༈ སློབ་དཔོན་དཔའ་བོ་རྡོ་རྗེ་ནི། སློབ་དཔོན་ཨེ་ལ་ངྷ་རི་ཡོངས་འཛིན་དུ་བསྟེན་ནས་ཐེག་པ་ཆེན་པོའི་ལམ་གྱི་རིམ་པ་ཡོངས་སུ་རྫོགས་པ་གསན་ཏེ་སྒྲུབ་པ་རྩེ་གཅིག་ཏུ་མཛད་པས་སྲིད་པ་མཐའ་དག་ལ་ཞེན་པ་ལོག་པའི་ངེས་འབྱུང་གིས་རྒྱུད་བསྐུལ་ནས་ཟས་བསོད་སྙོམས་པ་དང༌། ཟས་སྟན་གཅིག་པ་དང༌། ཟས་ཕྱིས་མི་ལེན་པ་དང༌། ཆོས་གོས་གསུམ་པ་བ་དང༌། ཕྱིང་པ་བ་དང༌། ཕྱག་དར་ཁྲོད་པ་དང༌། དགོན་པ་བ་དང༌། ཤིང་དྲུང་པ་དང༌། བླ་གབ་མེད་པ་དང༌། དུར་ཁྲོད་པ་དང༌། ཙོག་བུ་པ་དང༌། གཞི་ཇི་བཞིན་པ་སྟེ་སྦྱངས་པའི་ཡོན་ཏན་བཅུ་གཉིས་དང་ལྡན་ཞིང་བདག་པས་གཞན་གཅེས་པའི་བྱང་ཆུབ་ཀྱི་སེམས་དང་སྲིད་གསུམ་རྨི་ལམ་ལྟ་བུར་གཟིགས་པའི་ལྟ་བའི་གདེང་ཐོབ་སྟེ། ཕྱི་མའི་སྐྱེ་བོ་རྣམས་ལ་སྣང་བར་བྱ་བའི་ཕྱིར་དབེན་པའི་རི་སུལ་དུ་སྒྲུབ་པ་ལ་རྩེ་གཅིག་ཏུ་གཞོལ་བ་ཞིག་ཡིན་ཞེས་བཀའ་གདམས་གླེགས་བམ་ལས་གསུངས་སོ། །དེས་ན་བྱང་ཆུབ་ལམ་གྱི་རིམ་པ་ལ་བློ་སྦྱོང་བར་འདོད་པ་རྣམས་ཀྱིས་སློབ་དཔོན་ཨེ་ལ་དྷ་རི་དང་དཔའ་བོ་རྡོ་རྗེ་གཉིས་ལ་གསོལ་བ་འདེབས་ཤིང༌། བདག་ཉིད་ཆེན་པོ་འདི་གཉིས་ཀྱི་རྣམ་ཐར་ལྟར་དབེན་པའི་གནས་སུ་ལམ་ཆ་ཚང་ལ་སྒྲུབ་པ་སྙིང་པོར་བྱའོ། ། |
