| རྒྱལ་སྲས་ཞི་བ་ལྷས་མཛད་པའི་སྤྱོད་འཇུག་དང་བསླབ་བཏུས་གཉིས་དང་ཆེད་དུ་བརྗོད་པའི་ཚོམ་དང༌། བྱང་ས་སྟེ་བཀའ་གདམས་གཞུང་དྲུག་གུང་བསྒྲིགས་ཏེ་བྱང་ཆུབ་ལམ་གྱི་རིམ་པའི་མན་ངག་རྣམས་དམིགས་སྐོར་རེ་རེ་ནས་གཞུང་དྲུག་པོ་དེ་དག་གང་རིགས་ནས་རྒྱས་པར་བཤད། གཞན་ཡང་སློབ་དཔོན་འཕགས་པ་ཀླུ་སྒྲུབ་ཀྱིས་མཛད་པ་མདོ་སྡེ་ཀུན་ལས་བཏུས་པ་དང༌། རིན་ཆེན་ཕྲེང་བ་དང་རྩ་ཤེ་ལ་སོགས་པའི་རིགས་ཚོགས་རྣམས་དང་སློབ་དཔོན་ཀ་མ་ལ་ཤི་ལས་མཛད་པའི་སྒོམ་རིམ་གསུམ་ལ་སོགས་པ་གསུང་རབ་དགོངས་འགྲེལ་དང་བཅས་པ་ཐམས་ཅད་བྱང་ཆུབ་ལམ་གྱི་རིམ་པའི་གདམས་ངག་ཏུ་ངོ་སྤྲད་ནས་སྟོན་པར་མཛད་པས་རྒྱལ་བའི་གསུང་རབ་དགོངས་འགྲེལ་དང་བཅས་པ་འཆད་པ་ལ་མི་འཇིགས་པའི་སྤོབས་པ་ཐོབ། རང་དང་གཞན་གྱི་གྲུབ་མཐའ་རྒྱ་མཚོའི་ཕ་རོལ་ཏུ་སོན། སྡེ་སྣོད་གསུམ་དང་ཤིང་རྟ་ཆེན་པོའི་གཞུང་རྣམས་ཕལ་ཆེར་ཐུགས་ལ་གཟུང་སྟེ་སྐལ་བ་དང་ལྡན་པ་གཞན་དག་ལ་གསུང་རབ་དགོངས་འགྲེལ་དང་བཅས་པ་མཐའ་དག་བྱང་ཆུབ་ལམ་གྱི་རིམ་པར་བསྡུས་ནས་འདོམས་པ་ལ་དབང་འབྱོར་པས་བོད་དུ་སྐྱེས་པའི་མི་ཞིག་ལ་ཤ་ར་བ་ཆེན་པོ་ལས་མཁྱེན་རབ་རླབས་ཆེ་བ་མེད་ཅེས་བཀའ་གདམས་གོང་མའི་གསུང་བསྒྲོས་ལས་འབྱུང༌། དོན་འདི་དག་ལ་དགོངས་ནས་རྗེ་ཐམས་ཅད་མཁྱེན་པས་ཀྱང༌། རྣམ་དཔྱོད་འགྲན་ཟླ་བྲལ་བའི་ཤ་ར་བ། །ཞེས་བསྔགས་པ་མཛད་དོ། །ཤ་ར་བ་ཆེན་པོ་ཉིད་ཀྱི་ཞལ་ནས།དེང་དུས་ཆོས་བྱེད་ཀུན་ཆོས་འཆད་པ་པོ་གང་ན་ཡོད་ཟེར་བ་ཐམས་ཅད་ཀྱི་རྩར་འགྲོ་སྟེ། སྟོན་པ་རིན་པོ་ཆེ་ཡབ་སྲས་ཀྱི་ལུགས་དེ་མིན། དགེ་བཤེས་སྟོན་པས་སྐུ་ཚེ་དེ་ལ་བླ་མ་ལྔ་ལས་མ་བསྟེན། དེ་ཡང་དགེ་བསྙེན་གྱི་སྡོམ་པའི་སློབ་དཔོན་དང༌། ཀློག་ཡིག་སློབ་པའི་སློབ་དཔོན་དང༌། བླ་མ་སེ་བཙུན་དང༌། པཎྜི་ཏ་སྨྲི་ཏི་དང༌། ཇོ་བོ་རྗེ་སྟེ། དེ་རྣམས་ཀྱི་ནང་ནས་ཀྱང་གཞན་རྣམས་ལ་ཆོས་འབྲེལ་རེ་ཙམ་ཡིན་བླ་མ་སེ་བཙུན་པ་ལ་མཚན་ཉིད་ཀྱི་གཞུང་རྣམས་གསན། གཙོ་བོ་ནི་ཇོ་བོ།རྗེ་ཉིད་ལ་བརྟེན་ནས་བྱང་ཆུབ་ལམ་གྱི་རིམ་པ་མཐའ་དག་པར་གསན་ཏེ། ཇོ་བོ་རྗེ་མངའ་རིས་སུ་མཇལ་བ་ནས་མཐར་སྙེ་ཐང་དུ་ཞིང་གཤེགས་པའི་བར་ཇོ་བོ་རྗེ་ཉིད་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན་ཏེ་མདོ་སྔགས་ཀྱི་གསུང་རབ་དགོངས་འགྲེལ་དང་བཅས་པ་མཐའ་དག་བྱང་ཆུབ་ལམ་གྱི་རིམ་པར་བསྡུས་ཏེ་གསན་ཞིང་དེ་འབའ་ཞིག་ཐུགས་ཉམས་སུ་བཞེས་པས་བསྟན་པ་ཡོངས་རྫོགས་ཀྱི་བདག་པོར་བྱོན་པ་ཡིན། དགེ་བཤེས་པོ་ཏོ་བ་ཆེན་པོས་ཀྱང་ཁྱིམ་དུ་བཞུགས་སྐབས་སྦ་སྒོམ་ལ་བསྙེན་གནས་ཀྱི་སྡོམ་པ་ཞིག་ཞུས་བླ་མ་དེ་དང༌། དགེ་ཚུལ་གྱི་སྡོམ་པའི་མཁན་སློབ་དང༌། མཚན་ཉིད་ལ་བསླབ་སྦྱོང་མཛད་པའི་སྐབས་ཀྱི་སློབ་དཔོན་དང༌། འབྲོམ་རིན་པོ་ཆེ་རྣམས་མ་གཏོགས་པ་བླ་མ་མ་བསྟེན། དེ་ཡང་གཙོ་བོར་འབྲོམ་རིན་པོ་ཆེ་ཉིད་ལ་བརྟེན་ཏེ། དང་པོ་མཇལ་བ་ནས་མཐར་ཞིང་ནམ་གཤེགས་ཀྱི་བར་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན་ཏེ་བྱང་ཆུབ་ལམ་གྱི་རིམ་པ་ཉིད་ལ་སྦྱངས་པས་བསྟན་པ་ཡོངས་རྫོགས་ཀྱི་བདག་པོར་བྱོན། ཁོ་བོས་ཀྱང་བཀའ་གདམས་སྐུ་མཆེད་རིན་པོ་ཆེ་གསུམ་ལ་བརྟེན་ཅིང་དེའི་ནང་ནས་ཀྱང་དགེ་བའི་བཤེས་གཉེན་པོ་ཏོ་བ་ཆེན་པོ་ཉིད་ལ་བརྟེན། གཞན་དག་དགེ་ཚུལ་གྱི་མཁན་སློབ་མ་གཏོགས་བླ་མ་གཞན་མ་བསྟེན། དགེ་བཤེས་པོ་ཏོ་བ་ཆེན་པོ་ནི་ལོ་བཅོ་བརྒྱད་ཀྱི་བར་དུ་བསྟེན་ཏེ་མི་མཉེས་པ་སྐད་ཅིག་ཀྱང་བྱེད་མ་མྱོང་གསུང༌། མཐར་དགེ་བཤེས་པོ་ཏོ་བ་ཞིང་གཤེགས་ནས་དགེ་བཤེས་པོ་ཏོ་བའི་སློབ་མ་ཕལ་ཆེར་ཤ་ར་བའི་རྗེས་སུ་འབྲང་སྟེ་འཁོར་བརྒྱ་ཕྲག་མང་པོ་དང་བཅས་ཀླུངས་ཤོད་དུ་བྱོན་ནས་ཚོགས་བསྡུས། ཡོ་བྱད་གང་བྱུང་ཐམས་ཅད་དགེ་འདུན་ལ་བསྔོས། དེ་ནས་སྙན་པའི་གྲགས་པས་འཛིན་མའི་ཁྱོན་ཀུན་ཁྱབ་སྟེ་བྱང་ཆུབ་ལམ་གྱི་རིམ་པ་རྒྱ་ཆེར་བཤད་པས་ཆོས་གསན་པ་མང་དུས་སུམ་སྟོང་འདུ་པ་བྱུང༌། ཕལ་ཆེར་ཉིས་སྟོང་ལྷག་ཙམ་རྒྱུན་དུ་འདུས། དེ་ཐམས་ཅད་ཀྱང་དགེ་བཤེས་ཤ་ར་བ་ཆེན་པོ་ཉིད་ཀྱི་རྣམ་ཐར་རྗེས་སུ་སྐྱོང་བ་ཤ་སྟག་བྱུང་སྟེ། ཤ་ར་བ་ཆེན་པོ་ཉིད་ཀྱིས་རང་གི་འཁོར་དུ་འདུས་པའི་གདུལ་བྱ་ཐམས་ཅད་ཚུལ་ཁྲིམས་རྣམ་པར་དག་པ་གཞིར་བཟུང་ནས་སྐྱེས་བུ་གསུམ་གྱི་ལམ་གྱི་རིམ་པ་སྒོམ་པ་ལ་སྦྱར། ལམ་གྱི་རིམ་པའི་ཡང་རྩ་བ་བཤེས་གཉེན་བསྟེན་ཚུལ་རྣམ་པར་དག་པ་ཞིག་དགོས་ཞེས་འདོམས་པར་མཛད།ཤ་ར་བ་ཉིད་ཀྱི་ཞལ་ནས་ཐེག་པ་ཆེན་པོའི་ལམ་གྱི་རྩ་བ་དགེ་བའི་བཤེས་གཉེན་ཡིན། དགེ་བའི་བཤེས་གཉེན་ལ་མ་བསྟེན་པར་ལམ་གང་ཡང་སྐྱེ་བ་མི་སྲིད་པ་ཡིན། ས་བཅུའི་བྱང་ཆུབ་སེམས་དཔའ་བསྐལ་པ་གྲངས་མེད་གསུམ་དུ་ཚོགས་བསགས་པ་ལ་ཡང་ཕྱོགས་བཅུའི་སངས་རྒྱས་རྣམས་ཀྱིས་ཕྱག་གཡས་པ་དབུ་ཐོག་ཏུ་བཞག་ནས་བྱིན་གྱིས་མ་བརླབས་པར་རྡོ་རྗེ་ལྟ་བུའི་ཏིང་ངེ་འཛིན་ཐོབ་མི་སྲིད་པས་དེ་བཞིན་གཤེགས་པ་དེ་དག་གནས་སྐབས་དེ་ན་དགེ་བའི་བཤེས་གཉེན་བྱ་བར་འདོད་པ་ཡིན། ད་ལྟ་འུ་ཅག་ཐམས་ཅད་ཀ་ཅ་ཁོ་ན་ལ་རྩི་བ་ལ་སྐུ་མཆེད་གསུམ་པོ་ལ་རེས་གསུམ་ག་སྤྱིར་འབུལ་བ་འོང༌། རེས་གཉིས་ལ་འོང་བ་ལ། དུས་དེ་ཐམས་ཅད་ན་གསུམ་ལ་ཕུལ་ན་གཉིས་ལ་འབུལ། གཉིས་ལ་ཕུལ་ན་གཅིག་ལ་འབུལ་གྱི་ང་འདི་འདོད་ཡེ་མི་གསུང་དེ་ལྟ་བུ་ལ་དད་གསུང༌། དགེ་བཤེས་ཤ་ར་བ་ཆེན་པོ་དེ། དགེ་བཤེས་པོ་ཏོ་བའི་རྣམ་ཐར་སྐྱོང་བ་མ་གཏོགས་སུ་ལའང་མི་འདུད་སུ་དང་ཡང་མི་ཁོན།གང་དུ་འདུག་ཀྱང་དམའ་ས་འཛིན་རྐྱེན་བཟང་ངན་གང་བྱུང་ཡང་བྱང་ཆུབ་ལམ་གྱི་རིམ་པ་སྒོམ་པ་ཁོ་ན་ལས་ཐབས་གཞན་གང་ཡང་མི་མཛད། སྐུ་མཐོང་བ་དང་གསུང་ཐོས་པ་ཐམས་ཅད་དད་པ་རང་དབང་མེད་པར་སྐྱེ། དད་རྫས་དང་གཤིན་རྫས་གང་བྱུང་ཡང་དཀོན་མཆོག་གི་མཆོད་པ་དང༌། དགེ་འདུན་གྱི་བསྙེན་བཀུར་ཁོ་ན་ལ་གཏོང་བ་ལས་མི་དགོས་པའི་སར་ཡེ་མི་གཏོང༌། མ་ངག་པའི་རྫས་ཡེ་མི་འཆང་གཞན་གྱིས་ཞིང་དང་ཁང་ཁྱིམ་དང་ཕྱུགས་ལ་སོགས་ཕུལ་ཡང་གཏན་ནས་མི་བཞེས། ལན་ཅིག་སྦྱིན་བདག་ཞིག་གིས་ཞིང་རྔས་པའི་ཐོག་ཅིག་ཕུལ་བ་ན་དགེ་འདུན་ལ་ཕུལ་ང་ལ་མི་དགོས་རྩ་སོག་ཆུར་སྐྱོལ་གྲྭ་པ་རྣམས་ཀྱི་རྒྱགས་སྐྱེལ་མིའི་ཁལ་མ་ལ་ཕན་འགྲོ་གསུང༌། དགེ་བཤེས་པོ་ཏོ་བ་དང་ཤ་ར་བ་གཉིས་པོས་ཐབས་ལྟོ་བཅོས་གང་ཡང་མ་མཛད་པར་ལམ་རིམ་ཁོ་ན་སྒོམ་པར་མཛད་པས་རང་དང་སློབ་མ་རྣམས་ལ་ནད་གདོན་གྱི་འཚེ་བ་ཉུང༌། ལྷ་འདྲེ་མི་གསུམ་བྱམས་ཚེ་རིང་བར་བྱུང༌། དགེ་བཤེས་སྤྱན་སྔ་བ་དང་བྱ་ཡུལ་བ་དཔོན་སློབ་རྣམས་ཐབས་རིམ་མན་ངག་འདི་མི་མཁྱེན་བྱ་བ་མེད་པས་གདུལ་བྱ་རྣམས་ཀྱང་མན་ངག་སྣ་ཚོགས་ལག་ལེན་བྱེད་པ་བྱུང་ཡང་ནད་གདོན་གྱི་འཚེ་བ་མེད་ཞེས་བཀའ་གདམས་གོང་མའི་གསུང་སྒྲོས་ལས་འབྱུང༌། ཤ་ར་བ་ཉིད་ཀྱི་ཞལ་ནས་སྤྱིར་ལེགས་ཉེས་ཅི་བྱུང་ཆོས་ལ་བརྟེན་པ། དེའི་ནང་ནས་ཀྱང་འདུལ་བ་ལ་བརྟེན་ན་ལྡབ་ཀྱང་མི་དགོས་པ་ཞེ་གཙང་བ། རྟག་ཐུབ་པ། ཉམས་དགའ་བ།མཐའ་བཟང་བ་ཡིན་གསུང༌། ཡང་ཞལ་ནས་རྟེན་དང་བསྲུང་བ་མི་དགོས་པའི་གང་ཟག་གསུམ་ཡིན།དགེ་སློང་ཆོས་གོས་རྣམ་གསུམ་ལས་ཡོངས་སུ་བཟུང་བ་ཐམས་ཅད་སྤངས་ཏེ་ཉེས་པ་ཕྲ་ཞིང་ཕྲ་བས་ཀྱང་མ་གོས་པ་ཞིག་བྱུང་ན་རྟེན་དེ་ཉིད་མཆོད་གནས་ཡིན་པས་མི་དགོས། བྱང་ཆུབ་ཀྱི་སེམས་སྨོན་འཇུག་གཉིས་རྣལ་མར་ཡོད་པ་དེ་སེམས་ཅན་ཐམས་ཅད་ཀྱི་མཆོད་གནས་ཡིན་པས་མི་དགོས། སྔགས་པ་མཚན་ཉིད་དང་ལྡན་པ་སྣང་བ་ཐམས་ཅད་ལྷ་དང་ལྷ་མོར་ཤེས་པ་ལ་མི་དགོས་གསུང༌། བཀའ་རྒྱུད་ཟམ་མ་ཆད་པའི་གདམས་པ་ལ་བརྟེན་ནས་ཤེས་བཞིན་ཆེན་པོས་ཐམས་ཅད་མིག་འོག་ཏུ་ཆུད་པར་བྱས་ཏེ། སྤྱོད་ལམ་རྣམ་བཞིར་ཅི་བྱེད་ཐམས་ཅད་ཐར་པའི་རྒྱུར་དཀར་ལམ་གྱིས་གཏོང་ཤེས་པ་ཅིག་དགོས་གསུང༌། ཡང་ཞལ་ནས་བྱ་ཡུལ་བའི་བཀའ་རྒྱུད་འདི་ལ་སྲུང་བ་ཟད་པ་མེད་པ་ཅིག་ཡོད་དེ་འཚེ་བ་ཤིན་ཧུ་མང༌། མི་དབང་དུ་བསྡུ་བའི་ཐབས་ཟད་པ་མེད་དེ་ངན་སྨ་དེ་མང་བོ་སྣང༌། ཚེ་སྤེལ་ཐབས་ཁོ་ན་མཛད་དེ་སྐུ་ཚེ་རིང་བ་ཙམ་མ་བྱུང་ལ། པོ་ཏོ་བའི་བཀའ་རྒྱུད་འདི་བསྟན་པ་རིན་པོ་ཆེ་ཁས་བླངས་ཀྱི་ཆོས་ཁོ་ན་ལས་སྤན་སྤུན་ཡེ་མི་མཛད་དེ་འཚེ་བ་ཉུང་མི་བྱམས་སྐུ་ཚེ་རིང་བར་བྱུང་སྟེ། ཁོ་བོས་ནི་མན་ངག་དེ་མངོན་སུམ་དུ་གོ་བར་བྱུང་གསུང༌། 2/4 མདུན་ངོས། 上一页 1 2 3 4 下一页 尾页 |
