| དོན་ཏིང་འཛིན་བདེ་ལ་རྩེ་གཅིག་རོལ། །སླར་རྗེས་ཐོབ་སྒྱུ་མའི་རྣམ་ཐར་སྐྱོང༌། །དུས་རེས་འགའ་ས་འཛིན་ཡངས་པར་འཆག །ལམ་ཐུན་མོང་རིམ་པ་ནས་བཟུང་སྟེ། །དཔལ་ཟུང་འཇུག་བདེ་བ་ཆེན་པོའི་བར། །གཞི་སྟན་ཐོག་གཅིག་ཏུ་དྲིལ་བྱས་ནས། །དུས་ཉིན་མཚན་ཁོར་ཡུག་བསྒོམ་པར་སྤྲོ། །མཐར་ན་ཚོད་ཡོངས་སུ་སྨིན་གྱུར་ཀྱང༌། །རྗེ་ཀུན་མཁྱེན་ཐུབ་པའི་དབང་པོ་ཡིས། །ཆོས་མང་དུ་ཐོས་པའི་དགེ་སློང་དེ། །ནགས་བཟང་པོའི་སྐྱེད་མོས་ཚལ་གྱི་ཁྲོད། །ཚེ་ལང་ཚོ་ཡོལ་བ་གནས་པ་བདེ། །ཞེས་གསུངས་བཞིན་རྒ་ཤིས་སྐྲག་པ་མེད། །སེམས་ཆོས་བརྒྱད་སྤྲོས་པ་རྩད་ནས་བཅད། །ལྷའི་སྐྱེད་ཚལ་འདྲ་བའི་དབེན་གནས་དེར། །ཕ་བླ་མའི་རྣམ་ཐར་སྐྱོང་བར་སྤྲོ། །སྟེང་ཆུ་འཛིན་བླ་བྲེ་ལང་ལིང་གཡོ། །བར་རྨུགས་པའི་སྟོད་གཡོགས་ཡོལ་བས་བྲེས། །སྨད་ནགས་ཚལ་སྔོན་པོའི་ཤམ་ཐབས་མཛེས། །གཞི་ནེའུ་གསིང་མེ་ཏོག་ཕང་ཕུང་ཅན། །འགྲོགས་བདེ་བའི་བྱ་དང་རི་དྭགས་གྲོགས། །ཡིད་བག་ཕེབས་བདེ་བར་ཟློས་གར་སྒྱུར། །ཚེ་འདི་ནང་ཆགས་སྡང་སྐྱེ་བའི་ཡུལ། །གཉེན་ཉེ་དུ་དགྲ་སོགས་མིང་ཡང་མེད། །ཀུན་མངོན་དགའ་བསྐྱེད་པའི་སྨན་ལྗོངས་དེར། །ནོར་འབྱོར་རྒུད་གསོག་བསྲུང་སྡུག་བསྔལ་བྲལ། །འཕྲལ་གང་བྱུང་ཆོག་ཤེས་བདུད་རྩིས་འཚོ། །ཆོས་འཕགས་ནོར་བདུན་གྱི་བང་མཛོད་འཛིན། །ལས་ཅི་བྱེད་སྣ་ཐག་རང་གིས་བཟུང༌། །རྗེ་རྒྱལ་བ་ཀུན་གྱི་རྗེས་སུ་སློབ། །ཚུལ་འདི་འདྲའི་བདེ་སྐྱིད་ཁྱད་པར་གང༌། །ལྷའི་དབང་པོས་ཀྱང་ནི་རྙེད་དཀར་གསུངས། །དོན་དེ་ཕྱིར་པདྨོའི་དྲ་བ་ཡིས། །སྟེང་མཛེས་པར་ཁེབས་པའི་ཡིད་བཞིན་མཚོ། །རྒྱང་མིག་ལམ་བབ་པའི་ངང་པ་བཞིན། །གནས་དབེན་པའི་དགའ་ཚལ་སྙིང་ལ་དྲན། །ལས་ཉོན་མོངས་ཆུ་སྲིན་མང་པོས་གཙེས། །རླབས་སྐྱེ་རྒ་ན་འཆིའི་རྦ་ཀློང་འཁྲུག །གཏིང་མཐའ་མེད་འཁོར་བའི་རྒྱ་མཚོ་ལས། །ད་མྱུར་དུ་སྒྲོལ་ཕྱིར་དབེན་པར་འགྲོ། །ལམ་ཐབས་ཤེས་ཟབ་མོའི་ཉམས་ལེན་གྱིས། །དགྲ་སྐྱེ་རྒ་ན་འཆི་རྩད་བཅད་ནས། །དུས་རྟག་ཏུ་འདུ་འབྲལ་མི་བྱེད་པའི། །ལུས་ལོངས་སྤྱོད་གྲོགས་སོགས་སྒྲུབ་པར་སྨོན། །ཚུལ་འདི་ལྟར་རེ་བའི་དོན་པོ་རྣམས། །སྐྱབས་བསླུ་མེད་བླ་མ་དཀོན་མཆོག་གིས། །ཡུན་མི་རིང་མྱུར་དུ་འགྲུབ་པ་ཡི། །གེགས་ཞི་ཞིང་མཐུན་རྐྱེན་འགྲུབ་པར་མཛོད། །ཅེས་སོ། །དེ་དུས་སུ་གུ་གེ་ཆོས་རྒྱལ་གྱིས་གདན་འདྲེན་ཡང་ཡང་བྱུང་བ་ལྟར་ཞལ་གྱིས་བཞེས་ཏེ་ལྷ་ལྡན་ནས་བཀྲ་ཤིས་ལྷུན་པོར་ཕེབས། ཟླ་ཕྱེད་ལྷག་ཙམ་བཞུགས་ནས་རིམ་གྱིས་ཕེབས་ཏེ་ལམ་བར་དུ་བཞུགས་པའི་དགེ་འདུན་གྱི་སྡེ་དང་དད་པ་ཅན་རྣམས་ཀྱིས་མཆོད་ཅིང་བསྙེན་བཀུར་བ་ཡང་དང་དུ་བཞེས། ཅི་འདོད་པའི་ཆོས་ཀྱིས་ཀྱང་ཚིམ་པར་མཛད། ཟླ་བ་བཞི་པའི་ཉེར་གསུམ་ལ་མ་ཕམ་མཚོ་འགྲམ་དུ་ཕེབས་ནས་སྐུ་ཁྲུས་མཛད་ཅིང་མཚོའི་རྡེའུ་ཕྱག་སྤར་གང་བཞེས་པས་ཕལ་ཆེར་ལྷའི་རྣམ་པར་བྱོན། སང་གངས་རིའི་མདུན་ན་ཕར་ཕེབས་དུས་གངས་རིའི་རྩེ་ནས་འཇའ་ཚོན་ཁ་དོག་སྣ་ལྔ་རྒྱལ་མཚན་དང༌། བ་དན་དང་། གདུགས་ལྟ་བུ་དང༌། དར་བརྐྱངས་པ་འདྲ་བ་དཔག་ཏུ་མེད་པ་བྱུང་སྟེ་རྗེ་འདི་པའི་སྟེང་ངོས་སུ་ཆགས་པ་བྱུང་སྟེ་རྗེ་འདི་གར་ཕེབས་ཀྱི་དབུའི་ཐོག་ཏུ་ཆགས་པ་བྱུང་བས་གངས་རིའི་གནས་འཛིན་པ་འབྲི་ཁུང་རྡོར་འཛིན་འཁོར་བཅས་དད་པར་གྱུར་ཏེ་རྗེ་འདིའི་ཕྱི་བཞིན་བསྙེགས་ནས་ཤྭ་ལ་ཙ་གོང་དུ་མཇལ་ཁ་དང་བྱིན་རླབས་ཞུས། ངེད་གངས་རིར་སླེབས་ནས་ལོ་བཅུ་ཙམ་སོང་ཡང་དེ་རིང་ལས་རྟགས་ཡ་མཚན་ཆེ་བ་མ་བྱུང༌། ཁྱེད་ཀྱིས་བདག་བྱང་ཆུབ་མ་ཐོབ་ཀྱི་བར་དུ་ཐུགས་རྗེས་ཟུངས་ཞེས་དད་གུས་ཆེན་པོས་སྨོན་ལམ་འདེབས་པར་བྱེད་དོ། །དེ་ནས་ཟླ་བ་ལྔ་པའི་ཚེས་བཅུ་གསུམ་ལ་ཞབས་དྲུང་ཆོས་རྗེ། ཇོ་བོ་བདག་པོ་ལྷ་སྡེ་མི་སྡེའི་གཙོ་བོ་རྣམས་ཀྱིས་རྟ་བ་མང་པོའི་ཚོགས་དང་བཅས་ཕེབས་བསུ་ཞུས་ཏེ་ཞང་ཞུང་གི་ལུང་ནང་སྤའི་ལྡིང་ཞེས་བྱ་བར་ཕེབས། འདི་སྐབས་ལྷ་རྣམས་ཀྱིས་མེ་ཏོག་གི་ཆར་ཕབས་པ་སོགས་དགེ་མཚན་ཕུན་སུམ་ཚོགས་པ་ཀུན་གྱི་མངོན་སུམ་དུ་གྱུར། ཚེས་བཅོ་ལྔ་ལ་མཐོ་ལྡིང་གསེར་གྱི་ལྷ་ཁང་དུ་ཞབས་དྲུང་མི་དབང་གིས། སྐྱེས་མཆོག་ལོ་ཙཱ་བ ་རིན་ཆེན་བཟང་པོའི་བཞུགས་ཁྲིར་གདན་དྲངས་ཏེ་རིན་པོ་ཆེའི་མཎལ་ཕུལ་ཏེ་སེར་ཚོགས་ཀྱི་འདུས་པ་རྒྱ་མཚོ་ལ་མང་འགྱེད་ཀྱི་བསྙེན་བཀུར་དང་བླ་མའི་རྣལ་འབྱོར་སོགས་འདོད་ཆོས་ཞུས། དེ་ནས་ཕལ་ཆེར་ཆོས་གྲྭ་སར་བཞུགས་ནས་མཆོད་ཡོན་རྣམས་ལ་གསང་བདེ་འཇིགས་གསུམ་གྱི་དབང༌། བསྐྱེད་རྫོགས། སྣར་ཐང་བརྒྱ་རྩ། འཇམ་དབྱངས་ཆོས་སྐོར། བཀའ་གདམས་ཆོས་འབྱུང་གི་ལུང་སོགས་ཟབ་རྒྱས་ཆོས་ཀྱི་འཁོར་ལོ་བསྐོར། མདོར་ན་གུ་གེ་བདག་པོ་སྐུ་མཆེད་ཁུ་དབོན་རྣམས་ཀྱིས་ཐོག་དྲངས་ཕྱོགས་དེའི་ལྷ་སྡེ་མི་སྡེ་ཐམས་ཅད་ཀྱིས་དད་གུས་ཚད་མེད་པས་མཆོད། དེ་ནས་ཟླ་བ་དགུ་པའི་ཚེས་བཅུ་གསུམ་ལ་གུ་གེ་ནས་ཆིབས་བསྐྱོད་དེ་གངས་རིའི་བར་དུ་ཞལ་ངོ་མཆོད་ཡོན་རྣམས་ཀྱིས་ཆིབས་བསྐྱེལ་ཞུས། གངས་རི་ཆེན་པོ་ལ་ཞབས་བསྐོར་མཛད་ནས་གངས་རིའི་སྐུ་མདུན་དུ་དད་འདུས་ཀྱི་སྐྱ་སེར་གྱི་ཁྲོམ་ཤིན་ཏུ་ཆེ་བ་ཚོགས་པ་ལ་ཉིན་དགུང་ཁྲོམ་དབང་ཞིག་གནང་སྐབས། གངས་རི་ཆེན་པོ་བཻཌྰུརྱའི་མདོག་ལྟར་སྔོ་བ་ལ་གཟུགས་བརྙན་སྣ་ཚོགས་འཆར་བ་ཞིག་ཏུ་གཟིགས། སྐུའི་ཉེ་སྐོར་དུ་ཡོད་པའི་གྲྭ་པ་འགའ་ཞིག་ལ་གངས་རི་འདི་ཅི་འདྲར་སྣང་བཀའ་འདྲི་གནང་བར། དཀར་ཞིང་འཚེར་བར་འདུག་ཟེར། མཁར་ནག་ཆོས་མཛད་ལ་བཀའ་འདྲི་གནང་བར་རྒྱ་མཐིང་བཟང་པོའི་མདོག་ལྟ་བུ་ཤིན་ཏུ་སྔོ་བ་ཞིག་འདུག་ཟེར། དེ་ཙམ་ཞིག་མཐོང་ནས་ཡ་མཚན་དུ་ཕྱེད་དོ། །དེ་ནས་ཟླ་བ་བཅུ་གཅིག་པའི་ཚེས་བཅུ་གསུམ་ལ་ཆོས་གྲྭ་ཆེན་པོ་བཀྲ་ཤིས་ལྷུན་པོར་ཕེབས་ནས་སེར་ཇ་གསེར་འགྱེད་དང་བཅས་པ་གནང༌། དེ་དུས་ལྷ་ས་དང་འབྲས་སྤུངས་ཀྱི་རྒྱབ་རིར་མི་སྟོང་ཕྲག་དུ་མ་ཁ་བཏགས་ཤིང་སེ་འབྲས་གཉིས་དམག་གིས་བཅོམ་སྐབས་སུ་མཆིས་ཀྱང༌། ཡང་དག་པར་རྫོགས་པའི་སངས་རྒྱས་བཞུགས་སྐབས་སུའང་གྲོང་ཁྱེར་སེར་སྐྱ་པ་རྣམས་དང་ཀོ་ས་ལ་པའི་དམག་འཁྲུག་ཚན་ཆེ་བ་དང་རྒྱ་བོད་གཉིས་ཀར་བསྟན་པའི་འཕེལ་འགྲིབ་སྣ་ཚོགས་བྱུང་ཡང༌། ལས་ཀྱི་རྣམ་སྨིན་བཅོས་སུ་དཀའ་བ་ལྟར་ཐབས་དང་བྲལ་ཡང༌། བསྟན་པ་འབའ་ཞིག་ཐུགས་ལ་དགོངས་ཏེ་སེ་འབྲས་གཉིས་ཀར་མང་ཇ་གསེར་འགྱེད་དང་བཅས་པ་ལན་ལྔ། ཁ་ཆེའི་ཆབ་བུམ་སྤུས་གཙང་བ་ཆ་རེ་རེ། འབྲས་སྤུངས་བྱམས་ཁང་དང་དངུལ་གདུང་ཁང་དུ་གུག་ཏིང་ཆེ་ལེགས་བདུན་ཚར་རེ་རེ་ཕུལ་བ་སོགས་སེ་འབྲས་གཉིས་ཀ་མི་ཉམས་པའི་ཐབས་ལ་རྣམ་པ་ཀུན་ཏུ་འབད་པར་མཛད། དེ་ནས་ལོ་དེ་ཉིད་ཀྱི་སྟོན་མཇུག་སོག་དམག་དཔུང་ཆེ་བ་བྱང་རྒྱབ་ཏུ་སླེབས། སྡེ་སྲིད་དཔོན་བློན་གྱི་བཀས་རྗེ་འདི་པ་ཆིངས་ལ་ཕེབས་དགོས་པ་བྱུང༌། ལྷ་སར་ཕེབས་པའི་ནུབ་མོ་རྗེ་རིན་པོ་ཆེའི་རྟོགས་བརྗོད་མདུན་ལེགས་མ་ཚང་མ་ཞལ་ཏོན་དུ་མཛད་པའི་མནལ་ལམ་ཞིག་བྱུང་བ་ཆིངས་དགའ་རབ་ཡོང་དུ་རེ་བས་རོང་པོ་འདམ་གྱི་བར་དུ་ཕེབས་ཀྱང་ཐུགས་བཞེད་བཞིན་མ་བྱུང༌། དེ་ནས་རེ་ཞིག་འབྲས་སྤུངས་སུ་བཞུགས་ནས་སེ་འབྲས་གཉིས་ཀ་ཆོས་དང་ཟང་ཟིང་གཉིས་ཀྱི་སྒོ་ནས་བསྐྱངས་ཏེ་སྲོག་རྩ་བཟུང༌། ཁྱད་པར་ཐམས་ཅད་མཁྱེན་པ་བསོད་ནམས་རྒྱ་མཚོའི་དངུལ་གདུང་གི་སྒོ་རྒྱན་ཐམས་ཅད་བཤིག་ནས་མ་རུངས་པར་བྱས་པ། རྗེ་འདི་པས་བསྟན་རྒྱུན་དང་རྟེན་འབྲེལ་ལ་དགོངས་ཏེ་གསེར་གཡུ་སོགས་རིན་པོ་ཆེའི་ཕུང་པོ་ལས་གསར་བསྒྲུབས་མཛད་དེ། ཐམས་ཅད་མཁྱེན་པའི་ཕྱག་རྫས་དང་ལ་བབ་པའི་དུས་སུ་བསྒྲུབས་པའི་སྒོ་རྒྱན་ཟིལ་གྱིས་གནོན་པ་ལྟ་བུ་བཟོ་བར་མཛད་དོ། །གཞན་ཡང་སེ་འབྲས་གཉིས་ཀར་བདག་ཅག་གི་སྟོན་པའི་སྐུ་བརྙན་བཀྲ་བའི་བཀྲ་ཤིས་ཁ་བཏགས་ཀྱི་འཕན་གྱི་ཕྲེང་བ་རེ་རེ་དང༌། གྲྭ་ས་གསུམ་གར་མང་ཇའི་བསྙེན་བཀུར་ཡང་ཡང་མཛད་དེ་རེ་ཞིག་འབྲས་སྤུངས་སུ་སྐུ་མཚམས་དམ་པོ་ལ་བཞུགསསོ། །དེ་ནས་ཟླ་བ་བདུན་པའི་ཟླ་འགོ་ལ་བོད་དམག་ཐམས་ཅད་རྐྱང་ཐང་སྒང་དུ་འདྲིལ། ཚེས་བཅུ་གཅིག་གི་ཚ་བཞེས་གྲོལ་མཚམས་སུ་སྐད་ཅིག་ལ་སོག་པོའི་རྟ་པ་སྒར་ཐོག་བརྒྱུགས་ནས་མི་བརྒྱ་ཕྲག་དུ་མ་བསད་ཅེས་སྙན་དུ་གསན་པས། རྗེ་འདི་པས་སྐུ་དང་སྲོག་ལའང་མ་གཟིགས་པར་སྐུ་མཚམས་ལ་ཧར་འདོན་མཛད་དེ་དན་འབག་གི་བར་ཞབས་ཐང་གིས་མགྱོགས་པར་ཕེབས་པས། བོད་དམག་རྣམས་ལྕགས་པོ་རིའི་མཚམས་སུ་འཁོར་ཞིང་སོག་པོའི་རྟ་པ་ལན་གཉིས་པ་རྒྱུག་པར་རྩོམ་པ་མེ་མདའ་དང་ཉག་ཕྲན་གྱི་ཆར་འབབ་པའི་སྐབས་སུ་ཕེབས། ལྷ་བཙུན་རང་ལ་ཟང་ཟིང་གི་གནང་ཆ་གྱ་ནོམ་པ་དང་བཅས་དངོས་སུ་ཞུ་བ་ནན་ཆེན་མཛད་པས། ལྷ་བཙུན་གྱིས་ཀྱང་ཅི་གསུང་བཀའ་བཞིན་དུ་ནོད་ནས་རྟ་རྒྱུག་འཕྲོ་བཅད་པས་དམག་མི་འབུམ་ཕྲག་ཏུ་ཉེ་བ་སྲོག་གཙེས་པ་ལས་སྐྱོབ་པར་མཛད་དོ། །དེ་སྐབས་གཙང་སོག་གཉིས་ཀས་ལྷ་ས་སྤྱི་མཆོད་ཀྱི་ཕྱིར་རྗེ་འདི་པ་ལ་ཕུལ།སོ་སོར་ཚིག་སྦྱངས་སྔོན་དུ་འགྲོ་བའི་ཁྲ་མ་གནང་ནས། ཇོ་བོ་རིན་པོ་ཆེའི་གསེར་ཐོག་གི་འོད་ཀྱིས་ཁྱབ་པའི་སར་བྲོ་དམ་པོས་བཀག་ཅིང་བརྟན་པར་མཛད་དེ་ཉིད་ཀྱི་སྐུ་དང་སྲོག་ལའང་མ་གཟིགས་པར་སེ་འབྲས་གཉིས་ཀ་བསྐྱངས་ཏེ་རྒྱལ་བ་ཙོང་ཁ་པ་ཆེན་པོའི་བསྟན་པའི་སྲོག་འཛིན་པར་མཛད་དོ། ། 16/23 མདུན་ངོས། 上一页 14 15 16 17 18 19 下一页 尾页 |
