|
བཞི་པ་མཛད་པ་འབད་མེད་དུ་འབྱུང་བ་ཚངས་པ་དང་འདྲ་བ་ལ་གཉིས་ཏེ། འབད་པ་མེད་ཀྱང་སྣང་བ་འབྱུང་བའི་ཚུལ། གདུལ་བྱ་མེད་ན་སྣང་བ་ལོག་པའི་ཚུལ་ལོ། །དང་པོ་ལ་གསུམ་སྟེ། གདུལ་བྱ་ལ་སྣང་བའི་ཚུལ། སྣང་བའི་འཕྲིན་ལས་མཛད་པའི་ཚུལ། དེ་ལྟར་སྣང་བའི་རྒྱུའོ། །དང་པོ་ནི། དཔེ་ཇི་(༡༦༠བ)ལྟར་གཟུགས་ཁམས་ཀྱི་གནས་ལ་ལྷའི་དབང་པོ་ཚངས་པ་དེ་བསམ་གཏན་དང་པོའི་ཚངས་པའི་གནས་གཞན་དུ་འཕོ་བ་མེད་བཞིན་དུ་འདོད་པ་ན་སྤྱོད་པའི་ལྷའི་གནས་ནི་དྲུག་པོ་ཐམས་ཅད་དུ་ལུས་ཀྱི་སྣང་བ་འབད་པ་མེད་པར་སྟོན་པ་ལྟར། དེ་བཞིན་དུ་ཐུབ་པ་སངས་རྒྱས་ཀྱང་སྣང་བ་སྟོན་པར་མཛད་ཅེས་པའོ། །ཇི་ལྟར་ན་ཆོས་ཀྱི་སྐུ་ལས་བསྐྱོད་པ་མེད་པར་རོ༑།གནས་གང་དུ་ན། གདུལ་བྱ་གནས་པའི་འཇིག་རྟེན་གྱི་ཁམས་མཐའ་ཡས་པ་ཀུན་ཏུའོ། །གང་ཟག་གང་ལ་ན་སྐལ་བ་དང་ལྡན་པའི་གདུལ་བྱ་རྣམས་ལའོ། །གང་གིས་སྟོན་ན་འབད་རྩོལ་མེད་པར་སྤྲུལ་པའི་སྐུ་དག་གིས་སོ། །གཉིས་པ་ནི། ཇི་ལྟར་ལྷ་ཚངས་པ་དེ་དུས་རྟག་ཏུ་རང་གི་གཞལ་ཡས་ཁང་ནས་མི་གཡོ་བར་གནས་བཞིན་དུ་སྤྲུལ་པའི་ལུས་ཀྱིས་འདོད་ཁམས་ཀྱི་ལྷའི་གནས་རྣམས་སུ་ཞུགས་པར་གྱུར་པ་དེ་འདོད་པའི་ལྷ་རྣམས་ཀྱིས་མཐོང་ལ་དེ་མཐོང་བའི་ལྷ་དེ་ཡང་འདོད་པའི་ཡུལ་ལ་དགའ་བའི་ཆགས་པ་སྤོང་བར་བྱེད་པ་ལྟར། དེ་བཞིན་དུ་བདེ་བར་གཤེགས་པ་ཡང་ཆོས་ཀྱི་སྐུ་ལས་མི་བསྐྱོད་པར་བཞུགས་བཞིན་དུ་སྤྲུལ་པའི་སྐུས་འཇིག་རྟེན་ཀུན་ཏུ་ཁྱབ་པར་སྟོན་ལ་དེ་ཡང་སྐལ་བ་དང་ལྡན་པའི་གདུལ་བྱ་རྣམས་ཀྱིས་མཐོང་ཞིང༌།དེ་མཐོང་བའི་གདུལ་བྱ་དེ་ཡང་རྟག་ཏུ་སྒྲིབ་པའི་དྲི་མ་ཀུན་སེལ་བར་བྱེད་དོ། །གསུམ་པ་ནི་ཚངས་པས་རང་ཉིད་ཀྱི་སྔོན་གྱི་སྨོན་ལམ་དང་( ༡༦༡ན)འདོད་ལྷ་རྣམས་ཀྱིས་ནི་སྔོན་གྱི་དགེ་བའི་མཐུས་ཇི་ལྟར་ཚངས་པ་འབད་པ་མེད་པར་སྣང་བ་སྟོན་པ་ལྟར། རང་བྱུང་རྫོགས་པའི་སངས་རྒྱས་ཀྱི་སྤྲུལ་པའི་སྐུ་ཡང་སྔོན་གྱི་སྨོན་ལམ་དང་གདུལ་བྱའི་བསོད་ནམས་ཀྱི་མཐུ་ལས་སྣང་བས་ཚངས་པ་དེ་བཞིན་ནོ། །གཉིས་པ་གདུལ་བྱ་མེད་ན་སྣང་བ་ལྡོག་པའི་ཚུལ་ནི་སྐལ་བ་དང་ལྡན་པའི་གདུལ་བྱ་ལ་དགའ་ལྡན་གྱི་གནས་ནས་འཛམ་བུའི་གླིང་དུ་འཕོ་བ་དང༌། ཡུམ་གྱི་ལྷུམས་སུ་འཇུག་པ་དང་ལུམ་བི་ནིའི་ཚལ་དུ་སྐུ་བལྟམས་པ་དང༌། ཚལ་ནས་ཡབ་ཀྱི་ཁབ་སེར་སྐྱའི་གྲོང་དུ་གཤེགས་པ་དང་བཙུན་མོའི་འཁོར་དུ་དགྱེས་པར་རོལ་བ་དང༌། རབ་ཏུ་བྱུང་ནས་དབེན་པར་དཀའ་བ་སྤྱོད་པ་དང༌། བྱང་ཆུབ་ཀྱི་སྙིང་པོར་གཤེགས་ནས་བདུད་ཀྱི་སྡེ་བཅོམ་པ་དང༌། བྱང་ཆུབ་ཆེན་པོའི་གོ་འཕང་བརྙེས་པ་དང༌། ཞི་བ་མྱ་ངན་ལས་འདས་པའི་གྲོང་ཁྱེར་དུ་འགྲོ་བའི་ལམ་སྟོན་པའི་ཆོས་ཀྱི་འཁོར་ལོ་བསྐོར་བའི་བར་དག་བསྟན་ནས་མཐར་མྱ་ངན་ལས་འདས་པའི་ཚུལ་བསྟན་པས་ཐུབ་པའི་དབང་པོ་སེམས་ཅན་སྐལ་བ་མེད་པ་རྣམས་ཀྱི་མིག་གི་ལམ་དུ་སྣང་བར་མི་འགྱུར་ཏེ།སྣང་བའི་རྒྱུ་མཚན་ཚང་བའི་ཕྱིར་རོ། །རྒྱན་ལས། ཇི་ལྟར་ཆུ་ཡི་སྣོད་ཆག་ན། །ཟླ་བའི་གཟུགས་བརྙན་མི་སྣང་བ། །དེ་བཞིན་སེམས་ཅན་ངན་པ་ལ། །སངས་རྒྱས་གཟུགས་ཀྱང་མི་སྣང་(༡༦༡བ)ངོ༌། །ཞེས་སོ༑།
ལྔ་པ་ཐུགས་ཀྱི་མཛད་པ་ཉི་མ་དང་འདྲ་བ་ལ་ལྔ་ལས། དང་པོ་ཕན་གནོད་ལ་རྣམ་རྟོག་མེད་པ་ནི། ཇི་ལྟར་ཉི་མའི་འོད་ཀྱིས་གདུངས་པའི་དུས་གཅིག་ཚེ་ཉིད་ལ་པདྨ་ལ་སོགས་པ་རྒྱས་པ་དང་ཀུ་མུ་ཏ་ནི་རབ་ཏུ་ཟུམ་པར་འགྱུར་ཡང་ཆུ་སྐྱེས་ཁ་ཕྱེ་བའི་ཡོན་ཏན་དང་ཀུ་མུ་ཏ་ཁ་ཟུམ་པའི་སྐྱོན་དག་ལ་ནི་ཉི་མ་རྣམ་པར་རྟོག་པ་མེད་པ་དེ་བཞིན་དུ། འདིར་ནི་འཕགས་པའི་ཉི་མ་ཡང་གདུལ་བྱ་ལ་ཕན་པ་དང་༑གདུལ་བྱ་མ་ཡིན་པ་ལ་མི་ཕན་ཡང་དེ་ལ་རྣམ་པར་རྟོག་པ་མེད་དོ༑།དེ་ཉིད་བཤད་པ་ཇི་ལྟར་ཉི་མའི་དཀྱིལ་འཁོར་རྟོག་པ་མེད་པར་རང་གི་འོད་དུས་ཅིག་ཅར་སྤྲོས་པ་ཡིས་པདྨ་ནི་འདབ་མ་རྒྱས་པར་བྱེད་པ་དང༌། གཞན་ལོ་ཏོག་སྨིན་པར་བྱེད་པ་ལྟར། དེ་བཞིན་དུ་དེ་བཞིན་གཤེགས་པའི་ཉི་མ་ཡང་དམ་པའི་ཆོས་ཀྱི་འོད་ཟེར་གདུལ་བྱའི་སྐྱེ་བོའི་པདྨ་ལ་ཕན་པར་བྱེད་ཀྱང་དེ་ལ་རྣམ་པར་རྟོག་པ་མེད་པར་འཇུག་གོ །གཉིས་པ་མུན་པ་སེལ་བའི་འོད་འགྱེད་པ་ནི་འོད་ཟེར་སྤྲོ་བར་མཛད་ཅེས་པའོ། །གང་གིས་ན་ཀུན་མཁྱེན་གྱི་ཉི་མ་ཡིས་སོ། །དེ་གང་དུ་ཤར་ན། བྱང་ཆུབ་ཀྱི་སྙིང་པོའི་ནམ་མཁར་ཤར་བའོ། །དེ་ཉིད་གང་ཞེ་ན། ཆོས་ཀྱི་སྐུ་དང་གཟུགས་ཀྱི་སྐུ་དག་གིས་ཞེས་སྐུ་གསུམ་གྱི་བདག་ཉིད་ཅན་ནོ། །གང་ལ་འོད་ཟེར་སྤྲོ་ན་གདུལ་བྱའི་འགྲོ་བར་ནི་ཞེས་པའོ། །གང་གི་འོད་ཟེར་སྤྲོ་ན་ཡེ་ཤེས་ཀྱིའོ། །གསུམ་པ་སྣོད་ཀྱི་རྗེས་སུ་བྱེད་པ་ནི་གང་གི་(༡༦༢ན)ཕྱིར་གདུལ་བྱ་རྒྱུད་དག་པའི་ཆུའི་སྣོད་ནི་ཐམས་ཅད་བདེ་བར་གཤེགས་པའི་ཉི་མའི་གཟུགས་བརྙན་ནི་གྲངས་དཔག་ཏུ་མེད་པ་དུས་ཅིག་ཅར་དུ་འཆར་རོ། །བཞི་པ་འོས་པར་འཆར་བ་ནི་འབབ་ཅིང་འཆར་རོ་ཞེས་པའོ། །གང་ན་རྫོགས་པའི་སངས་རྒྱས་ཀྱི་ཉི་མའོ། །དེ་གང་དུ་འཆར་ན་ཆོས་ཀྱི་དབྱིངས་ཀྱི་ནམ་མཁའི་དཀྱིལ་དུ་ནི་འཆར་རོ། །དེ་ཉིད་ཇི་ལྟ་བུ་ཞེ་ན༑རྟག་ཏུ་ཆོས་ཅན་ཐམས་ཅད་ལ་ཁྱབ་པའོ། །གང་ལ་ན་གདུལ་བྱའི་རི་ལའོ། །ཇི་ལྟར་འཆར་ན་ཇི་ལྟར་འོས་པར་སྐལ་བ་དང་འཚམས་པར་འཆར་རོ། །དེ་ཉིད་དཔེ་དང་སོ་སོར་ཕྱེ་ན་ཇི་ལྟར་རྒྱ་ཆེན་པོའི་འོད་ཟེར་སྟོང་དང་ལྡན་པའི་ཉི་མ་མཁའ་ལ་ཤར་ན་ནམ་མཁའི་ཁོངས་འདིར་འཇིག་རྟེན་ཀུན་ཏུ་གསལ་བར་བྱས་ནས་རིམ་གྱིས་ནི་ཐོག་མར་འཛམ་བུ་གླིང་གི་རི་མཆོག་དང་དེའི་རྗེས་སུ་བར་མ་དང་མཐར་དམན་པའི་རི་ལ་འབབ་པ་དེ་བཞིན་དུ། རྒྱལ་བ་སངས་རྒྱས་ཀྱི་ཉི་མ་ཡང་གདུལ་བྱ་དད་པ་ལ་སོགས་པའི་དགེ་བ་རབ་དང་བར་མ་དང་ཐ་མ་དང་ལྡན་པའི་སེམས་ཅན་གྱི་ཚོགས་ལ་ཡང་རིམ་གྱིས་འབབ་ཅིང་འཕྲིན་ལས་འཇུག་པར་བྱེད་དོ། །ལྔ་པ་ཉི་མ་ལས་ཁྱད་པར་དུ་འཕགས་པ་ནི། ཉི་མའི་དཀྱིལ་འཁོར་བས་སངས་རྒྱས་ཁྱད་པར་དུ་འཕགས་ཏེ་སངས་རྒྱས་ཀྱིས་ཞིང་ཀུན་ནམ་མཁའི་མཐིལ་ཞེས་པ་མཐར་ཐུག་པར་འོད་ཟེར་སྤྲོ་བའི་ནུས་པ་ཉི་མ་ལ་མེད་པས་ཁྱབ་(༡༦༢བ)པ་མ་ཡིན་ལ། མི་ཤེས་པའི་གཏི་མུག་གི་མུན་པས་བཀག་པ་བསལ་ནས་ཤེས་བྱའི་གནས་ལུགས་ཀྱི་དོན་གསལ་བར་སྟོན་པ་ཡང་ཡོད་པ་མ་ཡིན་པས་དོན་ཆེ་བ་ཡིན་ནོ། །ཐུགས་རྗེའི་བདག་ཉིད་སངས་རྒྱས་ཀྱི་ཉི་མ་ལས་བརྗོད་བྱ་ཇི་ལྟ་བ་དང་ཇི་སྙེད་པ་སྣ་ཚོགས་སྟོན་པའི་མདོག་བཀྱེ་བའི་གསུང་རབ་ཀྱི་འོད་ཀྱི་ཚོགས་ཀྱིས་གསལ་བ་དག་ནི་ཞིང་ཐམས་ཅད་དུ་གདུལ་བྱའི་འགྲོ་བ་མཐའ་དག་ལ་འཇུག་པས་ཁྱབ་པ་ཡིན་ལ། ཤེས་བྱ་ཇི་ལྟ་བ་དང་ཇི་སྙེད་པའི་དོན་སྟོན་པ་མཛད་པས་དོན་ཆེ་བ་ཡང་ཡིན་ནོ། །དེ་ལ་གཉིས་ལས་སྡུག་བསྔལ་སེལ་བ་ནི་སངས་རྒྱས་གྲོང་ཁྱེར་དུ་གཤེགས་པའི་ཚེ་མིག་དང་མི་ལྡན་པའི་སྐྱེ་བོ་ལོང་བ་རྣམས་ཀྱིས་གཟུགས་མཐོང་ཞིང་དེ་བཞིན་དུ་འོན་པས་སྒྲ་ཐོས་པ་ལ་སོགས་པ་མཐོ་རིས་ཀྱི་ཉེ་བར་འཚེ་བ་སེལ་བ་དང༌། དོན་མེད་པ་ངན་སོང་བ་རྣམས་ངན་སོང་གི་ཚོགས་དང་བྲལ་ཞིང་སངས་རྒྱས་ཀྱི་དོན་དེ་མ་མཐོང་བ་ལ་ནི་བདེ་བ་ཉམས་སུ་མྱོང་ནས་ངན་སོང་ལས་སྐྱོབ་པའོ། །དེ་དག་གི་མཇུག་བསྡུ་ནི་གང་ཟག་དང་ཆོས་ཀྱི་བདག་ཏུ་རྨོངས་པའི་གཏི་མུག་གིས་བློའི་མིག་ལྡོངས་པ་གྱུར་ནས་སྲིད་པའི་མཚོར་ལྟུང་བས་སྡུག་བསྔལ་གྱི་རླབས་ཀྱིས་གཙེས་ཏེ་ལྟ་བ་ངན་པའི་མུན་པས་བསྒྲིབས་པའི་འགྲོ་བ་རྣམས་ཀྱི་བློ་སྟེ་ཤེས་རབ་ཀྱིས་སྣང་བས། སྔར་མ་མཐོང་བའི་ཤེས་བྱའི་གནས་བདག་མེད་གཉིས་མངོན་སུམ་དུ་མཐོང་བར་འགྱུར་(༡༦༣ན)རོ། །རྒྱུ་གང་ལ་བརྟེན་ནས་མཐོང་ནས་སངས་རྒྱས་ཉི་མའི་འོད་ཀྱིས་ཤེས་བྱའི་གནས་ལུགས་གསལ་བར་བྱས་པ་ལས་སོ།། 5/7 མདུན་ངོས། 上一页 3 4 5 6 7 下一页 尾页 |
