ད་སྔ་གཟིགས་བཞིན་པ།  མདུན་ངོས། > མི་སྣ་མཚམས་སྦྱོར། > མཁས་བའི་ཁྱུ་མཆོག
༄༅། །ལམ་རིམ་བླ་མ་བརྒྱུད་པའི་རྣམ་ཐར་ལས་རྗེ་བཙུན་རེད་མདའ་བ་གཞོན་ནུ་བློ་གྲོས་ཀྱི་རྣམ་ཐར།
སྤེལ་དུས།05-16  ཡོང་ཁུངས། ཀྲུང་གོའི་བོད་ཀྱི་སློབ་གསོ་དྲ་བ།  རྩོམ་པ་པོ། ཡོངས་འཛིན་ཡེ་ཤེས་རྒྱལ་མཚན།
རྒྱལ་སྲས་དམ་པ་འདི་ཞིང་གཤེགས་པའི་ཚེ་ས་ཆེན་པོ་འདིས་ཀྱང་མྱ་ངན་བྱས་པ་ལྟར་ཆེས་ཆེར་གཡོས་ཤིང་དཀར་ཕྱོགས་ཀྱི་ལྷ་རྣམས་ཀྱིས་བདག་ཉིད་ཆེན་པོ་འདི་དགའ་ལྡན་དུ་ཕེབས་པ་ལ་མཆོད་པའི་བྱེ་བྲག་སྣ་ཚོགས་པ་ཐོགས་ནས་བསུ་བ་བྱས་ཤིང་ལྷ་རྣམས་ཀྱིས་བརྡུངས་པའི་རྔ་བོ་ཆེའི་སྒྲ་ཆེར་གྲག་པ་མི་རྣམས་ཀྱིས་ཐོས་པའང་བྱུང་ངོ༌།   །རྗེ་བཙུན་རེད་མདའ་པ་ལ་རྗེ་བཙུན་ཆོས་ཀྱི་རྒྱལ་པོ་ཙོང་ཁ་པ་ཆེན་པོས་བློ་སྦྱོང་དོན་བདུན་མའི་ཁྲིད་ལེགས་པར་གསན་ཞིང་རྗེ་རིན་པོ་ཆེས་སྐལ་བ་དང་ལྡན་པ་མཐའ་ཡས་པ་ལ་སྤེལ་བར་མཛད་དེ་རྗེ་རིན་པོ་ཆེས་བྱང་ཆུབ་ལམ་གྱི་རིམ་པའི་ཁྲིད་གནང་སྐབས་བྱང་ཆུབ་ཀྱི་སེམས་སྦྱོང་ཚུལ་ལ་རྒྱུ་འབྲས་མན་ངག་བདུན་གྱི་སྒོ་ནས་སྦྱོང་ཚུལ་དང༌།   རྒྱལ་སྲས་ཞི་བ་ལྷའི་གཞུང་ལ་བརྟེན་ནས་བདག་གཞན་མཉམ་རྗེའི་སྒོ་ནས་སྦྱོང་ཚུལ་གཉིས་སུ་མཛད་ནས་བདག་གཞན་མཉམ་རྗེའི་སྒོ་ནས་སྦྱོང་ཚུལ་ལ་བློ་སྦྱོང་འདིའི་མན་ངག་རྣམས་སྟེན་པར་མཛད་ལ། ཡང་བྱང་སེམས་འཆད་ཁ་བས་བློ་སྦྱོང་འདི་ལ་དོན་བདུན་དུ་ས་བཅད་མཛད་ཅིང་མིང་ཡང་བློ་སྦྱོང་དོན་བདུན་མ་ཞེས་འདོགས་པར་མཛད་པ་ལྟར་དེ་དང་མཐུན་པའི་ཁྲིད་ཚུལ་རྒྱལ་སྲས་ཐོགས་མེད་བཟང་པོ་དཔལ་གྱིས་དོན་བདུན་མའི་ཁྲིད་ཡིག་ཟུར་དུ་མཛད་པ་ལྟར་བློ་སྦྱོང་དོན་བདུན་མའི་ཁྲིད་ཟུར་དུའང་གནང་སྟེ་རྗེ་རིན་པོ་ཆེ་འོན་བཀྲ་ཤིས་རྡོ་ཁར་ཕེབས་སྐབས་སེམས་དཔའ་ཆེན་པོ་ཧོར་སྟོན་སོགས་རྒྱལ་སྲས་མང་པོ་ལ་བློ་སྦྱོང་དོན་བདུན་མའི་ཁྲིད་རྒྱས་པར་སྩལ། སེམས་དཔའ་ཆེན་པོ་ཧོར་སྟོན་པས་རྗེ་དགེ་འདུན་གྲུབ་ལ་གནང༌། དེས་འདུལ་འཛིན་བློ་གྲོས་སྦས་པ་ལ་གནང༌། དེས་པཎ་ཆེན་ཡེ་ཤེས་རྩེ་མོ་ལ་གནང༌།   དེས་རྗེ་སྐྱབས་མཆོག་དཔལ་ལ་གནང༌། དེས་རྒྱལ་བ་དབེན་ས་པ་ལ་གནང༌། དེས་མཁས་གྲུབ་སངས་རྒྱས་ཡེ་ཤེས་ལ་གནང༌། དེས་རྗེ་བཙུན་བློ་བཟང་ཆོས་ཀྱི་རྒྱལ་མཚན་ལ་གནང༌། དེས་ཞབས་དྲུང་ལྷ་པ་བསྟན་པ་དར་རྒྱས་ལ་གནང༌།དེས་གྲུབ་ཆེན་བློ་བཟང་བྱམས་པ་ལ་གནང༌། དེས་གྲུབ་དབང་ཆོས་རྒྱ་མཚོ་ལ་གནང༌། དེས་རྗེ་བཙུན་བླ་མ་གྲུབ་པའི་དབང་ཕྱུག་བློ་བཟང་རྣམ་རྒྱལ་ལ་གནང༌། རྗེ་བླ་མ་བཀའ་དྲིན་མཚུངས་མེད་དེའི་ཞབས་དྲུང་དུ་བདག་གིས་ཆོས་འདིའི་བཀའ་དྲིན་ཐོབ་བོ། །ཡང་རྒྱལ་བའི་སྲས་པོ་ཐོགས་མེད་བཟང་པོ་དཔལ་གྱིས་སེམས་དཔའ་ཆེན་པོ་རྒྱ་མ་བ་ཡོན་ཏན་འོད་ལ་གནང༌།   དེ་ནས་རིམ་གྱིས་བརྒྱུད་དེ་བདག་གི་དྲིན་ཅན་རྩ་བའི་བླ་མ་རྗེ་བཙུན་ངག་དབང་བྱམས་པའི་ཞབས་དྲུང་དུ་ཆོས་འདིའི་བཀའ་དྲིན་བདག་གིས་རྒྱས་པར་ཐོབ་བོ། །བློ་སྦྱོང་སྙན་རྒྱུད་ཆེན་མོ་འདིའི་རྒྱུད་རིམ་མདོར་བསྡུས་གསོལ་འདེབས་ཀྱི་ཚུལ་དུ་བཀོད་ན་འདི་ལྟར། ཐུབ་དབང་འཇམ་དབྱངས་རྒྱལ་སྲས་ཞི་བ་ལྷ།   །ཨེ་ལ་ངྷ་རི་དཔའ་བོ་རྡོ་རྗེ་དང༌། །རིན་ཆེན་དཔལ་དང་བླ་མ་གསེར་གླིང་པ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཡིད་བཞིན་ནོར་འདྲའི་ཐུགས་མངའ་མར་མེ་མཛད། །རྒྱལ་བའི་འབྱུང་གནས་སྟོན་པ་རིན་པོ་ཆེ། །བསྟན་པ་རིན་ཆེན་གསལ་མཛད་པོ་ཏོ་བ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས།  །ཡོན་ཏན་མཆོག་གི་གྲགས་པའི་ཤ་ར་བ། །བྱང་ཆུབ་ཐུགས་གཉིས་འབྱོངས་པའི་འཆད་ཀ་བ།   །ལྟ་སྤྱོད་རྣམ་པར་དག་པའི་རྒྱལ་བ་སེ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས།    །གཅིག་ཏུ་གཞན་དོན་མཛད་པའི་སྐྱེས་མཆོག་ལྷ། །བསླབ་གསུམ་རྣམ་པར་དག་པའི་ལྷ་སྡིངས་པ།   །སྒོ་གསུམ་གཞན་དོན་མཛད་པའི་ལྷ་སྡིངས་དཔོན། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །དུས་གསུམ་རྒྱལ་བའི་ལམ་གནས་ཡོན་ཏན་དཔལ། །སངས་རྒྱས་བསྟན་པ་རྒྱས་མཛད་བདེ་བ་དཔལ།   །མཁས་བཙུན་འགྲན་ཟླ་བྲལ་བའི་དཀའ་བཞི་པ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཕན་བདེ་ཀུན་གྱི་འབྱུང་གནས་རིན་པོ་ཆེ། །བསོད་ནམས་ཡེ་ཤེས་སྟོབས་ཀྱིས་སྟོང་གསུམ་གྲགས། །བྱམས་དང་སྙིང་རྗེའི་མངའ་བདག་ཆོས་ཀྱི་རྗེ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཐོགས་མེད་གཉིས་པ་རྒྱལ་སྲས་རིན་པོ་ཆེ། །འཛམ་གླིང་མཁས་པའི་གཙུག་རྒྱན་རེད་མདའ་པ། །རྒྱལ་བ་ཀུན་དངོས་བློ་བཟང་གྲགས་པའི་དཔལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཐེག་མཆོག་གདམས་པའི་གཏེར་གྱུར་ནམ་མཁའ་དཔལ།   །ཁམས་གསུམ་བསྟན་པའི་བདག་པོ་དགེ་འདུན་གྲུབ། །སེམས་དཔའ་ཆེན་པོ་བློ་གྲོས་སྦས་པའི་ཞབས།   །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཡེ་ཤེས་མཚན་ཅན་འཇམ་དབྱངས་སྐྱབས་མཆོག་དཔལ།   །སྐུ་གསུམ་མངོན་གྱུར་རྗེ་བཙུན་དབེན་ས་པ། །དེ་སྲས་ཐུ་བོ་སངས་རྒྱས་ཡེ་ཤེས་ཞབས། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །རྗེ་བཙུན་བློ་བཟང་ཆོས་ཀྱི་རྒྱལ་མཚན་ཞབས།   །དེ་སྲས་ཐུ་བོ་ཞབས་དྲུང་ལྷ་པ་དང༌། །གྲུབ་ཆེན་བློ་བཟང་བྱམས་པ་རིན་པོ་ཆེར།    །གསོལ་བ་འདེབས་སོ་བདག་རྒྱུད་བྱིན་གྱིས་རློབས། ། སེམས་དཔའ་ཆེན་པོ་གྲུབ་དབང་ཆོས་རྒྱ་མཚོ། །རྩ་བའི་བླ་མ་བློ་བཟང་རྣམ་རྒྱལ་ཏེ།   །དངོས་དང་བརྒྱུད་པའི་བླ་མ་མཆོག་རྣམས་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཡང་རྩ་བའི་བླ་མ་བྱམས་པའི་མཚན་ཅན་གྱི་གསན་རྒྱུན་ལྟར་གསོལ་བ་འདེབས་པ་ནི། རྒྱལ་སྲས་ཐོགས་མེད་ཡན་གོང་ལྟར་ལ། དེ་ནས་འདི་ལྟར། རྒྱལ་བའི་སྲས་པོ་ཐོགས་མེད་བཟང་པོ་དཔལ།   །ཡོན་ཏན་འོད་དང་བློ་འཕེལ་ཚུལ་ཁྲིམས་དར། །བསོད་ནམས་ལྷ་དབང་བསོད་ནམས་ལེགས་མཆོག་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས།   །སྙུག་ལ་པཎ་ཆེན་ངག་དབང་གྲགས་པ་དང༌། །སྤྱན་སྔ་ངག་དབང་ཆོས་གྲགས་བྲག་དགོན་པ། །དཔལ་འབྱོར་ལྷུན་གྲུབ་འཕྲིན་ལས་རབ་རྒྱས་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །གངས་ཅན་མགོན་པོ་བློ་བཟང་རྒྱ་མཚོའི་སྡེ། །བློ་བཟང་དར་རྒྱས་འཇམ་དབྱངས་གྲགས་པའི་དཔལ། །ལམ་བཟང་གསལ་མཛད་དགེ་ལེགས་རྒྱ་མཚོ་ལ།    །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །རྒྱལ་བ་ཀུན་གྱི་མཁྱེན་བརྩེ་ནུས་པ་ཀུན།   །གཅིག་བསྡུས་འཇམ་མགོན་བསྟན་པའི་སྲོག་ཤིང་ཆེ། །རྩ་བའི་བླ་མ་ངག་དབང་བྱམས་པ་ལ།   །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །རབ་འབྱམས་གསུང་རབ་ཀུན་གྱི་སྙིང་པོའི་དོན། །གཅིག་ཏུ་བསྡུས་ནས་གསལ་བར་སྟོན་མཛད་པ། །བཀའ་དྲིན་མཚུངས་མེད་རྗེ་བཙུན་བླ་མ་ལ།   །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཞེས་པའོ། །དེས་ན་བྱང་ཆུབ་ལམ་གྱི་རིམ་པ་ལ་བློ་སྦྱོང་བར་འདོད་པའི་གདུལ་བྱ་རྣམས་ཀྱིས་བདག་པས་གཞན་གཅེས་པའི་བྱང་ཆུབ་ཀྱི་སེམས་རིན་པོ་ཆེ་མྱུར་དུ་རྒྱུད་ལ་སྐྱེ་བར་བྱ་བའི་ཕྱིར་བློ་སྦྱོང་སྙན་རྒྱུད་ཀྱི་བླ་མ་རྣམས་ལ་གསོལ་བ་འདེབས་ཤིང་བློ་སྦྱོང་རྒྱུད་པའི་བླ་མ་རྣམས་ཀྱི་མཛད་པ་རྣམ་ཐར་རྣམས་བསམས་ལ་བྱང་ཆུབ་ཀྱི་སེམས་རིན་པོ་ཆེ་མ་སྐྱེས་པ་བསྐྱེད་པ་དང་སྐྱེས་ཟིན་གོང་ནས་གོང་དུ་སྤེལ་བ་ལ་བློ་གྲོས་དང་ནུས་པ་དང་རྩོལ་བ་ཅི་ཡོད་ཐམས་ཅད་གཅིག་ཏུ་དྲིལ་ཏེ་རྣམ་པ་ཀུན་ཏུ་འབད་པར་བྱའོ། །

རྒྱབ་སྐྱོར།
返回首页
གཙོ་ངོས།
པར་ལྡན་རྩོམ་ཡིག
ཉེ་ལམ་གསར་བརྗེས།
ཀློག་མཁན་མང་ཤོས།
 
Copyright © 2005 - 2018 Teducn.com
phone:18997245213 QQ:89457590
དྲ་ཚིགས་འདིའི་པར་དབང་ཡོད་ཚད་ཀྲུང་གོའི་བོད་ཀྱི་སློབ་གསོ་དྲ་བར་དབང་།
ཡིག་ཟམ། gangjian_xn@hotmail.com
འབྲེལ་གཏུགས་ཁ་པར། ༡༨༩༩༧༢༤༥༢༡༣青ICP备18000196号