| གཞན་དག་ངན་སེམས་གཡོ་སྒྱུའི་དུག་གི་ཆུས། །ཡིད་རབ་མྱོས་ཀྱང་བསྟན་འཛིན་གཟུགས་སུ་རློམ། །ཀྱི་ཧུད་གངས་ཅན་ཁྲོད་འདིར་སེང་ཆེན་ལས། །ཤྭ་ནའི་བུ་ཉིད་སྐད་གསང་མངོན་བར་མཐོ། །འདོད་དགུའི་འབྱུང་གནས་ཡིད་བཞིན་རིན་ཆེན་ལས། །མཆིང་བུའི་རྡོ་བ་ལྷག་པར་གཙིས་སུ་བྱེད། །གཙོང་རོང་ནགས་ཀྱི་ཁྲོད་ན་ཉི་མ་བས། །མེ་ཁྱེར་མཆོག་ཏུ་རློམ་པ་མཐོང་བས་སྐྱོ། །དེ་ལྟར་མི་བཟད་སྙིགས་མའི་དུས་ཀྱི་མཐའ། །དམུ་རྒོད་སྐྱེ་བོ་བྱུང་རྒྱལ་སྤྱོད་པའི་དུས། །རྒྱལ་དང་རྒྱལ་སྲས་མཁས་པའི་ཚོགས་རྣམས་ཀྱང༌། །ཞི་བའི་དབྱིངས་སུ་གཟིམ་ནས་བཏང་སྙོམས་མཛད། །འཐོར་རླུང་དྲག་པོའི་མདུན་སར་མར་མེ་ཡིས། །མུན་པའི་སྨག་རུམ་སེལ་བར་བྱེད་དམ་ཅི། །དེ་ཕྱིར་ཉམ་ཆུང་སྐྱེ་བོས་ཐུབ་བསྟན་གྱི། །ཁུར་ཆེན་མི་བཟད་འཁྱེར་བ་ངལ་བའི་གནས། །རྩོད་པའི་དུས་འདིར་ཐམས་ཅད་མཁྱེན་པ་ལྟར། །མ་ལུས་འགྲོ་བའི་མིག་གཅིག་ཙོང་ཁ་པ། །དེ་ཡི་ལེགས་བཤད་བདུད་རྩི་མྱང་བའི་ཕྱིར། །གཅིག་པུར་དབེན་པ་བསྟེན་པ་མི་ལེགས་སམ། །རྣམ་དཀར་བསོད་ནམས་སྟོང་གིས་ལེགས་བསྐྲུན་པའི། །ཤིན་ཏུ་རྙེད་པར་དཀའ་བའི་དལ་འབྱོར་འདི། །དོན་མེད་འཇིག་རྟེན་བྱ་བས་ཆུད་གཟོན་པ། །བདག་ལ་སྙིང་མེད་གྱུར་པར་གདོན་མི་ཟ། །རིན་ཆེན་བདུན་ལྡན་གླིང་བཞིར་དབང་སྒྱུར་བའི། །འཁོར་ལོས་སྒྱུར་བའི་དཔལ་ཡང་ཆུ་ཤིང་འདྲ། །སྐབས་གསུམ་བདག་པོའང་རང་གི་ཕུན་ཚོགས་ཀུན། །མི་བཟད་ལས་ཀྱི་དབང་གིས་འདིར་དགོས་ཀྱང༌། །ཅུང་ཟད་བདེ་བའི་དབང་གིས་སྲེད་པ་འཕེལ། །ཕལ་ཆེར་མི་བཟད་ཟུག་རྔུ་སྐྱེ་བའི་རྒྱུ། །ཉེས་བརྒྱའི་འབྱུང་གནས་འཁོར་བའི་ཕུན་ཚོགས་ལ། །མཁས་པ་སུ་ཞིག་ལྷག་པར་ཆགས་པར་བྱེད། །དེ་ཕྱིར་ཀུན་དགའ་རྒྱས་པའི་ནགས་ཀྱི་ལྗོངས། །མེ་ཏོག་མངོན་པར་རྒྱས་པའི་འཇོ་སྒེག་ཅན། །བུང་བའི་ན་ཆུང་མགྲིན་པའི་གླུ་ལེན་ཅིང༌། །རྨ་བྱ་གཞོན་ནུ་དགའ་བའི་ཟླས་གར་སྒྱུར། །ཁུ་བྱུག་མགྲིན་པའི་ལམ་ནས་དྲིལ་ཆེན་འཁྲོལ། །ཀ་ལ་པིང་ཀ་གྱུར་གྱུར་གླུ་དབྱངས་སྒྲོག །དབུ་བའི་ཕྲེང་མཛེས་འབབ་ཆུའི་ན་ཆུང་མ། །ལྷུང་ལྷུང་སྒྲ་སྙན་སྒྲོག་ཅིང་ཕྱོགས་སུ་འབབ། རབ་སྨིན་འབྲས་བུའི་ཁུར་འཆང་ལྗོན་པའི་ཤིང༌། །ལོ་མ་མེ་ཏོག་རྒྱས་པས་ཕྱོགས་ཀུན་གང༌། སྟེང་ནས་སྟོད་གཡོགས་ཆུ་འཛིན་དཀར་པོ་གཡོ། །ངོས་ནས་མུ་ཏིག་ཆུ་བོའི་དོ་ཤལ་འབབ། །སྐེད་སྐབས་ནགས་ཚལ་སྔོན་པོའི་ཤམ་ཐབས་ཅན། །ས་འཛིན་བུ་མོས་ཕྱོགས་ཀུན་མཛེས་པར་བསྐོར། །འོག་གཞི་བཻཌྰུརྱ་ཡི་ནེ་འུ་གསིང༌། །ནེ་ཙོའི་གཤོག་པ་ལྟ་བུར་མཆོག་ཏུ་མཛེས། །སྣ་ཚོགས་མེ་ཏོག་དྲ་བས་ཁེབས་པ་ལ། །རི་དྭགས་སྣ་ཚོགས་བག་ཕེབས་རྣམ་པར་རྒྱུ། །འདུ་འཛིའི་ཆོམ་རྐུན་སྒྲིབ་ལ་འོངས་པ་བཞིན། །འཁྲི་ཤིང་ཕྲེང་བས་བར་མཚམས་མེད་པར་དཀྲིགས། །དེ་ལྟར་ཕུན་ཚོགས་ནགས་ཚལ་དབེན་པའི་གནས། །ལྷ་ཡི་སྐྱེད་ཚལ་ལྟ་བུར་ཉམས་དགའ་བར། །ཚེ་འདིའི་ཆོས་བརྒྱད་སྣང་བ་ཀུན་དོར་ནས། །འཁྲུལ་མེད་ཏིང་འཛིན་རོ་ལ་རྩེ་གཅིག་ཏུ། །རོལ་པའི་སྤྱོད་ཚུལ་འདི་ལ་སྙིང་ནས་སྤྲོ། །མང་དུ་ཐོས་པའི་བཟླས་བརྗོད་ལྷུར་ལེན་ཅིང༌། །བདེ་སྟོང་ལྷན་ཅིག་སྐྱེས་པའི་ཡེ་ཤེས་མེས། །གཉིས་སྣང་འཁྲུལ་པའི་བག་ཆགས་ཀུན་བསྲེགས་ནས། །རྣམ་ཀུན་མཆོག་ལྡན་ཟུང་འཇུག་སྒྱུ་མའི་སྐུར། །ལངས་ནས་སྣ་ཚོགས་སྤྲུལ་པའི་ཐབས་མཁས་ཀྱི། །ལྕགས་ཀྱུས་མ་དག་སྲིད་པའི་འཁོར་ལོ་འདི། །མཆོག་ཏུ་མི་འགྱུར་བདེ་བའི་དབྱིངས་ཆེན་པོར། །གང་དྲངས་རྣལ་འབྱོར་མཆོག་དེ་སྐལ་བ་བཟང༌། །དེ་སྐད་སྨྲ་དེ་བཞད་པའི་རྡོ་རྗེ་ཉིད། །སྔོན་བྱོན་དམ་པའི་རྣམ་ཐར་སྙིང་ལ་འགྲོགས། །སྙིགས་དུས་སྐྱེ་བོའི་སྤྱོད་པས་གཏིང་ནས་སུན། །བློ་གྲོས་ལུས་སྟོབས་རྒྱས་པས་ཅུང་ཟད་དྲེགས། །ཆུ་ཡི་ལྕིད་ཀྱིས་ལྷག་པར་ནོན་པའི་སྤྲིན། །འབྲུག་སྒྲ་བསྒྲགས་པ་མེད་པར་ལྡོག་མ་ཡིན། །དེ་ཕྱིར་སྙན་ངག་མགྲིན་པའི་གླུ་དབྱངས་མཆོག །མ་སྨྲས་པར་ཡང་བདག་བློ་ཅི་ཞིག་ཚིམ། །ཚུལ་འདི་སྐྱེ་བས་ཐོབ་པའི་བློ་གྲོས་ཀྱིས། །སྙན་ངག་དྲིལ་ཆེན་སྒྲོག་ལ་ཐོགས་མེད་པ། །ལྷག་བསམ་ཁོ་ན་སྙིང་ལ་རབ་འགྲོགས་པ།། དབྱངས་ཅན་བཞད་པའི་རྡོ་རྗེས་གཏམ་དུ་བྱས། །ཞེས་སོ། དེ་ནས་ཡོས་ལོ་ཟླ་བ་དགུ་པའི་དུས་ཆེན་ལ་ཐུགས་དམིགས་གཏད་དེ་ཕུ་ཆུང་གི་གནས་མཇལ། དེའི་ལ་ལ་བརྒྱུད་དེ་ཕེབས་པ་ན་དེ་དུས་འཕགས་པའི་གྲུབ་ཐོབ་ཀུན་དགའ་རྒྱལ་མཚན་པ་ཞེས་པ་ཅིག་བྱང་ར་སྒྲེང་ན་བཞུགས་པའི་མནལ་ལམ་དུ། སང་འབྲོམ་སྟོན་པ་ཕེབས་པ་ཡོད་ཟེར་བ་ཅིག་བྱུང་འདུག་པས། ཁོང་གིས་ཀྱང་རྒྱང་རིང་པོ་ནས་བསུས་ནས་གུས་མཆོད་ཆེན་པོ་མཛད། གཞན་ཡང་ཐུགས་དམ་པ་སོ་སོའི་མནལ་ལམ་དུ་འབྲོམ་སྟོན་པ་དང་མཇལ་བ་དང་ཉི་ཟླ་ཤར་བ་སོགས་བྱུང་འདུག་པས་གནས་དེར་ཕེབས་འཕྲལ་ཉིད་ནས་ར་སྒྲེང་པ་ཀུན་གྱིས། ཕ་སྟོན་པ་རིན་པོ་ཆེ་ཞེས་ཞབས་ལ་འདུད། ལྷག་པར་དྲུང་བྱང་སེམས་པ་ཞེས་སྐུ་སྐྱེ་བ་ཉི་ཤུ༌ཙམ་དྲན་པ་ཞིག་ཡོད་པ་དེས་ཁོང་རང་གི་སྤྱིལ་བུར་སྤྱན་དྲངས། ལྡུམ་ར་ན་མེ་ཏོག་རྩ་བ་སུམ་ཅུ་ཙམ་ཡོད་པའི་མེ་ཏོག་ཐམས་ཅད་བཏུས་ནས་དེ་རྗེས་ཁོང་གིས་བདེན་ཚིག་བརྗོད་པ་ནི། སྐུ་སྐྱེ་རིན་པོ་ཆེ་འདི་འབྲོམ་གྱི་སྤྲུལ་པ་ཡིན་ངེས་ན་བདེན་པ་དེས་ད་ནང་ཚ་བཞེས་ཀྱི་རིང་ལ་འདིར་མེ་ཏོག་བརྒྱ་རྩ་གཅིག་འཆར་བར་ཤོག་ཅིག མིན་ན་གཅིག་ཀྱང་མི་འབྱུང་བར་ཤོག་ཅིག དེའི་དཔང་པོ་དཀོན་མཆོག་གསུམ་དང་། །ཇོ་བོ་ཡབ་སྲས་དང༌། ཁྱད་པར་ཆོས་སྐྱོང་ཞལ་དམར་བས་མཛོད་ཅིག་བྱས་ནང་དུ་བྱོན། དཔོན་སློབ་རྣམས་ཀྱིས་གསོལ་ཇ་འདེབས་གཅིག་གི་རིང་ལ་མེ་ཏོག་ཕྱེད་དང་ཉིས་བརྒྱ་དུས་གཅིག་ཏུ་ཤར་འདུག་པས་ཁོང་དད་པ་ཤུགས་དྲག་ཏུ་འབར་རོ། །དེ་ནས་རྗེ་དགེ་འདུན་གྲུབ་ཀྱི་ཐུགས་སྲས་པཎ་ཆེན་ཕྱོགས་ལྷ་འོད་ཟེར་འཕྱོང་རྒྱས་རི་བོ་བདེ་ཆེན་ན་བཞུགས་པ་དེས་རྗེ་འདིའི་སྙན་པ་གསན་ནས་རྗེ་དགེ་འདུན་གྲུབ་ཀྱི་བཀའ་དྲིན་བསབ་པའི་ཕྱིར་སྤྲུལ་པའི་སྐུ་འདིའི་འཕྲིན་ལས་རྒྱ་ཆེར་སྤེལ་བར་བྱའོ་སྙམ་དུ་དགོངས་ནས་རྗེ་འདི་ལྷོ་ཁ་ཕྱོགས་སུ་སྤྱན་དྲངས། ལྷོ་ཁ་ཕྱོགས་ཀྱི་ཆོས་སྡེ་མཐའ་དག་དང༌། རྗེ་དགེ་འདུན་གྲུབ་ཀྱི་སྦྱིན་བདག་འབྱོར་པ་ཅན་མཐའ་དག་བསྐུལ་ཏེ་རྗེ་འདིའི་ཞལ་བལྟ་བ་དང་གསུང་གི་བདུད་རྩི་མྱངས་སུ་གཞུག་ཕྱིར་པཎ་ཆེན་རང་གིས་གཙོ་མཛད་དེ་དགེ་འདུན་རྣམས་ཀྱིས་རྒྱང་རིང་པོ་ནས་བསུ་བ་མཛད།མཇལ་མ་ཐག་ཏུ་པཎ་ཆེན་རིན་པོ་ཆེ་ལ་ས་དང་པོ་ཐོབ་པ་ལྟ་བུའི་དགྱེས་པ་ཆེན་པོ་བྱུང་བ་ཡིན་པ་འདུགདེ་ནས་རི་བོ་བདེ་ཆེན་གྱི་གཞལ་ཡས་ཁང་གི་སྟེང་དུ་སྤྱན་དྲངས་བཀུར་སྟི་ཕུལ་དུ་བྱུང་བ་མཛད།ཐོག་མར་དཔལ་ལྡན་ལྷ་མོའི་བཀའ་ཞིག་གནང་དགོས་ཞུས་པས། དང་པོ་བོ་དོང་དུ་བྱས་ཟིན་པས་ད་བསྐྱར་ལྡབ་མི་དགོས་བྱ་བ་དང༌། གཞན་ཡང་སྔོན་རྗེ་ཉིད་བལ་པོར་པཎྜི་ཏ་ཅིག་ཏུ་འཁྲུངས་དུས་ཁྱེད་དེ་དུས་འཁོར་འདི་ལྟ་བུ་ཞིག་ཡིན་གསུངས་པས་པཎ་ཆེན་ཉིད་ཀྱང་ཐུགས་ཚིམ་ཞིང་མོས་གུས་ཕུལ་དུ་ཕྱིན་པ་འཁྲུངས། 3/6 མདུན་ངོས། 上一页 1 2 3 4 5 6 下一页 尾页 |
