ཁོ་ཚེ་རིན་པོ་ཆེ་ནས་དངུལ་སྲང་བཅུ་དང་དོང་ཉིས་བརྒྱ། སྐུ་ཕྱོགས་རྒྱལ་ཚབ་ཚང་ནས་ཕྲུག་གཅིག་དང་དོང་ཁྲོན་ལྔ་བཅུ། སྐུ་ཕྱོགས་ཐལ་ཤུལ་རིན་པོ་ཆེས་དོང་ཁྲོན་ལྔ་བཅུ། སྐུ་ཕྱོགས་ཞྭ་དམར་རིན་པོ་ཆེས་དངུལ་སྲང་གསུམ་དང་ཞོ་ལྔ། སྐུ་ཕྱོགས་བེ་སི་ཚང་དོང་ཁྲོན་(༡༧༩བ)བརྒྱ། གཟིམས་ཁང་ཚང་དོང་ཁྲོན་ཉེར་ལྔ། མཁན་པོ་ཚང་གདན་གཅིག །འཕྱོར་ཚང་མཁན་ཟུར་གདན་གཅིག །མི་ཉག་མཁན་ཟུར་གྲོ་བྲེ་ཉི་ཤུ། མཁན་པོ་ཁྲི་ཐོག་བས་ཇ་གཅིག །རྩ་བ་ཆུང་བ་ཚང་གདན་དཀར་གཅིག །བྲང་ཁང་ཚང་ཇ་གཅིག །ཆགས་ཀའི་ཞབས་དྲུང་གདན་གཅིག །བླ་བྲང་ཨ་ལགས་རིན་པོ་ཆེ་ནས་སྒོར་མོ་བཞི་བཅས་ཕུལ་བ་དང༌། དགེ་སློང་སངས་སྐྱབས་ཀྱི་དགེ་རྩ་ལ་དངུལ་སྲང་བཅུ། ས་དཀར་ཆོས་རྗེ་གྲགས་པ་བརྩོན་འགྲུས་དོང་ཁྲོན་བརྒྱ། རྩ་རིང་མོ་རི་ཁྲོད་པ་བློ་བཟང་དཔལ་ལྡན་དངུལ་སྲང་ཉི་ཤུ། རྡི་ཚའི་དགེ་རྒན་དོང་ཁྲོན་བརྒྱ། གླིང་ནས་བསྡོམས་པའི་དོང་ཁྲོན་ལྔ་བརྒྱ་ལྷག་ཙམ། ནང་སོ་མགོན་པོ་ཚེ་རིང་གྲོ་བྲེ་བརྒྱ་དང་དོང་ཁྲོན་བརྒྱ། རྐང་ཚའི་ཆེན་ཧུ་གནས་བརྟན་ནས་དངུལ་སྲང་བཅུ། དོར་སྡེ་གཤོང་གསུམ་སོགས་ཉིན་ཐུབ་རྣམས་ཀྱིས་ཀྱང་འབྲུ་བསོད་དང་བུད་ཤིང་སོགས་ཀྱིས་ཆ་རྐྱེན་སྦྱར་ཏེ་པར་དུ་བརྐོ་བའི་ཚེ། ཡི་གེ་འབྲི་མི་དགོན་ལུང་རི་ཁྲོད་པ་དབང་ཕྱུག་རྒྱ་མཚོ། པར་རྐོན་མཁན་བསྟན་འཛིན་ཕུན་ཚོགས། དགེ་འདུན་ཐབས་མཁས། བློ་བཟང་དོན་ཡོད། རྒྱལ་མཚན་འཕྲིན་ལས། བློ་བཟང་སྦྱིན་པ། དགེ་འདུན་བརྩོན་འགྲུས། དགེ་འདུན་སྦྱིན་པ། བློ་བཟང་ཐབས་མཁས། བསམ་གཏན་རྒྱ་མཚོ། སྔགས་འཆང་ཕག་མོ་ཚེ་རིང༌། དོ་དམ་པ་བཀའ་བཅུ་ཡེ་ཤེས་རྒྱ་མཚོ། བཀའ་བཅུ་ཡེ་ཤེས་གྲགས་པ། བཀའ་བཅུ་དགེ་འདུན་འོད་ཟེར། བཀའ་བཅུ་(༡༨༠ན)བློ་བཟང་སྦྱིན་པ། བཀའ་བཅུ་བློ་བཟང་མཆོག་ལྡན། དགེ་སློང་ཚུལ་ཁྲིམས་རབ་རྒྱས། ཇ་མ་དགེ་སློང་བློ་བཟང་ཚུལ་ཁྲིམས་རྣམས་ཀྱིས། བསམ་པ་གྲུ་ནང་མའི་དཔེ་བཞིན་ཕུར་ཐག་བྱས་ཏེ་མཇུག་ལེགས་པར་གྲུབ་པའི་པར་བྱང་སྨོན་ཚིག་འདི་ལྟ་བུ་དགོས་ཞེས་ནན་གྱིས་བསྐུལ་བ་མ་ཟློག་པར་༧ གྱི་ན་པ་དགེ་འདུན་བསྟན་པ་ཕུན་ཚོགས་ཀྱིས་བྲིས་པ་འདིས་ཀྱང་རྒྱལ་བའི་བསྟན་པ་རིན་པོ་ཆེ་དར་ཞིང་རྒྱས་ལ་ཡུན་རིང་དུ་གནས་པར་གྱུར་ཅིག།མངྒ་ལཾ།། །། 2/2 མདུན་ངོས། 上一页 1 2 |
|
|
|
|
|
 |
ཉེ་ལམ་གསར་བརྗེས། |
|
|
|
|
|
|
|
|
ཀློག་མཁན་མང་ཤོས། |
|
|
|
|
|
|
| |
|
