ལེའུ་བཞི་པ།མཛད་པའི་འཕྲིན་ལས་ཀྱི་

               བཞི་པ་མཛད་པའི་འཕྲིན་ལས་ལ་གསུམ་སྟེ།མདོར་བསྟན། རྒྱས་པར་བཤད།དཔེས་སྒྲུབ་པའོ།།དང་པོ་ལ་གཉིས་ལས།ལྷུན་གྱིས་གྲུབ་པ་ནི་རྫོགས་པའི་སངས་རྒྱས་ཀྱིས་གདུལ་བྱ་ལ་འཕྲིན་ལས་སྒྲུབ་པ་ན་གདུལ་བྱའི་ཁམས་ནི་རིགས་ཐ་དད་པ་དུ་མ་དང་གདུལ་བྱ་དེ་དག་འདུལ་བའི་ཐབས་ནི་འདུལ་བའི་རྣམ་པ་སྟེ།ཞི་བ་དང་དྲག་པོ་ལ་སོགས་པའི་སྦྱོར་བའམ།ཆ་ལུགས་དང་སྤྱོད་ལམ་ལ་སོགས་པའི་རྣམ་པའོ།།གདུལ་བྱའི་ཁམས་ཐ་དད་པ་རྣམས་ཀྱི་གང་དང་གང་གིས་འདུལ་བར་བྱ་བའི་ལས་དང་གདུལ་བྱ་དང་གང་ན་གནས་པའི་ཡུལ་དང་གང་གི་ཚེ་འདུལ་བའི་དུས་སུ་བབ་པ་ན་འདུལ་བའི་ཕྱིར་གཤེགས་པ་ལ་ཁྱབ་བདག་རྟག་ཏུ་འབད་རྩོལ་མེད་པར་ལྷུན་གྱིས་གྲུབ་པར་འཇུག་གོ།གཉིས་པ་རྒྱུན་མི་འཆད་པ་ནི་ཡོན་ཏན་རིན་ཆེན་མཆོག་ཏུ་གྱུར་པའི་ཚོགས་དང་ལྡན་པའི་ས་བཅུའི་ཡེ་ཤེས་ཆུས་གང་བའི་མཚོ་ལྟ་བུ་ནི་ངེས་པར་འབྱིན་པའི་རྒྱུའོ།།བསོད་ནམས་དང་ཡེ་ཤེས་ཀྱི་ཚོགས་རྣམ་པ་གཉིས་ཉི་མའི་འོད་ཅན་ལྟ་བུ་ནི་བརྟེན་པའི་རྒྱུའོ༑།དེ་ལྟར་ས་བཅུ་དང་ཚོགས་གཉིས་པོ་འདིས་འགྲོ་བས་ན་ཐེག་པ་སྟེ་ལམ་གྱི་ཐེག་པ་མ་ལུས་པ་ངེས་པར་བསྒྲུབས་ཏེ་ཞེས་པའོ།།དེ་དག་གི་འབྲས་བུ་ནི་མཐའ་(༡༥༠ན)དང་དབུས་མེད་ཅིང་རྒྱ་ཆེ་བ་ནམ་མཁའ་ལྟར་ཐམས་ཅད་ལ་ཁྱབ་པའི་བྱང་ཆུབ་བོ།།ཡོངས་སུ་འཛིན་པ་ནི་སངས་རྒྱས་ཉིད་ཅེས་པ་ཁམས་ནི་ཡོན་ཏན་དྲི་མ་མེད་པ་འཛད་མེད་དུ་ཡོད་པས་གཏེར་དང་འདྲ་བ་དེ་སེམས་ཅན་ཀུན་ལ་ཁྱད་པར་མེད་པར་རྣམ་པར་གཟིགས་ནས།དེའི་སྒྲིབ་པ་ནི་ཉོན་མོངས་པ་དང་ཤེས་བྱའི་སྒྲིབ་པའི་སྤྲིན་གྱི་དྲ་བ་དང་འདྲ་བ་དེ་སེལ་བའི་རྐྱེན་གང་ཡིན་ན་སངས་རྒྱས་རྣམས་ཀྱི་ཐུགས་རྗེ་རླུང་དང་འདྲ་བས་རླུང་གིས་སྤྲིན་གཏོར་བ་བཞིན་དུ་རྣམ་པར་གཏོར་ཞིང་སེལ་བར་བྱེད་དོ།།