ད་སྔ་གཟིགས་བཞིན་པ།  མདུན་ངོས། > སྲོལ་རྒྱུན་སློབ་གསོ། > གསུང་རབ་བང་མཛོད།
༄༅། །ཆོས་ཀྱི་རྗེ་དོན་རིན་པས་མཛད་པའི་རྒྱུད་བླ་མའི་བསྟན་བཅོས་ལས་ལེའུ་བཞི་པ།མཛད་པའི་འཕྲིན་ལས་ཀྱི་སྐབས་ཀ
སྤེལ་དུས།07-17  ཡོང་ཁུངས། ཀྲུང་གོའི་བོད་ཀྱི་སློབ་གསོ་དྲ་བ།  རྩོམ་པ་པོ།

ལེའུ་བཞི་པ།མཛད་པའི་འཕྲིན་ལས་ཀྱི་

སྐབས་ཀྱི་རྣམ་པར་བཤད་པ།

               བཞི་པ་མཛད་པའི་འཕྲིན་ལས་ལ་གསུམ་སྟེ།མདོར་བསྟན། རྒྱས་པར་བཤད།དཔེས་སྒྲུབ་པའོ།།དང་པོ་ལ་གཉིས་ལས།ལྷུན་གྱིས་གྲུབ་པ་ནི་རྫོགས་པའི་སངས་རྒྱས་ཀྱིས་གདུལ་བྱ་ལ་འཕྲིན་ལས་སྒྲུབ་པ་ན་གདུལ་བྱའི་ཁམས་ནི་རིགས་ཐ་དད་པ་དུ་མ་དང་གདུལ་བྱ་དེ་དག་འདུལ་བའི་ཐབས་ནི་འདུལ་བའི་རྣམ་པ་སྟེ།ཞི་བ་དང་དྲག་པོ་ལ་སོགས་པའི་སྦྱོར་བའམ།ཆ་ལུགས་དང་སྤྱོད་ལམ་ལ་སོགས་པའི་རྣམ་པའོ།།གདུལ་བྱའི་ཁམས་ཐ་དད་པ་རྣམས་ཀྱི་གང་དང་གང་གིས་འདུལ་བར་བྱ་བའི་ལས་དང་གདུལ་བྱ་དང་གང་ན་གནས་པའི་ཡུལ་དང་གང་གི་ཚེ་འདུལ་བའི་དུས་སུ་བབ་པ་ན་འདུལ་བའི་ཕྱིར་གཤེགས་པ་ལ་ཁྱབ་བདག་རྟག་ཏུ་འབད་རྩོལ་མེད་པར་ལྷུན་གྱིས་གྲུབ་པར་འཇུག་གོ།གཉིས་པ་རྒྱུན་མི་འཆད་པ་ནི་ཡོན་ཏན་རིན་ཆེན་མཆོག་ཏུ་གྱུར་པའི་ཚོགས་དང་ལྡན་པའི་ས་བཅུའི་ཡེ་ཤེས་ཆུས་གང་བའི་མཚོ་ལྟ་བུ་ནི་ངེས་པར་འབྱིན་པའི་རྒྱུའོ།།བསོད་ནམས་དང་ཡེ་ཤེས་ཀྱི་ཚོགས་རྣམ་པ་གཉིས་ཉི་མའི་འོད་ཅན་ལྟ་བུ་ནི་བརྟེན་པའི་རྒྱུའོ༑།དེ་ལྟར་ས་བཅུ་དང་ཚོགས་གཉིས་པོ་འདིས་འགྲོ་བས་ན་ཐེག་པ་སྟེ་ལམ་གྱི་ཐེག་པ་མ་ལུས་པ་ངེས་པར་བསྒྲུབས་ཏེ་ཞེས་པའོ།།དེ་དག་གི་འབྲས་བུ་ནི་མཐའ་(༡༥༠ན)དང་དབུས་མེད་ཅིང་རྒྱ་ཆེ་བ་ནམ་མཁའ་ལྟར་ཐམས་ཅད་ལ་ཁྱབ་པའི་བྱང་ཆུབ་བོ།།ཡོངས་སུ་འཛིན་པ་ནི་སངས་རྒྱས་ཉིད་ཅེས་པ་ཁམས་ནི་ཡོན་ཏན་དྲི་མ་མེད་པ་འཛད་མེད་དུ་ཡོད་པས་གཏེར་དང་འདྲ་བ་དེ་སེམས་ཅན་ཀུན་ལ་ཁྱད་པར་མེད་པར་རྣམ་པར་གཟིགས་ནས།དེའི་སྒྲིབ་པ་ནི་ཉོན་མོངས་པ་དང་ཤེས་བྱའི་སྒྲིབ་པའི་སྤྲིན་གྱི་དྲ་བ་དང་འདྲ་བ་དེ་སེལ་བའི་རྐྱེན་གང་ཡིན་ན་སངས་རྒྱས་རྣམས་ཀྱི་ཐུགས་རྗེ་རླུང་དང་འདྲ་བས་རླུང་གིས་སྤྲིན་གཏོར་བ་བཞིན་དུ་རྣམ་པར་གཏོར་ཞིང་སེལ་བར་བྱེད་དོ།།

རྒྱས་པར་བཤད་པ་ལ་གཉིས་ཏེ།ལྷུན་གྱིས་གྲུབ་པ་དང༌།རྒྱུན་མི་འཆད་པའོ།།དང་པོ་ལ་གཉིས་ལས།བསྟན་པ་ནི་གདུལ་བྱ་གང་གི་ཐབས་གང་གིས་གདུལ་བའི་བྱ་བ་གང་དང་ཡུལ་གང་དུ་དུས་གང་གི་ཚེ་འཕྲིན་ལས་འཇུག་པ་ལ།གདུལ་བྱ་ལ་སོགས་པ་དེའི་རྣམ་པར་རྟོག་པ་སྐྱེ་བ་མེད་པའི་ཕྱིར་ཐུབ་པ་རྟག་ཏུ་འཕྲིན་ལས་ལྷུན་གྱིས་གྲུབ་པར་འཇུག་གོ།བཤད་པ་ནི་འཕྲིན་ལས་འཇུག་པའི་ཡུལ་གདུལ་བྱའི་ཁམས་ནི་གང་ཞིག་གི་འདུལ་བའི་ཚུལ་ཐབས་མང་པོ་གང་དང་གང་དག་གིས་གདུལ་བའི་བྱ་བ་སྟེ།དགོས་པ་གང་དང་གང་དུ་འཇུག་པའི་ཡུལ་དང་གང་གི་ཚེ་འཇུག་པའི་དུས་དེ་དག་ལ་རྟོག་པ་མེད་ཅིང་ལྷུན་གྱིས་གྲུབ་པའོ།།
གཉིས་པ་རྒྱུན་མི་འཆད་པ་ལ་བཞི་སྟེ།བསྟན་པ།བཤད་པ། དཔེ་སྦྱར་བ།དོན་བསྡུ་བའོ།།(༡༥༠བ)དང་པོ་ནི་འཕྲིན་ལས་འབྱུང་བའི་ངེས་པར་འབྱིན་པའི་རྒྱུ་དང༌།དེའི་བརྟེན་པ་སྟེ་རྐྱེན་དང༌། དེའི་འབྲས་བུ་དང༌།འཕྲིན་ལས་དེའི་འཇུག་པའི་ཡུལ་གྱི་རྒྱུ་ཡོངས་སུ་འཛིན་པ་དང༌།ཡུལ་དེའི་སྒྲིབ་པ་དང༌།སྒྲིབ་པ་དེ་གཅོད་པའི་རྐྱེན་དང་ཆོས་དྲུག་པོ་རྣམས་ལ་ནི་རྣམ་པར་རྟོག་པ་མེད་པའི་ཕྱིར་རྒྱུན་མི་འཆད་དོ།།གཉིས་པ་ནི་འཕྲིན་ལས་གང་ལ་བརྟེན་ནས་རྒྱུན་མི་འཆད་ཅེ་ན།འབྲས་བུའི་བར་ངེས་པར་འབྱིན་པའི་རྒྱུ་ནི་ས་བཅུ་སྟེ།བསོད་ནམས་དང་ཡེ་ཤེས་ཀྱི་ཚོགས་གཉིས་དག་ནི་འཕྲིན་ལས་དེའི་འགྲུབ་པའི་རྒྱུ་ཡིན་ནོ།།འབྲས་བུ་གང་ཐོབ་པའི་རྒྱུན་མི་འཆད་ཅེ་ན།འཕྲིན་ལས་དེའི་འབྲས་བུ་ནི་བྱང་ཆུབ་མཆོག་བླ་ན་མེད་པའི་བྱང་ཆུབ་ཡིན་ཏེ༑ཞེས་པའོ།།བྱང་ཆུབ་རང་གིས་ཐོབ་ཀྱང་གཞན་ལ་འཕྲིན་ལས་འཇུག་པའི་རྒྱུ་མེད་པས་བྱང་ཆུབ་ཐོབ་པར་མི་ནུས་སོ་སྙམ་ན།བྱང་ཆུབ་ཀྱི་༨ང་བཞིན་ཁམས་དེ་བཞིན་ཉིད་དེ་སེམས་ཅན་ཐམས་ཅད་ཀྱིས་ཡོངས་སུ་འཛིན་པས་འཕྲིན་ལས་འཇུག་ཏུ་རུང་ངོ་ཞེས་པའོ།།དེ་ལྟར་ན་བྱང་ཆུབ་ཀྱི་རང་བཞིན་ཁམས་ཡོད་ན་འཕྲིན་ལས་དོན་མེད་དོ་སྙམ་ན།བྱང་ཆུབ་དེ་ལ་སྒྲིབ་པར་བྱེད་པ་ནི་མཐའ་ཡས་པའི་ཉོན་མོངས་པ་དང་ཉེ་བའི་ཉོན་མོངས་བག་ཆགས་དང་བཅས་པ་རྣམས་སོ༑།ཞེས་པས་འཕྲིན་ལས་དོན་ཡོད་དོ།།གལ་ཏེ་སྒྲིབ་པ་དེ་སེལ་བའི་ཐབས་མེད་པས་སེལ་བར་མི་ནུས་སོ་ཞེ་ན།སྒྲིབ་པ་དེ་འཇོམས་པའི་རྐྱེན་ནི་དུས་ཀུན་ཏུ་འཇུག་( ༡༥༡ན)པའི་ཐུགས་རྗེ་ཆེན་པོ་ཡིན་ཞེས་པའོ།།གསུམ་པ་ནི་ངེས་པར་འབྱིན་པ་ལ་སོགས་པའི་དོན་གྱི་གནས་དྲུག་པོ་ནི་འདི་དག་རྣམས་གོ་རིམ་ཇི་བཞིན་དུ་རྒྱ་མཚོ་དང་ཉི་མ་དང་ནམ་མཁའ་དང་གཏེར་དང་སྤྲིན་དང་རླུང་བཞིན་དུ་ཤེས་པར་བྱའོ།།ཇི་ལྟར་ན་དྲི་མ་དག་པར་བྱེད་པའི་ཤེས་རབ་ཀྱི་ཆུ་དང་གཟུངས་དང་ཏིང་ངེ་འཛིན་དང་མངོན་པར་ཤེས་པ་ལ་སོགས་པའི་ཡོན་ཏན་རིན་པོ་ཆེ་དང་ལྡན་པའི་ཕྱིར་ས་བཅུ་པོ་རྣམས་ནི་རྒྱ་མཚོ་ཆེན་པོ་བཞིན་ནོ།།སེམས་ཅན་ཐམས་ཅད་ཀྱི་ཉེ་བར་འཚོ་བ་སྟེ་ཕན་པ་བྱེད་པའི་ཕྱིར་ཚོགས་གཉིས་དག་ནི་ཉི་མ་བཞིན་ནོ།།རྒྱ་ཆེན་པོ་མཐའ་དང་དབུས་མེད་པའི་ཕྱིར་འབྲས་བུ་བྱང་ཆུབ་ནམ་མཁའི་ཁམས་བཞིན་དུ་མཐའ་མེད་པའོ།།ཡང་དག་པར་རྫོགས་པའི་སངས་རྒྱས་ཀྱི་ཆོས་ཉིད་དུ་དང་པོ་ནས་ཡོད་པའི་ཕྱིར་སེམས་ཅན་ལ་ཡོད་པའི་ཁམས་ནི་གཏེར་དང་འདྲའོ།།གློ་བུར་དུ་བྱུང་བ་དང་སེམས་ལ་ཁྱབ་པར་བྱེད་པ་དང༌།རྩ་བ་མ་གྲུབ་པའི་ཕྱིར་ཁམས་དེའི་སྒྲིབ་བྱེད་ཉོན་མོངས་པ་ནི་སྤྲིན་གྱི་ཚོགས་བཞིན་ནོ།།སྒྲིབ་པའི་སྤྲིན་དེ་འཐོར་བར་བྱེད་པར་ནི་ཉེ་བར་གནས་པའི་ཕྱིར་ཐུགས་རྗེ་མི་བཟད་པ་སྟེ་ཆེན་པོ་ནི་སྤྲིན་གཏོར་བར་བྱེད་པའི་རླུང་དང་འདྲའོ།།བཞི་པ་ནི་དུས་འཁོར་བ་ཇི་སྲིད་དུ་མཛད་པ་འཕྲིན་ལས་རྒྱུན་མི་འཆད་དོ་ཞེས་བྱའོ།།རྒྱུ་མཚན་གང་ལས་ཤེ་ན།དང་པོ་ཐུགས་བསྐྱེད་པ་ན་གཞན་དོན་( ༡༥༡བ)དུ་འཚང་རྒྱ་བར་དམ་བཅས་ལ་དེའི་ཐབས་སུ་ས་བཅུ་དང་ཚོགས་གཉིས་བསྒྲུབས་པས་རྒྱུ་ཕུན་སུམ་ཚོགས་པའི་གཞན་གྱི་དབང་གིས་ངེས་པར་འབྱུང་བ་དང༌།མཁྱེན་པས་བདག་དང་སེམས་ཅན་ཐམས་ཅད་དེ་བཞིན་གཤེགས་པའི་སྙིང་པོ་ཅན་དུ་མཚུངས་པར་གཟིགས་པའི་གདུལ་བྱ་ལ་འཕྲིན་ལས་འཇུག་པའི་རྒྱུ་ཡིན་པའི་ཕྱིར་བཞུགས་པ་དོན་ཡོད་པ་དང༌།ཐུགས་རྗེའི་མཛད་པ་སྒྲིབ་པ་སྤྲིན་ལྟ་བུ་སེལ་བའི་འཕྲིན་ལས་ཡོངས་སུ་མ་རྫོགས་པའི་ཕྱིར་རོ༑།
གསུམ་པ་དཔེས་སྒྲུབ་པ་ལ་གཉིས་ཏེ།མདོར་བསྟན།རྒྱས་པར་བཤད་པའོ།།
དང་པོ་ནི་སྐུའི་ངོ་བོ་བརྒྱ་བྱིན་དང་འདྲ་བ་དང༌།གསུང་གི་ངོ་བོ་ལྷའི་རྔ་དང་འདྲ་བ་དང༌།ཐུགས་ཀྱི་ངོ་བོ་སྤྲིན་དང་འདྲ་བ་དང༌།མཛད་པ་འབད་མེད་དུ་འབྱུང་བ་ཚངས་པ་དང་འདྲ་བ་དང༌།ཐུགས་ཀྱི་མཛད་པ་ཉི་མ་དང་འདྲ་བ་དང༌།ཐུགས་ཀྱི་གསང་བ་ནོར་བུ་རིན་ཆེན་བཞིན་དང༌།དེ་བཞིན་གཤེགས་པའི་གསུང་གི་གསང་བ་སྒྲ་བརྙན་བཞིན་དང༌།སྐུའི་གསང་བ་ནམ་མཁའ་དང་འདྲ་བ་དང༌།དགེ་བ་སྐྱེད་པ་ས་གཞི་བཞིན་ནོ།།
རྒྱབ་སྐྱོར།
返回首页
གཙོ་ངོས།
པར་ལྡན་རྩོམ་ཡིག
ཉེ་ལམ་གསར་བརྗེས།
ཀློག་མཁན་མང་ཤོས།
 
Copyright © 2005 - 2018 Teducn.com
phone:18997245213 QQ:89457590
དྲ་ཚིགས་འདིའི་པར་དབང་ཡོད་ཚད་ཀྲུང་གོའི་བོད་ཀྱི་སློབ་གསོ་དྲ་བར་དབང་།
ཡིག་ཟམ། gangjian_xn@hotmail.com
འབྲེལ་གཏུགས་ཁ་པར། ༡༨༩༩༧༢༤༥༢༡༣青ICP备14000172号