སྟབས་ཀ་ནམ་མཁའ་རིན་ཆེན་ཀྱིས་སློབ་དཔོན་བྱང་ཆུབ་བཟང་པོ་ལ་བཀའ་གདམས་བསྟན་པའི་སྙིང་པོ་སྙིང་གི་ཐིག་ལེའི་གདམས་པ་གནང་དགོས་པར་ཞུས་པ་ན་འདི་ལ་མཆོད་རྫས་ཅུང་ཟད་ཅིག་དགོས་གསུངས། དེ་འཚོལ་བར་ཞུས་ནས་ཡོ་བྱད་རྣམས་བཙལ་ཏེ་མཆོད་རྫས་རྣམས་ཚང་བར་བཙལ་གྲུབ་པ་ན་ཞག་བཅུ་དྲུག་གི་རིང་ཐིག་ལེ་བཅུ་དྲུག་གི་དབང་མཛད། དེ་ནས་དབེན་པའི་གནས་དུ་མར་ཕེབས་ནས་གདམས་ངག་རྣམས་ཡོངས་སུ་རྫོགས་པར་གནང་སྟེ།   ལོ་ཉི་ཤུ་རྩ་བཞིའི་རིང་འབྲལ་མེད་དུ་བསྟེན་ནས་བཀའ་གདམས་ཀྱི་གདམས་ངག་ཡོངས་སུ་རྫོགས་པར་གསན་གསུང་ངོ༌། །འདི་ཡན་ཆད་ནི་ཆིག་རྒྱུད་ཁོ་ན་ཡིན་པ་ལ་སློབ་དཔོན་བྱང་ཆུབ་བཟང་པོས་སྟབས་ཀ་བ་ནམ་མཁའ་རིན་ཆེན་ལ་ད་ཕྱིན་ཆད་མན་ངག་ཅུང་ཟད་ཡངས་སུ་ཐོངས་ཞེས་བཀའ་གནང༌།   དེ་ནས་སློབ་དཔོན་ནམ་མཁའ་རིན་ཆེན་གྱིས་བྱང་ཆུབ་སེམས་དཔའི་ནོར་བུའི་ཕྲེང་བ་རྒྱ་ཆེར་སྤེལ་ཞིང༌། བཀའ་གདམས་གླེགས་བམ་ཡང་དོན་གཉེར་ཅན་མང་པོ་ལ་བཤད། སྙིང་གི་ཐིག་ལེའི་གདམས་པ་ནི་འབྲོམ་ཀུ་མ་ར་མ་ཏི་ལ་གནང་སྟེ། མཆོད་པའི་ཡོ་བྱད་རྣམས་ཚོགས་པར་བྱས་ཏེ་ཐིག་ལེ་བཅུ་དྲུག་གི་དབང་ཞག་བཅུ་གཉིས་ལ་རྫོགས་པ་ཞིག་མཛད།   གླེགས་བམ་ཡང་ཡོངས་སུ་རྫོགས་པར་བསྟན་ཏེ་ཐུགས་ལ་གཟུང་དུ་བཅུག   འབྲོམ་ཀུ་མ་ར་མ་ཏིས་ཀྱང་བཀའ་གདམས་གླེགས་བམ་ཡོངས་སུ་རྫོགས་པ་ཚིག་གཅིག་ཀྱང་མ་ལུས་པར་ཐུགས་ལ་བཟུང་ནས་རྒྱུན་དུ་ཞལ་ཏོན་མཛད། བཀའ་གདམས་སྤྲུལ་བའི་གླེགས་བམ་ཆེན་མོ་ནི་སློབ་དཔོན་ནམ་མཁའ་རིན་ཆེན་གྱིས་སྟབས་ཀའི་མཆོད་རྟེན་གྱི་ནང་དུ་བཞུགས་སུ་གསོལ་ཞེས་འབྱུང་ངོ༌།   །དེ་ནས་འབྲོམ་ཀུ་མ་ར་མ་ཏིས་སྣར་ཐང་དུ་ཕེབས་ནས་བཀའ་གདམས་གླེགས་བམ་རྒྱ་ཆེར་སྤེལ་ཞིང༌། སྣར་ཐང་མཁན་ཆེན་ཉི་མ་རྒྱལ་མཚན་གྱིས་འབྲོམ་ཀུ་མ་ར་མ་ཏིའི་ཞལ་ནས་ཇི་ལྟར་གསུངས་པ་ལྟར་བཀའ་གདམས་གླེགས་བམ་ཡི་གེར་བཀོད།   དེ་ལ་མ་ཕྱི་བྱས་ནས་ཕྱོགས་ཕྱོགས་སུ་འཕེལ་བ་ཡིན་པས་དེང་སང་བཀའ་གདམས་གླེགས་བམ་ཡི་གེར་འཁོད་པ་ལ་བལྟར་ཡོད་པ་ནི་འབྲོམ་ཀུ་མ་ར་མ་ཏིས་བཀའ་གདམས་གླེགས་བམ་ཐུགས་ལ་བཟུང་བ་དེའི་བཀའ་དྲིན་ལས་བྱུང་བ་ཡིན་ནོ། །དེ་ནས་རིམ་གྱིས་ཐམས་ཅད་མཁྱེན་པ་དགེ་འདུན་གྲུབ་དང༌།རྒྱལ་བ་དགེ་འདུན་རྒྱ་མཚོ་གཉིས་ཀྱིས་རྒྱ་ཆེར་སྤེལ་བར་མཛད།   དེ་ནས་རིམ་གྱིས་བརྒྱུད་དེ་པཎ་ཆེན་ཐམས་ཅད་མཁྱེན་པ་བློ་བཟང་ཆོས་ཀྱི་རྒྱལ་མཚན་དང༌། རྒྱལ་དབང་ཐམས་ཅད་མཁྱེན་པ་ངག་དབང་བློ་བཟང་རྒྱ་མཚོ་གཉིས་ཀྱིས་སྤེལ་བར་མཛད། རྒྱལ་དབང་ཐམས་ཅད་མཁྱེན་པ་ངག་དབང་བློ་བཟང་རྒྱ་མཚོ་ལ་ནི་འབྲོན་རིན་པོ་ཆེས་དངོས་སུ་ཞལ་གཟིགས་ནས་སྙིང་གི་ཐིག་ལེའི་དབང་དང་གདམས་ངག་གནང་བ་ཡིན་ཞེས་བདག་གི་བླ་མ་དམ་པ་གསུང་ངོ༌། །དུས་ཕྱིས་ནི་བདག་གི་དྲིན་ཅན་རྩ་བའི་བླ་མ་རྗེ་བཙུན་ངག་དབང་བྱམས་པས་སྙིང་གི་ཐིག་ལེའི་དབང་དང་གདམས་ངག་མི་ནུབ་པར་བཟུང་ནས་དོན་གཉེར་ཅན་ཁ་ཤས་ལ་གནང་བ་ལས་ཧ་ཅང་དར་ཆ་ཆེ་པ་མི་སྣང་ལ།   བླ་མ་རིན་པོ་ཆེ་དེ་ཉིད་ཀྱི་ཞབས་དྲུང་དུ་བདག་གིས་ཐིག་ལེ་བཅུ་དྲུག་གི་དབང་དང་བཀའ་གདམས་སྙིང་གི་ཐིག་ལེའི་གདམས་ངག་འདིའི་བཀའ་དྲིན་ལེགས་པར་ཐོབ་ལ་ཇོ་བོ་ཡབ་སྲས་ཀྱི་གསང་ཆོས་བཀའ་གདམས་ལྷ་ཆོས་བདུན་ལྡན་གྱི་སྙིང་པོའི་ཡང་སྙིང་པོ་ཐིག་ལེ་བཅུ་དྲུག་གི་གདམས་ངག་འདི་མ་ནུབ་པར་ཡུན་རིང་དུ་གནས་ན་ཅི་མ་རུང་སྙམ་དུ་སྨོན་པས་ཐིག་ལེ་བཅུ་དྲུག་གི་གདམས་ངག་འདིའི་བླ་མ་གོང་མའི་བརྒྱུད་རིམ་རྣམ་ཐར་དང༌། འདིའི་དཀྱིལ་ཆོག་སློབ་མ་རྗེས་སུ་འཛིན་ཚུལ་དང་བཅས་པ་ཆེས་ཞིབ་པར་བཀོད་པ་བཀའ་གདམས་གསལ་བྱེད་ཅེས་བྱ་བ་དང༌། བློ་དམན་རྣམས་ཀྱིས་འདིའི་ཆོ་ག་རྣམས་ངག་འདོན་དུ་བྱ་ཚུལ་དང༌། འདིའི་མན་ངག་ཇི་ལྟར་ཉམས་སུ་ལེན་ཚུལ་གྱི་ཁྲིད་ཡིག་དང༌། བཀའ་གདམས་ལྷ་ཆོས་བདུན་ལྡན་གྱི་རྣམ་ཐར་ལ་སྨོན་ལམ་དུ་བྱ་ཚུལ་ཚིགས་བཅད་དུ་བསྡེབས་པ་བཅས་གདམས་ངག་འདི་ཆ་ལག་དང་བཅས་པའི་ཡི་གེ་བདག་གིས་ལོགས་སུ་བྲིས་ནས་ཡོད་དོ།   །དེས་ན་བྱང་ཆུབ་ལམ་གྱི་རིམ་པ་ལ་བློ་སྦྱོང་བར་འདོད་པ་རྣམས་ཀྱིས་རྒྱ་ཆེན་སྤྱོད་པའི་རྒྱུད་ཀྱི་བླ་མ་རྣམས་དང༌། ཟབ་མོ་ལྟ་བའི་རྒྱུད་ཀྱི་བླ་མ་རྣམས་དང༌།   ཉམས་ལེན་བྱིན་རླབས་རྒྱུད་ཀྱི་བླ་མ་རྣམས་ལ་གསོལ་བ་འདེབས་ཤིང་ལམ་ཕྱོགས་རེར་མ་སོང་བར་མདོ་སྔགས་གཉིས་ཀའི་ལམ་གྱི་ལུས་ཡོངས་སུ་རྫོགས་པ་ལ་སྒྲུབ་པ་སྙིང་པོར་བྱ་ཞིང་ཐ་ན་སྨོན་ལམ་གྱི་ཡུལ་ཚུན་ཆད་དུ་བྱས་ཏེ་བག་ཆགས་ཅི་ཐེབས་བྱའོ། ། ། །

 3/3    མདུན་ངོས། 上一页 1 2 3