རྡེའུ་རྩེད་(ལྷ་སར་ཨབ་འཐོར་གྱི་རྩེད་འཇོ་ཟེར་)ནི། བསྡད་རྩེད་དང་ལངས་རྩེད་གཉིས་ ཡོད་ལ། བསྡད་རྩེད་ནི་མི་གཉིས་གསུམ་མམ་བའི་བར་མཉམ་དུ་ས་སྟེང་དུ་སྒོར་མོ་རྔ་འདྲའི་གྲལ་གྱིས་སྐྱིལ་ཀྲུང་བཅས་པའམ་གཡས་བརྐྱང་གཡོན་བསྐུམ་མམ་ཡང་ན་གཡོན་བརྐྱང་གཡས་བསྐུམ་ཅི་རིགས་ཀྱི་སྒོ་ནས་གྲངས་ངེས་ཅན་ཡིན་པའི་རྡེའུ་རྣམས་ལག་པས་འཕངས་ལེན་བྱེད།དེ་ཡང་ལག་གཡས་པས་རྩེ་ན་གཡོན་པས་ཕྱག་རྒྱ་སྣ་ཚོགས་བྱེད་པའམ་ཡང་ན་ལག་གཡས་གཡོན་བརྗེ་རེས་བྱས་ཏེ་རྩེ། གཞན་ཡང་ལག་ཕྱི་ནས་བསྐྱུར་ཏེ་ནང་དུ་ལེན་པ་དང་།ནང་ནས་བསྐྱུར་ཏེ་ཕྱི་ནས་ལེན་པའམ།ཡང་ན་ལག་པས་རྡེའུ་གཉིས་ནམ་མཁར་འཕངས་ཤིང་གཡོན་པས་ལེན་པའམ།
གཡོན་པས་ལེན་སྐབས་གཡས་པས་མུ་མཐུད་དུ་ས་སྟེང་གི་རྡེའུ་རྣམས་སྒྲུག་དགོས་པ་སོགས་མང་ངོ་། “ལྕང་སྡོང་གཅུས་རིལ་”ཞེས་པ་དང་།“བྲང་ཁོག་ལྡིག་ལྡིག་”ཅེས་པ་སོགས་ནི་རྩལ་གནད་ཅིག་ཏུ་བརྩི་བ་ཡིན་ལ།“ཆུའི་ཕར་རི་ཚུར་རི་”ཞེས་པའི་སྟེང་དུ་རྒྱ་གྲམ་གྱི་རྟགུས་ལྟ་བུའི་རི་མོ་འིག་བྲིས་ཏེ་དེའི་ཤར་ནུབ་གཡས་གཡོན་རྣམས་སུ་རྡེའུ་རེ་བཞག་སྟེ། ལག་གཡས་པས་རྡེའུ་རྣམས་ནམ་མཁར་འཕངས་པ་དང་དུས་མཚུངས་ལག་གཡས་གཡོན་གཉིས་ཀས་ས་སྟེང་གི་རྡེའུ་རྣམས་གཡས་གཡོན་ཤར་ནུབ་བརྗེ་དགོས་པ་ཡིན།
ལངས་རྩེད་ནི་རྩལ་རྩེད་ཀྱི་རང་བཞིན་ཤུགས་ཆེ་ཙམ་ལྡན་པའི་རྡེའུ་རྩེད་ཀྱི་རྣམ་གྲངས་ཤིག་ཡིན་པ་སྟེ།དེར་ཡང་རྡེའུ་ཆུང་གཉིས་སམ་གསུམ་གང་རུང་ཞིག་ལག་གཡས་་་པས་ནམ་མཁར་འཕངས་པ་ལག་གཡོན་པས་ལེན་ཞིང་བསྟུན་མར་ལག་གཡས་པར་བརྒྱུད་སྤྲོད་བྱེད་དགོས་པ་དང་གཅིག་དང་།ཡང་ལག་གཡས་གཡོན་གཉིས་ཀར་རྡེའུ་གཉིས་རེ་བཟུང་སྟེ།ལག་གཉིས་སོ་སོར་འཕངས་ལེན་གྱིས་རྩེད་སྲོལ་ཞིག་ཀྱང་ཡོད། གོང་གི་རྡེའུ་རྩེད་ཀྱི་རིམ་པ་དེ་དག་གི་སྐབས་སུ་རྩེད་མོ་བའམ་རྩེད་འཇོ་བས་གང་འངོད་ལྟར་རྡེའུ་འཕངས་ལེན་དང་ཤར་ནུབ་གཡས་གཡོན་བརྗེ་མི་ཆོག་པར་སྒྲིག་མཐུན་ཁྲིམས་སྲུང་དང་གཞུངས་དྲང་སྤྱི་མཐུན་སྒོས་ལྕང་སྡོང་གཅུས་རིལ་དང་བྲང་ཁོག་ལྡིག་ལྡིག་གི་རྩལ་གནད་ཐོན་དགོས།གལ་ཏེ་སྒྲིག་ལམ་དེ་དག་མབརྩིས་ཚེ། ཚོགས་པ་ལས་ཕྱིར་ཕུད་པ་དང་། ཡང་ན་རྩེད་མཚར་གྱི་ཆད་པ་བཅད་དེ་མི་ཐ་ཤལ་བ་འིག་གི་གྲས་སུ་འཇོག་པ་ལྟ་བུས་ཀྱང་མི་འིག་གིས་མི་ཚེའི་བཤུལ་ལམ་རིང་མོའི་སྐབས་ནམ་འིག་གི་དུས་སུའང་གཤིས་དྲང་གཞུངས་དྲང་བྱེད་དགོས་པ་ནི་མི་ཚེའི་སློབ་གསོ་དང་མི་ཚེའི་ཚད་མ་ཡིན་པ་བསྟན་ཡོད།
ཐུན་མོང་གི་འདུ་ཤེས་ལ་ཤུགས་སྣོན་རྒྱག་ཐུབ་པའི་སྐོར།རྩེད་འཇོ་བ་རྣམས་ཀྱི་ཐུན་མོང་གི་རང་བཞིན་དེས་མི་རྣམས་ཀྱི་ན་ཚུན་རོགས་རམ་དང་མཉམ་འབྲེལ་གྱི་འདུ་ཤེས་ཆེས་ཆེར་སྐྱེད་ཐུབ་སྟེ།དཔེར་ན།རྩེད་འཇོ་བ་རྣམས་ཁག་ཀ་ཁ་གཉིས་སུ་བགོས་ཏེ་ཐེབས་པེད་རྩེ་བ་དང་།རྡོ་སྒོར་རྒྱག་པ།མདའ་རྩེད་རྩེ་བ། གབ་རེས་འུར་རེས་(གཞའ་མ་གཞའ་རེས་)བྱེད་པ་བཅས་ནི་རང་རང་གི་རྩལ་དང་བློ་རིག་འདོན་པ་གཙོ་བོར་བརྩི་ཡང་རང་ཕྱོགས་ཀྱི་རྩེད་འཇོ་བ་དང་ཕན་ཚུན་མཉམ་འབྲེལ་དང་རོགས་རམ་བྱེད་རྒྱུ་ནི་མཐའ་མཇུག་གི་རྒྱལ་ཕམ་ཐག་གཅོད་ཀྱི་གནད་ལ་རག་ལས་པ་ལྟ་བུའོ།
|
