ད་སྔ་གཟིགས་བཞིན་པ།  མདུན་ངོས། > གཞུང་ལུགས་ཞིབ་འཇུག > རོལ་དབྱངས། ལུས་རྩལ། རི་མོ།
༄༅། །བོད་ཀྱི་འུར་རྡོའི་བྱུང་རིམ་དང་རིན་ཐང་ །
སྤེལ་དུས།03-21  ཡོང་ཁུངས། གཉན་པོ་གཡི་རྩེའི་ཤེས་རིག་ལྟེ་གནས།   རྩོམ་པ་པོ།
གསུམ་པ།   བོད་ཀྱི་འུར་རྡོའི་རྒྱུ་སྤུས་བྱུང་རིམ་ནས་བཟོ་ཁྱད་བཀོལ་སྟངས་སོགས་ཀྱི་ཐད་ནས་རྗེས་བློས་གཞལ་ན།གདོད་མའི་མངའ་མཛད་དུས་ཀྱི་འུར་རྡོའི་རྒྱུ་ཆ་ནི་གཙོ་བོ་ཤིང་ཤུན་དང༌།  ཤིང་རྩད་རྩྭ་རྒྱུས་སོགས་སླས་པའམ་བསྒྲིམས་ནས་བཟོས་པ་དང༌།མི་དང་སྤྲ་ཡི་སྐྲ་བསྒྲིམས་པ་དང་སླས་ནས་བཟོས་པའི་རྒྱུད་རིམ་ནས་མིའི་བློ་སྒོའི་འཚར་ལོངས་དང་བསྟུན།སྲོག་ཆགས་ཀྱི་ཀོ་བ་དྲས་ཏེ་རྒྱུན་བུས་བཟོས་པ་དང༌།གཅན་གཟན་སྣ་ཚོགས་དང་རི་སྐྱེས་སྲོག་ཆགས་ཀྱི་སྤུ་བསྒྲིམས་ཏེ་བཟོས་པ་ནས་ནོར་ལུག་གི་སྤུ་བཀོལ་ནས་བཟོ་བ་དང་དར་སྐུད་སོགས་བསྒྲིམས་པ་དང་སླས་ཏེ་བཟོ་ཤེས་པ་ད་ལྟའི་བར་རིམ་པར་བརྒྱུད་དེ་རྒྱུ་སྤུས་ཅན་དང༌།ལག་རྩལ་རང་བཞིན་ལྡན་པའི་འུར་རྡོ་ཞེས་པའི་ལག་ཆ་དེ་གྲུབ་གནས་བྱུང་ཡོད་ལ། བོད་ཀྱི་འུར་རྡོའི་བཟོ་དབྱིབས་དང་བཀོལ་ཚུལ་གྱི་ཆ་ནས་མཚོན་ཏེ་བསམས་ན།ལོ་ངོ་ཁྲི་ཕྲག་མི་ཉུང་བའི་ཡ་སྔོན་བོད་གདོད་མའི་དུས་ནས་ད་ལྟ་བར་ལྟ་བུ་ལྟ་ཅི། དུས་རབས་རེ་གཉིས་དང་ཐ་ན་ལོ་རབས་ཁ་ཤས་རིང་མིའི་སྤྱོད་སྟངས་དང་དངོས་པོ་བེད་སྤྱོད་བྱེད་ལུགས་ཧ་ཅང་འགྱུར་བའི་རིམ་པ་ཅན་ཡིན་པ་ནི་དངོས་པོའི་གནས་ལུགས་ཤིག་ཡིན་པ་ནང་བཞིན།ད་ལྟའི་དུས་ཀྱི་མདའ་གཞུ་སོགས་མཚོན་ཆ་གཞན་དག་དང་བལྟས་བསྡུར་བྱས་ན།བོད་ཀྱི་འུར་རྡོ་ནི་རྒྱུ་སྤུས་དང་བཟོ་ཁྱད་ཀྱི་ཐོག་ནས་མཛེས་ཆོས་སྤྲས་བཅས་ཀྱི་འགྱུར་བ་ཅུང་བྱུང་ཡོད་པ་ཙམ་མ་གཏོགས།བཟོ་དབྱིབས་ཀྱི་རྣམ་པ།རྒྱུ་ཆ།བཀོལ་སྤྱོད་བྱེད་སྟངས་སོགས་ཀྱི་ཐད་ནས་ད་དུང་གདོད་མ་ཅི་བཞིན་དུ་རང་སོར་གནས་ཡོད་པར་སེམས།དེས་ན་བོད་ཀྱིས་འུར་རྡོ་འདིས་བོད་མི་རིགས་ཀྱི་ཆེས་རྒྱུན་རིང་གི་ལོ་རྒྱུས་ལ་བདེན་དཔང་བྱས་ཡོད་པར་མ་ཟད་འཛམ་གླིང་གི་རིག་མཛོད་ཁྲོད།ཆེས་ཕུལ་དུ་བྱུང་བའི་གནའ་རྫས་ཀྱི་ཁྱད་ཆོས་མངོན་ཐུབ་ཡོད་པ་དང༌།ཆེས་མཐོའི་གོ་གནས་ཟིན་ཡོད་པར་སྣང༌།     
འུར་རྡོའི་ཞེས་པའི་ལག་ཆ་དེའི་མིང་སྤྱི་གྲུབ་ཀྱི་ཆ་ཤས་སུ་འུར་གྱི་ཡ་མཆོག་དང༌།འུར་གྱི་མ་མཆོགའདི་གཉིས་ལ་ཡ་ཆ་དང་མ་ཆ་ཞེས་འབོད་སྲོལ་ཡང་ཡོད།འུར་མཐིལ། འུར་གྱི་དཔའ་ལུང་ངམ་མཛུབ་ལུང༌། རྡོ་ལེན་ནམ་རྡོ་དཀྲིས།ཚར་ལྕེ་འམ་འུར་ལྕེ་སོགས་འདུས་ཡོད་པ་དང༌། དེ་ཡང་འུར་མཐིལ་དཀྱིལ་དུ་བྱས་པའི་འུར་ཡ་མཆོག་མཛུབ་ལུང་གི་ཕྱོགས་སུ་ངོས་འཛིན་ལ།རིང་ཚད་བཀོལ་སྤྱོད་མཁན་མི་རང་རང་གི་གཞུ་འདོམ་གང་དང༌།འུར་མ་མཆོག་ལ།འུར་མཐིལ་གྱི་ཁ་རྩ་ནས་སོར་བཅུ་ཙམ་ལ་རྡོ་ལེན་ནམ་རྡོ་དཀྲིས་ཟེར་ཞིང་རྩིད་རྐུད་ཁ་དོག་འཐབས་ཏེ་དཀྲི་བ་འམ།  པགས་རིགས་སོགས་དངོས་པོ་སྲ་མོས་གཡོགས་པའི་སྲོལ་ཡོད་པ་དང༌།དེའི་ཕྱོགས་སུ་ཚག་ལྕེ་ཁྲ་སླས་ཀྱིས་སྤྲད་པ་བཅས་ལ།བཀོལ་མཁན་གྱི་རང་འདོམ་གང་གི་ལྷག་ཙམ་བྱས་ན་བཀོལ་བདེ་བ་ཡིན། ད་ལྟའི་འུར་རྡོ་ལ་སྒྲིམ་མ་དང་སླས་མ་གཉིས་ལས་སླས་མ་ཅུང་རྒྱུགས་ཆེ་བ་ཡིན་ལ། འུར་སླེ་སྟངས་ལ་ཡང་ཐུན་མོང་མ་ཡིན་པའི་རྣམ་གྲངས་དུ་མ་ཞིག་ཡོད་པ་ནི། ཆུ་མིག་དགུ་སྒྲིལ། ཐ་གུ་ཁྲ་སླས།ཟུར་མིང་སྒང་སླས།མདུད་པ་དགུ་སྒྲིལ།རྐྱ་གཡས་སྒྲིམ་དང་གཡོན་སྒྲིམ་གཉིས་ཁྲ་བཟོ་བྱེད་པ་སོགས་ཡོད་ལ།དེ་ལས་ཀྱང་ཆུ་མིག་དགུ་སྒྲིལ་ནི་འུར་རྡོ་སླེ་སྟངས་ཀྱི་གྲས་ནས་མཛེས་ཤོས་ཡིན་པར་མ་ཟད།བོད་ཀྱི་ནང་བསྟན་ཆོས་ལུགས་པའི་ཟབ་མོ་རྟེན་འབྲེལ་གྱི་འཆར་སྒོ་འམ།གཅོད་སྔགས་སོགས་ཀྱི་རྟོགས་ཆ་ནས།འུར་རྡོ་ཆུ་མིག་དགུ་སྒྲིལ་ལ་ནི་བྱིན་རླབས་ནུས་སྟོབས་ཁྱད་པར་བ་ཡོད་ཚུལ་གྱི་གསུང་སྲོལ་ལྟར་ན།ཆུ་མིག་དགུ་སྒྲིལ་གྱི་འུར་རྡོ་བྱས་ན་གཟུགས་དབྱིབས་ཀྱི་གྲུབ་སྟངས་རྐྱང་བའི་སྟེང་ན་ཡང་མིའི་བདེ་འཇགས་ལ་རམ་འདེགས་ནུས་པའི་གཟུགས་མེད་ཀྱི་སྟོབས་ཤུགས་དང༌།ཁྱད་ཆོས་ཡོད་པ་གཅོད་ལུགས་སོགས་ལ་གཞིགས་ན་མང་མོད།སྐབས་སུ་དེ་ཙམ་གྱིས་འཐུས་པར་བྱ།འུར་མཐིལ་ནི།ཕྱིང་བ་དང༌།ཀོ་བ་སོགས་སྤྲད་དེ་བཟོ་སྲོལ་ཡོད་ལ།ལེགས་ཤོས་ནི་འབྲོང་མོའི་རྐན་སླས་དང༌།ཁྲ་སླས་ཀྱིས་གྲུབ་པའི་རིགས་གཉིས་ཡིན་པར་ཐོས།འོན་ཀྱང་ད་ལྟ་མདོ་དབུས་ཁམས་གསུམ་ན་ཅུང་མི་འདྲ་བའི་འུར་མཐིལ་སྤྲོད་སྲོལ་ཡོད་པས་མཐའ་གཅིག་ཏུ་ངེས་པ་མི་འདུག་མོད། གང་ལྟར་བོད་ཀྱི་འུར་རྡོ་གྲུབ་སྟངས་ཀྱི་ཆ་ནས་གཞིགས་ན་བོད་མི་རིགས་ལ་ཐག་པ་སྒྲིམ་སླས་ཀྱི་ཁྱད་ཆོས་ཀྱང་ཐུན་མོང་མ་ཡིན་པ་ཞིག་ཡོད་པ་ཤུགས་ནས་རྟོགས་ཐུབ། 
བཞི་བ།བོད་ཀྱི་འུར་རྡོའི་བྱེད་ནུས་དང་རིན་ཐང་ནི། འུར་རྡོ་ལ་བརྟེན་ནས་བོད་གདོད་མའི་དུས་རབས་མང་པོ་ཞིག་གི་རིང་ནས་བཟུང་རིམ་རྒྱུད་དུ་དང་པོ་རང་བྱུང་ཁོར་ཡུག་ནས་མི་དང་མཉམ་དུ་འཚར་ལོངས་བྱུང་བའི་གཅན་གཟན་གྱི་རིགས་ལ་འགོག་རྒོལ་བྱས་ཡོད་པ་དང༌།བར་སྐབས་ཤིག་ནས་མི་རིགས་དང་མི་རིགས་བར་གྱི་འགལ་ཟླ་དང་འགྲན་རྩོད་གཡུལ་ལས་ཀྱི་རྒྱུད་རིམ་ཁྲོད།དགྲ་ཡ་འགོག་འདུལ་སོགས་དྲག་ཆས་ལག་ཆ་ཕུལ་བྱུང་གི་བྱེད་ནུས་དང་རིན་ཐང་གི་གོ་གནས་བཟུང་ཚུལ་ལོ་རྒྱུས་ཀྱི་རྒྱབ་ལྗོངས་བཅས་ཡོད་པ་དང༌། དེ་བཞིན་དུ་འུར་ཁྲ་ནི་བོད་ཀྱི་དགྲ་ལྷའི་གོ་མཚོན་གྱི་ཚབ་ནུས་རྫས་རྟེན་ཁྱད་པར་བ་དང།ཝེར་མའི་རྟེན་མཁར་དང་ཆོས་སྐྱོང་གི་བླ་གནས།ནོར་བདག་གི་གཡང་རྫས།རྣོ་མཐོང་བས་འཇུ་ཐུག་གི་ཚབ་དང་མོ་ཆས།འུར་མོ་འདི་ཨ་མདོ་འབྲོག་ཕྱོགས་མ་གཏོགས་གཞན་དུ་དར་མིན་མ་ངེས།འཕྲོས་དོན་དུ་འུར་མོ་ཇི་ལྟར་འདེབས་ཚུལ་ཅུང་བཀོད་ན།དེ་ཡང་རང་རང་གི་དོན་བྱ་ལ་དམིགས་ཏེ་ནོར་ལྷ་དང་རྫི་ལྷ་ཞེས་བདེན་པ་བརྡར་བཞིན།འུར་ཐག་ཉིས་ཁུགས་ལ་ཁུག་མདུད་གཅུ་ལེན་བྱས་ཏེ་ལག་གཡས་གཡོན་གཉིས་ཀྱིས་འཐེན་བཤིགས་བྱས་ཏེ་བརྟག་རྒྱུ་ཞིག་ཡིན།བརྟག་ཡུལ་ལ།འུར་ཡ་མཆོག་མ་མཆོག་གཉིས་ཨ་ལོང་ལྟར་སྦྲེལ་ནས་བབ་རྒྱུ་ཞིག་ཡོད་པ་ནི་མཛོ་མོའི་གསེར་རྣ་ཞེས་པ་མོ་རབས་སུ་བརྩི།ལག་པ་གཡས་གཡོན་གཉིས་ལ་འུར་ཡ་མཆོག་མ་མཆོག་གཉིས་ཁུགས་པ་རེ་རེ་བྱས་ཏེ་བབ་ན།དེ་ལ་རི་བོང་རྣ་ཅོར་ཟེར་ལ་ཅུང་ལེགས་པའི་ངོ་རུ་བརྩི།ཆ་བསྣོལ་ཏེ་རྐྱང་ཤད་དུ་བབ་ན་ཐུག་གུ་ཐུག་རྐྱང་ཟེར་ཞིང་འཚུབ་ངོ་རུ་བརྩི། ཆ་གཉིས་ཨ་ལུང་གཅུ་བསྣོལ་དུ་བབ་པར་མིད་པ་རྐེ་གཅུ་ཟེར་ཞིང་ཆེས་ངན་ངོ་རུ་བརྩི་བ་སོགས་དཔྱད་ཚུལ་ཤིན་ཏུ་མང་པོ་འདུག་པར་མ་ཟད་རྣོ་མཐོང་གི་ཁྱད་ཆོས་ལྡན་པའི་ལག་ལེན་ད་ལྟ་ཡང་བོད་དམངས་ཁྲོད་དུ་སྲོལ་མ་ཉམས་པར་ལག་ལེན་བྱེད་བཞིན་ཡོད།གཞན་དུ་ཞི་བྱེད་པས་ཆུ་མིག་འགྲིམ་པའམ་གཉན་ས་གཅོད་སྐབས་ཀྱི་གཅོད་ཆས།སྔགས་པས་རྡོ་ཟོར་འཕེན་སྤྱད་ཀྱི་ཐུན་རྫས།བོད་ཀྱི་ལྷ་མོའི་ཟློས་གར་སོགས་ཀྱི་སྐབས་ལུས་རྒྱན་ནམ་གར་ཆས་ཀྱི་གྲས་དང༌། སྐྱེས་པ་ཚོས་ཀྱང་ཆེད་དུ་འུར་རྡོ་བཀོལ་སྤྱོད་དང་མཐོང་ཆེན་བྱེད་དགོས་པའི་སྐབས་མང་པ་དཔེར་ན།དུས་རབས་ཉི་ཤུ་བའི་ལོ་རབས་ལྔ་བཅུ་བའི་ཡ་སྔོན་དུ་བོད་མདོ་དབུས་ཁམས་གསུམ་སྤྱི་དང་ཁྱད་པར་ཨ་མདོ་མགོ་ལོག་སོགས་སུ་སྐྱེས་པ་ཚོས་རྒྱན་འགྱེད་རྩེད་མོའི་སྐབས་དང༌།མི་དང་མིའི་བར་རམ་སྡེ་བ་དང་ཚོ་ཁག་ཕན་ཚུན་བར་མི་མཐུན་པའི་མཁོན་བརྩོད་འདུམ་སྐབས་དཀར་ནག་གི་དབྱེ་བ་འབྱེད་དཀའ་རིགས་ལ་ཤོ་འཕང་སྟེ་ཤོ་སུ་རྒྱལ་དཀར་པོར་གཏོང་བའི་སྲོལ་རྒྱུན་གྱི་ཁྲིམས་ལུགས་ཀྱི་ཤོ་འཕེན་པའི་སྐབས་གང་ཟག་རང་རང་གི་ཤོ་འབོད་དང་སྨོན་ཚིག་བརྗོད་པའི་སྲོལ་གྱི་ཁྲོད་དུ་འུར་རྡོའི་ལོ་རྒྱུས་ཀྱི་རྒྱབ་ལྗོངས་སུ།ཤོའབོད་སྒྱུ་རྩལ་གྲས་ཀྱི་གསུམ་པ་ཁ་ལ་འམ་ཀེ་ལེའི་ཤོ་འབོད་ཀྱི་སྐབས་སུ་འདི་ལྟར་འབོད་སྲོལ་འདུགཁ་མི་དལ་མ་ཎི་ཐོན་དང༌།མ་ཎི་ཆོས་ཀྱི་འགོ་མ།ལག་མི་དལ་འུར་རྡོ་ཟུངས་དང༌།འུར་རྡོ་མཚོན་གྱི་ཐོག་མ། ཞེས་སྐྱེས་པ་ཚོའི་ཁ་ན་ཤར་རྒྱུག་ཏུ་ཡོད་པ་ད་ལྟའི་རྒས་པོ་ཚོའི་བར་གནས་པ་དང༌།ཐ་ན་རྫི་བོ་ཚོས་འཕར་སྤྱང་འགོག་བྱེད་དང་ནོར་ལུག་གཅུན་ཆས་སོགས་བོད་མི་རིགས་ཀྱི་འཚོ་བའི་ཁྲོད་ཀྱི་ཡུལ་སྲོལ་གོམས་གཤིས་དང་ཁ་འབྲལ་ཐབས་མེད་པའི་ཕྱི་དངོས་པོའི་ཆ་དང༌། སྨན་ཤར་གྱི་རྒྱན་ཆ་སོགས་ནང་སེམས་ཁམས་ཀྱི་འཛིན་སྟངས་དང་མཛེས་དཔྱོད་ཀྱི་ཆ་ནས་ཀྱང་རིན་ཐང་བླ་མེད་ཀྱི་དངོས་པོ་ཞིག་གི་གོ་གནས་བཟུང་ཡོད་ཚུལ་ནི།བོད་ཀྱི་ལོ་རྒྱུས་དང་ངག་རྒྱུན།དོན་དངོས་ས་བོན་ཅན་གྱི་གླིང་སྒྲུང༌།ལྷ་མོའི་ཟློས་གར་སོགས་ཀྱིས་ར་སྤྲོད་བྱས་ཡོད་པ་ནང་བཞིན།ད་ལྟའི་དུས་སྐབས་སུ་བོད་ཀྱི་འུར་རྡོ་ལ་ལོ་རྒྱུས་ཀྱི་རིན་ཐང་དང༌།གནའ་རྫས་ཀྱི་རིན་ཐང༌།དཔྱད་སྒོའི་རིན་ཐང༌།ཤེས་རིག་ལག་རྩལ་གྱི་རིན་ཐང་ཡོད་པ་འདིའི་ཤུགས་ནས་གཞལ་ན།བོད་ཀྱི་གདོད་མའི་མི་རིགས་དང་མེས་པོ་གོང་མ་ཚོས་ཤེས་རིག་དང༌།སྒྱུ་རྩལ་ལྟ་ཚུལ།ལག་རྩལ་འགྲན་བསྡུར་གྱིས་དངོས་ཆས་གསར་གཏོད་སོགས་དུས་སྐབས་རེ་རེའི་ཐད་ཀ་ནས་འཛམ་གླིང་མི་རིགས་སོ་སོའི་མིག་ལྟོས་བྱེད་ཡུལ་དང༌། མིའི་འཚོ་སྡོད་ཐད་ཀྱི་སྲོལ་དང་གོམས་གཤིས་ཆེས་མང་པོ་ཞིག་གི་འབྱུང་ཁུངས་ཀྱང་ཡིན་པར་གདོད་མི་ཟ་མོད། དུས་རབས་ཉི་ཤུ་བའི་ནང་ཚུན་གྱི་བོད་མི་ཚོ་ནི་འཛམ་གླིང་འདིར་འཚོ་སྡོད་པ་ཡོད་དོ་ཅོག་གི་རྗེས་ལུས་པར་གྱུར་ཡོད་པའི་དོན་ནི། འུ་ཚོས་མེས་པོ་གོང་མ་ཚོས་ཇི་ལྟར་དུས་རབས་ནས་དུས་རབས་བརྒལ་ཚུལ་ལ་ཕྱི་མིག་མ་འཕངས་པ་དང༌།ཁོ་ཚོས་ཤུལ་བཞག་རིག་དངོས་ལ་སྲུང་སྐྱོང་དང་གསར་སྣོན་གྱི་ལག་མགོ་འགུལ་དགོས་པའི་འདུ་ཤེས་རྩ་བ་ནས་བོར་ཏེ།རྟག་ཏུ་གཞན་ལ་རེ་བའི་བག་ཁུམ་རང་ལུགས་པའི་སེམས་གཤིས་ཆགས་པའི་མི་རབས་ཤིག་ཏུ་ཁེལ་སོང་བས་རེད་དོ།།དེས་ན་ད་ནས་བཟུང་འུ་ཚོས་བོད་གདོད་མིའི་ལག་ཆ་འུར་རྡོ་ལྟ་བུ་ལ་ཆ་བཞག་ནས་རང་གི་མེས་པོ་གོང་མ་ཚོའི་མཛད་རྗེས་ཕྲན་ཙམ་ལ་ཡང་མི་རིགས་རང་གི་ཁྱད་ཆོས་འབུར་ཐོན་རེ་མངོན་རྒྱུ་ཡོད་པའི་རྒྱུ་མཚན་སེམས་ལ་ངེས་པར་བྱས་ཏེ། མི་རབས་རང་རང་གི་ཐད་ནས་ཀྱང་ནུས་ཤུགས་རྩལ་སྤྲུགས་ཀྱིས་འཛམ་གླིང་འཚོ་སྡོད་པའི་རྗེས་ཆོད་ཐབས་ལ་བསམ་བློ་གཏོང་དགོས་པར་སེམ་མོ། ཞེས་སྨིན་དབུས་སྤྲང་པོས་ཡུལ་མགོ་ལོག་གླིང་དཀར་སྟོད་ཀྱི་རང་སྤྱིལ་ཝེར་མ་དགྱེས་པའི་དགའ་ཚལ་ནས་བོད་ས་བྱི་ཟླ་ཚེས་ལ་་ཕུལ།
རྒྱབ་སྐྱོར།
返回首页
གཙོ་ངོས།
པར་ལྡན་རྩོམ་ཡིག
ཉེ་ལམ་གསར་བརྗེས།
ཀློག་མཁན་མང་ཤོས།
 
Copyright © 2005 - 2024 Teducn.com
phone:18997245213 QQ:89457590
དྲ་ཚིགས་འདིའི་པར་དབང་ཡོད་ཚད་བོད་ཀྱི་སློབ་གསོ་དྲ་བར་དབང་།
ཡིག་ཟམ། gangjian_xn@hotmail.com
འབྲེལ་གཏུགས་ཁ་པར། ༡༨༩༩༧༢༤༥༢༡༣青ICP备18000196号