དབྱངས་དང་ཚིག་གི་དོན་ཤེས་པས།།
ཕྱི་ནས་སྦྱོར་བ་རབ་ཏུ་བརྩམ།།
རང་དང་རྗེས་སུ་འཚམ་པ་ཡི།།
གྲོགས་པོ་ཉེ་བར་བཞག་པར་བྱ།།
གླུ་ནི་ཀུན་ཏུ་བསྒྱིངས་ཚུལ་གྱིས།།
ལངས་ལ་ལག་པ་འགྲམ་པར་བཞག།
མཆོད་ལ་ཁྲུས་བྱས་མིག་ཕབ་སྟེ།།
དང་བས་སྐྱིལ་ཀྲུང་བཟང་པོ་བཅའ།།
རྟོག་བརྗོད་ལག་པའི་བརྡ་སྤྲོད་པའི།།
ཙོག་པུའམ་བཟང་པོའི་འདུག་སྟངས་ཡིན།།
བཤགས་པ་ཀུན་ཏུ་གནོང་ཚུལ་གྱིས།།
པུས་བཙུགས་ཐལ་མོ་སྦྱར་ཏེ་འདུད།།
དེ་བཞིན་བསྟོད་ལ་སྤྲོ་བའི་ཚུལ།།
སྨད་དང་འགྲན་ལ་ཐིགས་པའི་ཚུལ།།
རྟོགས་པ་བརྗོད་ལ་གོ་བའི་ཚུལ།།
རྗེས་སུ་གདམས་ལ་མན་ངག་ཚུལ།།
བཤགས་ལ་ཉམ་ཐག་ཚུལ་ཡིན་ཏེ༑༑
དགའ་ལ་དགའ་བའི་ཚུལ་ཡིན་ནོ།།
རྐང་པ་ལ་སོགས་རྗེས་བསྟུན་ལ།།
དེ་དང་རྗེས་མཐུན་དབྱངས་ཉིད་དོ།།
དེ་ལྟར་བརྗོད་ན་འཇིག་རྟེན་དང༌།།
རྗེས་སུ་མཐུན་ཞིང་མཛེས་པར་འགྱུར།།
སྤྱིར་ནི་འཇིག་རྟེན་འདི་ན་ཡང༌།།
ཡུལ་དང་དུས་ཀྱི་བྱེ་བྲག་དང༌།།
རྒན་དང་གཞོན་ནུའི་དབྱེ་བ་དང༌།།
སྐྱེས་དང་བུད་མེད་ལ་སོགས་པའི།།
ཁྱད་པར་ཉིད་ཀྱིས་མི་འདྲ་བའི།།
དབྱངས་ཀྱི་སྦྱོར་བ་དུ་མ་མཐོང་།།
དབུས་པ་རྣམས་ཀྱིས་ལྡིར་ཞིང་འགྱུར།།
གཙང་པ་འཚེར་ཞིང་གསལ་བ་ཡིན།།
བཙིར་ཞིང་མདུད་པ་མངའ་རིས་པ།།
ཁམས་པ་རྣམས་ནི་བརྗིད་ཅིང་གྱོང༌།།
དེ་ལྟར་དེ་དག་རྣམས་ལ་ཡང༌།།
སོ་སོར་ཕྱེ་ན་རྣམ་པ་མང༌།།
མདོར་ན་སྐད་གདངས་བྱེ་བྲག་གིས།།
རང་ལ་ལྷན་ཅིག་སྐྱེས་པ་ཡི།།
འགྱུར་གྱི་བྱེ་བྲག་ཤེས་པར་བྱ།།
སློབ་དཔོན་གཞན་གྱིས་བསྒྱུར་ན་ནི།།
ཚོན་རྩི་བཞིན་དུ་བསྒྱུར་དུ་རུང༌།།
སྔོན་གྱི་དབྱངས་མཁན་ཚིག་ལ་མཁས།།
ད་ལྟ་རྣམས་ནི་དབྱངས་ལ་སྦྱོང༌།།
ཕྱི་མའི་དུས་ཀྱི་དབྱངས་མཁན་རྣམས།།
མི་མཁས་བློ་ཆུང་གླུ་ལ་དགའ།།
ཅི་ཡང་མེད་ཀྱང་འཚེར་འགྱུར་སྙམ།།
གཞོན་ནུའི་ཚེ་ན་འགྱུར་ཁུགས་བདེ།།
དར་ལ་བབ་ན་མགྲིན་པ་བཟང༌།།
རྒན་པར་འགྱུར་ནས་ཚིག་ལ་མཁས།།
ཕལ་ཆེར་བུད་མེད་རྣམས་ཀྱི་ཕྲ།།
སྐྱེས་པ་རྣམས་ཀྱི་སྦོམ་པ་ཡིན།།
གཞོན་ནུའི་ཚེ་ན་ཕྲ་བ་སྟེ།།
དར་ལ་བབ་ན་སྦོམ་པར་འགྱུར།།
རྒན་པ་རྣམས་ཀྱི་མགྲིན་པ་ཞུམ།།
བ་ཚྭ་ཅན་གྱི་ཆུ་འཐུང་ཞིང༌།།
སྣུམ་བག་ཅན་གྱི་ཁ་ཟས་ཟ།།
ལྷགས་པ་ཅན་གྱི་གནས་འདུག་པའི།།
མི་རྣམས་ཕལ་ཆེར་མགྲིན་པ་སྦོམ།།
དེ་ལས་བཟློག་པ་ཕྲ་བ་ཡིན།།
རྣ་བར་སྙན་པར་འགྱུར་ཁུགས་དང༌།།
གཅོད་མཚམས་དང་ནི་ངག་སྙན་པ།།
སྡཻབས་མཁས་པ་ལས་བྱུང་བ་ཡིན།།
དེ་ཡང་སྦྱངས་པའི་སྟོབས་ལས་འབྱུང༌།།
མདོར་ན་ཐོག་མའི་སློབ་དཔོན་གྱི།།
རྗེས་སུ་ཕྱི་མ་འཇུག་པར་འགྱུར།།
དེ་ནས་དབྱངས་ཀྱི་སྦྱོར་བ་རྣམས།།
དཔེ་ཡི་མིང་གིས་བཤད་པར་བྱ།།
འདྲེན་པ་དཔག་བསམ་ལྗོན་ཤིང་སྟེ།།
བཀུག་པ་མེ་ཏོག་འཁྲི་ཤིང་ཡིན།།
དབུས་ཞན་ཆུ་ཀླུང་དལ་འགྲོ་བ།།
འགྱུར་ཁུགས་རྒྱ་མཚོའི་ཟླ་བར་བཤད།།
ཚོགས་སུ་སེང་གེའི་ང་རོ་སྟེ།།
དབེན་པར་བུང་བ་རོལ་བའི་ཚུལ།།
མཁས་པའི་མདུན་སར་ནེ་ཙོའི་དབྱངས།།
རྨ་བྱའི་འཇོ་སྒེག་རྨཽངས་ནང་དུ།།
སྐྱོ་ཚེ་དང་བ་ཀུན་འདྲེན་པ།།
རྗེས་སུ་དགའ་བ་འདོད་ལྷའི་མདའ།།
མཆོད་ལ་དགེ་བའི་མེ་ཏོག་སྟེ།།
བ་ཚྭའི་ཆུ་ཀླུང་སྡིག་སྦྱོང་ལ།།
རང་ཕྱོགས་བསྟོད་ན་ལྷ་ཡི་རྔ།།
ཕ་རོལ་སྨོད་ན་འཁོར་ཟིལ་གནོན།།
ཀུན་ཏུ་སྙན་པ་དྲི་ཟའི་དབྱངས།།
སྤེལ་བ་མེ་ཏོག་ཕྲེང་ལྡན་ཡིན།།
དེ་ལ་སོགས་པའི་རྣམ་པ་ཡིས།།
འདྲེན་པའི་ཁྱད་པར་ལེགས་བརྟགས་ཏེ།།
དབྱངས་ཀྱི་སྦྱོར་བ་གཞན་ལ་ཡང༌།།
ཇི་ལྟར་འཚམ་པ་སྦྱར་བར་བྱ།།
དེ་ལྟར་ཤེས་པའི་མཁས་པ་ལ།།
ཀུན་ཏུ་འཇུག་པའི་གདམས་ངག་བཤད།།
དལ་བ་ལ་ནི་མི་འཚམས་ཤིང༌།།
མྱུར་བ་ལ་ནི་མ་བརྡབས་ལ།།
འབྲེལ་བའི་ཚེ་ན་མ་འདྲེས་པ།།
དབུགས་འཇམ་མ་ཞུམ་སྤོབས་པའི་གནད།།
དབྱངས་སྦྱོར་མང་ན་དོན་གོ་ཆུང༌།།
བདེ་འབྱམ་མང་ན་ཐ་མལ་སྐྱོ།།
ཧ་ཅང་ཐལ་ན་མཁས་པས་ཁྲེལ།།
རན་པར་སྤེལ་བ་དུས་ཀྱི་གནད།།
ཀུན་ལ་མཁས་པས་རང་ཉིད་སྤྲོ།།
འགྱུར་ཁུགས་འབྱོངས་པས་ངག་ལ་བྱམས།།
ཚིག་སྦྱོར་ལེགས་པས་གཞན་ལ་སྙན།།
འཇམ་ཞིང་འཕྲོད་པ་སྦྱངས་པའི་གནད།།
ཧ་ཅང་རྒོད་དང་ཐིམས་པ་དང༌།།
དོན་མ་རྟོགས་དང་མི་སྤྲོ་བ།།
གཞན་དུ་ཡེངས་པ་བློ་ཡི་སྐྱོན།།
ཟུར་མ་ཕྱིན་དང་ཟློས་པ་དང༌།།
ཚིག་ལྷད་ཅན་དང་མི་གསལ་བ།།
གཅོད་མཚམས་ནོར་བ་ཚིག་གི་སྐྱོན།།
དབྱངས་ལ་འཕེལ་འགྲིབ་རྟབ་པ་དང༌།།
ཧ་ཅང་མགྱོགས་བུལ་བཙིར་ནས་འདོན།།
བཅོས་ཤིང་སྨྲ་བ་གདངས་ཀྱི་སྐྱོན།།
རྣམ་འགྱུར་ཡ་ཡོ་བཞིན་སྡུད་དང༌།།
མི་ལྟ་བ་དང་ཕྱུགས་ལྟར་བལྟ།།
གཟིར་དང་འཚབ་པ་ལུས་ཀྱི་སྐྱོན།།
སྔོན་ལ་འགྲོ་དང་ཕྱིས་ནས་འཐེན།།
ཆེ་དང་ཆུང་དང་མི་བསྲེ་དང༌།།
མཁས་འདོད་བྱེད་པ་གྲོགས་ཀྱི་སྐྱོན།།
ཀུན་ཏུ་གཡེངས་དང་ཕན་ཚུན་སྨྲ།།
ཆེད་ཆེར་མི་འཛིན་མ་རངས་དང༌།།
དོན་གོ་མེད་པ་ཉན་པའི་སྐྱོན།།
ཚིག་ལ་རྨོངས་ལ་བརྙས་པའི་རྒྱུ།།
དབྱངས་སྦྱོར་མེད་ན་བཞད་གད་རྒྱུ།།
དུས་ཚོད་མེད་ན་སྐྱོ་བའི་རྒྱུ།།
དགོས་པ་མེད་ན་སྡིག་པའི་རྒྱུ།།
མཁས་པ་འདུས་ཤིང་མང་པོས་བསྐོར།།
གྲོགས་པོ་ངན་ཞིང་འགྲན་ཟླ་མང༌།།
སྦྱངས་པ་ཆུང་ཞིང་སྤོབས་པ་ཞན།།
བློ་གྲོས་ངན་པ་སྡུག་པའི་རྒྱུ།།
དེ་ལྟར་མི་མཐུན་ཕྱོགས་མང་ན།།
ཇི་ལྟར་གྱུར་ཀྱང་དོར་བར་བྱ།།
གལ་ཏེ་ཐམས་ཅད་ཕུན་ཚོགས་གྱུར།།
མཁས་པས་དགེ་བ་སྤེལ་ཕྱིར་བླང༌།།
དེ་ལྟར་ཤེས་ནས་རྐྱེན་གཞན་ལས།།
བྱུང་བའི་རོལ་མོ་རྣམས་ལ་འབད།།
གླིང་བུ་པི་ཝང་རྫ་རྔ་དང༌།
ཁར་རྔ་རྔ་ཟླུམ་རྔ་བོ་ཆེ།།
རྔ་ཕྲན་ཆ་ལང་ཀ་ཎ་ཊི།།
དུང་དང་རྒྱུད་མངས་ལ་སོགས་པ།།
ཇི་སྙེད་སིལ་སྙན་སྦྱོར་བཤད་པ།།
དེ་སྙེད་ལ་ནི་མཁས་པར་བྱ།།
ཕྱི་ནས་རོལ་མོ་ཀུན་འདུས་པའམ།།
སོ་སོ་ཉིད་ཀྱིས་རྣམ་པར་རྩེན།།
དབུས་འགྱུར་ཚལ་ན་གཏམ་རྒྱུད་ཀྱི།།
ཟློས་གར་བྱེད་པས་ཐམས་ཅད་སྦྱོར།།
མཐའ་འཁོབ་འདི་ན་དེ་ལྟ་བུ།།
བྱེད་པའང་ལྟ་ཞོག་ཐོས་པའང་དཀོན།།
འདིར་ཡང་གཞུང་མངས་དྭོགས་པས་ན།།
སིལ་སྙན་སྦྱོར་བ་ངས་མ་བཤད།།
གལ་ཏེ་དོན་དུ་གཉེར་རྣམས་ལ།།
ཕྱི་ནས་གཞན་དུ་བཤད་པར་བྱ།།
འདི་ནི་ཀུན་ཏུ་གཡེང་བ་དང༌།།
ཀྱལ་བའི་རྒྱུ་ཕྱིར་རྒྱལ་བས་བཀག།
འོན་ཀྱང་དཀོན་མཆོག་མཆོད་པ་དང༌།།
གཞན་གྱི་དོན་ལ་ཉེས་པ་མེད།།
དེས་ན་མགོན་མེད་ཟས་སྦྱིན་གྱིས།།
ཞུས་ཚེ་དགེ་སློང་རྣམས་ལ་གནང་།།
རྒྱལ་སྲས་རྣམས་ཀྱིས་མི་བསླབ་པ།།
དེ་ནི་གང་ཡང་ཡོད་མིན་གསུངས།།
དྲུག་ལས་སྐྱེ་སོགས་གླུའི་སྦྱོར་བ།།
རྒྱལ་བས་གསུངས་པ་དུ་མ་མཐོང་།།
གལ་ཏེ་ཁྱོད་ཀྱང་གླུའི་སྦྱོར་བ།།
དེ་ཉིད་ཁྱད་པར་རིགས་ཤེ་ན།།
སྐད་དང་གདངས་ཀྱི་ཁྱད་པར་གྱིས།།
བོད་ཀྱི་སྒྲ་ལ་འཇུག་པར་དཀའ།།
དེས་ན་དྲུག་ལས་སྐྱེས་སོགས་ཀྱི།།
གླུ་ཡི་སྦྱོར་བ་འདིར་མ་བཤད།།
ལྐོག་མ་ཉེད་པ་ལ་སོགས་པ།།
ཐུབ་པས་ཇི་སྙེད་གསུངས་པ་གང༌།།
བོད་ཀྱི་སྒྲ་དང་མཐུན་པ་རྣམས།།
འདི་ཡི་ནང་ན་འདུ་ཤེས་བྱོས།།
རོལ་མོའི་བསྟན་བཅོས་ལས་སྦྱོར་བ་གཏན་ལ་དབབ་པ་སྟེ་ལེའུ་གསུམ་པའོ།། །།
|