| དེ་ནས་གསེར་གླིང་པས་ཡུལ་དེའི་སྐྱེ་བོ་ཐམས་ཅད་དང་འཛམ་བུའི་གླིང་ནས་ཆོས་དོན་གཉེར་གྱིས་ལྷགས་པ་ཐམས་ཅད་ལ་ཐེག་པ་ཆེན་པོའི་ཆོས་རྒྱ་ཆེར་བསྟན་ཏེ་ཆོས་ཀྱིས་མཐོ་བའི་ཁང་བཟང་མི་ཡུལ་དུ་བབས་པ་འདྲ་བར་ཐེག་པ་ཆེན་པོའི་ཆོས་ཀྱི་སྒྲ་དབྱངས་ཀྱིས་ཕྱོགས་ཀུན་ཏུ་ཁྱབ་ཅིང་ཡུལ་དེའི་སྐྱེ་བོ་ཕལ་པ་དག་ཀྱང་དཀོན་མཆོག་གསུམ་ལ་སྐྱབས་སུ་འགྲོ་བའི་ཚིག་ཁོ་ན་ཁ་ཏོན་དུ་བྱེད་ཅིང༌། བྱང་ཆུབ་ཏུ་སྨོན་ལམ་འདེབས་པ་དང་རང་བཞིན་གྱི་དགེ་བའི་ལས་ལ་བརྩོན་ཞིང་དུས་རྟག་ཏུ་དཀོན་མཆོག་མཆོད་པ་ལྷུར་བྱེད། མུ་སྟེགས་ཀྱི་སྨྲ་བ་ངན་པ་རྣམས་ནི་ཉིན་བྱེད་ཤར་བའི་དུས་ཀྱི་འབྱུང་པོའི་བྱ་ལྟར་སྨྲ་བ་ནུབ་པར་གྱུར་ཏོ། །དེ་ནས་གསེར་གླིང་པ་ཆེན་པོས་རྒྱལ་བསྟན་ཡུན་རིང་དུ་གནས་པའི་ཕྱིར་དུ་བྱང་ཆུབ་ལམ་གྱི་རིམ་པའི་མན་ངག་མདོ་རྒྱན་སྦྱར་བའི་འགྲེལ་པ་རྨད་དུ་བྱུང་བ་ཞིག་ཀྱང་མཛད་ཅིང༌། བློ་སྦྱོང་སེམས་དཔའི་རིམ་པ་དང༌། བློ་སྦྱོང་རྟོགས་པ་འབུར་འཇོམས། འཕགས་པ་མི་གཡོ་བའི་སྒྲུབ་ཐབས། མངོན་རྟོགས་རྒྱན་གྱི་འགྲེལ་པ་གཙོ་བོའི་དོན་བཅུ་གཅིག་ཏུ་བསྡུས་པ།བསླབ་པ་ཀུན་ལས་བཏུས་པའི་མངོན་པར་རྟོགས་པ། ཚོགས་བདག་ཁྲོ་བོའི་སྒྲུབ་ཐབས་སོགས་མཛད་དོ། །དེ་ལྟར་བདག་ཉིད་ཆེན་པོ་འདིས་སྤྱིར་བསྟན་པ་ལ་བྱ་བ་རྒྱ་ཆེར་མཛད་ཅིང༌། ལྷག་པར་ཇོ་བོ་རྗེ་དཔལ་ལྡན་ཨ་ཏི་ཤ་ལ་གསེར་གླིང་གི་ཕོ་བྲང་ཉིད་དུ་ལོ་བཅུ་གཉིས་བར་ཐེག་པ་ཆེན་པོའི་ལམ་གྱི་རིམ་པའི་མན་ངག་ཡོངས་སུ་རྫོགས་པ་གེགས་སེལ་བོགས་འདོན་དང་བཅས་པ་གནང་བས་ཇོ་བོ་རྗེའི་ཐུགས་ཀྱི་བུམ་བཟང་བྱང་ཆུབ་ཀྱི་སེམས་ཀྱི་བདུད་རྩིས་ཡོངས་སུ་གང་བས་བྱང་ཆུབ་ཀྱི་སེམས་རིན་པོ་ཆེའི་མཐུས་མཐོང་ཐོས་དྲན་རེག་ཐམས་ཅད་རྗེས་སུ་འཛིན་ཅིང་སྨིན་གྲོལ་ལ་འགོད་ནུས་པ་དང༌། པཎ་གྲུབ་གཞན་ལས་འཕྲིན་ལས་ཀྱི་ཁྱབ་བརྡལ་ཆེ་བ་དང༌། ལྷག་པར་བྱང་ཕྱོགས་གངས་རིའི་ཁྲོད་ཀྱི་འགྲོ་བ་དམུ་རྒོད་ཤིན་ཏུ་གདུལ་དཀའ་བ་རྣམས་ཀྱང་ཇོ་བོ་རྗེའི་སྐུ་མཐོང་བ་དང༌། གསུང་ཐོས་པ་དང༌། ཐ་ན་མཚན་ཙམ་ཐོས་པ་ཡན་ཆད་དད་ཅིང་འདུན་པ་དང་ཇོ་བོའི་མཚན་ཐོས་ཏེ་སྐུའི་རྣམ་པ་ཡིད་ལ་དྲན་པ་ན་རང་རང་གི་ཉོན་མོངས་གདུག་རྩུབ་རྣམས་སྐད་ཅིག་ལ་ཞི་ནས་དད་པ་དང་མོས་པ་ངང་གིས་སྐྱེ་བ་དང༌། སྙིགས་མ་ལས་ཀྱང་ཆེས་ཆེར་སྙིགས་པའི་དུས་མཐའ་འདིར་རང་རང་གི་ཡུལ་གྱི་རྒན་པོ་སྔ་མ་དག་གི་ཟེར་སྒྲོས་ལ་ཞེན་ཏེ་བདག་ཅག་གི་འདི་ཁོ་ན་བདེན་གྱི་གཞན་ནི་གཏི་མུག་གོ་ཞེས་ཆགས་སྡང་རླུང་དམར་འཚུབ་པས་ཕྱོགས་ཀུན་གང་སྟེ་སྐྱེ་བོ་དམ་བ་ཅི་འདྲ་ཞིག་བྱོན་ཡང་དད་པ་སྐྱེ་དཀའ་བ་ལ་ཇོ་བོ་རྗེ་དཔལ་ལྡན་ཨ་ཏི་ཤ་ལ་ནི་གྲུབ་མཐའ་དང་ཡུལ་དང་སྡེ་དགོན་རིས་སུ་མ་ཆད་པར་མཆོག་དམན་བར་མ་མཐའ་དག་གིས་མཚན་ཐོས་་པ་ཙམ་གྱིས་ཐལ་མོ་སྦྱོར་བའི་འོས་སུ་བྱེད་ཅིང༌། གསུང་གི་བདུད་རྩི་དག་ལའང་རང་གིས་ཉམས་སུ་ལེན་པར་མ་ནུས་ཀྱང་འདི་ནི་གཞན་ནོ་ཞེས་མི་སྤང་བར་སྨོན་ལམ་གྱི་ཡུལ་དུ་བྱེད་པ་འདི་བྱུང་བ་ཡིན་ནོ། །དོན་གྱི་དབང་འདི་གཟིགས་ནས་ཇོ་བསྟོད་དུ། གསེར་གླིང་རྒྱལ་པོ་ས་སྐྱོང་བླ་མ་ལས། །བྱང་ཆུབ་སེམས་ཀྱི་བདུད་རྩིའི་སྨན་བླངས་ནས། །འགྲོ་བ་ཀུན་ལ་ཕན་པར་མཛད་པ་ཡི། །དཔལ་ལྡན་ཨ་ཏི་ཤ་ལ་གསོལ་བ་འདེབས། །ཞེས་གསུངས་སོ། །དེ་ལྟར་གསེར་གླིང་པ་ཆེན་པོ་ཆོས་ཀྱི་གྲགས་པས་བསྟན་འགྲོའི་དོན་རྒྱ་ཆེར་མཛད་ནས་སྐུ་ཚེ་དེའི་དངོས་ཀྱི་གདུལ་བྱ་རྫོགས་པ་ན་སྐུའི་བཀོད་པ་བསྡུས་ཏེ་དགའ་ལྡན་ཆོས་ཀྱི་ཕོ་བྲང་དུ་གཤེགས་སོ། །དེས་ན་བྱང་ཆུབ་ལམ་གྱི་རིམ་པ་ལ་བློ་སྦྱོང་བར་འདོད་པ་རྣམས་ཀྱིས་བླ་མ་གསེར་གླིང་པ་ཆེན་པོ་ལ་གསོལ་བ་འདེབས་ཤིང་རྒྱལ་སྲས་བདག་ཉིད་ཆེན་པོ་འདིའི་རྣམ་ཐར་ལྟར་བྱང་ཆུབ་ཀྱི་སེམས་རིན་པོ་ཆེ་དགེ་སྦྱོར་གྱི་མཐིལ་དུ་བཟུང་ནས་གསུང་རབ་དགོངས་འགྲེལ་དང་བཅས་པ་ཐམས་ཅད་བྱང་ཆུབ་ཀྱི་སེམས་རིན་པོ་ཆེ་མ་སྐྱེས་པ་བསྐྱེད་པ་དང༌། སྐྱེས་ཟིན་གོང་ནས་གོང་དུ་འཕེལ་བའི་ཐབས་སུ་གོ་བར་བྱས་ལ་ལམ་གྱི་ལུས་ཡོངས་སུ་རྫོགས་པའི་ཉམས་ལེན་ལ་བརྩོན་པ་ཆིག་བསྒྲིལ་དུ་བྱའོ། ། 2/2 མདུན་ངོས། 上一页 1 2 |
|
|
|
|
|
 |
ཉེ་ལམ་གསར་བརྗེས། |
|
|
|
|
|
|
|
|
ཀློག་མཁན་མང་ཤོས། |
|
|
|
|
|
|
| |
|
