དང་པོ། བྱ་འགུལ་གྱི་དམིགས་ཡུལ།
སློབ་མ་རྣམས་ཀྱི་བསམ་གཞིག་གི་ནུས་པ་དང་སློབ་སྦྱོང་གི་གོམས་གཤིས་གསོ་སྐྱོང་བྱེད་པ་དང་། བསླབ་བྱའི་ནང་དོན་རྒྱ་བསྐྱེད་བཏང་བ། སློབ་མའི་རྨང་གཞིའི་ཤེས་བྱའི་ཆུ་ཚད་ལ་ཚོད་བགམ་བྱེད་པ་བཅས་དམིགས་ཡུལ་དུ་བཟུང་སྟེ་༢༠༡༧ལོའི་ཟླ༡༡ཚེས༢༩ཉིན་༼རེས་གཟའ་ལྷག་པ༽གྱི་ཕྱི་དྲོ་ངེད་སློབ་གྲྭས་བོད་རྒྱ་རྩིས་ཀྱི་ཤེས་རིག་འགྲན་བསྡུར་གྱི་བྱ་འགུལ་སྤེལ་བ་རེད།
གཉིས་པ། བྱ་འགུལ་གྱི་བརྒྱུད་རིམ། ༡ བྱ་འགུལ་མ་སྤེལ་སྔོན་ལ་སློབ་གྲྭ་དང་སློབ་སྟོན་ཁང་གི་བཀོད་སྒྲིག་འོག་སློབ་དཔྱོད་ཁང་སོ་སོའི་འགན་ཁུར་བས་རང་གི་ཚོགས་མི་རྩ་འཛུགས་བྱས་ཏེ་སློབ་རིམ་སོ་སོའི་སློབ་མའི་ཤེས་ནུས་ཀྱི་ཆུ་ཚད་དང་འཚམ་པའི་རྨང་གཞིའི་སྐོར་གྱི་དྲི་ཚིག་འཚོལ་བསྡུ་བྱས་པ་དང་། བྱ་འགུལ་སྤེལ་སྐབས་ཀྱི་མི་སྣ་བཀོད་སྒྲིག་བྱས།
༢ སློབ་རིམ་སོ་སོའི་རིག་སྟོབས་མི་འདྲ་བར་གཞིགས་ཏེ་དམའ་རིམ་དང་འབྲིང་རིམ། མཐོ་རིམ་བཅས་སློབ་རིམ་གསུམ་དུ་ཕྱེ་ནས་དྲི་ཚིག་འཚོལ་བསྡུ་བྱས་ཤིང་། བྱ་འགུལ་གྱི་ཡུལ་དངོས་བཀོད་སྒྲིག་བྱས། ༼ གཅིག་ཐོག་ཏུ་དམའ་རིམ་འཛིན་གྲྭ ཉིས་ཐོག་ཏུ་འབྲིང་རིམ་འཛིན་གྲྭ སུམ་ཐོག་ཏུ་མཐོ་རིམ་འཛིན་གྲྭ་བཅས་རིམ་པ་ལྟར་བཀོད་སྒྲིག་བྱས། ༽
༣ ཚེས་༢༩ཉིན་དངོས་སུ་བྱ་འགུལ་སྤེལ་བ་སྟེ། བསླབ་ཚན་སོ་སོའི་དགེ་རྒན་གྱིས་འཚོལ་བསྡུ་བྱས་པའི་དྲི་ཚིག་གི་ནང་དོན་ལ་ངག་ཐོག་ནས་ལན་བཏབ་པ་དང་། ལན་འགྲིག་ཚེ་བྱ་དགའི་ལེགས་སྐྱེས་གནང་བ་རེད། འགྲན་སྡུར་མཇུག་རྫོགས་རྗེས་སློབ་མ་ཡོངས་ཀྱིས་དྲི་ཚིག་རེ་རེའི་ལན་ལ་གསལ་ཆ་ཡོད་པའི་ཆེད་དུ་དྲིས་ལན་རེ་རེ་བཞིན་ཁ་གསལ་བོའི་སྒོ་ནས་གསལ་བཤད་བྱས་པ་རེད།
གསུམ་པ། ཕྱོགས་བསྡོམས།
ཐེངས་འདིའི་བྱ་འགུལ་ནི་བསླབ་ཚན་སྤྱི་ལ་ཁྱབ་པ་ཞིག་ཡིན་པ་དང་། སློབ་མའི་ཤེས་ནུས་སམ་བློ་ཁ་དང་འཚམ་པའི་དྲི་གཞི། བསླབ་ཚན་དང་འབྲེལ་བ་ཡོད་པའི་དྲི་གཞི། སློབ་ཆུང་སློབ་མ་ཚོར་མཚོན་ན་ཆེས་རྨང་གཞིར་གྱུར་བའི་རྒྱུན་ཤེས་སོགས་སྣ་མང་ཕུན་སུམ་ཚོགས་པ་ཞིག་ཡིན་པས། སྔོན་དཔག་གི་དམིགས་ཡུལ་དེ་ལམ་ལྷོངས་བྱུང་ཞིང་། སློབ་མའི་སློབ་སྦྱོང་གི་སྤྲོ་སེམས་དང་འདོད་འདུན་བསྐྱེད་བསྲིང་། ཡིད་ཆེས་སམ་རང་བཀུར་གྱི་བསམ་བློ། བསམ་གཞིགས་ཀྱི་ནུས་པ་བཅས་སློབ་མའི་ཕྱོགས་ཡོངས་ཀྱི་ནུས་པ་བསྐྱེད་བསྲིང་ལ་ནུས་པ་མི་དམན་པ་ཞིག་ཐོན་ཡོད་པར་སྙམ།
༢༠༡༧ལོའི་ཟླ༡༡ཚེས༣༠ཉིན། |