གོང་གསལ་ཡོན་ཚད་ཞན་པ་དང་བསམ་པ་ཀུན་སྤྱོད་སོགས་མི་ཡི་རྒྱུ་སྤུས་ཞན་པའི་རྒྱུ་མཚན་གང་ཡིན་ཟེར་ན། གཙོ་ཆེར་མཉམ་སྡོམ་གྱི་རྒྱུ་སྤུས་མཐོར་འདེགས་བྱེད་པ་སློབ་གསོའི་དམིགས་ཡུལ་གཙོ་བོ་ཡིན་པའི་ངོས་ཟིན་མེད་ཅིང་། སྐབས་འགར་ཆབ་སྲིད་གཙོ་བོར་བྱེད་པ་དང༌། སྐབས་འགར་ཤེས་བྱའི་རིག་གནས་རྐྱང་བ་སློབ་པ་“ག་བོར་བྱེད་པ་དང༌། བོད་ཡིག་སློབ་གྲྭ་ལྟ་བུར་མཚོན་ན་བོད་ཡིག་གཙོ་བོར་མི་བྱེད་པ་དང༌། བོད་ཡིག་གཙོ་བོར་བྱེད་པའི་སློབ་ཁག་རྣམས་ཀྱང་བོད་ཡིག་གི་གཞི་རྩའི་ཤེས་བྱ་གཙོ་བོར་མི་འཛིན་པ་དང༌། སློབ་ཁྲིད་བྱེད་པའི་ཚེ་ཤེས་བྱའི་རིག་གནས་བཤད་ཁྲིད་བྱེད་པ་ལས། བསམ་པ་དང༌། ཀུན་སྤྱོད་སྐྱེད་སྲིང་གལ་ཆེར་མི་བྱེད་པ་དང༌།དེ་དང་མཚུངས་པར།སློབ་གསོའི་འཆར་གཞི། བཀོད་སྒྲིགདོ་དམ་བྱེད་ཐབས་བཅས་བོད་ཡིག་སློབ་གསོའི་གནས་ལུགས་དང་མཐུན་པ་ཞིག་དང༌། ཆ་འཛོམས་ པོ་ཞིག་མེད་པ་བཅས་སོ།།

གོང་གསལ་བོད་ཡིག་སློབ་གསོའི་ཕྱོགས་ཀྱི་གནད་དོན་དེ་དག་གཞི་ནས་བསྒྱུར་ཐབས་མ་བྱས་ན། སློབ་གསོའི་འཕེལ་རྒྱས་ཕྱོགས་ལ་གནོད་པ་ཐེབས་པར་གོར་མ་ཆག་པས།མྱུར་དུ་བཅོས་བསྒྱུར་བྱེད་དགོས། དེ་ཡང་བཅོས་བསྒྱུར་གྱི་ཐོག་མ་བསམ་བློའི་ལྟ་ཕྱོགས་བཅོས་བསྒྱུར་བྱེད་པ་དེ་ཤིན་ཏུ་གལ་ཆེ་བས།དེའི་ཐད་ལ་རང་རེའི་ལྟ་ཚུལ་མང་བོ་ཞིག་དུས་ལས་ཡོལ་ཅིང་རྙིང་དྲགས་པ་དང༌། གཡོན་ལྷུང་གི་འཆིང་བ་ལས་གྲོལ་མ་ཐུབ་པ་དང༌། རིག་གནས་གསར་རྙིང་གཉིས་ཀྱི་འབྲེལ་བའི་ཐད་ལ་ལྟ་ཚུལ་ཡང་དག་ཅིག་མེད་པ་དང༌། རིག་གནས་རིགས་མི་གཅིག་པ་ལ། ཁྱད་ཆོས་མི་གཅིག་པ་མང་བས། སློབ་གསོ་བྱེད་པའི་སྐབས། རིག་གནས་རང་རང་གི་ཁྱད་ཆོས་ལྟར་མི་བྱེད་པར་གཞན་དག་གི་བྱེད་སྟངས་དང་བསྟུན་ཅི་ཐུབ་བྱེད་པ་སོཊ་ལྟ་ཚུལ་ཐད་ཀྱི་གནད་དོན་ཤིན་ཏུ་མང༌། ཐོག་མར་བོད་སྐད་བོད་ཡིག་དེ་བོད་མི་རིགས་ལ་མཚོན་ན་མེད་དུ་མི་རུང་བའི་མི་རིགས་ཀྱི་རྟགས་མཚན་དང་རིག་གནས་ཀྱི་གཞི་རྩ་ཡིན་ལ། སྐད་ཡིག་རིག་གནས་འདི་མ་ཉམས་ན་བོད་མི་རིགས་ཀྱང་ཉམས་མི་སྲིད། སྐད་ཡིག་རིག་གནས་འདི་ཉམས་སོང་ན་མི་རིགས་ཀྱང་རྩ་བ་ནས་ཉམས་འགྲོ་བ་རྒྱལ་ཁབ་ཕྱི་ནང་གི་ལོ་རྒྱུས་ཀྱི་ཉམས་མྱོང་དང༌།རིག་གཞུང་སྟེང་ནས་ངེས་ཐུབ་པ་ཞིག་ཡིན། མི་རིགས་གཞན་དང་རྒྱལ་ཁབ་གཞན་གྱི་ཚན་རིག་རིག་གནས་བཟང་བོ་སློབ་དགོས་པ་དང༌། བེད་སྤྱོད་བྱེད་དགོས་པ་སྨོས་མ་དགོས། དེ་མ་བསླབས་ན་རང་རེ་འཇིག་རྟེན་འདིར་འཚོ་གནས་བྱེད་དཀའ་ལ། སྟོབས་འབྱོར་མངའ་ཐང་ལྡན་པའི་མི་རིགས་ཤིག་ཏུའང་འགྱུར་མི་ཐུབ།འོན་ཀྱང་ཚན་རིག་རིག་གནས་སློབ་པ་རྒྱུ་མཚན་དུ་བྱས་ནས་མི་རིགས་རང་གི་སྲོལ་རྒྱུན་རིག་གནས་བོར་བརླག་བྱེད་པ་ནི་ལོ་རྒྱུས་ཀྱི་རང་བཞིན་ལྡན་པའི་ནོར་འཁྲུལ་ཆེན་པོ་ཞིག་ཏུ་འདུགདེ་ཡང་ཀྲུང་གོའི་མཚན་ཉིད་རིག་པའི་མཁས་ཆེན་ཀྲོ་ཟི་ཆི་ཡིས། “རིག་གནས་ཆ་ཚང་བར་རྒྱུན་འཛིན་བྱས་ན།ད་གཟོད་སྒོ་ཀུན་ནས་གསར་སྐྲུན་བྱེད་ཐུབ”གསུངས་པ་ལྟར་རྒྱུན་འཛིན་དང་གསར་སྐྲུན་བར་གྱི་རྒྱུ་འབྲས་ཀྱི་འབྲེལ་བ་དེ་ལ་ངོས་ཟིན་ཡང་དག་ཅིག་དགོས་པ་ཡིན། རང་རེས་རྒྱ་སྐད་རྒྱ་ཡིག་བསླབ་དགོས་ཤིང༌། དབྱིན་ཇི་སོགས་ཕྱིའི་རྒྱལ་ཁབ་ཀྱི་སྐད་ཡིག་ཀྱང་བསླབ་དགོས་མོད། མི་རིགས་གང་ཡང་ཐོག་མར་རང་གི་ཕ་སྐད་མ་ཡིག་ཤེས་པ་གཞིར་བཞག་གིས་སྐད་རིགས་ཡིག་རིགས་གཞན་དག་སློབ་པ་ཡིན་ལ། དང་ཐོག་ཉིད་ནས་སྐད་ཡིག་གཞན་པ་ཞིག་ལ་བརྟེན་པ་ནི་རང་ལ་སྐད་ཡིག་མེད་པའམ། སྐད་ཡིག་ཡོད་ཀྱང་། སློབ་པའི་རང་དབང་དང་ཆ་རྐྱེན་མེད་པའམ། སྐད་ཡིག་གཞན་པའི་ཁོར་ཡུག་ཏུ་གནས་པ་གང་རུང་ལས་མ་འདས་སོ།།

གཞན་ཡང་མི་ཁ་ཤས་ཀྱིས་སྐད་ཡིག་ནི་བེད་སྤྱོད་པའི་ལག་ཆ་ཁོ་ནར་ལྟ་ཞིང༌། བེད་སྤྱོད་བྱེད་ཡུལ་ཆུང་ན་བསླབ་པའི་དགོས་པ་ཆུང་བསམ་ཞིང༌། སྐད་ཡིག་ནི་མི་རིགས་ཀྱི་བླ་སྲོག་ལྟ་བུ་ཞིག་ཏུ་བཟུང་ནས་རྒྱུན་འཛིན་དགོས་པ་མི་ཤེས།ལ་ལས་ཡི་གེ་རྐྱང་བ་ཞིག་བསླབས་ནས་དེ་ཡིས་ལག་ཆ་བྱས་ཏེ་ཚན་རིག་རིག་གནས་གསར་བ་སྤེལ་ན་ཆོག སྲོལ་རྒྱུན་རིག་གནས་གཞན་དག་བསླབ་མི་དགོས་བསམས་ཡོད་ལ། དེ་ནི་མི་རིགས་རང་རང་གི་སྐད་ཡིག་ནི། མི་རིགས་དེའི་རིག་གནས་ཡོངས་རྫོགས་དང་འབྲེལ་བ་དམ་པོ་ཡོད་པ་ཞིག་དང༌། སྐད་ཡིག་གང་གི་ཤེས་བྱའི་ཡོན་ཚད་མཐོ་དམན། སྐད་ཡིག་དེ་དང་འབྲེལ་ཡོད་ཀྱི་སྲོལ་རྒྱུན་རིག་གནས་ཀྱི་ཤེས་བྱ་དང༌།ཡོན་ཚད་ལ་རག་ལས་ཡོད་པ་ཞིག་ཡིན་པར་མ་ཤེས་པ་དང༌། མ་ཡིག་གི་ཆུ་ཚད་ནི་སྐད་ཡིག་རྐྱང་བའི་ཆུ་ཚད་མཚོན་པ་མིན་ལ།ཤེས་བྱའི་ཡོན་ཏན་ཡོངས་རྫོགས་མཉམ་སྡོམ་གྱི་ཆུ་ཚུད་མཚོན་པ་ཡིན་ཞེས་མཁས་པའི་ཁ་ལ་རླུང་ལྟར་གྲགས་པའི་དོན་དེ་མ་ཤེས་པའི་སྐྱོན་དུ་འདུག ཡང་ལ་ལས་ཚན་རིག་དང་ལག་རྩལ་སོགས་སྐད་ཡིག་གཞན་པར་བརྟེན་ནས་བསླབ་ན་ལས་སླ་བསམས་ཡོད་ཀྱང༌། དེ་ནི་རང་གི་སྐད་ཡིག་སློབ་མི་དགོས་པའི་རྒྱུ་མཚན་དུ་མི་འགྲོ་ལ། མིག་སྔར་གྱི་ལྟོ་གོས་འཚོ་བ་དོན་དུ་གཉེར་དགོས་པ་དེ།རིན་ཐང་གཞལ་དུ་མེད་པའི་ལོ་རྒྱུས་རིག་གནས་མི་དགོས་པའི་རྒྱུ་མཚན་དུ་ཡང་མི་འགྲོའོ།།

སྤྱི་ལོ1990ལོའི་ཟླ4པའི་ཚེས26ཉིན་མི་དམངས་གསར་འགྱུར་ངོས་སུ་འཁོད་པའི《རྒྱལ་གཅེས་རིང་ལུགས་དང་མི་རིགས་ཀྱི་སྲོལ་རྒྱུན་“རིག་གནས》ཞེས་པའི་རྩོམ་གྱི་ནང་དུ“རྒྱལ་གཅེས་རིང་ལུགས་ཉིད་ནི་སྲོལ་རྒྱུན་རིག་གནས་ཀྱི་ཆ་ཤས་ཤིག་དང༌། རྒྱལ་གཅེས་རིང་ལུགས་པ་ཞིག་ཡིན་ན། ཐོག་མར་ངེས་པར་དུ་རང་གི་མི་རིགས་ཀྱི་སྲོལ་རྒྱུན་རིག་གནས་ལ་བརྩི་འཇོག་བྱེད་དགོས”ཞེས་དང༌། རྒྱལ་གཅེས་རིང་ལུགས་ཞེས་པའི་གཅེས་འཛིན་གྱི་ཡུལ་གཙོ་བོ་ནི་ཀྲུང་ཧྭ་མི་རིགས་རང་གི་སྲོལ་རྒྱུན་རིག་གནས་དེ་དང༌། རང་རེའི་སྔོན་བྱོན་མེས་པོ་རྣམས་ཀྱིས་ལག་རྗེས་སུ་བཞག་པའི་འོད་འབར་རིན་ཆེན་དང་འབྲེལ་བ་དམ་ཟབ་ཡོད་པ་ཞིག་ཡིན';ཞེས་དང༌། “མི་ཞིག་གིས་གལ་ཏེ་མི་རིགས་ཀྱི་སྲོལ་རྒྱུན་རིག་གནས་ཀྱི་རིན་ཐང་ཡོད་རིགས་རྩ་མེད་དུ་དོར་ཅིང༌། སྲོལ་རྒྱུན་རིག་གནས་ཡོངས་རྫོགས་གཞི་རྩ་ནས་བཀག་སྟེ་ནུབ་ཕྱོགས་ཀྱི་ལུགས་སྲོལ་ལྷུར་བླངས་ན། དེ་ལ་ཀྲུང་གོའི་མི་ཡི་ལ་རྒྱ་ཡོད་དམ་ཞེས་དང༌། “གལ་ཏེ་འཛམ་གླིང་སྤྱི་འབངས་བྱེད་འདོད་དེ། རང་གི་མི་རིགས་ཀྱི་རིག་གནས་གཞི་རྩ་ནས་དོར་ན། དེ་ལྟ་བུའི་འཛམ་གླིང་སྤྱི་འབངས་དེ་སུས་ཀྱང་ཁས་མི་ལེན་ཏེ། མི་རིགས་སོ་སོའི་སྲོལ་རྒྱུན་རིག་གནས་ཀྱི་གཞི་རྩ་བརྟན་ཆགས་མེད་པའི་འཛམ་གླིང་སྤྱིའི་རིག་གནས་ཟེར་བ་ཞིག་མེད་པའི་ཕྱིར”ཞེས་བཤད་དོ།། དེང་སྐབས་རྒྱལ་ཁབ་གཞུང་ནས་ཀྱང༌། སློབ་གྲྭ་ཆེན་མོ་རྣམས་སུ་སྲོལ་རྒྱུན་རིག་གནས་ཀྱི་སློབ་ཁྲིད་འཛུགས་པ་རྒྱལ་གཅེས་རིང་ལུགས་ཀྱི་སློབ་གསོ་གཏོང་བའི་ཐབས་སུ་བཟུང་ནས་ལག་བསྟར་བྱེད་ཀྱིན་ཡོད་དོ།།

དེང་སྐབས་བོད་ཡིག་གི་སློབ་གྲྭ་མཐོ་རིམ་ནས་མཐར་ཕྱིན་པའི་སློབ་མ་ཕལ་ཆེར་སྐད་ཡིག་གི་ཆུ་ཚད་མཐོན་པོར་འགྲོ་མི་ཐུབ་པའི་རྒྱུ་མཚན་གཙོ་བོ་ནི། སྲོལ་རྒྱུན་རིག་གནས་ཀྱི་གཞི་རྩ་མཐུག་པོ་ཞིག་ཆགས་མེད་པའི་སྐྱོན་དེར་ཐུག་ཡོད། གནད་དེ་མ་ཤེས་ན་བོད་སྐད་བོད་ཡིག་གི་ཆུ་ཚད་མཐོར་འདེགས་ཟེར་བ་ཚིག་སྟོང་སྨྲ་བ་ལས་མ་འདས་སོ།། དེས་ན་བོད་ཡིག་གི་སློབ་གསོའི་རྒྱུ་སྤུས་མཐོར་འདེགས་བྱེད་དགོས་ན། ལྟ་ཚུལ་བསམ་ཚུལ་སྟེང་གི་ནོར་འཁྲུལ་མང་བོ་ཞིག་སེལ་དགོས།

གཉིས་པ།　སློབ་གསོའི་བཀོད་སྒྲིག་བྱེད་ཕྱོགས།

སྐད་ཡིག་གི་གཞི་རྩའི་ཤེས་བྱར་ཤུགས་སྣོན་དང༌། སློབ་མའི་བསམ་པ་དང་ཀུན་སྤྱོད་སོགས་མཉམ་སྡོམ་རྒྱུ་སྤུས་མཐོར་འདེགས་ཕྱོགས་ལ་ཤུགས་སྣོན་བྱེད་པའི་སློབ་གསོའི་བཀོད་སྒྲིག་ཆ་འཛོམས་ཤིང་ཐབས་ལེགས་པ་ཞིག་བཟོ་བཅོས་ལག་བསྟར་བྱེད་དགོས་པས། དེ་ཇི་ལྟར་བྱེད་པའི་ཐབས་ལ།

གཅིག  སློབ་གསོའི་ནང་དོན་ཕྱོགས་ལ།གཙོ་ཕལ་གྱི་དབྱེ་བ་ཕྱེས་ནས་གཞི་རྩའི་ཤེས་བྱའི་གཞུང་ལུགས་ཀྱི་སློབ་ཁྲིད་གཙོ་བོར་བྱས་ཏེ། སློབ་ཁྲིད་སྤྱིའི་སྡོམ་གྲངས་ཀྱི་བརྒྱ་ཆའི་དྲུག་ཅུའམ་བདུན་ཅུ་ཟིན་པ་དང༌།

　 གཉིས།  བོད་ཡིག་འཛིན་གྲྭར་སློབ་མ་སྡུད་ལེན་བྱེད་སྐབས། བོད་སྐད་བོད་ཡིག་གི་སྐར་གྲངས་གཙོ་བོར་བྱེད་པའི་སྟེང་ནས། སློབ་གྲྭ་འབྲིང་རིམ་ནས་ཐོ་རྟགས་བཀོད་པའི་བསམ་པ་དང་ཀུན་སྤྱོད་ཀྱི་ཡིག་རྟགས་ལ་བལྟས་ནས། སློབ་སྦྱོང་དང་ཀུན་སྤྱོད་ལེགས་ཤོས་སྡུད་ལེན་བྱེད་པ་དང༌།

　 གསུམ།  ལོ་རིམ་འཛིན་གྲྭ་འཕར་བ་དང༌།མཐར་ཕྱིན་པའི་ཡིག་རྟགས་སྟེར་བ་ལ། གཞི་རྩའི་ཤེས་བྱའི་རྒྱུགས་སྐར་བརྒྱད་ཅུ་ལོན་དགོས་པ་དང༌། བསམ་པ་ཀུན་སྤྱོད་སོགས་མཉམ་སྡོམ་རྒྱུ་སྤུས་ཀྱི་ཚད་གཞི་ངེས་ཅན་ཞིག་གཏན་ཁེལ་བྱས་ནས། ཚད་མ་འདང་ན་མཐར་ཕྱིན་ཡིག་རྟགས་མི་སྟེར་བའོ།།

　 གསུམ་པ།　སློབ་གསོའི་ནང་དོན་ཕྱོགས།

བོད་ཡིག་སློབ་གསོའི་གཞི་རྩའི་ཤེས་བྱའི་སློབ་སྦྱོང་ལ་ཤུགས་སྣོན་བྱེད་དགོས།

དེ་ཡང་གཞི་རྩའི་ཤེས་བྱའི་སྐོར་ལ།རྩོམ་རིགས་དང་བརྡ་སྤྲོད་རིག་པ།སྙན་ངགཚད་མ།བོད་ཀྱི་ལོ་རྒྱུས།ནང་དོན་རིག་པའི་སྤྱི་ཁོགབོད་ཀྱི་རིག་གནས་སྤྱི་ཁོག་བཅས་སྣ་ཁ་བདུན་ངེས་པར་སློབ་དགོས་པའི་ཤེས་བྱའི་ཁོངས་སུ་གཏན་ཁེལ་བྱེད་པ་དང༌།གཞི་རྩའི་ཤེས་བྱ་དེ་དག་ཀྱང་ཤེས་བྱའི་རྣམ་གྲངས་ཚང་ཞིང་གཞུང་ལུགས་ཀྱི་ཟབ་ཁྱད་ངེས་ཅན་ཞིག་ཡོད་པ།སློབ་གྲྭའི་སློབ་ཁྲིད་ཀྱི་ཁྱད་ཆོས་ལྡན་པའི་བོད་ཡིག་སློབ་གྲྭ་མཐོ་རིམ་སྤྱི་མཐུན་གྱི་སློབ་དེབ་གསར་བ་ཞིག་རྩོམ་སྒྲིག་བྱེད་དགོས།

　 བཞི་པ།　སློབ་ཁྲིད་བྱེད་སྟངས་ཕྱོགས།

　གོ་བདེ་བ། ཡིད་ངོར་འཇགས་སླ་བ།སློབ་མའི་བློ་སྒོ་འབྱེད་ཕུལ་ཆེ་བའི་ཐབས་སྣ་ཚོགས་བསྟེན་པ། དཔེར་ན། བོད་ཀྱི་ཆོས་ལུགས་རིག་གནས་ངོ་སྤྲོད་ཀྱི་གློག་པྲ་སྣང་བརྙན་སྟོན་པ་ལྟ་བུ་སོགས་ཚན་རིག་གི་སློབ་གསོའི་ཐབས་གསར་བེད་སྤྱོད་བྱེད་པ་དང༌། ལྟ་ཀློག་འབྲི་རྩོམ་སོགས་བསླབས་པའི་ཤེས་བྱ་བེད་སྤྱོད་གོམས་བྱང་གི་འགྲིག་ལམ་བཙུགས་ནས་གཤར་སྦྱང་ནན་ཏན་དུ་བྱེད་དུ་འཇུག་པ་དང༌། རྩོམ་ཡིག་དཔེར་བརྗོད་འབྲི་བའི་ཚད་གྲངས་དང༌། ཟུར་ལྟའི་ཡིག་ཆའི་རིམ་པ་གཏན་ཁེལ་བྱས་ནས། ཚད་གྲངས་སྐར་གྲངས་ངེས་ཅན་ལོང་དུ་འཇུག་པ་དང༌། སློབ་ཁྲིད་བྱེད་པའི་དགེ་རྒན་རྣམས་ལ་གཤར་སྦྱང་ལྟ་རྟོག་དང༌། རྩོམ་ཡིག་དཔེར་བརྗོད་དག་བཅོས་ཀྱི་འགན་ཁུར་འགྲུབ་ཚད་གཏན་ཁེལ་བྱས་ནས་རྟིང་སྐུལ་བྱེད་པ་དང༌། གཤར་སྦྱང་གི་སྐར་གྲངས། སློབ་ཁྲིད་ཀྱི་རྒྱུགས་སྤྲོད་སྐར་གྲངས་ཀྱི་བརྒྱ་ཆའི་ལྔ་བཅུ་བྱས་ནས་བགྲངས་ཏེ། རྒྱུགས་འཕྲོད་པའི་ཚད་གཞི་རྩའི་ཤེས་བྱ་རེ་རེ་བཞིན་སྐར་མ་བརྒྱད་ཅུ་ལོང་དགོས་པར་བྱེད་པ་དང༌། མཐར་ཕྱིན་པའི་སྐབས་གཞི་རྩའི་ཤེས་བྱ་རིགས་བདུན་རེ་རེ་བཞིན་རྒྱུགས་སྐར་བརྒྱད་ཅུ་མ་ལོངས་ན་མཐར་ཕྱིན་འཛིན་རྟགས་མི་སྟེར་ བའི་ཐབས་ལག་བསྟར་བྱེད་པ།

　 ལྔ་པ།　བསམ་པ་ཀུན་སྤྱོད་སློབ་གསོའི་ཕྱོགས།

ཀུན་སྤྱོད་ཀྱི་སློབ་ཁྲིད་ལ་ཤུགས་སྣོན་དང༌།འགྲིག་ལམ་དོ་དམ་ནན་ཏན་བྱེད་པ་ཟུང་འབྲེལ་བྱེད་པའི་ཐབས་ བསྟེན་པ།

དེ་ཡང་སློབ་གསོའི་ཕྱོགས་ལ། མི་རིགས་རང་གི་ཡ་རབས་མི་ཆོས་ཀྱི་སློབ་གསོ་དང༌། རྒྱལ་གཅེས་ཁྲིམས་སྲུང་གི་སློབ་གསོ་ཟུང་འབྲེལ་བྱེད་པ་དང༌།བཟང་བོ་ལ་བྱ་དགའ། ངན་པ་ལ་ཆད་པ་གཅོད་པ་སོགས་སྐྱེད་སྲིང་བྱ་ཡུལ་ཤེས་བྱའི་ཡོན་ཏན་གྱི་མཚན་ཉིད་ཚང་དགོས་པར་མ་ཟད། ཡ་རབས་མི་ཡི་མཚན་ཉིད་ཀྱང་ཚང་དགོས་པར་སྒོ་ཀུན་ནས་འབད་དགོས་པར་སྙམ་མོ།།

                                                  ཞེས1998ལོའི་ཟླ6ཚེས16ལ།

　                                           (《དོར་ཞིའི་གསུང་རྩོམ་ཐོར་བ》ལས་བདམས)

 2/2    མདུན་ངོས། 上一页 1 2