| དེ་ནས་རྗེ་བཙུན་འཇམ་པའི་དབྱངས་ཉིད་ཀྱིས་དངོས་སུ་ཞལ་བསྟན་ནས་མདོ་སྔགས་ཀྱི་ཆོས་མཐའ་ཡས་པ་གསུངས་ཤིང༌། ལྷག་པར་དཔལ་རྡོ་རྗེ་འཇིགས་བྱེད་ཆེན་པོའི་དབང་གནང་བའི་ཚེ་རྗེ་བཙུན་འཇམ་པའི་དབྱངས་སྐད་ཅིག་གིས་རྡོ་རྗེ་འཇིགས་བྱེད་ཀྱི་སྐུར་བཞེངས་ནས་དབང་བཞི་ཡོངས་སུ་རྫོགས་པ་བསྐུར་བ་དང༌། གཤིན་རྗེ་ཆོས་ཀྱི་རྒྱལ་པོ་སྲུང་མར་བཀའ་བསྒོ་བ་སོགས་མཛད་པའི་རྣམ་འཕྲུལ་བསམ་གྱིས་མི་ཁྱབ་པ་དེ་འདྲ་ཡོད་པར་གསུངས། དེས་ ན་ཐུན་མོང་མིན་པའི་དབང་དུ་བྱས་ན་རྗེ་རིན་པོ་ཆེ་རང་ཉིད་རྗེ་བཙུན་འཇམ་དབྱངས་དངོས་ཡིན་པར་མ་ཟད་ཡི་དམ་ཞི་ཁྲོ་གཉིས་ཀས་རྗེ་རིན་པོ་ཆེ་ལ་དངོས་སུ་ཞལ་བསྟན་ནས་ཡི་དམ་འདིའི་དབང་དང་གདམས་ངག་རྣམས་རྫོགས་པར་གནང་བ་ཡིན་པས་ཉེ་རྒྱུད་ཐུན་མོང་མིན་པའི་རྒྱུད་རིམ་གསོལ་འདེབས་སུ་བྱས་ན་འདི་ལྟར། འཇམ་དཔལ་རྡོ་རྗེ་རྒྱལ་བ་ཙོང་ཁ་པ། །མཁས་གྲུབ་སྐུ་མཆེད་ངྷརྨ་བཛྲ་ཞབས། །དབེན་ས་ཡབ་སྲས་བློ་བཟང་ཆོས་ཀྱི་རྒྱལ། །གསོལ་བ་འདེབས་སོ་དངོས་གྲུབ་རྣམ་གཉིས་སྩོལ། །གྲུབ་པ་མཆོག་བརྙེས་དཀོན་མཆོག་རྒྱལ་མཚན་དང༌། །དཀྱིལ་འཁོར་མངའ་བདག་བློ་བཟང་ཡེ་ཤེས་ཞབས། །རྗེ་བཙུན་བློ་བཟང་བསྐལ་བཟང་རྒྱ་མཚོ་ལ། །གསོལ་བ་འདེབས་སོ་དངོས་གྲུབ་རྣམ་གཉིས་སྩོལ། །རྒྱལ་ཀུན་ཐུགས་རྗེའི་ངོ་བོ་བྱམས་པའི་མཚན། །རྗེ་བཙུན་བློ་བཟང་དཔལ་ལྡན་ཡེ་ཤེས་ཞབས། །བཀའ་དྲིན་མཉམ་མེད་རྩ་བའི་བླ་མ་ལ། །གསོལ་བ་འདེབས་སོ་དངོས་གྲུབ་རྣམ་གཉིས་སྩོལ། །རྒྱལ་བ་ཀུན་གྱི་ཡབ་གཅིག་འཇམ་པའི་དབྱངས། །མ་རུངས་གདུལ་དཀའ་མཐའ་དག་འདུལ་བའི་ཕྱིར། །འཇིགས་བྱེད་ཁྲོ་བོ་ཆེན་པོའི་སྐུར་བསྟན་པ། །གསོལ་བ་འདེབས་སོ་དངོས་གྲུབ་རྣམ་གཉིས་སྩོལ། དེ་ལྟར་བསྟོད་པས་བྱང་ཆུབ་སྙིང་པོའི་བར། །འགལ་རྐྱེན་བདུད་བཞིའི་གཡུལ་ལས་རྣམ་རྒྱལ་ཏེ། །ཞི་རྒྱས་དབང་དྲག་གྲུབ་ཆེན་བརྒྱད་ལ་སོགས། །དངོས་གྲུབ་ཀུན་གྱིས་རྟག་ཏུ་འབྱོར་གྱུར་ཅིག །མདོར་ན་དེང་ནས་ཚེ་རབས་ཐམས་ཅད་དུ། །འཇམ་དཔལ་དཔའ་བོས་དགྱེས་བཞིན་རྗེས་བཟུང་སྟེ། །རིམ་གཉིས་ལམ་གྱི་རྟོགས་པ་མཐར་ཕྱིན་ནས། །སྐུ་གསུམ་གོ་འཕང་བདེ་བླག་ཐོབ་གྱུར་ཅིག །ཅེས་པའོ། །རྗེ་བཙུན་ཐམས་ཅད་མཁྱེན་པ་བློ་བཟང་ཡེ་ཤེས་ཀྱིས་རྗེ་བཙུན་བློ་བཟང་བསྐལ་བཟང་རྒྱ་མཚོ་ལ་གནང༌། དེས་རྗེ་བཙུན་བློ་བཟང་དཔལ་ལྡན་ཡེ་ཤེས་ལ་གནང༌། རྗེ་དེ་ཉིད་ཀྱི་ཞབས་དྲུང་དུ་བདག་གིས་རྡོ་རྗེ་འཇིགས་བྱེད་ཀྱི་དབང་ལེགས་པར་ཐོབ་ཅིང༌། ཡང་རྗེ་བློ་བཟང་ཡེ་ཤེས་ཀྱིས་རྡོ་རྗེ་འཛིན་པ་བློ་བཟང་རིག་གྲོལ་ལ་གནང༌། དེས་རྡོ་རྗེ་འཛིན་པ་ཡེ་ཤེས་དཔལ་འབྱོར་ལ་གནང༌། རྡོ་རྗེ་འཛིན་པ་དེའི་ཞབས་དྲུང་དུ་བདག་གིས་ཡི་དམ་འདིའི་དབང་ཐོབ། ཡང་རྗེ་བློ་བཟང་ཡེ་ཤེས་ཀྱིས་མཁན་ཆེན་ངག་དབང་བློ་བཟང་ལ་གནང༌། དེས་ཁྲི་ཆེན་ནམ་མཁའ་བཟང་པོ་ལ་གནང༌། དེའི་ཞབས་དྲུང་དུ་བདག་གིས་ཡི་དམ་འདིའི་དབང་ཐོབ།ཡང་རྗེ་བཙུན་ཤེས་རབ་སེང་གེ་ནས་སྲད་རྒྱུད་གོང་མ་རྣམས་ལ་རིམ་གྱིས་བརྒྱུད་པ་རྗེ་བཙུན་བླ་མ་ངག་དབང་བྱམས་པའི་ཞབས་དྲུང་དུ་བདག་གིས་ཡི་དམ་འདིའི་དབང་དང་རིམ་གཉིས་ཀྱི་མན་ངག་རྣམས་ལེགས་པར་ཐོབ་བོ། །
༈ གསང་བདེ་འཇིགས་གསུམ་གྱི་བརྒྱུད་རིམ་གོང་དུ་བསྟན་པ་དེ་དག་ཀྱང་དེང་སང་ཡོངས་གྲགས་ལྟར་བཀོད་པ་ཡིན་གྱི། འདི་དག་ལ་ནང་གསེས་ཀྱིས་ཕྱེ་ན་རྒྱ་གར་གྲུབ་ཆེན་མང་པོ་ནས་བརྒྱུད་པའི་བརྒྱུད་རིམ་དང༌། ལོ་ཙཱ་བ་མང་པོ་བརྒྱུད་པ་དང༌། དེ་ལའང་དབང་གི་བརྒྱུད་པ་དང༌། རྒྱུད་ཀྱི་ལུང་གི་བརྒྱུད་པ་དང༌། རིམ་གཉིས་ཀྱི་མན་ངག་མྱོང་ཁྲིད་ཀྱི་བརྒྱུད་པ་དང༌། རྩ་བཤད་སྦྱར་བའི་བཤད་སྲོལ་གྱི་བརྒྱུད་རིམ་སོགས་མང་དུ་ཡོད་དེ། རྗེ་རིན་པོ་ཆེའི་གསན་ཡིག་དང༌། མཁས་གྲུབ་རིན་པོ་ཆེའི་གསན་ཡིག་དང༌། པཎ་ཆེན་བློ་བཟང་ཆོས་ཀྱི་རྒྱལ་མཚན་གྱི་གསན་ཡིག་དང༌། ཀུན་མཁྱེན་ལྔ་པ་ཆེན་པོའི་གསན་ཡིག་གདྒྰའི་ཆུ་རྒྱུན་དང༌། རྗེ་བཙུན་བློ་བཟང་ཡེ་ཤེས་ཀྱི་གསན་ཡིག་སོགས་ལས་གསུངས་པ་ལྟར་རོ། ། 2/2 མདུན་ངོས། 上一页 1 2 |
