| སྔར་རྡོ་རྗེ་ཐེག་པའི་སྡོམ་པ་དང༌།། མ་བྱང་ཆུབ་སེམས་དཔའི་བསླབ་པ་ལ། །དགྲ་རྩ་བའི་ལྟུང་བ་ཆར་ལྟར་བབས། །གཞན་སྡོམ་པའི་ཡན་ལག་ཕྲ་རག་ཀུན། །ཕལ་ཆེ་བ་ཤེས་བཞིན་ཁྱད་དུ་བསད། །འགའ་མི་ཤེས་དབང་གིས་ལོག་པར་སྤྱད། ། རྒྱུད་ལྟུང་བའི་མི་གཙང་འདམ་དུ་བྱིངས། །ཁྱོད་དེ་ལྟར་གྱུར་ཀྱང་རབ་བྱུང་སོགས། །ལས་དགེ་སློང་བྱེད་རྒྱུ་གང་ཡིན་དང༌། །དབང་བསྐུར་སོགས་རྡོ་རྗེ་སློབ་དཔོན་གྱི། །ལས་བྱེད་པར་ཡ་ང་བག་ཚ་མེད། །རྒྱུ་དེས་ན་བསྟན་པ་དྲི་མས་བསྒོས། །ཆོས་ཟབ་ཅིང་རྒྱ་ཆེ་བདུད་རྩིའི་རྒྱུན།། མི་ཁྱོད་ཀྱི་སྣོད་དུ་ཅི་བླུགས་ཀྱང༌། །ཆོས་ཚིག་དོན་སྣོད་ཀྱིས་མ་ཐུབ་པས། །དོན་དེ་ལས་བསླུས་ཐབས་ཆེ་བ་ཅི། །ལར་དེ་ལྟར་འབྱུང་བའི་རྒྱུ་མཚན་ཡང༌། །ཆོས་ཚིག་བཞིའི་དོན་ཡང་མ་རྟོགས་པར།།རང་མཁས་པར་འཛིན་པའི་ང་རྒྱལ་དང༌། །རྒྱུད་ལྟུང་བའི་ནང་དུ་བྱིང་ནས་ཀྱང༌།། རང་བཙུན་པར་འཛིན་པའི་ལོག་ལྟ་དང༌། །སེམས་ཆགས་སྡང་དབང་དུ་གྱུར་པ་ལ། །རང་བཟང་པོར་འདོད་པའི་ཁེངས་སེམས་ཅན། །ལས་ཅི་བྱས་ཆོས་བརྒྱད་བྱེད་བཞིན་དུ། །རང་ཆོས་པར་རློམ་པའི་རློམ་སེམས་དེས། །བདུད་དེ་བཞིན་སྙིང་ལ་ཞུགས་པས་ལན། །བདུད་སྙིང་ལ་འཇུག་པའི་རྩ་བ་ཡང༌། །ལུས་གཟུགས་བརྙན་མི་ཁྱུར་བསྡད་པ་དང༌། །གཏམ་མི་ཟེར་ཁ་ལ་ཉན་པ་དང༌། །བློ་མི་མཐུན་མི་དང་བསྟུན་པས་ལན། །མཚང་འདི་རྣམས་ཡོད་མེད་སེམས་ལ་དྲིས། རྒྱུ་དེ་རྣམས་ཡིན་མིན་བསམ་མནོ་ཐོངས། །སྔར་མཚང་དུ་མ་ཤེས་དོན་སྙིང་རུལ། ། དོན་དེ་ཕྱིར་སྔར་བྱས་དོན་མེད་སོང༌། ད་ཚེ་མཇུག་ནམ་མཁའི་གློག་འདྲ་འདི། །རྟེན་དལ་འབྱོར་སྙིང་པོ་ལེན་འདོད་ཅིང༌།།རང་ལེགས་པའི་ལམ་དུ་འཇུག་འདོད་ན། །མཚང་ཡུལ་ནས་འདོན་ལུགས་དེ་ལྟར་མཛོད། ། ཆོས་ཚིག་གཅིག་མ་གོའི་མཁས་པ་དང༌། །ཁོ་བླུན་ཅིང་རྨོངས་པའི་བ་གླང་གཉིས། །མཁས་མི་མཁས་ཁྱད་པར་གང་གིས་འབྱེད། །ཁོ་བ་གླང་མཁས་པར་འཛིན་པ་མེད། །ཆོས་དེ་ཡིས་བ་གླང་ཁྱད་པར་འཕགས། །རྒྱུད་ལྟུང་བས་གོས་པའི་བཙུན་པོ་དང༌། །ཟས་མི་གཙང་ཟ་བའི་ཁྱི་ཕག་གཉིས། །བཙུན་མི་བཙུན་ཁྱད་པར་གང་གིས་འབྱེད། །ཁོ་ཁྱི་ཕག་བཙུན་པོར་ལྟ་བ་མེད། །ཆོས་དེ་ཡིས་ཁྱི་ཕག་ཁྱད་པར་འཕགས། །གནོད་གང་འཁྱོལ་བྱེད་པའི་བཟང་པོ་དང༌། །ཁྲེལ་གཏོང་ནས་བོར་པའི་གྱག་ཁྱེར་གཉིས།།བཟང་མི་བཟང་ཁྱད་པར་གང་གིས་འབྱེད། །བཟང་མི་བཟང་ཁྱད་པར་མེད་པ་ལ། །ཁོ་གྱག་ཁྱེར་བཟང་པོར་འདོད་པ་མེད། ། ཆོས་དེ་ཡིས་གྱག་ཁྱེར་ཁྱད་པར་འཕགས། །ལས་ཆོས་བརྒྱད་བྱེད་པའི་ཆོས་པ་དང༌། །ཁྲམ་གཡོ་སྒྱུ་བྱེད་པའི་ཁྱིམ་པ་གཉིས། །ཆོས་བྱེད་མེད་ཁྱད་པར་གང་གིས་འབྱེད། །ཆོས་བྱེད་མེད་ཁྱད་པར་མེད་པ་ལ། །ཁོ་ཁྱིམ་པ་ཆོས་ཀྱིས་རློམས་པ་མེད། །ཆོས་དེ་ཡིས་ཁྱིམ་པ་ཁྱད་པར་འཕགས། །ཁྱོད་མཁས་བཙུན་བཟང་པོར་འདོད་པ་དང༌། །ཆོས་བྱས་སོ་སྙམ་པའི་འཁྲུལ་བ་ཞིག།ད་ཁྱོད་ལས་དམན་པའི་སེམས་ཅན་སུ། །དེ་ཤེས་ན་དམན་ཆ་འཛིན་རེ་རན། །སེམས་མི་གལ་མི་སྙེག་དམན་ཆ་བཟུང༌། །ལུས་མི་ཡི་གསེབ་ནས་ད་བུད་ལ། །གནས་མི་མེད་ས་ཡི་བས་མཐའ་སྟེན། །སེམས་ཚེ་འདིའི་འཁྲི་བ་གཏིང་ནས་ཆོད། ། གྱོང་ལྟོ་གོས་གཉིས་ཀྱི་སྟེང་དུ་བསྐུར། །ཟས་དཀའ་ཐུབ་བཅུད་ལེན་བདུད་རྩི་ཟོ། །གོས་ཕྱག་དར་ཁྲོད་ཀྱིས་ཆོག་ཤེས་སྟེན། །ད་དཀོར་ཟས་དུག་ཆུའི་ཞེན་པ་སྤོངས། །རྒྱུད་སྡོམ་པ་གསུམ་གྱི་ནོར་ལུག་རྣམས། །བྱམས་སྙིང་རྗེ་ལྷག་བསམ་ཐང་ཆེན་དུ། །དྲན་ཤེས་བཞིན་རྫི་བོས་ལེགས་སྐྱོངས་ལ། །ད་ཡན་ལག་ཕྲ་མོ་སྣ་གཅིག་ཀྱང༌། །སེམས་ཉོན་མོངས་དགྲ་ལ་མ་ཤོར་བར། །རྒྱུད་ཚུལ་ཁྲིམས་འཕེལ་སྐབས་ཆེ་བར་མཛོད། །བློ་བླ་མ་དཀོན་མཆོག་གསུམ་ལ་གཏོད། །དུས་འབྲལ་མེད་རྒྱུན་དུ་གསོལ་བ་ཐོབ། །ཆོས་ཐོས་བསམ་སྒོམ་གསུམ་ཚུལ་བཞིན་གྱིས། །སེམས་དངོས་འཛིན་འཁྲུལ་བ་རྩད་ནས་ཆོད། །མི་སྨྲ་མཁས་ཆོས་བརྒྱད་སློབ་བྱུང་ན། །ཚིག་གཅིག་ཀྱང་དེ་ལ་མ་ཉན་པར། །སྟོབས་ཅི་ཡོད་དེ་ཡི་ལོག་ཕྱོགས་སྒྲུབས། །ཁོ་གཏིང་ནས་མ་དགའ་འགྱོད་པ་མེད། །ད་གཏམ་དང་གྲོགས་ངན་སྣ་ཚོགས་དང༌། །མི་ཀུན་གྱིས་རིང་དུ་སྤངས་པ་དང༌།།འཕྲལ་འཚོ་བའི་ཡོ་བྱད་དཀོན་པ་སོགས། །ཁོང་འཇིག་རྟེན་ཆོས་དང་མི་མཐུན་པའི། །རྐྱེན་མི་འདོད་སྣ་ཚོགས་ཅི་བྱུང་ཡང༌། །ཆོས་སྙིང་ནས་བྱེད་པའི་བསམ་པ་གྲུབ། །མཚང་ཡུལ་འདོན་སེམས་ལ་གྲོས་འདེབས་འདི། །རང་ཉེས་ཀྱི་དོགས་ནས་སྨྲས་པ་ཡིན། །གྲོས་སེམས་ལ་ཞོག་ལ་ཉམས་སུ་ལོངས། །དུས་གཏན་གྱི་མདུན་མ་འགྲུབ་སྟེ་མཆི། །ཞེས་སོ།།དེ་སྐབས་པཎ་ཆེན་བློ་བཟང་ཆོས་ཀྱི་རྒྱལ་མཚན་དབེན་དགོན་དུ་ཕེབས་པ་ཞིག་གི་དུས།ནཱ་རོ་ཆོས་དྲུག་གི་ཟབ་ཁྲིད་རྒྱས་པ་ཞིག་དགོས་ཞེས་ཞུས་པར་པཎ་ཆེན་ཐམས་ཅད་མཁྱེན་པ་ཆེན་པོ་དེ་ཉིད་སྤྱིར་ཡང་དབེན་པའི་རི་སུལ་དུ་སྒྲུབ་པ་བྱེད་པ་རྣམས་ལ་ཤིན་ཏུ་དགྱེས་ཤིང༌། ལྷག་པར་དམ་པ་འདི་ཉིད་སྤྱན་གྱི་འབྲས་བུ་ལྟར་སྐྱོང་བར་མཛད་པས་མཚམས་གྲོལ་ན་དགེ་སྦྱོར་ལ་གཡེང་བ་ཡོང་གསུངས་ནས་པཎ་ཆེན་ཐམས་ཅད་མཁྱེན་པ་ཆེན་པོ་ཉིད་དམ་པ་འདིའི་སྒྲུབ་ཁང་དུ་ཕེབས་ནས་ནཱ་རོ་ཆོས་དྲུག་གི་ཁྲིད་རྒྱས་པར་སྩལ་ཞིང་སྒྲུབ་པ་མཐར་ཕྱིན་པའི་ཕྱིར་ལམ་གྱི་གེགས་སེལ་བོགས་འདོན་རྣམས་ཞིབ་པར་གསུངས།གཞན་ཡང་མཚམས་ཁོངས་སུ་གྲུབ་པའི་དབང་ཕྱུག་གནས་བཅུ་རབ་འབྱམས་པ་དགེ་འདུན་རྒྱལ་མཚན་གདན་དྲངས་ནས་མན་ངག་དུ་མ་གསན་ཞིང༌། ལྷག་པར་ནཱ་རོ་ཆོས་དྲུག་སྐོར་སོགས་འཁྲུལ་འཁོར་གྱི་སྐོར་རྣམས་འཐིལ་ཕྱིན་པར་ཞུས་ནས་སྦྱངས་ཏེ་གདེང་ཐོབ་པར་མཛད། དེ་ལྟར་སྒྲུབ་པ་ཡུན་རིང་དུ་མཛད་ནས་ཉམས་རྟོགས་གོང་འཕེལ་དུ་གྱུར་ཏེ་ཚེ་འདི་ལ་གཉེན་ཉེ་འབྲེལ་ནོར་ལོངས་སྤྱོད་གང་ལའང་ཆགས་པ་མེད་པར་སྒྲུབ་པ་མཐར་ཕྱིན་པ་དཔལ་ཤ་བ་རི་དང་མཚུངས་པ་ཞིག་བྱེད་དགོངས་པ་ཡོད་པ་ལ། པཎ་ཆེན་བློ་བཟང་ཆོས་ཀྱི་རྒྱལ་མཚན་གྱིས་བཀྲ་ཤིས་ལྷུན་པོར་རྒྱུད་གྲྭ་གསར་འཛུགས་མཛད་དེ་གཞུང་ལུགས་རབ་འབྱམས་ལ་སྦྱངས་པ་མཐར་ཕྱིན་པའི་དགེ་བའི་བཤེས་གཉེན་ཤ་སྟག་བསྡུས་ཏེ་རྒྱུད་གྲྭར་གཞུག་པར་མཛད་པའི་མགོན་དུ་དམ་པ་འདི་ཉིད་འབྱོན་དགོས་པའི་བཀའ་ཕེབས་པ་ན་ཚེ་མཚམས་ལ་བཞུགས་པ་ཡིན་ཡང་ཕྱོགས་བཅུའི་རྒྱལ་བ་ཐམས་ཅད་མཆོད་པ་བས་བླ་མའི་བ་སྤུའི་བུ་ག་གཅིག་མཆོད་པ་ཕན་ཡོན་ཆེ་བར་གསུངས་པ་དང༌།སངས་རྒྱས་ཀྱི་སར་མྱུར་བ་མྱུར་བར་བགྲོད་པ་ལ་རྡོ་རྗེ་སློབ་དཔོན་གྱི་བཀའ་བཞིན་སྒྲུབ་པ་ཉིད་བསྔགས་པར་རྒྱུད་དང་གྲུབ་ཆེན་གྱི་གཞུང་ཐམས་ཅད་ལས་གསུངས་པའི་ཚུལ་ལ་ངེས་པ་རྙེད་ནས་ཚམ་ཚོམ་མེད་པར་མཚམས་གྲོལ་ཏེ་པཎ་ཆེན་བློ་བཟང་ཆོས་ཀྱི་རྒྱལ་མཚན་གྱི་བཀའ་བཞིན་བཀྲ་ཤིས་ལྷུན་པོའི་སྔགས་ཁང་གི་གདན་སར་ཕེབས། པཎ་ཆེན་ཐམས་ཅད་མཁྱེན་པ་ཆེན་པོ་བློ་བཟང་ཆོས་ཀྱི་རྒྱལ་མཚན་ལ་རྒྱུད་ཀྱི་རྒྱལ་པོ་དཔལ་གསང་བ་འདུས་པ་འགྲེལ་པ་སྒྲོན་གསལ་མཆན་བུ།བསྡུས་དོན།མཐའ་གཅོད་བཞིའི་སྒོ་ནས་འགྲེལ་ཚུལ་རྒྱལ་བ་ཙོང་ཁ་པ་ཆེན་པོའི་མན་ངག་རྣམས་ལེགས་པར་ཞུས། མཐའ་དྲུག་དང་ཚུལ་བཞིའི་དཀའ་གནས་རྣམས་ལ་ཁོང་ན་གནས་པའི་དོགས་པ་ཕྲ་མོའང་ཆོད་པར་མཛད་ནས་རྒྱུད་གྲྭར་བཞུགས་པའི་རབ་འབྱམས་སྨྲ་བའི་སྡེ་རྣམས་ལ་ཆུ་བོའི་རྒྱུན་ལྟར་བཤད་ཅིང༌།དཔལ་གསང་བ་འདུས་པ་གཙོ་བོར་བཏོན།དཔལ་འཁོར་ལོ་སྡོམ་པ། 2/3 མདུན་ངོས། 上一页 1 2 3 下一页 尾页 |
