|
མངོན་པ་འོག་མར། ཉོན་མོངས་དྲུག་པོ་ཕྲ་རྒྱས་སུ་བཤད་ལ། ཕྲ་རྒྱས་ཀྱི་དོན། བྱེ་བྲག་སྨྲ་བས། ཀུན་དཀྲིས་ཉོན་མོངས་ལ་འདོད། གནས་མ་བུ་པའི་སྡེ་པ་རྣམས་ཀྱིས་ཉོན་མོངས་པའི་ཐོབ་པ་ལ་འདོད། མདོ་སྡེ་པ་དང་སློབ་དཔོན་དབྱིག་གཉེན་གྱིས་ཉོན་མོངས་པའི་ས་བོན་ལ་བཞེད་པར་བཤད་ཅིང་། ཉོན་མོངས་སྐྱེ་བའི་རྒྱུ་ལ། རྒྱུ་ཕྲ་རྒྱས་མ་སྤངས་པ་དང་། ཉོན་མོངས་སྐྱེ་བའི་ཡུལ་ཉེ་བ་དང་། ཚུལ་བཞིན་མ་ཡིན་པའི་ཡིད་བྱེད་གསུམ་དུ་བཤད་དོ། །མཚུངས་ལྡན་ནི། ཉོན་མོངས་གང་དང་མཚུངས་ལྡན། ཚོར་བ་གང་དང་མཚུངས་ལྡན། རྣམ་ཤེས་གང་དང་མཚུངས་ལྡན་ཏེ་གསུམ་གྱིས་བཤད་ལ། མཚུངས་པར་ལྡན་ཚུལ་མངོན་པ་གོང་འོག་ཅུང་ཟད་མི་འདྲའོ། །རྣམ་གྲངས་ལ་ཉི་ཤུ་རྩ་བཞི་ལས། དང་པོ་ཀུན་སྦྱོར་ལ། རྗེས་སུ་ཆགས་པའི་ཀུན་སྦྱོར། ཁོང་ཁྲོ་བའི་ཀུན་སྦྱོར། ང་རྒྱལ་གྱི་ཀུན་སྦྱོར། མ་རིག་པའི་ཀུན་སྦྱོར། ལྟ་བའི་ཀུན་སྦྱོར། མཆོག་ཏུ་འཛིན་པའི་ཀུན་སྦྱོར། ཐེ་ཚོམ་གྱི་ཀུན་སྦྱོར། ཕྲག་དོག་གི་ཀུན་སྦྱོར། སེར་སྣའི་ཀུན་སྦྱོར་ཏེ་དགུའོ། །ང་རྒྱལ་བདུན་ཏེ། ང་རྒྱལ། ཆེ་བའི་ང་རྒྱལ། ང་རྒྱལ་ལས་ཀྱང་ང་རྒྱལ། ངའོ་སྙམ་པའི་ང་རྒྱལ། མངོན་པའི་ང་རྒྱལ། ཅུང་ཟད་སྙམ་པའི་ང་རྒྱལ། ལོག་པའི་ང་རྒྱལ་ལོ། མངོན་པ་འོག་མར། བདག་མཆོག་ཡིན་ནོ། །བདག་དང་འདྲའོ། །བདག་དམན་ནོ། །བདག་པས་མཆོག་ཡོད་དོ། །བདག་དང་མཉམ་པ་མེད་དོ། །བདག་པས་དམན་པ་མེད་དོ་སྙམ་པའི་ང་རྒྱལ་དགུ་མདོ་ལས་བཤད་པ་དང་། བསྡུ་ན། ང་རྒྱལ། ལྷག་པའི་ང་རྒྱལ། ཅུང་ཟད་སྙམ་པའི་ང་རྒྱལ་གསུམ་དུ་འདུ་བར་བཤད་དོ། །གཉིས་པ་འཆིང་བ་ནི་དུག་གསུམ་མོ། །གསུམ་པ་བག་ལ་ཉལ་ནི། འདོད་པའི་འདོད་ཆགས་ཀྱི་བག་ལ་ཉལ། དེ་བཞིན་དུ་སྦྱར་ཏེ། ཁོང་ཁྲོ། སྲིད་པའི་འདོད་ཆགས། མ་རིག་པ། ལྟ་བ། ཐེ་ཚོམ་གྱི་བག་ལ་ཉལ་ཏེ་བདུན་ནོ། །བཞི་པ་ཉེ་བའི་ཉོན་མོངས་པ་ནི་གོང་དུ་བཤད་པའི་ཉེ་ཉོན་ཉི་ཤུའོ། །ལྔ་པ་ཀུན་དཀྲིས་ནི། རྨུགས་པ། གཉིད། རྒོད་པ། འགྱོད་པ། ཕྲག་དོག སེར་སྣ། ངོ་ཚ་མེད་པ། ཁྲེལ་མེད་པ་སྟེ་བརྒྱད་དོ། །དྲུག་པ་ཆུ་བོ་ནི། འདོད་པ། སྲིད་པ། ལྟ་བ། མ་རིག་པའི་ཆུ་བོ་སྟེ་བཞིའོ། །བདུན་པ་སྦྱོར་བ་ནི། འདོད་པའི་སྦྱོར་བ་སོགས་བཞི་སྟེ་ལྔ་མ་དང་འདྲའོ། །བརྒྱད་པ་ཉེ་བར་ལེན་པ་ནི། འདོད་པ། ལྟ་བ། ཚུལ་ཁྲིམས་བརྟུལ་ཞུགས། བདག་ཏུ་སྨྲ་བ་ཉེ་བར་ལེན་པ་སྟེ་བཞིའོ། །མངོན་པ་འོག་མར། སྐབས་འདིར་ལུང་མ་བསྟན་གྱི་ལྟ་བ་བཅུ་བཞི་ལ། དྲི་བ་བཞི་ནི། མགོ་གཅིག་ཏུ་ལུང་བསྟན་པར་བྱ་བའི་དྲི་བ། རྣམ་པར་ཕྱེ་ནས་ལུང་བསྟན་པའི་དྲི་བ། དྲིས་ནས་ལུང་བསྟན་པའི་དྲི་བ། བཞག་པར་བྱ་བའི་དྲི་བ་དང་བཞིར་བཤད་དོ། །དགུ་པ་མདུད་པ་ལ། བརྣབ་སེམས་ལུས་ཀྱི་མདུད་པ། དེ་བཞིན་དུ་སྦྱར་ཏེ་གནོད་སེམས། ཚུལ་ཁྲིམས་བརྟུལ་ཞུགས་མཆོག་འཛིན། ལྟ་བ་མཆོག་འཛིན་གྱི་ལུས་ཀྱི་མདུད་པ་སྟེ་བཞིའོ། །བཅུ་པ་སྒྲིབ་པ་ནི། འདོད་པ་ལ་འདུན་པ། གནོད་སེམས། རྨུགས་གཉིད། རྒོད་འགྱོད། ཐེ་ཚོམ་གྱི་སྒྲིབ་པ་སྟེ་ལྔའོ། །བཅུ་གཅིག་པ་ཐ་བ། བཅུ་གཉིས་པ་དྲི་མ། བཅུ་གསུམ་པ་སྡིག་པ། བཅུ་བཞི་པ་ཟུག་རྔུ། བཅོ་ལྔ་པ་ཅི་ཡང་། བཅུ་དྲུག་པ་ཉེས་པར་སྤྱོད་པ་རྣམས་དུག་གསུམ་མོ། །མངོན་པ་འོག་མར། དྲི་མ་ལ། སྒྱུ། གཡོ། རྒྱགས་པ། འཚིག་པ། ཁོན་འཛིན། རྣམ་འཚེ་སྟེ་དྲུག་ཏུ་བཤད་དོ། །བཅུ་བདུན་པ་ཟག་པ་ནི། འདོད་པ། སྲིད་པ། མ་རིག་པའི་ཟག་པ་སྟེ་གསུམ་མོ། །བཅོ་བརྒྱད་པ་ཕོངས་པ། བཅུ་དགུ་པ་ཡོངས་སུ་གདུང་བ། ཉི་ཤུ་པ་འཁྲུག་པ། ཉེར་གཅིག་པ་འཐབ་པ། ཉེར་གཉིས་པ་རིམས་ནད། ཉེར་གསུམ་པ་ནགས་སྦྱོར། ཉེར་བཞི་པ་གགས་རྣམས་ཀྱང་དུག་གསུམ་མོ། །མངོན་པ་འོག་པར། ཕྲ་རྒྱས་ཀུན་དུ་འགྲོ་བ་དང་། ཀུན་འགྲོ་མ་ཡིན་པ་གཉིས། གོང་མའི་ཆ་མཐུན་ལྔ་དང་། ཐ་མའི་ཆ་མཐུན་ལྔ་སྟེ་གཉིས་དང་། ཀུན་འགྲོ་མ་ཡིན་པ་གཉིས། གོང་མའི་ཆ་མཐུན་ལྔ་དང་། ཐ་མའི་ཆ་མཐུན་ལྔ་སྟེ་གཉིས་དང་། དམིགས་པ་དང་མཚུངས་ལྡན་གྱི་རྒྱས་འགྱུར་གཉིས་སོགས་བཤད་ཀྱང་གོང་གི་དེར་འདུའོ། །ལོག་པར་ཞུགས་པ་ལ། ཡུལ་དང་ལྟ་བ་ལ་ལོག་པར་ཞུགས་པ། སེམས་ཅན་དང་ལྟ་བ་ལ་ལོག་པར་ཞུགས་པ། ལྟ་བ་ལ་ལོག་པར་ཞུགས་པ། གཉེན་པོ་ལ་ལོག་པར་ཞུགས་པ། ཐམས་ཅད་ལ་ལོག་པར་ཞུགས་པ། སྡུག་ཀུན་ལ་ལོག་པར་ཞུགས་པ་འགོག་ལམ་ལ་ལོག་པར་ཞུགས་པ་སྟེ་བརྒྱད་དོ། །
ཁམས་ཀྱི་དབྱེ་བ་ནི། ཁམས་གོང་མ་གཉིས་ན་ཁོང་ཁྲོ་མེད་དོ། །ཉོན་མོངས་ལྷག་མ་ནི་ཁམས་གསུམ་ཀ་ན་ཡོད་དོ། །སྤང་བྱའི་རིས་ནི། མཐོང་སྤང་ཉོན་མོངས་བརྒྱ་དང་བཅུ་གཉིས། སྒོམ་སྤང་བཅུ་དྲུག་གོ། །མངོན་པ་འོག་མར། འདོད་པ་ན་སྡུག་བསྔལ་མཐོང་བས་སྤང་བར་བྱ་བ་བཅུ། ཀུན་འབྱུང་མཐོང་སྤང་བདུན། འགོག་པ་མཐོང་སྤང་བདུན། ལམ་མཐོང་སྤང་བརྒྱད། སྒོམ་སྤང་བཞི་སྟེ་སོ་དྲུག གཟུགས་གཟུགས་མེད་ན་ཁོང་ཁྲོ་མ་གཏོགས་པ་སུམ་ཅུ་སོ་གཅིག་རེ་སྟེ་དགུ་བཅུ་རྩ་གཅིག་ཏུ་བཤད་དོ། །སྤོང་བྱེད་གཉེན་པོ་ལ། སྤོང་བའི་སྦྱོར་བ་ནི། ཡོངས་སུ་ཤེས་པ། དང་དུ་མི་ལེན་པ། གཉེན་པོ་རྙེད་པ་གསུམ་མོ། །ཡོངས་སུ་ཤེས་པ་ནི། རྒྱུ། ངོ་བོ། ཉེས་དམིགས་ཏེ་གསུམ་ཤེས་པའོ། །གཉེན་པོ་ལ་གྲོལ་བྱེད་ཀྱི་ལམ་བདག་མེད་རྟོགས་པ་དང་། འབྱུང་བྱེད་ཀྱི་ལམ་མི་རྟག་པ་རྟོགས་པ་སོགས་ཏེ་གཉིས་སོ། །སྤངས་པ་ལ་གཉིས་ཏེ། རེ་ཞིག་མི་སྐྱེ་བའི་ཉམས་སྨད་པ་དང་། ས་བོན་སྤངས་པས་སྐྱེར་མི་རུང་བའི་ཆོས་ཅན་དུ་བྱས་པའོ། །ལས་ཀྱི་ཀུན་འབྱུང་ལ། སྒྲས་བརྗོད་ཀྱིས་དབྱེ་ན་ལས་ལྔ་སྟེ། དམིགས་པའི་ལས། བྱེད་པའི་ལས། རྩོལ་བའི་ལས། བསྒྱུར་བའི་ལས། ཐོབ་པའི་ལས་སོ། །ལས་དངོས་ལ། སེམས་པའི་ལས། བསམ་པའི་ལས་གཉིས། སྔ་མ་ལ་བསོད་ནམས་དང་། བསོད་ནམས་མ་ཡིན་པ་དང་། མི་གཡོ་བའི་ལས་གསུམ་མོ། །ཕྱི་མ་ལ་རྟེན་གྱི་སྒོ་ནས་ལུས་ངག་ཡིད་གསུམ་གྱི་གསུམ་དང་། ངོ་བོའི་སྒོ་ནས་དགེ་མི་དགེ་གཉིས་སོ། །སེམས་པ་ལས་གྱུར་པའི་ལས་ལྔ་ནི། གཞན་གྱིས་བསྒོ་བ། གཞན་གྱིས་གསོལ་བ་གདབ་པ། མི་ཤེས་པ། རྩ་བ་ལ་མངོན་པར་ཞེན་པ། ཕྱིན་ཅི་ལོག་གི་སེམས་པ་ལས་གྱུར་པའོ། །སེམས་པའི་ལས་དང་ཡིད་ལས་དོན་གཅིག བསམས་པའི་ལས་ལ་ལུས་ངག་གི་ལས་གཉིས་དང་། དེ་རེ་རེ་ལ་རྣམ་པར་རིག་བྱེད་མ་ཡིན་པ་གཉིས་གཉིས། ཕྱི་མ་ལ་རང་ཡིན་གྱི་སྡོམ་པ་དང་སྡོམ་མིན་དང་བར་མའི་ཚུལ་ཁྲིམས་ཀྱིས་བསྡུས་པའི་རྣམ་རིག་མིན་པ་དང་གསུམ་དུ་བཤད་ཅིང་། དགེ་བ་ལ་དོན་དམ་པའི་དགེ་བ། ངོ་བོ་ཉིད་ཀྱི་དགེ་བ། མཚུངས་ལྡན་གྱི་དགེ་བ། ཀུན་སློང་གིས་དགེ་བ་བཞི། མི་དགེ་བ་དང་། ལུང་མ་བསྟན་གཉིས་ལའང་དབྱེ་བ་དེ་དང་འདྲ། ལས་ཀྱི་ཀུན་སློང་ལ། རྒྱུའི་ཀུན་སློང་དང་། དུས་ཀྱི་ཀུན་སློང་གཉིས་ལས། སྔ་མ་རབ་ཏུ་འཇུག་བྱེད་དང་། ཕྱི་མ་རྗེས་སུ་འཇུག་བྱེད་ཡིན་ལ། དེ་ཡང་རབ་འཇུག་ཡིན་ལ་རྗེས་འཇུག་མ་ཡིན་པའི་མུ། རྗེས་འཇུག་ཡིན་ལ་རབ་འཇུག་མ་ཡིན་པའི་མུ། གཉི་ཀ་ཡིན་པའི་མུ། གཉི་ཀ་མ་ཡིན་པའི་མུ་སྟེ་བཞི་དང་། བྱེ་བྲག་སྨྲ་བས་རིག་བྱེད་མ་ཡིན་པའི་གཟུགས་ཀྱང་རྫས་གྲུབ་ཏུ་འདོད་པར་བཤད་དོ། །
ཡང་ལས་ལ་མྱོང་བར་ངེས་པའི་ལས་དང་། མ་ངེས་པའི་ལས་གཉིས། ངེས་པ་ལ། བྱེད་པ་ངེས་པ། རྣམ་སྨིན་མྱོང་བར་ངེས་པ། དུས་ངེས་པ་སྟེ་གསུམ། ཡང་ལས་བྱས་ཤིང་བསགས་བ། བསགས་ལ་མ་བྱས་པ། བྱས་ལ་མ་བསགས་པ་སྟེ་གསུམ། ལས་ཀྱི་འབྲས་བུ་གསུམ་ནི། རྣམ་སྨིན་གྱི་འབྲས་བུ། རྒྱུ་མཐུན་གྱི་འབྲས་བུ། བདག་པོའི་འབྲས་བུ་སྟེ་གསུམ། དེ་ནི་དགེ་མི་དགེ་གཉིས་ཀ་ལ་འདྲའོ། །ཡང་འཕེན་བྱེད་ཀྱི་ལས་དང་། རྫོགས་བྱེད་ཀྱི་ལས་གཉིས། འཕེན་བྱེད་དགེ་བས་འཕངས་ལ་རྫོགས་བྱེད་མི་དགེ་བས་རྫོགས་པ། འཕེན་བྱེད་མི་དགེ་བས་འཕངས་ལ་རྫོགས་བྱེད་དགེ་བས་རྫོགས་པ། གཉི་ཀ་དགེ་བ། གཉི་ཀ་མི་དགེ་བ་སྟེ་མུ་བཞི། འཕེན་ཚུལ་ལ། ལས་གཅིག་གིས་ལུས་གཅིག་འཕེན་པ། ལས་གཅིག་གིས་ལུས་དུ་མ་འཕེན་པ། ལས་དུ་མས་གཅིག་འཕེན་པ། ལས་གཅིག་གིས་ལུས་དུ་མ་འཕེན་པ་སྟེ་མུ་བཞི། མངོན་པ་འོག་མར། ལས་དུ་མས་སྐྱེ་བ་གཅིག་འཕེན་པ་དང་། ལས་གཅིག་གིས་སྐྱེ་བ་དུ་མ་འཕེན་པ་བྱེ་སྨྲའི་ལུགས་ལ་མེད་པར་བཤད་དོ། །ལས་སྨིན་ཚུལ་གྱི་རིམ་པ་ལ། ལྕི་ཡང་གི་ཁྱད་པར་ཡོད་ན། ལྕི་བ་ཐོག་པར་སྨིན་ལ། དེ་ཡང་འདྲ་ན་འཆི་དུས་གང་མངོན་དུ་གྱུར་པ་དང་། དེ་ཡང་འདྲ་ན་གོམས་ཤས་གང་ཆེ་བ་དང་། དེ་ཡང་འདྲ་ན་ཐོག་མར་གང་བྱས་པ་སྔོན་ལ་སྨིན་པར་བྱེད་དོ། །མི་དགེ་བའི་ལས་ལམ་བཅུ་ནི། སྲོག་གཅོད། མ་བྱིན་ལེན༑ ལོག་གཡེམ་སྟེ་ལུས་ཀྱི་གསུམ། རྫུན། ཕྲ་མ། ཚིག་རྩུབ། ཚིག་ཀྱལ་པ་སྟེ་ངག་གི་བཞི༑བརྣབ་སེམས། གནོད་སེམས། ལོག་ལྟ་སྟེ་ཡིད་ཀྱི་གསུམ་དང་བཅུའོ། །དེ་བཅུ་ཀ་ཡང་རྩོམ་བྱེད་དུག་གསུམ་གང་རུང་དང་། རྫོགས་བྱེད་དུག་གསུམ་ཅི་རིགས་པས་བྱེད་དོ། །ལོག་གཡེམ་ལ། བགྲོད་བྱ་མིན་པ། ཡན་ལག་མིན་པ། དུས་མིན་པ། གནས་མིན་པའི་བྱེ་བྲག་གིས་བཞིའོ། །རྫུན་སྨྲ་ལ། མཐོང་བ། ཐོས་པ། བྱེ་བྲག་ཕྱེད་པ། རྣམ་པར་ཤེས་པ་བཞི་ལ། མ་མཐོང་བ་སོགས་སུ་སྨྲ་བ་བཞི་དང་། མ་མཐོང་བ་སོགས་བཞི་ལ། མཐོང་བ་སོགས་སུ་སྨྲ་བ་བཞི་སྟེ་བརྒྱད་དོ། །ལོག་ལྟ་བ། རྒྱུ། འབྲས་བུ། བྱེད་པ། ཡོད་པའི་དངོས་པོ་ལ་སྐུར་བ་འདེབས་པ་བཞི། བྱེད་པ་ལ། ས་བོན་འདེབས་འཛིན་ལ་སྐུར་བ། འགྲོ་འོང་ལ་སྐུར་བ། སྐྱེ་འགྱུར་གྱི་བྱེད་པ་ལ་སྐུར་བ་སྟེ་གསུམ་མོ། །ལས་ལམ་བཅུ་ལས། ལུས་ངག་གི་བདུན་ནི་ལས་ཡིན་ལ། ཡིད་ཀྱི་གསུམ་ནི་ལས་མིན་པར་མངོན་པ་འོག་མ་ལས་བཤད་དོ། །བཅུ་ཀ་ཡང་གཞི། བསམ་པ། སྦྱོར་བ། མཐར་ཐུག་སྟེ་བཞི་བཞི་དང་། བསམ་པ་ལ། འདུ་ཤེས། ཉོན་མོངས། ཀུན་སློང་གསུམ་གསུམ་གྱིས་བཤད་དོ། །དགེ་བ་བཅུའི་ལས་ལམ་ནི། སྲོག་གཅོད་སྤོང་བ་སོགས་མི་དགེ་བ་ལས་བཟློག་སྟེ་སྦྱར་རོ། །ལས་དེ་དག་གི་བྱེད་ལས་ནི། ལས་སོ་སོར་ངེས་པ། ལས་འཕེལ་ཆེ་བ། ལས་བྱས་པ་དང་མི་ཕྲད། ལས་ཆུད་མི་ཟ་བའོ། །སྟོབས་ལྡན་གྱི་ལས་ལ། གཉེན་པོ་སྟོབས་ལྡན། མི་མཐུན་ཕྱོགས་སྟོབས་ལྡན། རང་བཞིན་སྟོབས་ལྡན། ཞིང་དང་ཀུན་སློང་གིས་སྟོབས་དང་ལྡན་པ་བཞི་དང་། ཡང་ཞིང་། དངོས་པོ། ངོ་བོ་ཉིད། རྟེན། ཀུན་སློང་དྲག་པོ། བསམ་པ། གྲོགས༑ ལན་མང་དུ་བྱེད་པ། མང་པོ་ཚོགས་པའི་སྒོ་ནས་སྟོབས་དང་ལྡན་པ་སྟེ་དགུའོ། །སྟོབས་དང་མི་ལྡན་པ་ནི་དེ་ལས་ལྡོག་པའོ། ། 7/11 མདུན་ངོས། 上一页 5 6 7 8 9 10 下一页 尾页 |
