| ཐམས་ཅད་མཁྱེན་པ་རང་ཉིད་ཀྱི་གསུང་འབུམ་ཐོར་བུའི་ལུང་ཚང་མ་གསན།སླར་གཙང་ཕྱོགས་སུ་ཞབས་ཀྱི་འཁོར་ལོ་བཀོད་དེ། དགེ་འཕེལ་མཁན་པོ་ལེགས་པའི་བློ་གྲོས་པ་ལ་སྨྱུང་གནས་ཀྱི་ཆོ་གའི་ལུང༌།ཡི་དམ་གྱི་སྔགས་བཏུའི་རྗེས་གནང༌།བླ་མ་མགོན་པོ་དབྱེར་མེད་ཀྱི་རྗེས་གནང༌།སྨན་བླའི་ལུང་སོགས་ཆོས་བཀའ་ཅི་རིགས་པ་གསན་ནོ།།གཞན་ཡང༌།དེ་དག་གི་སྐབས་ཤིག་ཏུ་གསེར་སྡིངས་སུ་ཕེབས།པཎ་ཆེན་བྱང་ཆུབ་བློ་གྲོས་ལ་དཔལ་གསང་བ་འདུས་པའི་རྩ་རྒྱུད་སྒྲོན་གསལ་ཆ་ལག་དང་བཅས་པ་སོགས་འདུས་པ་འཕགས་པའི་སྐོར་གྱི་གདམས་པ་ཆ་ལག་དང་བཅས་པ་རྫོགས་པར་གསན་ནོ།།དེ་དུས་གནས་རྙིང་ཡོལ་དུ་མངའ་རིས་ལོ་ཆེན་རྣམ་རྒྱལ་བ་ལ་སྦ་བཞིའི་གདམས་པ་དང་བདེ་མཆོག་གདན་བཞི་ལ་སོགས་པ་རྒྱུད་ལ་བརྟེན་པའི་ཟབ་མོའི་གདམས་པ་མཐའ་ཡས་པ་གསན་ཅིང༌།བླ་མ་འདི་ཁ་ཆེ་ཁྲི་གདན་དུ་སློབ་དཔོན་རྡོ་རྗེ་དྲིལ་བུ་པའི་དངོས་སློབ་མཆོག་གི་དངོས་གྲུབ་བརྙེས་པ་ཞིག་དང་མཇལ་ནས་རྗེས་སུ་བཟུང་ཞིང༌།ཁྱད་པར་རྒྱལ་བ་ཙོང་ཁ་པའི་ཞལ་མངོན་དུ་གྱུར་ནས་གདམས་པ་མཐའ་ཡས་པ་ཐོབ་པའི་རྣལ་འབྱོར་གྱི་དབང་ཕྱུག་ཞིག་གོ།།གཞན་ཡང་དགོས་པ་ཁྱད་པར་ཅན་ལ་དགོངས་ནས་མཁས་པ་དང་གྲུབ་པའི་བླ་མ་དུ་མ་ཞིག་ལས་ཀྱང་ཟབ་པ་དང་རྒྱ་ཆེ་བའི་གདམས་པ་སྣ་ཚོགས་པ་གསན་པས་ལུང་གི་བསྟན་པ་མཐའ་དག་གི་བདག་པོར་གྱུར་ཏོ།།དེ་ལྟར་རྒྱལ་བ་དབེན་ས་པ་ཆེན་པོ་སྤྱིར་བསྟན་པ་ཡོངས་རྫོགས་ཀྱི་བདག་པོར་གྱུར་ཅིང༌།ཁྱད་པར་རྗེ་བཙུན་འཇམ་དབྱངས་ཀྱིས་རྒྱལ་བ་ཙོང་ཁ་པ་ཆེན་པོ་ལ་དངོས་སུ་གནང་བའི་སྙན་རྒྱུད་ཀྱི་མན་ངག་ཡོངས་སུ་རྫོགས་པའི་མངའ་བདག་གཅིག་པུར་གྱུར་པ་ནི་རང་ཉིད་ཀྱིས་ཀྱང་ཞལ་གྱིས་བཞེས་ཏེ།རྒྱལ་བ་དབེན་ས་པ་ཆེན་པོ་ཉིད་ཀྱིས་གསུང་ལས།འཇམ་པའི་དབྱངས་ཀྱི་སྲས་ཀྱི་ཐུ་བོ་མཆོག།བློ་བཟང་གྲགས་པ་ཞེས་པའི་བླ་མ་དེའི། །གསུང་གི་སྙིང་པོ་སྙན་རྒྱུད་འཛིན་པ་ནི།།དེང་སང་དུས་ན་ཁོ་བོ་ཙམ་དུ་བས།།ཞེས་གསུངས་པ་ལྟར་རོ།།མདོར་ན་དགུང་ལོ་བཅུ་བདུན་ནས་བཞི་བཅུ་ཞེ་གཉིས་ཀྱི་བར་དུ།བྲག་རྒྱ་རྡོ་རྗེའི་ཕོ་བྲང༌།དབེན་སྨར་སྟག་གཟིག་གླན་ཆེན།ཀྲོ་བྲག ཁྱད་པར་པ་སྣམ་ཇོ་མོ་ལྷ་རི་ལ་སོགས་པའི་རི་ཁྲོད་རྣམས་སུ་སྒྲུབ་པ་སྙིང་པོར་མཛད་དེ།ཆོས་རྗེ་ངག་དབང་གྲགས་པ་ལ་གནང་བའི་བཀའ་ཤོག་ཏུ།བདག་ཀྱང་ཟླ་རེ་ཟླ་གཉིས་མ་ཤི་ན།སྐྱེ་བ་འདིའི་ཕྱི་མའི་མདུན་མ་ཞིག་དང༌།ལོ་རེ་ལོ་གཉིས་མ་ཤི་ན་སྐྱེ་བ་གཏན་གྱི་མདུན་མ་ཞིག་རྐང་ཚུགས་སུ་བྱེད་དགོས་སྙམ་པའི་བསམ་པས།རང་ལོ་བཅུ་བདུན་ནས་བཟུང་ད་བར་ཐེག་པ་མཆོག་གི་བརྟུལ་ཞུགས་ལ་གནས་པའི་རྒྱ་བོད་ཀྱི་མཁས་གྲུབ་ཕལ་ཆེ་བ་རྣམས་ཀྱི་གསུང་གི་སྙིང་པོ་དོན་གྱི་གདམས་པ་ཅིག་ཉམས་སུ་ལེན་པའི་དྲན་འདུན་དང་མ་བྲལ་བ་ཡོད་ལགས་ཞེས་འབྱུང་ཞིང༌།དེ་ལྟར་སྒྲུབ་པ་ཡུན་རིང་ལ་ཤུགས་དྲག་པོས་གོ་འཕང་ཇི་ལྟ་བུ་བརྙེས་པ་ཡང༌།ཉིད་ཀྱི་གསུང་ལས། གངས་ཅན་ལྗོངས་ཀྱི་སྐལ་ལྡན་མཆོག།བློ་བཟང་དོན་གྲུབ་ཅེས་པས་ཀྱང༌།།ལམ་མཆོག་འདི་ཉིད་ཉམས་བླངས་པས།།ཚེ་འདི་ཉིད་ལ་སངས་རྒྱས་ཐོབ།།ཅེས་གསུངས་ཏེ།བསམ་གྱིས་མི་ཁྱབ་པའི་རྣམ་ཐར་རོ།།དེ་ནས་སྐུ་ཚེ་ཇི་སྲིད་བར་སྐྱེ་བོ་ཕལ་མོ་ཆེས་མཐོང་བ་དང་ཐོས་པའི་ཡུལ་ལས་འདས་པ་དབེན་པ་ནས་དབེན་པའི་གནས་ཆེན་དག་ཏུ་རྒྱུ་ཞིང་གནས་པར་བྱའོ་སྙམ་དུ་དགོངས་པ་ལས།དུས་རེ་ཞིག་གི་ཚེ་དབེན་པར་ཐུགས་དམ་ལ་མཉམ་པར་བཞག་པའི་ཐོ་རངས་ཤིག་ཟིལ་དང་འུར་ཆོམ་ཤིན་ཏུ་ཆེ་བའི་ངང་ནས་སྐུ་རྒྱབ་ཀྱི་མགོན་པོའི་བྲིས་སྐུ་དེས་གསུངས་སྙམ་པ་ལ།ཉི་ཤུ་རྩ་བཞིའི་མཁའ་འགྲོའི་གཙོ།།དཔའ་བོ་ཆེན་པོ་འདིར་བཞུགས་ལ།། ཆུ་སྐྱེས་ཁོང་པའི་པད་དཀར་བཞིན།།སྦས་པའི་ཚུལ་གྱིས་བྱིན་གྱིས་རློབས།།ཟེར་བ་ཞིག་བྱུང་གསུངས།དེ་ལྟ་བུའི་མགོན་པོའི་བྲིས་སྐུ་བྱིན་རླབས་ཅན་དེ་ཡང་དབེན་དགོན་གྱི་མགོན་ཁང་ན་བཞུགས་སོ།།དེ་ལྟར་ལྷ་དང་བླ་མས་ལུང་བསྟན་པ་ལ་བརྟེན་ནས་དབུས་རིའི་རྩེར་དབེན་དགོན་བཏབ་ནས།མདོ་ཁམས།མངའ་རིས།དབུས་གཙང་སོ་སོ་ནས་དད་འདུས་ཀྱི་སྐལ་བ་དང་ལྡན་པའི་གདུལ་བྱའི་ཚོགས་རྣམས་ལ་ཟབ་པ་དང་རྒྱ་ཆེ་བའི་ཆོས་ཀྱི་འཁོར་ལོ་བསྐོར་བར་མཛད་དོ།།དེའི་ཚེ་ཡང་གདུལ་བྱའི་ཚོགས་རྣམས་ཀྱིས་དད་པས་ཀུན་ནས་བསླངས་པའི་མཆོད་པ་དང་ཟང་ཟིང་གི་བསྙེན་བཀུར་གྱི་ཚོགས་རྒྱང་རིང་བོ་དག་ནས་ཀྱང་དམ་པ་འདིའི་དྲུང་དུ་ཉེ་བར་ལྷགས་ཤིང་སྤྱན་ལམ་དུ་བབས་པ་དག་ཀྱང་བདག་གིར་ཡོངས་སུ་བཟུང་བ་གཅིག་ཀྱང་མ་མཛད་པར་གྲགས་ཏེ།ཉིད་ཀྱི་གསུང་ལས།སྔོན་དུས་ཀྱི་མི་ལ་རས་པ་དང༌།།ད་དུས་ཀྱི་བློ་བཟང་དོན་གྲུབ་ལ།།འཕྲལ་ཆས་ཀྱི་ཟས་གོས་མ་གཏོགས་པ།།ནོར་དངོས་པོའི་འཛིན་པས་དགོས་པ་མེད།།ཚེ་གཅིག་ལ་སངས་རྒྱས་བསྒྲུབ་པ་ལ།།དེ་འདྲ་ཡི་སྤྱོད་ལ་ལེགས་གནས་ནས།།ཆགས་སྡང་སྤངས་པའི་དབེན་གནས་སུ།།དལ་འབྱོར་ལ་སྙིང་པོ་ལེན་པར་ཤོག།ཅེས་གསུངས་པ་ལྟར་རོ།།དེ་ལྟར་རྒྱལ་བ་དབེན་ས་པ་ཆེན་པོས་རྣལ་འབྱོར་གྱི་དབང་ཕྱུག་མི་ལ་རས་པ་སླར་ཡང་འཇམ་མགོན་བླ་མའི་བསྟན་པ་སྤེལ་བའི་ཕྱིར་སྐྲ་བཅད་ངུར་སྨྲིག་གི་ན་བཟའ་གསོལ་བ་སོགས་རབ་ཏུ་བྱུང་བའི་རྟགས་ཆ་ལུགས་བཟུང་སྟེ་བྱོན་པ་ཇི་ལྟ་བར་ཆོས་བརྒྱད་ཚེ་འདིའི་འཁྲི་བ་ཕྲ་མོ་ཙམ་ཡང་མེད་པར།གསང་བ་འདུས་པའི་རྩ་རྒྱུད་ལས།དགོན་པ་ཆེན་པོའི་ས་ཕྱོགས་སུ།།མེ་ཏོག་འབྲས་བུ་སོགས་ཀྱིས་བརྒྱན།།རི་བོ་དབེན་པའི་ས་ཕྱོགས་སུ།།དངོས་གྲུབ་ཐམས་ཅད་བསྡུས་པ་བསྒྲུབ།།ཅེས་གསུངས་པ་ལྟར།སྔོན་བྱོན་དམ་པའི་བསྟི་གནས་འདུ་འཛིས་དབེན་པའི་གྲུབ་པའི་གནས་མཆོག་དག་ཏུ་མདོ་སྔགས་གཉིས་ཀའི་ལམ་གྱི་ལུས་ཡོངས་སུ་རྫོགས་པ་ལ་སྒྲུབ་པ་མཐར་ཕྱིན་པར་མཛད་དེ།ལམ་ཐུན་མོང་བའི་ངེས་འབྱུང༌།བྱང་ཆུབ་ཀྱི་སེམས། ཡང་དག་པའི་ལྟ་བ་རྣམས་ལ་མྱོང་བ་མཐར་ཕྱིན་ཏེ་རྒྱལ་སྲས་ཀྱི་སྤྱོད་པ་རྒྱ་མཚོའི་ཕ་རོལ་ཏུ་སོན། སྔགས་ཀྱི་དམ་ཚིག་དང་སྡོམ་པ་རྣམ་པར་དག་པ་བསྲུངས་ཏེ་ལམ་རིམ་གཉིས་ལ་བསླབས་པས་རིམ་པ་དང་པོའི་རྣལ་འབྱོར་མཐར་ཕྱིན་ཏེ་གང་ཤར་ལྷའི་རྣམ་རོལ་ཏུ་འཆར་ཞིང༌།ཟབ་གསལ་གཉིས་མེད་ཀྱི་རྣལ་འབྱོར་མཐར་ཕྱིན་ཏེ་རང་དང་གཞན་གྱི་ཚེ་རབས་བརྒྱ་སྟོང་དྲན་ཏེ། རང་གི་སྐུ་ཚེ་སྔ་མའི་འཁྲུངས་རབས་དག་པའི་འཁོར་ལ་གསུངས་པ་ནི།གང་གིས་ཁྱོད་ཀྱི་མཚན་ཙམ་དྲན་པས་ཀྱང༌།།འདི་ཕྱིའི་ལེགས་ཚོགས་ཐམས་ཅད་ཅིག་ཅར་དུ།།སྟེར་མཛད་བླ་མ་ཐུབ་པའི་དབང་པོ་ལ།།རྟག་ཏུ་གུས་པའི་ཡིད་ཀྱིས་ཕྱག་འཚལ་ལོ།།བདག་ཅག་ཐར་ལམ་བགྲོད་པའི་གཙོར་གྱུར་པ།།ཐེག་ཆེན་བསྟན་པ་འཛིན་པའི་ཉན་ཐོས་སུ།།ལེགས་གྱུར་ཐུབ་པ་ཆེན་པོའི་ཉན་ཐོས་ཀྱི།།རྟོགས་པའི་མཆོག་ཏུ་གྱུར་པ་ཡིན་སྙམ་ཡོད།།དེ་ནས་ད་བར་བྱང་ཆུབ་སྤྱོད་པ་ཡི།།དལ་འབྱོར་རྟེན་བཟང་ལེགས་པར་ཐོབ་གྱུར་ནས།།ངན་སོང་གསུམ་སོགས་སྡུག་བསྔལ་རབ་སྤངས་ནས།།ལྟ་སྤྱོད་ལྡན་པའི་དལ་འབྱོར་ཐོབ་བམ་སྙམ།།བདག་གི་ལུས་ངག་ཡིད་གསུམ་འདི་དག་ནི།།རྒྱལ་བ་ཐམས་ཅད་འདུས་པའི་སྐུ་ཡི་མཆོག།ཐུབ་དབང་རྡོ་རྗེ་འཆང་དུ་ལེགས་མཐོང་ནས།།དད་པའི་སྤུ་ལོང་ལེགས་པར་གཡོས་གྱུར་ཅིང༌།།ཉིན་མཚན་ཀུན་ཏུ་གསོལབ་འདེབས་པ་དང༌།།ཤུགས་དྲག་དད་པས་ཡན་ལག་བདུན་པར་ནི།།ཇི་སྲིད་བྱང་ཆུབ་བར་དུ་བརྩོན་པར་ཤོག།འདི་ཡི་དགེ་བས་བདག་གཞན་འགྲོ་བ་ཀུན།། འོག་མིན་མཁའ་སྤྱོད་དགའ་ལྡན་བདེ་བ་ཅན།།མངོན་དགའ་ལ་སོགས་དག་པའི་ཞིང་ཁམས་སུ།།མྱུར་བ་མྱུར་བར་ལེགས་པར་སྐྱེ་བར་ཤོག།བདག་ལ་ལེགས་པར་དད་པའི་སྐྱེས་བུ་རྣམས།།ཚེ་ཡི་མཐར་ཡང་རྒྱལ་བ་འོད་དཔག་མེད།།འཁོར་དང་བཅས་པ་མཐོང་ནས་དེ་མ་ཐག།བུ་བུ་བདེ་བ་ཅན་དུ་འགྲོའོ་ཞེས།།མཐར་ཐུག་གསུང་གི་གནང་བ་ཐོབ་པར་ཤོག།སངས་རྒྱས་ཀུན་གྱིས་གསུངས་པའི་ཐེག་པ་མཆོག།ཧེ་རུ་ཀ་པ་ལ་སོགས་ཡི་དམ་ལྷའི།།རིམ་གཉིས་ཆ་ལག་བཅས་པའི་རྟོགས་པ་རྣམས།།ཚེ་འདི་ཉིད་ལ་མངོན་དུ་རབ་གྱུར་ནས།། འགྲོ་ཀུན་བདེ་ཆེན་གནས་ལ་འགོད་པར་ཤོག།ཐུབ་དབང་རྡོ་རྗེ་འཆང་དང་ཙོང་ཁ་པ།།ཡིད་ལ་གང་འདོད་དངོས་གྲུབ་མ་ལུས་པ།།སྩོལ་མཛད་རྩ་བརྒྱུད་བླ་མའི་ཚོགས་རྣམས་དང༌།།ཕྱག་དྲུག་མགོན་པོ་ལ་སོགས་བསྟན་སྲུངས་ཀྱིས།།འདི་ཕྱིའི་ལེགས་ཚོགས་ཐམས་ཅད་ཅིག་ཅར་དུ།། ལེགས་པར་འགྲུབ་པར་བྱེད་པའི་བཀྲ་ཤིས་ཤོག།ཅེས་གསལ་བར་གསུངས།རྫུ་འཕྲུལ་ལ་མངའ་བརྙེས་ཏེ་ས་རྡོ་རི་བྲག་ལ་ཐོགས་པ་མེད་པ་དང་ནམ་མཁའ་ལ་འཕུར་བ་སོགས་ཀྱི་རྫུ་འཕྲུལ་བསྟན་པ་འགའ་ཞིག་ནི་སྔར་བརྗོད་ཟིན་པ་ལྟར་རོ།།བདེ་གསང་འཇིགས་གསུམ་གྱི་རྫོགས་རིམ་དང༌། བླ་མེད་ཀྱི་རྫོགས་རིམམཐའ་དག་གི་གནད་བསྡུས་པ་ནཱ་རོ་ཆོས་དྲུག་གི་ཉམས་ལེན་མཐར་ཕྱིན་ཏེ་འཁོར་ལོ་གསུམ་གྱི་རྩ་མདུད་གྲོལ་ནས་རྒྱལ་བའི་བཀའ་རྣམས་སཾ་སྐྲྀ་ཏའི་སྐད་དུ་འདོན་པ་སོགས་ལ་ཐོགས་པ་མེད་པ་སྔར་བརྗོད་ཟིན་པ་ལྟར་དང༌།གཙོ་བོར་སེམས་དབེན་དང་སྒྱུ་ལུས་འོད་གསལ་གྱི་རིམ་པ་རྣམས་མཐར་སོན་ཏེ་ཟུང་འཇུག་གི་གོ་འཕང་བརྙེས་པ་ནི་འཇམ་མགོན་སྙན་རྒྱུད་འཛིན་པའི་སྐྱེས་བུ་དམ་པ་གོང་མ་རྣམས་ལ་ཡོངས་སུ་གྲགས་ཏེ།སྐུ་གསུམ་གོ་འཕང་མངོན་གྱུར་དབེན་ས་པ།།ཞེས་འཇམ་མགོན་བསྟན་པ་འཛིན་པའི་སྐྱེས་བུ་དམ་པ་ཐམས་ཅད་མཐུན་པར་སྒྲོགས་པ་ལྟར་རོ།།དེ་ལྟར་རང་གིས་རྟོགས་པ་མཆོག་བརྙེས་ནས་སྐལ་བ་དང་ལྡན་པ་མཐའ་ཡས་པ་ལ་ཆོས་ཀྱི་བདུད་རྩི་སྩལ་བས་ན་རྒྱུད་འཛིན་གྱི་སློབ་མ་ཡང་མཐའ་ཡས་པས་མཐའ་དག་པར་སུ་ཞིག་གིས་བརྗོད་པར་ནུས།གཙོ་བོ་འགའ་ཞིག་བརྗོད་ན་ཡེ་ཤེས་མཁའ་འགྲོས་ལུང་བསྟན་པའི་སྐྱེ་བ་བདུན་པ་གྲུབ་པའི་སྐྱེས་བུ་ཀུན་མཁྱེན་ལེགས་པ་དོན་གྲུབ་ལའང་རྣལ་འབྱོར་བླ་མེད་ཀྱི་ཁྲིད་ལག་རྗེས་ཐུན་མོང་མ་ཡིན་པའི་གདམས་པ་མ་ལུས་པ་སྩལ།བྱང་སྟོན་སྨྲ་བའི་དབང་པོ་བསམ་གཏན་འོད་ཟེར།ཀུན་མཁྱེན་ཤེས་རབ་དཔལ་བའི་གདན་ས་པ་མདོ་བརྗོད་རྗེ་བློ་གྲོས་རྣམ་རྒྱལ་བ།ཆོས་རྗེ་དགེ་ལེགས་རྣམ་རྒྱལ་བ། ཞལ་སྔ་ནས་སངས་རྒྱས་རྒྱལ་མཚན་པ།ཆོས་རྗེ་ངག་དབང་གྲགས་པ་སྐུ་མཆེད།ཀོང་སྟོན་ཆོས་རྗེ་འཇམ་དབྱངས་རྒྱལ་པོ།ཐོན་པ་ཞལ་སྔ་ནས་བཀྲ་ཤིས་རྒྱལ་མཚན།ཆོས་རྗེ་ལྷོ་པ་བློ་གྲོས་རྣམ་རྒྱལ།བསམ་གཏན་པ་ཆེན་པོ་རྗེ་དབོན་ལེགས་ཚོགས་ལྷུན་གྲུབ། མཁན་ཆེན་ནོར་བཟང་རྒྱ་མཚོ།རྒྱུད་སྡེ་འཛིན་པ་ཞལ་སྔ་ནས་རྣམ་རྒྱལ་དཔལ་བཟང༌།པཎ་ཆེན་བསམ་གྲུབ་དཔལ་བཟང༌།བསྟན་པའི་མངའ་བདག་པཎ་ཆེན་དམ་ཆོས་ཡར་འཕེལ།འཇམ་དབྱངས་བླ་མ་དགེ་འདུན་བློ་བཟང༌།འཇམ་དབྱངས་ཤཱནྟི་པ་ཆེན་པོ།རྗེ་བློ་བཟང་རྒྱ་མཚོ།མངའ་རིས་སློབ་དཔོན་དགེ་འདུན་རྒྱལ་མཚན།ཐོས་བསམ་གླིང་པ་རིན་ཆེན་དཔལ་འབྱོར་རྒྱ་མཚོ།གངས་ཅན་མཁན་པོ་པཎ་ཆེན་རིགས་པ་སེང་གེ་ལ་སོགས་པ་བསྟན་འཛིན་བགྲང་བ་ལས་འདས་པ་བྱོན་ཞིང༌།མདོར་ན་དབུས་གཙང་གི་སྡེ་སྣོད་འཛིན་པ་དང༌།རིས་མེད་པའི་བན་སྐྱའི་ཚོགས་མཐའ་ཡས་བ་ལ་ཟབ་པ་དང་རྒྱ་ཆེ་བའི་དམ་པའི་ཆོས་ཀྱི་བཀའ་དྲིན་གྱིས་ཁྱབ་པར་མཛད་དོ།།སྙན་རྒྱུད་བསྟན་པའི་བདག་པོ་རང་གི་སྲས་ཀྱི་ཐུ་བོ་རྒྱལ་ཚབ་ཏུ་དབང་བསྐུར་བ་ནི་མཁས་གྲུབ་ཆེན་པོ་སངས་རྒྱས་ཡེ་ཤེས་སོ།རྒྱལ་བ་དབེན་ས་པ་ཆེན་པོ་འདིས་ཕྱི་རབས་ཀྱི་གདུལ་བྱ་རྣམས་ཀྱི་དོན་དུ་བྱང་ཆུབ་ལམ་གྱི་རིམ་པའི་ཁྲིད་ཡིག་དངོས་གྲུབ་ཀུན་འབྱུང༌།བླ་མ་ལ་གསོལ་བ་འདེབས་པའི་རིམ་པར་ཕྱེ་བ་དངོས་གྲུབ་ཀུན་འབྱུང༌། སྙིང་པོའི་གནད་ཐོར་བུའི་རིམ་པར་ཕྱེ་བ་དངོས་གྲུབ་ཀུན་འབྱུང༌།བྱང་ཆུབ་ལམ་གྱི་རིམ་པའི་སྙིང་པོ་གསོལ་འདེབས་ཚིགས་བཅད་དུ་སྡེབས་པ་དངོས་གྲུབ་ཀུན་འབྱུང༌།རང་ལ་གདམས་པ་བདེ་ཆེན་གཏེར་མཛོད་སོགས་ཐོར་བུའི་སྐོར། རྗེ་རང་ཉིད་ཐུགས་བསྐྱེད་ཚུལ་དང༌། 8/10 མདུན་ངོས། 上一页 6 7 8 9 10 下一页 尾页 |
