ད་སྔ་གཟིགས་བཞིན་པ།  མདུན་ངོས། > གཞུང་ལུགས་ཞིབ་འཇུག > བོད་ཡིག
༄༅། །བོད་ཡིག་སློབ་གསོའི་རྒྱུ་སྤུས་ཕྱོགས་ཀྱི་གནས་ཚུལ་དང་ལེགས་བཅོས་བྱེད་དགོས་ཀྱི་བསམ་འཆར།
སྤེལ་དུས།04-30  ཡོང་ཁུངས།  རྩོམ་པ་པོ།དོར་ཞི་གདོང་དྲུག་སྙེམས་བློ།

 

 

 

                                                            དོར་ཞི་གདོང་དྲུག་སྙེམས་བློ།  

དེ་ཡང་སློབ་གསོའི་བྱ་བའི་ལེགས་ཉེས་སློབ་གསོའི་རྒྱུ་སྤུས་སྟེང་ནས་ཕྱེ་བ་ཡིན་ལ། སློབ་གྲྭ་དང་སློབ་མ་མང་ཉུང་གི་སྟེང་ནས་ཕྱེ་བ་མིན། བཟོ་གྲྭ་ལྟ་བུར་མཚོན་ན་བཟོ་གྲྭའི་བཟང་ངན་བཟོ་གྲྭ་ཆེ་ཆུང་དང་ཐོན་རྫས་མང་ཉུང་སྟེང་ནས་ཕྱེ་བ་མིན་ལ། ཐོན་རྫས་ཀྱི་རྒྱུ་སྤུས་བཟང་ངན་སྟེང་ནས་ཕྱེ་བ་ལྟ་བུ་རེད།  སློབ་གྲྭ་ཡང་མི་ཡོན་ཏན་ཅན་སྐྱེད་སྲིང་བྱེད་སའི་བཟོ་གྲྭ་ལྟ་བུ་ཡིན་པས། དགེ་རྒན་རྣམས་ལམིའི་རིགས་ཀྱི་བསམ་བློ་བཟོ་རྩལ་མཁས་པཞེས་པའི་མིང་གཟི་བརྗིད་ཅན་ཞིག་ཀྱང་བཏགས་འདུགདེང་སྐབས་རྒྱལ་ཁབ་གཞུང་ནས་ཀྱང་སློབ་གསོའི་རྒྱུ་སྤུས་ཇེ་མཐོར་གཏོང་བ་དེ་སློབ་གསོ་བཅོས་བསྒྱུར་གྱི་རྩ་གནད་ཅིག་ཏུ་བྱས་འདུགརང་རེ་བོད་ཡིག་སློབ་གསོར་མཚོན་ན་ཡང་གཞི་རིམ་དང་མཐོ་རིམ་སློབ་གསོ་གང་ལ་ཡང་དཀའ་ལས་དང་གནད་དོན་མང་དུ་ཡོད་ཀྱང༌། སློབ་གསོའི་སྤུས་ཚད་ཞན་པ་དེ་ཐུན་མོང་གི་གནད་དོན་ཞིག་ཏུ་གྱུར་འདུག་པས།ཚང་མས་བཏང་སྙོམས་བྱེད་མི་རུང་སྙམ་ཞིང༌། འདིར་དེའི་ཕྱོགས་ཀྱི་གནས་ཚུལ་དང་ལེགས་བཅོས་ཀྱི་བསམ་འཆར་ཅུང་ཟད་སྨྲས་ན།

  དང་པོ། བོད་ཡིག་སློབ་གསོའི་རྒྱུ་སྤུས་ཕྱོགས་ཀྱི་གནད་དོན།

   དེ་ཡང་རྒྱལ་ཁབ་ཕྱི་ནང་དང་གནའ་དུས་དང་དེང་དུས་ཀྱི་སློབ་གསོ་གང་ཡིན་ཀྱང༌། གཞི་དང་རྩའི་བར་གྱུར་པ་ནི་སྐད་ཡིག་གི་སློབ་གསོ་ཡིན་ལ། སྐད་ཡིག་ཤེས་པ་རིག་གནས་སློབ་གསོ་ཀུན་གྱི་གཞི་རྩ་ཡིན་པར་མ་ཟད། རིག་གནས་ཚན་རིག་གཞན་དག་ཤེས་ཐབས་དང༌།བེད་སྤྱོད་ཐབས་ཀྱི་ལག་ཆ་དང༌། སྤྱི་ཚོགས་ཀྱི་འཚོ་བར་བྱ་བ་དོན་དག་གང་སྒྲུབ་ཀྱང་ཁ་མིག་ལག་པ་བཞིན་དུ་མེད་དུ་མི་རུང་བའི་ལག་ཆ་གཅིག་པུ་ཡིན། སྐད་ཡིག་ནི་རིག་གནས་ཀྱི་བང་མཛོད་ཀྱང་ཡིན་ལ། བང་མཛོད་ཀྱི་ལྡེ་མིག་ཀྱང་ཡིན། མི་རིགས་རང་གི་སྐད་ཡིག་མི་རིགས་རང་གི་རིག་གནས་ཀྱི་བང་བཛོད་དང་ལྡེ་མིག་ཡིན་ཏེ། མི་རིགས་ཀྱི་རིག་གནས་ཚང་མ་སྐད་ཡིག་གི་སྟེང་ནས་བརྒྱུད་དེ་འོངས་པ་དང༌། སྐད་ཡིག་ལ་བརྟེན་ ནས་ཤེས་དགོས་ལ།སྐད་ཡིག་གཞན་པའི་སྟེང་ནས་མི་རིགས་གཞན་ཞིག་གི་རིག་གནས་ཆ་ཚང་བ་དང་གཏིང་ཕྱིན་པ་ཞིག་ཤེས་མི་ཐུབ་ཅེས་ཁོ་བོས་མགྲིན་པ་གཟེངས་སུ་བསྟོད་ནས་སྨྲ་བར་སྤོབས། མི་རིགས་རང་གི་སྐད་ཡིག་བཟང་ཙམ་མ་ཤེས་ན། མི་རིགས་རང་གི་རིག་གནས་བཟང་ཙམ་ཤེས་མི་ཐུབ།མི་རིགས་རིང་གི་སྐད་ཡིག་མི་ཤེས་པའི་མི་རྣམས།མི་རིགས་རང་གི་རིག་གནས་ཕྱོགས་ལ་ཡང་ལོང་བ་དང་མཚུངས་པ་རིགས་པ་དང་མངོན་སུམ་ཉམས་མྱོང་སྟེང་ནས་ཤེས་ཐུབ་བོ།། སྐད་ཡིག་གང་ཤེས་ཤིང་བག་ཆགས་ཟབ་པ་རྣམས། སྐད་ཡིག་དེའི་རིག་གནས་ལ་དགའ་ཞེན་ཆེ་བ་ཡང་དངོས་པོའི་ཆོས་ཉིད་ལྟ་བུར་སྣང༌།དེ་ལས་སྐད་ཡིག་སློབ་གསོ་གལ་ཆེ་བའི་རྒྱུ་མཚན་ཡང་ཤེས་ཐུབ་བོ།།

         སྐད་ཡིག་གི་ཡོན་ཚད་ནི་གཏམ་བཤད་པའི་རྩལ་དང་སྤོབས་པ། ཡི་གེ་འབྲི་རྩོམ་གྱི་བྱང་ཆ་དང་ཆུ་ཚདསྐད་ཡིག་དེ་ལས་གྲུབ་པའི་ཡིག་ཚང་ཀློག་པའི་གོ་བ་ལོན་ཚད་སོགས་ཀྱི་སྟེང་ནས་མཚོན་པ་ཞིག་ཡིན་པས།ཚད་ཐིག་དེ་ལས་དེང་སྐབས་ཀྱི་བོད་ཡིག་སློབ་གྲྭ་མཐོ་འབྲིང་གི་སློབ་གསོའི་རྒྱུ་སྤུས་མཐོ་དམན་ཅུང་ཟད་གཞལ་ན། གཅིགརྩོམ་ཡིག་གི་གནས་ ཚུལ། ལོ་དུ་མའི་སྔོན་ལསྦྲང་ཆརགྱི་རྩོམ་སྒྲིག་པ་རྒན་པ་ཞིག་གིས་ང་ལ་བསམ་འཆར་བཤད་པར། དེང་སང་སློབ་གྲྭ་ཆེན་མོའི་སློབ་མ་དང༌།སློབ་གྲྭ་ཆེན་མོ་ནས་མཐར་ཕྱིན་པའི་ན་གཞོན་ཕོ་མོའི་ནང་ན་རྩོམ་ལ་དགའ་བ་དང་རྩོམ་འབྲི་མཁན་མང་དུ་འདུག འོན་ཀྱང་ཚིག་སྦྱོར་བདེ་བ་དང་ཡི་གེ་ལ་དགཆ་ཡོད་པ་ཤིན་ཏུ་དཀོན་ཞིང༌། ཚིག་ལོག་བརྡ་ལོག་ཡིག་ནོར་མང་བས། རྩོམ་ཕལ་ཆེར་གཞི་ནས་མ་བཅོས་ན་འཕུད་ཚུལ་མེད་བཅོས་ན་ལས་ཚེགས་ཆེ་བས། ངེད་ཅག་བོད་ཡིག་རྩོམ་སྒྲིག་པ་རྣམས་ལ་རྒྱ་ཡིག་གི་རྩོམ་སྒྲིག་པ་ལ་མེད་པའི་མི་འོས་པོའི་འགན་ཁུར་མང་བོ་ཞིག་མགོར་བབས་ཡོད་པས་དཀའ་ཚེགས་ཤིན་ཏུ་ཆེ། ཁྱེད་ཅག་སློབ་གྲྭ་ཆེན་མོའི་དགེ་རྒན་རྣམས་ཀྱིས་ཐུགས་མཉམ་འཇོག་དགོས་འདུག་ཟེར། སྐད་ཆ་དེ་ཐོས་འཕྲལ་ངའི་ངོ་ལ་མེ་སྟག་ལྷུང་བ་ལྟ་བུར་ཚ་རེག་གེར་སོང༌། དེ་ཡང་ཡིན་ཏེ། ངེད་ཅག་དགེ་རྒན་གྱི་གོ་སར་བསྡད་ནས་སློབ་མ་དེ་འདྲ་བྱུང་ན་ཤིན་ཏུ་ངོ་གནོང་དགོས་པ་ཞིག་རེད།དེ་ནས་བཟུང་སྟེ་བདག་གིས་ཀྱང་བོད་ཡིག་གི་དུས་དེབ་དང་གསར་འགྱུར།རྩོམ་དེབ་སོགས་མིགསྔར་གང་མཐོང་མཐོང་ལ་མཉམ་འཇོག་ཅུང་ཟད་བྱས་པར།སློབ་གྲྭ་ཆེན་མོའི་སློབ་གྲྭ་བ་དང༌། སློབ་གྲྭ་མཐོ་འབྲིང་ནས་མཐར་ཕྱིན་པའི་ན་གཞོན་རྣམས་ཀྱིས་བྲིས་པའི་རྩོམ་ནང་དུ་ཡིག་སྐྱོན་དང་ཚིག་སྐྱོན། དོན་སྐྱོན་ཉུང་ཉུང་ཙམ་མ་ཡིན་པར། གང་ཡིན་སར་མཐོང་ཞིང་ཧ་ལས་དགོས་པའི་ཚོད་དུ་སྣང་ལ། ཡིག་སྐྱོན་ཕྱོགས་ལ་ཡི་གེ་མ་དག་པ་དང༌།རྣམ་དབྱེ་དང་ཚིག་ཕྲད་སོགས་དགོས་སར་མི་འཇོགམི་དགོས་སར་འཇོག་པ་སོགས་ཆད་ལྷག་ནོར་འཁྲུལ་མང་བ་དང༌། ཆིག་སྐྱོན་ཕྱོགས་ལ་ཙམ་སྒྲ་དང༌། ངང་སྒྲ་སོགས་ལོག་པར་སྦྱར་པ་དང༌།རྒྱ་སྐད་ཀྱི་ཚིག་གི་སྦྱོར་སྟངས་མང་དུ་བསྲེས་པ་དང༌། ཆིག་སྔ་ཕྱིའི་མཚམས་སྦྱོར་གྱི་སྒྲ་ཆད་ཅིང་དོན་སྔ་ཕྱི་མི་འབྱོར་བ་དང༌། དོན་སྐྱོན་གྱི་ཕྱོགས་ལ་བརྗོད་འདོད་ཀྱི་དོན་ཇི་ལྟ་བ་བཞིན་དུ་མཚོན་ཐུབ་ཀྱིན་མེད་པ་དང་།འགལ་མ་ངེས་ཐེ་ཚོམ་ཅན་གྱི་ཚིག་སྦྱོར་དང༌། ཚིག་དང་དོན་སྟེང་གི་ཞིབ་ཆ་མེད་པའོ།། དེ་ལྟ་བུའི་རྩོམ་སྐྱོན་དེ་རིགས་རྩོམ་འབྲི་མཁན་ གསར་བ་རྣམས་ཀྱི་རྩོམ་ནང་དུ་ཡོད་པར་མ་ཟད། རྩོམ་པ་པོའི་མིང་ཡོད་ལ་རྩོམ་པ་པོའི་གྲལ་དུའང་ཚུད་པར་རློམ་ཞིང་། སྨྱུག་རྩེ་རང་དགར་སྐྱོད་པ་མང་བོ་ཞིག་གི་རྩོམ་གྱི་ནང་དུ་ཡང་རིག་རྒྱུ་ཡོད་པས།རྩོམ་པ་པོ་ཁ་ཤས་ཤིག་གི་སྐྱོན་མིན་ལ། རྩོམ་སྒྲིག་པ་དང་སློབ་གྲྭའི་དགེ་རྒན་ཚང་མས་མཉམ་འཇོག་བྱེད་དགོས་པའི་གནད་དོན་ཞིག་ཏུ་གྱུར་འདུགབདག་གིས་གྱ་བདུན་ལོ་ལ<སྙན་ཚིག་རྒྱ་མཚོའི་གསར་སྐྱེས་མེ་ཏོག>ཅེས་པའི་རྩོམ་ལ་ཅུང་ཟད་དཔྱད་པཞེས་པ་ཀན་ལྷོའིཟླ་ཟེརདང༌།རྩོམ་དཔྱད་དགག་ལན་ངན་རྟོག་དྲི་མ་འཁྲུད་པའི་རིགས་ལམ་བདུད་རྩིའི་ཆུ་རྒྱུནཞེས་པ་ནུབ་བྱང་མི་རིགས་སློབ་གྲྭ་ཆེན་མོའི་བོད་ཡིག་དུས་དེབ་སྟེང་དུ་བཀོད། རྩོམ་ཡིག་སྔ་ཕྱི་དེ་གཉིས་ཀྱང་བརྡ་ལོག་ཚིག་ལོག་སྤེལ་བའི་རྩོམ་ཡིག་སྐོར་ཅིག་ལ་དམིགས་ནས་བྲིས་པ་ཡིན། དཔེར་ན།སྙན་ཚིག་རྒྱ་མཚོའི་གསར་སྐྱེས་མེ་ཏོགཅེས་པའི་དཔྱད་གཏམ་ཐུང་ཐུང་ཡི་གེ་ཚེག་བར་ཉིས་བརྒྱ་ཙམ་ལས་མེད་པ་དེའི་ནང་ན་ཚིག་ལོག་བརྡ་ལོག་དྲུག་ཅུ་ལྷག་ཙམ་འདུག དེ་ཡང་རང་ཉིད་སློབ་གྲྭ་ཆེན་མོའི་བོད་ཡིག་དགེ་རྒན་གྱི་གོ་ས་ན་ཡོད་པ་ཞིག་ཡིན་པས།ཡིག་ལོག་བརྡ་ལོག་གིས་གང་བའི་རྩོམ་ཡིག་དེ་འདྲ་བྱུང་ན་རྒྱལ་ཁབ་དང་བོད་ཡིག་སློབ་གྲྭའི་སྙན་གྲགས་ལ་གནོད་པར་དོགས་ནས།སློབ་མའི་རྩོམ་ཡིག་ལ་དགེརྒན་གྱིས་སྨྱུ་གུ་དམར་པོས་དག་བཅོས་བྱེད་པ་བཞིན་དུ་ལྷག་བསམ་དག་པས་སྐྱོན་འདོན་དག་བཅོས་བྱས་པ་ཡིན་ཡང༌། རྩོམ་པ་པོས་ནོར་འཁྲུལ་ཁས་མི་ལེན་པའི་སྟེང་དུ།ས་མཆོང་གནམ་མཆོངབྱསེངཱརྣས་རྒོལ་ལན་སློག་པར་འདུགཁོ་བོའི་རྩོམ་དེ་དག་དགེ་རྒན་ཚང་མས་མཉམ་འཇོག་བྱས་མེད་ན་ཡང་ཐང༌། ད་ལྟའང་རྩོམ་ཡིག་གི་གནས་ཚུལ་བཟང་དུ་མ་སོང་བར་དག་རྒྱུན་འབྱམས། ཞིང་ནང་གི་ལྡུམ་བུ་བཞིན་ས་ཁྱབ་འདུག་པས། བོད་ཡིག་སློབ་གྲྭ་དང་བོད་ཀྱི་རྩོམ་རིག་གི་སྙན་གྲགས་ལ་བསམས་ན། རིག་པ་ཤིན་ཏུ་བསྒྲིམ་དགོས་པར་སྣང་ངོ༌།།

གཉིས། བོད་ཡིག་གི་རྒྱུཊ་སྤྲོད་པའི་གནས་ཚུལ།

ལོ་རེ་བཞིན་བོད་ཡིག་གི་སློབ་གྲྭ་འབྲིང་རིམ་ནས་མཐར་ཕྱིན་ཏེ་སློབ་གྲྭ་ཆེན་མོར་རྒྱུགས་སྤྲོད་མཁན་ནང་ན་རྒྱུགས་འཕྲོད་མཁན་བརྒྱ་ཆའི་སུམ་ཅུ་ཡང་མི་ལོང་ཞིང༌། དེའི་ནང་ན་བོད་ཡིག་སྐར་མ་བརྒྱད་ཅུ་ཡན་ཆད་ཅན་ཆེསཉུང་བར་སྣང་ལ།རང་རེ་བོད་ཡིག་ཚན་ཁ་ག་ཏུ་རྒྱུགས་འཕྲོད་པའི་ནང་ན་ཡང༌། བོད་སྐད་བོད་ཡིག་གི་ཡོན་ཚད་བཟང་ཞན་རིམ་པ་གསུམ་ཕྱེ་ན་སློབ་ཁྲིད་ཀྱི་རྗེས་ཆོད་པའི་སྐད་ཡིག་གི་ཡོན་ཚད་ཅུང་ཟད་བཟང་ཤོས། སྤྱིར་བཏང་འཛིན་གྲྭ་རེ་ལ་ལྔ་དྲུག་ཙམ་ལས་མེད།(འཛིན་གྲྭ་རེར་མི་གྲངས30-35བར་ཡོད)དེ་ལ་བརྒྱ་ཆ་བརྩིས་ན་བརྒྱ་ཆའི་བཅོ་ལྔ་ལོང་མི་ལོང་ཙམ་རེད། ཞིབ་འཇུག་སློབ་མར་རྒྱུགས་སྤྲོད་མཁན་ཡང་ལོ་རེར་ཉི་ཤུ་སུམ་ཅུ་རེ་ཡོད། དེའི་ནང་ན་རྒྱུགས་འཕྲོད་མཁན་བརྒྱ་ཆའི་བཅུ་ནས་བཅོ་ལྔའི་བར་ཡིན་ལ། དེའི་ནང་ན་བོད་ཡིག་སྐར་མ་བརྒྱད་ཅུ་ཡན་ཆད་ཅན་མི་རེ་གཉིས་ལས་མེད། དེ་ཡེང་ཞིབ་འཇུག་སློབ་མར་རྒྱུགས་འཕྲོད་མཁན་ནི་སློབ་གྲྭ་ཆེན་མོ་ནས་སློབ་སྦྱོང་མཐར་ཕྱིན་པ་དང༌། ཡོན་ཚད་དེ་དང་མཉམ་པའི་བོད་ཡིག་དགེ་རྒན་དང༌། བོད་ཡིག་གི་བྱ་བ་བྱེད་མཁན་ཤ་སྟག་རེད། བོད་ཡིག་རྒྱུགས་ཤོག་གི་དཀའ་སླ་ཡང༌། སྤྱིར་བཏང་གི་སློབ་གྲྭ་ཆེན་མོའི་དངོས་གཞི་འཛིན་གྲྭ་ནས་མཐར་ཕྱིན་པའི་འབྲིང་མཐོའི་ཡོན་ཚད་དང་བསྟུན་ནས་ཕུད་པ་ཡིན་ལ།ནང་དོན་ཡང་སྐད་ཡིག་དང་སུམ་རྟགས། སྙན་ངག མངོན་བརྗོད། ལོ་རྒྱུས། ཚད་མ་སོགས་ཀྱི་གཞི་རྩའི་ཤེས་བྱ་དང༌།རྒྱུན་ཤེས་སྐོར་ཅིག་ལས་མེད། ངེད་ཅག་གིས་ལོ་དུ་མར་རྒྱུགས་བླངས་པ་དང་རྒྱུགས་ཤོག་བལྟས་པའི་གནས་ཚུལ་ཕྱོགས་ཙམ་མཚོན་ན། སུམ་རྟགས་ཕྱོགས་ལ་ཡིག་ནོར་བཅའ་མི་ཤེས་པ་དང་རྣམ་དབྱེ།ཚིག་ཕྲད། བྱ་ཚིག་སོགས་ངོས་འཛིན་ནོར་བ་དང༌། སྙན་ངག་ཕྱོགས་ལ།དཔེ་རྒྱན་དང་གཟུགས་རྒྱན་ལྟ་བུ་རྒྱུན་བཀོལ་གྱི་རྒྱན་གྱི་དཔེར་བརྗོད་ངོས་འཛིན་ནོར་བ་དང༌། ལོ་རྒྱུས་ཕྱོགས་ལ། ངེས་པར་ཤེས་དགོས་པའི་རྒྱུན་ཤེས་ཀྱི་སྐོར་ཀྱང་མི་ཤེས་པ་དང༌། ཚད་མའི་ཕྱོགས་ལ། བསྡུས་ཆུང་གི་ཤེས་བྱའི་གྲངས་འདྲེན་དང༌། ཐལ་འགྱུར་གྱི་ལན་ཙམ་ཡང་འདེབས་མི་ཤེས་པ་དང༌། རྩོམ་རིག་ཕྱོགས་ལ། ཤིན་ཏུ་གོ་སླ་བའི་ཚིགས་བཅད་ཤོ་ལོ་ཀ་རེ་གཉིས་ལ་ཡང་གོ་བ་ལོན་མེད་ཅིང་ཚིག་འགྲེལ་འོལ་ཚོད་དུ་རྒྱག་པ་དང༌། རྒྱུན་དུ་བཀོལ་བཞིན་པའི་མངོན་བརྗོད་ཀྱི་མིང་ཙམ་ཡང་མི་ཤེས་པ་དང༌། ཚོད་བརྟག་ཏུ་རྩོམ་བཅད་ལྷུག་གང་རུང་རེ་ཅུང་ཟད་བྲིར་བཅུག་པ་ཡང༌། ཚིག་སྦྱོར་བདེ་ཞིང༌། ཚིག་སྐྱོན་དང་དོན་སྐྱོན། ཡིག་སྐྱོན་གང་ཡང་མེད་པའི་གྲ་དག་ཅིག་འཁྱོངས་དཀའབ་སོགས་མདོར་ན། སྐད་ཡིག་གི་གཞི་རྩའི་ཤེས་བྱའི་ཐད་ལ་གོ་རྒྱ་ཐོས་རྒྱ་ཆུང་བའི་སྐྱོན་ཤིན་ཏུ་ཆེ་བར་མངོན། ལོ་རེ་བཞིན་རྒྱུགས་ཤོག་ལྟ་མཁན་རྣམས་ལ་རྒྱུགས་ལན་དགོད་བྲོ་བ་ཁ་མཚར་བྱས་ནས་མང་དུ་བཤད་རྒྱུ་ཡོད་པ་ལྟ་བུ་ཡིན། དེ་ལས་རང་རེའི་མཐོ་རིམ་སློབ་གསོའི་སྤྱིར་བཏང་གི་རྒྱུ་སྤུས་ཀྱང་ཟུར་བསྟན་ལེབ་མཐོང་གི་དཔེར་ཤེས་ཐུབ་བོ།།

  གསུམ། བསམ་པ་དང་ཀུན་སྤྱོད་ཕྱོགས་ཀྱི་གནས་ཚུལ།

ཕྱི་རྒྱལ་གྱི་མཁས་པ་གྲགས་ཆེན་ཡོ་ཧན་ཟིན་གྱིས།ཀུན་སྤྱོད་བཟང་བོ་ནི་ཤེས་ཡོན་ཚད་མཐོན་པོར་བསླེབས་པའི་རྟགས་མཚན་ཡིནཞེས་དང༌། ཏན་ཏིན་གྱིསཀུན་སྤྱོད་ཀྱིས་ཤེས་ཡོན་གྱི་མི་འདང་ས་ཁ་གསབ་བྱེད་ཐུབ་མོད། འོན་ཀྱང་ཤེས་ཡོན་གྱིས་ཀུན་སྤྱོད་ཀྱི་མི་འདང་ས་ཁ་གསབ་བྱེད་མི་ཐུབགསུངས་སོ།།  ས་སྐྱའི་ལེགས་བཤདལས།  ཤེས་རབ་ལྡན་པས་ཉེས་པ་དག།སེལ་བར་ནུས་ཀྱི་བླུན་པོས་མིན།།ཞེས་དང༌། གལ་ཏེ་རིག་པ་ཡོད་ན་ཡང༌།།སྐྱེ་བོ་རང་བཞིན་ངན་པ་སྤང༌།།དུག་སྦུལ་ནོར་བུས་མགོ་བརྒྱན་ཀྱང༌།།མཁས་པ་སུ་ཞིག་པང་དུ་ལེན།།ཞེས་གསུངས་པ་ལྟར། བསམ་པ་ཀུན་སྤྱོད་བཟང་བོ་སྐྱེད་སྲིང་བྱེད་པ་རྒྱལ་ཁབ་ཕྱི་ནང༌། གནའ་དུས་དང་དེང་དུས་ཀྱི་སློབ་གསོ་ཐུན་མོང་གི་ནང་དོན་གལ་ཆེན་ཞིག་རེད་མོད། དེང་སང་སློབ་གྲྭ་ཆུང་འབྲིང་ཆེ་གསུམ་གྱི་སློབ་མའི་ནང་ན་བསམ་པ་དང༌།ཀུན་སྤྱོད་ཕྱོགས་ཀྱི་ངན་ཤན་འགོས་ནས་ལད་པོ་མ་རབས་སུ་གྱུར་པ་ཤིན་ཏུ་མང་ཞིང༌། ཡ་ང་དགོས་པའི་ཚོད་དུ་གདའ། འབྲོག་པའི་ས་ཆ་སོགས་ན་བྱིས་པ་སློབ་གྲྭར་མི་གཏོང་བའི་རྒྱུ་མཚན་གལ་ཆེན་ཞིག་ནི།བྱིས་པ་ལད་འགྲོ་བར་སྐྲག་པ་རེད། ཕ་མ་མང་བོ་ཞིག་གིས་བཤད་རྒྱུར་བྱིས་པ་སློབ་གྲྭར་སོང་ན་ཡོན་ཏན་མི་ལོབས་ཤིང་ངན་ལོབས་ནས། ཁྱིམ་དུ་ཡོང་ན་ཕ་མའི་ཁ་མི་ལེན། ལས་ཀ་མི་ལས།ཤོམ་བྱས་ནས་ལབ་མགོ་བྱེད་ཅིང༌། ཤོ་དང་རྡུང་རེས་རྒྱག་པ་སོགས་ལ་དགའ་བས་སློབ་གྲྭར་མ་སོང་ན་དགའ་ཟེར། སློབ་གྲྭ་ཆུང་འབྲིང་གི་དགེ་རྒན་རྣམས་ཀྱིས་བཤད་རྒྱུར།དེང་སང་གི་སློབ་མ་རྣམས་ཀྱིས་སློབ་སྦྱོང་མི་བྱེད། འགྲིག་ལམ་མི་རྩི།ཕར་བཤད་དུས། ཚིག་ཡང་ན་མི་ཉན། ཚིག་ལྩི་ན་མི་འཁུར། བྱིས་པ་མ་རབས་ལ་ལས་དགེ་རྒན་རྣམས་ལ་ཁ་འཐབ་ལག་འཛིང་བྱེད་པ་དང༌། དགྲར་བཟུང་ནས་གྲི་དང་མཚོན་ཚད་པ་སོགས་ཀྱང་ཡོད་པས་དགེ་རྒན་བྱེད་རྒྱུ་དཀའ་མོ་རེད་ཟེར། སློབ་གྲྭ་ཆེན་མོ་ན་ཡང༌། སློབ་སྦྱོང་མི་བྱེད་པ་དང༌། འགྲིག་ལམ་མི་འཁུར་བར་ཆང་འཐུང༌། ཤོ་རྒྱགའཁོན་འཛིང་རྡུང་རེས་བྱེད་པ་དང༌། གཞུང་གི་ནོམ་རྫས་ཅོག་ཙེ་དང་ཤེལ་སྒོ་གཅོག་པ་དང༌། གློག་སྐུད་གཅོད་པ། རྐུ་བྱེད་པ། ཆབ་སྲིད་སྟེང་དུ་ཁྲིམས་འགལ་གྱི་བྱ་བ་བྱེད་པ་སོགས་དང༌། རྒྱུགས་སྤྲོད་སྐབས་གཡོ་སྒྱུ་བྱེད་པ་སོགས་ལོ་རེ་བཞིན་ཆད་པ་བཅད་པ་དང༌།གཏན་འཕུད་བཏང་བ་ཡང་མི་ཉུང་བ་ཞིག་ཡོད། ལྷག་པར་རིག་གནས་ཤིན་ཏུ་རྗེས་ལུས་ཡིན་ས་ནས་ཡོང་བའི་རོང་འབྲོག་གི་ན་གཞོན་ལ་ལ་སྤྱོད་པ་ལྷག་པར་བཙོགལ་ལ་ཞིག་ཡུལ་ནས་ཡོང་དུས་གྲི་དང་སྐོར་དབྱུག་སོགས་བཟུང་ནས་འཐབ་འཛིང་བྱེད་རྒྱུའི་གྲ་སྒྲིག་བྱས་ནས་འོངས་པར་སྣང༌།ལ་ལས་སྐྲ་རིང་བོ་མི་དྲེད་ལྟ་བུར་བཞག་ནས། མི་གྲལ་དུ་སོང་ན་གཡག་གི་འགྲོ་སྟངས་བྱེད་ཅིང། སྐད་ཆ་བཤད་ན་ངུར་བ་ལྟ་བུར་བྱེད་ཅིང་། སྐེ་ཤིང་ཤིང་བྱས་ནས་གུས་གུས་དུད་དུད་བྱེད་མི་ཤེས། དགེ་རྒན་རྣམས་ལ་བརྩི་བཀུར་མེད་ལ་ཁ་ལེན་ཚིག་རྩི་མི་བྱེད་པ་དང༌།འགྲིག་ལམ་དོ་དམ་བྱེད་པའི་དགེ་རྒན་རྣམས་ལ་དགྲར་བཟུང་ནས་མིག་ཟུར་གྱིས་ལྟ་བ་སོགས་སློབ་གྲྭ་ཆེན་མོའི་སློབ་མའི་བཟོ་ལྟ་ཅུང་ཟད་ཀྱང་མེད་པ་མི་ཉུང་བ་ཞིག་ཡོད། སྤྱི་ཚོགས་སྟེང་ན་ཡང༌། དེང་སང་གི་སློབ་གྲྭ་ཆེན་མོ་ནས་མཐར་ཕྱིན་ཏེ། བོད་སེར་མངགས་པའི་ན་གཞོན་ཕལ་ཆེར་ཞིག་ཡོན་ཏན་ལས་མི་ཚད་པའི་ང་རྒྱལ་དང༌། བྱ་བ་མི་ལས་པར་ཆང་འཐུང་ཞིང༌། ལབ་རྒྱག་མཁན་ཤ་སྟག་རེད་ཟེར་བ་དང༌། དེང་སང་གི་བོད་ཀྱི་སློབ་གྲྭ་པ་རྣམས་བོད་ཀྱི་རིག་གནས་མི་ཤེས་ཤིང༌། བོད་ཀྱི་རིག་གནས་ལ་སྐྱོན་རྒྱག་མཁན་མང་དུ་སྣང་ཟེར་བ་སོགས་རྣ་བར་མང་དུ་ཐོས་སོ།།

རྒྱབ་སྐྱོར།
返回首页
གཙོ་ངོས།
པར་ལྡན་རྩོམ་ཡིག
ཉེ་ལམ་གསར་བརྗེས།
ཀློག་མཁན་མང་ཤོས།
 
Copyright © 2005 - 2024 Teducn.com
phone:18997245213 QQ:89457590
དྲ་ཚིགས་འདིའི་པར་དབང་ཡོད་ཚད་བོད་ཀྱི་སློབ་གསོ་དྲ་བར་དབང་།
ཡིག་ཟམ། gangjian_xn@hotmail.com
འབྲེལ་གཏུགས་ཁ་པར། ༡༨༩༩༧༢༤༥༢༡༣青ICP备18000196号