| དཔལ་གསང་བ་འདུས་པ་ལྷ་བཅུ་དགུ་ཕྱི་ནང་དུ་འབུར་དུ་དོད་པ་ལ་ཕྱོགས་བཞི་ན་ཡབ་བཞི། མཚམས་བཞི་ན་ཡུམ་བཞི། གཙོ་བོ་འཇམ་དཔལ་རྡོ་རྗེ་བྲེའི་མགུལ་ན་བཞུགས། ལྷ་མོ་དྲུག་ནང་དུ་འབུར་དོད་དུ་བཞུགས། ཁྲོ་བོ་བཞི་ནས་ཙམ་རེ་ཟུར་གྱི་མཆོད་རྟེན་གྱི་ནང་ན་བཞུགས་པ་གཅིག་བཞེངས་སུ་གསོལ་ཏེ། འབྲོམ་རིན་པོ་ཆེས་རྣལ་འབྱོར་པ་རྣམས་དང་བཀའ་བགྲོས་མཛད་ནས་བྱ་ལོ་ལ་གདུང་ཁང་དང་གཙུག་ལག་ཁང་ཁྱུང་མགོ་ཅན་གྱི་རྔ་ཁང་ཡན་ཆོད་ཚར་བར་མཛད་ནས་ད་འདི་མན་ཆད་ལ་བྱེད་པ་པོ་ཞིག་འོང་གི་གསུང་སྟེ། འཛིན་རྡོ་ཡོན་ཏན་འབར་བྱ་བ་ལ་བོད་པ་མཛད་ནས་ཁྱོད་འཇིག་རྟེན་གྱི་ཤེས་ཆེ་བ་ཡིན་པས་ཤེས་ཀྱིས་དང་ཁོ་བོས་འཇིག་རྟེན་གྱི་རྣམ་པར་རྟོག་པ་སྤོང་བློ་ཞིག་བགྱི་གསུངས་ནས་ཁྱུང་མགོ་ཅན་ལ་བསྐོར་བ་མཛད་དེ་ཤངས་སྣབས་ཀྱིས་ཀྱང་ལྐོག་མ་ན་མར་སླེབ་པར་བྱས་ནས། འཇིག་རྟེན་མཁྱེན་པ་རྙེད་དང་མ་རྙེད་དང༌། ཞེས་བྱ་བའི་ཚིགས་བཅད་དེ་འདོན་ཞིང་ཆོས་བརྒྱད་པོ་དེ་ལ་བཏང་སྙོམས་སུ་མཛད་ཅིང་བཞུགས་པ་ལགས། དེ་ལྟར་འབྲོམ་སྟོན་པ་རྒྱལ་བའི་འབྱུང་གནས་ཐུགས་ཟབ་ལ་དཀྱེལ་ཆེ་བ་མཁྱེན་པའི་ཚད་རྒྱ་མཚོ་ཆེན་པོ་དང་མཚུངས་པ་དེས་ར་སྒྲེང་དུ་ཇོ་བོའི་སྲོལ་བཟང་གིས་བཙུགས་ནས་ཡོད་པའི་དུས་སུ། ཐུགས་ཀྱི་སྲས་སྐུ་མཆེད་གསུམ་རིམ་པར་བྱོན་པ་ཡིན་ཏེ། ཕུ་ཆུང་བས་ནི་སྙེ་ཐང་ཉིད་ནས་ཕྱགས་ཕྱི་མཛད། སྤྱན་སྔས་མེ་མོ་བྱའི་ལོ་ལ་ར་སྒྲེང་དུ་བྱོན། པོ་ཏོ་བས་དེའི་ཕྱི་ལོ་ལ་ར་སྒྲེང་དུ་བྱོན། དེ་ལྟར་ཞབས་དྲུང་དུ་བསྙེན་པའི་སློབ་མ་རྣམས་འཇིག་རྟེན་ལ་ཞེན་པ་བཟློག་ཏུ་བཅུག་ནས་ཆོས་ཁོ་ན་སེམས་སུ་བཅུག་པ་ལ་འབྲོམ་རིན་པོ་ཆེའི་དུས་ན་དགེ་འདུན་ལྔ་བཅུ་ཙམ་ལས་མེད་དེ། དེ་རྣམས་ཀྱི་དབང་དུ་བྱས་ན། ཏིང་ངེ་འཛིན་བཟང་པོ་ཐུགས་རྒྱུད་ལ་འཁྲུངས་ཤིང་ཚུལ་ཁྲིམས་རྣམ་པར་དག་པ། ཡི་དམ་གྱི་ལྷའི་ཞལ་གཟིགས་པ། མངོན་པར་ཤེས་པ་རྒྱ་ཆེན་པོ་དང་ལྡན་པ། ཆོས་རྣམས་ཀྱི་རང་དང་སྤྱིའི་མཚན་ཉིད་རིག་པའི་ཤེས་རབ་ཕུན་སུམ་ཚོགས་པ་མངའ་བ། ནུབ་ཕྱོགས་ཨྱོན་དང་འདྲ་བ་གྲུབ་ཐོབ་དུ་སྤུང་ངེ་བ་གཅིག་བྱོན་ཏེ། མཚོ་ལ་པདྨས་བརྒྱན་པ་འདྲ་བའི་འཁོར་སྐད་པ་དེ་དགེ་བཤེས་སྟོན་པའི་འཁོར་དེ་ཀུན་ལ་ཟེར་བ་ཡིན། དེ་བས་ན་མང་ཁ་ན་མེད་གྲུང་གཙོ་བ་ཡིན་གསུང༌། དགེ་བཤེས་པོ་ཏོ་བས་ཀྱང༌། ངའི་དོན་གྱི་མཁན་པོ་དེ་ར་སྒྲེང་གི་དགེ་བསྙེན་རྒན་པོ་དེར་སྣང་གསུངས་ནས། འབྲོམ་རིན་པོ་ཆེའི་གདམས་པ་ཐུགས་ཉམས་སུ་བཞེས་པས་ངེས་འབྱུང་གི༌བསམ་པ་མ་བཅོས་པ་ཐུགས་ལ་འཁྲུངས་པ་ན་སྔར་གྱི་སོ་སོ་ཐར་པའི་སྡོམ་པ་ངེས་འབྱུང་གི་སྡོམ་པར་སོང་གསུང་བ་ལགས། དེ་ལ་སྤྱིར་ཇོ་བོ་བོད་དུ་ཕེབས་ནས་བདག་གཉེར་འབྲོམ་རིན་པོ་ཆེས་མཛད། ཇོ་བོ་རྗེ་ཉིད་ཀྱང་འབྲོམ་རིན་པོ་ཆེ་ཁོ་ན་ལ་ཐུགས་གཏོད་པར་མཛད། བསམ་ཡས་སུ་བཞུགས་པའི་ཚེ་ཇོ་བོ་རྗེས་འབྲོམ་རིན་པོ་ཆེ་ལ་གསང་སྔགས་ཀྱི་སྤྱོད་པའི་ཐབས་མང་པོ་དང༌། མཆིམས་ཕུར་དོ་ཧ་ལ་སོགས་པའི་གདམས་པ་ཟབ་མོ་རྣམས་གནང་ཞིང་ནང་དུ་ཐུགས་ཉམས་སུ་བཞེས་པར་མཛད་ཀྱང་གསང་སྔགས་སྒྲ་ཇི་བཞིན་པར་སྤྱོད་པའི་རྩིང་སྤྱོད་རྣམས་ཇོ་བོའི་དྲིན་ལས་མེད་པ་ཅིག་བྱུང་ན་དགོངས་པས་གསང་སྔགས་ཟབ་མོ་རྣམས་གསན་པ་སྐད་དུ་ཡེ་མི་མཛད་པར་ཐེག་པ་ཆེན་པོའི་བླ་མ་བྱ་བ་བཤད་པ་ན་འབྱམས་ཀླས་པར་གོ་བ་བསྐྱེད་ལ། ལག་ཏུ་ལེན་པ་ན་བསྟན་པའི་ཐ་མ་ལ་གང་ཕན་དང༌། ཐད་ཀར་དོན་དུ་གང་འགྱུར་སྟོན་པ་ཅིག་དགོས་གསུང་ཞིང་འབྲོམ་རིན་པོ་ཆེ་ཉིད་ཀྱང་དེ་ལྟར་དུ་འདོམས་པར་མཛད། འབྲོམ་རིན་པོ་ཆེས་ཞང་ཆོས་ཀྱི་རྒྱལ་པོ། ཇོ་བོ་ལེགས། ཡོངས་རྫོགས་རྣལ་འབྱོར་པ། སྤྱན་སྔ་དང་བཞི་མིན་པ་ལ་སྔགས་ཀྱི་དབང་བསྐུར་མ་གནང་བ་ཡིན་གསུང༌། པོ་ཏོ་བས་འབྲོམ་རིན་པོ་ཆེའི་སྤྱན་སྔར་ལོ་ངོ་བདུན་བཞུགས་པ་ལ་བུམ་པ་འཆའ་བ་ལན་ཅིག་ལས་མ་གཟིགས་གསུང༌། སྔོན་རྣལ་འབྱོར་པ་ཆེན་པོས་འབྲོམ་རིན་པོ་ཆེ་ལ་བསྲུང་སྡོམ་རྣམ་པར་དག་པའི་སྟངས་ཕུལ། ཏིང་ངེ་འཛིན་ཕུན་སུམ་ཚོགས་པའི་རྟོགས་པ་ཕུལ་བས། འབྲོམ་རིན་པོ་ཆེའི་ཞལ་ནས། ཁྱོད་བསྲུང་སྡོམ་རྣམ་པར་དག་སྟེ་བསྡམ་པར་བྱ་བའི་ཉེས་བྱས་ཕྲ་མོས་ཀྱང་མ་གོས། ཏིང་ངེ་འཛིན་བཟུང་སྟེ་རྣ་རྩར་རྔ་བོ་ཆེ་བརྡུངས་ཀྱང་མི་ཚོར་བ་ཡོད་ཀྱང་དེ་བས་ངའི་བྱམས་པ་སྙིང་རྗེ་བྱང་ཆུབ་ཀྱི་སེམས་མེད་ན་ཉིན་མཚན་དུ་བཤགས་པ་བྱ་དགོས་པའི་སར་སྐྱེས་དོགས་ཡོད་དོ་གསུང་ངོ༌། །ཡང་ལན་ཅིག་མུ་གེ་ཞིག་བྱུང་བའི་དུས་སུ་འབྲོམ་ཟ་ལོ་མཚོ་མ་བྱ་བ་ཞིག་གིས་ནས་མི་ཁུར་ལྔ་བཅུ་ཕུལ་ནས་དེའི་མིང་པོ་འབྲོམ་ཚིག་པ་ད་རེ་བྱ་བས་གཏམ་བཏང་བ། ཇོ་བོ་ལྷ་ཅིག་འཛམ་བུ་གླིང་གི་རྒྱན་དམ་པ་ཡིན། དེའི་མན་ངག་བུམ་པ་གང་བྱོའི་ཚུལ་དུ་མངའ་བ་དགེ་བའི་བཤེས་གཉེན་སྟོན་པ་ཁྱེད་ཡིན། ཕྱོགས་ཕྱོགས་ནས་བྱོན་པའི་གྲྭ་པ་ཀུན་ཡང་མན་ངག་འདོད་པ་ཡིན་པས་དེ་རིང་ཇོ་བོའི་མན་ངག་གསུང་བར་ཞུ་ཞུས་པས། འབྲོམ་རིན་པོ་ཆེའི་ཞལ་ནས་བྱ་བྱ་གསུངས་ནས་འཆི་བ་མི་རྟག་པ་དང་ལས་དང་འབྲས་བུ་མང་དུ་བསམས་ལ། ཁས་བླངས་པའི་སྡོམ་པ་དག་པར་བྱ། བྱམས་པ་དང་སྙིང་རྗེ་མང་དུ་སྒོམས་ལ་བྱང་ཆུབ་ཀྱི་སེམས་བརྟན་པར་བྱ། དེས་འཕངས་ནས་ཚོགས་སྒོ་སྣ་ཚོགས་ནས་གསོག་ཅིང་སྡིག་པ་སྒོ་སྣ་ཚོགས་ནས་སྦྱོང་བ་དེ་བླ་མའི་མན་ངག་ཡིན་པས། སང་ཙ་ན་ཇོ་བོ་རྗེ་ལྷ་ཅིག་དང་མ་ཕྲད་སྙམ་ནའང་དེ་ལས་མེད་དོ། །འབྲོམ་དགེ་བསྙེན་རྒན་པོ་དེ་དང་མ་ཕྲད་སྙམ་ནའང་དེ་ལས་མེད་གསུང༌། ཡང་འབྲོམ་རིན་པོ་ཆེའི་ཞལ་ནས།ངའི་ལམ་གྱི་རིམ་པ་འདི་ལ་སུ་ཡིད་ཆེས།ཁམས་མ་གི་ན་སྟོང་ཟོམ་ཡོན་ཏན་སྙིང་པོ་བྱ་བ་ཞིག་ཡོད་དེ། དེ་ལ་བཟླས་ན་ཡིད་ཆེས་སམ་གསུང༌། འབྲོམ་རིན་པོ་ཆེས་དགོན་པ་ལ་ཉིན་གཅིག་ཐུགས་དམ་སྐྱེལ་དུ་བྱོན་ཙ་ན་མཎྜལ་རྡུལ་ཆིང་ངེ་འདུག་པ་ལ། སྒོམ་པདབང་ཕྱུག་རྒྱལ་མཚན། མཆོད་པ་མི་བརྗེ་བ་ཙུག་ཡིན་གསུངས་པས། བག་རེ་ནང་དུ་བསམ་འཚལ་བར་གདའ་བས་ཞུས་པས། ཁྱོད་གཅིག་པུ་ལ་སྒོམ་ཡོད་སྙམ་མམ། ཁྱོད་པས་ཨ་ཏི་ཤ་སྒོམ་བཟང་སྟེའང་མཆོད་པ་འདི་དང་འདི་རྣམས་མཛད་པ་ཡིན། ང་ལ་ཡིད་མ་ཆེས་ན་མདོ་སྡེ་ལྟོས་གསུང༌། ཡང་འབྲོམ་རིན་པོ་ཆེ་སྐུ་ཁམས་ཅུང་མ་བདེ་བ་ཞིག་གི་དུས་སུ་རྣལ་འབྱོར་པ་ཆེན་པོས་རྩིག་པ་ལ་ཐག་ཐོགས་མེད་པར་བྱོན་ཏེ་བསྙུན་དྲིས་པས། ཇོ་བོ་བ། ཁྱོད་གང་ངོ་ཚ་བའི་ཡན་ལག་དེས་དྲེགས་སམ། སེམས་ཅན་བཞག་ནས་གར་ཆ། དེ་ནི་ཉིན་མཚན་དུ་བཤགས་པ་བྱ་དགོས་པའི་སར་སྐྱེ་བ་ཡིན་གསུང་ནས་བཀའ་བཀྱོན། ཡང་དགོན་པ་གོང་ན་འབྲོམ་རིན་པོ་ཆེ་དང༌། རྣལ་འབྱོར་པ་རྣམ་པ་དང༌། སྐུ་མཆེད་གསུམ་རྣམས་འཚོགས་ནས་ཀུ་རེ་བཞད་གད་ཙིག་སེ་མཛད་ཙ་ན། ཉེ་གནས་ན་རེ་ཀུ་རེ་ནི་ཀུ་རེ་སྟེ་འུ་ཅག་རྣམས་དེ་རིང་ཅི་ཟ་ཟེར་བ་ལ། དགོན་པ་བའི་ཞལ་ནས། ཨ་པོ་ནི་སྤུས་སྣ་གདོང་ན་ཡར་བྱུང་བ་འོ་ནི་ཀུན་ཟ་བ་ཡིན་གསུང༌། དར་ཅིག་ལོན་ཙ་ན་ཡོན་བདག་གཅིག་གིས་ཕྱེ་དང་མར་ཐུད་འཁུར་བ་ཞོ་ལ་སོགས་པ་རྟ་རྒྱབ་གཅིག་བཀལ་ནས་བྱུང་བས་བསྙེན་བཀུར་བཟང་པོ་བྱས། དེར་འབྲོམ་རིན་པོ་ཆེས་བསྔོ་བ་ཡོན་བཤད་མཛད་ནས་ཡོན་བདག་དེ་སོང་བའི་ཤུལ་དུ་བཀའ་ཕབ་མཛད་དེ། སྒོམ་ཆེན་པ་ཀུན་ཀྱང་ཡོན་ཏན་བག་རེས་སྦོས་ནས་ཕྱིན་ཆད་དེ་འདྲ་བ་གསུང་རྒྱུ་མ་ལགས་གསུང་ནས་བཀྱོན་པར་མཛད། འབྲོམ་རིན་པོ་ཆེ་བརྒྱད་སྟོང་འགྲེལ་ཆེན་གསུང་བའི་དུས་སུ། མཁྱེན་གསུམ་ཐོན་ནས་རྣམ་ཀུན་ལ་མ་ཟུག་པའི་སྐབས་སུ་སྐུ་ཁམས་ལྟེམ་པ་ཅིག་བྱུང་ནས་འགྲེལ་པ་གསུང་མ་སྤྱོད་པར་འདི་མན་ཆོད་ཀྱི་དོད་པོ་གཅིག་བྱ་གསུངས་ནས། ཕ་རོལ་ཏུ་ཕྱིན་པ་དྲུག་གསུམ་བཅོ་བརྒྱད་དུ་ཕྱེ་བའི་ཉམས་སུ་བླང་བདེ་བ་ཅིག་གསུངས་པས།སྤྱན་སྔའི་ཞལ་ནས། གསུང་མ་སྤྱོད་པ་རང་གིས་འཚེངས་བསམ་པ་ཅིག་བྱུང་གསུང༌། དེ་ལྟར་ན་འབྲོམ་རིན་པོ་ཆེ་དེས་གཡུང་ཆོས་མགོན་ལོ་བཞིར་བསྟེན། རྒྱལ་གྱི་ཞང་ལ་དགེ་བསྙེན་གྱི་སྡོམ་པ་མནོས་ནས་ཁམས་སུ་ཇོ་བོ་སེ་བཙུན་གྱི་ཞབས་དྲུང་དུ་ལོ་ཉི་ཤུ། དེ་ནས་ཇོ་བོ་དང་མཇལ་ནས་ཇོ་བོ་ཞིང་མ་གཤེགས་ཀྱི་བར་དུ་མི་འབྲལ་བར་ཞབས་ཏོག་མཛད། ཇོ་བོའི་ཡོན་ཏན་མ་ལུས་པ་ཐུགས་སུ་ཆུད་པར་མཛད་ནས་ར་སྒྲེང་དུ་ལོ་དགུར་བསྟན་པའི་མངའ་བདག་མཛད་དེ། སྤྱིར་སངས་རྒྱས་ཀྱི་བསྟན་པ་རིན་པོ་ཆེ་ཡང་སྒོས་སུ་བཀའ་གདམས་ཀྱི་བསྟན་པ་རིན་པོ་ཆེ་ཉི་མ་ཤར་བ་ལྟ་བུར་མཛད། ཕྱི་རབས་ཀྱི་གདུལ་བྱ་རྣམས་ཀྱི་དོན་དུ་ཇོ་བོ་རྗེ་དང་འབྲོམ་རིན་པོ་ཆེ་རང་ཉིད་ཀྱི་ཐབས་མཁས་ཀྱི་སྤྲུལ་བ་འབྱོན་ཚུལ་གསང་བ་ཟབ་མོའི་གནས་རྣམས་ཀྱང་སྟོན་པར་མཛད་དེ། རྗེ་བཙུན་འཇམ་པའི་དབྱངས་ཀྱི་སྤྲུལ་བ་རྔོག་ལེགས་པའི་ཤེས་རབ་ཀྱིས་གསོལ་བ་ཤུགས་དྲག་ཏུ་བཏབ། ཇོ་བོ་རྗེས་ཀྱང་གསུང་བར་བསྐུལ་ནས་འབྲོམ་རིན་པོ་ཆེས་ཕྱོགས་བཅུའི་སངས་རྒྱས་ཐམས་ཅད་ཀྱིས་འཕགས་པ་སྤྱན་རས་གཟིགས་ཀྱི་ཐུགས་རྗེ་བསྐུལ་ནས་བོད་ཁ་བ་ཅན་གྱི་མགོན་པོར་བྱོན་པའི་ལོ་རྒྱུས་རྣམ་ཐར་ཞིབ་ཏུ་གསུངས་ཤིང༌། མ་འོངས་པ་ནའང་ཇོ་བོ་རྗེ་དང་འབྲོམ་རིན་པོ་ཆེ་གཉིས་ཀྱི་སྤྲུལ་བ་རྒྱུན་མི་འཆད་པ་བྱོན་ནས་རྒྱལ་བསྟན་འཛིན་ཅིང་སྤེལ་བ་དང། དེ་དང་དེའི་ཚེ་དགོན་གནས་ཇི་ལྟ་བུ་འབྱུང་བ་དང༌། མཚན་ཇི་ལྟ་བུ་འབྱུང་དང༌། མཛད་པ་ཇི་ལྟ་བུ་མཛད་ རྣམས་ལུང་བསྟན་པའི་གླེགས་བམ་མཛད། བཀའ་གདམས་བསྟན་པའི་ཆུ་འགོ་བཙུགས། བཀའ་གདམས་ཀྱི་བསྟན་པའི་སྙིང་པོའི་ཡང་སྙིང་པོ་ཐིག་ལེ་བཅུ་དྲུག་གི་གདམས་ངག་ཆ་ལག་དང་བཅས་པ་ཐོར་བུ་ཐོར་བུར་བསྟན་པ་དང༌། ཁྱད་པར་རྒྱལ་བའི་བཀའ་དང་དགོངས་འགྲེལ་མ་ལུས་གང་ཟག་གཅིག་གི་ཉམས་ལེན་གྱི་རིམ་པར་ཧྲིལ་གྱིས་དྲིལ་བ་སྐྱེས་བུ་གསུམ་གྱི་ལམ་གྱི་རིམ་པ་རྒྱུད་ལ་སྦྱོར་ཚུལ་ཤིན་ཏུ་གསལ་ཞིང་གོ་བདེ་བ། བློ་མཐོ་དམའ་སུས་བལྟས་ཀྱང་རྒྱུད་འཁུལ་བ་རང་རྒྱུད་ལ་བསྐུལ་འདེབས་དད་པའི་ལྗོན་ཤིང་སོགས་གདམས་ངག་གི་ཡིག་འཇོག་ཀྱང་མང་དུ་མཛད་ནས་མྱ་ངན་ལས་འདའ་ཁར་པོ་ཏོ་བའི་པང་དུ་དབུ་བཞག་ནས་ཡོད་པའི་ཚེ་པོ་ཏོ་བའི་ཐུགས་ལ་འཇིགས་སར་སྐྱེལ་མས་བོར་བ་འདྲ་བ་ཞིག་འོང་བར་འདུག་ན་ད་སུ་ལ་བརྟེན་སྙམ་ཞིང་སྤྱན་ཆབ་འབྲོམ་རིན་པོ་ཆེའི་ན་བཟའི་གོང་ཙ་ན་མར་ཉིལ་གྱིས་བྱུང་བས་འབྲོམ་རིན་པོ་ཆེས་མཁྱེན་ནས། ཞལ་འཆེམས་ལ་ད་ཕན་ཆད་དགེ་བའི་བཤེས་གཉེན་འདི་ཁོ་ན་ལ་བརྟེན་དགོས་བྱ་བ་ཡེ་མེད་ཀྱི། མདོ་སྡེ་ལྟོས། དགེ་བའི་བཤེས་གཉེན་མདོ་སྡེ་ལ་གྱིས། གྲོགས་པོ་མིག་ཟུར་ལ་ལྕི་བ་དང་འགྲོགས། ཁ་མཉམ་ལག་མཉམ་དེས་ཀྱང་མི་འོང་བར་སྣང༌། གཉིས་དང་གསུམ་ཡང་ཉུང༌།གཅིག་པུར་ཡེ་མ་འདུག བཞི་ལྔ་མན་ཆོད་ཙམ་རན། དེ་ལས་མང་དུ་ཡང་མི་རུང༌། སེམས་བཟང་པོར་གྱིས་དང༌། ཁྱད་པར་ཅན་དང་ཕྲད་དེ་འོང་གི་གསུངས་ནས། མདུན་ན་ཇོ་བོ་ལེགས་ཡོད་པས། སེམས་བཟང་པོ་བྱང་ཆུབ་ཀྱི་སེམས་ལ་ཟེར་བ་མ་ལགས་སམ་ཞུས་པས། ཡིན་མོད་གསུངས་ནས་སྐུ་དངོས་ཀྱི་གདུལ་བྱ་རྣམས་རྫོགས་པ་ན་ཤིང་ཕོ་འབྲུག་གི་ལོ་སྣྲོན་གྱི་ཟླ་བའི་ཚེས་ཉི་ཤུ་ལ་ར་སྒྲེང་དུ་སྐུའི་བཀོད་པ་བསྡུས་ཏེ་དགའ་ལྡན་ཆོས་ཀྱི་ཕོ་བྲང་དུ་རྒྱལ་བ་མ་ཕམ་པ་དང་ནམ་མཁའ་དྲི་མ་མེད་པ་འཁོར་བཅས་ཀྱི་ཞབས་དྲུང་དུ་ཕེབས་ཤིང༌། གཞན་ཡང་ནམ་མཁས་གར་ཁྱབ་ཏུ་སྤྲུལ་པའི་བཀོད་པས་ཁྱབ་སྟེ། གདུལ་བྱ་གང་དང་གང་ན་ཡོད་པ་དེར་རང་རང་གི་ཁམས་དང་བསམ་པ་དང་མཐུན་པར་སྐུའི་བཀོད་པ་བསྟན་ནས་འགྲོ་བའི་དོན་མཛད་ཅིང་བཞུགས་སོ། །འབྲོམ་རིན་པོ་ཆེ་འདི་ལ་ལྷ་དང་མིའི་སློབ་མ་བསམ་གྱིས་མི་ཁྱབ་པ་ཡོད་ཅིང༌། བསྟན་པ་ཡོངས་རྫོགས་འཛིན་པའི་སློབ་མའང་ཆེས་མང་བར་ཡོད་ལ། ཡོངས་སུ་གྲགས་པའི་སློབ་མའི་གཙོ་བོ་ནི་དགེ་བཤེས་ཁམས་པ་ལུང་པ་ཆེན་པོ་དང༌། རྣལ་འབྱོར་རྣམ་པ་བཞི་དང་བཀའ་གདམས་སྐུ་མཆེད་གསུམ་སྟེ། ཁམས་པ་ལུང་པ་ཆེན་པོ་ནི། འཕན་ཡུལ་ཡུང་བར་ཤིང་མོ་གླང་ལ་འཁྲུངས། རུས་སྒང༌། རྟེན་དགེ་བསྙེན་ཡིན་མཚན་ཤཱཀྱ་ཡོན་ཏན། གཞོན་པའི་དུས་སྡེ་སྣོད་ལ་ཡང་སྦྱངས་པ་མཛད་དེ། ཉིད་ཀྱི་ཞལ་ནས། ངས་ལྷ་ས་སྙེ་ཐང་དུ་བ་མ་ཡིན་པ་དང་རྟ་མ་ཡིན་པ་ལ་མི་ཚེ་བསྐྱལ་ཞེས་གྲགས། སྙེ་ཐང་དུ་ཇོ་བོ་ཉིད་དང་མཇལ་ཞིང་ཕྱིས་ར་སྒྲེང་དུ་དགེ་བཤེས་སྟོན་པ་ཡུན་རིང་དུ་བསྟེན་ཅིང་སྐུ་མཆེད་གསུམ་མམ་བཞི་ཞེས་གྲགས། པོ་ཏོ་བའི་ཞལ་ནས། ཡུང་བའི་དགེ་བཤེས་སྒང་ཤཱཀྱ་ཡོན་ཏན་གྱིས་ཆོས་བདེན་པར་བཟུང་ནས་སྐྱབས་སུ་མཆི་བྱས་པས། ད་ལྟ་ཡུང་བ་ལུང་པ་ན་ཁོང་ལས་བདེ་སྐྱིད་ཆེ་བ་མེད་གསུང༌། དེ་ལྟར་དགེ་བཤེས་ཁམས་ལུང་པས་དགུང་ལོ་དགུ་བཅུའི་བར་སྒྲུབ་པའི་རྒྱལ་མཚན་བཙུགས་ཤིང་སེམས་ཅན་གྱི་དོན་མཛད་ནས་ཤིང་མོ་ལུག་དགུ་བཅུ་རྩ་གཅིག་པ་རྟའི་ཟླ་བའི་ཚེས་བཅུ་བཞི་ལ་ཁམས་ལུང་དུ་སྐུ་གཤེགས། ཆོས་ལ་ཐུན་བརྒྱད་མར་མིང་ཐོགས་ཚོགས་པ་སྟོང་ཕྲག་རེ་ཙམ་འཚོགས། བྱང་ཆུབ་ཀྱི་ཐུགས་འབྱོངས་པས་ཞལ་མཐོང་བ་ཐམས་ཅད་དད་པར་གྱུར། ཕྱོགས་མཐའ་དག་ནས་མཇལ་མི་བྱུང་བ་ན། ཁྱེད་ཅག་གི་ཡུལ་ན་མི་རྒན་མེད་དམ་གསུང་བ་ལ། མི་རྒན་ཏ་ཡོད་དེ་ཁྱེད་ལྟ་བུ་མེད་ཅེས་ཞུས་མདོར་ན་མཐོང་ཐོས་དྲན་རེག་དོན་ལྡན་དུ་འགྱུར་ངེས་པའི་སྐྱེས་བུ་ཆེན་པོར་གྲགས་སོ། །སྐུ་མཆེད་གསུམ་གྱི་རྣམ་པར་ཐར་པ་ནི་ཕྱི་ནས་འཆད་པར་འགྱུར་ལ། རྣལ་འབྱོར་པ་རྣམ་པ་བཞི་ནི། རྣལ་འབྱོར་པ་ཆེན་པོ་བྱང་ཆུབ་རིན་ཆེན། རྣལ་འབྱོར་དགོན་པ་བ་ཆེན་པོ་དབང་ཕྱུག་རྒྱལ་མཚན། རྣལ་འབྱོར་པ་ཤེས་རབ་རྡོ་རྗེ། རྣལ་འབྱོར་ཕྱག་དར་སྟོན་པ་བཞི་སྟེ་དེ་དག་གི་རྣམ་ཐར་ནི་སྔར་ཇོ་བོའི་རྣམ་ཐར་གྱི་སྐབས་སུ་བཤད་པ་ལྟར་རོ། །གཞན་མ་དགེ་བཤེས་ཀ་བ་ཆེན་པོ། གསང་ཕུ་བ་ལེགས་པའི་ཤེས་རབ། ཡེར་པའི་དགེ་བཤེས་ཇོ་བོ་ལེགས་སོགས་སེམས་དཔའ་ཆེན་པོ་ངོ་མཚར་བསམ་གྱིས་མི་ཁྱབ་པའི་རྣམ་ཐར་དང་ལྡན་པ་མང་དུ་ཡོད་མོད་ཀྱི་ཡི་གེའི་ཁུར་གྱིས་འཇིགས་པས་འདིར་མཐའ་དག་མ་སྤྲོས་སོ། །དེས་ན་བྱང་ཆུབ་ལམ་རིམ་ལ་བློ་སྦྱོང་བར་འདོད་པ་རྣམས་ཀྱིས་ཐུགས་རྗེ་ཆེན་པོ་རྒྱལ་བ་འབྲོམ་གྱི་རྣམ་ཐར་རྣམས་དྲན་པར་བྱས་ལ་སྐུའི་རྣམ་པ་ཡིད་ཡུལ་དུ་བྱས་ཏེ་ཡང་དང་ཡང་དུ་གསོལ་བ་གདབ་པ་དང༌། ལྷག་པར་ཚེ་འདི་བློས་གཏོང་བ་དང་མཁའ་ཁྱབ་ཀྱི་སེམས་ཅན་ལ་བྱམས་སྙིང་རྗེ་སྦྱོང་བ་སོགས་འབྲོམ་རིན་པོ་ཆེའི་གསུང་རྣམས་དྲན་པར་བྱས་ལ་ཉིན་རེ་བཞིན་བྱང་ཆུབ་ལམ་གྱི་རིམ་པ་ལ་བག་ཆགས་ཅི་ཐེབས་བྱའོ། ། 9/9 མདུན་ངོས། 上一页 7 8 9 |
|
|
|
|
|
 |
ཉེ་ལམ་གསར་བརྗེས། |
|
|
|
|
|
|
|
|
ཀློག་མཁན་མང་ཤོས། |
|
|
|
|
|
|
| |
|
