ད་སྔ་གཟིགས་བཞིན་པ།  མདུན་ངོས། > གཞུང་ལུགས་ཞིབ་འཇུག > བོད་ཡིག
༄༅། །གཞི་རིམ་སློབ་གསོ་ཡང་འཛམ་གླིང་ལ་ཁ་ཕྱོགས་དགོས།
སྤེལ་དུས།04-30  ཡོང་ཁུངས།  རྩོམ་པ་པོ།གཅན་རོང་བསྟན་འཛིན།
         གསུམ།    ནུས་པ་དང་མི་གཤིས།
         བྱིས་པའི་ནུས་པ་སྐྱེད་སྲིང་ནི་བྱིས་པའི་མི་ཚེ་ཧྲིལ་བོའི་འཚོ་གནས་ལ་འབྲེལ་བ་དམ་པོ་ཡོད་པའི་བྱ་བ་གལ་ཆེན་ཞིག་ཡིན་པར་མ་ཟད། མིའི་ནུས་པ་བཟང་ངན་དང་མི་གཤིས་ཆགས་པ་ལ་ཚད་མི་འདྲ་བའི་སྒོ་ནས་ཤན་ཤུགས་ཐེབས་བཞིན་ཡོད་པས། མིའི་ནུས་པ་བཟང་ངན་གྱིས་མི་གཤིས་ཐག་གཅོད་བྱེད་བཞིན་ཡོད་ལ། མི་གཤིས་བཟང་ངན་གྱིས་མི་ཚེའི་རིན་ཐང་ཧྲིལ་བོ་ཐག་གཅོད་བྱེད་བཞིན་ཡོད་དེ། དཔེར་ན། ཤེས་བྱ་ཡོན་ཏན་ཕུན་སུམ་ཚོགས་ཀྱང་མི་གཤིས་ཞན་ཚེ་སྤྱི་ཚོགས་ལ་ཕན་ལས་གནོད་པ་ཆེ་བ་གང་མང་ཞིག་ཡོད་པ་དང་། མི་གཤིས་ཕུན་སུམ་ཚོགས་ཚེ་ཤེས་ནུས་ཅུང་ཞན་ན་ཡང་སྤྱི་ཚོགས་ལ་ཕན་པ་ཆེ་བའི་དོན་དངོིས་འདི་དག་གིས་ནུས་བ་གལ་ཆེ་ལ་མི་གཤིས་དེ་བས་ཀྱང་གལ་ཆེ་བར་མ་ཟད། ནུས་པ་རབ་འབྲིང་ཐ་གསུམ་ལ་བརྟེན་ནས་མི་གཤིས་རབ་འབྲིང་ཐ་གསུམ་ཆགས་པ་ཡིན་པས། ནུས་པ་སྐྱེད་སྲིང་གི་སློབ་གསོར་སྔར་ལས་གཙིགས་ཆེན་བྱེད་དགོས་པ་རེད།
         ཐོག་མར་དཀའ་ཁག་དང་སྐྱོན་བརྗོད། ཟུར་ཟ། མགོ་གནོན་སོགས་ཐེག་པའི་དཔའ་ངར་བརྟན་བརླིང་གི་བསམ་བློའི་སྤུས་ཚད་དང་ནུས་རྩལ་ཕུན་སུམ་ཚོགསཔ་ཞིག་མེད་ཚེ་འགྲན་རྩོད་དུས་རབས་ཀྱི་ནང་དུ་དཀའ་ཁག་སྣ་ཚོགས་ཀྱིས་ཕམ་ཁའི་ལམ་དུ་བསྐྱལ་ངེས་ཡིན་པས། ཆུང་དུས་ནས་ནུས་པ་དང་མི་གཤིས་ཀྱི་སྤུས་ཚད། སྤོབས་པ་བཅས་སྐྱེད་སྲིང་བྱེད་རྒྱུ་ཡང་ཧ་ཅང་གལ་ཆེ་བ་ཞིག་རེད་སྙམ། སྤྱི་ཚོགས་ཀྱི་ལག་ལེན་ནི་གཞུང་ལུགས་ཀྱི་མ་ཡུམ་དང་བསླབ་དེབ་གསོན་པོ་ཞིག་ཡིན་པས། སྤྱི་ཚོགས་ལག་ལེན་དང་ཟུང་འབྲེལ་བྱས་ཏེ་ཞིབ་འཇུག་རང་བཞིན་གྱི་སློབ་སྦྱོང་དང་ལྟ་ཞིབ་ཀྱི་སློབ་སྦྱོང་། ལག་ལེན་རང་བཞིན་གྱི་སློབ་སྦྱོང་། གཤིབ་བསྡུར་རང་བཞིན་གྱི་སློབ་སྦྱོང་དང་སློབ་ཁྲིད་བྱེད་པར་གཙིགས་ཆེན་བྱེད་དགོས་བ་ལས། དགེ་རྒན་དང་ཁྱིམ་བདག་རྣམས་ཀྱིས་སློབ་མའི་སློབ་སྦྱོང་གི་ཕྱོགས་ལ་ཚོད་འཛིན་ཐལ་དྲགས་མི་རུང་ལ་གཏན་ནས་དོ་དམ་མ་བྱས་ན་ཡང་མི་ཆོག་པས། སློབ་མའི་སློབ་སྦྱོང་ཕྱོགས་ཀྱི་བྱ་བ་གང་ཞིག་སློབ་གྲྭ་དང་ཁྱིམ་བདག་གི་འགན་དབང་ཡིན་པ་དང་། གང་ཞིག་སློབ་མ་དང་སྤྱི་ཚོགས་ཀྱི་འགན་དབང་ཡིན་པ་ལ་བསམ་གཞིགས་དང་ཞིབ་འཇུག་དཔྱིས་ཕྱིན་པ་ཞིག་བྱེད་དགོས། དཔེར་ན། ཁྱིམ་བདག་སྐོར་ཞིག་གིས་བྱིས་པའི་སློབ་གྲྭའི་ལས་བྱ་ཡན་ཆད་རང་གིས་འབྲི་བ་དང་། དམའ་འབྲིང་གི་སློབ་མའི་གྱོན་པ་ཁྱིམ་བདག་གིས་བསྐོན་པ། སློབ་ཆུང་གི་སློབ་མར་ཟ་མ་ཁ་ནང་དུ་འཇོག་པ་སོགས་ཀྱི་བྱེད་སྟངས་དེས་བྱིས་པའི་ཁེར་རྐྱང་གི་འཚོ་གནས་དང་མི་ཇི་ལྟར་བྱེད་ཚུལ། དོན་ཇི་ལྟར་སྒྲུབ་ཚུལ་སོགས་ཀྱི་སྤུས་ཚད་འཕེལ་རྒྱས་ལ་ཤན་ཤུགས་ཚབས་ཆེན་ཐེབས་ངེས་རེད།
         འོན་ཀྱང་སློབ་མ་རྣམས་སློབ་ཆེན་འགྲིམས་སྐབས་ཕྱིན་ཆད་རང་གི་འཕེལ་རྒྱས་ཀྱི་རེ་བ་ཕྱོགས་གང་ན་ཡོད་པ་ཐག་གཅོད་བྱེད་རྒྱུ་ནི་སློབ་མའི་མི་ཚེ་ལ་ཐད་ཀར་འབྲེལ་བ་ཡོད་པའི་དོན་ཆེན་ཞིག་ཡིན་མོད། བསམ་ཡུལ་ལས་འདས་པ་ཞིག་ནི་འགན་འཁུར་འདི་དག་ཐམས་ཅད་སློབ་མ་དང་ཁྱིམ་བདག་ཁོ་ནའི་སྟེང་དུ་དེད་ཡོད་པ་རེད། ཕྱི་གླིང་ལ་མཚོན་ན། སློབ་མ་སློབ་ཆེན་འགྲིམས་པའི་སྔོན་དུ་སློབ་གྲྭ་དང་དགེ་རྒན་གྱིས་སློབ་མ་རེ་རེའི་ཕྱོགས་ཡོངས་ཀྱི་གནས་ཚུལ་དབྱེ་ཞིབ་ཆ་ཚང་བ་བྱས་རྗེས། ཕྱིན་ཆད་ཆེད་ལས་གང་གི་ཕྱོགས་ལ་རེ་བ་ཆེ་ན། ཡིག་ཐོག་ནས་སློབ་མ་རེ་རེར་དོན་དངོས་དང་མཐུན་པའི་བསམ་འཆར་འདོན་པ་ལྟ་བུ་རེད།
         དེ་བས། སློབ་གསོའི་ཆོས་ཉིད་དང་སློབ་མའི་ལུས་སེམས་འཕེལ་རྒྱས་ཀྱི་ཆོས་ཉིད་ལྟར་སྤྱི་ཚོགས་དང་། སློབ་གྲྭ། ཁྱིམ་བདག སློབ་མ་རྣམས་ཀྱིས་རང་རང་གི་འགན་དབང་རང་རང་གིས་དང་དུ་ལེན་རྒྱུ་དེ་ཡང་བྱིས་པའི་མདུན་ལམ་ལ་ཐད་ཀར་རག་ལས་བའི་བྱ་བ་གལ་ཆེན་ཞིག་ཡིན་ལ། མཐོ་རིམ་སློབ་གྲྭ་འགྲིམས་སྐབས་སློབ་གྲྭ་དང་ཆེད་ལས་འདེམས་ཏེ་རེ་བ་འབྲི་རྒྱུ་ནི་སློབ་མ་དང་ཁྱིམ་བདག་ཁོ་ནས་ཐག་གཅོད་ནུས་པ་ཞིག་མ་ཡིན་པས། སློབ་གྲྭ་སོ་སོས་འགན་ཁུར་ཏེ་སློབ་མ་རེ་རེར་ཕྱིན་ཆད་སྐྱེད་སྲིང་གི་བསམ་འཆར་འདོན་པ་ལས་འགན་ཁུར་ཡོད་ཚད་ཁྱིམ་བདག་གི་སྟེང་དུ་འདེད་མི་རུང་ལ་ཁྱད་པར་དུ་གཞི་རིམ་ན་གནད་དོན་འདིས་སློབ་མའི་མདུན་ལམ་དང་མི་ཚེ་ལ་ཤན་ཤུགས་ཚབ་ཆེན་ཐེབས་བཞིན་ཡོད།
         བཞི་བ། རང་ཉིད་དང་འཛམ་གླིང་།
         དུས་རབས་འཕེལ་རྒྱས་ཀྱི་དབང་གིས་རང་ཉིད་དང་འཛམ་གླིང་གི་བར་ཐག་ཇེ་ཉེ་ནས་ཇེ་ཉེར་འགྱུར་བཞིན་ཡོད་ཡོད་པས། ཕྱི་གླིང་གི་ཡིག་རིགས་དང་སྐད་རིགས་སྦྱངས་བ་དང་མཉམ་དུ་ཁོ་ཚོའི་སྔོན་ཐོན་གྱི་བྱེད་ཐབས་དང་སྔོན་ཐོན་གྱི་ལྟ་ཚུལ་ལ་སློབ་སྦྱོང་བྱས་ཏེ། འགྲན་རྩོད་ཀྱི་ནུས་པ་དང་རྒྱལ་སྤྱིའི་འཇོན་ཐང་མི་སྣའི་རྨང་གཞིའི་སྤུས་ཚད་མཐོར་འདེགས་ཡོང་བར་གཙིགས་ཆེན་བྱེད་དགོས་པར་མ་ཟད། ད་དུང་རང་གི་རིག་གནས་ལ་སློབ་སྦྱོང་དང་ཞིབ་འཇུག་གཏིང་ཟབ་བྱས་ནས་རང་གི་ཤེས་ཡོན་གྱི་གྲུབ་ཆ་གྱ་ནོམ་པ་ཞིག་ཏུ་གཏོང་དགོས་པ་ལས་ཇི་ལྟར་ནུབ་ལུགས་ཅན་ཏུ་བསྒྱུར་ན་དེ་ལྟར་འཛམ་གླིང་དུ་ཁ་ཕྱོགས་པ་ཡིན་པའི་ངེས་པ་ག་ལ་ཡོད་སྙམ།
         རིག་གནས་ཀྱིས་མིའི་སྤུས་ཚད་ཀྱི་ཚབ་བྱེད་བཞིན་ཡོད་པས། ཕྱོགས་སོ་སོའི་ཤེས་བྱ་མང་པོ་འཛོམས་དགོས་ལ་རྒྱུན་མི་ཆད་པར་སྡེབ་སྒྲིག་བྱེད་དགོས་མོད། འོན་ཀྱང་ནུབ་ལུགས་ཀྱི་སྔོན་ཐོན་རིག་གནས་ཁྲོད་ནའང་རྗེས་ལུས་ཀྱི་ཆ་མི་ཉུང་བ་ཞིག་ཡོད་ངེས་རེད།
    
    དེ་བས། ཐོག་མར་རང་གི་ཕུན་སུམ་ཚོགས་པའི་རིག་གནས་དང་ལོ་རྒྱུས་ལ་སློབ་སྦྱོང་དཔྱིས་ཕྱིན་པ་ཞིག་བྱས་ཏེ། རྒྱལ་གཅེས་དང་དམངས་གཅེས་ཕ་ཡུལ་ལ་གཅེས་བའི་སྤུས་ཚད་ཀྱི་རྨང་གཞིའི་སྟེང་དུ་འཛམ་གླིང་སྔོན་ཐོན་ཤེས་རིག་གི་སྤུས་ཚད་ཀྱི་རྨང་གཞི་ཆགས་པར་གཙིགས་ཆེན་བྱེད་དགོས་བ་རེད་སྙམ་མོ།། 

 

རྒྱབ་སྐྱོར།
返回首页
གཙོ་ངོས།
པར་ལྡན་རྩོམ་ཡིག
ཉེ་ལམ་གསར་བརྗེས།
ཀློག་མཁན་མང་ཤོས།
 
Copyright © 2005 - 2024 Teducn.com
phone:18997245213 QQ:89457590
དྲ་ཚིགས་འདིའི་པར་དབང་ཡོད་ཚད་བོད་ཀྱི་སློབ་གསོ་དྲ་བར་དབང་།
ཡིག་ཟམ། gangjian_xn@hotmail.com
འབྲེལ་གཏུགས་ཁ་པར། ༡༨༩༩༧༢༤༥༢༡༣青ICP备18000196号