| དེ་རྣམས་ཀྱི་ཁྲོད་ནས་ནོར་བུ་གླིང་པའི་སློབ་དཔོན་ན་རེ།དེ་འདྲ་མ་གསུང་ཁོང་སྐྱེས་བུ་ངོ་མཚར་ཆེ་བ་ཞིག་སྣང་ཟེར་ཁོང་རང་གི་དཀར་ཡོལ་བཀྲུས་ནས་ཇའི་སྐལ་བ་དྲངས། དེར་རྒྱལ་བ་དབེན་ས་པ་ཆེན་པོ་ཉིད་གདུལ་བྱ་མ་རུངས་པ་དེ་དག་སྐྲག་པར་བྱ་བའི་ཕྱིར་སྟོད་ནས་མེ་འབར་བ་དང༌།སྨད་ནས་ཆུ་འཁྲུག་པ་སོགས་རྫུ་འཕྲུལ་ཡ་མ་ཟུང་སྟོན་པ་དང༌།ཁྲོ་བོའི་དབང་པོའི་སྐུར་བཞེངས་ཏེ་འདོད་ན་རི་རབ་ཀྱང་ཐལ་བར་རློག་པ་སོགས་མཐུ་སྟོབས་དང་རྫུ་འཕྲུལ་དཔག་མེད་སྟོན་ནུས་མོད་ཀྱང་གདུལ་བྱ་མ་རུངས་པ་དེ་དག་ཉོན་མོངས་པའི་གདོན་དྲག་པོས་ཟིན་པས་རེ་ཤིག་བཅོས་ཐབས་མེད་དེ།ཁོ་བོས་ཇི་འདྲ་བའི་རྫུ་འཕྲུལ་མངོན་པར་འདུ་བྱས་ཀྱང་གདོན་དྲག་པོས་བརླམས་པའི་ནད་པ་ལ་སྨན་གྱི་རིགས་གང་ཡང་མི་འཕྲོད་པ་ལྟར་སྐལ་བ་མེད་པའི་སྐྱེ་བོ་འདི་དག་ལ་དོན་དུ་མི་འགྱུར་བར་མ་ཟད།ལོག་པར་རྟོག་པ་འཕེལ་བར་འགྱུར་རོ་སྙམ་དུ་དགོངས་ནས་གཙང་ལ་ཕེབས་སོ།།དེའི་ཚེ་གྲུབ་ཆེན་ཆོས་རྡོ་ཇེའི་འཁོར་དུ་གྲུབ་པ་ཐོབ་པའི་སློབ་མ་བཅུ་ཙམ་ཡོད་པའི་ནང་ནས།རྗེ་འདི་ཉིད་སྲས་ཀྱི་ཐུ་བོར་དགོངས་སྙན་རྒྱུད་ཀྱི་བེའུ་བུམ་དང༌།སྤྲུལ་པའི་གླེགས་བམ་ཕྱག་ཏུ་གཏད་དེ་ལྷ་དང་བླ་མའི་ཚོགས་ཀྱིས་ལྷན་ཅིག་ཏུ་ཆོས་ཀྱི་རྒྱལ་ཚབ་ཏུ་དབང་བསྐུར་ཏོ།།དེ་ལྟར་རྒྱལ་བ་དབེན་ས་པ་ཆེན་པོ་ལ་གྲུབ་ཆེན་ཆོས་རྡོ་རྗེས་འཇམ་མགོན་བླ་མའི་མདོ་སྔགས་ཀྱི་སྙན་རྒྱུད་མན་ངག་ཡོངས་རྫོགས་གནང་བའི་མཐར་སྤྲུལ་པའི་གླེགས་བམ་ཕྱག་ཏུ་གཏད་དེ་སྙན་རྒྱུད་བསྟན་པའི་བདག་པོར་མངའ་གསོལ་བའི་ཚུལ་ལས་བརྩམས་ཏེ།མཁས་གྲུབ་སངས་རྒྱས་ཡེ་ཤེས་ཀྱིས་བསྟོད་པ་མཛད་པ་ནི།གྲུབ་པའི་དབང་པོས་རང་གི་འཁོར་རྣམས་ལ།།སྒྲིབ་མེད་ཡེ་ཤེས་སྤྱན་གྱིས་བརྟགས་པ་ན།།ཁྱོད་ལས་མཆོག་གཞན་མ་གཟིགས་དབེན་ས་པ།།བློ་བཟང་དོན་གྲུབ་ཞབས་ལ་གསོལ་བ་འདེབས།།ཞེས་དང༌།དེ་ནས་རང་གི་ཆོས་ཀྱི་རྒྱལ་ཚབ་ཏུ།།དབང་བསྐུར་སྤྲུལ་པའི་གླེགས་བམ་ཕྱག་ཏུ་བཞག།ཆོས་ཀྱི་རྒྱལ་སྲིད་ཡོངས་གཏད་དབེན་ས་པ།།བློ་བཟང་དོན་གྲུབ་ཞབས་ལ་གསོལ་བ་འདེབས།ཞེས་དང༌།དེ་ཚེ་བླ་མ་ལྷ་དང་སྲུང་མའི་ཚོགས།།དགོངས་གཅིག་ཉིད་ཀྱིས་ལེགས་པར་མངའ་གསོལ་བ།།ཁམས་གསུམ་ཆོས་ཀྱི་རྒྱལ་པོ་དབེན་ས་པ།།བློ་བཟང་དོན་གྲུབ་ཞབས་ལ་གསོལ་བ་འདེབས།།ཞེས་གསུངས་སོ།།དེ་ནས་རྒྱལ་བ་དབེན་ས་པ་ཆེན་པོས་གྲུབ་པའི་གནས་མཆོག་པདྨ་ཅན་ཞེས་ཀྱང་བྱ་པདྨ་འོད་ཀྱི་གཞལ་ཡས་ཞེས་ཀྱང་བྱ་བའི་གནས་དེར་དག་པའི་འཁོར་གྱི་ཚོགས་ལ་ཆོས་ཀྱི་འཁོར་ལོ་དང་པོར་བསྐོར་ཞིང༌།གཞན་ཡང༌།གྲུབ་པའི་གནས་དུ་མར་སྐྱེ་བོ་ཕལ་མོ་ཆེ་ལ་ལྐོག་ཏུ་གྱུར་པའི་ཚུལ་གྱིས་སྐལ་བ་དང་ལྡན་པ་རྣམས་ལ་ཆོས་ཀྱི་འཁོར་ལོ་དུ་མ་བསྐོར་བས།གྲུབ་པའི་གདུང་འཚོབ་བརྙེས་པའི་སྐྱེ་བོས་གངས་ཁྲོད་ཀྱི་དབེན་པ་མཐའ་དག་ཁྱབ་པར་རྗེ་ཉིད་ཀྱི་གསུང་ལས་དོན་གྱིས་འབྱུང་ངོ༌།།རྒྱལ་བ་དབེན་ས་པ་ཆེན་པོས་གྲུབ་པའི་གནས་མཆོག་ཏུ་དག་པའི་འཁོར་འགའ་ཞིག་ལ་ཆོས་གྱི་འཁོར་ལོ་ཐོག་མར་བསྐོར་བའི་ཚུལ་ལ་མཁས་གྲུབ་སངས་རྒྱས་ཡེ་ཤེས་ཀྱིས་བསྟོད་པ་མཛད་པ་ནི།པདྨ་ཅན་དང་དེ་བཞིན་གྲུབ་པའི་གནས།།རྣམས་སུ་ཟབ་རྒྱས་ཆོས་ཀྱི་ཆར་ཕབ་ནས།།ཀུན་ཏུ་གྲུབ་པས་ཁྱབ་མཛད་དབེན་ས་པ།།བློ་བཟང་དོན་གྲུབ་ཞབས་ལ་གསོལ་བ་འདེབས།།ཞེས་གསུངས་སོ།།དེ་དང་དེའི་སྐབས་རྣམས་སུ་ཡང་གང་དང་གང་དུ་ཞབས་ཀྱི་འཁོར་ལོ་བཀོད་པའི་ས་ཕྱོགས་དང༌།དབེན་པའི་གནས་དེ་དང་དེ་དག་གི་མི་བསྲུན་པའི་གཞི་བདག་རྣམས་དམ་ལ་བཏགས་ཏེ།སྲོག་གི་སྙིང་པོ་བཞེས་ནས་སླན་ཆད་དགེ་བའི་བར་ཆད་མི་བགྱིད་པའི་བཀའ་ཡང་དག་པར་སྩལ།དེ་ཡང་པདྨ་ཅན་དུ་ཕེབས་པའི་ལམ་ཁར་སྡིག་པ་ར་ཅན་ལུག་ཐོང་ཙམ་ཞིག་བདག་ཉིད་ཆེན་པོ་ལ་འཇིགས་པ་སྟོན་པ་ལྟར་བྱེད་པ་ན།བདག་ཉིད་ཆེན་པོས་ཇི་མི་སྙམ་པར་ཏིང་ངེ་འཛིན་གྱིས་ཕྱག་རྒྱས་བཅིངས་ཏེ་ཕེབས་པས་ཆོ་འཕྲུལ་རང་ཞིར་སོང༌།ཕྱིས་ནི་གཞི་བདག་དེས་ཚུལ་བཞིན་འཕྲིན་ལས་བསྒྲུབས་ཏེ།རྗེ་འདི་པ་འཚོ་བའི་ཆ་རྐྱེན་གྱིས་གཏུགས་ནས་གནས་དེ་ལས་འབྱོན་པར་བཞེད་པ་ན་རྣ་རོ་སོགས་འཚོ་བའི་ཡོ་བྱད་སྒྲུབ་ཁང་གི་ཉེ་ལོགས་སུ་ཡང་ཡང་འཇོག་པར་བྱེད།དེའི་ཚུལ་རིག་སྟེ་གནས་འདིར་རྒྱུན་རིང་ན་དགེ་སྦྱོར་འཕེལ་ཡང་སེམས་ཅན་ལ་གནོད་པར་དགོངས་ནས་ཕེབས། ཕྱིས་དབེན་སར་བཞུགས་པའི་ཚེ་ཡང༌།ཇོ་མོའི་གཞི་བདག་དེས་གསའི་རྣམ་པར་ཀུན་གྱིས་མཐོང་བར་བྱས་ཏེ་རྗེ་ཉིད་མཇལ་བ་ལ་བྱུང་གསུང་ངོ༌།།ཚུལ་དེ་ལ་མཁས་གྲུབ་སངས་རྒྱས་ཡེ་ཤེས་ཀྱིས་བསྟོད་པ་མཛད་པ་ནི།སྐུ་གསུང་ཐུགས་ཀྱི་རྣམ་པ་སྣ་ཚོགས་པས།།ཞིང་སྐྱོང་གཞི་བདག་ཚོགས་རྣམས་དམ་ལ་བཞག།འགྲོ་ལ་ཕན་བདེ་རྒྱས་མཛད་དབེན་ས་པ།།བློ་བཟང་དོན་གྲུབ་ཞབས་ལ་གསོལ་བ་འདེབས། །ཞེས་གསུངས་སོ།།དེ་ནས་རྒྱལ་བ་དབེན་ས་པ་ཆེན་པོས་རི་བོ་དགེ་འཕེལ་དུ་ཐོག་ཤས་བཞུགས།དེའི་དུས་སུ་གང་ཤར་བདེ་སྟོང་དུ་ཤར་བའི་རིག་པ་བརྟུལ་ཞུགས་ཀྱི་སྤྱོད་པས་དུས་འདའ་བར་མཛད་པས། བློ་མིག་ལྡོངས་པའི་སྐྱེ་བོ་ཕལ་མོ་ཆེས་དབེན་ས་སྨྱོན་པ་ཞེས་ཀྱང་སྒྲོག་པར་བྱེད་པ་ཞིག་བྱུང་ངོ༌།།ཚུལ་འདི་ནི་རྒྱལ་བ་དབེན་ས་པ་ཆེན་པོ་ཉིད་ཀྱི་གསུང་ལས་ཀྱང༌།བླ་མ་ལྷ་ལ་རྩེ་གཅིག་གསོལ་བཏབ་པས།།ཡིད་ལ་གང་དྲན་འཕྲལ་ལ་ལག་ལེན་ལ།།འགེལ་བ་སྨྱོན་པ་འདྲ་བའི་སྤྱོད་པས་ནི།།སངས་རྒྱས་མྱུར་དུ་སྒྲུབ་ལ་བདག་གི་ལུགས།།ཞེས་དང༌།དེ་ཡང་འདི་ལྟར།བླ་མ་དང་ལྷག་པའི་ལྷ་ལ་གསོལ་བ་རྩེ་གཅིག་ཏུ་བཏབ་ནས།དགེ་བའི་རྣམ་རྟོག་རྣམས་ལྟ་ཅི་སྨོས།ཡིད་ལ་སྐྱེས་ཤིང་གང་དྲན་པའི་འདོད་ཆགས་སོགས་མི་དགེ་བའི་རྣམ་རྟོག་རྣམས་ཀྱང་བླ་ན་མེད་པའི་བྱང་ཆུབ་ཐོབ་པའི་རྒྱུ་དང་ཐབས་སུ་བསྒྱུར་ནས་འཕྲལ་ལ་དྲན་པ་འཕྲལ་ལ་ལག་ལེན་ལ་འགེལ་བའི་ཉམས་ལེན་ལ་བརྩོན་པར་བྱས་པས།དེང་སང་གི་མི་ཕལ་ཆེ་བ་རྣམས་ཀྱིས་བལྟ་པ་དང་ཉན་པའི་ངོར་ཡིད་ལ་གང་དྲན་ལག་ལེན་ལ་འགེལ་བའི་སྨྱོན་པ་འདྲ་བའི་སྤྱོད་པ་ཞིག་ནི་ཡོང་བར་འདུག་ནའང༌།འགྲོ་བའི་དོན་དུ་གོ་འཕང་མཆོག་དམ་པ་སངས་རྒྱས་མྱུར་བ་ཉིད་དུ་སྒྲུབ་པར་བྱེད་པའི་ཆོས་ལུགས་མཆོག་དམ་པ་འདི་ནི་བདག་བློ་བཟང་དོན་གྲུབ་ཀྱི་ལུགས་སོ།།ཞེས་དང༌།བླ་མ་ལྷ་ལ་རྩེ་གཅིག་གསོལ་བཏབ་ནས།།གང་བྱུང་རྐྱེན་རྣམས་ཕལ་ཆེར་དགེ་སྦྱོར་གྱི།།གྲོགས་སུ་འཆར་ཕྱིར་སྨྱོན་སྤྱོད་ལ་གནས་ནས།།དབེན་པར་གཅིག་པུར་སྡོད་པ་ཁོ་བོའི་ལུགས།།ཞེས་གསུངས་པ་ལྟར། རྐྱེན་བཟང་ངན་གང་བྱུང་ལ་ཐོག་བརྫིས་སུ་བྱས་ནས་འགོ་གནོན་པར་མཛད་དེ་བཀའ་ལས།ཡང་ན་ནི་ཆོས་བརྒྱད་འདི་འགོ་གནོན་ནུས་པ་ཅིག་དགོས་པར་འདུག ཡང་ན་ནི་ཆོས་བརྒྱད་འདི་ལམ་དུ་འཁྱེར་ནུས་པ་ཅིག་དགོས་པར་འདུགདེ་ལ་ཡང་མ་ནོར་བར་འཁྲིད་པའི་བཤེས་གཉེན་ཞིག་གིས་ཟིན་དགོས་པར་འདུག་གསུང༌།དེ་དག་གི་ཚེ་རྒྱལ་བ་དབེན་ས་པ་ཆེན་པོ་ཉིད་བླ་མ་ལྷའི་རྣལ་འབྱོར་ལམ་གྱི་སྲོག་ཤིང་དུ་བྱས་ཏེ་མདོ་སྔགས་ཀྱི་གནད་ཐམས་ཅད་བསྡུས་པའི་ལམ་གྱི་སྙིང་པོ་ཐུགས་ཉམས་སུ་བསྟར་བར་མཛད་པར་སྣང་སྟེ་གསུང་ལས།འཇམ་དབྱངས་བླ་མའི་ཞབས་ལ་ཕྱག་འཚལ་ལོ།།དེ་ལྟ་ན། ལམ་ཐུན་མོང་བ་ལ་སྦྱངས་ནས་རྒྱུད་འོས་སུ་གྱུར་པ་ན་བླ་མ་མཉེས་པར་བྱས་ནས་རྣམ་པར་དག་པའི་དབང་ལམ་ཟབ་མོའི་རྟེན་དུ་བསྒྲུབ་པར་ནུས་ངོས་ཤེས་པ་བླངས་ནས་དམ་ཚིག་དང་སྡོམ་པ་བཟུང༌།དེ་ནས།སྐབས་དེ་དང་གཞན་དུ་བླངས་པའི་སྡོམ་པ་གསུམ་ལ་གཅེས་སྤྲས་སུ་བྱས་ཏེ་ཚུལ་བཞིན་དུ་བསྲུང་བ་གཞིར་བཞག་ནས་ཐུན་བཞིའི་རྣལ་འབྱོར་གྱིས་རིམ་པ་དང་པོ་བསྒོམས་ལ་རྫོགས་རིམ་གྱི་རྟོགས་པ་ཁྱད་པར་ཅན་སྐྱེ་བའི་དགེ་བའི་རྩ་བ་སྨིན་པར་བྱས།དེ་ནས་རྫོགས་པའི་རིམ་པ་ཁྱད་པར་ཅན་རིམ་གྱིས་བསྐྱེད་ནས་ཟུང་འཇུག་གི་སྐུ་བསྒྲུབས་ན་མདོ་སྡེ་དང་རྒྱུད་སྡེ་མཐའ་དག་གི་གནད་རྣམས་གང་ཟག་གཅིག་འཚང་རྒྱ་བའི་ཆ་རྐྱེན་དུ་གྱུར་པ་ལ་ངེས་པ་རྙེད་ནས། ཐུབ་པའི་བསྟན་པ་ཡོངས་སུ་རྫོགས་པ་རང་གིས་འཛིན་ཅིང་གཞན་ལ་སྤེལ་ནུས་པ་ཡིན་ནོ།།ངྷརྨ་བཛྲ་གྱི་གསུང་རྒྱུན་བློ་བཟང་གིས་ཡི་གེར་བཀོད་པའོ།།ཞེས་གསུངས་ཏེ།གཞན་དག་ལ་འདི་ལྟར་གྱིས་ཤིག་ཅེས་གོ་བར་མཛད་པའོ།།ཡང་དེའི་ཚེ་ཕྱི་རབས་ཀྱི་གདུལ་བྱ་རྣམས་ལ་འདོམས་པའི་ཕྱིར་དགེ་སྦྱོར་རྐྱེན་དབང་དུ་མི་གཏོང་བར་ཕྱོགས་བཅུའི་རྒྱལ་བ་སྲས་བཅས་དཔང་དུ་བཞག་སྟེ་མཁྱེན་པར་གསོལ་ནས་ལམ་ཆ་ཚང་ལ་སྒྲུབ་པ་མཐར་ཕྱིན་པར་མཛད་པའི་དམ་བཅའ་འདི་ལྟར་མཛད་དེ།ན་མོ་གུ་རུ་བུངྔྷ་བོ་ངྷི་སཏྭ་བྷྱཿགང་ཞིག་ཅུང་ཟད་ཡིད་ལ་དྲན་པས་ཀྱང༌།།དངོས་གྲུབ་ཐམས་ཅད་ད་ལྟ་སྩོལ་མཛད་པའི།།བློ་བཟང་གྲགས་དང་ཐུབ་དབང་སྤྱན་རས་གཟིགས།།འཁོར་བཅས་རྣམས་ཀྱི་འདྲ་འབག་དྲུང་ཉིད་དུ།།འཁོར་བའི་སྣང་ཚུལ་རབ་ཏུ་མཐོང་ནས་ནི།།ཚེ་འདི་ཉིད་ལ་སངས་རྒྱས་སྒྲུབ་འདོད་པའི།།བློ་བཟང་དོན་གྲུབ་ཅེས་པའི་བཙུན་པ་ངས།།དགེ་འཕེལ་རི་བོའི་རྩེ་ནས་འདི་སྐད་ཞུ།།སྔ་སོར་ཁྱེད་རྣམས་དྲུང་དུ་བདག་གི་སུ།།ཚེ་འདིར་གློ་བུར་བྱ་བ་ངན་པ་རྣམས།།སྤངས་ཏེ་སྙིང་ནས་དམ་ཆོས་སྒྲུབ་བྱེད་པའི།།ཡིད་ཀྱི་དམ་བཅའ་མང་པོ་བླངས་ན་ཡང༌།།ཚེ་འདིའི་འཁྲི་བ་ཕྲ་མོ་མ་ཆོད་པས།།ཡིད་དམ་བཅས་པ་རྣམས་ལས་ཅུང་ཟད་ཙམ།།འགལ་བར་གྱུར་རྣམས་བཤགས་པས་བཟོད་པར་མཛོད།།སླར་ཡང་ཁྱེད་རྣམས་དགྱེས་པ་བསྐྱེད་ཕྱིར་དུ།།ཚོགས་གཉིས་བསགས་པའི་དགེ་སློང་བློ་བཟང་བདག།དགའ་བདེ་ལྡན་པའི་ངང་ནས་འདི་སྐད་དུ།།ངོ་མཚར་ལེགས་བྱེད་གཏམ་འདི་འབུལ་བར་བྱ།།ད་ནི་ལོག་པའི་ལམ་དུ་འཁྲིད་པའི་རྒྱུ།།གཉེན་དང་འཁོར་གཡོག་གྲོགས་དང་ལོངས་སྤྱོད་དང༌།།ཚེ་འདིར་དོན་མེད་བྱ་བ་ངན་པ་རྣམས།། སྤངས་ནས་ཆགས་སྡང་མེད་པའི་དབེན་གནས་སུ།།ཐམས་ཅད་མཁྱེན་པའི་ལམ་དུ་འཁྲིད་པའི་རྒྱུ།།གཉེན་དང་འཁོར་གཡོག་གྲོགས་དང་ལོངས་སྤྱོད་དང༌།།བཅས་ཏེ་གཏན་གྱི་མདུན་མ་བསྒྲུབ་ཕྱིར་དུ།།ཆོས་ཀྱི་བྱ་བས་རྒྱུན་དུ་འདའ་ལགས་སོ།།ཞེས་དམ་བཅའ་མཛད་དོ།།ཡང་དུས་ལན་ཅིག་གི་ཚེ་རང་གིས་རང་ལ་བསྐུལ་བ་འདི་ལྟར་མཛད་དེ།སངས་རྒྱས་ལས་ཀྱང་དཀོན་པའི་གདམས་པ་མཆོག།རྙེད་པར་དཀའ་བ་རྡོ་རྗེ་ཐེག་པའི་ལམ།།ལམ་འདི་ཕྱིས་ནས་རྙེད་པར་དཀའ་བས་ན།། ཚེ་འདིའི་འདོད་ཡོན་ཐེད་ལ་བོར་མཛོད་ལ།།རྒྱལ་བས་བསྔགས་པའི་རི་ཁྲོད་སྟོང་བ་རུ།།བསེ་རུ་བཞིན་དུ་གཅིག་པུར་གནས་མཛོད་ལ།།ལན་ཅིག་མིན་པར་ཡང་ཡང་སྒོམས་ཤིག་ཨང༌།།དེ་ལྟར་བསྒོམས་པས་བློ་གྲོས་བཟང་པོ་ཁྱོད།།སྒྲུབ་པའི་རྒྱལ་མཚན་ཏོག་ཏུ་ཚུགས་ཤིག་ཨང༌།།ཁྱད་པར་ཕ་རྒྱུད་གསང་བ་འདུས་པ་དང༌།།རྣལ་འབྱོར་མ་རྒྱུད་འཁོར་ལོ་སྡོམ་པ་གཉིས།།འབྲལ་བ་མེད་པར་ལུས་ལ་སྟིམས་ཤིག་ཨང༌།།ཞེས་པའང་གསུངས་སོ།། 6/10 མདུན་ངོས། 上一页 4 5 6 7 8 9 下一页 尾页 |
