| དེ་ནས་རྒྱལ་བས་བསྔགས་པའི་དབེན་པའི་གནས་རྣམས་སུ་ལམ་གྱི་ལུས་ཡོངས་སུ་རྫོགས་པ་ལ་སྒྲུབ་པ་སྙིང་པོར་མཛད་ཅིང་གང་ལའང་ཆགས་པ་མེད་པར་དབེན་པ་ནས་དབེན་པར་རྒྱུ་ཞིང༌།དགེ་སྦྱོར་ཡར་ངོའི་ཟླ་བ་བཞིན་འཕེལ་བར་གྱུར་ཏོ།།དུས་རེ་ཤིག་གི་ཚེ།པཎ་ཆེན་ཆོས་ཀྱི་རྒྱལ་མཚན་གྱི་བཀའ་དྲིན་དྲན་ཏེ།རིགས་གསང་ཆེན་རྒྱལ་བ་རྡོ་རྗེ་འཆང༌ །རྗེ་སྐུ་བཞིའི་ངོ་བོ་བ་སོ་བ།།མཚན་ཡོངས་སུ་གྲགས་པའི་ཆོས་རྒྱལ་ཞབས།།ཕ་རྩེ་གཅིག་དྲན་པས་གསོལ་བ་འདེབས།།གནས་འཁོར་བའི་རྒྱ་མཚོ་གཏིང་ཟབ་ཅིང༌།།བློ་མ་རིག་འཁྱགས་པའི་སྦུབས་ཆུད་ན།།རྗེ་ཟབ་དོན་མཁྱེན་པའི་འོད་ཟེར་གྱིས།།ཉམས་བདེ་སྟོང་རྟོགས་པ་སྦར་དུ་གསོལ།།དུས་སྙིགས་མའི་སྐྱེ་འགྲོ་ཡོངས་ཀྱི་མགོན།།ལར་བསམས་ཀྱིན་རྗེ་བཙུན་སྤྲུལ་པའི་སྐུ། མི་ཁོ་བོའི་གཙུག་རྒྱན་ཆོས་ཀྱི་རྗེ།།ཡིད་གདུང་ཤུགས་དྲག་པོས་གསོལ་བ་འདེབས།།རང་གཅེས་པར་འཛིན་པའི་ཚ་གདུང་འདིས།།བྱམས་སྙིང་རྗེ་རྒྱས་པའི་ལོ་ཏོག་སྲེག།རྗེ་བྱང་ཆུབ་སེམས་ཀྱི་སྤྲིན་ཆེན་ལས།།གཞན་གཅེས་འཛིན་ཆར་རྒྱུན་ཕབ་ཏུ་གསོལ།།ཞེས་གསོལ་འདེབས་ཤུགས་དྲག་པོ་མཛད་ཅིང་ཉམས་ཀྱི་སྣང་བ་དང་བསྟུན་པའི་མགུར་མང་པོ་བཞེས་སོ།།དེ་ནས་པཎ་ཆེན་ཆོས་ཀྱི་རྒྱལ་མཚན་གྱི་བཀའ་བཞིན་དུ། གངས་དང༌།རི་སུལ་དང༌།ནགས་ཁྲོད་སོགས་སྐྱེ་བོས་དབེན་པའི་ས་ཕྱོགས་དུ་མར་རྒྱུ་ཞིང་ཉམས་རྟོགས་གོང་ནས་གོང་དུ་འཕེལ་བར་མཛད་ལ།ཁྱད་པར་སྔོན་བྱོན་དམ་པ་དུ་མས་གྲུབ་པ་བརྙེས་པའི་ས་དཔའ་བོ་མཁའ་འགྲོ་སྤྲིན་བཞིན་འདུ་བའི་གནས་ཆེན་པ་སྣམ་ཇོ་མོ་ལྷ་རིའི་གསང་ཆེན་གྲུབ་པའི་གནས་པདྨ་ཅན་དུ་བསྐྱེད་རིམ་མཐར་སོན་ནས་རྫོགས་རིམ་ལ་ཆིག་བསྒྲིལ་མཛད་པས་སེམས་དབེན་དཔེའི་འོད་གསལ་དང༌།མ་དག་པའི་སྒྱུ་ལུས་གྲུབ་བོ།།དེ་འདྲ་བའི་གནས་བྱིན་རླབས་ཅན་དེ་ནི་རྡོ་རྗེ་བཙུན་མོའི་བྷ་གའི་དབྱིབས་ཅན་དུ་ཡོད་པས་པདྨ་ཅན་ཞེས་མཚན་ཐོགས་ཤིང༌།དེའི་དྲང་ཐད་ཀྱི་ཤར་ཕྱོགས་ན་བཀྲ་ཤིས་རྫོང་དགའི་རྒྱབ་རིའི་རྩེ་མོ་ན་ལིང་གའི་དབྱིབས་ཅན་གྱི་རྡོ་ཆེན་པོ་ཞིག་ཡོད་པ་ཚེས་བཅོ་ལྔའི་ཟླ་བ་ཤར་བའི་ཚེ་རྡོ་དེའི་གྲིབ་མ་པདྨ་ཅན་དུ་བབས་པ་ན་ལིང་ག་ཆོས་འབྱུང་དུ་ཞུགས་པ་ཇི་ལྟ་བར་འབྱུང༌།དེའི་ཚེ་པདྨ་ཅན་གྱི་སྒྲུབ་ཆུའི་ཉེ་སྐོར་གྱི་ས་རྣམས་སྐད་ཅིག་དེ་ལ་སིནྡྷུ་རར་འགྱུར་བ་ཞིག་ཡོད་པས་ཡུལ་ཉེར་བཞི་དངོས་དང་མཚུངས་པ་ཞིག་ཡོད་ཅེས་གྲག་གོ།།གནས་བྱིན་རླབས་ཅན་དེར་རྫོགས་རིམ་དང་འབྲེལ་བའི་བླ་མ་ལྷའི་རྣལ་འབྱོར་སྒོམ་པར་མཛད་པས་ཆོས་ཀྱི་རྒྱལ་པོ་ཙོང་ཁ་པ་ཆེན་པོའི་ཞལ་གཟིགས།དེའི་ཚེ་རྗེ་རིན་པོ་ཆེས་དམ་པ་འདི་ལ་ཐུན་མོང་དང་ཐུན་མོང་མ་ཡིན་པའི་སྙན་རྒྱུད་ཀྱི་གདམས་ངག་ཡོངས་སུ་རྫོགས་པར་གནང༌།ལྷག་པར་རྗེ་རིན་པོ་ཆེ་ཕྱི་པཎྜི་ཏའི་ཆ་ལུགས་ནང་གི་ཕུང་ཁམས་སྐྱེ་མཆེད་རྣམས་འདུས་པའི་ལྷ་ཚོགས་སུ་གསལ་བ་ཐུགས་ཀར་རྒྱལ་བ་ཤཱཀྱ་ཐུབ་པ་དེའི་ཐུགས་ཀར་རྡོ་རྗེ་འཆང་བཞུགས་པའི་བླ་མའི་རྣལ་འབྱོར་ཐུན་མོང་མིན་པ་སེམས་དཔའ་སུམ་བརྩེགས་ཅན་འདི་གནང་ངོ༌།།ཚུལ་དེ་ནི་རྒྱལ་བ་དབེན་ས་པ་ཆེན་པོས་གྲུབ་ཆེན་ཆོས་རྡོ་རྗེ་ལ་རྒྱལ་བ་ཙོང་ཁ་པས་ཞལ་གཟིགས་ནས་སྙན་རྒྱུད་ཀྱི་མན་ངག་གནང་བའི་ཚུལ་ལས་བརྩམས་ཏེ་བསྟོད་པ་ལས།རྗེ་བཙུན་ཆེན་པོ་མ་ཏི་བྷ་དྲ་སོགས།། དངོས་སུ་ཞལ་གཟིགས་བྱིན་བརླབས་མཆོག་ཐོབ་པས།།ཟབ་རྒྱས་ཆོས་ཀྱི་དཔལ་ལ་དབང་འབྱོར་ནས།།གདམས་པའི་གཏེར་ཆེན་གྱུར་ལ་གསོལ་བ་འདེབས།།ཞེས་གསུངས་པ་ལྟར་རོ།།དེ་ནས་གྲུབ་ཆེན་ཆོས་རྡོ་རྗེས་པདྨ་ཅན་གྱི་གོང་ན་སྒྲུབ་ཕུག་ཅིག་ཡོད་པ་དེར་རྒྱལ་བ་ཙོང་ཁ་པས་གནང་བའི་བླ་མའི་རྣལ་འབྱོར་ཐུན་མོང་མིན་པ་འདི་རྩེ་གཅིག་ཏུ་སྒོམ་པར་མཛད་པ་ན།འཕགས་པ་ཐུགས་རྗེ་ཆེན་པོའི་ཞལ་མངོན་སུམ་དུ་གཟིགས།དེས་རྐྱེན་བྱས་ཏེ་ཕྱོགས་བཅུའི་རྒྱལ་བ་སྲས་བཅས་མ་ལུས་པའི་ཞལ་མངོན་སུམ་དུ་གཟིགས་པར་གྱུར་ཏོ།།ཚུལ་དེ་ནི་རྒྱལ་བ་དབེན་ས་པ་ཆེན་པོས་གྲུབ་ཆེན་ཆོས་རྡོ་རྗེ་ལ་འཕགས་མཆོག་ཕྱག་ན་པདྨོས་བྱིན་གྱིས་བརླབས་པའི་མཐུས་ཕྱོགས་བཅུའི་རྒྱལ་བ་སྲས་བཅས་ཐམས་ཅད་མངོན་སུམ་དུ་གཟིགས་པའི་ཚུལ་ལས་བརྩམས་ཏེ་བསྟོད་པ་ལས།ཕྱག་ན་པདྨོས་དངོས་སུ་བྱིན་བརླབས་པས།།མ་ལུས་རྒྱལ་བའི་འཁོར་ལོ་གསལ་བར་གཟིགས།།དངོས་གྲུབ་རྒྱ་མཚོའི་དཔལ་ལ་དབང་འབྱོར་པས།།དོན་གཉིས་ལྷུན་གྲུབ་ཁྱོད་ལ་གསོལ་བ་འདེབས།།ཞེས་གསུངས་པ་ལྟར་རོ།།དེ་ནས་སླར་ཡང་སྒྲུབ་གནས་དེར་ཟབ་ལམ་རིམ་གཉིས་སྤྱི་དང་ཁྱད་པར་རྫོགས་རིམ་ཟབ་མོའི་རྣལ་འབྱོར་རྩེ་གཅིག་ཏུ་སྒོམ་པར་མཛད་པས་ཟུང་འཇུག་འགྲུབ་པའི་མཚན་མ་ཐོབ་པ་ན་ཤིན་ཏུ་སྤྲོས་མེད་ཀྱི་སྤྱོད་པ་ལ་བརྟེན་ནས་འོད་གསལ་རྩེ་གཅིག་ཏུ་སྒོམ་པར་མཛད་པས་དོན་དམ་པའི་འོད་གསལ་མངོན་དུ་བྱས་པ་ལས་ཟུང་འཇུག་རྡོ་རྗེ་འཆང་གི་གོ་འཕང་བརྙེས་ཏེ་ནམ་མཁའ་ཇི་སྲིད་གནས་ཀྱི་བར་དུ་ཟུང་འཇུག་གི་སྐུ་ལས་གཡོ་བ་མེད་པར་སེམས་ཅན་རང་རང་གི་སྐལ་བ་དང་འཚམ་པར་སྤྲུལ་པ་བསྟན་ཏེ་ཆོས་སྟོན་པ་སོགས་འགྲོ་བའི་དོན་ལ་གཡེལ་བ་མེད་པར་བཞུགས་སོ།།དེ་འདྲ་བའི་སྒྲུབ་གནས་དེ་ལ་ཟུང་འཇུག་ཕུག་ཅེས་གྲགས་སོ། །ཚུལ་དེ་ནི་རྒྱལ་བ་དབེན་ས་པ་ཆེན་པོས་གྲུབ་ཆེན་ཆོས་རྡོ་རྗེ་ལ་ཟུང་འཇུག་བརྙེས་པའི་ཚུལ་ལས་བརྩམས་ཏེ་བསྟོད་པ་ལས།དེ་ནས་མཁས་དང་གྲུབ་པ་མང་བསྟེན་ཅིང༌།།པདྨ་ཅན་སོགས་གྲུབ་པའི་གནས་རྣམས་སུ།།ཆོས་ཀུན་སྙིང་པོ་རྩེ་གཅིག་ཉམས་བཞེས་པས།།གྲུབ་པ་མཆོག་བརྙེས་ཁྱོད་ལ་གསོལ་བ་འདེབས།།ཞེས་དང༌།།བརྒྱ་ཕྲག་ལས་ལྷག་ལོར་ནི་བསྟན་པ་བསྐྱངས།།འཆི་མེད་དཔའ་བོ་མཁའ་འགྲོའི་གཙོར་བཞུགས་ནས།།ནམ་མཁའ་ཇི་སྲིད་སྐལ་ལྡན་འགྲོ་བ་འདྲེན།། 3/4 མདུན་ངོས། 上一页 1 2 3 4 下一页 尾页 |
